‘Amab ǃnâ ǃgû ǀgara re’

1. “Amab” ǃnâ da ge ǂgâxa ǀgaub xa ǃhoasa, mati ǃgâiba ra mā da?

“MATI du ge amab ǃnâ ǂgâxa?” ǂGom ta ge ra ǁnā dîsa du ge ǂgui ǃnāde a ǃereamsa. ǁNādi ge ǂguro dîdi hînan ǃgâsana ǂangusa da ga ra kuru, o ra dî da na. ǃGâibahe da ge a sida ǃgâsana xu ǁnâusa, matin ge Jehovaba ǂan tsî a ǀnam tsoatsoasa. Kaise da ge a ǃgâibahe khoena mîbasa. Tae-i ǃaroma da ge Jehovaba ǃoaba tsoatsoasa. (Rom. 1:11). Nē ǁgamǀhaodi ge ra ǂâiǂâi da matikōseb amaba a ǀō-aisa sa. Tsî da ge ǁnās ǃnâs tsîna ra ǁguiǂgāsen, î da ǃnāsase ‘amab ǃnâ ǃgû ǀgara’ ǁkhā. Tsî ǁnās ge Jehovaba ra ǂkhîǂkhî ǀgaub ǃnâ ûisa.​—3 Jhn. 4.

2. Tae-e da nē ǁkhāǁkhāǃâs ǃnâ nî ǃhoaǃgao?

² Nē ǁkhāǁkhāǃâs ǃnâ da ge ǀnî ǃaromade nî ǃhoaǃgao, tae-i ǃaroma da amaba a ǀnamsa. Tsî da ge ǁnāpaxu nî ǃhoaǃgao mati da aiǃgû. Tsî ǀnama nē ǀō-aisa ǀkhaeba a ǁgau ǁkhā ǀgausa. Nēs ge sida di ǃgôaǃgâsiba, Jehovab ge amaba ǃoa a ǂgae da ǃkhais diba nî ǀgaiǀgai. (Jhn. 6:44) Tsî i ge sida turab tsîna ra ǀgaiǀgai, î da amaba nau khoen ǀkha ǀgoragu.

‘AMABA’ DA ǀNAMBA ǃAROMAS

3. Mâsa ǀgui ǂhâǂhâsa ǃaromas amaba da a ǀnamba sa?

³ ǂGui ǃaroma di ǃgao da ge amaba a ǀnam. ǂHâǂhâsase da ge Jehova Eloba a ǀnam, amab di mā-ao ba. Elobmîs ǃnâ-ū ǀgui da ge ǁîba ǂan tama hâ, ǀgaisa Kuru-aob ase ǀhommi tsî ǃhūbaib diba. Xawe da ge ǁîba ǀnamxaǃnâ ǀhomsi ǁGûb ases tsîna a ǂan, sida ra tsâba ba. (1Pet. 5:7) ǂAn da ge a sida Elob “ǀkhomxasib tsî ǀkhommi xa ǀoa hâ, ǃhaese ǁaixa tama hâ. Tsî ǃnāǂamsa ǀnammi tsî ǂgomǂgomsasiba” ra ǁgausa. (Eks. 34:6) Jehovab ge ǂhanu-aisiba a ǀnam. (Jes. 61:8) Sida ǃgomsina ra hōǃâ sab ga mû, ob ge ra tsûtsûhe. Tsîb ge aiǂhumisa sida ǃgomsina ǂhanu ǁaeb ai ǀam kaisa. (Jer. 29:11) Sida tsîn ge ǁnā ǁkhoaxa ǁaeba ǃoa ra mûǂui. Tsî ǁnās ge ǀgui ǃaromas Jehovaba da kaise a ǀnamba sa.

4-5. Mati iob apostel Pauluba sida ǃâubasen sa anker-i ǀkha ra ǀgopeǀnō?

