Khoexaǃnâse Elobmîs amaba ǃhoa-ūgu

1. Tae-e da nî dī Jehovab omaris ǃâ kai ǂgao da gao?

ǂGUROǃNĀS ase da ga Jehovab ǃoaba-aon ǀkha ǀhao, o da ge ra ǂanǂgao “mati-i ge ǁî-e amaba Jehovab xa ǁkhāǁkhāsen” ǀgausa. ǀNîn ge ra mî ǁîn ge ǁgûn xa amaba a ǁkhāǁkhā-e ti. Naun ge a mî ǁkhā ǀgūǁaen ge Jehovaba a ǃoaba tsoatsoasa. Nē ǀgaub ǃnâ da ge ra ǃeream, Elobmîs ge sada a ǀkharaǀkhara amaga. Tae-i ǃaroma? Jehovab omaris ǃâ ǁkhā da ge a xawe da ge amaba da a ǀnams tsî ǁnās ǃoagu ra ûisa nî ǁgau. ǀGui ǀgaub nēsa da a dī ǁkhāb ge mî tsî da ra dī xūn ǃnâ ǂhauǃnâsa.—Psa. 15:​1-3.

2. (a) Khoena tae-e Jesub xa gere ǂâi? (b) Jesub gere ǁkhāǁkhā amaba mati khoena gere tsâǀkhā?

² Jesub ge hoaǁae amaba gere ǃhoa. Jesub khākhoen ge gere mî ǁîb a ǂhauǃnâsa, ǁîb ge mî xūn xan ge hoaǁae ǃgâibahe tama hâ i xawe. (Mat. 22:16) Jesub ge ǁîb saosabena ge mîba khoen mati ǁîb ǁkhāǁkhādi ǃoagu nî tanisen ǀgauba. ǁÎb ge ge mî: “Tita ge khoeba ta nî ǁgûba xu tsî ǀgôasa ǁgûsa xu tsî ǀuiǀgôasa ǀuiǁgûsa xu ǀgorase ge hā.” (Mat. 10:35) Jesub ge ge ǂhâba tama hâ i în khoena ǃgâi tama tanisen ǀgauba, ǁîb haisi-ams tsî ǁîb saosaben gere mî xūn ǃoagu ūhâ. Xaweb ge ge ǂan-i nēs nî īsa. (Mat. 23:37) ǁÎb ge ge ǂan-i khoen amab haisi-ams ǃoagu ǃkharagagu ǀgaugu ǃnâ nî tanisensa. ǀNîn ge nē haisi-amsa nî ǀnam tsîn ge nauna nēsa ūǃoa tide.—2Tes. 2:​9-11.

3. Tae-e da nē ǁkhāǁkhāǃâs ǃnâ nî ǃhoaǃgao?

³ Jesub khami da ge hoaǁae ra ǂhauǃnâ ǂgao, khoen ga nēs xa ǃgâibahe tama i xawe. Elobmîs amab xa aoǁnâ tsî da ge khoena ra ǁkhāǁkhā ǂgao, ǀnîn ga nēs xa ǁaixa kaihe xawe. Nēsa ra ǂâibasen mati tsî mâǁae da Elobmîs amab xa ra ǃhoas ǀkha da ǁae tidesa? Tātsēs tsîna. Nē ǁkhāǁkhāǃâs ǃnâ da ge dîde nî ǃeream: Mâpa da amaba Jehovab xa a ǁkhāǁkhāsen ǁkhā? Tsî da ge ǁnāpaxū saora dīsa nî ǃeream: Tae-i ǃaroma, mati tsî mâǁae da Elobmîs amab xa nî ǃhoa? Nē dîdi ǃereamdi ge nî hui da î da nauna ǃgâiǂhôasa mîba tsî hoaǁae ǂhauǃnâ.

MÂPA DA AMABA HŌ ǁKHĀ?

