Jehovab ǀons ge sida ǂhâǂhâsaba

1-2. Mati da a ǂan Jehovab ǀons Jesuba kaise a ǂhâǂhâsaba ǃkhaisa?

JESUB ge Jehovab ǀons xa kaise ge ǂhâǂhâsabahe i. Jesub ge ǃnāsase ge sîsen îb Jehovab ǀonsa ǂanǂan. ǃKharugo ǁkhāǁkhāǃâs ǃnâ da ge go mû, Jesub ge māsenxase a ǁōsa îb ǁgau, Jehovab ǃanu tsî ǁîb ǀgaugu hoagu ǂhanusa. (Mrk. 14:36; Heb. 10:​7-9) ǀOadisi kurigu ǂgaeǂguis khaoǃgâb ge Jesuba ǂgaeǂguis ǁkhāsiba nî mā-oa îb Jehovaba hoa ǂkhaisiba māhe. (1Kor. 15:​26-28) Jesub Elob ǀonsa ǀnams ge ra ǁgau ǁîb mâǃnôa ǀhōsagusisa ǁîb ǁGûb ǀkha ūhâsa. Nēs ge ra ǁgau Jesub ǁnā ǀonsa tani hâ khoeba kaise ǀnamsa.

² Jesub ge ǃhūbaiba ǃoa ge hā îb khoena tae-en Jehovab xa nî ǂansa mîba. (Jhn. 5:43; 12:13) ǁÎb saosabenab ge ǁîb ǁGûb ǀons xa ge mîba. (Jhn. 17:​6, 26) Khoenab gere ǁkhāǁkhā tsî buruxa dīga gere dī, ob ge ǁîna ge ǁgau Jehovab gā-aisib tsî ǀgaib tsîna xub ge nē xūna gere dīsa. (Jhn. 10:25) Jesub ge Jehovaba ge ǂgan îb ǁîb ǁkhāǁkhāsabena ǁîb “ǀons” ǃaroma kōǃgâ. (Jhn. 17:11) Amase î ge ǃgāsase ra ǁgau Jehovab ǀons Jesuba hoa xūn ǂam-ai kaise ǂhâǂhâsaba isa. ǁNā-amaga i mati khoe-e Jehovab saosabese nî ǂgaisen Jehovab ǀonsan a ǀū tsîn sîsenū tama hâ hîna?

3. Tae-e da nē ǁkhāǁkhāǃâs ǃnâ nî ǃhoaǃgao?

³ Ama Xristeǁî da a amaga da ge Jesuba ǁgae tsî Jehovab ǀonsa ǀnammi tsî ǃgôasib tsîna ra ǁgau. (1Pet. 2:21) Nē ǁkhāǁkhāǃâs ǃnâ da ge nî mû Jehovab ge tae-i ǃaroma ǁnān Elob “ǃgâiǂhôas Gaosib” disa ra aoǁnâna, ǁîb ǀons ai ra ǂgaisa. (Mat. 24:14) Tae-i ǃaromas Jehovab ǀonsa mâ khoe-i hoa-e nî ǂhâǂhâsabas tsîna da ge nî ǃhoaǃgao.

ǁÎB ‘ǀONSA’ ŪHÂ KHOEN

4. (a) Jesuba ǀhomma ǃoab nî oas aiǃâ ǁîb ǁkhāǁkhāsabega tae-e ge mîba? (b) Mâ dîsa da nî ǃhoaǃgao?

⁴ ǀHomma ǃoab nî oas aiǃâb ge Jesuba ǁîb ǁkhāǁkhāsabega ge mîba: “Xawe go ge sago ǃAnu Gagab di ǀgaiba nîra hō, sago ǂama nîra hāba; o go ge nî ti ǃkhō-amao, Jerusalems ǃnâs kas Judeab hoab ǃnâs kas Samariab hoab ǃnâs kasa, tsî ǃhūbaib di ǀams kōse.” (ǃNǃkh. 1:8) ǁKhāǁkhāsaben ge ǃgâiǂhôasa hoaba nî aoǁnâ, Israels ǃnâ ǀguis ose. ǀAms ain ge hoa khoena ǃēsa nî hō în Jesub di saosabe kai. (Mat. 28:​19, 20) Xaweb ge Jesuba ge mî: “O go ge nî ti ǃkhō-amao” kai. Nē ǀasa ǁlkhāǁkhāsabena Jehovab xa nî ǁkhāǁkhāhe tamas ka ion nî Jesub ǃkhō-am-aose ǀgui nî hâ? ǃNaeǃkhaidi 15ǁî danaǃâs ǃnâ hâ ǃnaeǃkhais ge nē dîsa ra ǃeream.