⁴ Mâsa a ǀnî ǃaroma amaba da a ǀnamba sa? Amab ge ǃgâiba sida ǃoa ra ǀkhī-ū. Aiǁgau-i xa ǂâi re. Elobmîs amab ge hānîǁaeb di ǃâubasensa ǃkhōǂgā hâ. Aiǁgau-e ǃâubasens xa mās ǃaromab ge apostel Pauluba ge xoa: “Nēs ge sida di ǃâubasens hîa anker-i, ǁaposa tsî ǂgomǂgomsa-i, ǂgāmâisab ǃnâ-u ǃanun di ǃanusib kōse’’ ra ǃkharu-i khami ī. (Heb. 6:19) Anker-i ǂgausa ra ǃkhōmâi khami i ge. Elobmîs di ǃâubasensa a ǀgaiǀgai da ǁkhā, ûib ǃgomsina da ga hōǃâ o.

⁵ Nē xoas ǃnâb ge Pauluba, ǀhomsi ǃâubasensa ūhâ. ǂKhauhesa Xristeǁîn ra ǃgôaǃgâ, ǃâubasens xa ra ǃhoa. ǁÎb di mîdi ge Xristeǁîn hîna paradais ǃhūbaib ai ûis ǃâubasensa, ūhân tsîna ǃkhōǂgā hâ. (Jhn. 3:16) ǀAmo ûib di ǃâubasens xa ǁkhāǁkhāsens, ge sida ûiba ǂâibasensa ge mā.

6-7. Matis ge Yvonnesa ǃgâiba hō, hānîǁaeb di amab xa ǁkhāǁkhāsens ǃnâ-ū?

⁶ Yvonne di ǀon hâ ǃgâsas ge, ǃkharuǃnâ xūn xa ǂâi re. ǁÎs ge amab ǃnâ ge kai tama hâ i. Tsîs ge ǀgôas ase ǁōba gere ǃao. ǁÎs ge ra ǂâi hō, ǀgui xū-i hînas ge khomai tsî ǀuru ǁoa î-i xa: “ǀGui tsē i ge ǁari-e hâ tide.” ǁÎs ge ra mî: “ǁNā mîdi ge ǃuia ǂkhaisase gere ǁgoe kaite. Tsî hānîǁaeb xa gere ǂâi kaite. ‘Amase i ge nē ûib xa ǃnāsa-e nî hâ’, tita ge gere ǂâi. ‘Tae-i ǃaroma ta nēpa hâ?’ Tita ge ǁō ǂgao tama ge hâ i.”

⁷ ǁÎs ǂkhamsis ǃnâs ge Yvonnesa, Jehovab di ǃoaba-aon ǀkha ge ǀhao. ǁÎs ge ra mî: “ǂGom tsoatsoa ta ge ge, ǃâubasensa ta a ūhâ ǁkhā ǃkhaisa. Î ta ǀamose paradais ǃhūbaib ai ûi.” Amaba ǁkhāǁkhāsensa mati sida ǃgâsasa ge hui? ǁÎs ge ǀaro tsî ra mî: “Nēsisa ta ge ǃuia ǁgoe tsî hānîǁaeb tsî ǁōb xa ǂâi tama hâ.” ǃGāsa i ge a Yvonnes amaba a ǀnamsa. Tsîs ge a ǃgâibahe nau khoena, ǁîs ǃâubasens xa hānîǁaeb ǃaroma mîbasa.—1 Tim. 4:16.

8-9. (a) Jesub ǂkhōs ǃnâ ra mîhe khoeba, hōb ge a ǁhuiba matikōse gere ǃgôaǃgâ? (b) Amaba matikōse a ǀō-aisa ba du?

