ǂKhamkhoedo, ǁāǁnâs khaoǃgâ ǃnāsa-e dī re

1. Mâ ǃgâi xūnan ǂgui ǂkhamkhoena ǀnai sīǃnâ hâ?

MÂ KURIB hoaba i ge ǂgui ǂkham Xristeǁîna ra ǁāǁnâhe. Sadu tsîna nēsa ge dī? ǁNāsa du ge dī, amaga i ge sadu di gagasi ǃgâsana kaise a ǂkhî. Tsîb ge Jehovab tsîna ǁnās ǃaroma a ǂkhî. (ǂKhm. 27:11) ǂÂis ǀguisa hî re matikō ǂgui xūna du ǀnai sīǃnâ hâsa. Aiǁgause du ge kurina Elobmîsa ǃgâise ǁkhāǁkhāsen hâ. Nē ǁkhāǁkhāsens ge ǂgomǃgâsiba ra mā du, Elobmîs a Elob di mî ǃkhaisa. ǁNās ǂamai du ge Elobmîs di xoa-aoba ǂan tsî ǀnam tsoatsoa hâ. ǁNā ǀnammi hîna du ūhâb ge kaise kai hâ. Tsî du ge ǁnās ǀkha nēsi a ǁāǁnâsa ǃoaba-ao, kaise du ge ǃgâi mîǁguiba dī hâ.

2. Tae-e da nē ǁkhāǁkhāǃâs ǃnâ nî ǃhoaǃgao?

² ǁĀǁnâhe du nîs aiǃâ du ge ǃgomsina ge ūhâ i. Hîna gere ǃgomǃgomna, î du ǂgomǂgomsase Jehovab ǃoagu hâ. Xawe du ra kai khami du ge ǃnāsa ǃâitsâ ga nî hōǃâ. Satanni ge nî dītsâ, îb sadu ǀnammi Jehovaba du ūba hâba ǂkhabuǂkhabu. Tsî ǁnās ǀkha nî ǂgaebē du î du tā ǁîba ǃoaba. (Efe. 4:14) Tā du ge ǁnāsa nî mā-am. Tae-e a hui du ǁkhā î du ǂhauǃnâse, Jehovab ǃoagu hâ tsî sadu māǁnâsensa dīǀoaǀoa? Aiǃgû tsî du ge gagasise nî ǀgai. “ǁGūba” du ge nî Xrsiteǁî-i ase kaisa. (Heb. 6:1) Xawe mati du ǁnāsa dī ǁkhā?

MATI DU XRISTEǁÎ-I ASE A AIǃGÛ ǁKHĀ?

3. Tae-en hoa Xristeǁîna nî dī, ǁāǁnâhe toan gas khaoǃgâ?

³ ǁĀǁnâs khaoǃgâ da ge sida tsîna apostel Paulub ge, Efeses ǃnâ ra hâ ǃgâsana a mā ǀapemāsa nî sao. ǁÎb ge ǁîna ge ǂkhâǃnâ în ‘ǀoasa kaikhoesisa’ Xristeǁîn ase ūhâ. (Efe. 4:13) Tsî ǁnās ge ra ǂâibasen în ‘aiǃgû tsî gagasise ǀgaiǀgaisen.’ ǁNâuǃā ǁkhā da ge a tae-i ǃaromab ge Pauluba gagasise kaisa, ǀgôa-i di kais ǀkha a ǀgopeǀnōsa. ǀAsase ǃnae hâ ǀgôa-i ge kaise ǁgûn xa a ǀnam-e. Xawe i ge ǁî-e ǂkharirose ǀgui ǀamose a hâ ǁoa. ǁAeb ra ī khami i ge ‘ǀgôasis xūna nî ǀû.’ (1Kor. 13:11) ǁNās tsîn ge a ǀgui Xristeǁîn ǀkha. ǁĀǁnâs khaoǃgâ da ge sida tsîna nî aiǃgû gagasise kais ǀkha. ǀKhī da ǀnî xūna ǃhoaǃgao re, hîna a hui da ǁkhāna, î da ǁnāsa dī.

