Jobi ǂkhanis ge ǁnamas ǀkha hui da ǁkhā

1-2. Jobi ǃnona ǀhōsagu tsî Elihub tsîkha mâ ǃgomsiga ra hōǃâ?

JOBI ge ǁîb ǃkhūsiba ǂoaǃnâ on ge ǁnā ǀkharib khoena hoana ge ǁnâu tae-i ge ǁîb ǀkha īsa. Khoegu ge Us ǃoa ge ī, î gu Joba sī ǁkhaeǂgao. ǁÎgu ǀondi ge Elifasi, Bildadi tsî Sofari tsîkha. Mû gu ge o tae-i ge Jobi ǀkha īsa o gu kaise ge ǃhuri.

² Mûnan-ai re tae-i ge īsa. Jobi ge kaise gere ǃoa, ǁîba ge ǀō-aisaba ī xūn hoanab ge ǂoaǃnâ o. ǁÎb gūn, goman, ǃgapiǃnaigu tsî donkin tsîn ge ǃnari-e tamas ka io ge ǃgam-e. ǁÎb ǀgôan tsî ǂgui ǃgān tsîn ge ge ǃgam-e. Oms ge ǁîn ai ǁā, on ge ǀgôana ge ǁō. Nēs ǂam-aib ge Joba kaise ge ǀaesen. ǁÎb ge tsûtsûsa ǀhapide hoa sorosi ge ūhâ-i. ǁÎb ǀhōsagu ge ǃnūseba xu ge mû, Jobi ge ǂkhabuǂâi hâse tsaob ǃnâ ǂnôa īsa. ǁÎga mati ge tanisen? ǁÎgu ge Jobi xōǀkhā ǂgui tsēde xū-e mî tamase ge ǂnû, matib ge ǃgoma gere tsâsagu ge mû xawe. (Job. 2:12, 13) Elihu ti ǀon hâ ǂkhamkhoeb tsîn ge Joba ge kōǃgâ tsî ǁîb xōǀkhā ge ǂnû. ǀAms aib ge Joba ge ǃhoa tsoatsoa, ǁîb ge gere ǁkhore ǁōb ga hâsa tamas ka iob ga ǃnaehe tama hâsa. (Job. 3:1-3, 11) Mûmûxaseb ge Joba huiba ge ǂhâhâ-i. Jobi ge ǁîb ǀhōsaga xu huiba ge ǂhâhâ-i. Nē khoegu ge ǃēsa ge ūhâ-i Joba ǁkhaeǂgao tsî ǁgausa ǁîb ǀkha gu ǁae hâsa. Hā re î da kō tae-e gu ge dīsa.

3. Tae-e da nē ǁkhāǁkhāǃâs ǃnâ nî ǃhoaǃgao?

³ Jehovab ge Moseba ge daoǁgau îb ǁnā 3 khoegu tsî Elihub tsîkha ge mî tsî a dī xūna xoa. ǂÂi-oa du ga ob ge Elihuba Jehovab ge mî kai bi xūna ge mî. Xawe Elifab ge īǁkhāsib ga hâ o demon gagab ge mî kai bi xūna ge mî. (Job. 4:12-16; 33:24, 25) ǁNā-amaga da ge Jobi ǂkhanis ǃnâ ǃgâi tamas ka io ǁgai ǀapemādi xa ra khomai. ǃGaoǃgâ da ge nî matis Jobi ǂkhanisa ǀhōsa-e da ga ǁnama ǂgao o nî hui dasa. Elifasi, Sofari tsî Bildadi aiǁgausa xu da ge nî ǁkhāǁkhāsen tae-e da mî tsî dī tidesa. Xawe Elihub aiǁgausa xu da ge nî ǁkhāǁkhāsen tae-e da mî tsî nî dīsa. Mû da ge nî tae-en ga Israelǁîna Jobi ǂkhanisa xu ǁkhāǁkhāsen hâsa tsî tae-e da sada tsîna ǁnāpaxu a ǁkhāǁkhāsen ǁkhāsa.

