‘ǃKhams ge a Jehovab di’

Fransi ǂhanub ge 1990 ge mî î-i sida ǁnâub beros Fransi ǃnâ hâsa, ǁgui-ai marisa matere 1993 tsî 1996 ge māsenxa mādi ase gere māhe marina xu. Fransi ǁnâuǃgâ ǃkhaib tawa da ge ǂhanuse ge ǁnâuǃgâhe tama hâ i. ǀKhoma da ge ge î-i ǁnā mîǁguiba ǂâiǃgâhe xawes ge ǃereamsa ge ǀgui i tsîb ge ǂhanuba N$ 116 235.00 miliunsa ǁnâub beros banksa xu ge ū. Sida mari-e hō-oas ǃaroma da ge Europab ǀgapi ǁnâuǃgâ ǃkhaib khoesi ǂhanugu diba ǃoa ge ī. Sida ǁhōban nî ǁnâus aiǃân ge ge mî î da ǂhanu ǂansaben Fransi din ǂhanuba ra ǂnûǁkhaeban ǀkha ǀhao tsî ǃhoa ǁhōb nî ǀgoraǃgâhes aiǃâ.

ǂÂi da ge ge hâ i ǂnûǁkhaeba-aos nî ǂgan dasa î da ǀnî marisa Fransi di ǂhanuba matare. Xawe da ge ge ǂan i ǁnā marisa da ga matare, o da Elobmîs daoǁgaude nî ǃgûǂamsa. ǃGâsan ge māsenxa māde ge mā în Gaosib di ǂhâsiga ǂkhâǃnâ. ǁNās ǀkhas ge ǁnā marisa ge ǂhanub di tama hâ i. (Mat. 22:21) Xawe da ge ǁnā ǀhaosa ge hâǃnâ î da ǁgau Eurobap ǂhanub ǁgaraga da ra ǃgôaǃgâsa.

ǁNā ǁnâuǃgâ ǃkhaib di îsa beros ǃnâ da ge ǀhaosa ge ūhâ i, ǃgâise ge tsoatsoa tama hâ isa. Tsoatsoas ǀkhas ge Europab ǁnâuǃgâ-aosa ge mî ǁîs gere ǃâubasensa în Jehovab ǃoaba-aona ǁgui-ai maris Fransi ge ǂgansa matare. Jehovab di gagab ge ge ǁgari ge i ge dî, “ǂan îs a ǂhanub ge ǀnai N$ 116 235.00 miliunsa sida xu a ūsa?”

ǁÎs ais ge gere ǁgau ǀūs ge īsa tsîs ge kaise ge ǁaixa Fransi ǂhanub ge dī xū-i ǃaroma. ǂHanuba ra ǂnûǁkhaeba khoen ge nēsan ge ama dīsa ǃkhōǃgâ, o i ge nē ǁhōb ǃoagus ge ūhâ i ǂâiǀgauba ge dawa. ǁÎna mîǂgāba tsîs ge ǁnā ǀhaosa ge ǀam kai. Mûǂan ta ge ge Jehovab ge hoa xūna dawasa î da nē ǁhōba dan. ǂKhîse da ge ǁnā ǀhaosa ge ǁnāxu tsî da ge ge buru tae-i ge ǁnās khaoǃgâ a īsa.

Europab ǀGapi ǁnâuǃgâ ǃkhaib khoesi ǂhanugu dib ge sida ǃgâib ǃnâ hâ mîǁguiba Junib 30, 2011 ge dī. ǁÎn ge ge ǂanǃgâ ǁnā ǁgui-ai marisa ūs ge ǂhanu tama hâ isa tsîn ge ǂhanuba ge mîmā în ūn ge maris tsî ǀarosa maris tsîna mā-oa. Nē ǂhâǂhâsa mîǁguib ge noxopa ǃanu ǃoabas Fransi ǃnâ hâsa nētsēs kōse ra ǁkhauba. ǁNā dîs ǃâubasen tama ge hâse ge ge dîs ge Goliata ge ǃgam ǀuis khami ge ī-i. ǁNā ǁhōb di ǀamǂoasa î ge ge dawa. Tae-i ǃaroma da ge nē ǁhōba dan? Davidi ge Goliata a mîba khami, ‘ǃkhams ge a Jehovab di.’—1Sam. 17:​45-47.

