Elobmîs ǃnâ du ge ǂguro ǁkhāǁkhāsen xūna nēsi hui du ǁkhā?

1. Elobmîs amaba mati ge tsâǀkhā du ǂgurose du ge ǁkhāǁkhāseno?

ELOBMÎS ǃnâ da ge ǂguro ǁkhāǁkhāsen xūn ge sida ûiga ge dawa. Aiǁgause da ge Elob ǀons a Jehova ǃkhaisa ǁkhāǁkhāseno, da ge ǁîba ge ǀgū tsoatsoa. (Jes. 42:8) ǁŌhân mâsiba da ge ǁkhāǁkhāseno da ge ǂâiǂhansen tama hâ, sida ǀnamsaben hîna ge ǁōn ǃgoma ra tsâsa. (Aoǁn. 9:10) Elob mîmâis ǃhūbaibab nî paradai kais xa da ge ǁkhāǁkhāsen, o da ge hānîǁaeb xa ge ǂâiǂhansen ǀû. ǂGomǃgâsiba da ge ūhâ sida 70 tamas ka io 80 kurigu ǀguiga ûi tidesa xawe ǀamose nî ûisa.—Psa. 37:29; 90:10.

2. Gagasise ǀgaisa Xristeǁîna mati ǂgurosen ge ǁkhāǁkhāsen xūna xu ǃgâiba a ǀama ǁkhā? (2 Petrub 1:​12, 13)

² Elobmîs ǃnâ da ge ǂgurose ǁkhāǁkhāsen xūn a ǂhâǂhâsa ǃkhaisa da ge tā nî ǀuru. Apostel Petrub ge ǁîb di ǀgamǁî sîǂkhanisa “amab ǃnâ ǃgaoǃgaosa” ūhâ Xristeǁîna ǃoa ge xoa. (Khomai re 2 Petrub 1:​12, 13 sa.) Xawe ǁnā ǁaeb ǃnâ i ge eloxoresa khoena ǀhaohâb ǃnâ ge hâ i ǃgâsana ge amaba xu gere ǂgaebē ǂgaona. (2Pet. 2:​1-3) Petrub ge ǃgâsana gere ǂkhâǃnâ ǂgao în ǁnā khoen gere ǁkhāǁkhā ǂhumiga xu ǁkhaubasen. ǁNā-amagab ge ǁîna ǀnain ge ǁkhāǁkhāsen hâ i ǁkhāǁkhāde ge hōhōǃnâ. Nē ǁkhāǁkhādi ge ǁîna nî hui în ǂgomǂgomsase Jehovab ǀkhāb ai hâ.

3. Tae-i ǃaroman hoa Xristeǁîna ǂguron ge Elobmîs ǃnâ ǁkhāǁkhāsen xūna nî ǂâiǃgâ? Aiǁgau-e mā re.

³ ǂGui kurina da ge amab ǃnâ hâ xawe da ge kurina da ge Elobmîs ǃnâ ǁkhāǁkhāsen xūna xu a ǀama ǁkhā. Aiǁgause ǂansa ūhâ sâi-ao-i tsî ǀasase ra ǁkhāǁkhāsen i tsîn ge ǀgui ǂûna ra sîsenu. ǁAeb ra ǃkharu khami i ge ǂansa ūhâ sâi-ao-e ǁkhoaxa tsî ǃgâi ǀgaub ǃnâ ra sâi. ǁKhā ǀgaub ǃnâ i ge Jehovaba gaxuse ra ǃoaban tsî ǀasase ra ǃoaban tsîna ǃkharagagu xūna ǀgui xoade xu ra ǁkhāǁkhāsen. Sida mâsib tsî Jehovab ǃoabas ǃnâ da ra dī xūn tsîn ge ǀnîsi ge dawa ǁāǁnâhe da ges khaoǃgâ. ǃKharu ge ǁaeb ǃnâ da ge Elobmîs ǃnâ ǁkhāǁkhāsen xūn xa da ga ǂâio da ge ǀasa ǀgaugu nēsi da a sîsenu ǁkhā gu tsîna ra mû. Hā re î da kō tae-en gagasise ǀgaisa Xristeǁîna ǃnona Elobmîs ǁkhāǁkhāde xu a ǃkhāǁkhāsen ǁkhā ǃkhaisa.

