Hâ ǀgara nî ǃās ai ǂgomaiǂnûi

1. Jerusalems ǀkha i tae-e nî īsab ge Jesuba mî?

ǁŌB nîs aiǃâb ge Jesu Xristuba ǁîb ǁkhāǁkhāsabena kēbos xa ge mîba. Nē kēbos ge Jerusalems tsî ǁîs tempeli ge dīkakahe ǁaeb ai ge dīǀoaǀoahe. ǁÎb ge ǁîna ge ǃkhâikhom Jerusalems ǀguitsē ‘toroǂnubidi xa nî xaǂgāhesa.’ (Luk. 21:20) Jesub ge ǁîb ǁkhāǁkhāsabena ge mîba în nē toroǂnubiden ga mûo Judeaba xu ī. Jesub mîdi ge ge ama ī tsî i ge Romes toroǂnubide Jerusalemsa ge xaǂgā.—Luk. 21:​21, 22.

2. Apostel Pauluba Judeab tsî Jerusalems ǃnâ ge hâ i Xristeǁîna tae-e ge mîba?

² Romeǁî toroǂnubis Jerusalemsa nî xaǂnamipes aiǃâb ge Apostel Pauluba Hebreǁîn sîǂkhanisa ge xoa. ǁNā sîǂkhanis ǃnâb ge Pauluba Xristeǁîna ǃkhâikhomsa hānî ǃgom ǁaegu xa ge mîba. Tae-e nî ī ge īsa? Jerusalems nî hîkākāhe ge is ge. Nē Xristeǁîn ge ûiǃkharu ǂgaon ga hâo ǁîn omdi tsî ūn hâ xūn tsîna ga ǁnāxū hâ. Jerusalems xab ge Pauluba ge xoa: “Nēpa da ge ǁaposa ǃā-e ūhâ tama, amaga da ge ǃgoaxaǁaeb di-e ra ôa.”—Heb. 13:14.

3. ‘Ama ǃgaoǃgaoba ūhâ ǃāsa’ tae-e ǃoa ra ǁnaeǁgau tsî tae-i ǃaroma da ǁnāsa ǃoa ra mûǂui?

³ Xristeǁîn ge Judeab tsî Jerusalemsa xu a ī, on ge ǂgui khoena gere mî ǁîn gâre ti tsî gere âi. Xawe ǁnā mîǁguib ge ǁîn ûiga ge sâu. Khoen ge nētsē gâre da a ti ra mî, mari-i ai da ǂgomaiǂnûi tama tsî da khoesib nē ǃhūbaib ǃgomsiga nî ǀam kais ǃnâ ǂgom tama hâ amaga. Tae-i ǃaroma da ǁnā mîǁguiba ra dī? ǀGūǁaeb Elob Gaosiba nē eloxoresa ǃhūbaiba nî dīkākā amaga. Sida ge Elob Gaosib ai ra ǂgomaiǂnûi ǁîb “ama ǃgaoǃgaoba ūhâ ǃā” amaga.a (Heb. 11:10; Mat. 6:33) Nē ǁkhāǁkhāǃâs ǃnâs ge mâ xoaǂams hoasa: (1) Matib ge Pauluba Xristeǁîna a ǀapemā ǀgauba nî ǃhoaǃgao în Elob Gaosib ai ǂgomaiǂnûi ǀgara. (2) Matib ge Pauluba Xristeǁîna a hui ǀgausa în Jerusalemsa xu ǃkhoeni tsî (3) ǁîb ǀapemāsa nētsē mati sida nî hui ǀgausa.

JEHOVAB AI ǂGOMAIǂNÛI ǁÎB TĀTSĒ ǁNĀXUǃNÂ TSI TĪDE

4. Jerusalemsa tae-i ǃaroma Xristeǁîna ge ǂhâǂhâsaba ī?

⁴ Jerusalems ge Xristeǁîna kaise ge ǂhâǂhâsaba ī. ǂGuro Xristeǁî ǀhaohâb ge ǁnā ǃās ǃnâ ge tsoatsoahe 33ǁî kuri. ǂGaeǂguira soros ǃgâsagu tsîn ge ǁnāpa gere hâ. ǂGui Xristeǁîn ge omde ge ūhâ i tsî ǂgui xūn tsîna ge ǀhaoǀhaobasen hâ i ǁnā ǃās ǃnâ. Xaweb ge Jesuba ǁîb saosabena ge ǃkhâikhom în Jerusalems tsî Judeaba xu ǂoa.—Mat. 24:16.

