ǂGui ǃgâi xūna ta ge Jehovaba xu ge hō ǃgâi aiǁgaude xu ta ge ǁkhāǁkhāsen amaga

Tita ge Quebek di ǀon hâ ǃās ǃnâ ge ǃnae. Frans gowab ra ǃhoa ǃnâ-e Kanadian ǂharis Quebeki dis ǃnâ. Ti ǁgûra Louis tsî Zéliab tsîra ge ǀnamma ūhâ omaris ǃnâ ge kaikai te. Ti ǁgûb ge kaise ge taoxa i khoeba tsî khomais xa kaise ge ǃgâibehe i. Tita ge xoas xa kaise ge ǃgâibahe i tsî gere xoa-ao kai ǂgao.

12 Kurixa ta a hîna kha ge Rodolphe Soucy ti ǁgûb sîsenǁare-aob tsî ǁîb ǀhōsab tsîkha sida omsa ge sari. ǁÎkha ge ge Jehovab di ǀHûǀguitimî-ao i. Tita ge xū-e ǀHûǀguitimî-aon xa ge ǀū i tsî nē ǂgoms ǃnâ ǃgâiǃgâibasensa ge ūhâ tama hâ i. Xawe ta ge ǁîn di ǃgâi ǀgaub hînan hoa dîde Elobmîsa xu ra ǃeream ǀgaub dis xa ge ǃgâibahe i. Ti ǁgûra tsîn ge nēs xa ge ǃgâibahe i tsî da ge Elobmîs ǁkhāǁkhāsa ge ūǃoa.

ǁNā ǁaeb ai ta ge Katolik kerkheb di skola ǃoa gere ī. ǀNî ǁaen ai ta ge ti ǃgubis ǀgôan ǀkha ti Elobmîs ǁkhāǁkhās dawa ta gere ǁkhāǁkhāsen xūn xa gere ǃhoa. Prister ge ī ǁkhāǁkhā-aogu ge ega a ǂanǂui xawe. Elobmîsa sîsen-ū tsî mîn da xūna ǂkhâǃnâs xan ge ǀgôan aisi gere mîǃharade. Nēs ge kaise ǁgâise ge tsâ kai te xawe ta ge ge mûǂan skoli ǁkhāǁkhā-aon hîna ge prister in ge Elobmîs ǀkha ǀgau tama hâ isa. Mûǂan ta ge ge ǁnāba ta hâ titesa. Ti ǁgûra di mā-ams ǀkha ta ge ǀnîhâ skola ǃoa ge doe.

AOǁNÂ SÎSENNA ǀNAMSA ǁKHĀǁKHĀSENS

Elobmîs ǁkhāǁkhās ǀkha ta ge ge aiǃgû xawes ge ti gagasi kaisa kaise ge ǂau i omsa xu oms ǀkha aoǁnâ sîsen-e dīsa ta gere ǃao amaga. Katolik kerkheb ge kaise ǀgaisa sîsenǂûiba ge ūhâ i tsî aoǁnâ sîsenna gere mâǃoa. Maurice Duplessis ǂgīǂgōsi ǂgaeǂgui-aob Quebeki tib ge kerkheb ǀkha ǀguiba gere sîsen ǀhao. ǁÎb di huib ǀkhan ge kerkheb ǁanina ǀHûǀguitimî-aona gere saoǃgon. Kai ǁkhoaǂgaosiba da ge ge ǂhâ hâ i ǁnā ǁaeb ai aoǁnâ sîsen-e dīsa.

