Sida ǁGauǃnâ-aoba xum ge sîm ûi kurigu hoaga ge ǁkhāǁkhāsen

TI ǁGÛRA AIǁGAUS

Ti ǁgûra ge ǁaubexa 1950 Kindersley Saskatchewan ti ǀon hâ ǃās Kanadab ǃnâ hâsa ǃoa ge doe. ǁNās khaoǃgâ ra ge amaba ge ǁkhāǁkhāsen tsî î ge nē-e sida ûib ǃnâ ǂhâǂhâsa xū-i ase ge ī. ǀGôaro ta ge īo ta ge ti omaris ǀkha aoǁnâ sîsenni ǃnâ ǃnāsa ǁaeba gere ǂoa. Tsî ta ge ǁnās ǃgao “huiǃnâra aimâba-aose” gere ǂgaisen, ǁnāsa ta ge dī tama hâ i xawe ǁhaisa kurixa ta ge ge ī.

Ti ǁgûra ge ge ǀgâsa ī xawe ra ge ǃgâi aiǁgaude ge ǁgau da, Jehovaba da ǁguibade a dība ǁkhāsa. Aiǁgause ra ge 1963, ū ra ge hâ i xūna ge ǁamaxu îra Pasadena, Amerikab ǃnâ ǀō-aisa ǀkharib di kai ǀhaosa hâǃnâ. Sida ge 1972, 1 000 xa ǃnāsa kilometerga ge doe Kanadaba ǃoa î da Italian gowaba ra ǃhoa khoena aoǁnâba. Ti dadab ge ǃanus sîsen-e gere dī. ǁÎb ge ǃgâise ra matare-e sîsen-e ge ūǃoa ǂgao tama hâ i, îb Jehovaba ǃoabas ai ǂâisa ǂnûi ǁkhā.

Ti ǁgûra ge tita tsî ti ǃnona ǃgâsana a ǁgau aiǁgausa ta ge kaise ra ǃgôaǃgâ. Jehovaba ta mati nî ǃoabasa ra ge ǂgurose ge ǁkhāǁkhāte. Ti ûib hoaba ta ra ǂâi-oa xū-e ra ge ge ǁkhāǁkhā te. ǂGurose ta ga Elob Gaosiba ôa, ob ge nî kōǃgâ te.—Mat. 6:33.

JEHOVABA ǀOASASE ǃOABA TSOATSOAS

Tita ge 1980 Debbie ti ǀon hâ ǃgâsas, kaise îsasa ge ǃgamme. ǁÎs ge Jehovaba ǀoasase ǃoabas xa ge ǃgâibahe i. ǀOasasem ge Jehovaba gere ǃoaba ǂgao tsîs ge Debbiesa ǃnona ǁkhâgam ǃgamme toa hâs khaoǃgâ ǁnaetisa aimâba-aos ase ge ǃoaba tsoatsoa. ǀGui kuribam ǃgamme hâs khaoǃgâm ge ǂkhari ǃārosa ǃoa ge doe tsî ta ge tita tsîna ge ǁnaetisa aimâba-ao kai.

ǁAerobam doesī toa hâs khaoǃgâm ge ǂkhabuǂâi tsî gere doe ǂgao. Xawem ge aibe ǃnarimâra mûǂam-aob ǀkha ge ǃhoa. ǁÎb ge ǀnamxaǃnâ xawe ǂhauǃnâse ge mî: “Saro ge aitsâma mâsiba ra ǃgom kai. Hōǃâ ro ra ǃgomsin ai ro ge saro ǂâisa ra ǂnûi. Xawe ro ga ǃgâi xūn ai ǂâisa ǂnûi, o ro ge ǃgâi xūna nî mû.” Nē ǀapemāsam ge kaise ge ǂhâ hâ i. (Psa. 141:5) ǃHaesem ge nē ǀapemāsa sîsenū tsî ge mûǂan ǂgui ǃgâi xūn hâsa. ǀHaohâb ǃnâ î ge Jehovaba ge ǃnāsase gere ǃoaba ǂgao ǃgâsana ge hâ i, ǂkhaman tsî Jehovaba ge ǃoaba tama hâ i khoen ǀkha ge ǃgamme hâ în tsîna. ǁNāpaxum ge ǂhâǂhâsa xū-e ge ǁkhāǁkhāsen. ǃGâi xūn ai ǂâisa ǂnûisam ge ge ǁkhāǁkhāsen tsî ge ǂgomǃgâ Jehovab ǃgom mâsigu ǃnâ nî hui mî sa îm mâǀgai. (Mix. 7:7) Sîm ge ǁkhapa ǃgâiaǂgaoba ge hōǃâ tsoatsoa tsîb ge mâsiba ge dawa.