JEHOVAB GE A KURU-AO

4. Jehovab a Kuru-aosa ǂansa mati ra tsâǀkhā da?

⁴ “Elob ge hoa xūna ge ǂnubi.” (Heb. 3:4) ǂAn da ge a ǃhūbaib tsî ûitsama xūn ge gā-ai tsî ǀgaisa Kuru-aob xa a kuruhesa. ǁÎb ge ge kuru da, ǃgâise a ǂan da tsîb ge sida ǀkha ǁae hâ. ǁÎb ge a ǂan tae-i sida ǃgâibasa. Jehovab a Kuru-aosa ǂans ge sida ûiba ǃgâi ǀgaub ǃnâ ge dawa tsî nēs ge sida ûiba ǂâibasensa ra mā.

5. Mâ amaba hui da ǁkhā î da ǃgamǃgamsenxasiba omkhâi? (Jesajab 45:​9-12)

⁵ Jehovab a Kuru-aosa ǁkhāǁkhāsens ge ǃgamǃgamsenxasiba ra ǁkhāǁkhā da. Aiǁgauseb ge Joba Jehovab xa ǃgâi tama ǂâiǀgauba ge ūhâ i tae-i a ǂhâǂhâsasab ge ge ǀuru tsîb ge ǁîb xa ǀgui ge ǂâi. ǁÎb a ǂhanusab ge gere ǁgau ǂgao xaweb ge Jehovaba ge hōhōǃnâ bi ǁîb a hoaǀgaixa Kuru-ao ǃkhaisa. (Job. 38:​1-4) Nē ǂâiǂâiǃnâs ge Joba ge hui îb mûǂan Jehovab ra dī xūn hoan a ǂhanusa. Kēbo-aob Jesajab ge saorase ge xoa: “ǂGoaba ǁîb kuru-aob ǃoa tare-ets ra dī . . . ti mî ǁkhāb a?”—Khomai re Jesajab 45:​9-12 sa.

6. Mâ ǁaegu ai i ǃnāsase a ǂhâǂhâsa Jehovab gā-aisib tsî ǀgaib xa ǂâiǃgâsa? (Ai-īsiga mû re.)

⁶ Xristeǁî-i ga Jehovaba ǂgui kurina ǃoabao i ge ǁî-i ǂâiǀgaub ai a ǂgomǃgâ ǁkhā. Tsî Jehovab tsî ǁîb mîsa xu daoǁgausa ôa tide. (Job. 37:​23, 24) ǁNāti ī khoe-i ga Jehovab gā-aisib tsî kaisib xa ǂâiǃnâ, os ǁnāsa mati ǁî-e a hui ǁkhā? (Jes. 40:22; 55:​8, 9) Nē amab ge ǁî-e nî hui î-i mûǂan Jehovab di ǂâidi a ǂhâǂhâsasa. Tsîs nēsa ǁî-e nî huisa î-i ǃgamǃgamsenxa.

7. Rahelasa tae-e ge dī îs ǀkharaǀkharana ūǃoa?

⁷ Rahelas ge Sloveniab ǃnâ ra hâ. Jehovab a Kuru-aos xa ǂâiǃgâs ge ǁîsa ge hui îs ǀapeǂhumis ra dī ǀasa ǀkharaǀkharana ūǃoa. ǁÎs ge ra mî: “ǀNî ǁaega i ge supu tama hâ ǂgaeǂguira ǃgâsagu ra dī mîǁguiga ūǃoasa. Aiǁgause ta ge ǂGaeǂguira soros ǀasa ǂhôan #8 ta ge kōs khaoǃgâ ta ge ǃhuri, ǀhō-amsa ūhâ ǃgâsab ǃhoasa ra mâ ǃkhaisa ta ge mûo. ǁNā-amaga ta ge Jehovaba ǃoa ge ǀgore îb hui te î ta nē ǀkharaǀkharasa ūǃoa.” Rahelas ge ge mûǂan Jehovab a Kuru-ao amagab hoaǁae a ǂansa matib ǁîb ǀapeǂhumisa nî ǂgaeǂguisa. ǀAsa ǀkharaǀkharana ǁnâuǃā tamas ka io ūǃoas xa du ga ǃgombahe o, tae-i ǃaroma du Jehovab di gā-aisib tsîb ǁîb kurus di ǀgaib xa ǂâiǃgâ tama hâ?—Rom. 11:​33-36.

TAE-I ǃAROMAB ELOBA ǃGOMSIGA RA MĀ-AM?

