Hâǃnâts hâ mâsib hoab ǀkha ǂkhîs xats ge ǁkhāǁkhāsen?

1. Ū da hân ǀkha ǂkhîsa tae-e ra ǂâibasen tsî tae-e ǂâibasen tama?

ŪTS hâ xūn ǀkhats a ǂkhî? Ūn hâ xūn ǀkha ra ǂkhî khoen ge ǃgâiaǂaob tsî ǂkhîb tsîna ra hōǃâ, ūn hâ ǀkhaegu ain ǂâisa ra ǂnûi amaga. Ūhâ taman hâ xūn ǃaroman ge ǁaixa tama. Ū da hâ xūn ǀkha da ga ǂkhîo i ge ǂâibasen tama hâ sida ûiga da ra ûi ǀgaub ǀkha da ǁae tama ti. Aiǁgause, ǁnās ǀkha Jehovab di ǃoabas ǃnâ ǃnāsa-e dīs ge tsū tama. (Rom. 12:1; 1Tim. 3:1) Ū da hân ǀkha da ga ǂkhîo da ge sida ǃgâiaǂgaoba ǂoaǃnâ tide, ǃâubasen da hâ ǁgaumâide da ga ǃhaese hō tama i xawe.

2. Mâ ǁgai xūna a īǁkhā ū da hâ xūn ǀkha da ga ǂâu tama io?

² Ū da hân ǀkha da ga ǂkhî tama io da ge ǁgai mîǁguiga a dī ǁkha. Ūn hâ xūn ǀkha ǂâu tama khoen ge gaxū īrga ra sîsen în ǂhâǂhâsa tama xūna ǁama. Tsûaǂgaoxasen ge ǀnî Xristeǁîna mari-i tsî ǀnî xūn turan ran tsîna ge ǃnari. ǀNîsin ge ge mîbasen ‘nēsa ta anu hâ,’ ‘kaise ta gaxū ǁaeba ǃâu hâ’ tamas ka io ‘marisa ta ge nēsi ū tsî ega nî ǂgā.’ ǃNaris ge Jehovaba ra tsûaǂgao kai tsî ǃgôasiba ǁgau tama. (ǂKhm. 30:9) ǀNîn ge ǁgaumâi-en hō tama amaga ǂkhabuǂâi tsî Jehovaba ge ǃoaba ǀû. (Gal. 6:9) Mati-i Jehovaba ra ǃoaba khoe-e ǁnāti-i xū-e dīsa ra ǂâi? ǁNāti-i khoe-i ge ǀnîsi ū-i hâ xū-i ǀkha ge ǂâu tama hâ i.

3. Filipeǁîn 4:​11, 12 sa xu da tae-e ra ǁkhāǁkhāsen ǁkhā?

³ Hoa da ge ū da hâ xūn ǀkha a ǂâu ǁkhā. Apostel Paulub ge ge xoa “xawe ta ge hâǃnâ ta ka mâsib hoab ǀkha ǂkhîsa ge ǁkhāǁkhāsen.” (Khomai re Filipeǁîn 4:​11, 12 sa.) Nē mîdeb ge tronkes ǃnâb ǂnôa hîna ge xoa. ǁÎb ǃgâiaǂgaobab ge ge ǂoaǃnâ tama hâ i. ǁÎb ge ǂgui khoen ǂan tama xū-e ge ǁkhāǁkhāsen, ǁnās ge ūb hâ xūn ǀkha ǂâus “ǂganǃgâsiba.” Ū da hâ xūn ǀkha ǂâus ǃgomsiba da ga ūhâ on ge Paulub ge ǃkharuǃnâ xūna ra ǁgau sida tsîn ū da hâ xūn ǀkha ǂâu ǁkhā ǃkhaisa mati ǀguib ga mâsiba ī xawe. Tā da ge nî ǃâubasen supu i asa ū da hâ xūn ǀkha ǂâusa. Xawe da ge nî ǁkhāǁkhāsen î da ū da hâ xūn ǀkha ǂâu. Mati? Nē ǁkhāǁkhāǃâs ǃnâ da ge nî ǃhoaǃgao tae-i nî hui dasa î da ū da hân ǀkha ǂâu.

