ǁKhāǁkhāsen re mati du nauna ǃgâi ǀapemāsa nî mā ǀgausa

1. Ham-e ǀapemāsa nî mā? ǁGuiǃā re.

SATSA nauna ǀapemās xa ǃgâibahe? ǀNî khoen ǃaroma i ge nēsa dīsa a supu. Xawen ge ǀnî khoena ra ǃao tamas ka io ra sau nau khoena ǀapemāsa. Mati du ga ǀapemās xa tsâs hoas ǃnâ da ge hoa da ǁaeba xu ǁaeb ǀkha nau khoena ǀapemāsa nî mā. Tae-i ǃaroma? Jesub ge mî xui-ao, ǁîb saosaben ūba gun hâ ǀnammi ai nî mûǃāhesa. (Jhn. 13:35) ǀGui ǀgaub sida ǃgâsana da ǁîna da a ǀnam ǃkhaisa a ǁgau ǁkhāb ge ǁaeba xu ǁaeb ǀkha ǁîna ǀapemāsa. Elobmîs ge ra mî ǀapemā gu da ga, o da ge ǀhōsaguside ra ǀgaiǀgai.—ǂKhm. 27:9.

2. ǀHaohâb ǃûi-aoga tae-e nî dī tsî tae-i ǃaroma? (Boksis “ǁNamas wekheb ǁaegu hâ ǀhaos” ti hâsa mû re.)

² ǀHaohâb ǃûi-aogu ge nî ǂan mati gu ǃgâi ǀapemāsa nau khoena nî māsa. Jehovab tsî Jesub tsîn ge nē aoga ge ǁgaumâi i gu ǀhaohâga kōǃgâ. (1Pet. 5:​2, 3) ǀGui ǀgaub nēsa gu ra dīs ge Elobmîs ai ǃgaoǃgaosa ǃhoade ǀhaohâb ǃnâ māsa. ǁNamasa da ga ǂhâo, gu ge ra ǁnama da. Tsî gu ge ǁnān hîna ge Jehovaba ǃoaba ǀûn tsîna ra hui în ǀhaohâba ǃoa oaǀkhī. Mati gu ǀhaohâb ǃûi-aogu tsî sida tsîna ǃgâi ǀapemāsa a mā ǁkhā?

3. (a) Mati da ǁkhāǁkhāsen ǁkhā î da nauna ǃgâi ǀapemāde mā? (Jesajab 9:6; boksis “Jesuba ǁgae ǀapemāna du ga māo” ti hâsa mû re.) (b) Tae-e da nē ǁkhāǁkhāǃâs ǃnâ nî ǃhoaǃgao?

³ Mati da ǃgâi ǀapemāsa nî mā ǀgauba da ge a ǁkhāǁkhāsen ǁkhā, naun Elobmîs ǃnâ hân ǃgâi ǀapemāde gere mān di ǃnaeǃkhaide xu. Jesub ge hoaǁae ǃgâi ǀapemāde gere mā. ǀGui ǂgaiǀons ǁîb ǀguib ūhâs ge “Buruburuxa ǀApemā-aob” ti hâ. (Khomai re Jesajab 9:6 sa.) Nē ǁkhāǁkhāǃâs ǃnâ da ge nî ǁkhāǁkhāsen tae-e da dī ǁkhāsa khoe-i ga ǀapemāsa ǂgan o. Tsî tae-e da a dī ǁkhā khoe-i ga ǀapemāsa ǂhâ o ǂgan tama i ka ī xawes tsîna. ǂHâǂhâsasib ǃgâi ǁaeb tsî ǃgâi ǀgaub ǃnâ ǀapemās dib tsîna da ge nî ǃhoaǃgao.

ǂGANHE DA GA O ǀAPEMĀS ǃAROMA

4-5. Khoe-i ga ǀapemāsa ǂgano, mâ dîs xa da ǂgurose nî ǂâi? Aiǁgau-e mā re.

⁴ Khoe-i xa du ga ǀapemāsa ǂganheo du ge ǃgâiaǂgao ǁkhā, sadu ǀhōsa-i ra ǂgomǃgâ du amaga. Tsî du ge ǁî-e ǁkhā ǁaeb ai ra hui ǂgao. Xawe ǂgurose du ge nî ǂâi, ‘tita nē ǀhōsa-i ǀapemāsa ra ǂgan xū-e ǃgâise a ǂan?’ ǀNî ǁaeb ai da ge khoe-e ǀapemās xa, ǁî-e ǁnā xū-i ǂansa ūhâ khoe-e ǃoa a ǁnaeǁgau ǁkhā î-i ǃgâi ǀapemāsa hō.