Nēs ge ǂguroǃnā tamasa nēti i ǁhō-e da dan hâsa. ǀGaisa hanugu tsî ǂgomdi xa da ge māǃoahe xawe da ge 1 225 ǁhōga, 70 ǃhūgu ǀgapi ǁnâuǃgâ ǃkhaigu tsî ǃhūbaib ǂhawase ge dan. Nē ǁhōga dans ge ge hui da î da sida ǂhanuga ǁkhauba. Aiǁgause ǂgoms ase ǂanhes, aoǁnâ sîsen-e ǃnorasase dīs, ǃhūgu ǁaxasigu tsî ǀaoba ǁaihesa ǂkhās.

Tae-i ǃaroma ta ge Europab di ǁhōb ǃnâ ǃgâ ī, Amerikab dana beros Jehovab ǃoaba-aon dis ai ta gere ǃoaba hîna?

SÎSABE ÔASASIBA ŪHÂ ǁGÛRA XA KAIKAIHES

Ti ǁgûra Georgi tsî Lucill hâra ge 12ǁî ǃgubis Gileadi disa ge hâǃnâ tsî Etopiab ǃnâ gere ǃoaba, 1956 ta ge ǃnae o, Elobmîs ǃnâ ge hâ i aoǁnâ-aob Filipi ǀonsa ta ge ge māhe. (ǃNǃkh. 21:8) Saora kurib ge ǂhanuba sida sîsen-e ge ǂkhā. Kaise ta ge ǂkhariro î xawe ta ge ǃgāsase ra ǂâihō tita tsî ti omaris tsîn ge Jehovaba ǂganǃgâsib ǃnâ gere ǃoabasa. ǀGôaro-i ase ta ge nēs a ǁkhoaxa ti ge ǂâi hâ i. ǃHausenxase da ge ge ǂganhe î da ǃhūba xu 1960 ǂoa.

Wichita, Kansas ti ǀon hâ ǃās Amerikab ǃnâ hâsa ǃoas ge ti omarisa ge doe xawe ra ge ti ǁgûra sîsabe ôasasib hîna ra ge ūhâ iba ge ǂoaǃnâ tama hâ i. Tita, ti ausis Judis tsî ti ǂkham ǃgâsab Leslie hâra hîna ge Etopiab ǃnâ ǃnae ra ge ge ǁkhāǁkhāte î da Jehovaba ǀnam tsî sida ǂgaob hoab ǀkha ǃoaba. Tita ge 13 kurin ǀkha ge ǁāǁnâhe. ǃNona kurin khaoǃgâs ge ti omarisa ǃnāsa ǂhâsib ge Perub ǃnâ hâ i ǃās, Arequipa ti ǀon hâsa ǃoa ge doe.

Tita ge ge 18 kurixa i 1974 î ge Perub ǁnâub berosa tita tsî nau haka ǃgâsagu tsîna ǀō-aisa aimâba-aogu ase a sîǂuio. Noxopa aoǁnâhe tsâ tama ǃhomgu Andes di gu ǃnâ ge ge sī gere aoǁnâ. Nēs ge Quechua tsî Aymara gowab tsîna ra ǃhoa khoena ge ǃkhōǂgā hâ i. Ommi khami i audob arki ti ge gere ǂgaib ǀkha ge ge gere ǃnarimâ. Jehovab ǀgū ǁae ǃâs, ǀaen tsî ǁōb tsîna nî ūbēsa nē khoena Elobmîs ǃnâ ǁgaus xa ǂâis xa ta ge ǃgâibahe. (J.ǂHa. 21:​3, 4) ǂGuin ge Gaosib haisi-amsa ǃkhōǃoa tsî Jehovaba ge ǃoaba tsoatsoa.

