Jehovab ǀonsa tae-i ǃaroma Jesuba ge ǂhâǂhâsaba i?

1-2. (a) Jesuba ǃgamheb nî ǃuis aiǃâ tae-e ge dī? (b) Mâ dîde da nē ǁkhāǁkhāǃâs ǃnâ nî ǃhoaǃgao?

JESUB ge ǁîb di ǂgomǂgomsa apostelgu ǀkha ǃKhūb di ǃuiǂûsa Nisanni 14, 33ǁî kuri ǃuia ge ūhâ i. ǁÎb ge ge ǂan i Judab nî ǀapexubisa tsîb ǂnauhe tsî ǁîb di khākhoen xa nî ǃgamhesa. ǂÛs khaoǃgâb ge ǁîba ǂgui ǂkhâǃnâ ra xūna ǁîb di apostelga ge mîba. Jesub ge kaise ǂhâǂhâsa ǀgoresa ge dī ǁîgu nî īs aiǃâ. ǁNā ǀgoresa da ge Johanneb 17ǁî danaǃâs ǃnâ a khomai ǁkhā.

² Nē ǁkhāǁkhāǃâs ǃnâ da ge nî mû taena da Jesub ǀgoresa xu a ǁkhāǁkhāsen ǁkhāsa. Tae-i xab gere ǂâiǂhânsen ǁōb nîs aiǃâ? ǃHūbaib aib ge hâ io tae-e Jesuba ge ǂhâǂhâsaba i? Hā re î da ǁnā ǀgam dîra di ǃereamde ǃhoaǃgao.

“TITA GE SA ǀONSA ǁÎNA GE ǂANǂAN”

3. Jesuba tae-e Jehovab ǀons xa ge mî tsî tae-eb gere ǂâibasen? (Johaneb 17:​6, 26)

³ ǁÎb di ǀgores ǃnâb ge Jesuba ge mî: “Tita ge sa ǀonsa ǁîna ge ǂanǂan.” ǂAn da ge a nēs ge Jesuba kaise ǂhâǂhâsaba isa, nēsab ge ǀgam ǃnāra a mî amaga. (Khomai re Johaneb 17:​6, 26 sa.) ǁÎba tae-e gere ǂâibasen? ǁÎgab ge ǀūgu a ǀons xa mîba? Jesub di ǁkhāǁkhāsasbegu ge ge Jodeǁî ī tsî gu ge ge ǂan-i Elob ǀons a Jehovasa. ǁNā ǀons ge Hebre xoadi ǃnâ ǁaubexa 7 000 ǃnāde hâ. Jesub ge sa ǀonsa da ge ge ǂanǂan ti a mî, o ge ǂâibasen tama hâ i Elob Jehova ti ra ǂgai ǀonhesa. Xaweb ge ǁîga ge ǁkhāǁkhā Jehova Elob a mâǃnôa Elosa. Jesub ge ǁîb di ǁkhāǁkhāsabega ge hui î gu Jehovaba ǃgâise ǂan. Nēs ge Jehovab ǂâibasens, khoen tsî ǃhūbaib tsînab ūba hâsa ǃkhōǂgā hâ, tae-eb ge dīs, tae-eb sī nî dīs tsî mâ ǀgaugab ūhâsa. Jesub ǀguib ge Jehovaba ǃgâise a ǂan.

4-5. (a) Mati i khoe-i ǀonsa ǃnāsase a ǂhâǂhâsa ǁkhā? Aiǁgau-e mā re. (b) Jesub di ǁkhāǁkhāsabega mati Jehovaba ǃgâise ge ǂan?

⁴ Aiǁgause i ge ǀnîsi sadu ǀhaohâb ǃnâ David ti ǀon hâ ǀhaohâb ǃûi-aoba hâ, ǁîb ge a dokter, ǁnā ǃgâsaba du ge ǀnîsi ǂgui kuriga a ǂan. ǀNîsi i ge sadu ûib ǃnâ ǁkhōǁkhōsa mâsiba nî hâ tsî du ge dokter-e nî ǂhâ tsî du ge hospitalsa ǃoa ra ī ūhe. Tsîb ge ǁnā ǃgâsaba sadu ûiba ra sâu. Nēsisa du ge nē ǃgâsaba a ǀnam ǂguros xa. ǁÎb ǀonsa du ga ǁnâu, o du ge ra ǂâihō ǁîb ge tae-e dība dusa. Davidi ge noxopa ǁnā ǃgâsab gaixuse du a ǂanba xaweb ge nēsi a dokter sadu ûiba go sâuba.