4. Mâ ǀgauga a hui du ǁkhā, î du gagasise kai? ǁGuiǃā re. (Filipeǁîn 1:9)

⁴ Jehovaba ǃnāsase ǀnam re. ǀNai du ge Jehovaba kaise a ǀnam. Xawe i ge sadu ǁîba ūba hâ ǀnamma noxoba a ǀgaisa ǁkhā. Mâǀgaub ǃnâ? Apostel Paulub ge ǀgui ǀgaub hîna Filipeǁîn 1:9 ǃnâ hâb xa ra mî. (Khomai re.) Paulub ge ge ǀgore în Filipeǁîn di ǀnamma ‘ǃnāsase kai.’ Sida ǀnammi ǃnâ da ge a kai ǁkhā. Mati da ǁnāsa a dī ǁkhā? Nēsa da ge ‘ǂans tsî hōǃâs ǃnâ ǃnāsase’ dīs ǃnâ a dīhō ǁkhā. ǃNāsase da ga Jehovaba ǂan, o da ge ǃnāsase ǁîba ra ǀnam. Tsî ra ǃgôaǃgâ tsoatsoa, ǁîb xūna ra dī ǀgauba. Tsî da ge ǁnās ǀkha sida ǁkhāsib ǃnâ ra kai, î da ǁîba ǂkhîǂkhî. Tsî da ge tātsēs tsîna, ǁîba ǂkhî kai tama xū-e dī tide. ǃGarise da ge ra dītsâ, î da ǂanǂui ǁîb di ǂâis a taesa. Tsî mati da ǁnās ǀkha ǀguiǃnâxase a sîsen ǁkhā ǀgaus tsîna.

5-6. Mati da Jehovaba da ūba hâ ǀnamma, a kaikai ǁkhā? ǁGuiǃā re.

⁵ Jehovaba da ge ǀnam tsoatsoa ǁkhā, ǁîb di ǀgôaba da ga ǃgâise ǂan o. Hîna ǃgâise ǁîb di pab di ǀgauga ra ǁgae ba. (Heb. 1:3) Jesuba da ga ǃgâise ǂan ǂgao, o da ge haka ǃnaeǃkhaidi ǁîb xa hâde nî ǁkhāǁkhāsen. “Elobmîsa du ga tsēs hoasa khomai tama io, o du ge Jesub xa hâ ǃâde nēsi a khomai tsoatsoa ǁkhā.” Jesub xa du ra khomai khami, sadu ǂâisa ǁîb ǀgaugu ai ǂnûi re. Khoen ge ǁîb ǀkha hâ tsî ǃhoas xa ge ǃgâibahe i. ǁÎb ge ǂkhari ǀgôarona ǁîb di ǃomman ǃnâ gere tani. (Mrk. 10:13-16) Jesub ge ǃgâi tsî ge khoexaǃnâ i. Tsî i ge ǁîb di ǁkhāǁkhāsabena ge ǃao tama hâ i, ǁîn di tsâsiga ǁîba mîbasa. (Mat. 16:22) Tsî nē ǀgaub ǃnâb ge Jesuba ǁîb di ǀhomsi ǁGûba gere ǁgae. Jehovab tsîn ge mâ ǁae-i hoa-i ai a ǃhoa-ūhe ǁkhā. ǁÎba ǃoa da ge a ǀgore ǁkhā. Tsî da ga ǁîba ǃoa ǀgore o, da ge sida di ǂgaoba a ǁkhōǂui ǁkhā. ǂGomǃgâsiba da ge ūhâ, ǁîb sida ǀgoraǃgâ tidesa. ǁÎb ge ǀnam da tsî ra tsâba da.—1Pet. 5:7.