⁵ Sao ra aiǁgaus xa ǂâi re. ǀNîsi i ge sadu ǀgū ǀhōsa-e go ǀaesen. Tsîb ge ra mîba du ǁîb ge ǀaeǃkhō ǀgaugu xa ôaǃnâsa dī hâ ǁîb a ūǃoa ǁkhāga. Tsîb ge ra dî du sado mati ra ǂâi mâ ǀaeǃkhōs nî ǃgâi ti. ǀNîsi du ge ǀgui ǀaeǃkhō ǀgaub xa a ǃgâibahe ǁkhā xawe du ge ǀaeǃkhō-ao tama hâ. Tsî ǁkhāǁkhāhe tama hâ mati du ǁîb ūhâ ǀaeba nî ǀaeǃkhō ǀgausa. ǁNāti ī mâsib ǃnâ du ge sadu ǀhōsa-e a ǀapemā ǁkhā, î-i ǀaeǃkhō-ao-e ôa ǁkhāǁkhāsen hâ-e matib ǁîb ǀaeba nî ǀaeǃkhōhe ǀgausa.

6. Tae-i ǃaroma da nî ǁhûi ǃâusa, ǀapemāsa da nî mās aiǃâ?

⁶ Nēsi da ga tsâ ǂansa da ge ūhâ ǀnî hâ ǂharigu ǃnâ, xawe da ge a ǁhûi ǁkhā ǃnubu ǁaeroba ǂâisa ǃeream da nîs aiǃâ sida ai i ga ǀapemāsa ǂganheo. Tae-i ǃaroma? ǂKhoamîdi 15:28 ge ra mî “ǂhanu-ai khoe-i ge aibe ǂâiǃgâ tsî ǀgui ra ǃeream.” ǃEreamsa da ǂan ti da ga ǂâio da tae-e nî dī? Noxopa da ge ǁaeba ū, ôaǃnâsa dī, ǀgore tsî nî ǂâiǃgâ. Nēsa da ga dīo da ge ǂgomǃgâ ǁkhā mā da nî ǃereams Jehovab tsâsigu tsî ǂâiǀgaugu tsîna nē xū-i ai nî ǁgausa. Kēbo-aob Natanni aiǁgausa ǃgaoǃgâ re.

7. Tae-e da kēbo-aob Natanni aiǁgausa xu ra ǁkhāǁkhāsen?

⁷ Gao-aob Davidi ge kēbo-aob Natanna ge mîba, ǁîb Jehovab tempela ra om ǂgao ǃkhaisa. Natanni ge ǁkhā ǁaeb ai Davida ge mîba nē i a ǂhanu xū dīb nî-e îb tempela om. Xawe Jehovab ge ǁnāti ge ǂhâba tama hâ i. ǀApemāb nîs aiǃâb ge Natanna Jehovaba ga dî hâ, Davidi tae-e nî dīsab ra ǂhâbasa. (1Kro. 17:​1-4) Nē aiǁgaus ra ǁgau khami ǀapemāsa da ga ǂganheo i ge a gā-ai ‘ǃhoas ǃnâ ǂausa.’—Jak. 1:19.

8. Mâ ǀnî hâ ǃaroma-e hâ ǃgâise da nî ǂâiǃgâsa khoe-e da nî ǀapemās aiǃâ?

⁸ ǀNî hâ ǃaromas ge hâ ǂâiǃgâ da nîsa khoe-e da nî ǀapemās aiǃâ: Khoe-e da ga ǂhanu tama ǀapemāsa mâo da ge sida tsîna ǀhapixa ǁkhā, ǁgai xū-i ga nē khoe-i ǀkha īo. Amase i ge kaise ǂhâǂhâsa î da ǃgâise ǂâiǃgâ khoe-e da nî ǀapemās aiǃâ.

ǀAPEMĀS, ǂGANHE TAMA DA GA Ī XAWE

9. ǁNamasa gu nî mās aiǃâ gu ǀhaohâb ǃûi-aoga tae-e ǂâis ǃnâ nî ūhâ? (Galateǁîn 6:1)

⁹ ǁAeba xu ǁaeb ǀkha gu ge ǀhaohâb ǃûi-aoga ǃgâsana ǁnamasa nî mā ‘ǁoren xa i ga gaoǂamheo.’ (Khomai re Galateǁîn 6:1 sa.) Khoe-i ge ǀnîsi ǂhanu tama mîǁguiga ra dī, ǁore kai ǁkhā nî na. ǀHaohâb ǃûi-aogu ge nēti ī khoe-e ra hui ǂgao î-i aiǃgû Jehovaba ǃoaba tsî ǀamosib kōse ûi. (Jak. 5:​19, 20) ǁÎgu ǁnamas ǃgâi sîsenǂuiba nî ūhâsa gu ge ra ǂhâba. Amaga gu ge ǀhaohâb ǃûi-aoga aibe nî ǀgomǀgomǃgao nē khoe-i go amabes ǃnâ ǁoreb xa gaoǂamhesa. Mûǂan gu ge ra khoe-i ga ǁîgu xa ǀkhara mîǁguiba dī, oi ǂâibasen tamasa ǁnā khoe-i Jehovaba ǂkhîǂkhî tama xū-e ra dī ǃkhaisa. (Rom. 14:​1-4) Xawe ǀhaohâb ǃûi-aogu ga mûǂan khoe-i ǁî-i ǀhōsagusis Jehovab ǀkha i ūhâsa ǁkhōǁkhōsasib ǃnâ ra mâisa, o gu ǀhaohâb ǃûi-aoga mati nēti ī khoe-e ǃgâi ǀapemāsa mā ǁkhā?