⁵ ǁKhā ǀgaub ǃnâ gu ge Jesub ǁkhāǁkhāsabega Jehovab ǀonsa ǀnai ge ǂan i. Xawe ǁnā ǀons ge ǁîga nēsisa ǃnāsase ge ǂhâǂhâsaba i. Jesub ge ǁîga hui î gu Jehovaba ǃgâise ǂan amaga. Tae-i ǃaroma da ti ra mî? Jesub ge ǁîb ǁGûba, ǁîb gere mî tsî dī xūn hoan ǃnâ gere ǁgae amaga. Jesub ǁkhāǁkhāsabegu ge Jesub gere ǁkhāǁkhā ǀgauba mû tsî matib nauna ra hâ-ū ǀgausa, o gu ge Jehovaba ǃgâise ge “ǂan” ǁkhā i.—Jhn. 14:9; 17:3.

“SA ǀONS, TITATS GE MĀS” ǃNÂ-Ū

6. Jesuba tae-e gere ǂâibasen, Jehovab ge ǁîb ǀonsa ǁîba mā tib gere mîo? (Johaneb 17:​11, 12)

⁶ ǁÎb ǀgores ǃnâb ge Jesuba ǁîb ǁkhāǁkhāsabega ge ǀgoreba: “ǁÎna sa ǀons, titats ge mās” ǃnâ-ū sâu. (Khomai re Johaneb 17:​11, 12 sa.) Nēsa ra ǂâibasen Jesub nî Jehovab ase ǂanhesa? Hî-î. Jesub ge Jehovab ǀons xa ǃhoa, ob ge “sa ǀons” ǃaroma ti ge mî. Nēs ge ge ǂâibasen tama hâ i, Jehovab ǀons ge Jesub di ǀon kaisa. Jesuba tae-e ge ǂâibasen Elob ǀonsab ge māhe tib gere mîo? ǂGurose, Jehovab ge Jesuba ge sî îb ǁîba ǃhoaba. ǁÎb ge ǁîb ǁGûb di ǀons ǃnâ ǀkhī tsî buruxa dīga gere dī ǁnā ǀons ǃnâ. (Jhn. 5:43; 10:25) ǀGamǁîse, Jesub ǀons ge “Jehovab a ore-ao” ti ra ǂâibasen. Jesub ǀons ǂâibasens ge Jehovab ǀonsa ǃkhōǂgā hâ.

7. Jesuba tae-i ǃaroma Jehovaba ge ǃoaba ǁkhā i? Aiǁgau-e mā re.

⁷ Jesub ge Jehovaba ǃoaba ǁkhā īsa ǁnâuǃās ǃaroma sao ra aiǁgaus xa ǂâi re. ǂGaeǂgui-ao i ge nau khoe-e a sî ǁkhā în naun ǀkha ǃhoaba bi. ǁNā khoe-i ga ǃhoao, i ge ǂgaeǂguira aob ǀkha ǀgui ǃereamsa ūhâ. Jesub ge Jehovaba ǃhoabas ǃereamsa ge ūhâ i, Jehovab xab ge sîhe hâ i amaga.—Mat. 21:9; Luk. 13:35.

8. Tae-i ǃaromab ge Jehovaba mî ǁîb ǀons Jesub ǃnâ hâsa ǃhūbaib aib nî hās aiǃâ? (Eksodus 23:​20, 21)

⁸ Elobmîs ge Jesuba ‘mîs’ ti gere ǂgai, Jehovab ge ǁîba gere sîsenū amaga, îb ǀhomǃgān tsî khoen tsîna mîba Jehovab tae-e ǁîna xu ra ǂgaoǀkhāsa. (Jhn. 1:​1-3) Jesub ge ǀnîsi ǁnā ǀhomǃgā ge îba, Jehovab ge sîba îb Israelǁîna ǃgaro ǃhūb ǃnâ kōǃgâ. Jehovab ge Israelǁîna mîba în ǁnā ǀhomǃgâba ǁnâuǀnam, ob ge ǁîna ge mîba tae-i ǃaroman ǁnāsa nî dīsa. ǁÎb ge ge mî: “ǁÎb ti ǁkhāsib hoaba ūhâ.”a (Khomai re Eksodus 23:​20, 21 sa.) Jehovab ge nēsa ge mî Jesub ǁîba gere ǃoaba amaga. Tsîb ra ǁgausa Jehovab hoa xūn ǃnâ ǂhanu tsî ǃanusa.