ǃGâsab hîna ge tita a huib i ta aoǁnâ sîsen-e ta ge ūba hâ i ǃoaba xu ǀgorab ge Johaneb Raeba khoeseǁî Gilead skoli ǃnâ ge ǃâ i ba. Johaneb hîna ge ǃnâsa ǂansa ūhâ îb ge ge tsâmtsîǃnâ tsî supuse ge ǃhoa-ūhe ǁkhā i. ǁÎb ge hoaǁae ge ǁnama te tama hâ i xawe ǁîb di ǃgâi aiǁgaus ǀkha gere ǁkhāǁkhā te. Johaneb ge Frans gowaba ǃgâise ge ǃhoa ǁoa i. Nēs ǃaroma ta ge hoaǁae ǁîb ǀkha aoǁnâ sîsenni ǃnâ gere ǂoa tsî gowab ǀkha gere hui bi. Johaneb ǀkha hoaǁae sîsens ge ge hui te i ta mîǁgui Jehovab di ǀHûǀguitimî-ao kaisa. Disi kuriga ǀHûǀguitimî-aon ǀkha ta ǀhao hâ hîna ta ge 26 Meib 1951ǁî kurib ǃnâ ge a ǁāǁnâhe.

Sida ǂkhari ǀhaohâb hîna Quebeki ǃnâ ge hâ îb ge ǃnāsase aimâba-aon xa ge ǀoahe hâ i. ǁÎn di ǃgâi aiǁgaus ge tita ge ǂkhâǃnâ i ta aimâba-ao kai. ǁNā ǁaeb ai da ge omsa xu oms ǀkha gere aoǁnâ Elobmîs ǀguisa ra sîsen-ūse. ǂKhanin ōse da ge Elobmîsa ǃgâise nî sîsen-ū ge is ge. Nēs ǃaroma ta ge gere dītsâ Elobmîsa ǃgâise ǂansa i ta amaba ǁkhauba ǁkhā. Xawen ge ǂguina gere ǂkha Elobmîsa xu khomaisa Katolik kerkheb mā-ams ōse.

Simone Patrysas ǂgomǂgomsa ǃgâsasa ta ge 1952ǁî kuri ge ǃgame. Montrealsa ǃoam ge ge doe tsî kurib ǃnâ sim di ǀgôas Lises ǀkha ge ǀkhaehe. ǃGamem nîs aiǃnâ ta ge aimâba-ao sîsen-e a ǀû xawem ge tita tsî Simone hâma ǀguiǃgupu ûiba ūhâsa gere dītsâ. Nēs ǀkham ge ǀhaohâb tsî aoǁnâ sîsenni tsîn ǃnâ hoaǁae ge ǁhao ǁkhā i.

Disi kuri gu ge ge ǃkharu tita ge ǁkhawa aimâba-ao kais xa a ǂâi tsoatsoas aiǃâ. 1962ǁÎ kurib ǃnâ ge Kanadab Betels tawa hâ i Gaosib aoǁnâ-aogu skola ta ge ge ǁhaoǃnâ. ǃGâsab Camille ǀkha da ge ǀgui kamers ǃnâ ge hâ kaihe. Camilleb di ǁkhoaǂgaosib aoǁnâ sîsenni ǃnâb ge ūhâ îb ge ge tsâǀkhā te. ǁÎb ge ǃgame tsî ǀgôan tsîna ge ūhâ i. ǁNā ǁaeb ai i ge ǀgôana ūhâ ǁgû-i hîna ra aoǁnâ-e Quebeki ǃnâ ge ǀkhai i. Xaweb ge Camilla nēsa gere dītsâ. ǀGuiba khom ge hâ i ǁaeb ǃnâb ge ge ǂkhâǃnâ te i ta nēs xa ǂâiǃgâ. ǁKhâba ǃkharu tsî ta ge ge mûǂan ǁkhawa ta ǁnaetisa aimâba-ao kai ǁkhā ǃkhaisa. ǀNîn ge ti mîǁguiga gere dîǃnâ xawe ta ge nēs ǀkha ge aiǃgû. Jehovab ti mîǁguiga nî ǀkhae ǃkhais ǃnâ ta ge ǂgomǃgâsiba ūhâ i amaga.

ǀŌ-AISA AIMÂBA-AOSE QUEBEKA ǃOA OAS

1964ǁÎ kurib ǃnâm ge Simone hama ǀō-aisa aimâba-aose kai ǃnâm ge ǃās ǃnâ ge ǁgaumâihe. Nēbam ge ǁnābaxū ra sao kuriga ge sîsen. Nē ǁaeb aib ge aoǁnâ sîsena ge ǃgâi i xawe da ge noxoba ǃgomsina gere hōǃnâ.