4. Tae-i ǃaroma da mî ǁkhā Jehovab a amab di ǃgaoǃgaosa?

⁴ Jehovab ge a amab di ǃgaoǃgao. ǁÎb ra mîn hoan ge a ama. Aiǁgause, ǁîb ga tae-i a ǂhanus tsî tae-i a tsūsa a mîba da oi ge a ama. (Psa. 19:9; 119:​142, 151) ǁÎb hānîǁaeb xa mîmâi hâ xūn hoan ge ra ama kai. (Jes. 55:​10, 11) Jehovab ge tātsē mîmâi-e khôa tama hâ. (Num. 23:19) Amaseb ge Jehovaba a ǂhûmi ǁoa. (Heb. 6:18) ǁNās ge a ǃgâi ǃaroma ǁgaurasa Jehovab a ‘amab di Elosa.’—Psa. 31:5.

5. Tae-i ǃaroma i ǃgom tama “amab di Eloba” hōsa? ǁGuiǃā re. (ǃNaeǃkhaidi 17:27)

⁵ ǀNî khoen ge ra mî ǃgom-i asa Jehovaba ǂansa “ǁîb amab di Eloba” xawe nēs ge ama tama. Kurus ge ra ǁgau Elob hâsa. (Rom. 1:20) ǀGapi ǁkhāǁkhāsensa ūhâ Grikeǁîn ǀkhab ge Atenes ǃnâ gere ǃhoa, ob ge Pauluba ge mî Elob ra ǂhâbasa în “ǁîba hō, sada xub kaise ǃnūse hâ tama xuige.” (Khomai re ǃNaeǃkhaidi 17:27 sa.) Jehovab ge ǃgamǃgamsenxa khoen amaba ra ôan ǃoa ra ǀgū.—Jhn. 6:44.

6. Elobmîsa mâ amaba ǃkhōǂgā hâ tsî tae-i ǃaromats nē amaba ǂansa ra ǃgôaǃgâ?

⁶ ǀGui ǀgaub Jehovaba da a hō ǁkhāb ge Elobmîsa ǁkhāǁkhāsensa. ǁNā ǂkhanisa ge xoa khoegu ge Elob ǃanu gagab xa ge ǃgomǂgāǃnâhe hâ i. (2Pet. 1:​20, 21) ǁNā-amagan ge Elobmîs ǃnâ hâ xūn hoana ama tsî ǂgomǃgâhe ǁkhā. Aiǁgause, Elobmîs, ǃhūbaib tsî ǁîb ge tsoatsoas xa a mî xūna da ge ǂgomǃgâ ǁkhā. (Gen. 1:​1, 26) Elobmîs tae-i ǃaroma da ra ǁores, tae-i ǃaroma i ǂgui ǃgomsigu tsî ǁōb tsîna hâs xa ra mî xūna da ge a ǂgom ǁkhā. (Rom. 5:12; 6:23) ǂGomǃgâ ǁkhā da ge a Elobmîs ga mîo Jehovab ǁîb ǀGôab ǃnâ-ū, ǁgâuab “ǂhûmib di ǁgûb” ra ǃaroma ǃgomsigu hoaga nî ūbēsa. (Jhn. 8:44; Rom. 16:20) Elobmîs mîmâis Jesub eloxoresana nî hîkākās, ǁōhâna khâisa nî mās, ǃhūbaiba nî ǀkharaǀkharas tsî ǀoasa kurusa nî mā dasa da ge a ǂgomǃgâ ǁkhā. (Jhn. 11:​25, 26; 1Jhn. 3:8) Jehovab ge ǀō-aisa aiǂhanuba ge mā da. ǁÎb ge amaba ge ǁkhāǁkhā da tsî ǃēsa ge mā da î da nauna nēs xa ǁkhāǁkhā.—Mat. 28:​19, 20.

TAE-I ǃAROMA DA AMABA NÎ ǃHOA?

7-8. Amaba da ra ǃhoabas ǂâibasensa tae-i ǃaroma a ǂhâǂhâsa? Aiǁgau-e mā re. (Markub 3:​11, 12) (Ai-īsiga mû re.)