GANGANXASIBA OMKHÂI

4. Ganganxasiba mati ra hui da î da ū da hân ǀkha ǂâu? (1Tesalonikaǁîn 5:18)

⁴ Ganganxa khoe-i ge ǃnāsa ǁaeba ū i hâ xū-i ǀkha ra ǂâu. (Khomai re 1 Tesalonikaǁîn 5:18 sa.) Aiǁgause da ga sida ûib ǃnâ da ūhâ xūn ǀkha ǂkhîo, da ge ūhâ tama da hâ xūn xa kaise ǂâi tide. Nēsi da ūhâ ǁgaumâidi xa da ga ǂâiǃgâo da ge ǁnā ǁgaumâidi ǃnâ ǁkhā da a-i hoa-i ai ǂâisa nî ǂnûi. Nēs ǀkha da ge hoaǁae ǂâiǂhansen tide, mati da ǀkhara ǁgaumâi-i ǂhâba da hâ-e nî hō ǀgaub xa. Jehovab ge a ǂan ganganxasib ǂhâǂhâsa ǃkhaisa, ǁnā-amagab ge Elobmîs ǃnâ ra mîba da î da ǁîba gangan ǀgore da gao. Ganganxa ǂgaoba ūhâs ge ra hui da î da “ǂkhîb Elob dib, ǁnâuǃāb hoaba ǃnā hâba” hōǃâ.—Fil. 4:​6, 7.

5. M â ǃaromasas ge Israelǁaesa ūhâ i ganganxasiba ǁgausa? (Ai-īsiba mû re.)

⁵ ǃGaoǃgâ re tae-i ge Israelǁîn ǀkha a īsa. ǂGui ǃnāden ge Jehovab ǃoa gere ǃgae Egipteb ǃnân gere ǂû ǂûnan ge nesi ūhâ tama hâ i amaga. (Num. 11:​4-6) Ûib ge ǃgaroǃhūb ǃnâ ge supu tama hâ i. Tae-e ga hui nî hâ în ūn hân ǀkha ǂâu? Jehovab ge ǀnai dība nî xūna ǂâi-oa tsîn ge ǃgôaǃgâsiba ga ǁgau hâ. ǁÎn ge matin ge Egipteb ǃnâ ǃgāse hâ ūhe tsîb ge Jehovaba Egipteǁîna disi ǁkharagu ǀkha ǁkhara ǀgaub xa ga ǂâi-oa hâ. Israelǁaes ge Egipteba xu ī ob ge Jehovaba ge hui nî în ǂgui ǃhuniǀurigu, ǀhaiǀurigu tsî saran tsîna ūsao. (Eks. 12:​35, 36) Israelǁîn ge Faraob toroǂnubis xa sauruhe ob ge Jehovaba huriba ge ǁkhowa-am tsîn ge ǃnorasase ge ǃkharu ǁkhā i. ǃGaroǃhūb ǃnân ge tsēs hoasa mana-e gere māhe. O tae-i xan ge Israelǁîna ǂû-i ǃaroma gere ǃgae? Israelǁîn ge ge ganganoǃnâ i Jehovab ge ǂâusa ǂûna mā nî xawes tsîn hoan ǃnâ.