ǀGui satertaxtsē kam karab ai ta ge Sainte-Maries Quebeka xu ǃnū tama hâ ǃāros ǃnâ ǃkhōsis ǃnâ ge a ūhe. ǀApaǃnami ge ǃkhō-omsa ǃoa ī ū te tsî ǃkhōsis ǃnâ ge ǂgānam ǂgāde omsa xu oms ǀkha ta gere aoǁnâ amaga. Ega ta ge Baillargeon di ǀon hâ ǂhanuba ǃoa ge ī ūhe. ǁÎb ge ham-e a ti ǂnûǁkhaeba-ao ti ge dîde. Glen Howa di ǀon hâ ǂanǂansa ǀHûǀguitimî-ao ǂnûǁkhaeba-aob tita ge mî ob ge ǃao rase ge mî: “Ae hî-î ǁîb ose.” Glen Howb ge kaise a ǂanǂansa ǃgâi ǂnûǁkhaeb-aob ǀHûǀguitimî-aon diba. Mîbahe ta ge ge ti ǃoagu ge hâ i ǁhōb ge a ǂgae-oahe ǃkhaisa.

Quebeki ǃnâ da gere hōǃâ mâǃoas ge ge re ǃgom kai ǃamku ǃkhai-i ǀhaode da nî ūhâ ǃnâ e hōsa. Sida di ǀhaohâb ge kaise ǂkhari ǃkhaiǃnâ omros ǀguisa ge hō ǁkhā i. ǀGama kaise i ga ǃkhai o hōs ǃaroma gu ge ǃgâsaga oli-i ǀkha ra sîsen ǀgamǀgam-ūdasa gere sîsen-ū. ǀHaos nî tsoatsoas aiǃân ge nē ǀgamǀgam-ūdas ǂnāmipe gere ǂnû tsî ǂkhâǃnâ ra xūn hînan ge ǃkharu ǃnâna gere ǁgambagu.

Kaise i ge ǃgâi mûsa matib ge aoǁnâ sîsenna kurigu ge ī khami a aiǃgûsa. 1960ǁÎ kurigu ǃgâgu ge ǀoro ǀhaohâga Quebeki ǃnâ ge hâ i Côte-Nordi tsî Gaspé Peninsulab tsîn ǃnâ. Nētsē kha ge ǀgam ǃnârimâ ra mûǂam-aoga nē ǂharis ǃnâ hâ tsîn ge ǃgâsana îsa Gaosib ǀHû-ommgu ǃnâ ra ǀhao.

ǁKHAUǂÛIS ǃNARISARIMAS SÎSENNI ǃAROMA

1970ǁÎ kurib ǃnâm ge tita tsî Simone hamma ǃnarima ra mûǂam-aosis sîsen-e ǃoa ge ǁkhauhe. ǁNāpaxum ge 1973ǁî kurib ǃnâ ǂkharis sîsen-e ǃoa ge ǁgaumâihe. ǁNa kurigu ǃnâ ta ge kaise ǂgui xūna ǃgâsakha Laurier Saumurib tsî David Splanec hâkha xu ge ǁkhāǁkhāsen. Mâ ǂharis ǀhaodi hoadi khaoǃgâ khom ge tita tsî ǃgâsab Davib hâkhoma mati khom sikhom di aoǁnâ sîsenna a ǃgâiǃgâi ǁkhā ǀgaus xa gere ǃhoa. ǂÂi-oa ta ge ra ǀgui ǁaeb ge Daviba a mîba te xu-e: “Léonce, kaise ta ge sa ǀuniga ǃhoas xa go ǃgâibahe i. ǃGâi go i xawe ta ge tita ǃnona ǃhoade ǁnā ǃâs hoasa xu ga kuruǂûi hâ.” ǂGui xūna ta ge ǃhoadi ǃnâ ǂgāsa ge ǁnaeti hâ i. ǀGui ǃgupu ǀgaub ǃnâ xūna dīsa ta ge nî ǁkhāǁkhāsen ge is ge.