5. Mati gu ge apostelgu tsî ǀhaohâb ǃûi-aogu tsîna ǁgau ǂhâbasa î asa în khoena Jehovab ǀonsa ǂan? (Ai-īsiba mû re.)

⁵ Apostelgu tsî ǀhaohâb ǃûi-aogu tsîn ge 49ǁî kuri Jerusalems ǃnâ ge ǀhao î gu ǃhoaǃgao ǂhâbasa i asa, Jodeǁî tama khoe-e ǃgaohesa Xristeǁî kai ǂgao î gao. ǀAms aib ge Jesub di ǃgâb Jakobuba ge mî: “Simonni [Petrub] ge go ǃhoaba ge, matib ge Eloba ǂgurose ǂâibasen ǃkhaisa, ǀūbena xub nî ǀons âba ǁae-e hōbase.” Ham-i ǀons xab ge Jakobuba gere ǃhoa? Kēbo-aob Amosi mîde ra ǁgaeǁgaeseb ge ge mî: “Tsîb ge ûiǃgau hâ hoaraga khoesiba tita ǃoa nî hā hoaraga Jodeǁî tamana, tita xa ge tin ase ǂgaihena” tib ra Jehovaba mî. (ǃNǃkh. 15:​14-18) ǀAsa ǁkhāǁkhāsaben ge Jehovab xa ǀgui ǁkhāǁkhāsen tide xawen ge ǁîb ‘ǀons’ ai nî ǂgaihe. Nēs ge ra ǂâibasen ǁîn khoena Elob ǀons xa nî ǁkhāǁkhāsa tsîn ge khoena nî ǂan ǁîn Elob ǀonsa tani hâsa.

6-7. (a) Jesuba tae-i ǃaroma ǃhūbaiba ǃoa ge hā? (b) Mâ ǂhâǂhâsa xū-i ǃaromas tsînab ge Jesuba ǃhūbaiba ǃoa hā?

⁶ Jesub ǀons ge ra ǂâibasen “Jehovab ge a ti ore-ao” tsîb ge Jehovaba ǁîb ǀgôab ǃnâ-ū ge ǂgomsa a ǁgauna ge ore. Jesub ge ǃhūbaiba ǃoa ge hā îb khoesib ǃaroma ǁîb ûiba mā. (Mat. 20:28) Xoremarib ǁguibas ǃnâ-ūb ge ge īǁkhā kai în khoena sâuhe tsî ǀamose ûis ǃâubasensa hō.—Jhn. 3:16.

⁷ Khoesiba tae-i ǃaroma xoremariba ge ǂhâ hâ i? Edenni ǃhanab ǃnâ ge ī xū-i ǃaroma. ǃKharugo ǁkhāǁkhāǃâs ǃnâ da go ǃhoaǃgao khami î ge Adammi tsî Eva hâra Jehovaba ge mâǃoa tsî ǁnās ǀkha ǀamose ûis ǃēsa ge ǂoaǃnâ. (Gen. 3:​6, 24) Xaweb ge Jesuba ǃhūbaiba ǃoa hā tsî khoena ores ǂam-ai kaise a ǂhâǂhâsa xū-e ge dī. ǁGâuab ge ǂhûmiba Jehovab xa ge mî. (Gen. 3:​4, 5) ǁNās ǀkha î ge ge ǂhâbasa î în khoena ǂan Jehovab ge tsū xū-e dī tama hâ isa tsî î ǁîb ǀonsa a ǃanusa. ǁNās ǀkhab ge Jesuba ge ǂhanu khoe-i nē xū-e dīsa ǁîb ǁGûba ǃhoaba tsîb ge Jehovab ra ǂgaoǀkhā xūn hoana ǂhanuse a dī amaga.

