Tae-i ǃaroma da ǀapemāsa nî ôa?

1. Mati da gā-ai mîǁguiga ū tsî sida mîǁguiga sīǃnâ ǁkhā? (ǂKhoamîdi 13:10; 15:22)

HOA da ge ǃgâi mîǁguiga ra dī ǂgao. Tsî da ge hoase ra ǂhâba ū da ra mîǁguin nî dīǀoaǀoahesa. Elobmîs ge ra mîba da mati da nē ǀgam xūna a sīǃnâ ǁkhāsa.—Khomai re ǂKhoamîdi 13:10; 15:22 sa.

2. Jehovaba tae-e ra mîmâi dība dab nîsa?

² Ama as ge sada di ǁGûb Jehovab ǂoaǂamsa ǀapemāde a mā da ǁkhāsa. ǁNā-amaga da ge ǁîba ǃoa ǀgore tsî nî ǂgan î da gā-aisiba māhe. ǁÎb ge mîmâiba da hâ tsî ra mî: “Tita ge ǁnās ǃoa nî ǀapemā du tsîs ge ti mûsa sadu ai nî hâ.” (Psa. 32:8) Nē mîdi ge ra ǁgau Jehovab ǃnāsa-e ra dīsa ǀapemādas ǀguis xa. Jehovab ge ra mî ǂhâ da hâ ǀapemādeb nî mādasa tsîb nî hui dasa ǁnā ǀapemāde dīǀoaǀoasa.a

3. Tae-e da nē ǁkhāǁkhāǃâs ǃnâ nî ǃhoaǃgao?

³ Nē ǁkhāǁkhāǃâs ǃnâs ge Elobmîsa nî hui da, haka dîde ǃereams ǀkha: (1) Mâ ǀapemāde nî hui da î da ǃgâi ǀapemāde xu ǀama? (2) Ham-e ǃgâi ǀapemāde a mā da ǁkhā? (3) Mati da ǁgau ǁkhā amabes ǃnâ da ǀapemāde ǂhâ hâsa? (4) Tae-i ǃaroma da nau khoena ǂgan tide în mîǁguiga dība da?

MÂ ǀGAUGU ǃNÂ DA NÎ TANISEN?

4. ǃGâi ǀapemāde xu da ga ǀama ǂgao, o da mâ tanisen ǀgauba nî ūhâ?

⁴ ǃGamǃgamsenxase da ga taniseno da ge ǀapemāde xu nî ǀama. ǂAnǃgâ da ge nî nau khoen huiba da ǂhâhâsa î da gā-ai mîǁguiba ū noxopa da hâ ǃnâ tama mâsib ǃnâ da ga ǂgâo. ǃGamǃgamsenxa tama da ga i, ob ge Jehovaba hui da tide. Tsî da ga ǁîb mîsa khomai, o da ge ǂhâsi-e mû tide Jehovab ra mā da ǀapemāde sida ûib ǃnâ sîsenusa. (Mix. 6:8; 1Pet. 5:5) Xawe ǃgamǃgamsen da gao da ge Jehovab ra mā da ǀapemāde sida ûib ǃnâ nî sîsenu ǂgao.

5. Gao-aob Davida taena ge dī ǀgapiǂâixa kaibi ga hâna?

⁵ Kō re tae-e da Gao-aob Davidi aiǁgausa xu a ǁkhāǁkhāsen ǁkhāsa. ǁÎb ge ǂgui buruxa ǃgâi xūna dī xaweb ge ge ǀgapiǂâixa tama hâ i. ǂGui kurina Gao-ao kaib nîs aiǃân ge khoena ge ǂan i Davidi ge kaise ǃgâi musik-e gere ǀhurusa. ǂGan-eb ge ge hâ i îb Gao-aoba ǀō-e ǀhuruba. (1Sam. 16:​18, 19) Jehovab ge Davida sao ra Gao-aose a ǁgaumâi, ob ge ǃanu gagaba ge mābi tsîb ge kai ǀgaiba ge hō. (1Sam. 16:​11-13) Kaiseb ge khoen xa ǀnamhe tsî gere koahe ǁîn khākhoenab ge ǃgam amaga, Filisteǁî Goliadi tsîna ǃkhōǂgā hâse. (1Sam. 17:​37, 50; 18:7) Davidi ga ǀgapiǂâixa hâ ob ge ga ǂâi hâ nē xūnab a dī ǁkhā ǃkhais ǃaromab ǀnî hâ khoen di ǀapemāde ǂhâ tama hâsa. Xaweb ge Davida ge ǃgamǃgamsenxa i.