6. Mâ ga ǀnî ǀgaugu ganganxasiba da a ǁgau ǁkhā ga?

⁶ Tae-e nî hui du î du ganganxasiba ǁgau? Tsēs hoasa ǂâiǃgâ re ǃgâi xūn sadu ûib ǃnâ ra īna. ǀNîsi du ge ǀgam tamas ka io ǃnona xūn gangan du rana a xoaǁnâ ǁkhā. (ǃG.am. 3:​22, 23) ǀGamǁîse khoena gangan ti mî xū-en ga dība duo tsî ǃgōsase Jehovaba tsēs hoasa gangan. (Psa. 75:1) ǃNonaǁîse, Sada ǀhōsan ga ganganxasiba ǁgau tama i, tamas ka io hoaǁae ǃgae o da ge ǁîn khami a i ǁkhā. Xawe sida ǀhōsan ga ganganxao i ge ǁîn ǃgâi tanisen ǀgauba sida hui ǁkhā î da ganganxa. (Deu. 1:​26-28; 2Tim. 3:​1, 2, 5) ǃĒde ôa tsî da ga gangan ti mîo da ge ǀorose sida ǃgomsigu tsî ūhâ tama da hâ xawe da ǂhâba hâ xūn xa ǁaixa tide.

7. Tae-e Acisa ge hui îs ūs hân ǀkha ǂâu?

⁷ Acis hîna Indonesiab ǃnâ ra hâs ǀkha i ge tae-e īsa ǃgaoǃgâ re. “Koronas gere tsoatsoa ǁaeb ǃnâ ta ge ti ǃgomsiga nau ǃgâsan digu ǀkha gere ǀgopeǀnō. ǁNās xa ǃaromahe hâse ta ge ū ta hân ǀkha ge ǂâu tama hâ i.” (Gal. 6:4) Tae-e ge huisi îs ǁîs ǂâiǀgauba dawa? Acis ge ra mî: “Tsēs hoasa ta gere hō ǀkhaega ta ge ge ǃgôa tsoatsoa tsî ta ge Elob ǀapeǂhumis di ǃâ ta a amaga ta ge ǃkhōǃoa ǃgâi xūn xa gere ǂâiǃgâ. Jehovaba ta ge gangansa ge mā dībateb ge xūn hoan ǃaroma tsî nēs ge ge huite î ta ū ta hân ǀkha ǂâu.” Sadu mâsib xa du ga ǂkhîoǃnâo du ge Acis ge dī xū-e a dī ǁkhā î du ganganxasiba hō-oa.

ǃGAMǃGAMSENXASE HÂ ǀGARA

8. Tae-e Baruxi ǀkha ge ī?

⁸ Kēbo-aob Jeremiab di xoa-aob Baruxi ge ǁaeroba ǁîb ûib mâsib ǀkha ge ǂkhî tama hâ i. Baruxi ge ǃgom ǁgaumâisa ge ūhâ i, ǁîb ge Jeremiaba gere ǂkhâǃnâ îb ganganoǃnâ Israelǁîna mîba tae-i ǁîn ǀkha nî īsa, Jehovaban ǁnâuǀnam tama amaga. Jehovab ǁîba ra ǂgaoǀkhā xūn ai ǂâisa ǂnûi tama i tsîb ge Baruxa ǁîb ra dī ǂgao xūn ai ǂâisa ge ǂnûi tsoatsoa. Jeremiab ǃnâ-ūb ge Jehovaba Baruxa ge mîba: “Satsa kha ǁnâi kai xūna ra ôabasen? Tā ǁnāsa dī.” (Jer. 45:​3-5) ǀNî mîdi ǃnâb ge Jehovaba Baruxa gere mîba: “Ūts hâ xūn ǀkha ǂâu” ti. Baruxi ge ǁnâmasa ge ūǃoa tsîb ge Jehovab ǀgū ǀhōsase ge hâ ǀgara.

9. 1 Korinteǁîn 4:​6, 7 sa xu da tae-e ra ǁkhāǁkhāsen? (Ai-īsiba mû re.)