DANA BEROSA ǃOA ǁGAUMÂIHES

Peruba ta ge 1977 a sari ob ge ǂgaeǂguira soros ǃgâsab Albert Schroedera ge ǂkhâǃnâ te î da betels sîsenni dana beros ai hâ i ǃaroma xoaǂgāsen. Tsî ta ge ǁnāsa ge dī. ǃNupu ǁaeroba ǁnās khaoǃgâ ta ge Junib 17, 1977 Brooklyn betels dawa ge ǃoaba tsoatsoa. Saora haka kurigu ǃnâ ta ge ǃanus tsî xūna dī-ūnus departements ǃnâ gere sîsen.

Junib 1978 ta ge Elisabeth Avallonesa ǃhūbaib ǂhawase ge hâ i ǀkharib kai ǀhaos tawa ge ǀhao-ū New Orleans ǃnâ, Louisiana ti ǀon hâ ǃās ǃnâ. Ti ǁgûra khami Jehovaba ǂgaob hoab ǀkha ǀnam ǁgûra xas ge ge kaikaihe. Elisabeths ǀkha ta ge ǀhao os ge ǁîsa ǁnaetisa aimâba-aose haka kuriga gere ǃoaba. Tsîs ge gere ǁkhore Jehovaba ǁîs ûib hoaba ǀoasase ǃoabasa. ǃNubu ǁaerob ge ǃkharus khaoǃgâm ge ǃgâise a ǂangu om ge ge ǀnamgu. Oktoberi 20, 1979 ǃgamme tsîm ge betels dawa ǀguiba ge ǃoaba tsoatsoa.

Sîm ti ǂguro ǀhaohâb Brooklyn Spanjeb ǃnân ge ǃgâsana kaise ge ǀnamxaǃnâ i. ǃNona kurigu ǃnâm ge ǃnona ǃkharagagu ǀhaohâgu ǃnâ gere ǃoaba tsîn ge ǁnā ǃgâsana ge ǂkhâǃnâmî îm betels sîsenni ǀkha aiǃgû. ǁÎn huib, sîm ǀhōsan tsî omaris ǁanin di ǂkhâǃnâs tsînam ge ra ǃgôaǃgâ hîna ge huimî na sîm ǁgûra ǁîra kairasis ǃnâ kōǃgâsa.

ǀAPEǂHUMIS ǂHANUGA ǂNÛǁKHAEBAS

Buru ta ge ge 1982 ta ge ǂhanuba ra ǂnûǁkhaeba departements ǃnâ betels tawa sîsen tsoatsoao. ǃNona kurigu khaoǃgâ ta ge ge ǂganhe î ta ǂhanub di skola ǀgapi ǁkhāǁkhāsens tawa hâǃnâ î ta ǂhanub ǂansabe kai. ǁKhāǁkhāsen ta ge ge Amerikab tsî nau ǃhūgu ǃnâ hâ khoen tsîn ǃnorasase ǂgui xūna a dī ǁkhāsa Jehovab ǃoaba-aon ge dan ǁhōgu xa ǃaromahe hâse. Nē ǂhâǂhâsa ǁhōga da ge klas ǃnâ ge ǃhoaǃgao.

ǂHanuba ra ǂnûǁkhaeba departements mûǂam-aob ase ta ge 1986 ge ǁgaumâihe 30 kurin ǀkha. Kaise ta gere ǃgôaǃgâ betels gere ǂgomǃgâtesa ǂkham ta ge ī xawe. ǂGui xūna ta ge ǀū i amaga ta ge gere ǂâiǂhansen. Tsî ta ge ge ǂan i nēs supu ǁgaumâi tidesa.

ǂHanuǂansabe kai ta ge ge 1988. Mûǂan tama ta ge ge hâ i nē skoli ge matikōse tita tsî Jehovab ǀkha ta ūhâ ǀhōsagusisa a tsâǀkhā ǃkhaisa. ǀGapi ǁkhāǁkhāsens ge aitsama koasens turaba sats ǃnâ omkhâi tsî ra tsâ kai nau khoen xats a ǂhâǂhâsasa, ǁkhāǁkhāsan ūhâ tama amaga. Elisabets ge ge hui te î ta ǁkhapa ti ǀhōsagusisa Jehovab ǀkha ra ǀgaiǀgai xūn ai ti ǂâisa ǂnûi, ǀgapi ǁkhāǁkāsensa ǃoa ta nî īs aiǃâ ta gere dī khami. ǁAeba î ge ge ū gagasise omkhâisensa xawe ta ge ǁkhapa Jehovab ǀgūse ge tsâ tsoatsoa. ǃKharuǃnâ ta ge xūna xu ta ge a ǂan kai ǂansa ūhâs ǂhâǂhâsa tamasa. ǀGū ǀhōsagusis tsî ǃgam ǀnamma Jehovab tsî ǁîb khoena ūhâbas ge ûib ǃnâ kaise a ǂhâǂhâsa.