5. Pauluba Xristeǁîna mati ge aiǂhomi?

⁵ Paulub ge gere ǂhâba în Xristeǁîna ǂhumisase hâ Jerusalemsa xu īsa ǁnā-amagab ge ǁîna gere hui în ǁnâuǃā Jehovab mati nē ǃās xa ra tsâsa. Tsîb ge ǁîna ge hōhōǃnâ Jehovab tempeli tawa hâ pristergab ūǃoa tama hâsa tamas ka io ǁnāpa ra dīhe ǁguibadi tsîna. (Heb. 8:13) ǃNāsa ǁanǂgāsaben ǁnā ǃās din ge Mesiaba ge ūǃoa ǂgao tama hâ i. ǂHâbasa tama i ge ge hâ i în khoena Jehovaba Jerusalems ǃnâ si ǃoaba, Jerusalems tsî tempeli tsîn nî hîkākāhe amaga.—Luk. 13:​34, 35.

6. Hebreǁîn 13:​5, 6 ǃnâb ge Pauluba mā ǀapemāsan ge Xristeǁîna tae-i ǃaroma ǂhâhâ i?

⁶ Paulub ge Hebreǁîna ǃoa a xoa ǁaeb ǃnân ge khoena Jerusalems ǃnâ hâs xa ge ǃgaibahe i tamas ka io sarisa. ǁNā ǁaeb Romeǁîn xoa-aob ge Jerusalemsa ǂanǂansa ǃās ase ge ǁnaeǁgau. Jodeǁîn ge ǂgui ǃhūga xu gere sī în ǁâudīga sī hâǃnâ nēs ǀkhan ge ǂgui mari-e gere sîsenū. Nēs xa ǃaromahe hâsen ge ǀnî Xristeǁîna ge ǃkhū. ǁNā-amagab ge Pauluba ǁîna ge mîba: “Tāb sadu di ûiba mariǃgunuxasib xa gaoǂamhe, î du ū du hân ǀkha ǂâu.” Jehovab ǃoaba-aona ǀgaisa ǂgomǃgâsiba ra mā xoasab ge ge sîsenū mîrasa: “Tita ge tātsē ǁnāxū tsi tsî ǃharaxū tsi tide.” (Khomai re Hebreǁîn 13:​5, 6; Deu. 31:6; Psa. 118:6) Judeab tsî Jerusalems tsîn ǃnâ ge hâ i Xristeǁîn ge Jehovab xan ǁnāxūǃnâhe tidesa nî ǂgomǃgâ ge is ge. Tae-i ǃaroma? Sîǂkhanisan ǃkhōǃoa hâs khaoǃgân ge ge ǂgaoǀkhāhe în ǁîn omdi, ǁamaxu ǃkhain tsî ūn hâ xūn tsîna ǁnāxū tsî doe. ǁNās khaoǃgân ge ǃhao ǃhūba ǃoa ge doe tsîs ge nēsa ge supu tama hâ i.

7. Tae-i ǃaroma da sida ǂgomǃgâsiba Jehovab ǃnâ nēsi nî ǀgaiǀgai?

⁷ Sida ra ǁkhāǁkhāsen xūn: Tae-e ǀgūǁae nî ī? ‘Kai ǁgâiǀāb’ ge nî tsoatsoa tsî i ge nē Eloxoresa ǃhūbaiba nî hîkākāhe. (Mat. 24:21) Jerusalems ǃnâ ge hâ i Xristeǁîn khami da ge nēsi ǂgomǂgomsase nî hâǀgara tsî ǁnāǁaeb ǃaroma nî aiǂhomîsen. (Luk. 21:​34-36) Kai ǁgâiǀab ǃnâ da ge sida omdi tsî ū da hâ xūn tsîna a ǂoaǃnâ ǁkhā. ǁNā ǁaeb ǃnâ da ge nî ǂgomǃgâ Jehovab tātsē ǁnāxūǃnâ da tidesa. Kai ǁgâiǀab nî tsoatsoas aiǃâ da ge nēsi ǃēsa ūhâ î da ǁgau Jehovab ǃnâ da ra ǂgomǃgâsa. Dîsen re, ‘ti mîǁguigu tsî dī ta ra xūna ra ǁgau māri-i ai ta ra ǂgomǃgâsa tamas ka io Jehovab ai?’ (1Tim. 6:17) ǃKharu ge ǁaeb Xristeǁîn aiǁgaudi ge ra hui da î da ǂgomǂgomsase hâ, ‘kai ǁgâiǀāb’ ǁaeb ǃnâ. Xawe kai ǁgâiǀāb ǃnâ da ge noxoba da hōǃâ tama ǃgomma nî tsâ. Kai ǁgâiǀab ga tsoatsoa o da mati nî ǂan tae-e da nî dīsa?