⁹ ǀNî ǁaegu ai i ge Jehovab ǃoaba-aoba ǀnî ǁgaumâisab anu hâ khami a tsâ ǁkha. ǁÎb ge ǀnîsi nē ǀgaub ǃnâ a tsâ ǁkhā ǂgui xūn ǂansab ūhâ, ǃgarise sîsen tamas ka iob Jehovaba ǂgui kurina ǃoaba hâ amaga. Naun ge ǀnîsi ǁîn ǂhâba hâ ǁgaumâide ra ǃkhōǃoa. Tae-e a huibi ǁkha îb tā ǁaixa? 1 Korinteǁîn 4:​6, 7 (Khomai re) ǃnâb ge apostel Pauluba a xoa mîdeb ge a ǂâiǃgâ ǁkhā. Aiǂhanugu tsî ū da hâ ǂans hoas ge Jehovaba xu ra hā. Jehovab ge nē māde mā da tama ǀō-aisa khoeda a amaga. Nēn hoan ge anu tama da hâ ǃgâisib Jehovab diba ra ǁgau.—Rom. 12:​3, 6; Efe. 2:​8, 9.

10. Mati da ǃgamǃgamsenxasiba a omkhâi ǁkhā?

¹⁰ ǃGamǃgamsenxasiba da ge omkhâi ǁkhā Jesub aiǁgausa ǁgaes ǃnâ-ū. Jesub aiǁgaus xa da ga ǃgamse ǂâiǃgâ tsî ǁîba ǁgae o da ge ǃgamǃgamsenxasiba ǁkhāǁkhāsen ǁkhā. Jesub ge ǁîb ǁkhāǁkhāsabegu ǂaide ge ǁā, Elob ôa tsîb kai ǃereamsa ūhâsab ge ǂan i xawe. Apostel Johanneb ge ge xoa: “Jesub ge ge ǂan i ǁGûb xab ge mâ xū-i hoa-i ǂama ǁkhāsiba māhe tsîb ge Eloba xu hā tsîb Elob ǃoa nî oa ǃkhaisa. . . . ǁNās khaoǃgâb ge ǁkhāǁkhāsabegu ǂaide” ge ǁā tsoatsoa. (Jhn. 13:​3-5) Jesub ge ǀnîsi ga tsâ hâ ǁîb ǁkhāǁkhāsabegu ǁîb ǂaide nî ǁāsa. Elob ôab a amagab kai ommi, ǂgui mari-i tamas ka io supu ûiba nî ūhâ tib ge Jesuba ge ǂâi tama hâ i. (Luk. 9:58) Jesub ge ge ǃgamǃgamsenxa i, ūb hân ǀkhab ge ge ǂâu. ǃGâi aiǁgausab ge sida ge ǁnāxupa.—Jhn. 13:15.

11. ǃGamǃgamsenxasiba Dennisa mati ge hui îb ūb hân ǀkha ǂâu?

¹¹ Dennis ti ǀon hâ ǃgâsab Nederlands ǃnâ ra hâb ge ra mî, Jesub khami ǃgamǃgamsensab ge dītsâsa xawe i ge supu tama. ǁÎb ge ra mî: “ǀNî ǁaega ta ge ǀgapiǂâixasib tamas ka io ū ta hâ xūn ǀkha ta ǂâu tama ǃkhaisa ra hōǃâ, aiǁgause i ga khoe-e tita ǂhâba hâ ǁgaumâisa hō o. ǁNās ga io ta ge ǃgamǃgamsenxasib xa hâ khomaiǃâde ra ǁkhāǁkhāsen. ǃGamǃgamsenxasib xa hâ ǃhoaǃâde ta ge jw Librarib ǃnâ ǀguiba ǀhaoǀhao hâ î ta ǃkhaese hō tsî khomai. Ti selfoni ais tsîna ta ge ǀnî ǃhoadi ǃgamǃgamsenxasib xa hâde ǃnaoǁnâ hâ tsî ǁaeba xu ǁaeb ǀkha ra ǃgâ.a ǁKhāǁkhāsen ta ge ge Jehovaba ta ra dība xūn hoan tita ose xawe ǁîba koasa nî māsa. Jehovab ge mâ khoe-i hoa-e ra mā-am xū-e dīsa xaweb ge ǁîba nē xūna ra sîsen kai.” Ū du hâ xūn ǀkha du ga ǂâu tama i, ǂhâba du hâ ǁgaumâidi xa ǃaromahe hâse o ǃgamǃgamsenxasib ai sîsen re. Nēs ge sadu ǀhōsagusis Jehovab ǀkha du ūhâsa nî ǀgaiǀgai tsî nî hui du, î du ū du hân ǀkha ǂâu.—Jak. 4:​6, 8.