JOBI ǃNONA ǀHŌSAGU ǀAPEMĀS

4. Tae-i ǃaroma gu ge Jobi ǃnona ǀhōsaga ǁîba ǁkhaeǂgao ǁoa-i? (Ai-īsiba mû re.)

⁴ Elobmîs ge ra mî Jobi ǃnona ǀhōsagu ge ǁîba “tsâbaǁhao tsî nî ǁkhaeǂgaose ge ǀhao,” ǁîb ǀkha ge ī ǁai xū-e gu ge ǁnâu o. (Job. 2:11) Xawe ǁîgu ge Joba ge ǁkhaeǂgao tama hâ i. Tae-i ǃaroma? ǃNona ǃaromadi ge hâ. ǂGurose gu ge ǁîga Joba ge ǃgâ tama hâ i tsî ǁîb mâsib tsîna ge ǁnâuǃā tama hâ. Aiǁgause gu gere ǂâi, Jehovab ge Joba ǁkharasa dīb ge ǁoren ǃaroma.a (Job. 4:7; 11:14) ǀGamǁîse, ǁnā khoegu ge Joba gere mā ǀapemās ge ǁîba huioǃnâ, khoexaǃnâ tama i tsî kai tsûaǂgaoba ge ǃaroma. Nē ǃnona khoegu ǂhanuse ra ǀō mîde ge sîsenū xawe ǃgâi ǃgaoǃgaoba ge ūhâ tama hâ i. (Job. 13:12) Bildadi ge khoexaǃnâ tama ǀgaub ǃnâ Joba ge mîba kaiseb ra ǃhoa ti. (Job. 8:2; 18:2) Sofari ge Jobi mîdi “ǀgaisa ǂoab khami” ǀgui ī ti ge mî. (Job. 11:12) ǃNonaǁîse, ǁîgu ge Jobi ai ǃau tama hâ i xawe ǁîgu ge mî xūn tsî nēsa a dī ǀgaub ge ǁîba ǀnam-e tamab hâ khami gere tsâ kai. (Job. 15:7-11) Nē khoegu ge gere ǁgau ǂgao Jobi ge ǁoresa tsî gu ge ǁnās ǀkha ǁîba ǁkhaeǂgao tamas ka io ǁîb ǂgomsa ge ǀgaiǀgai tama hâ i.

5. Mâ ǀamǂoasa ge hâ Jobi ǃnona ǀhōsagu ǀapemāsa xu?

⁵ Elifasi, Sofari tsî Bildad hâ gu ge ǃhoa toa, ob ge Joba ǀnaib gere tsâs xa ǁaise ge tsâ. (Job. 19:2) Aiǃgû tsî gu ge ǂgari-ambi ǁai xūnab ra dīsa, ob ge gere ǁguiǃā ǀhapiob asa. ǁNâuǃāxa î ge a tae-i ǃaromab ge Joba gere ǁgau ǂgaosa, ǁîb a ǂhanu-aisa tsîb ge tae-i ǃaroma mî ǁoab a xūna gere mîsa. (Job. 6:3, 26) Jobi ǀhōsagu gere mî xūn ge Jehovab ǂâis ǃoagu ge hâ tama hâ i tsî ǁîgu ge Joba ge tsâbaǁhao tama hâ i. ǀAmǂoas ge ǁGâuab ge ǁîga gere sîsenū î gu Joba ǂkhabuǂâi kai. (Job. 2:4, 6) Israelǁîna mati nē ǃnaeǃkhaisa xu ǃgâiba ga ǀama hâ tsî sada mati ǁnāsa xu nētsē ra ǀama?

6. Israels ǃûi-aoga tae-e Jobi ǃnona ǀhōsaga xu ga ǁkhāǁkhāsen hâ?

⁶ Israelǁîn ga ǀama hâ ǀgaub. Jehovab ge Israeǁîna ǁîb ǁaes ase ǁhûi, ob ge ǃûi-aoga ge ǁgaumâi î gu khoena daoǁgau tsî hui în ǁîb ǂhanuga sao. (Deu. 1:15-18; 27:1) Nē khoegu ge ǀapemāde gu nî mās aiǃâ ǃgâise ǃgâ tsî nî ǀgoraǃgâ. (2Kro. 19:6) ǃNāsase ǂans ǃaroma gu ge dîn tsîna nî dî. (Deu. 19:18) Israels ǀapemā-aogu ge ǁîgu tawa ge huiba gere ôa khoena ǃgâi ǀgaub ǃnâ nî ǃhoa-ū ge is ge. Tae-i ǃaroma? ǀHūsasiba da ga ǁgau, os nēsa khoe-e ra ǂkhabuǂâi kai tsâ i ra ǀgauba mîsa xu. (Eks. 22:22-24) Nēn ge ǀnî xūn Israels ǃûi-aogu ga Jobi ǃnaeǃkhaisa xu ǁkhāǁkhāsen hâ ga.