ǂGAEǂGUIRA ǃGÂSAGA ǁNÂUǀNAM

8. Jesuba ǁîb ǁkhāǁkhāsabega mâ daoǁgausa ge mā?

⁸ ǀOro kuriga ǃkharu tsîn Paulub sîǂkhanisa Hebreǁîna ǃoa xoa hâs khaoǃgân, ge Xristeǁîna ge mû matis Romes toroǂnubisa Jerusalemsa xāǂnamipe hâsa. ǁNās ge īs khaoǃgân ge Xristeǁîna ge ǂan i Jerusalems tsî Judeab tsîna xūn nî ǃkhoesa ǀgūǁaes Jerusalemsa nî dīkākāhe amaga. (Mat. 24:3; Luk. 21:​20, 24) Mâ ǃkhai-e ǃoan nî ī ge isa? Jesub ge ge mî: “An Judeab ǃnâ hâna ǃhommi ǃoa” ǃkhoe. (Luk. 21:21) ǁNā ǀkharib ǃnâ i ge ǂgui ǃhomga ge hâ i. Xawen ge mati ǂan i mâ ǃhomma ǃoan nî īsa?

9. Xristeǁîna tae-i ǃaroma ǀnîsi gere ǂâi mâ ǃhomga ǃoan nî īsa? (ǃHūb ǂhaweba mû re.)

⁹ Xristeǁîn ge sao ra ǃhomga ǃoa nî ǃkhoe ge is ge: Samariab ǃhomgu, Galileab ǃhomgu, Hermoni ǃhommi, Lebanons ǃhomgu tsî Jordan ǃāb nau ǀkhab ai hâ ǃhomgu tsîna ǃoa. (ǃHūb ǂhaweba mû re.) ǁNā ǃhomgu ǃnân ge khoen ǃnorasa a ti ge gere ǂâi ǀnî ǃāde ge hâ i. Aiǁgause i ge Gamla ti ǀon hâ ǃāsa ge hâ i ǃhomgu ge kaise ge ǀgapi i tsî i ge ge ǃgom-i ǁnāpa sīsa. ǀNî Jodeǁîn ge gere ǂgom nē ǃās ǃnâ ǁans ge ǃnorasa i ǃkhaisa. Xawen ge Romeǁîna ǁnā ǃāsa ǁnāǂam tsî ǃās ǁanǂgāsaben tsîna ge hîkākā.b

10-11. (a) Jehovaba mati Xristeǁîna ge daoǁgau? (Hebreǁîn 13:​7, 17) (b) Xristeǁîna mati ge ǀama ǂgaeǂguisa ra ū ga ǁnâuǀnams ǃnâ-ū? (Ai-īsiba mû re.)

¹⁰ Jehovab ge ǀnîsi Xristeǁîna ǀhaohâba ra ǂgaeǂguigu ǃnâ-ū gere daoǁgau. ǀOrokam ǁaeb xoa-aob Eusebiusi ge ega ge xoa ǁîb ge ge mî: “Elob ge ǀnî ǃgâsaga ǂhaiǂhaisa ge mâ în Jerusalems ǃnâ hâ Xristeǁîna Pelasa ǃoa ī Bereas ǃnâ hâ kai ǃāsa.” ǂHanuse i ge gere mûsen Xristeǁîna Pelasa ǃoa īsa. Jerusalemsa xu i ge ge ǃnū tama hâ i tsî ge supu ī ǁnāpa sīsa. ǃNāsa khoen Pelas ǃnâ gere hân ge ge Jodeǁî tama hâ i, ǁnās ǀkhan ge Romeǁîn ǃoagu ge ǃkham tama hâ i.—ǃHūb ǂhaweba mû re.

¹¹ “Sadu ǀhaohâb ǃûi-aoga ǁnâuǀnam”, ti hâ ǀapemāsa ge sao xristeǁîn ge ge ǃkhoe. (Khomai re Hebreǁîn 13:​7, 17 sa.) ǁNās xa ǃaromahe hâsen ge Elob khoena ge sâuhe. “Ama ǃgaoǃgaoba ūhâ ǃās,” Elob Gaosiba ǃoa ra ǁnaeǁgaus ǃnân ǂgomǃgâsiba ūhâ, amagab ge Jehovaba ge ǁnāxūǃnâ nî tama hâ i.—Heb. 11:10.