ǃGÂIǂHÔAS ǂHANUGA ǂNOABAS

ǀGapi ǁkhāǁkhāsens khaoǃgâ ta ge sida departementsa huis ai ǂâisa ge ǂnûi, î da betels di ǂhanugu ǂhâsiga kōǃgâ Jehovab ǀapeǂhumis tsî ǃgâiǂhôasa aoǁnâs ǂhanuga ǁkhauba. Sîsenni ge ge ǁkhoaxai xawe î ge ǃgomsiga ge hâ i, Jehovab ǀapeǂhumis ǃnâ î ge xūna ǃkhaese gere dawa amaga. Aiǁgause da ge sida ǂkhanin ǃaroma māsenxa māde gere ǂgan xawe 1991 î ge ǂhanuga ra ǂnûǁkhaeba departementsa ge ǂganhe î da daoǁgaude mā mati da nēsa dī ǀû ǁkhāsa. Jehovab ǃoaba-aon ge ǁnās khaoǃgâ mari-e ǂgan tamase ǂkhanina gere māǂûi. Nēs ge betels sîsenni tsî aoǁnâ sîsenni tsîna ge supusupu. Tsî nētsēs tsîna ra ǁkhauba da î da ǁgui-ai maride matares ǀkha nî hâ ǃgomsina xu ǂgōsen. ǀNîn ge ge ǂâi hâ i nē ǀkharaǀkharas xa ǃaromahe hâse da ǂgui mari-e nî ǂoaǃnâ ǃkhaisa. Tsî da ǂâusa ǂkhanina ūhâ tidesa î da ǃgâiǃgâibasensa ūhâ khoena mā. Tsî î ǁnās xa ǃaromahe hâse ǀoro khoena Jehovab xa nî ǁkhāǁkhāsensa. Xawe î ge ǀnîn gere ǂâi khami ge ī tama hâ i. Jehovaba ra ǃoaba khoen di ǃgôab ge 1990 ge ǀarosen, tsîn ge khoena nētsē matare tamase ûiga ra sâu gagasi ǂûna hō ǁkhā. ǁKhāǁkhāsen ta ge ge ǀapeǂhumis ra dī kai ǀkharaǀkharan ra īǁkhāsa, Jehovab ǃanu gagab huib tsî ǂgaeǂguira ǃgâsaga xu da ra hō daoǁgaus ǀkha.—Eks. 15:2; Mat. 24:45.

ǁNâuǃgâ ǃkhaigu tawa da ge nē ǁkhōga dan tama ǃgâi ǂhanuǂansabega da ūhâ amaga xawe î ge ǁnān ǂgaeǂguirana Jehovab khoen ǃgâi tanisen ǀgauba ra mû. Nē aiǁgausa da ge 1998 ge mû ǃnona ǂgaeǂguira soros ǃgâsagu tsî ǁîgu tara di tsîn ge ǀō-aisa ǀkharib kai ǀhaosa Kubab ǃnâ hâ ǃnâo. ǁÎn di ǃgâi tanisens tsî ǃgôasiban gere ǁgau ǀgaus ge ǂhanub ǂgaeǂgui-aona ge ǁgau ǂgīǂgōsi xūn ǃnâ da ǃâ-e ūhâ tamasa.