Sîm ǂguro aimâba-aon skoli ǁgauǃnâ-aogu ge ǀkhara ǃhūgu ǃnâ gere ǃoaba. ǁÎgu ge ai-īsiga ǁgau da tsî ǀkhara ǃhūgu ǃnâ gu ra ǃoaba, o gu ra hōǃâ ǃgomsin tsî ǀkhaegu xas tsîna ge ǁgamba da. Nēs ge sîma ge ǂkhâǃnâ îm sîsabese ǃoaba ǂgao. ǁNās ǀkham ge ge mîǁgui îm sîsabese ǃoaba tsoatsoa.

ǁNā mîǁguiba sīǃnâs ǃaromam ge 1984 Frans gowab ra ǃhoaǃnâhe ǀkharib Quebeka ǃoa ge doe. Nēs ge 4 000 kilometerga British Kolombiaba xu ge ǃnū i. Nēs ge gere ǂâibasen îm ǀasa gowab tsî khoen ǃhaosi ǁnaetigu tsîna ǁkhāǁkhāsen. ǀNî hâ ǃgomsib ūm ge hâ îb ge ǃnāsa ǁaebam ge ǀoro mari-e ge ūhâ i. ǀNî aob faramsa ge ūhâ îb ge ǁîb ǃhanaba xu ǃgau hâ ǃaia te ge mā mî tsîm ge ǁaeroba ǁnā-i ǀgui-e gere ǂû. Debbies ge ǃkharagagu ǀgaugu ǃnâ ǁkhoaxase ǃaiate gere sâi. ǃGomsin ge hâ i xawem ge ge dītsâ îm ǂkhîb ǀkha aiǃgû. Sîm ge ge ǂan i Jehovab sîma ra kōǃgâsa.—Psa. 64:10.

ǀGuitsēm ge ǃâubasen tamam hâ hîna ge bel-e. Sîm ge ge ǁkhauhe îm Kanadab betels tawa sī ǃoaba. Gilead skoli tawam ge ge xoaǂgāsen hâ i, ǁnā-amagam ge Betelsa ǃoam ge ǁkhauheo ge ǂkhî i xawe gere tsûaǂgao. Betelsa ǃoa īs ǁkhauǂuisam ge ge ūǃoa. Sîm ge om ge ǁnâub komites ǃgâsab Kenneth Littlela ge dî, “tae-em nî dī Gileada ǃoam ga ǁkhauheo?” ǁÎb ge ge ǃeream: “ǁKhauǂuisa ro ga ǃkhōǃoao, da ge ǁnā ǁaeb ai nē mâsiba nî ǃhoaǃgao.”

Tsîm ge Debbie hâma wekheba ǃkharu tsî Gileada ǃoa ge ǁkhauhe. Mîǁguibam nî dī ge īs ge. ǃGâsab Little-i ge ge mî: “Mâ mîǁguib ǀguibats ga dī xawets ge ra ǂâi, nau mîǁguibats ga dī hâ ti. ǀGui mîǁguib naub xa a ǃgâi tits ge a mîǁoa. Jehovab ge hoakha nî ǀkhae.” Sîm ge Gileada ǃoa īs ǁkhauǂuisa ge ūǃoa, kurin ra ǃkharu khamim ge ǃgâsab Little-i ge mā ǀapemāsa ra mûǂan. ǃGâsab Little-i ge mā ǀapemāsam ge ǁgaumâidi ǁaegu nî ǁhûi ǃgâsa-e ra ǀapemā.