8. Jesuba ra saon hoana tae-e nî ǁnâuǃā?

⁸ Hoa Xristeǁîn ge Jehova Eloba ǁîn di Elob ase nî ǂanǃgâ. (Jhn. 17:3) Tsîn ge ǁîna Jehovab ǀonsa tani hâ khoen ase nî ǂanhe ge īs ge. Nē Xristeǁîn tsîn ge ge mûǂan matikōse î a ǂhâǂhâsasa în Jehovab ǀonsa ǃanuse ūhâ. Nēsan ga dīo ǀguin ge Jehovab xa ūǃoahe tsî ǀamo ûiba nî hō ge īs ge. (ǃNǃkh. 2:​21, 22) ǁNā-amaga î ge ge ǂhâbasa i, în ǂgomǂgomsa saosaben hoana Jehovab tsî Jesub xa ǁkhāǁkhāsen. Nēs ǃnâ-ū da ge ra mû tae-i ǃaromab ge Jesuba Johaneb 17ǁî danaǃâs ǃnâ hâ mîde sao rase a ǀamǀamsa: “Tita ge sa ǀonsa ǁîna ge ǂanǂan tsî ta ge ǃaruǀî nî ǂanǂan si, îb ǁnā ǀnammi titats ra ǀnam-ūba ǁîn ǃnâ hâ, î ta tita ǁîn ǃnâ hâ.”—Jhn. 17:26.

“SADU GE A TI ǀHÛǀGUITIMÎ-AO”

9. Mati da a ǁgau ǁkhā Jehovab ǀons sida a ǂhâǂhâsaba ǃkhaisa?

⁹ ǃHoaǃgao da go khami da ge go ǁkhāǁkhāsen Jesub di saosabe kai ǂgao da gao da Jehovab di ǀonsa nî ǃanuǃanusa. (Mat. 6:​9, 10) Jehovab ǀonsa da ge kaise ǂhâǂhâsa ǀons ase nî mû tsî da ge nî ǁgau sida tsîn nēs xa ti ra tsâsa. Tae-e da a dī ǁkhā î da Jehovab ǀonsa ǃanuǃanu tsî ǁgau ǁGâuab ge ǁîb xa a mî ǂhûmi xūn ama tamasa?

10. Jesajab 42 sa xu 44ǁî danaǃâdi ǃnâ da tae-e ra khomai? (Jesajab 43:9; 44:​7-9) (Ai-īsiba mû re.)

¹⁰ Jesajab 42 sa xu 44ǁî danaǃâdi ǃnâb ge Jehovaba ǁîba ǃoaba tama khoena ra mîba în ǁgau ǁîn ra ǃoaba elogu a amasa. ǁNâuǃgâ ǃkhaigu tawa î ra dīhe khamib ge ǁîna ge ǂgan în ǁgau ǁîn elogu hâsa xawe î ge khoe-e ge ǀkhai i.—Khomai re Jesajab 43:9; 44:​7-9 sa.

11. Jesajab 43:​10-12 ǃnâb Jehovaba ǁîb khoena tae-e ra mîba?

¹¹ Khomai re Jesajab 43:​10-12 sa. Jehovab ge ǁîb khoena ge mîba: “Sadu ge a ti ǀhûǀguitimî-ao [ǃoaba-ao] . . . tita ge ǃKhūta.” Jehovab ge ǁîna ra ǂgan în sao ra dîsa ǃeream: “Ti xōǀkhā ǀkhara elo-e hâ-e?” (Jes. 44:8) ǁNā-amaga da ge aiǂhanuba ūhâ ǁnā dîsa ǃereamsa. Mî tsî da ra dī xūn ǃnâ da ge ra ǁgau Jehovab ǀguib a ama Elosa. ǁÎb ǀons ge hoa ǀon di xa a kai. Ûi da ra ǀgaub ǃnâ da ge ra ǁgau Jehovaba da a ǀnamsa tsî da ǁîb ǃoagu a ǂgomǂgomsa ǃkhaisa ǁGâuab ga sida ûiba ǃgomǃgom xawe. Nē ǀgaub ǃnâ da ge ǃēsa ūhâ ǁîb ǀonsa ǃanuse ūhâsa.