6. Mati da a ǂan Davidi ge māsenxa isa ǀapemāde ūǃoasa? (Tsoatsoas ai hâ ai-īsiba mû re.)

⁶ Gao-aoseb ge ǂnûihe toas khaoǃgâb ge Davida ǃgâise a ǀapemā bi ǁkhā ǀhōsa ga ge ǁhûi. (1Kro. 27:​32-34) Ama as ge gao-aob aseb nî ǂnûihes aiǃâb ge Davida ge māsenxa i, nau khoen xab ra māhe ǀapemāde ūǃoasa. Aorekhoegu ǀguiga xu ǀapemāsa ūǃoa tama i tsîb ge tarekhoes Abigails tsîna xu ǀapemāde ge ūǃoa. ǁÎs ge ǀgapiǂâixa, ganganoǃnâ tsî khoena ǃgôa tama aob Nabala ge ǃgamme hâ i. Davidi ge ǃgamǃgamsen hâse ǁîs di ǃgâi ǀapemāsa ge ūǃoa tsî ǁnās xa ǃaromahe hâse dī ǂgaob gere tsū xū-e ge dī tama hâ i.—1Sam. 25:​2, 3, 21-25, 32-34.

7. Tae-e da Davidi aiǁgausa xu ǁkhāǁkhāsen ǁkhā? (Aoǁnâ-aob 4:13) (Ai-īsiba mû re.)

⁷ Davidi aiǁgausa xu da ge a ǁkhāǁkhāsen ǁkhā. Aiǁgause da ge xū-e ǃgâise dīs ǂansa ūhâ tamas ka io da ge nauna ra mûǂam. Xawe da ge tā nî ǂâi hoa xūna da a ǂansa tsî da ǀapemāsa nauna xu ǂhâ tamasa. Davidi khami da ge ǃgâi ǀapemāde nî ǃgâ, ham-i ǀgui-i ga mā xawe. (Khomai re Aoǁnâ-aob 4:13 sa.) ǁNāsa da ga dīo da ge ǂgui ǃgomsiga ra ǃaroma mîǁguiga ū tide sida tsî naun tsîna ra tsâǀkhā ga.

HAM-E ǃGÂI ǀAPEMĀSA MĀ TE ǁKHĀ?

8. Tae-i ǃaromab ge Jonatanna Davida ǃgâi ǀapemāsa mā ǁkhā i?

⁸ Kō re ǀgamǁî xū-i Davidi aiǁgausa xu da a ǁkhāǁkhāsen ǁkhā-e. ǁÎb ge ǃgâi ǀapemāsa gere ôa Jehovab ǀkha ǃgâi ǀhōsagusisa ūhân tawa. ǁNās ǂam-aib ge ǁhōb xa ǃgâi ǂansa ūhân tawa ǀapemādi tsîna gere ôa. Aiǁgause Sauli a māsenxa ǁîb ǀkha ǂkhîba kurusab gere ǂan ǂgao, ob ge Sauli ôab Jonatanni ǀapemāsa ge ǃgâ. Tae-i ǃaromab ge Jonatanna ǁkhāsiba ūhâ i ǁîba ǃgâi ǀapemāsa māsa? Jonatanni ge ǃgâi ǀhōsagusisa Jehovab ǀkha ge ūhâ i tsî Sauli tsîna ǃgâise ge ǂan i. (1Sam. 20:​9-13) Nē aiǁgausa tae-e ǁkhāǁkhā da ǁkhā?