ǂHaris mûǂamaogu ge ǃnarimâra mûǂam-aoga ǂkhâǃnâsa gere ǂganhe. Quebeki ǃnân ge ǂgui aoǁnâ-aona ge ǂan te i. ǁÎn ge ǂharisa ta gere sī sari o, o aoǁnâ sîsenni ǃnâ ti ǀkha gere sîsen ǂgao. ǁÎn ǀkha sîsens ge kaise ge ǁkhoaxa i xawe ta ge nēs ǃaroma !narimara mûǂamaob ǀkha ge sîsen ǁoa i. ǀGui ǃnâs aib ge ǀnamxaǃnâ !narimara mûǂamaoba ge mîba te: “ǃGâsan ǀkhats ǁaeba ra ūhâ xawe tā ǀuru re tita saris amsis tsînats go hāsa. Tita tsîn ge ǂkhâǃnâ-esa ǂhâ hâ.” Nē ǃgâi ǂkhâǃnâs ge ge hui te i ta ǀnōsa mûǂûiba ūhâ.

1976ǁÎ kurib ǃnâ i ge kaise ǁgai xū-e ge i. Ti ǀnamǀnamsa kaikhoes Simones ge ǃâubasen tama ta hâ hîna ǀaesen tsî ge ǁō. ǁÎs di māsenxa gagab tsî ǀnammi tsîn ǃaromas ge ǁîsa ge ti ǃgâi ǀhōsa i Jehovab ǃoabas ǃnâ. Aoǁnâ sîsenni ǃnâ hoaǁae ǁhaos ge ge hui te i ta tā kaise ǃoa. Jehovaba ta ge kaise ra gangan nē ǁaeb ǃnâb gere mā te huib ǃaroma. Ega ta ge Carolyn Elliottsa ge ǃgamme. Māsenxa ǀapaǃaogowaba ra ǃhoa aimâba-ao ǃgâsas hîna Quebeka ǃoa nēbas nî ǃoaba ga ge hāsa. Carolyns ǀkhan ge khoena supuse a ǃhoa ǁkhā tsî ǁîs ge khoen ǃnâ ǃgâiǃgâibasensa ge ūhâ i ǃgōsase ǁnân hîna taoxa tsî ra ǀguritsâsen na. ǁÎs ge titas ge ǃnarimas sîsenni ǃnâ a ǁhao o, o kai huib ase ge i i.

KAISE ǂHÂǂHÂSA KURIB

Januarib 1978ǁî kuri ta ge aimâba-aon skola ǃoa ge ǁkhauhe Quebeki ǃnâ. Kaise ta ge gere ǃaoro nē skola ta ge noxoba ǁhaoǃnâ tamas ka io ǂkhanin tsîna sîsen-ū tsâ tama hâ i amaga. Kaise ge ǃgâi is ge ǂguro ǁkhāǁkhās hîna ta ge mās ge ǂgui xūn hînan ge aimâba-aona a ǃkharu ǃnâna ge ǃkhōǂgā hâ i. Tita gere ǁkhāǁkhā xawe ta ge kaise ǂgui xūna nau ǃgâsana xū ge ǁkhāǁkhāsen.

Egas ge “Victorious Faith” di hâ xoaǂamsa ūhâ ǃHūbaib ǂhawase hâ ǀkharib kai ǀhaosa 1978ǁî kurib ǃnâ Olympik Stadiumi tawa ge hā i. Nē ǀhaos ge ge kaise kai ǀhao i hîna Quebeki ǃna ǂguro ǃnās ase ge hâ isa. Nēban ge 80 000 khoena ge hâ i. ǂGān-e ta ge ge i da ǂhôan departaments ǃâb ǀkha sîsenǀhao. ǂGui ǂhôa-aon ǀkha da ge gere ǃhoa tsî ǂgui ǃgâi xūn hînan ge sada xa a xoan xa ge ǃgâibahe i. ǁÎn ge sida ai-īsiǂhôaǂgares tsî ǂhôaǂgares tsîn ǃnâ-ū 20 îrga ge ǃhoa-ū. Kaise ǃgâi aoǁnâs ge ge mā-e.

