Jehovab di ǀHûǀguitimî-aona ǃgamme ǀgoras xa mati ra tsâ?

Elobmîs ǃgammeb tsî ǀgoras xa ra mā daoǁgaude da ge ra sao. Elob ge ǃgammeba khoe-aogu ra ǀamose nî ǃgaeǀhao xū-i ase ge ǂguiǂgā. Elobmîs ge ra mî ǀaib ǀguib ǃgammeba a khôa ǁkhā di.​—Mateub 19:5, 6, 9.

ǀHûǀguitimî-aona ǃgomsina ǃgammeb ǃnâ ra hōǃgâ khoena hui i ra?

Î, ǃkharagagu ǀgaugu ǃnâ:

• ǂKhanin. Nē ǂkhanin ge ǁaeba xu ǁaeb ǀkha ǃgammega a omkhâi ǁkhā ǃâga ra ūhâ. ǀGoras ams ai mā ǃgammegu tsîn ge nē ǃâgu xa a huihe ǁkhā. Aiǁgause, “Maintaining Commitment in Your Marriage,” “How to Forgive,” tsî “Rebuilding Trust in a Marriage” di hâ khomai ǃâga mû re.

• ǀHaodi. ǀHaohâb, ǂharis tsî ǀkharib di kai ǀhaodi tawa da ge Elobmîsa xu hâ ǀapemādi hîna ǃgammeb ǃnâ a sîsen-ūhe ǁkhā de ra ǃhoaǃgao.

• ǀHaohâb ǃûi-aogu. ǀHaohâb ǃûi-aogu ge ǃgamme hâ khoena Elobmîs ǃnâ hâ xoadi xa a ǂâiǂâi ǃnâ ǁkhā, aiǁgause Efeseǁîn 5:22-25 khami.

ǃGamme ǀgorasa mā-ams di aiǂhanuba gu ǀhaohâb ǃûi-aoga ūhâ?

Hî-î. ǀHaohâb ǃûi-aogu ga ǃgomsina ǃgammeb ǃnâ ra hōǃgâ khoena huis ǃgao a ǂgaihes tsîna gu ge nē khoena a mîba ǁoa tae-en nî dīsa. (Galateǁîn 6:5) Xawe Elobmîs ai ǃgaoǃgaosa tama xū-i ǃaroma ra ǀgora khoe-i ge tā ǁkhawa nî ǃgamme.​—1 Timoteub 3:1, 5, 12.

ǀHûǀguitimî-aona ǁaeroba hâ ǀgorasa mati ra mû?

Elobmîs ge ra mî în ǃgamme hâ khoena mâsib ga ǃgâi tama i xawe ǀguiba hâ. (1 Korinteǁîn 7:10-16) ǂGaoba xu ǀgore, Elobmîs tsoatsoade sîsen-ū tsîn ga ǀnamma a ūhâbagu o, on ge ǂgui ǃgomsina a ǀam kai ǁkhā.​—1 Korinteǁîn 13:4-8; Galateǁîn 5:22.

Xawe kaise ǁkhōǁkhōsa mâsigu hîna nē ra mîhe gu ǃnân ga ǃkharu o, on ge Xristeǁîn ǀnîna ǁaeroba ra ǀgora:

• Marisise ǂkhâǃnâ-e tama is.​—1 Timoteub 5:8.

• Kaise ǂnau-es.​—Psalmdi 11:5.

• Gagasi ǁkhōǁkhōsasib. Aiǁgause, ǃgame i hâ khoe-i ge Jehovab ǁgaraga khôasa ra ǂgān tsî i ge nē khoe-i ǀkha ǃgamme hâ Xristeǁî-e a mîǁgui ǁkhā ǀgoras ǀguis ge nî īǁkhā kai Eloba i nî ‘khoen ǃgâ-ai ǁnâuǀnam ǃkhaisa.’​—ǃNaeǃkhaidi 5:29.