9. Ham-e da dî ǁkhā ǀapemā-e da ga ôa o? Aiǁgau-e mā re. (ǂKhoamîdi 13:20)

⁹ ǃGâi ǀapemāsa da ga ǂhâo da ge Jehovab ǀkha ǃgâi ǀhōsagusisa ūhâ tsî ǁnā xū-e ǃgâise a ǂan khoe-i ai huiba nî ôa.b (Khomai re ǂKhoamîdi 13:20 sa.) Aiǁgause ǂkham ǃgâsab ga ǃgamme ǂgaob ra khoesa ôa, o i ham-e ǁîba ǃgâi ǀapemāsa a mā ǁkhā? ǃGamme tama khoe-i aib ga huiba ǂgan o i ge ǁnā khoe-e a hui bi ǁkhā Elobmîsa xus ga ǁnā ǀapemāsa māheo. Xawe ǃgâsab ge ǀnîsi ǃgâi ǀapemāsa ǃgamme hâ khoera ǁîba ǃgâise a ǂan tsî Jehovaba gaxuse ǃoaba hâ ra xu hō ǁkhā. ǁÎra ge Elobmîs ǀapemādi ǀguide mā tide xawe tae-e ra ge ǁîra ǃgammeba xu a ǁkhāǁkhāsens tsîna.

10. Tae-e da nî ǃhoaǃgao?

¹⁰ ǀGam ǀgau kha hîna da nî ūhâ kha da ge go ǃhoaǃgao tsî ham-i tsîn ǃgâi ǀapemāde a mā da ǁkhāsa. Hā re i da ǃhoaǃgao tae-i ǃaroma da nî ǁgausa ǀapemāde da ǂhâba hâsa. Tsî ǂhanu i asa i da nauna ǂgan în mîǁguiga dība da.

MATI DA ǁGAU ǁKHĀ ǀAPEMĀSA DA ǂHÂHÂSA?

11-12. (a) ǀNî ǁae da taena xu nî ǂgōsen? (b) ǂHâǂhâsa mîǁguibab nî ôa ǁaeb ǃnâb ge tae-e Gao-aob Rehabeamma dī?

¹¹ ǀNî ǁaen ain ge khoena ǀapemāsa nau khoen ai a ǂgan ǁkhā. Xawe i ge ǀnîsi nē khoe-e mîǁgui hâ tae-e nî dīsa tsî i ge ǁnā khoe-e ǂan ǂgaos ǀguisa ra hî ǁî-i mîǁguiban ra ǃkhōǃgâsa. ǁNā khoe-i ge amabes ǃnâ ǀapemāhe ǂgao tama, ǁî-i ge Gao-aob Rehabeamma xu a ǁkhāǁkhāsen ǁkhā.

¹² Gao-aob Rehabeammi ge ge Israelǁaes di gao kai ǁîb dadasab Salomonni ǁōb khaoǃgâ. Rehabeammi ge gao kai on ge khoena kai ǃkhūsisa ge ūhâ i xawen ge gere tsâ Salomonni ge ǃgarise sîsen kai nîsa tsîn ge Rehabeamma ge ǂgan î-i ǁîn sîsen-e supusupuhe. Rehabeammi ge ǁîna ge ǂgan în ǁîba ǁaeroba mā, îb tae-eb nî dīsa ǂâiǃgâ. ǂGuroseb ge Salomonna ǀapemā-aogu ai huiba ge ǂgan, ǁnās ge ge ǃgâi i dīsa. (1Gao. 12:​2-7) Xaweb ge ǁnā aogu xab ge māhe ǀapemāsa ūǃoa tama ge i. Tae-i ǃaromab ge ǁnāsa dī? Rehabeammi ge ǀnai ǀnîsi mîǁguiba ge dī hâ i tsî gere ǃâubasen aogu ǁîb mîǁguiba nî ǂkhâǃnâsa. ǁÎb ǂkham ǀhōsagu tawab ge ǀapemāsa ôa, ob ge ǁîgu xa ge ǃkhō-amhe tsîb ge ǁnās xa ge ǃgâibahe. (1Gao. 12:​8-14) Rehabeammi ge ǁîb ǀhōsagu ge mî xū-e khoena ge mîba. ǁNā mîmâis ge ǁaesa ge ǀgora tsîn ge ǀnîna ǀnî gaoba ge ǁhûibasen. ǁNāpaxub ge Rehabeamma toa tama ǂkhîoǃnâsiba ge ūhâ i.—1Gao. 12:​16-19.