SÎSABESE ǃOABAS

Kaisem ge ge ǃgâiaǂgao 83ǁî klas Gileadi disa hâǃnâsa, sida ge ge 24 i klas ǃnâ. Nēs ge Aprili 1987 ge īsa Amerikab ǃnâ. ǃGâsab Ulysses Glassi tsî Jack Redfordi tsîkha ge ge dana ǁgauǃnâ-ao-i. Koro ǁkhâgu ge ǃhaese ge ǃkharu tsî da ge 6 Septemberi 1987 skoli ǀkha ge toa. Sîm tsî Johnni tsî Marie Goode hâ ta ge Haitiba ǃoa ge sî-e.

Gileada xu î ge sîsabena Haitiba ǃoa 1962 xu ge sî-e tama hâ i. ǃNona wekhega Gilead skoli khaoǃgâm ge tita tsî Debbies tsîna 35 ǃgâsana ūhâ ǀhaohâb ǃnâ sī gere ǃoaba. Sîm ge kaise ǂkham, ǂansa ūhâ tama i tsî ǀguri sîsaben gere hâǃnâ oms ǃnâ gere ǁan. ǁNā ǀkharib ǃnâ hâ khoen ge kaise ge ǀgâsa i tsîn ge ǃnāsana khomaisa ge ǀū i. ǁNāpam hâ ǁaeb ǃnân ge khoena ǂkhabadīb ǀkha ge tsoatsoa, ǂgīǂgōsi ǃgomsin xa ǃaromahe hâse. ǁÎn ge ǂhanuba gere ǃkhōǃkhuni ǂgao tsî î ge ǀgaisa ǂoab tsîna ge hâ i.

Xawem ge ǂgui xūna ǃgâiaǂgaoxa ǃgâsan Haitib ǃnâ hâna xu ge ǁkhāǁkhāsen ǁkhā i. ǃGāsan ge ǂgui ǃgomsiga ge ūhâ i xawen ge Jehovab tsî aoǁnâ sîsenni tsîna kaise ge ǀnam-i. ǀGui ǃoa taras ge ge khomai ǁoa ī xawes ge 150 xoade danasa xu ge ǂan i. Tsēs hoas mâsigu ge ge ǀgaiǀgaimi, îm aiǃgû tsî Gaosib haisi-amsa aoǁnâ, ǁnā Gaosib ǀguib khoen ǃgomsina nî ūbe hō amaga. Kaisem ge ra ǂkhî sîm ge ǂgurose Elobmîsa a ǁkhāǁkhā khoen ge ǁnaetisa aimâba-ao, ǀō-aisa aimâba-ao tsî ǀhaohâb ǃûi-ao kaisa.

Haitib ǃnâ ta ge Trevob ǀkha ge ǀhao, ǀnî hâ ǂgoms sîsabeba. Tsîm ge ǃēde ge ūhâ i ǂgui ǃnāde ǁîb ǀkha Elobmîs xa ǃhoasa. Kurina ǃkharu tsî ta ge ǃâubasen tama ta hâ sîǂkhanisa ǁîba xu ge ǃkhōǃoa. ǁÎb ge ge xoa: “Saora ǂkharis kai ǀhaos tawa ta ge ra ǁāǁnâhe. Haitiba ǃoa ta ge ra oa ǂgao, î ta ǀō-aisa aimâba-aose Mormon sîsabese ta gere ǃoaba ǃkhaib ǃnâ sī aoǁnâ.” ǁÎb ge ǁnāsa ǂgui kuriga ge dī ǁîb taras ǀkha.