8. Elob tae-i ǃaroma ǃgomsiga ra mā-amsa ǁkhāǁkhāsensa xu da mati ǃgâiba ra ǀama?

⁸ Tae-i ǃaromab Eloba ǃgomsiga ra mā-am? ǀNîn ǁnā dîs di ǃereamsa ge hō tama hâ în ge Elob ǀkha ge ǁaixa tamas ka io ra ǂgom Elo-i a ǀkhaisa. (ǂKhm. 19:3) Xawe du ge ge ǁkhāǁkhāsen khoen ǃgomma tsâ tsî ra ǁōsa, ǁoreb tsî ǀoasa-oǃnâsib xa ǃaromahe hâse tsîb Jehovaba tsū xū-e dī tama hâsa. ǁKhāǁkhāsens tsîna du ge ge hî Jehovab di ǃnūǃnâxasib khoenab ūba hâb ge ge mā-am î-i ǂguina ǁîba ǂan. Tsî aitsama mû matib Jehovaba ǃgoma tsâsa hoase nî ūbēsa. (2Pet. 3:​9, 15) Nē amaba ǂans ge ǂgomǃgâsiba mā du tsî ǁîb ǃoa ra ǂgae du.

9. Mâ mâsigu ǃnâb Jehovaba tae-i ǃaroma ǃgomsiga ra mā-amsa da nî ǂâiǃgâ?

⁹ Jehovab ǃgomsiga nî ǀam kaisa da ǃâu hâ ǁaeb ǃnâ da ge ǃnūǃnâxasiba ǂhâ hâ. Xawe i ga ǀnam da khoena ǂâiǂhasen, ǂhanuoǃnâsiba hōǃâ tamas ka io ǁō, o da ge a ǂâi ǁkhā tae-i ǃaromab Jehovaba ǃhaese xū-e dī tama hâsa. (Hab. 1:​2, 3) Nēti da ga tsâo i ge a ǃgâi ǂâiǃgâsa tae-i ǃaromab Jehovaba ǃgomsiga ra mā-amsa.a (Psa. 34:19) ǁÎb ǂâibasens ǃgomsigab ǀamose nî ūbēs xa da ge nî ǂâiǃgâ.

10. Tae-e Annesa ge ǁkhaeǂgao mamasas ǁōb khaoǃgâ?

¹⁰ Elob tae-i ǃaroma ǃgomsina ra mā-amsa ǂans ge nî hui da î da ǃgomsin ǃnâ mâǀgai. Annes hîna Mayotte ailandi ǃnâ ra hâs ge ge mî: “Ti mas di ǁōb khaoǃgâ ta ge kaise ge tsûaǂgao. Xawe ta ge ǁaeba xu ǁaeb ǀkha ra ǂâiǂâiǃnâsen Jehovab nē ǃgomsina ǃaroma tamasa. ǁÎb ge amabes ǃnâ hoa ǃgomsina ra ǀam kai ǂgao tsî sida ǀnamsaben ǁōgena khâisa ra mā ǂgao. Nēti ī xūn xa ǂâiǃgâs ge ra hui te î ta ǃnomsasiba ūhâ.”

11. Jehovab tae-i ǃaroma ǃgomsina ra mā-amsa ǂansa mati nî hui da î da aiǃgû tsî aoǁnâ?

¹¹ Elob tae-i ǃaroma ǃgomsiga ra mā-amsa ǂans ge nî ǂkhâǃnâ da î da aoǁnâ ǀgara. Petrub ge ge ǁguiǃā Jehovab a ǃnūǃnâxasa khoen nî ǃhobasen tsî sâuhesab ra ǂhâba xui-ao. ǁÎb ge ge xoa: “Tsî nē xūn hoan ga hîkākāheo, tarebe khoeǃnôado nî ī? Sadu ge ǃanu tanisens tsî eloǃaoǃgâxasib ǃnâ nî ûi.” (2Pet. 3:11) ǁNā “ǃanu tanisens tsî eloǃaoǃgâxasib” tsîn ge aoǁnâ sîsen-e ǃkhōǂgā hâ. Sida Îb khami da ge khoena a ǀnam tsî da ge ra ǂhâba în Elob ǂhanu-ai ǃhūbaib ǃnâ ûi. ǃNūǃnâxaseb ge Jehovaba sadu ǂharis ǃnâ hâ khoena ǃēsa ra mā în ǁîba ǃoaba. Kai aiǂhanuba da ge ūhâ Elob sîsen ǁare-aon ase î da ǂgui khoena hui în ǁîb xa ǁkhāǁkhāsen ǀams nî hās aiǃâ.—1Kor. 3:9.

“ǀUNI TSĒDI” ǃNÂ DA GE ÛI HÂ

12. “ǀUni tsēdi” ǃnâ da ûi hâsa ǁkhāǁkhāsensa xu da mati ǃgâiba ra ǀama?