“TI ÎTSE, SA ǀONSA ǂKHAIǂKHAI RE!”

9. Jehovab ǀonsa matikōse Jesuba ge ǂhâǂhâsaba i? ǁGuiǃā re.

⁹ ǃHoaǃgao da go khamib ge Jesuba, Jehovab ǀons xa kaise ge ǂhâǂhâsabahe i ǃhūbaib aib nî hās aiǃâ. ǃHūbaib aib ge hâ i, ob ge Jesuba hoa xūn ǃnâ Jehovab ǀons a ǂhâǂhâsasa ge ǁgau. ǁÎb di aoǁnâs lams aib ge Jehovaba ge ǂgan “ti îtse sa ǀonsa ǂkhaiǂkhai” re. ǃKhaeseb ge ǁGûba ǀhomma xu ǃgari dommi ǀkha ge ǃeream: “ǀNai ta ge go ǂkhaiǂkhai si tsî ta ge ǁkhawa nî ǂkhaiǂkhai si.”—Jhn. 12:28.

10-11. (a) Matib ge Jesuba Jehovab di ǀonsa ǂkhaiǂkhai? (Ai-īsiba mu re.) (b) Tae-i ǃaromas Jehovab ǀonsa ǃanuǃanuhe tsî nî ǂhanuǂhanuhe?

¹⁰ Jesub tsîn ge ǁîb ǁGûb ǀonsa ǂkhaisiba ge mā. Mâ ǀgaub ǃnâ? ǀGui ǀgaub ge Jehovab di buruxa ǀgauga ǂanǂansa tsî naunab ge dība buruxa xūn tsîna. Xaweb ge ǀkhara xū-i tsîna ge dī. Jesub ge nî ǁgaus ge Jehovab hoa xūna ǃanuse ra dīsa tsî ǁîb ǀonsa a ǃanusa.b Jesub ge nēsa ge ǁgau matikōse i nēsa a ǂhâǂhâsasa, ǁîb di saosabenab ge ǁkhāǁkhāo matin nî ǀgoresa. ǁÎb ge ge mî: “Sida Îtse ǀhommi ǃnâ hâtse sa ǀonsa as khaihe re.”—Mat. 6:9.

¹¹ Tae-i ǃaromas Jehovab ǀonsa ǃanuǃanuhe tsî nî ǂhanuǂhanuhe? Edens ǃhanab ǃnâb ge ǁGâuaba ǂhumiba Jehovab Elob xa a mî amaga. ǁGâuab ge ge mî Elob a ǂhumi-ao tsîb ǃgâi xūna Adammi tsî Eva hâra xu ra ǃkhō-oasa. (Gen. 3:​1-5) ǁNāsa dīs ǃnâ-ūb ge ǁGâuaba gere mî Jehovab xūna ǂhanu ǀgaub ǃnâ dī tama hâsa. ǁGâuab ge Jehovab xa ǂhumi amagan ge khoena ra ǂâi Jehovab a ǁgai Elo ti. ǁNās khaoǃgâ Jobi tsēdi ǃnâb ge ǁGâuaba ge mî, Jehovaba ra ǃoaba khoen ǁîba xun ra hō ǃgâi xūn ǃgao ǀgui ǁîba ra ǃoaba ti. ǁNā ǂhumi-aob ge ge mî khoen Jehovaba nî ǃoaba ǀûsa, ǃgomsinan ga hōǃâ o Jehovaban ama ǀnam tama amaga. (Job. 1:​9-11; 2:4) ǁAeb ge ge ǂhâbasa i ǁgausa ham-i ge ǂhumi-ao isa Jehovab tsî ǁGâuab ǁaegu.