⁶ Jesub ge tsâba ǁkhaoxasiba khoena gere ǁgau. Apostel Mateub ge nēti ge xoa: “Tsî Jesub ge ǂnubis khoena mû, ob ge ǁîna ge ǀkhom, tsau hâ tsî ǁnāxūhe hâ gūn, ǃûi-ao-i ose hân khamin ge ī i amaga.” (Mat. 9:36) Jehovaba mati ra tsâ? Jesub ge nēti ge mî: “ǁKhā ǀgaub aib ge sago Îb ǀhommi ǃnâ hâba mā-am tide nē ǂkhariron di ǀgui-i tsîn nî kāǁō ǃkhaisa.” (Mat. 18:14) Nē mîdi ge kaise ra ǂkhî kai da. ǁGau i ra amaga Jehovab kaise a ǀnam da ǃkhaisa. Jesuba da ǃnāsase ra ǂan, khami i ge sida ǀnammi Jehovaba da ūba hâba ra kai.

7. Mati i gagasise ǀgaisa Xristeǁîn ǀkha hâsa a hui du ǁkhā?

⁷ ǁKhāǁkhāsen ǁkhās tsîna du ge i, mati du ǀnamma a ǁgau ǁkhāsa. ǁAeba du ga ǀhaohâb ǃnâ hâ ǃgâsan ǀkha ga ra ūhâ o, kō re matikōsen ǁîna a ǂkhîsa. ǁÎn ge ǃhausen-e ūhâ tama hâ Jehovaba ǃoabasan ge mîǁgui o. Dî nî re, mâ ǂanden ge Jehovaba ǃoabas ǃnâ a hōsa. ǂHâǂhâsa mîǁguiba du ga dī o, ǁîn ai ǀapemāde dî re. ǂÂis ǃnâ ūhâ re ,“ǂgui ǀapemā-aon hâpab ge ǃnorasasiba hâ.”—ǂKhm. 11:14.

8. Tae-e nî hui du, Elobmîs ǃnâ du ga ǂgomǀoro o?

⁸ ǂGomǀoros ai sîsen re. ǀGamǁî xoaǀgoras ǃnâ i go ro mîhe khamib ge ǁGâuaba nî dītsâ. Îb sadu di ǂgomsa ǂkhabuǂkhabu î du tā Jehovab ǀgūse sī. ǀGui ǀgaub ǁîb ǁnāsa a dī ǁkhāb ge, ǂGomǀorosisa sadu ǃnâ omkhâisa, Elobmîs ra ǁkhāǁkhān ama tama ǃkhaisa. Aiǁgause i ge ǀnî khoena a mîba du ǁkhā. Elob ge sida kuru tama hâ i sa. Tsî da ge ǃhūbaib ai evolusib ǃnâ-ū a ǀkhīsa. ǀNîsi du ge ǂkham du ge io, ǁnā i xa ǂâis tsîna ge hî tama hâ i. Xawe du nēsi kai hâ, o du ge ǁnā-e skoli tawa ra ǁkhāǁkhāhe. ǀNîsin ge sadu ǁgauǃnâ-aon ra mîna nēsisa ǂâibasen-e ra kuru. Xawe i ge īǁkhā ǁîn ge tātsē dītsâ tama hâ isa, în ǂanǂui Kuru-aob hâsa. ǂÂi hō re ǀapemās hîna ǂKhoamîdi 18:17 ǃnâ hâsa: “ǂGurose ǁî-i ǁhōba ra aoǁgui khoe-i a ǂhanu khami i ge ra mûsen, ǁî-i di mâǃoa-ao-i hā tsî ǁî-e dîǃnâ tamas kōse.” Skoli ai du ra ǁkhāǁkhāhe xūna ūǃoas ǀuisa hîs xa, ǃamkuse amaba Elobmîs ǃnâ ôaǃnâ re. Sida di ǂkhinin ǃnâ, ôaǃnâde dī re. ǃGâsan hîna ge ǃkharu ge ǁaeb ǃnâ, xūn ge ǃhūbaib ai a hā ǀgaus (evolusib) ǃnâ gere ǂgoman ǀkha ǃhoa re. Dî nî re tae-i ǃaroman ge Kuru-aob hîna a ǀnam dab hâsa, ǂgom tsoatsoasa. Nēti ī ǃhoaǀhaodi ge nî hui du, î du ǂan Kuru-aob hâ ǃkhaisa.