13. Mati da nî ǂan nau khoena xu da ǀapemāsa amabes ǃnâ ǂhâhâsa?

¹³ Tae-e da Rehabeammi aiǁgausa xu ǁkhāǁkhāsen ǁkhā? ǀApemāsa da ga ôa, o da ge ǀapemāhesa nî ǃâubasen. Mati da nî ǂan ǀapemāsa da ǂhâhâsa? Dîsen ǁkhā da ge a, ‘ǀapemāsa ǂgan tsî ta ǂhâba ta ra xū-e ta ga ǁnâu tama io, ǁnāsa ūǃoa tama?’ Sao ra aiǁgausa ǃgaoǃgâ re.

14. ǀApemāsa da ga hō, o da tae-e ǂâis ǃnâ nî ūhâ? Aiǁgau-e mā re. (Ai-īsiba mû re.)

¹⁴ ǀNîsi i ge khoe-e ǃgâsaba ǃgâise ra matare sîsen-e ge mā. Ūǃoab nîs aiǃgâb ge ǀhaohâb ǃûi-aoga ǀapemā-e ra ǂgan. ǃGâsab ge ra mî nē sîsenni gaxu ǁaebab ǁîb omsa xu nî ǀkhaisa ra ǂgaoǀkhā bi ǃkhaisa. ǀHaohâb ǃûi-aob ge ǃgâsaba ra hōhōǃnâ Elobmîs daoǁgaudi xa, ǁîb di ǃereams asa îb omarisa gagasise kōǃgâ. (Efe. 6:4; 1Tim. 5:8) ǃGâsab ge ǀhaohâb ǃûi-aob ge ǀapemā bi xū-e ge ūǃoa ǂgao tama hâ i. Naunab ge ǀhaohâb ǃnâ ge dî ǁîb ra ǁnâu ǂgao xū-e nî mîba bi khoe-eb ge hōs kōse, îb nē sîsen-e ūǃoa. Nē ǃgâsaba amabes ǃnâ ǀapemā-e gere ôa tamas ka iob ge ǀnai mîǁgui toa hâ i tsî ǃkhō-am bi nî khoe-i ǀgui-e gere ôa. ǂÂis ǃnâ da ge nî ūhâ sida ǂgaob gaxaǃnâ ǃkhaisa. (Jer. 17:9) ǀNî ǁaegu ai da ge ǃgâiba da tama ǀapemāde ra hō xawe ǁnās ge ama ǂhâ da hâ ǀapemāsa.

NAUNA TA NÎ ǂGAN ÎN MÎǁGUIGA DĪBA TE

15. Tae-e xu da nî ǂgōsen tsî tae-i ǃaroma?

¹⁵ Jehovab ge ra ǃâubasen î-i mâ khoe-i hoa-e ǁî-i mîǁguiga dī. (Gal. 6:​4, 5) ǁKhāǁkhāsen da ge go mîǁgui-e da nî dīs aiǃâ i a ǂhâǂhâsasa î da Elobmîs tsî Jehovaba gaxuse ǃoaba hâna xu ǀapemāde hō. Xawe da ge nî ǂanbasen î da tā ǃâubasen nau khoen xa mîǁguiga dībahesa. ǀNîn ge ǃgâisen da ǂgomǃgâ khoe-e ra dî “tae-e du ga ti mâsib ǃnâ dī hâ?” Tsî ǀnîn ge nau khoen di mîǁguiba ǁgae tsî ǁkhā xū-e ra dī ǃgâise ǂâiǃgâ tamase.

16. ǁGôa-eloga ǃoa gere dīhe ǁguibadi xa i ge tae-i mâsiba Korintes ǃnâ hâ i? Ham-e ǁnā ǁgan-e ǂûs mîǁguiba gere dī? (1 Korinteǁîn 8:​7, 10:​25, 26)