EUROPAB ǁNĀPAXU AFRIKAB

Gaosib aoǁnâ sîsenni ge Europab ǃnâ gere khoraǂuisen ǃkhaiba ǃoam ge ge ǁgaumâihe. Ljubljanab ǃnâm ge 1992 ge doe sī Sloveniab danaǃāsa. Ti ǁgûra ge ǁnāpa ge kaikaihe Italiba ǃoa ra nî does aiǃâ. ǁNā ǁaeb ǃnâ î ge noxopa toroba Yugoslaviab ǃnâ ge hâ i. Viennas tsî Austriab ǁnâub berodi tsî Zagreb, Croatiab, Belgradeb tsî Serbiab ǃnâ ge hâ i berodi tsîn ge ǁnā ǀkharib ǃnâ ge hâ i aoǁnâ sîsen-e gere mûǂam. Mâ ǃhūb hoab Betelsa nî ūhâ ge īs ge.

ǁNās ge gere ǂâibasen nēsisam ǀnî hâ gowab tsî ǃhaoǃnâsi ǁnaetigu tsîna nî ǁkhāǁkhāsensa. ǁNā ǃās khoen ge gere mî, “gowab ge a ǃgom” tsî ǁnās ge ge ama i. ǃGâsan hîna ge ǀapeǂhumis gere dī ǀkharaǀkharana māsenxase gere ūǃoan ǂgomǃgâsibam ge gere ǃgôaǃgâ. Tsîm ge gere mû matib Jehovaba ǁîna ra ǀkhae ǀgauba. ǁNāpam ge ge mû, matib Jehovaba ǂhanu ǁaeb ai ǀnamxaǃnâse xūna ra ǃgâiǃgâisa. Sloveniab ǃnâm ge hâ i ǁaeb ǃnâm ge ǂgui ǀasa xūna ge ǁkhāǁkhāsen. ǁNam ge ǁkhāǁkhāsen xūn ge ge huimi îm hā nî ǃgomsiga tani hō ǁkhā.

Sîm ûib ge ge dawa, Ivory Coasta ǃoam ge 2 000 nî ǃnâ ge ǁgaumâihe, Afrikab westes ǃnâ. ǁNāpaxum ge November 2002 torob xa ǃaromahe hâse Sierra Leonsa ǃoa ge ī. Sierra Leons ǃnâ ge 11 kuriga hâ i torob ge ge ǀam. Kaise î ge ge ǃgom i Ivory Coasta ǃnubu ǁaeb ǃnâ ǁnāxusa. Xawe î ge ǁkhāǁkhāsenam ge xūna ge huimi îm sîm ǃgâiaǂgaoba ūhâ ǀgara.

ǂGui khoen amaba gere ǁkhāǁkhāsen ǂgaon tsî ǀnamxaǃnâ ǃgâsan hîna ge torob ǁaeb ǃnâ mâǀgain aim ge ǂâisa ge ǂnûi. ǀGâsan ge ī xawen ge ūn hâ xūna gere ǀgoragu ǂgao. ǀGui ǃgâsas ge ǁîs sarana Debbiesa gere mā. Debbies ge nē sarana ūǃoa ǂgao tama hâ ī os ge ǃgâsasa ge mî, “torob ǃnân ge ǂgui ǃgâsana ge hui da tsî da ge nēsi ǁkhā xū-e ra dī.” ǁÎn aiǁgausa ǁgaesam ge ge mîǁgui.