7. Israels ǃûi-aoga xu xōǀkhā ham-i tsîna ǀapemāsa mā ǁkhā tsî matin ge Jobi ǃnaeǃkhaisa xu nî ǀama? (ǂKhoamîdi 27:9)

⁷ Israels ǃnâ ge hâ i ǃûi-aogu ge ǀapemādi ǀguite ge mā tama hâ i. Israels ǃnâ ge hâ i khoe-i ge ǁî-i ǀhōsa-e a hui ǁkhā î-i Jehovab ǀkha i ūhâ ǀhōsagusisa ǃgâiǃgâi. (Psa. 141:5) Ama ǀhōsan ge nē ǀgaub ǃnâ a hui gu ǁkhā. (Khomai re ǂKhoamîdi 27:9 sa.) Israelǁîn ga Elifasi, Sofari tsî Bildadi ge Jobi ǀkha ǃhoa ǀgauba ǂâiǃgâ hâ, os ge ǁnāsa ǁîna ga hui hâ în ǂan tae-en mî tsî dī tidesa.

8. Tae-e da nî ǂanbasen khoena da ga ǀapemā o? (Ai-īsiga mû re.)

⁸ Mati sida ǃgâiba nî ǀama? Xristeǁîn ase da ge sida ǃgâsan ga ǃgomsina hōǃâ, o ǁîna ra hui. Xawe ǁnāsa dīs ǃaroma da ge tā Jobi ǃnona ǀhōsagu ge tanisen tsî mî xūna nî ǁgae, o da ge sida ǃgâsana ǁkhaeǂgao hō tide. ǀApemāsa da nî mās aiǃâ da ge ǂgurose hoa amaba nî ǂan. ǀGamǁîses ge sida ǀapemāsa Elobmîs ai nî ǃgaoǃgaosa, Elifasi ge dīs khami ose. (Job. 4:8; 5:3, 27) ǃNonaǁîse da ge tā khoexaǃnâ tama xūna nî mî. ǂÂis ǃnâ ūhâ re, Elifasi tsî ǁîb ǀhōsagu tsîn ge mî xūn ge ge ama-i. Egab ge apostel Paulub tsîna ǁnā mîde ge sîsenū. (ǀGopeǀnō re Job. 5:13 tsî 1 Korinteǁîn 3:19 sa.) Xawe ǃnāsa xūn Elifasi, Bildadi tsî Sofari ge Elob xa mîn ge ge ama tama-i tsîs ge ǁnāsa Joba ge tsûtsû. Tsîb ge Jehovaba ge mî ǁîgu ge amaba mî tama hâ īsa. (Job. 42:7, 8) Nauna da ga ǀapemāde mā o da ge nî kōǃgâ î da tā ǁîna tsâ kai, Jehovab ǁîna ǀnam tama ti. Hā re î da ǃhoaǃgao tae-e da Elihub aiǁgausa xu a ǁkhāǁkhāsen ǁkhāsa.

ELIHUB GE JOBA ǀAPEMĀ ǀGAUS

9. ǁGuiǃā re Jobi ge tae-i ǃaroma huiba ǂhâhâ īsa ǁîb ǀhōsagu ge ǃhoa toas khaoǃgâ tsî Jehovaba nēsa mati ge ǁgau?

⁹ Jobi tsî ǁîb ǃnona ǀhōsagu ge ǂkhaba toas khaoǃgâ î ge mâsiba ge dawa. Jobi tsî ǁîb ǃnona ǀhōsagu tsîn ge gaxuse ge ǂkhaba, nēs ge Elobmîs ǃnâ 28 ǁaraǃādi ǃnâ hâ. Nēs ge ra ǁgau, ǁîgu ge kaise ǁaixa hâ īsa. ǁNâuǃā ǁkhā da ge a Jobi ge tae-i ǃaroma gere ǂkhabuǂâisa. ǁÎb ge noxoba ǁkhaeǂgaohe tsî mî-unubahesa ge ǂhâhâ i. Jehovaba mati Joba ge hui? ǁÎb ge Elihuba ge sîsenū îb ǀapemāhe. Elihuba tae-i ǃaroma ge ǃâu khoegu nî ǂkhaba toasa? ǁÎb ge ge mî, “tita ge ǂkham tsî sago ge kai, ǁnā-amaga ta ge ǃgôasib ǃaroma go ǃnō.” (Job. 32:6, 7) Elihub ge a ǂan ǁkhara khoen gaxuse ûihâ, ǃnāsa ǂansa ūhâ tsî ǂgui xūna ge ǃkharuǃnâsa ǂkhamkhoen xa. ǃNūǃnâxase Jobi ǀhōsaga ǃgâsa xub ge Elihuba ge ǃnō ǁoa-i. ǁNās ǀkhab ge ge mî: “ǂGui ûikuri tamagu ge gā-ai kai ra ga tamas ka io kairasis ǀgui tamas ge ǁnâuǃāba ra māsa.” (Job. 32:9) Saoraseb ge Elihuba tae-e mî tsî matib ge nēsa mî?