⁸ Elobmîs amab ge ǃgâiǂhôas, Elob gaosib dis tsîna ǃkhōǂgā hâ. Jesub ge Gaosib amaba sâusa ǁuib ǀkha gere ǀgopeǀnō, Mateub 13:44 ǃnâb Jesuba ra mîs ǃoagu. “ǁKhātib ge Gaosib ǀHommi diba ǁuib, ǃhanab ǃnâ sâusab hîa khoeb xa hōhe tsî ra gaugauheb khami ī. ǁÎb ge kaise ǃgâiaǂgao tsî ǃgû tsî ūb hân hoana ǁamaxū tsî oa tsî ǁnā ǃhanaba ra ǁama.” ǃGaoǃgâ re, aob ge ǁuiba ge ôa tama hâ i. Xawe hōb ge, ob ge kai ǁguibana ge dī, îb ūhâ ǀgara. Ūb hâ xūn hoanab ge ge ǁamaxu. Tae-i ǃaroma? ǁÎb ge ge ǂan i matikōseb ge ǁnā ǁuiba ǂhâǂhâsa isa. ǁGuibab ge xūn hoan xa-i ge ǁnā, ǁuiba ǃnāsase ge ǂhâǂhâsa i.

⁹ Sadu tsîna amab xa ǁnāti ra tsâ? Îo, ǂan da ge a xū-i nē ǃhūbaib ǃnâ ǂkhîb hîna da Jehovaba ǃoabasa xu ra hōb, ǀkha a ǀgopeǀnōhe ǁoasa. ǁNās ge ǀAmo ûiba, hānîǁaeb di ǃâubasensa, Elob Gaosib di ǂgaeǂguis ǃnaga ūhâsa. Aiǂhanub hîna da, ǀgū ǀhosagusisa Jehovab ǀkha ūhâs, dib ge hâ a ǁguiba-i hoa-i ǂamai a kai. Sida kaise ra ǃgâiǂgao kai i ge. Jehovaba ǂkhîǂkhî tsî ǁîba “anu hâse” ûisa.​—Kol. 1:10.

10-11. Tae-e Michaela ge ǂkhâǃnâ, îb ǀkharaǀkharana dī?

¹⁰ ǂGui da ge kai ǁguibade dī hâ, î da Jehovab di mā-amsa hō. ǀNîn ge ǂgui mari-e gere matare sîsenna ge ǁnāxu. ǀNîn ge ǃkhūsiba ge ôa ǀû. Tsî ǀnîn ge ǁîn di ûiǀgauba amaban ge ǁkhāǁkhāsen, o ge dawa. ǁNā-eb ge Michaela ge dī, ǁîb ge amab ǃnâ ge kai tama hâ i. ǂKhamkhoeb aseb ge karateb ǃnâ ge ǁkhāǁkhā-e hâ i. ǁÎb ge ra mî: “Tita ge kaise ge ǂhâǂhâsabahe i, i da ǃgâi sorosi mâsiba ūhâ. ǀNî ǁae gu ai ta ge mûhe ǁoa ta a khami gere tsâ.” Xaweb ge Elobmîsa ǁkhāǁkhāsen tsoatsoa o, ob ge Michaela. Elob di mûǂûib ǂkhabadīb diba ge mû. (Psa. 11:5) ǁÎba ge Elobmîs ǁkhāǁkhāsa gere mā ǃgamme hâ khoera xab ge, Michaela nēti ra mî: “ǁÎra ge tātse ge mîbate tama hâ i, î ta karateba ǀû. ǁÎra ge aiǃgûs ǀguisa ge hî, Elobmîs amaba ǁkhāǂkhātes ǀkha.”

¹¹ Michaeli ge ǃnāsase Jehovab xa gere ǁkhāǁkhāsen, khamib ge ǁîb di ǀnama ǁîb ǃoagu ge kai. ǁÎb ge kaise Jehovab di tsâba ǁkhaoxasib, ǁîb di ǃoaba-aon ǃoagub ūhâb xa ge tsâǀkhāhe. ǁAeb ra i khamib ge Michaela ge mûǂan, ûib di ǀkharaǀkharanab nî dīsa. “ǂAn ta ge ge i karateba ǀûs, kaise tita nî ǃgomba ǃkhaisa,” dib ge ra mî. “Xawe ta ge ge ǂan i, ǁnās Jehovaba nî ǂkhîǂkhîsa. Tsî ta ge ǂgomǃgâsiba ge ūhâ i, ǁîba ǃoabas ǀnî hâ ǁguiba i ǂamai a kaisa.” Michaeli ge ge ǂan i, amab hînab ge hōb ge kaise ǀō-aisa isa. Tsîb ge ǁnās ǃaroma ǁîb ûib ǃnâ, kai ǀkharaǀkharana ge dī.​—Jak. 1:25.