Ivory Coasta ǃoam ge oa, xawe î ge ǂgīǂgōsi ǃgomsin ǁnāpa ge hâ îna ǁkhapa ǂkhabadība ge ǃaroma. Tsîm ge November 2004 anikunis (helikopters) ǀkha ge ǃkhū, mâ-i hoa-e ǀgui ǁgarus ǀkha. Fransi toroǃkham-aogu anidi ra mâ ǃkhais tawam ge floeri ai ǀgui ǃuisa ge ǁgoe tsîm ge ǁnāpaxu Switserlanda ǃoa ge ǁhana. ǁNâub beros tawam ge 12 irs tsuxub ǃnâ a sī, o î ge ǁnâub komites ǁanigu, ǀhaohâb hui-aoga ra ǁkhāǁkhā ǃgâsagu tsî ǁîgu taradi tsîna ǁkhoreǁharemi, ǁnamǂgāmi, ǂû-e māmi tsî Switserlandi ǃnâ ra kuruhe sokolaten tsîna ge māmi. Nēs ge ǀnam-em hâsa ge hōǃâ kaimi.

ǁAerobam ge Ghanaba ǃoa ge ǁgaumâihe tsî ǁkhawa Ivory Coastsa ǃoa ǁnāpa ge hâ i ǂkhabadīb ge ǁgoe-a aio. ǃGâsan ǃgâisib ge ge huimi ǂâiǂhansenam gere o, ǃkhoenî tsîm ge ǁaerob ǁgaumâide ūhâ io. Debbie hâm ge ge mîǁgui nēti ī ǀnammi Jehovab khoen ǁaegu hoaǁae hâ amagam nēsa ǁause ū tidesa. Egam ge ge mûǂan ǁnā ǃgom ǁaegu ge ǂhâǂhâsa xūna a ǁkhāǁkhāmi ǃkhaisa.

AIǂOAS DI ǃHŪGU

Dana berosa xum ge sîǂkhanisa 2006 ge ǃkhōǃoa, aiǂoasa (oostes) ǃoam ǁgaumâihe hâsa. ǁNāpam ge ǀasa xūna gere hōǃâ, ǀasa ǃgomsigu, gowagu tsî ǃhaoǃnâbe xūn tsîna. ǁKhāǁkhāsenam nî ǂgui xūn ge ge hâ i. ǂGīǂgōsi ǃgomsigu tsî ǂgomdi xa ǃaromahe hâse tsîm ge ge mû, ǀguiǃnâxasiba da a ūhâ ǁkhāsa Jehovab ǀapeǂhumis ra mā daoǁgaude da ga sao o. ǃGâsanam ge kaise gere ǃgôaǃgâ, ǁîn ge ǀaokhoen, skol ǀhōsan, sîsenǁare-aon tsî ǁanǁare-aon xan gere mâǃoahe xawe gere mâǀgai amaga.

Sîm ge 2002 Kai ǀhaos Israels ǃnâ ge hâ īsa ge ge hâǃnâ. Pinkstertsēs 33ǁî kuri ge hâ-i ǀhaos khaoǃgâs ge nēsa ge ǂguro ǃnā i Jehovab khoen ge kai ǃgôab ǃnâ ǀhaosa. Tātsē da ge nē tsēsa ǀuru tide.

ǁNā kurigu ǃnâm ge sida sîsenni mā-amhe tama ǃhūba ge sari. ǀApeǂhumis ǂkhaninam ge ge ūsao, aoǁnâ sîsenni ǃnâ ǂoa tsî ǂkhari ǃgôab ǂkharis ǀhaos tsîna ge hâǃnâ. ǃApuna tani hâ soldagu ge hoa ǃkhaidi ai gere mâ, xawe ta ge ǃnorasase gere tsâ ǃûisen rase ta ge ǀoro aoǁnâ-aon ǀkha gere ǃgûo.