12. Jesajab 40:​3, 5 ǃnâ hâ kēbosa mati ge dīǀoaǀoahe?

¹² Jehovab ǀonsa da ga ǂkhâǃnâo da ge Jesu Xristuba ra ǁgae. Jesajab ge ge kēbo khoe-i Jehovab daoba nî ‘aiǂhumi’ ǃkhaisa. (Jes. 40:3) ǁNāsa mati ge dīǀoaǀoahe? Johaneb ǁāǁnâ-aob ge Jesuba daoba ge aiǂhumiba, Jehovab ǀons ǃnâ hā tsî Jehovab ǀons ǃnâ ǃhoasa. (Mat. 3:3; Mrk. 1:​2-4; Luk. 3:​3-6) ǁKhā kēbos ge ra mî: “Ob ge ǃKhūb ǂkhaisiba nî ǂhaiǂhaihe.” (Jes. 40:5) Nēsa mati ge dīǀoaǀoahe? Jesub ge ǃhūbaib ai a hā, ob ge Jehovaba ǀoasase ge ǂnûǁkhaeba. Jehovab aitsama ǃhūbaib ai hâ khami î ge ge ī-i.—Jhn. 12:45.

13. Jesuba da mati a ǁgae ǁkhā?

¹³ Jesub khami da ge sida tsîna Jehovaba ra ǂnûǁkhaeba. Jehovab ǀonsa da ge tani hâ tsî da ge ǀhao-ū da ra khoen hoana ǁîb buruxa dīgu xa ra mîba. Nēsa ǃgâise dīs ǃaroma da ge Jesub ge Jehovab ǀonsa ǃanuǃanus ǃaroma a dī xūn hoana nauna nî mîba. (ǃNǃkh. 1:8) Jesub ǀguib ge Jehovab xa ǃamkuse ge aoǁnâ, sida tsîn ge ǁîb aiǁgausa ra ǁgae. (J.ǂHa. 1:5) Mâ ǀgaugu ǃnâs tsîna da a ǁgau ǁkhā, Jehovab ǀons a ǂhâǂhâsaba da ǃkhaisa?

JEHOVAB ǀONS TAE-E SIDA ǃAROMA RA ǂÂIBASENS

14. Mati da Jehovab ǀons xa ra tsâ Psalmdi 105:3 ǃnâ i ra ǁguiǃāhe khami?

¹⁴ Kaise da ge Jehovab ǀons ai a ǂnīsa. (Khomai re Psalmdi 105:3 sa.) Jehovab ge kaise ra ǂkhî ǁîb ǀons ǃaroma da ga koaseno. (Jer. 9:​23, 24; 1Kor. 1:31; 2Kor. 10:17) Jehovab a sida Elo ǃkhaisa ‘koasens’ ge ra ǂâibasen ǂnīsa da asa. Kai aiǂhanub ase da ge ra mû nauna Jehovab a ǃanu tsî ǁîb ra dīn hoan a ǂhanu ti mîbasa. Tā da ge nî tao sida sîsenǁare-aon, ǁanǁare-aon tsî nau khoen tsîna mîbasa Jehovab ǃoaba-ao da asa. ǁGâuab ge ra ǂhâba î da tā nau khoena Jehovab ǀons xa mîba. (Jer. 11:21; J.ǂHa. 12:17) ǁGâuab tsî ǁîb ǂhumi kēbo-aogu tsîn ge khoena Jehovab ǀonsa ra ǀuru kai ǂgao. (Jer. 23:​26, 27) Jehovab ǀonsa da a ǀnam amaga da ge ǁîba “hoaraga tsēsa” ra koa ǂgao.—Psa. 5:11; 89:16.

15. Jehovab ǀonsa sîsenūsa tae-e ra ǂâibasen?

¹⁵ Aiǃgû tsî da ge Jehovab ǀonsa ra sîsenū. (Joe. 2:32; Rom. 10:​13, 14) Jehovab ǀonsa sîsenūs ge ǁîb ǀonsa ǂans xa ǃnāsa-e ǃkhōǂgā hâ. Jehovaba da ge ǃgâise ǂan, ǂgomǃgâ tsî ǁîba ǃoa huib tsî daoǁgaus ǃaroma ra kō. (Psa. 20:7; 99:6; 116:4; 145:18) ǁÎb ǀons tsî ǀgaugu tsîna da ge nauna ra ǁkhāǁkhā tsî da ge ra hui nî în ǁîn ûiga dawa în Jehovaba ǂkhîǂkhî tsî sâuhe.—Jes. 12:4; ǃNǃkh. 2:​21, 38.