⁷ ǃKharu go xoaǀgoradi ǃnâ da go ǃhoaǃgao khami da ge ǂhauǃnâse nî ǃhoa Jehovab di omaris ǃâ kai ǂgao da gao. Xawe ǁîba da ga ǂkhîǂkhî ǂgao, o da ge ǂhauǃnâse ǃhoas ǂam-ai ǃnāsa-e nî dī. Tae-i ǃaroma da ǂhauǃnâse ra ǃhoas ge Jehovaba a ǂhâǂhâsaba. Jesub aoǁnâ sîsenni ǃnâ i ge tae-e a īsa ǃgaoǃgâ re. (Khomai re Markub 3:​11, 12 sa.) Jesub ge Galileab hurib ǀgūse gere aoǁnâ on ge ǂnubis khoena ǁîb ǂnamipe ge mâ. ǁÎn ǁaegu i ge demongu xa ge ǂgâhe hâ i aoba Jesub aiǃâ ǁnāǁgoe tsî ge mî: “Sats ge Elob di Ôatsa.” Demonga tae-i ǃaroma nē amaba Jesub xa ge mî? Demongu ge ǀnîsi gere ǂhâba în ǁnâu ge khoena ǁîga ǂgomǃgâ tsî Jehovaba ǃoaba ǀû. Demongu ge mî i ge ge ama-i xawe gu ge ge ǂhauǃnâ tama hâ-i. Jesub ge ǁîgu a gaxaǃnâsa ge ǂan-i tsî ǁnās ǀkha nēs xa ge ǂkhî tama hâ i. Jesub ge demonga ge mîba îgu ǁîb xa aoǁnâ ǀû.

⁸ Tae-e da nē ǃnaeǃkhaisa xu ra ǁkhāǁkhāsen? Tae-i ǃaroma da amaba ra ǃhoas ge Jehovaba a ǂhâǂhâsaba. ǁNā-amaga i ge kaise a ǂhâǂhâsa nauna Jehovab xa amaba ǁkhāǁkhāsa. ǁÎba da ge a ǀnam tsî da ge khoen ga aoǁnâ da ra haisi-ams ǃaroma a koa da, o nē koasa Jehovaba ǃoa ra ǁnaeǁgau ǂgao.—Mat. 5:16; ǀgopeǀnō re ǃNaeǃkhaidi 14:​12-15 sa.

9. Tae-e dīsa xu da nî ǂgōsen tsî tae-i ǃaroma?

⁹ ǀNî hâ mâsiba ǃgaoǃgâ re ǁgaura ba î da tā aitsama koasen. Mûnan-ai re ǁgaumâisa ǀhaohâb ǃnâ ūhâ ǃgâsab ge ǂganǃgâsib ǃnâ xū-e ra mîba da tsî da ge sida nauna nēs xa ra mîba. Khoen hîna da go mîban ga ǂanǂui, ǁîna da go mîba xūn amasa on ge ǀnîsi a ǂâi ǁkhā sada nē xūn ǀkha ǂgomǃgâhe hâ ti. Khoen ge nēs xa a ǃgâibahe ǁkhā xaweb ge Eloba ǂkhî tide. (ǂKhm. 11:13) Tae-i ǃaroma? Amaba da ge mî xawe i ge ge ǂhanu tama hâ-i ǂganǃgâsib ǃnâ da ge mîbahe xūna ǁîna mîbasa, ǂhanu ǂâibasens ǀkha da ge ǁîna mîba tama hâ i amaga.

MATI DA AMABA NÎ ǃHOAǀGAUB

10. ǃGâi ǃhoaǀgaubats mati nî ǁguiǃā? (Koloseǁîn 4:6)

¹⁰ Khomai re Koloseǁîn 4:6 sa. Apostel Paulub ge Koloses ǃnâ gere hâ Xristeǁîna ge hōhōǃnâ în ‘hoaǁae ǃgâi ǃhoaǀgauba’ ūhâ. ǁNāsa tae-e ra ǂâibasen? Grike gowab mîs nēba ra sîsenūhes ge ra ǂâibasen î-i mî da ra xūna nauna hui tsî khoexaǃnâ.