9. Tae-e du Melissas di aiǁgausa xu ra ǁkhāǁkhāsen?

⁹ Melissa di ǀon hâ ǃgâsas ge ǃgâiba ge hō, ôaǃnâsas ge kurus xa a dī o.b ǁÎs ge ra mî: “Skoli ǃnâ i ge ǁgauǃnâ-aona. Xūn ge ǃhūbaib ai ti ǀgui a hā ǀgausa ǃamkuse ra ǁguiǃā. În khoena ǂgom ǁnās a amasa. ǂGuro ta ge oaǃnâde ge dī ǂgao tama hâ i, ǃao ta gere amaga. Xūn ge kuruhe ǀgaub a amasa ta nî ǂanǂuisa. Xawe ta ge ge ǂâi Jehovab ra ǂhâbasa, î da ǃgâi ǃaromas ǃgao ǁîba ǃoaba. Tsî ta ge ǁnās ǃaroma ôaǃnâde ge dī tsoatsoa. Tsî ta ge ǁnās ǀkha Is There a Creator Who Cares About You? tsî ǁnāpaxu Was Life Created? di ǀon hâ ǂkhini kha tsîna ge khomai. Tsî ta ge noxoba Ûib di tsoatsoas—Koro dîdi hîna da a dî ǁkhā di, di ǀon hâb tsîna ge khomai. Tsî ǁnā-i ǀgui-e ta ge ge ǂhâ hâ i. ǁKhore ta ge ra ǁnā-e ta ga ǀnai dī hâsa.”

10-11. Tae-e a hui du ǁkhā, î du ǃanuse hâ ǀgara? (1 Tesalonikaǁîn 4:3, 4)

¹⁰ ǃGâi tama tanisen ǀgauba xu ǂgōsen. ǂKhamsis ǃnâ i ge ǁgoe-ūgus di tsâsiga kaise a ǀgaisa ǁkhā. Tsî ǀnî ǁaegu ain ge ǀnîna a ǁgari du ǁkhā, î du ǁnāsa dī. Satanni ge ra ǂhâba î du ǁnā turagu sadu digu ǃnâ māǁnâsen. Tae-e a hui du ǁkhā î du ǃanuse hâ ǀgara? (Khomai re 1 Tesalonikaǁîn 4:3, 4 sa.) Jehovaba ǃoa du ra ǀgore ǁaeb ai sadu tsâsiga ǁîba mîba re. Tsî ǂgan bi re îb ǀgaiǀgai du. (Mat. 6:13) ǂÂihō re Jehovab ge ra hui du ǂgao tsî ǀgoraǃgâ du ǂgao tama hâ. (Psa. 103:13, 14) Elobmîsa ǃoas tsîna du ge a-ī ǁkhā huib ǃaroma. Melissas hîna ge ǀnai ǂgaihe hâ is ge ǃgomsiba gere hōǃâ. ǃGâi tama ǂâiǀgauga xu ǂgōsens ǀkha. ǁÎs ge ra mî: “Elobmîsa tsēs hoasa khomais ge ge hui te î ta ǃgâi tama turaga ǃkhamǃoa. ǂÂiǂâiǃnâ te i ge gere Jehovab di ta a sa. Tsî ta ǁîba ti ûib ǃnâ ǂhâba hâsa.”—Psa. 119:9.