10-12. Tae-e gu ǀhaohâb ǃûi-aoga nî dī ǃâubasen tama khoe-e gu ga ǁnamao? Aiǁgau-e mā re. (Ai-īsiga mû re.)

¹⁰ ǀHaohâb ǃûi-aogu ǃaroma i ge supu tama hâ ǁnamasa ǂgan tama khoe-e ǁnamasa. Tae-i ǃaroma? Paulub ge ge mî khoe-i ge ǁore-i xa gaoǂam-e ǁkhā ǀū-i a hîna. ǁNā-amaga i ge xūna hâ ǀhaohâb ǃûi-aogu aibe nî dīna, î-i ǁnama-e ra khoe-e supubahe nē ǁnamasa ūǃoasa.

¹¹ Sao ra aiǁgaus xa ǂâi re, ǃhana ǂgā-aob haina ǃgari ǃhūb ǃnâ ra ǃhana ǂgaoba. ǃKhomnab ǃhūb ǃnâ nî ǂgās aiǃâb ge ǃhūba nî aiǂhommi. ǁNāpaxub ge ǃkhomna ǂgā ǁkhā tsî ǀguib ge ǁgamme nî ǂnâ îs nē ǃkhomsa ǃī ǁkhā. ǁKhā ǀgaub ǃnâ i ge xūna hâ ǀhaohâb ǃûi-aob a dī ǁkhā na î-i ǁnama-e ra ǃgâsa-e supubahe nē ǁnamasa ǃgâsa. Aiǁgauseb ge ǀhaohâb ǃûi-aoba ǂhanu ǁaeba nî ǃâu tsîb ge ǃgâsa-e nî mîba ǁî-i ǃnâb ǃgâiǃgâibasensa ūhâsa tsî i xū-e hâsa ǁî-eb ra mîba ǂgao-e. ǁNamasa ra mā ǃgâsab ga ǀnamxaǃnâ tsî ǃgâi ǃgâsab ase ǂansao, i ge nî supu ǁîb di ǀapemāsa ūǃoasa.

¹² Nē ǁgamǀhaos ǃnâb ge ǀhaohâb ǃûi-aoba nē khoe-e a supusupuba ǁkhā, ǁî-e ǂâiǂâiǃnâs ǃnâ-ū hoa da ǁaeba xu ǁaeb ǀkha ra dīsāsa tsî hoa da ǁaeba xu ǁaeb ǀkha ǁnamasa ǂhâhâsa. (Rom. 3:23) ǃNomsa tsî ǃgôasiba ūhâ dommi ǀkhab ge ǀhaohâb ǃûi-aoba xoade xu ǃgāsase nî ǁgau ǁore-i xa i go gaoǂamhe ǃkhaisa. ǃGâsab ga mûǂano dīsāb go ǃkhaisa, ob ge ǀhaohâb ǃûi-aoba ǃkhomsa ra ǂgā, ǁguiǃāba bi rase tae-eb nî dīsa îb nē mâsiba ǃgâiǃgâi. ǁGamǀhaos ǀams aib ge ǀhaohâb ǃûi-aoba nē ǃgâsa-e a supusupuba ǁkhā î-i ǁnamasa ūǃoa, ǁî-i ra dī ǃgâi xūn xa ǂâiǂâiǃnâ tsî ǀgore-ū isa.—Jak. 5:15.

13. ǀHaohâb ǃûi-aoga tae-e nî dī î-i ǁîgu ra mā ǁnamasa ǁnâuǃāhe?

¹³ ǀNî ǁaegu ai i ge khoe-e ǁnamasa ǃgâise ǁnâuǃā tama hâ. ǀHaohâb ǃûi-aoga tae-e nî dī î-i ǁîgu ra mā ǁnamade ǁnâuǃāhe? ǃGâi ǀgaub ǃnâ gu ge ǀhaohâb ǃûi-aoga dîna dî ǁkhā i gu ǀgomǀgomǃgao mā gu go ǁnamas ǁnâuǃāhe ǃkhaisa. Tsî i ǁnama-e ra khoe-e ǂansa tae-e i nî dī-unusa.—Aoǁn. 12:11.