ǀASA ǁGAUMÂIS ǀNÎHÂ GOWAB DA ǃHOA-E ǂHARIS ǃNÂ

Kai ǀkharaǀkhara i ge 1996ǁî kurib ǃnâ ge hâ. ǁĀǁnâhe ta ge sa xu ta ge Frans gowab da ǃhoaǃnâ-e ǂharis Quebeki dis ǃnâ gere sîsen. hîna ta ge ǀapaǃaogowab ra ǃhoa ǃnâhe ǂharis Torontos disa ǃoa ge sīhe. Kaise ta ge gere ǃao ǃhoade nē gowab ǃna māsa ǀapaǃaogowaba ta ge ǃgâise ǃhoa ǁoa i amaga. ǀGaisase ǀgore tsî ta ge Jehovab ai gere ǂgomaiǂnûi.

Kaise ta ge gere ǃao nē ǂharis ǃna da ge sîsen tsoatoa o xawe ta ge nēsisa ǀgam kurikha Toronto ǂharis ǃnâ sîsensa xu ǂkhîba ra ǀama. Carolyns tsî ǃgâsan tsîn ge kaise ge hui te nē gowaba ǃgâise ǃhoas ǀkha. ǂGui ǀasa ǀhōsanam ge ǃhaese ge kuru.

Wekheb ǃnâ ge hâ i ǂharis ǀhaos amsi ge hâ i aiǂhōmisen ǁaeb ǃnâ ta ge fraitaxtsē kham karagu ai omsa xu oms ǀkha gere sîsen. ǀNîn ge ǀnîsi gere ǂâi tae-i ǃaromats ǂharis ǀhaos ǁaeb ǃnâ aoǁnâ sîsenni ǃnâ ra ǂoa di? Xawe ta ge ǃgâi ǁgamǀhaode aoǁnâ sîsenni ǃnâ ūhâs xa ge ǃgâibahe i. Nēsis tsîna aoǁnâ sîsenni ǃnâ ǁhaos ge tita ǃgâise ra tsâ kai.

1998ǁÎ kurib ǃnâm ge tita tsî Carolyn hâma Montrealsa ǃoa aimâba-aon ase ge sî-oahe. Kurina da ge ǀhaohâb trollies sîsenna gere muǂam tsî ǂhôan Departamets ǀkhas tsîna gere sîsen în tā khoena ǃgâi tama xūna Jehovab di ǀHûǀguitimî-aon xa ǃhoa. Carolyns tsî tita tsîn ge nēsisa Kanadaba ǃoa ra sari khoen hîna ǃgâi ǂgaoga Elobmîs ǃoa-ai ūhâna aoǁnâbas xa a ǃgâibahe.

68 Kurigu hina da Jehovaba ǃoaba hâ gu ǃoa ta ga kō oa o, o ta ge kaise ǀkhaesase ra tsâ. Aoǁnâ sîsenni ǃnâ ǂkhîba hōs, nau khoena huis în amaba ūǃoas ge ti ǃaroma kaise a ǂhâǂhâsa. ǁAe-i khaoǃgâs ge ti ôas tsî ǁîs kaikhoeb tsîna omarisa ge kai kai tsî ǁnās khaoǃgâ ge aimâba-ao kai. ǁÎsa aoǁnâ sîsenni ǃnâ ôasase mûs ge kaise ge ǂkhî kai te. Tita ge Xristeǁîn hîna ǁîn ǃgâi aiǁgaudi tsî daoǁgaudi tsîn ǀkha ra hui te na saos xa a ǃgâibahe gagasise kais tsî Jehovaba ǃoabas ǃnâ ǃkharagagu xūna dīs ǀkhan ta hui te amaga. Mûǂan ta ge ge ǁgaumâidi ǃnâ ǂgomǂgomsase hâs ǃaroma da ge Jehovab ai nî ǂgomaiǂnûi. (Psa. 51:11) Jehovaba ta ge kaise ra gangan aiǂhanub ǁîb ǀonsa koas tib hînab ge māteb ǃaroma.—Psa. 54:6.