ǂAn i du go i?

Pristerga tae-e tempeli tawan ge xamanina gere ǂāhes khaoǃgâ ǀaob ǀkha gere dī?

MÂ KURIB hoaba gu ge pristerga Israels ǃnâ ǂgui xamanin ǁguibade gere dī tempeli altars ai. Jode xoa-aob Josephus ti ǀon hâb ge ge xoa, Pasxaǁâudīb tawa î ge 250 000 gūna ge ǁguibahe. Nēs ǃnâ-ū i ge ǂgui ǀaoba altars ai gere dâu. (Lev. 1:​10, 11; Num. 28:​16, 19) Nē ǀaob ǀkha î ge tae-e gere ī?

Ôaǃnâ-aogu ge Jesub ǁaeb ǃnâ Herodi ge om hâ i tempeli ǃnâ kai āba ge hō. Nē āb ǃnâ î ge ǀaoba gere dâu ǂgâ altarsa xu.

ǀGam xūna ǃgaoǃgâ re, ǁgau ra na mati î ge ǀaoba altarsa xu gere ǃanuhe ǀgauba:

• Altars ǃnaga ge hâ i ādi: Mishnahs ǃnâ ge hō-e altars kuruhe hâ ǀgaub ge ra ǁguiǃā ǀaob ra dâu ǀgauba. Nēs ge ǀhaoǀhaosa Jode ǂhanub ǃnâ ra hō-e. ǁNāpa i ge xoahe hâ: “Altars di suid-westes ǃnâ î ge ǀgam āra ge hâ i. ǁNā āra ǃnâ-ū i ge westes tsî suidesa xu ra hā ǀaoba gere dâu ǂgâ tsî ǁnāpaxu ǁgammi ǀkha ǀhao tsî Kidronsǃāb ǃnâ gere dâu ǂgâ.”

  Jode ǂhanub tsî ǁnaetigu xa hâ ǀoro ǂkhanis 200 kurib khaoǃgâ ge xoahes ge ǁkhā xū-e ge ǁguiǃā, ǃhūb ǃnāga i āra hâsa. ǂKhanis ge ra ǁguiǃā, mâ altars hoas ge ǀgam āra ǁhôas ǃnâ ūhâ isa. Tsî i ge altars ai hâ ǀaob tsî ǃanus ǃgao gere sîsenūhe ǁgammi tsîna ǁnā āra ǃnâ gere dâu ǁnâsa Kidronǃārob kōse.”

• Kai ǁgammi: Pristergu ge kai ǁgam-e ge ǂhâ hâ-i î gu altars tsî ǀao-i ra dâu ǃnâ ǃkhaiba ǃanu. Nē ǂhâǂhâsa ǁgaumâisa ǃamkuse dīs ǃaroma gu ge pristerga ǁgamme ge ǂhâ hâ i. ǁÎgu ge ǁgamme ǃāsa xu nî hō ge īs ge. ǁGammi ge altarsa ǃoa ǃhūb ǃnagaba xu gere hā, ǁgammi gere sâuǃnâhe xapa ga xu. Ôaǃnâ-aob Joseph Patrichi ge ge mî: “ǀNî hâ tempel-i ge ge ǀkhai i ǁnāti ī ǀgaub ǃnâ ge kuruhe hâ ī-e, î-i ǁgamme altarsa ǃoa dâu ǁkhā tsî ǀurixa ǁgamme ǀnî hâ ǀkhāba ǃoa dâu.”