“TI ÛIBA TA RA ǁGUIBA”

12. Tae-eb ge Jesuba māsenxase gere dī Jehovab ǀonsab ǀnam ǃkhais ǃaroma?

¹² Jehovabab ūba hâ ǀnammi ǃaromab ge Jesuba ǁkhāb a-i hoa-e gere dī ǂgao, îb Jehovab ǀonsa ǂhanuǂhanu tsî ǃanuǃanu. Jesub ge māsenxase ǁîb “ûiba” gere mā îb ǁgau, Jehovab a ǃanu tsî ǁîb daogu a ǂhanusa. (Jhn. 10:​17, 18) Adammi tsî Eva hâra ǀoasa kurusa ge ūhâ i ra ge Jehovaba ǁnâuǀnamoǃnâ tsî ǁGâuaba ge sao. ǁNā-amagab ge Jesuba māsenxase ǃhūbaiba ǃoa hā tsî geǁgau Jehovabab a ǀnam ǃkhaisa.c Jesub ge Jehovaba gere ǁnâuǀnam, dī tsîb gere mî xūn hoan ǃnâ. (Heb. 4:15; 5:​7-10) ǁÎb ǂhauǃnâsibab ge ǁîb ûib hoaba ge ǃkhōǀgara, tsûtsûsa ǁōbab nî ǁōs kōse. (Heb. 12:2) Nē ǀguab ǃnâb ge ge ǁgau Jehovab tsî ǁîb ǀons tsînab a ǀnamsa.

13. Jesuba tae-i ǃaroma ge ǂhanu khoe-i ǁGâuab a ǂhumi-aosa ǁgausa? (Ai-īsiba mû re.)

¹³ Jesub gere dī xūn hoan ge gere ǁgau, ǁGâuab a ǂhumi-aosa Jehovab ose. (Jhn. 8:44) Jesub ǀguip ge Jehovaba ǃgâise ge ǂan i. ǁGâuab ge Jehovab xa mî xūn ga ama hâ, ob ge Jesuba ǁnāsa ga ǂan hâ. Xaweb ge Jesuba ge mâǁapo Jehovab ǀonsa ǁkhaubas ǃnâ. Jehovab gere ǁnāxū bi khami i gere mûsen xaweb ge Jesuba māsenxase ǁō tsî ǂgomǂgomsase ge hâ, îb tā ǁîb ǀnamxaǃnâ ǁGûba ǁnâuǀnamoǃnâ.—Mat. 27:46.d

‘ǁNĀ SÎSENNI DĪ TA NÎSETS GE MĀ TEBA TA GE DĪTOA’

14. Jehovaba mati Jesub di ǂgomǂgomsasiba ge mādawa-am?

¹⁴ ǁŌb nîs aiǃâb ge dī ǀgores ǃnâb ge Jesuba ge mî ǁkhā i, ‘ǁnā sîsenni dī ta nîsats ge mā teba ta ge dītoa.’ ǁÎb ge gere ǂgomǃgâ Jehovab ǁîb ǂgomǂgomsasib ǃaroma nî mādawa-am bi ǃkhaisa. (Jhn. 17:​4, 5) Jesub ge ge ǂhanu i, ǁîb Dadasab ǃnâ ǂgomǃgâsiba ūhâsa. Jehovab ge ge mā-am tama hâ i, îb ǁnā ǀhobas ǃnâ hâ ǀgara. (ǃNǃkh. 2:​23, 24) Jesuba khâisa mā tsîb ge ǀgapi ǃharos tsîna ǀhommi ǃnâ ge mābi. (Fil. 2:​8, 9) ǁNās khaoǃgâb ge Jesuba Elob Gaosib di Gao-aob ase ge ǂgaeǂgui tsoatsoa. Elob Gaosiba taena nî dīǀoaǀoaba da? ǀGamǁî ǃâb ǁnā ǀgores dib ge ra mîba da: ‘Sa Gaosiba ab hā re, sa [Jehovab] ǂâisa as ī re ǀhommi ǃnâs ra īs ǁkhās khami, ǁnāti ǃhūbaib on ai.’—Mat. 6:10.

