Jehovab di ǀHûǀguitimî-aona tae-i ǃaroma toroba ǃoa ī tama hâ?
Jehovab di ǀHûǀguitimî-aon ge sao ra ǃaroma di ǃgao. Toroba ǃoa ī tama hâ:
Eloba ǁnâuǀnams. Elobmîs ge ra mî, ǁîb ǃoaba-aon ge “gôagu âna nîra ǃhūǃkhāxū kai” tsî “torodīsa ǁkhāǁkhāsen tide.”—Jesajab 2:4.
Jesuba ǁnâuǀnams. Jesub ge apostel Petruba ge mîba: “ǂGā-oa sa gôaba ǁîb di ǃkhais ǃnâ; gôaba ra ū-i hoa-i gôab ǀkha nî hîǀhuruhe xuige.” (Mateub 26:52) Nēs ǃnâ-ūb ge Jesuba ge ǁgau. ǁÎb saosaben toro-i ǃaroma gôa-e ūkhâi tidesa.
Jesub ǁkhāǁkhāsaben ge ǁîb mîmāsa ra ǁnâuǀnam mî rasa “ǃhūbaiba xun ǁîna hâ tama.” Nēs ǃaroman ge ǂgīǂgōsi ǁaxasigu ǃnâs tsîna ǃâ tama hâ. (Johaneb 17:16) Torogu ǃnân ge ǀkha-e ǁhûi tama hâ. Tsî ǁnān hîna torob ǃnâ ǃân tsîna mâǃoa tama hâ.
Nau khoena ǀnam. Jesub ge ǁîb di ǁkhāǁkhāsebana ge mîmā în “ǀnamgu.” (Johaneb 13:34, 35) ǁÎn ge ǃhūbaib ǂhawasen hâ, xawe a khoeǃgâgu. ǁNā-amagan ge torob ǃnâ ǃâ tama hâ.—1 Johaneb 3:10-12.
ǂGuro ǁaeb Xristeǁîn aiǁgaus. Encyclopedia of Religion and Wars di ǀon hâ ǂkhanis ge ra mî: “ǂGuro ǁaeb saosaben Jesub din ge torogu ǃnâ ge ǃâ ǂgao tama hâ i. ǁÎn ge nē xūna Jesub ge mîmā nî ǀnammi ǀkha ǃgûǀhao tama. Tsî ǂhanuoǃnâsiba ra aiǃgû kai xūn ase gere mû.” Peter Meinholdi Germanib dib hîna Elob tsî ǂgom ǀgauga ra ôaǃnâb. Tsîn ge ǂguro ǁaeb ǁkhāǁkhāsaben Jesub din xa ge mî: “Xristeǁî tsî torob ǃnâ ǃâs ge ǀgam xūn hîna ǃgûǀhao tamana.”
ǀHaohâsiba huis
Jehovab di ǀHûǀguitimî-aon ge ǃgâi khoen hîna ǀhaohâsiba ra huina. Tsî ǃgomsina ǃhūgu hînan da hâǃnâgu ǃnâ ǃaroma tama hâ. ǂHanuba da ge ra ǁnâuǀnam, Elobmîs da mîmāda khami:
“Mâ-i hoa-e a-i ǂamkhoega ǃnaga hâba.”—Romeǁîn 13:1.
“Kaesara ǁnâi mā Kaesari di-e, tsî Eloba Elob di-e.”—Mateub 22:21.
Nēs ǃoagu da ge ǂhanuba ra ǁnâuǀnam. Tsî sida ǀkhaba ra hau tsî ǂhanub ǀkha ra sîsenǀhao. ǀHaohâsiba ǃnōrasase ūhâs ǃnâ.