¹¹ Sadu ǃgomsina tā aitsama ǃgâiǃgâi ǂgao re. Sadu ǁgûn ǀkha ǃhoa re ǃgomsin xa. Supu tama i ge hâ ǁnāti xūn xa ǃhoasa. Xawe i ge a ǂhâǂhâsa î du ǁnāsa dī. Melissas ge ra mî: “ǁKhoaǂgaosiba ta ge ge ǀgoreba. Tsî ta ge ǁnās khaoǃgâ ti pab ǀkha ti ǃgomsin xa ge ǃhoa. ǁNās khaoǃgâ ta ge kaise ǃgâise gere tsâ. ǂAn ta ge ge i Jehovab kaise tita ǀkha a ǂkhîsa.”

12. Mati du ǃgâi mîǁguiga a dī ǁkhā?

¹² Elobmîs di ǀapemādi xa daoǁgauhe re. Kai du ra khami i ge sadu ǁgûna nî mā-am du, î du aitsâma ǃnāsa mîǁguiga dī. Xawe i ge kaise ǂgui xūna hâ noxoba du a ǀūna. Mati du a ǂgōsen ǁkhā î du tā, sadu ǀhōsagusis Jehovab ǀkha du ūhâsa a tsâǀkhā ǁkhā xūna dīsā? (ǂKhm. 22:3) Kari ti ǀon hâ ǃgâsas ge ra mî, tae-i ge huisisa îs ǃgâi mîǁguiga dī. ǁÎs ge ge ǁnâuǃā gagasise ǀgaisa Xristeǁîn. Mâ xū-i hoa-i ǃaroma ǂhanuga ǂhâba tamasa, ǁî-i di ûib ǃnâ xū-e dīs ǃaroma. ǁÎs ge ra mî: “ǂAn ǂgao ta ge gere matib Jehovaba xūn xa ra ǂâisa, saos ǀguisa hîs xa.” Elobmîsa du ga khomai o, dîsen re: ‘Tae-eb nē ǃâba tita Jehovab ra ǂâiǀgaub xa ra mîba? Tita a hui ǁkhā xūna i ǃkhōǂgā hâ? Tsî i ga ǁnāti ī o, mati ta ǃgâiba a hō ǁkhā ǁnāna ta ga sîsenū o?’ (Psa. 19:7; Jes. 48:17, 18) Elobmîsa khomai tsî du ga ǁîs di ǀapemādi xa ǂâiǃgâ o. O i ge kaise nî supuba du, î du mîǁguigu hîna Jehovaba ra ǂkhîǂkhî ga dī. Aiǃgû tsî du gagasise ra kai hîna, du ge nî mûǂan. Mâ xū-i hoa-i ǃaroma du ǂhanu-e ǂhâba tamasa. Jehovab xūn xa ra ǂâi ǀgauba du nî ǁnâuǃā amaga.

13. Matin ǃgâi ǀhōsana a hui du ǁkhā? (ǂKhoamîdi 13:20)

¹³ Jehovaba ǀnam ǀhōsana ǁhûi re. ǀNai i go ǃhoaǃgaohe hâ-i khami. Î ge ǀhōsan hîna du ra ǁhûina a hui du ǁkhā, î du gagasise ǀgaisa Xristeǁî kai. (Khomai re ǂKhoamîdi 13:20 sa.) Sara di ǀon hâ ǃgâsas ge ǁîs di ǃgâiaǂgaoba gere ǂoaǃnâ. Xawe i ge xū-e ge ī hîna ge huisi-e, îs ǃnāsa ǂkhîba hō-oa. Saras ge ra mî: “ǃGâi ǀhōsana ta ge ge hō ti ûib ǃnâ, ǂhâ ta ge hâ-i ǁaeb ǃnâ. ǂKham ǃgâsas tsî tita tsîn ge ǀguiba gere ǀhao wekheb ǃnâ, îm ǃKhē xu ǂgō-omma ǁkhāǁkhāsen. Tsî i ge ǀnî ǀhōsa-e ge hui te, î ta ǀhaodi tawa ǃeream. Ti ǀhōn di ǂkhâǃnâs ǃaroma ta ge aitsama ôaǃnâs. Tsî ǀgores tsîna ǂhâǂhâsa xū-i ase ge mû tsoatsoa. Tsî ta ge ǀgaisa ǀhōsagusisa Jehovab ǀkha ge omkhâi. Tsî ǁnās xa ǃaromahe hâse ǃnāsa ǂkhîba ǁkhapa ge hō.”