¹² Elobmîs ge ra ǁguiǃā khoen mati “ǀuniga tsēdi” ǃnâ nî tanisensa. (2Tim. 3:​1-5) Sida ǂnamipe da ga kō, o da ge ra mû Elobmîs kēbodi ra dīǀoaǀoahesa. Khoen di tanisen ǀgaugu ra ǁgai ǂoa khami da ge ra mû Elobmîs a ǂgomǃgâhe ǁkhāsa.—2Tim. 3:​13-15.

13. Lukab 12:​15-21 ǃnâ hâ ǂkhōs Jesub disa mati ra hui da?

¹³ ǀUniga tsēdi ǃnâ da ûihâsa ǂans tsîn ge ra hui da î da ǂhâǂhâsa xūn ai sida ǂâisa ǂnûi. Nēs tae-i ǃaroma a ǂhâǂhâsasa da ge Jesub di ǂkhōs Lukab 12:​15-21 ǃnâ ra hōhes ǃnâ nî ǁkhāǁkhāsen. (Khomai re.) Jesuba tae-i ǃaroma ǃkhū hâ khoeba “sa gâretse” ti ge ǂgai? ǁÎb ǃkhū hâ amagas ose xawe ǂhanu tama xūnab ge ǂgurose gere mâi amaga. ǁÎb ge ‘ǃkhūsiba ǁîb ǃaroma ge ǀhaoǀhaobasen, xaweb ge Elob ǃnâ ge ǃkhū tama hâ i.’ ǁNā ǁaeba ǂhanu tamase sîsenus ge ǃgâi tama ge hâ i, ǁnā khoeb ge ǂnâusa ǁaeba ūhâ tama hâ i amaga. Elob ge ǁîba ge mîba: “Nē tsuxub ǂûb ǃnâts ge ǀoms âtsa nî ǂgaoǀkhāhe.” Nētsē da ge nē xūn di ǀams ra ǀgū khami a dîsen ǁkhā: ‘Dī ta nî ti ta mîǁgui hâ xūna ra ǁgau ti ǁaeba ta gā-aise ra sîsenusa? Mâ mîǁguiga sīǃnâs ǀkha ta ti ôana ra hui? Ti ǀgaib tsî ǁaeb tsî ū ta hâ xūna ta ra sîsenu î da ǀhommi ǃnâ ǁuiba sâubasen?’

14. Mikis aiǁgaus ǃoagu i tae-i ǃaroma ǂhâǂhâsa î da Elobmîs ǃnâ ra dīǀoaǀoahe xūn ǀuni tsēdi ǃnâ da hâsa ra ǁgaun xa ǂâiǃgâ?

¹⁴ Sida ûib di mûǂûib ge nî ǀkhara ǀuniga tsēdi ǃnâ da ûi hâsa ra ǁgau xūn xa da ga ǂâiǃgâo. Nēti ī xū-i ge Miki ti ǀon hâ ǃgâsas ǀkha ge ī. ǁÎs ge ra mî: “Skola ta ge toa, o da ge xamanin xa gere ǁkhāǁkhāsen ǂgao. ǁNaetisa aimâba-ao kai tsî ǂhâsib a ǃnāsaba sī aoǁnâs mîǁguib tsîna ta ge ge ūhâ i. Ti ǀhaohâb ǃnâ hâ ǃgâsan ge ge ǂkhâǃnâ te î ta ǃgâise ǂâi, ǂhâba ta hâ sîsen-e dī tsî ta noxopa ǁnaetisa aimâba-ao kai tsî ǃnāsa ǂhâsib hâba sī a aoǁnâ ǁkhāsa. ǁÎn ge ge ǂâiǂâiǃnâ te nē xūn ǀams ǀgū ǁae nî ǀkhīsa. Hōhōǃnâ ten ge ge xamamin xa ta ǀasa ǃhūbaib ǃnâ ǀamosib kōse a ǁkhāǁkhāsen ǁkhāsa. ǃNubu ǁkhāǁkhāsens ǀguisa ta ge ge dī ti ǁaeba ge ǁnātikōse ū tama hâ isa. Nēs ge ge hui te î ta ǁnaetisa aimâba-aose nî ǂkhâǃnâ te sîsen-e hō. Tsî ega Ecuadora ǃoa doe ǃāsa ǂhâsib hâba.” Mikis tsî ǁîs aob tsîn ge nēsisa ǁnā ǃhūb ǃnâ ǃnarimâra sîsen-e ra dī.