11-12. Tae-i ǃaroma da Elobmîs amaba da ra ǁkhāǁkhā ǀgauba nî ǂanbasen? ǁGuiǃā re. (Ai-īsiga mû re.)

¹¹ Paulub ǀapemāsa da ge nî sîsenū hoaǁae ǃgâise ǃhoasa nauna da ga amaba Elobmîsa xu a ǁkhāǁkhāo. Elobmîs ǃnâ hâ amab ge ǀāgôab ǀkha ra ǀgopeǀnōhe. ǀNî mîdi ǃnâ nēs ge khoe-i ǂganaga hâ mâsigu tsî dī-i ra xū-i ǃaromas tsîna ra ǁgau. (Heb. 4:12) Xawe da ga Elobmîsa ǂōrisase tamas ka io ǂhanu ǀgaub ǃnâ sîsenū tama ios ge nēsa khoena ǂhâbasa tamase a tsûtsû ǁkhā. Nēsa mati a īǁkhā?

¹² Mûnan-ai re saora xū-e. Aiǁgause du ge aoǁnâ sîsenni ǃnâ, aob Krismes tsî Eastersa ra tsēdība ra ǀhao-ū tsî ǁîb ge ama tama eloga ǃoas tsîna ra ǀgore. Elobmîsa ra sîsenūse da ge ǁîba a ǁgau ǁkhā ǃhoa tama xū-e ǃoa ǀgores a gâresa tsî i Krismes tsî Easters tsîna ǂhûmi ǂgomde xu hâsa. (Jes. 44:​14-20; 2Kor. 6:​14-17) ǂGuro ǁgamǀhaos ǃnâ da ga ǁîba nē xūna a mîba, o da ge amaba ra ǃhoa xawe da ge Elobmîsa ǂōrisase tamas ka io ǃamgu ǀgaub ǃnâ sîsenū tama hâ.

13. Mati da sida ǃhoaǀgauba a ǁkhoaǁkhoa ǁkhā?

¹³ Paulub ge ǁîb khomai-aon tsîna ge mîba în hoaǁae ǃgâi ǃhoaǀgauba ūhâ. ǁÎb ge ge ǂâibasen tama hâ i, î da Elobmîs amaba ǀnî hâ ǀgaub ǃnâ ǁguiǃā. Paulub ge ra ǀkhoma da, î da sada ǃhoaǀgauba “ǁkhoaǁkhoa” tsî Elobmîs amaba khoen nî ǁnâuǃā tsî ūǃoase aoǁnâ. (Job. 12:11) Nēsa dīs ge a ǃgom ǁkhā. ǂÛ-i xa da ga ǃhoa, o da ge ǀnîsi a ǂâi ǁkhā sada a ǁkhoaxaba ǂûn naun tsîna nî ǁkhoaxaba ti. ǁKhā ǀgaub ǃnâ da ge ǀnîsi a ǂâi ǁkhā, sada ǃhoaǀgaub nau khoena ra ǂgae ti. Xawe ǁnās ge ama tama. Aiǁgause, ǀnî ǃhaodi ǃnân ge khoena ǀnîsi ǁîn ra tsâǀgauba ǃoaǃū mîs xa a ǃgâibahe, ǁîn xa ǁkhara khoen ǀkhan ga ǃhoas tsîna. Xawen ge ǁkhawa nauna a tsâ ǁkhā nēti-i ǃhoaǀgaub ǂhanu tama hâ ti. Paulub ge ge ǀapemā da “î du ǂan ǁkhā mâti du hoaraga khoena nî ǃeream ǃkhaisa.” Nēs ge ra ǂâibasen î da ǃhoa da ra ǀgauba ǁkhoaǁkhoa, sada ǁkhoab tamas ka io ǃhaos di ǁkhoab ǃoagus ǀguis ose xawe ǃgâ-aon ǁkhoab ǃoagu.