14. Matib ge Juliena ǃgâi ǀhōsana kuru?

¹⁴ Mati du ǃgâi ǀhōsana a kuru ǁkhā, hîna ǃgâi sîsenǂuiba sadu ai a ūhâ ǁkhāna? Julienni hîna nēsisa ǀhaohâb di ǃûi-aob ase ra ǃoabab ge ra mî: “ǂKham ta ge i, o ta ge ǃgâi ǀhōsana aoǁnâ ū ta gere ǃgâsan ǃnâ gere hō. ǁNā ǀhōsan ge ge ǁkhoaǂgaoxa i. Tsî ge hui te î ta mû, aoǁnâ sîsenni a ǁkhoaxa ǁkhā ǀgausa. Tsî ta ge ǁnās ǀkha ǀoasase aoǁnâ sîsen-e dīs di mîǁguiba ge dī. Mûǂans tsîna ta ge ge hî, ǃgâi ǀhōsan tsîna ta gere ǂoaǃnâ ǃkhaisa. Tsî ǃaromas hîna ta ge ǃgâi ǀhōsana ūhâba tama hâ is ge. Tita ǀkha ǀgui kurina ūhâ khoen ǀguina ta gere ôa ǃkhais ǃaroma. Ega ta ge ǃgâi ǀhōsan tsîna Betels tawa ge kuru. ǁÎn di aiǁgaus ge ge hui te, î ta ǁkhoaxa ǁaeba ta nî ūhâ ǀgaub tsîna ǁhûi. Nēs ge ǀgūse Jehovab tawa ge sī-ū te.”

15. Tae-eb ge Pauluba Timoteuba, ǀhōsan xa mîba? (2 Timoteub 2:20-22)

¹⁵ Tae-e du nî dī, ǀhaohâb ǃnâ hâ khoe-i ga Jehovab ǀkha du ūhâ ǀhōsagusisa nî ǁgaiǁgaisa du ga mûǂan o? Paulub ge ge ǂan i ǂguro ǁaeb di Xristeǁî ǀhaohâb ǃnâ ge hâ i, khoen ǀnîn ge gagasi mûǂuiba ūhâ tama hâ isa. ǁNā-amagab ge Timoteuba ge mîba, îb ǁîna xu hâbē. (Khomai re 2 Timoteub 2:20-22 sa.) Sida ǀhōsagusis Jehovab ǀkha da ūhâs ge kaise a ǀō-aisa. Tātsē da ge mā-am ǂgao tama, i khoe-e sida ǀhōsagusis hîna da Jehovab ǀkha ūhâsa ǂkhabuǂkhabu. Hîna ge kurina ūsa, î da omkhâi.—Psa. 26:4.

MATI I MÎǁGUIGA DĪSA HUI DU ǁKHĀ GAGASISE KAIS ǃNÂ?

16. Mâǃnôa mîǁguiga du nî dī?

¹⁶ Sīǃnâ ǁkhā du a mîǁguiga dī re. Mîǁguigu hîna sadu ǂgomsa ǀgaiǀgai tsî nî hui du ga ǁhûi re. (Efe. 3:16) Aiǁgause du ge ǀnîsi a mîǁgui ǁkhā, î du ǁkhāǁkhāsen. Tsî ǃnāsase Elobmîsa khomai. (Psa. 1:2, 3) Tamas ka io du ge dītsâ ǁkhā, î du ǃnāsase sadu ǂgaoba xu ǀgore. Tamas ka io du ge ǀnîsi nî ǂanbasen, mâ ǀgaub ai du ǁkhoaxa ǁaeba ra ūhâs. Tsî mati du sadu ǁaeba ra sîsenū ǀgaub tsîna. (Efe. 5:15, 16) Jehovab ga mû o ǃgarise du ra sîsensa î du ǃgâiǃgâisen, ob ge kaise nî ǂkhî.