10. Tae-eb ge Elihuba dī Jobab nî ǀapemās aiǃâ? (Job 33:6, 7)

¹⁰ Elihub ge Jobab nî ǀapemās aiǃâ gere ǂhâba îb Joba ǃnomsa tsî ǂhomisase tsâ ǁîbab nî ǃgâs aiǃâ. Elihuba tae-e ge dī? ǂGurob ge aibe ǁîb tsâsiga ge ǃkhō-oa. Nēsa da ge a ǂan Elobmîs ra mî xui-ao, Elihub ge ǂgurose ǁaixa hâ īsa. (Job. 32:2-5) Nēs xa ǃaromahe hâseb ge Elihuba Jobi ǃoa ge khoexaǃnâ-i tsîb ge ǃnūǃnâxase Jobi ǀkha ama ǀhōsa-i khami ge ǃhoa. Aiǁgauseb ge Joba ge mîba: “Elob aiǃâ khom ge hoa khomma a ǀgui.” (Khomai re Job 33:6, 7 sa.) Tsîb ge Elihuba nēsa ge ǃgāsa kai ǁîb ǂōrisase Joba ra ǃgâsa. Jobab nî ǀapemās aiǃâb ge ǁîba Jobi gere mî ǂhâǂhâsa xūna gere ǁguiǃgâ. (Job. 32:11; 33:8-11) Elihub ge ǁnā xū-e ge dī Jobab ge ǁnama o.—Job. 34:5, 6, 9; 35:1-4.

11. Elihuba mati Joba gere ǁnama? (Job 33:1)

¹¹ Jobab gere mî-unuba ob ge Elihuba ǁîba ge tsâ kai ǂgao tama hâ i, xū tamab hâsa xaweb ge ǁîba nē ǂgomǂgomsa-aoba ǃgôasiba gere ǁgau. Aiǁgauseb ge Elihuba Jobi ǀonsa gere sîsenū nau ǃnona khoegu ge dī tama hâ īsa. (Khomai re Job 33:1 sa.) Elihub ge ǀnîsi ra ǂâihō matikōseb ge Jobi tsî ǁîb ǃnona ǀhōsagu gere gowa, o gere ǃhoa ǂgaosa tsîb ge Elihuba ǁîba ǃēsa ge mā ǁnamab gere ǁaeb ai îb ǃhoa. (Job. 32:4; 33:32) Elihub tsîn ge Joba gere ǂâiǂâiǃnâ tae-i ǃaroma i ge mî tsîb gere dī xūna ǃgâi tama īsa. Tsîb ge khoexaǃnâse ge ǂâiǂâiǃnâbi Jehovab gā-aisib, ǀgaib, ǂhanu-aisib tsî ǂgomǂgomsa ǀnammi xa. (Job. 36:18, 21-26; 37:23, 24) Elihub ǃgâi ǀapemādi ge Joba gere aiǂhomi îb Jehovaba xu nî hā ǃgāsa ǀapemāde ǃgâ. (Job. 38:1-3) Elihub aiǁgausa xūn mati ǂgurokham ǁaeb Xristeǁîna nî ǀama tsî sada nētsē mati ǁnāsa xu ra ǀama?

12. Jehovaba mati kēbo-aona ge sîsenū îb Israelǁaesa hui tsî Elihub aiǁgausa xūn ga ǁîna mati ǀama hâ?

¹² Israelǁîn ga ǀama hâ ǀgaub. Jehovab ge kēbo-aoga gere sîsenū î gu Israelǁîna ǁkhāǁkhā tsî ǁnama. ǂHanuǂhanu-aogu ǁaeb ǃnâb ge Jehovaba kēbo-aos Deborasa gere sîsenū îs ǁîb khoena daoǁgaude mā. Jehovab ge Samuela ǂkhamsisa xu ge sîsenū îb Israelǁîna daoǁgau. (ǂHǂh. 4:4-7; 5:7; 1Sam. 3:19, 20) Gao-aogu ǁaeb ǃnâb ge Jehovaba kēbo-aoga gere sîsenū î gu Israelǁîna daoǁgau, în ǁîba ǂhanu ǀgaub ǃnâ ǃoaba. Tsîn ga ǁnâuǀnamoǃnâ, ob ge kēbo-aoga gere sîsenū în mî-unuba-e. (2Sam. 12:1-4; ǃNǃkh. 3:24) Elihub ǃgâi aiǁgaus ge ǂgomǂgomsa-aogu tsî taradi tsîna ga hui hâ, khoe-en ra ǀapemā ǁaeb ai îs nēsa khoexaǃnâ ǀgaub ǃnâ dīhe.