Xawe ǀnî ǁaegu ai ǂhanuoǃnâsiba ǂhanuǂhanus ǃaroma da ge ‘ǃgâiǂhôasa ǁnâuǃgâ ǃkhaigu dawa nî ǁkhauba.’ (Fil. 1:⁠7) ǂGui kuriga i ge Europab tsî Suid-Koreab tsîna sida ǂhanuba ge ǂanǃgâ tama hâ i, torogu ǃnâ ǃâ tama isa. ǁNās xa ǃaromahe hâse gu ge 18 000 ǃgâsagu Europap ǃnâ ge hâ i gu tsî 19 000 xa ǃnāsa ǃgâsagu Suid-Koriab ǃnâ ge hâ î gu tsîna tronkes ǃnâ ge ūhe, toroba ǃkhams ǃnâ gu ge ǃâ ǂgao tama hâ i amaga.

Europap di khoesi ǂhanugu ǀgapi ǁnâuǃgâ ǃkhaib ge Julib 7, 2011 ge mā-am î-i Europap ǃnâ hâ ǃhūgu hoa ga ǂgomdi xa ǃaromahe hâse, torogu ǃnâ ǃâ tama khoen hoana mā-am în ǀnî hâ sîsen-e dī. ǁNā mîǁguib ge Suid-Koriab ge Junib 28, 2018 dī mîǁguib ǀkha ge ǀgui i. Sida ǃgâsagu ga ǀkhā-e ǁhui hâ, o i ge nē ǂhâǂhâsa mîǁguiga ga dīhe tama hâ.

ǂHanuga dana beros ai ra ǂnûǁkhaeba beros tsî ǃhūbaib ǂhawase hâ berodi tsîn ge ǃgarise ra sîsen, sida di ǂhanub Jehovaba ǃoaba tsî ǃnorasase aoǁnâs diba ǁkhaubasa. Kaise da ge ra ǃgôaǃgâ sida ǃgâsan hîna ǂhanub xa ra mâǃoahena ǂnoabasa. ǁKhō-e da ga dan tama ī xawe da ge gao-aogu tsî ǁaedi tsîna ǃgâiǂhôasa ra aoǁnâba. (Mat. 10:​18) ǀGoraǃgâ-aon, ǂhanuba ra ǂnûǁkhaeba khoen, ǂhôan tsî hoaǃnâ-aixa khoen tsîn ge xoadi hîna da ǁnâuǃgâ ǃkhaigu dawa ra ǃkhōǂgāte nî ǃgaoǃgâ sida ǂgomsa da ra ǁkhauba amaga. ǂHauǃnâ ǂgaoga ūhâ khoen ge Jehovab ǃoaba-aon xa ra ǁkhāǁkhāsen, sida ǂgomsa da Elobmîs ai ra ǃgaoǃgao amaga. ǁNās ǀkhan ge ǀnî khoena Jehovaba ge ǃoaba tsoatsoa.

GANGANS JEHOVA

ǃKharugo 40 kurigu ǃnâ ta ge aiǂhanuba ge ūhâ i ǁnâub berodi ǃhūbaib ǂhawase hâ di ǀkha sîsenǀhaosa. Tsî da ge ǂgui ǁnâuǃgâ ǃkhaigu ǃnâ ǀgapi ǂhanub ǂansabegu aiǃâs tsîna sida ǁhōga gere ǂnoaba. ǃHūbaib ǂhawase ǂhanuga ra ǂnûǁkhaeba departements tsî tita ǀkha ǀguiba dana beros ai ǂhanuga ra ǂnûǁkhaeba departements ǃgâsan tsîna ta ge kaise ra ǃgôaǃgâ. ǂGui ǀkhaega ta ge ti ûib ǃnâ ge hōǃâ tsîs ge nēsa ǃgâiaǂgaoba ra mā te.

Elizabets ge ǃkharugo 45 kurigu ǃnâ ǂgomǂgomsa tsî ǀnamxaǃnâse ge ǂkhâǃnâ te ǃgâi tsî tsū ǁaegu ǃnâ. ǁÎsa ta ge kaise nēn hoan ǃgao ra ǃgôaǃgâ. ǀAesen tsîs ǁkhāsiba ūhâ tama xawes gere ǂkhâǃnâ te amaga.

Aitsamam ge ge mû ǀgaib tsî xū-e dans sida ǁkhāsiga xu hâ tamasa. Davidi ge mî khami: “ǃKhūb ge a ǁîn di ǀgai.” (Psa. 28:8) Amase ‘ǃkhams ge a Jehovab di.’