ǂHANU ǁAEB TSÎ ǂHANU ǁNAMASA MĀS

14. Tae-i ǃaroma da ǁaixa da hâ hîna tā ǀapemāsa khoe-e nî mā? ǁGuiǃā re.

¹⁴ Hoa da ge ǀoasa kurusa ūhâ tama hâ, ǁnā-amaga da ge ǀnî ǁaegu ai nau khoena ra tsûtsû xūna a mî ǁkhā. (Kol. 3:13) Elobmîs ge ra mî ǀnî ǁaegu ai i ge khoe-e ǁaixa kai da ra xū-e a mî ǁkhā. (Efe. 4:26) Xawe da ge tā ǁnamasa nî mā ǁaixa da hâ hîna. Tae-i ǃaroma? ‘ǁAixasib Elob di ǂhanu-aisiba sîsenǂui tama xuiao’. (Jak. 1:20) ǁAixa da hâ hîna da ga ǁnamasa māo da ge mâsiba ǁgaiǁgais ǀguisa dī ǁkhā. Nēs ge ǂâibasen tama hâ tsâ da ra ǀgauba da ge ǁaixa kai da go khoe-e mîba ǁoa ti. Xawe da ge nî ǃâu ǃnomsa da nî ǁaeba, nē khoe-e da xū-e nî mîbas aiǃâ. Elihuba xu da ge ǁkhāǁkhāsen ǁkhā Joba ge ǃgâi ǁnamasa māba.

15. Tae-e da Elihub aiǁgausa xu ra ǁkhāǁkhāsen? (Ai-īsiba mû re.)

¹⁵ Tsēdeb ge Joba gere ǁkhaubasen khoegu ge ǃgâi tama xūna ǁîb xa ǃhoao. Elihub ge Jobi gere mî xūna gere ǃgâ tsî gere tsâba. Xaweb ge Joba ǀhapi-ob asa gere ǁgau ǂgao tsîb ge ǂhanu tama xūna Jehovab xa ge mî. ǁNā i ge Elihuba kaise ge ǁaixa kai. ǁÎb ge ge ǃâu ǃhoab nîs aiǃâ, ǃnomsab ges kōse tsîb ge ǃgôasib ǀkha Joba ge ǁnama. (Job. 32:2; 33:​1-7) Elihuba xu da ge ǂhâǂhâsa xū-e a ǁkhāǁkhāsen ǁkhā. Kaise i ge a ǃgâi ǁnamasa da ga māo da ǃnomsa, ǀnammi tsî ǃgôasib ǀkha nî māsa.—Aoǁn. 3:​1, 7.

AIǃGÛ RE ǁNAMASA MĀ TSÎ ŪǃOASA

16. Tae-e da Psalmdi 32:8 sa xu ǁkhāǁkhāsen ǁkhā?

¹⁶ Dana xoas nē ǁkhāǁkhāǃâs dis ge ra mî: “Tita ge ǁnās ǃoa nî ǀapemā du tsîs ge ti mûsa sadu ai nî hâ.” (Khomai re Psalmdi 32:8 sa.) Nēs ge ra ǂâibasen Jehovab aiǃgû tsî nî hui dasa. ǁÎb ge ra mîmâi ǁnama tsîb nî hui dasa. Jehovab aiǁgausa da ge ǁgae ǁkhā. Tsî da ga nauna ǁnamao da ge ǂkhâǃnâ tsî a hui nî ǁkhā în ǃgâi mîǁguiga dī.

17. ǀHaohâb ǃûi-aoga mati ra tsâ kai da Elobmîsa xu hâ ǁnamasa gu ga mā da o? (Jesajab 32:​1, 2)

¹⁷ Nēsi da ge ǃnāsase ǃgâi ǁnamasa mā tsî nî ūǃoa. (2Tim. 3:1) “ǂNâsa ǀkharib ǃnâ, ǁgamǃāgu khami” gu ge ǀhaohâb ǃûi-aoga ra khoakhoa da. Elobmîs ai ǃgaoǃgaosa ǁnamasa gu ge ra mā da tsî ra hui da î da aiǃgû Jehovaba ǃoaba ǀgarasa. (Khomai re Jesajab 32:​1, 2 sa.) ǃGâi ǁnamsa ra mā da ǀhōsana da ge kaise ra ǃgôaǃgâ. ǁÎn mîdi ge “ǀhaiǀurib ǃnâ kuruǂgāsa ǃhuniǀurib khami ī.” (ǂKhm. 25:11) A da hoa da ǁkhāǁkhāsen mati da aiǃgû tsî ǃgâi ǁnamasa mā tsî nî ūǃoasa.