SADU ǃÂUBASENS XA ǂÂIǃGÂ

12. Mâ ǃâubasens hānîǁaeb disa ra hui da î da ū da hân ǀkha ǂâu? (Jesajab 65:​21-25)

¹² Ū da hân ǀkha da ge ra ǂâu Jehovab mîmâiba da hâ hānîǁaeb a da ga ǂâiǃgâo. Jesajab di ǂkhanis ǃnâb ge Jehovaba ra mîba da ǂgui ǃgomsina da ūhâsab ra ǁnâuǃāsa. Xaweb ge ra mîmâi ǁnā ǃgomsin hoanab nî ūbesa. (Khomai re Jesajab 65:​21-25sa.) Îsa tsî ǃnōrasa omdi ǃnâ da ge nî ǁan. ǃGâi sîsenni tsî ǁkhoaxa ǂûna da ge nî ūhâ. Tātsē da ge ǂâiǂhânsen tide tsū xūn sida tamas ka io sida ǀgôan ǀkha nî īsa. (Jes. 32:​17, 18; Ese. 34:25) ǂGomǃgâsiba da ge a ūhâ ǁkhā nē îsa mîmâidi hānîǁaeb di di nî dīǀoaǀoahesa.

13. Tae-i ǃgomsina da ra hōǃâ tsî hānîǁaeb ǃâubasens xa ǂâiǃgâsa mati ra hui da?

¹³ Tae-i ǃaroma i a ǂhâǂhâsa sada ǃâubasens hānîǁaeb dis xa ǂâiǃgâsa? “ǀÛniga tsēdi” ǃnâ da ûi hâ tsî da hoa da “ǃgom ǁaega ra hōǃâ” amaga. (2Tim. 3:1) Jehovab ge daoǁgaus, ǂkhâǃnâs tsî ǀgaib ǂhâ da hâb tsîna tsēs hoasa ra mā da. (Psa. 145:14) ǁNās xōǀkhas ge sida Xristeǁî ǃâubasensa ra hui da ǃgomsina da ga hōǃâ ǁaeb ai. ǀNîsi du ge ǃgarise nî sîsen î du sadu omaris ǂhâsiga kōǃgâ. Nēsa ra ǂâibasen hoaǁae du nî ǀgâsa ti? Tātsē, Jehovab ge ge mîmâi ǂhâ du hâ xūnab nî mâ dusa tsî ǁnās xa ǃnāsase Paradais ǃnâ. (Psa. 9:18; 72:​12-14) Tsēs hoasa du ge ǀnîsi tsûba a hōǃâ ǁkhā tsî ra ǂâiǂhansen tamas ka io ǂgauhe tama ǀae-e ūhâ. Nē ǃgomsiga du ǀamosib kōse nî hōǃâ? Tātsē, ǀaeb tsî ǁōb tsîn ge ǀāsa ǃhūbaib ǃnâ nî ūbēhe. (J.ǂHa. 21:​3, 4) Nē ǃâubasens ge ra hui da î da nēsi da ūhâ mâsigu ǀkha ǂkhî. ǃGâiaǂgaob tsî ǂkhîb tsîna da ge a hōǃâ ǁkha, ǂhanuoǃnâsiba da ga ǃkharuǃnâ, ǁōb ǃnâ khoe-e ǂoaǃnâ tamas ka io i ga ǁgai xū-e sida ûib ǃnâ ī xawe. Tae-i ǃaroma? Nē da ra hōǃâ ‘ǃgomsigu ǁaerob dis ǀguisa ī’ ǃkhaisa da a ǂan amaga tsî da ǀāsa ǃhūbaib ǃnâ ǃgomsi-e ǁkhawa tsâ tidesa.—2Kor. 4:​17, 18.