AFRIKABA ǃOA OAS

ǀNî hâ ǁgaumâisam ge 2013 ge ǃkhōǃoa, Kongob di danaǃās Kinsasas ǁnâub berosa ǃoa. ǁNā ǃhūb ge kaise ge kai ī tsî ge îsa ī xawen ge ǁanǂgāsabena kaise ge ǀgâsa-i tsî ǂgui torogu tsîna ge hōǃâ. Tsoatsoas ǃnâm ge ge mî, “ûib Afrikab ǃnâ a ī ǀgausam ge ǀnai a ǂan, ǀnaim ge Afrikab ǃnâ gere hâ amaga. ǁNā-amagam ge ǂgui ǃgomsina hōǃâ tide Kongob ǃnâ hâsa.” Xawem ge noxopa ǂgui xūna nî ǁkhāǁkhāsen ge īs ge, ǃgōsase daogu tsî broxodi tsîna ūhâ tama ǃkhaidi tawa ǃnarisa. ǂGui ǃgâi xūn sîm ǂâisam nî ǂnûi ainam ge ge ūhâ i nēs ge ǃgâsan mâǀgais, ǃgomsigan ra hōǃâ xawe ǃgâiaǂgaoba ūhâs, ǃgâsan aoǁnâ sîsen-e a ǀnam ǀgaus tsî ǁîn ǁgūtsâdi ǀhaodi tsî ǂkharis kai ǀhaode hâǃnâsa. Aitsamam ge ge mû Gaosib aoǁnâ sîsenni gere aiǃgûsa, Jehovab ǀkhaeb tsî ǂkhâǃnâs xa ǃaromahe hâse. ǀOasa ǁaeba Jehovab sîsen-e Kongob ǃnâ dīs ge ǂhâǂhâsa xūna ge ǁkhāǁkhāmi tsî ǀhōsana ge māmi sîm omaris ǁanin ase ge īna.

ǁKhapam ge ǀnî hâ ǁgaumâisa 2017 ǀams ai ge hō, Suid-Afrikaba ǃoam ge ge ǁgaumâihe. Sîm ge ǁgaumâihe hâ i ǁnâub berodi xas ge nē ǁnâub berosa a kai. Sîm ǁgaumâis ǁnāpam ge ǃkhōǃoas tsîn ge ge ǀasa-i. ǁNāpam ǀasa xūna nî ǁkhāǁkhāsen ge īs ge xawe î ge ǃkharuge ǁaeb ǃnâm ge ǁkhāǁkhāsen xūna ge huimî. Disiǀgamǀa (20) xa ǃnāsa kuriga ǂgomǂgomsase mâǀgai hâ ǃgâsanam ge a ǀnam. Tsî î ge kaise a buruxa mûsa betels omaris ǀguiǃnâxase ra sîsensa, ǃkharagagu ǃhaodi tsî khaoǃhūga xūn hâ xawe. Supu î ge a mûsa Jehovab ǁîb khoena ǂkhîb ǀkha ra ǀkhaesa în ǀasa khoesib tsî Elobmîs daoǁgaudi tsîna ǁîn ûib ǃnâ sîsenū.

ǃKharugo kurigu ǃnâm ge Debbie hâma ǁgaumâide ge ǃkhōǃoa, ǃkharagagu ǃhaoǃnâsi ǁnaetigu tsî ǀasa gowagu tsîna ge ǁkhāǁkhāsen. Hoaǁae î ge ge supu tama hâ i xawem ge hoaǁae Jehovab di ǂgomǂgomsa ǀnamma gere hōǃâ, ǁîb ǀapeǂhumis tsî ǃgâsan ǃnâ-ūs tsîna. (Psa. 144:2) ǂGomǃgâsibam ge ūhâ ǀoasase Jehovaba ǃoabas di ǁkhāǁkhās ge a huimisa îm ǁîb di ǃgâi ǃoaba-ao kai.

Ti ǁgûra ge ǁkhāǁkhāte xūna ta ge ra ǃgôaǃgâ, ti ǀnamǀnamsa taras Debbies di ǂkhâǃnâs tsî ǃhūbaib ǂhawase hâ ǃgâsan di ǃgâi aiǁgaudi tsîna. Tita tsî ti taras, hānîǁaeb sîm ûib dib xa ra ǂâi ǁaeb ǃnâm ge ra mûǂui aiǃgû tsî sida ǁGâuǃnâ-aob ra mā ǁkhāǁkhāde ǁkhāǁkhāsen ǀgarasa.