Khomai-aon dîdi
Jehovaba ǀgūǁae mâ “ǂâisa” ǂhanub ǂgaeǂgui-aogu ǃnâ nî ǂgā?
Kai ǁgâiǀāb tsoatsoas xas ge ǂHaiǂhais 17:16, 17 sa ra mî: “Disi ǁnâgu hîats ra mûgu tsî ǀgurub tsîn ge ǀai-aosa nî ǁkhan; ǁîgu ge ūs hân hoana ūǀhana si tsî ǁîsa nî ǀōǀkhā kai. ǁÎs di ǁgansa ǂû tsî gu ge ǁîsa ǀaes ǀkha nî khauǃkhū. Elob ge ǁîgu di ǂgaogu ǃnâ ǁîb ǂâibasensa ǀguiǂâixase sîsenǂuis di ǂâisa ge mā, tsî ǁîgu di gaosisa ǀguruba ge mā.” Sida ǂkhanin ge ǃkharuge ǁaeb ǃnâ ge mî, Jehovaba ǂhanugu ǃnâ nē ‘ǂâisa’ nî ǂgāsa în ǂhomi ǂgomde dīkākā.
Xawe i ge ǀkharaǀkhara-e nî dīhe ge is ge. Nē “ǂâis” Jehovab ǂhanuga ǂgaogu ǃnâ nî ǂgās ge în “ǁîgu di gaosisa ǀguruba . . mā.” Nēs mati nî dīǀoaǀoahesa ǁnâuǃās ǃaroma da ge saora dîde nî ǃhaoǃgao.
Ham-e nē kēbos ǃnâ hâ? ‘ǀAi-aos’ Babilons kais ti a ǂansas ge ǂhumi ǂgomde ra ǂnûǁkhaeba. “ǀApa ǀgurub” ge United nationsa ra ǂnûǁkhaeba. Nē ǀapeǂhomis ge 1919 ge tsoatsoa în ǂkhîba ǃhūbaib ai hau. (J.ǂHa. 17:3-5) “Disi ǁnâgu” ge hoa ǂhanuga ra ǂnûǁkhaeba ǀguruba ra ǂkhâǃnâga.
Mâ ǃgaeǁaresa hâ ǀai-aos tsî ǀapa ǀgurub tsîn ǁaegu? ǀAi-aos ge ǀgurub ai ‘ǂnôa’. Tsîs ge nē ǀguruba ǂkhâǃnâ tsî ra ǂgaeǂgui ǂgao.
ǀAi-aos ǀkha i tae-e nî ī? ǀGurub tsî disi ǁnâgu tsîn ge “ǀai-aosa nî ǁkhan” tsî ǁnās ǀkha ūs hâ xūn hoana nî ūbē tsî hoa khoena nî ǁgau ǁîs a eloxoresa sa. ǁÎsan ge nî dīkākā, Jehovab ge mîmâi hâ-i khami. (J.ǂHa. 17:1; 18:8) Nēs ge ǂhomi ǂgomdi ǀamsa. Xawe ǁnās nî īs aiǃâb ge Jehovaba, ǁaede ī tama ge hâ-i xū-e nî dī kai khoesi ǂhanugu ǃoa.
Jehovaba tae-e ǁaede nî dī kai? ǁÎb ge nî ǃaroma î-i ǂhanuga ǁîb “ǂâisa” ūhâ, ǁnās ge “ǁîgu di ǀgaib tsî ǁkhāsiba ǀguruba” māsa, ǀnî mîdi ǃnâ United Nationsa. (J.ǂHa. 17:13) Nēs tae-e ra ǂâibasens xa ǂâiǃgâ. Khoesi ǂhanuga aitsâma nî mîǁgui în ǁîn ǀgaib tsî ǂgaeǂguis tsîna ǀguruba mā? Hî-î. Kēbos ge ra ǁgau, Elob ge ǁîna nēsa nî dī kai. (ǂKhm. 21:1; ǀgopeǀnō re Jesajab 44:28 sa.) Nē ǀkharaǀkharan ge ǁaeb ǀkha ī tide, nēs ge ǃkhaese nî ī. Tsîb ge ǀguruba hoase ǂhumi ǂgomde nî dīkākā.
Tae-e da a ǃâubasen ǁkhā? Tā da ge nî ǃâubasen ǂhôan nî ǁgausa, ǂhanugu nēsi United Nationsa ra ǁaeb ǀkha ra ǂkhâǃnâsa. ǃÂubasen ǁkhā da ge a: Jehovab ge nî īǁkhā kai î gu hoa ǂhanuga ǁîgu ǀgaiba United Nationsa mā. Nēs ga īo da ge a ǂan, kai ǁgâiǀāb ra tsoatsoasa. Hā re î da, “ǁnā-amaga a da tā ǁnâi naun khami ǁom, xawe a da ǂkhaikari . . hâ.” ǀGūǁaen ǃâubasen tama da hâ ǀkharaǀkharana nî hâ amaga.—1Tes. 5:6.