¹⁶ ǃGaoǃgâ re Korintes ǀhaohâb ǃnâ ge hâ i ǃgâsan gere hōǃâ mâsiba, ǁgôa-eloga ǃoa gere ǁguibahe ǁgan-e ǂûs xa. Paulub ge ǁnā Xristeǁîna ge mîba: “Tsî ǁgôa-elogu ra ǁguibahe ǂû-i xa ǂûs xa da a ǂans ge, ǁgôa-elo-i ǃhūbaib ǃnâ xū tama tsî i ǀnî elo-e hâ tamasa, ǀgui Elob ǀguib.” (1Kor. 8:4) Nēsa ǂâis ǃnâ ūhâsen ge ǀnîna ge mîǁgui ǁgôa-eloga ǃoa ra ǁguibahe tsî ra ǁamaxū-e ǁgan-en nî ǂûsa. Tsîn ge ǀnîna ge mîǁgui ǁnāti ī ǁgan-en ǂû tidesa ǁîn ǃgâiǂâisan ǃanuse ra ūhâ ǂgao amaga. (Khomai re 1 Korinteǁîn 8:​7, 10:​25, 26 sa.) Mâ khoe-i hoa-i ge nē mîǁguiba aitsama nî dī ge īs ge. Paulub ge Korinteǁîna ge ǀapemā tama hâ i în nau khoena mîǁguiga dība tamas ka io naun ra dī xūna ǁgae. “Mâ-i hoa-i ge aitsama Elob tawa nî ǃereambasen.”—Rom. 14:​10-12.

17. Tae-e a īǁkhā nau khoen ra dī mîǁguiga da ga ǁgae o? Aiǁgau-e mā re. (Ai-īsiga mû re.)

¹⁷ Mati da ǁkhā mâsiba nētsē a hōǃâ ǁkhā? ǀAo-i ǃâro-e sîsenus xa hâ aiǁgausa ǃgaoǃgâ re. Mâ Xristeǁî-i hoa-i ge aitsama nî mîǁgui ǀaob ǃâro-e i ūǃoa tamas ka io ūǃoa tamasa.c ǀNîsi da ge nî ǃgombahe nēsa ǀoasase ǁnâuǃāsa xawe nēti i mîǁguiba dīs ge mâ khoe-i hoa-i nî tani ǃgomgu di ǀguiba. (Rom. 14:4) Nau khoe-i mîǁgui hâ mîǁguiga da ga ǁgae, o da ge sida di ǃanu ǃgâiǂâisa a ǂkhabu kai ǁkhā. Nau khoen ra dī mîǁguiga da ga ǁgae, o i ge gā-ai tide. Sida di mîǁguiga da ga Elobmîs ai ǃgaoǃgao hâse dīo da ge gā-ai mîǁguiga nî dī. (Heb. 5:14) Mâ ǁaegu ai da gagasise ǀgaisa ǃgâsa-i ai ǀapemāde nî ôa? ǁNāsa da ge ra dī aitsama da ôaǃnâde dī hâs khaoǃgâ da ga Elobmîs daoǁgaude ǁnâuǃās ǀkha huiba ǂhâo.

ǀAPEMĀDE ÔA ǀGARA

18. Jehovaba taena ge dība da?

¹⁸ Jehovab ge kaise ǂgomǃgâ da hâ tsî ra mā-am da î da sida mîǁguiga aitsama ūbasen. ǁÎb ge Elobmîsa ra mā da. Tsîb ge gā-ai ǀhōsana ra mā da hui da rana, î da Elobmîs daoǁgaude ǁnâuǃā. Nē ǀgaugu ǃnâb ge Jehovaba sida di ǀnamxaǃnâ ǁGûb ase ra kōǃgâ da. (ǂKhm. 3:​21-23) Mâ ǀgaub ǃnâ da Jehovaba a ǁgau ǁkhā hui dab ra ǀgausa da ra ǃgôaǃgâsa?

19. Mati da aiǃgû tsî Jehovaba a ǂkhîǂkhî ǁkhā?

¹⁹ ǁGûn ge kaise ra ǂkhî ǁîn ǀgôan ra kai ǀgausa mûsa. Tsî Jehovab di gā-ai ǃoaba-ao kaisa nau khoena ra huise. ǁNās ǁkhās khamib ge Jehovaba ra ǂkhî mûb gao ǀgaisa Xristeǁî kai da rasa tsî da ga ǀapemāde ôa tsî mîǁguiga a dīo ǁîba da a ǀnamsa ra ǁgauga.