15. Khoena noxopa mati ǃgâiǂhôasa ūǃoa ǁkhā? Aiǁgau-e mā re. (Ai-īsiba mû re.)

¹⁵ Tā da ge nî ǂkhabuǂâi khoen ga ǃgâiǂhôasa ūǃoa ǂgao tama io. Khoen ge a dawa ǁkhā. Jesub ǃgâb Jakobub di aiǁgausa ǃgaoǃgâ re. ǁÎb ge ge mû Jesub ge mati kai tsî a Mesia kaisa tsî khoe-i noxopa ǁkhāǁkhā tsâ tama khami gere ǁkhāǁkhāsa. Nēnab ge kurina mû xaweb ge Jakobuba Jesuba ge sao tama hâ i. Jesub di khâis khaoǃgâb ge ǁîb di ǃgâb Jakobuba ge ǁkhāǁkhāsabe kai, ǁîb ge kaise ge ôasa i.b (Jhn. 7:5; Gal. 2:9) Tā sadu ǀaokhoen amaba ge ūǃoa tama hâ īn ǃnâ ǀûsen tsî ǁnān hîna ge gaosib hâisi-amsa ūǃoa ǂgao tama hâ în ǃnâs tsîna. ǂÂi-oa re ǀuniga tsēdi ǃnâ da ûi hâsa tsî i sida aoǁnâ sîsen-e a ǁgariǁgarisasa. Sats ǁî-e ǃoa ra mî xū-i ge ǀguitsē ǁî-i ai sîsenǂuiba a ūhâ ǁkhā, ǀnîsi kai ǁgaiǀāb khaoǃgâs tsîna.c

JEHOVAB HŌHŌǃNÂDE ǃGÔAǃGÂ ǀGARA

16. Mati du Jehovab hōhōǃnâde xu ǃgâiba ǀama hâ? (Boksis “ǁÎna sîsenu i nauna ǁkhāǁkhā” ti hâsa mû re.)

¹⁶ Elobmîs ai ǃgaoǃgaosa gagasi ǂûn sida ǀapeǂhumis ra mān ge Elobmîs amab ǂansa ūhâ tama khoen ǃaromas tsîna ra aiǂhumihe. Aiǁgause, wekheb ǀams ai ra māhe ǃhoas, ǀnî khomaiǃâdi jw.orgs ai hâ di, vidiogu tsî sida ǂkhanin tsîn ge Jehovaba ǃoaba tama khoen ǃaroma ra dīhe. ǁNāti i ga ī xawe da ge ǁnā hōhōǃnâde xu ǃgâiba ra ǀama. ǁNā ǁkhāǁkhā di ge Jehovaba da ūba hâ ǀnammi tsî ǁîb mîs ǃnâ da ūhâ ǂgoms tsîna ra ǀgaiǀgai. Tsî i ge ra hui da î da ǃgâi Elobmîs ǁkhāǁkhā-ao kai.—Psa. 19:7.

17. Mâ mâsigu ǃnâ du Elobmîs ǁkhāǁkhādi xa a ǂâiǃgâ ǁkhā?

¹⁷ Jehovaba ra ǃoaba khoen ase da ge kaise ra ǃgâiaǂgao, Elobmîs amaba da ra ǁnâuǃā ǀgaub ga ǃgāǃgāheo. Xawe da ge Elobmîs di ǁkhāǁkhādi hîna ge amaba ǃoa ǂgae dana kaise ra ǃgôaǃgâ. ǁKhāǁkhāsen da go khami nē Elobmîs amab ge noxopa hui da ǁkhā. Daoǁgaude da ga ǀapeǂhuumisa xu hō xawe da ga sida ǂâiǀgaub tamas ka io xūna da ra dī ǀgaub ǁnās ǂamai ǃgâi ti ǂâi, o da ge ǃgamǃgamsenxase nî ǂâihō Jehovab sida gā-ai tsî ǀgaisa Kuru-aob nē ǀapeǂhumisa ra daoǁgau ǃkhaisa. ǃGomsina da ga hōǃâ tamas ka ion ga ǀnam da a khoena ǃgomsiga hōǃâ, o da ge ǃnūǃnâxa ǁkhā tsî tae-i ǃaromab Jehovaba ǃgomsiga ra mā-amsa a ǂâiǃgâ ǁkhā. Sida ǁaeb tsî ǀgaib tsîna da mati nî sîsenus xa da ga ǂâio da ge nî ǂâi-oa ǀuni tsēdi ǃnâ da ûi hâsa. Jehovab hōhōǃnâde di aiǃgû tsî ǀgaiǀgai da tsî ǂkhâǃnâ da, î da Jehovaba ǂgomǂgomsase ǃoaba.