12-13. Jehovaba mati ǁîb khoena ǃgom ǁaegu ǃnâ ge daoǁgau?

¹² Sida ra ǁkhāǁkhāsen xūn: Jehovab ge ǂgaeǂguira ǃgâsagu ǃnâ-ū ǁîb khoena daoǁgaude ra mā. ǂGui aiǁgaudi ge Elobmîs ǃnâ hâ ǁgau ra te Jehovab ge ǂgomǂgomsa aoga a sîsen ūsa îb khoena daoǁgau ǃgom ǁaegu ǃnâ. (Deu. 31:23; Psa. 77:20) Nētsē da ge ǃgāsase ra mû Jehovab ǂgaeǂguira ǃgâsaga ra sîsen-ūsa î gu ǁîb khoena daoǁgau.

¹³ Aiǁgause, Koronas ge tsoatsoa o gu ge “ǂgaeǂguira ǃgâsaga” ǂhâbasa daoǁgaude gere mā. ǀHaohâb ǃui-aogu ge daoǁgaude ge māhe mati gu ǀhaohâga ǀhao tsî Jehovaba ǃoabas ǀkha nî aiǃgûsa. ǀOro ǁkhâga nē ǂkhīǁōs tsoatsoa hâs khaoǃgâ da ge 500 gowagu ǃnâ ǀkharib kai ǀhaosa ge ūhâ i. ǃHūbaib ǂhawase hâ ǃgâsan ge nē ǁaxasiba internets tamas ka io tv ai ge kō ǁkhā i tsîn ge ǀnîna radios ǃnâ-ū gere ǃgâ. Nē ǂkhī ǁōs hâ hîna da ge noxoba aiǃgû tsî ǂhâ da hâ daoǁgaude Jehovaba xu gere ǃkhōǃoa. ǁNās xa ǃaromahe hâse da ge ǀguiǃnâxase ge hâ ǀgara. ǂGomǃgâsiba da ge ūhâ mâ ǃgomsi-i ǀgui-e da ga hānîǁaeb ǃnâ hōǃâ xaweb Jehovaba aiǃgû tsî ǂgaeǂguira ǃgâsaga nî huisa îgu aiǃgû tsî gā-ai mîǁguiga dī. Kai ǁgâiǀāb ǃgao aiǂhomisens ǃaroma da ge gā-aise nî tanisen ǁnā ǃgom ǁaegu ǃnâ. Jehovab mîmāde da ge nî ǁnâuǀnam tsî ǂgaeǂguira ǃgâsaga nî ǂgomǃgâ. Mâ ǀkhara ǀgaugu tsîna da ǂhâ hâ?

ǃGÂSA ǀNAMGUB TSÎ ǃHAOKHOEǃKHŌǃOAXASIBA ǁGAU

14. Hebreǁîn 13:​1-3 ǃoagun Xristeǁîna mâ ǀgauga gere ǁgau Jerusalems di hîkākās aiǃâ?

¹⁴ Kai ǁgâiǀab ga tsoatsoa o da ge nēsi da ra ǁgaugu ǀnammi xa ǃnâsa ǀnamma nî ǁgaugu. ǁNā ǁaeb ǃnâ da ge Jerusalems tsî Judeab tsîn ǃnâ ge hâ-i ǃgâsan di aiǁgausa nî sao. ǁÎn ge hoaǁae ǀnamma gere ǁgaugu. (Heb. 10:​32-34) Jerusalems nî hîkākāhes aiǃâ ge hâ i kurigu ǃnâ i ge ‘ǃgâsaǀnamgub’ tsî ‘ǃhaokhoeǃkhōǃoaxasib’ tsîna ǁgaugusa ǃnāsase ge ǂhâbasa i.c (Khomai re Hebreǁîn 13:​1-3 sa.) ǁKhā xū-i ge sida ǀkha nî ī nē xūn di ǀams ra ǀgū khami.