MÂǁAETS AMABA NÎ ǃHOAS

14. Jesuba ǃhūbaib aib ge hâ io ǁîb a ǂan xūn hoana ǁîb ǁkhāǁkhāsabena gere ǁkhāǁkhā? ǁGuiǃā re.

¹⁴ Jesub ge hoaǁae ǁîb ǁkhāǁkhāsaben ǀkha khoexaǃnâse gere ǃhoa tsî ǁîna ǀnamxaǃnâ ǀgaub ǃnâ xūna gere ǁkhāǁkhā. (Mrk. 6:34) ǁÎn noxopa ǂgui xūna nî ǁkhāǁkhāsen ge is ge. Jesub ge ǁîb a ǂan xūn hoana ǁîna ge ǁkhāǁkhā tsâ tama hâ i. ǁÎn ǁkhāsigab ge ge ǂan-i. Jesub ge ge ǁnâuǃā, ǁaeb ge ǂhanu tama hâ īsa ǁîna ǀnî amaba ǁkhāǁkhāsensa. Jesub ge ge mî ǁîn nē amaba ǁkhā ǁoa tidesa. (Jhn. 16:12) Nēsa tae-e ra ǁkhāǁkhā da?

15. Elobmîsa da ra ǁkhāǁkhā khoe-e ǀgui ǁaeb ai hoa xūna nî ǂan? ǁGuiǃā re. (ǂKhoamîdi 25:11) (Ai-īsiba mû re.)

¹⁵ Jesub aiǁgaus ge ra ǁgau amaba da a ǂans ǂâibasen tamasa, î da ǂan da a xūn hoana ǀgui ǁaeb ai ǁkhāǁkhā. Mati da Jesub aiǁgausa a ǁgae ǁkhā? Nau khoen di mâsib xa da ge nî ǂâiǃgâ. ǃKharu go xoaǀgoras ǃnâ da goro ǃhoaǃgao aob Krismes tsî Eastersa tsēdīs xa go ǁkhoaxabahe îb xa ǂâi re. ǂAn da ase gu ge nē ǁâudīga ama tama elon ǀkha dī xū-e ūhâ tsî Elob xa ūǃoahe tama. Mûnan-ai re ǀnîsi du ge nē aob ǀkha Elobmîs ǁkhāǁkhāsa ǀgam wekhega Krismes aiǃâ go tsoatsoa. Khoexaǃnâsiba da ge ǁgau tide ǁîba da ga Elobmîs tae-e nē ǁâudīgu xa ra mîsa ǁkhāǁkhā tsî ga ǃâubaseno îb ǁîba ǁkhā ǁaeb ai Krismesa tsēdī ǀû. Ama as ge, ǀnî khoen Elobmîsa da ra ǁkhāǁkhān ge ǃkhaese ǁkhāǁkhāsenan ra xūna ra sîsenǂui. ǀNîn ge ǁaeba ra ū ǁîn ǂâiǀgaub tsî tanisen ǀgauga dawasa. Elobmîsa da ra ǁkhāǁkhā khoen ge ǂhâbasa ǀkharaǀkharana a dī ǁkhā, ǂhanu ǁaeb ai da ga tae-en nî dīsa a mîba nîo.—Khomai re ǂKhoamîdi 25:11 sa.

16. Mati da Elobmîsa da ra ǁkhāǁkhā khoena a hui ǁkhā în “amab ǃnâ ǃgû ǀgara”?

¹⁶ ǂGui xūn ge ra ǃgâiaǂgao kai da, nēs ge nauna Jehovab xa amaba ǁkhāǁkhās tsîna ǃkhōǂgā hâ. Saora xūna da ga dī o da ge ǁîna a hui ǁkhā în “amab ǃnâ ǃgû ǀgara”: ǃGâi aiǁgaus ase ǁîna ība re. (3Jhn. 3, 4) Dītsâ re î-i sats ra ûiǀgauba ǁgau Elobmîs ǃnâ hâ mîmâidets ra ǂgomsa. ǃGâi ǃaromas ǀkha amaba ǃhoas. Elobmîs amaba da ga ǁkhāǁkhā ǁaeb ai khoexaǃnâ mîde sîsenūs tsî Jehovaba koasa mās. Nēnats ga dī ots ge ra ǁgau Jehovab amab di Elobats ra ǃoabasa.