12-13. Elobmîs amaba mati Maylisa ge hui?

¹² Amab di ǀō-aisasiba ǁgaus ǃaromas ge Elobmîsa, lams hîna ǃkhaeb ǃnâ ra ǃnâs ǀkha ra ǀgopeǀnōhe. (Psa. 119:105; Efe. 5:8) Maylis hîna Azerbaijans, ǃnâ ra hâs ge, huib hînas ge Elobmîsa xu a hōba kaise ra ǃgôaǃgâ. ǁÎs ge ǃkharagagu ǂgomde ūhâ, omaris ǃnâ ge kai. ǁÎs di pap ge ge Muslim i tsî ǁîs di masa ge Jodeǁî i. ǁÎs ge ra mî: “Elo-i a ǀkhai tita ge ge mî tama hâ i, xawe ta ge ǂgui dîde ge ūhâ i. Dîsen ta ge gere, ‘tae-i ǃaromab ge Eloba khoena kuru. Tsî tae-i ǃaroma i khoe-e ǁî-i di ûib hoaba, ǃgomsiba nî hōǃâ. Tsî ǁnās khaoǃgâ ǀaeb ǃnâ sī nî ǂhūbiǂûihe?’ Ī ra xūn hoan Elob xa ra ǃaromahe din khoena ra mî, o ta ge gere ǂâi. ‘Eloba khoena ra ǂgaeǂgui tsî a ǃgâiba-e, khoen ǃgomsina ra hōǃâ ǀgaub xa?’”

¹³ Maylis ge aiǃgû tsî ǁîs di dîdi ǃereamde gere ôa. ǁAeb ra ī khamis ge Elobmîs ǁkhāǁkhāsa ūǃoa tsî amab ǃnâ ge ǂgâxa. “Elobmîs amab ge ge huite, î ta ǂkhî khoe kai,” dis ge ra mî. “ǃGâi ǁguiǃādi hîna Elobmîs ǃnâ hâ di ge, ǂganagab di ǂkhîba ge māte.” Maylis khami, da ge sida tsîna Jehovaba ra koa. Sada ge “ǃkhaena ba xu ǁîb buruxa ǃnâb ǃoa” a ǂgaehe amaga.​—1 Pet. 2:9.

14. Mati da amaba da ūba hâ ǀnama a ǀgaiǀgai ǁkhā? (“Elobmîsa da ǀgopeǀnō ū ǁkhā xūn” di hâ boksisa khomai re.)

¹⁴ Nē di ge ǀoro aiǁgaudi hîna, amab di ǀō-aisasiba ra ǁgaude. ǂGom da ge ra ǂguin xa du noxoba a ǂâi ǁkhāsa. Tae-i ǃaroma du sadu di Elobmîs ôaǃnâs ǃnâ, nau ǃaromadi tsîna ôa tama hâ. Tae-i ǃaroma du amaba a ǀnamsa? Amaba da ǃnāsase ra ǀnam, khami da ge ǀgauna nî ôa, î da ǁgau.

MATI DA A ǁGAU ǁKHĀ AMABA DA ǀNAMSA?