15. Tae-i ǃaroman Hebreǁî Xristeǁîna ǃgâsa ǀnammi tsî ǃhaokhoeǃkhōǃoaxasib tsîna nî ǁgaugusa ge i ǃkhoen ges khaoǃgâ?

¹⁵ Romeǁî toroǂnubi di ge Jerusalemsa xaǂam tsî ǁnāpaxū ǃhae ǁaeb ǃnâ ī, on ge Xristeǁîna ūn ge hâ i ǀoro xūn ǀkha ǀgui ge doe. (Mat. 24:​17, 18) ǁÎn ge ǃhomga ǃoan gere ī daob ǃnâ ge ǂhâ gu hâ i. Tsîn ge Pelas ǃnâ sī on nî ǀasa ûiba tsoatsoas ǀkha hui gus ge ge ǂhâbasa i, în hân ǃkhai-i tsî sîsenni tsîna hō. ǂGui ǃgâsan ge ǂû-i, saran tsî hân nî ǃkhai-i tsîna ge ǂhâ hâ i. Ūn ge hâ i xūna ǀgoragus ǃnâ-ūn ge Xristeǁîna ǁîn ǀgaisa ǀnammi tsî ǃhaokhoeǃkhōǃoaxasib tsîna ge ǁgaugu ǁkhā i.—Tit. 3:14.

16. Mati da sida ǀnamma ǃgâsan ǂhâsib ǃnâ hâna ǁgau ǁkhā? (Ai-īsiba mû re.)

¹⁶ Sida ra ǁkhāǁkhāsen xūn: Sada ǃgâsana da ge kaise a ǀnam ǁnā-amaga da ge ǁîna ra hui ǂhâsib ǃnân ga hâ o. Aiǁgause ǂguin ge ǁîn di ǃgâsan hîna ge torogu tamas ka io tsūkeǃgâgu ǃnâ hâ i na māsenxase ge hui. ǁÎn ge nē ǃhūsabena ǂhân hâ xūn huib tsî ǂkhâǃnâs tsîna ge mā în aiǃgû tsî Jehovaba ǃoaba ǀgara. Torob xa ǃaromahe hâse ge Ukraina xu a doe ǃgâsas ge ra mî: “Mû ta ge ge Jehovab sida ǃgâsana ra sîsenū ǀgausa, îb daoǁgauda tsî kōǃgâ da. ǁÎn ge ǃgaise Ukrainni tsî Hungerib ǃnâ ge ǃkhōǃoa da tsî da ge nēsisa Duits ǃhūb ǃnâ hâ.” ǁNān hîna ǃgâsana ǃhaokhoeǃkhōǃoaxasiba ǁgau tsî ra kōǃgân ge Jehovab xa ra sîsen ūhe.—ǂKhm. 19:17; 2Kor. 1:​3, 4.

17. Tae-i ǃaroma i kaise nēsi a ǂhâǂhâsa î da ǃgâsa ǀnamgub tsî ǃhaokhoeǃkhōǃoaxasib tsîna ǁgau?

¹⁷ Kai ǁgâiǀāb ǃnâ da ge nēsis xa ǃnāsase nî hui gu. (Hab. 3:​16-18) Jehovab ge nēsi ra hui da î da ǃgâsa ǀnamgub, ǃhaokhoeǃkhōǃoaxasib tsî ǁnā ǁaeb ǃnâ nî ǂhâbasa ǂhâǂhâsa ǀgaugu tsîna omkhâi.

TAE-E HĀNÎǁAEB ǃNÂ NÎ Ī?

18. Mati da Jerusalemsa xu ge ī Xristeǁîna a ǁgae ǁkhā?

¹⁸ ǁNâuǀnam tsî ge ǃhomga ǃoa ǃkhoe Xristeǁîn ge ge ûiǃkharu Jerusalems ge hîkākāhe o. ǁNā ǃāsan ge ge ǁnāxū xaweb ge Jehovaba ǁîna ge ǁnāxū tama hâ i. ǁÎn aiǁgausa xu da tae-e a ǁkhāǁkhāsen ǁkhā? Hānîǁaeb ǃnâ nî ī xūn hoana da ge ǂan tama. Xaweb ge Jesuba ge ǃkhaikhom da î da aiǂhomîsase hâ ǁnâuǀnamsa. (Luk. 12:40) Paulub ge Hebreǁîna ǃoa a xoa sîǂkhanisa xu da ra ǁkhāǁkhāsen xūna da ge a sîsenū ǁkhā. Jehovab ge aitsama mâ ǀguiǀguibe khoe-i hoa-e ǃoa ra mîmâi ǁî-eb ǁnāxūǃnâ tide ǃkhaisa. (Heb. 13:​5, 6) Hā re î da aiǃgû tsî Elob Gaosib ǃnâ ǂgomǃgâ ǁnā ǃās hîna ǀamose nî hâhâsa. ǁNāsa da ga dīo da ge îsa ǀkhaega ǀamosib kōse nî hōǃâ.—Mat. 25:34.