17. Mâ ǂkhîba khoena huisa xu ra ǀkhī?

¹⁷ Nau ǃgâsana du ga hui, o du ge gagasise ra kai. Jesub ge ge mî: “mās ge ǃkhōǃoas ǃgâ-ai a ǀkhaesa” di. (ǃNǃkh. 20:35) Kaise i ge sado nî ǂkhî kai, sadu ǁaeb. Tsî ǂkhamsis tsîna du ga nauna huis ǃnâ sîsenū o. Aiǁgause du ge ǀnîsi a mîǁgui ǁkhā, î du kairan. Tsî sorosi ǃnubusiga ūhân tsîna sadu ǀhaohâb ǃnâ hui. ǀNîsi du ge a hui nî ǁkhā, xūna sī ǁamas ǀkha. Tsî ǁîn di elektronik xūn ǀkha a hui nî ǁkhā. ǂKham ǃgâsa go, mîǁguiba dī re, î go ǀhaohâb di hui-ao kai. Tsî ǁnās ge nî ǃaroma i go sago ǃgâsana ǃoaba. (Fil. 2:4) Tsî du ge ǁnān hîna ǀhaohâb ǃauga hân tsîna ǀnamma ra ǁgau. ǃGâiǂhôasa du ga ǁîn ǀkha ǀgoragu o. (Mat. 9:36, 37) Īǁkhā i ga o, mîǁguiba dī re, î du Jehovaba ǀoasase ǃoaba.

18. Mati i ǀoasase ǃoabasa, Jehovab ǀgūse a sī-ū du ǁkhā?

¹⁸ ǀOasase Jehovaba ǃoabas ge aiǂhanuba mā du ǁkhā, î du gagasise kai. Aimâba-aose ǃoabas ge daode a ǁkhowa-am ǁkhā, î du Gaosib aoǁnâ-aon skola hâǃnâ ǁkhā. Betels tamas ka io du ge om sîsengu ǃnâ a ǃâ ǁkhā. ǂKham aimâba-ao ǃgâsas Kaitlyn di ǀon hâs ge ra mî: “ǃNāsa ǁaeba aoǁnâ sîsen-i ǃnâ ǂansa ūhâ khoen ǀkha hâs ge ge hui te, î ta gagasise ǁāǁnâs khaoǃgâ aiǃgû. ǁÎn di aiǁgaus ge ra ǂkhâǃnâ te î ta ǃnāsase Elobmîsa ǁkhāǁkhāsen. Tsî ǁnās ǀkha ǁkhāǁkhā ǀgaub tib tsîna ǃgâiǃgâi.”

19. Mâ ǀkhaega du nî hōǃâ, aiǃgû tsî du gagasise ra kai khami?

¹⁹ Aiǃgû tsî du gagasise ra kai khamib ge Jehovaba, ǂgui ǀkhaega nî mā du. Tsî du ge sadu di ǁkhāsiba ǃgâi tama xūn ai sîsenū tide. (1Jhn. 2:17) ǁNās ǀkhas tsîna du ge nî sâuhe, î du ǃgâi tama mîǁguiga dīsa xu ǂgōsen. Tsî du ge ama ǂkhîba nî hōǃâ. (ǂKhm. 16:3) Sadu ǃgâi aiǁgaus ge nau ǃgâsana nî ǂkhâǃnâ, ǂkhaman tsî kairan tsîna. (1Tim. 4:12) Nēn hoan xa ǂhâǂhâsase du ge ǂkhîb. Tsî ǃgâiaǂgaob tsîna nî hōǃâ, Jehovaba du ra ǂkhîǂkhî ǃkhais ǃaroma. Tsî du ge ǁîb ǀkha ǀgū ǀhōsagusisa nî ūhâ.—ǂKhm. 23:15, 16.