15. Mâ ǀgaub ai da amaba da ūba hâ ǀnama a ǁgau ǁkhā?

¹⁵ Amaba da a ǀnamsa da ge a ǁgau ǁkhā Elobmîs. Tsî Elobmîs ai a ǃgaoǃgaosa, ǂkhinina da ga khomai o. Matikō gāxuse da ga amab ǃnâ hâ, xawe da ge Elobmîs xa ǃnāsase nî ǃkhāǁkhāsen. Nē ǂkhinib ǂgurose ra mî ǀgui xui ge: “Nē ǃhūbaib ǃnâ i ge ǂgui ǂhumi xūna hâ, hîna amaba ǂanǂuisa ra ǃgomǃgomna. Amaba du ga hō ǂgao, o du ge ǂkhaikari nî hâ. . . . ǁGūtsâ tsî du ga hō, o du ge nî ǃkhōǀgara. Tā sâ ǂnû amaba du ga hō-o, noxoba ǃnāsase ôa.” ǁKhāǁkhāsens ge ǂgui sîsen-e ūhâ, xawe ǃgâiba ǃkhōǂgā hâ.

16. Mâ ǁkhāǁkhāsen ǀgauga a ǃgâiba du? (ǂKhoamîdi 2:4-6)

¹⁶ Hoa da ge khomais tsî ǁkhāǁkhāsens tsîna ǀnam tama. Xaweb ge Jehovaba ra ǁkhauda, î da ‘ôa ǀgara.’ Tsî ‘ǃgamse ôaǃnâ’ î da amaba ǁnâuǃā. (Khomai re ǂKhoamîdi 2:4-6 sa.) Nēsa da ga dī, o da ge hoaǁae ǃgâiba ra hō. ǁÎb di Elobmîs khomai ǃâs xab ge Coriba ra mî, ǁîb ge ǀgui xoasa ǀgui ǁaeb ai ra kō. ǁÎb ge ra ǁguiǃā: “Tita ge hoa ǀgamirodi tsî ǁnae ǁgau ra xoadi tsîna ra khomai. Tsî ǃnāsase ra ôaǃnâ. . . . ǂGui ǃgâiba ta ge ra hō ti khomaisa xu.” Nēsi da ga nē ǀgaub, tamas ka io ǀnî hâ ǀgauba sîsenū. Xawe da ge ra ǁgau amaba da ra ǃgôaǃgâsa. ǁAeba da ga ǁama ǂûi tsî ǁgūtsâ tsî ǁkhāǁkhāsen o.​—Psa. 1:1-3.

17. Amab ǃnâ ûisa tae-e ra ǂâibasen? (Jakobub 1:25)

¹⁷ ǂAn da ge a ǂâu tama i hâsa, amab xa ǀgui ǁkhāǁkhāsensa. ǃGâiba nēsa xu hōs ǃaroma, da ge amaba nî ûiǂui. ǁNās ge sida ûigu ǃnâ sîsenūsa. Tsî ǁnā ǁaeb ai ǀgui i ge amaba ǂkhîba a māda ǁkhā. (Khomai re Jakobub 1:25 sa.) Mati da nî ǁgau amaba da ra ûiǂuisa? ǀGui ǃgâsab ge ra mî, î da ǂanǂui, mapa da ǃgâise ra dīsa. Tsî mapa da noxoba ǃnāsase a dī ǁkhā ǃkhaisa. Apostel Paulub ge nēti ge mî: “A da ǀnai ta ge ǃkhōǃoan ǃoa ǀgui ûi re.”​—Fil. 3:16.

18. Mati io da ra ǁgūtsâ ‘amab ǃnâ ǃgû ǀgarasa’?

¹⁸ ǂÂi re ǃgâib hîna da ra hōba ‘amab ǃnâ da ga ǃgû ǀgara o.’ Sida ûib ǀguiba da ge ǃgâiǃgâi ǂgao tama hâ. Xawe da ge ǃgâiaǂgaoba Jehovab tsî sada ǃgâsan tsîna ra mā. (ǂKhm. 27:11; 3 Jhn. 4) ǃGâi ǃaroma-e da ūhâ, amaba ǀnam tsî ûiǂuisa?