16. Mati da a ǁgau ǁkhā ǁGâuab a ǂhumi-ao ǃkhaisa?

¹⁶ Māsenxase da ge Jehovab ǀons ǃaroma ǃgoma ra tsâ. (Jak. 5:​10, 11) ǃGom ǁaegu ǃnâ da ga ǂgomǂgomsase Jehovab ǃoagu hâo da ge ra ǁgau, ǁGâuab a ǂhumi-aosa. Jobi tsēdi ǃnâb ge ǁgâuaba ge mî, Jehovaba ra ǃoaba, “khoe-i ge ǁî-i ûiba sâus ǃaroma ū-i hâ xūn hoana nî mā.” (Job. 2:4) ǁGâuab ge gere mî khoen ǃgâi ǁaegu ǃnâ ǀgui Jehovaba nî ǃoaba ǃkhaisa xawen ga ǃgomma tsâ, on ge Jehovaba nî ǁnāxu. Jobi ge ge ǁgau nēs ge ǂhumi isa. Nētsēs tsîna da ge aiǂhanuba ūhâ matikōse î ga sida di ûiga ǃgom tamas ka iob ga ǁGâuaba ǂkhabuǂâi kai da xawe da tātsē Jehovaba ǃoaba ǀû tidesa. ǂGomǃgâsiba da ge ūhâ Jehovab nî kōǃgâ dasa ǁîb ǀons ǃaroma.—Jhn. 17:11.

17. 1 Petrub 2:12 ǃoagu da mâ ǀgaugu ǃnâs tsîna Jehovab ǀonsa ǂkhaisiba mā ǁkhā?

¹⁷ ǃGôasiba da ge Jehovab ǀonsa ra ǁgau. (ǂKhm. 30:9; Jer. 7:​8-11) Jehovab ǀonsa da tani hâ amaga î ge dī da ra xūna ǁîb ǀonsa koa tamas ka io a ǁgaiǁgai ǁkhā. (Khomai re 1 Petrub 2:12 sa.) ǁNā-amaga da ge ǁkhā da a ī hoa-e dī tsî Jehovab ǀonsa koasa nî mā, sida ǃhoa tsî ra tanisen ǀgaub ǃnâ-ū. ǀOasa kurusa da ga ūhâ tama i xawe da ge nē ǀgaub ǃnâ Jehovab ǀonsa koasa ra mā.

18. Mâ ǀkhara ǀgaub ǃnâs tsîna da Jehovab ǀons ǂhâǂhâsa ǃkhaisa ǁgau ǁkhā? (ǀGamirosa mû re.)

¹⁸ Jehovab ǀonsa da ge ǃgôasiba ra mā, khoen ga sida xa mati ǀgui ǂâi xawe. (Psa. 138:2) Tae-i ǃaromas nēsa kaise ǂhâǂhâsa? Jehovaba ra ǂkhîǂkhî xūna da ga dī, on ge khoena ǃnāsa ǁaeba ǁnās xa ǃgâibahe tama tsî ǁgai xūna sida xa a mî ǁkhā.a Jesub ge ǁō, on ge khoena ǁîba ǂkhabadī-aob ase gere mû tsî ǁîba ge ǃhui hâ i. Xaweb ge Jesuba nē ǀgaub ǃnâ māsenxase ge ǁō, îb Jehovab ǀonsa ǂkhaisiba mā. ǁÎb ge khoen ǁîb xa tae-e ra ǂâis ai ǁîb ǂâisa ge ǂnûi tama hâ i. (Heb. 12:​2-4) Elob ǂâisa dīs aib ge ǁîb ǂâisa ge ǂnûi.—Mat. 26:39.

19. Jehovab ǀons xats mati ra tsâ tsî tae-i ǃaroma?

¹⁹ Jehovab ǀons ai da ge ǂnīsa tsî da ge Jehovab ǃoaba-aon ase ǂanhesa ra ǃgôaǃgâ. Jehovab ǀons kaise a ǂhâǂhâsa amaga da ge aiǃgû tsî ǁîba ra koa naun ga ǃgôaǁnâ da xawe. ǁNā-amaga hā re î da aiǃgû tsî Jehovab ǀonsa koa ǁGâuab ga ǂkhabuǂâi kai da ǂgao xawe. Nē ǀgaub ǃnâ da ge ra ǁgau Jehovab ǀons kaise a ǂhâǂhâsa ǃkhaisa, Jesu Xristuba î ge ǂhâǂhâsaba îs ǁkhās khami.