15. Jesuba tae-i tsîna nî dīǀoaǀoa?

¹⁵ ǀGūǁaeb ge Jesuba Elob khākhoen ǃoagu nî ǃkham tsî eloxoresa khoena Armagedons dawa nî hîkākā. (J.ǂHa. 16:​14, 16; 19:​11-16) ǁNās khaoǃgâb ge ǁGâuaba “ǃgam āb” ǃnâ nî aoǂgā tsîb ge xū-i xare-e dī hō tide. (J.ǂHa. 20:​1-3) ǁNāpaxub ge Jesuba ǀoadisi kuriga nî ǂgaeǂgui tsîb ge ǂkhîba ǃhūbaib ai nî oaǀkhī-u tsî khoena nî hui în ǀoasa kurusa ūhâ. ǁŌhâna khâisa mā tsîb ge hoa ǃhūbaiba nî paradais kai. Jehovab di ǂâis ge nî dīǀoaǀoahe.—J.ǂHa. 21:​1-4.

16. Ûiba mati nî ī ǀoadisi kurigu khaoǃgâ?

¹⁶ Ûiba mati nî ī ǀoadisi kurigu khaoǃgâ? ǁOreb tsî ǀoasaoǃnâsib tsîn ge nî bē. Xoremarib ge ǂhâbasa tide. Khoen ge ǂkhauhesaga ǂhâ tide ǁîn di pristergu ase tsî Jesub tsîna ǀgapi pristeri ase în ǃgâi ǀhōsagusisa Jehovab ǀkha ūhâ. Tsî “ǀuni khākhoeb, hîkākāhe nîb ge ǁōba.” ǁŌhân ge khâisa nî hō ǃhūbaib ai hâ khoen hoan ge ǀoasa kurusa nî ūhâ.—1Kor. 15:​25, 26.

17-18. (a) ǀOadisi kurigu ǂgaeǂguis khaoǃgâ î tae-e nî ī? (b) Jesuba tae-e nî dī ǁîb ǂgaeǂguis ǀams ai? (1 Korinteǁîn 15:​24, 28) (Ai-īsiba mû re.)

¹⁷ ǀOadisi kurigu ǀams ai i tae-i tsîna noxopa nî ī? ǀŌ-aisa xū-i ge nî ī. Khoe-i ge tātsē îganǀgē tide Jehovab a ǃanu tsî ǂhanu Elosa. Tae-i ǃaroma? Edenni ǃhanab ǃnâb ge ǁGâuaba ge mî Jehovab a ǂhumi-aosa tsîb khoena ǀnammi ǃnâ ǂgaeǂgui tamasa. Khoen hîna ge Jehovaba ǃoaban ge ǃnākorobe ge ǁgau ǁîb ǀgaugu a ǃgâisa. ǀOadisi kurigu ǀams ai i ge Jehovab ǀonsa ǀoasase nî ǂhanuǂhanuhe. ǁÎb ge ǃgāsase nî ǁgau ǀnamxaǃnâ ǀhomsi ǁGûb asa.

¹⁸ ǀOadisi kurigu ǀams ain ge hoa khoena nî ǂan ǁGâuab ge Jehovab xa mî xūn ge ǂhumi isa. Jesuba tae-e nî dī ǁîb ǂgaeǂguis ǀams ai? Jesuba ǁGâuab khami Jehovaba nî mâǃoa? Tātsēs tsîna. (Khomai re 1 Korinteǁîn 15:​24, 28 sa.) Jesub ge Gaosiba ǁîb ǁGûba nî mā-oa tsî nî ǃgamǃgamsen. Jesub ge ǁîb ǂgaeǂguis di ǁkhāsiba Jehovaba ra mā-oa ǁîbab a ǀnam amaga. ǁÎb ge ǁGâuab khami ī tama.

19. Jehovab ǀonsa Jesub ǃaroma tae-e ra ǂâibasen?

¹⁹ ǁNā-amagab ge Jehovaba māsenxase Jesuba ǁîb ǀonsa ge mā. Jesub ge ǀoasase ǁîb Dadasab ǀgauga ge ǁgau. Jehovab ǀonsa Jesub ǃaroma tae-e ra ǂâibasen? ǁNā ǀons ge kaise ǂhâǂhâsa hoa xūn ǂam-ai. ǁNā ǀons ǃaromab ge ge ǁō tsîb ge Jehovaba hoa xūna nî mā-oa ǀoadisi kurigu ǀams ai. Mati da Jesub di aiǁgausa nî ǁgae? ǁNā ǃereamsa da ge sao ra ǁkhāǁkhāǃâs ǃnâ nî ǃhoaǃgao.