13. Xristeǁîna mati nî ǂkhâǃnâ gu?

¹³ Sida a ǀama ǁkhā ǀgaub. Xristeǁîn ase da ge Elob ǂâis, Elobmîs ǃnâ ra hō-esa ra khoraǂui. ǂHanu mîde da ge ra sîsenū sida ǃgâsana ǂkhâǃnâs ǃnâ-ū. (1Kor. 14:3) ǀHaohâb ǃûi-aogu ge hoaǁae nî ǃûisen î gu khoexaǃnâ tsî ǀnamxaǃnâ ǀgaub ǃnâ ǃhoa khoe-i ga ǂâiǂhansen tsî mî ǁoa-i a xūna mî xawe.—1Tes. 5:14; Job. 6:3.

14-15. ǀHaohâb ǃûi-aoga mati Elihub khami nî ī khoe-e gu ga ǀapemā o?

¹⁴ Nē mâsib xa ǂâi re, ǀhaohâb ǃûi-aob ge ra ǂanǂui ǃgâsas ǀhaohâb ǃnâ ǂkhabuǂâi hâsa. ǀHaohâb ǃûi-aob tsî ǀnî hâ ǃgâsab tsîn ge ǁîsa ra sari ǂkhâǃnâs ǃaroma. Nē ǁgamǀhaos ǃnâs ge ǃgâsasa aiǃgû tsî ra ǁguiǃā ǁîs aoǁnâ sîsenni tsî ǀhaode ra hâǃnâ xawe ǂkhîba hōǃâ tamasa. ǀHaohâb ǃûi-aoba tae-e nî dī?

¹⁵ ǂGuroseb ge nî dītsâ îb ǃgâsas ra tsâǀgauba ǁnâuǃā. ǁNāsab ga dī ǂgao ob ge ǁîsa dîde dî tsî ǁîs ra mî xūna ǂōrisase nî ǃgâ. ǁÎs ge ǀnîsi Jehovab ǀnamsi tama tsîs xū tama ti ra tsâ. ǀNîsis ge ǁîs tsēkorobe ǂhâsigu xa ra ǂâiǂhansen. (Luk. 21:34) ǀHaohâb ǃûi-aob ge ǃēde ôa tsî ǁîs ra dī ǃgâi xūn ǃgao nî koasi. Aiǁgauseb ge ǁîsa nî koa ǀhaode hâǃnâ tsîs aoǁnâ sîsenni ǃnâ ra ǁhaosa, nēs ga supu tama i xawe. ǀHaohâb ǃûi-aob ga ǁîs mâsiba a ǁnâuǃāo tae-i ǃaromas ti ra tsâsa, ob ge Elobmîsa sîsenū tsî ǁîsa nî hui is ǂan Jehovab a ǀnamsi ǃkhaisa.—Gal. 2:20.

AIǃGÛ TSÎ JOBI ǂKHANISA XU ǃGÂIBA ǀAMA

16. Mati da aiǃgû tsî Jobi ǂkhanisa xu ǃgâiba nî ǀama?

¹⁶ Jobi ǂkhanisa xu ǁkhāǁkhāsens ǃnâ-ū da ge ǂgui ǃgâi xūna nî ǀama. ǃKharu go ǁkhāǁkhāǃâs Jobi xa hâs ǃnâ da ge go ǁkhāǁkhāsen, Elob ǃgomsina ra mā-amsa tsî mati da Jehovab ǃoagu ǂgomǂgomsase nî hâ ǀgarasa ǃgomsina da ga tsâ xawe. Nē ǁkhāǁkhāǃâs ǃnâ da ge go ǃhoaǃgao mati da hoa da ǃgâi ǀapemāsa mā ǁkhāsa Elihub ǃgâi aiǁgausa ǁgaes ǃnâ-ū, Elifasi, Sofari tsî Bildadi hâ gu di aiǁgaus ose. ǀNîsi du ge Jobi ǂkhanis ǃnâ hâ ǁkhāǁkhāǃâde a ôaǃnâ ǁkhā khoe-e du nî ǀapemās aiǃgâ. Jobi ǂkhanisa du ga noxopa ôaǃnâ tama io du ge ǁnāsa nēsi a dī ǁkhā. Mûǂan du ge nî mati du nētsēs tsîna ǃgâiba a ǀama ǁkhāsa ǁnā ǂkhanisa xu.