14. Mati da sada ǃâubasensa nî ǀgaiǀgai?

¹⁴ Hānîǁaeb ǃâubasens ge ra hui da î da ū da hân ǀkha ǂâu. Tae-e nî hui da î da ǂgomǃgâsiba ūhâ Jehovab mîmâidi nî dīǀoaǀoahesa? ǀGui xū-i hui da nî i ge Paradais ǃnâ mûnan-aisensa. ǀNî ǁgaumâidi ǃaroma da ga ǂâiǂhânseno da ge nî ǂâiǃgâ, matikōsen nē xūna ǂhâǂhâsa tidesa ǀāsa ǃhūbaib ǃnâ ǀoasa kurusa da ga ūhâo. (1Tim. 6:19) ǂGui xūn xa da ge nēsi ra ǂâiǂhânsen tsî i ge a ǃgom kai ǁkhā hānîǁaeb mîmâidi xa ǂâiǃgâsa. Jehovab mîmâiba da hâ hānîǁaeb ǃâubasens xa da ga ǂâiǃgâo da ge sida ǃgomsin ai ǂâisa ǂnûi tide.

15. Tae-e du Christasa xu ra ǁkhāǁkhāsen?

¹⁵ Aiǃâ da goro ǃhoaǃgao ǃgâsab Dennisi ǀkha ǃgamme hâ ǃgâsas Christa ti ǀon hâs ge mati ǃâubasens xa hui-e ǀgauba ǃgâ re. ǁÎs ge ra mî: “Tita ge ǂkhabu kai te ra ǀaeba ūhâ, ǃgûǁoa ta ge a tsî ta ge rolstoelsa ra sîsenū tsî kharob ǃnâ ǃnāsa ǁaeba ra ǁgoe. Tsēs hoasa ta ge tsûb ǃnâ hâ. Ti ǀaeǃkhō-aob ge ge mîba te ǂgau ta tide ti. ǁKhā ǁaeb ǃnâ ta ge ge ǂâi, ‘ǁîb ge hānîǁaeb a tita ra mû khami mû tama hâ.’ Ti ǃâubasens ai ta ge ǂâisa ra ǂnûi, nēs ge ǃnomsasiba ra mā te. Nētsē ta ge nî mâǀgai nē ǃhūbaib ǃnâ ûisa xawe ta ge hā nî ǀāsa ǃhūbaib ǃnâ ǃgâi ǂurusiba nî ūhâ.”

“ǁNĀN ǁÎBA RA ǃAOǃGÂN ǃNUBUSI-I XARE-E ŪHÂ TAMA XUI-AO”

16. Tae-i ǃaromab ge Gao-aob Davida xoa ǁnān Jehovaba ra ǃaon “ǃnubusi i xare-e ūhâ” tidesa?

¹⁶ Ū da hân ǀkha da ga ǂâu xawe da ge noxopa ǃgomsina nî hōǃâ. Gao-aob Davidi xa ǂâi re, ǁîb ge ǃnona ǀgôana ǁōb ǃnâ ge ǂoaǃnâ. Nē ǃgomsinab gere hōǃâ xaweb ge Davida ge ǂkhî-i. ǁÎb ge Jehovab xa ge mî: “ǁNān ǁîba ra ǃaoǃgân ǃnubusi-i xare-e ūhâ” tidesa. (Psa. 34:​9, 10) Tae-i ǃaromab ge ǁnāsa mî ǁkhā i? ǁÎb ge ge ǂan i Jehovab ǃgomsina ǁkhae tamasa xaweb Davida ǂhâb hâ-e nî māsa. (Psa. 145:16) Davidi khami da ge sida tsîna ǂgomǃgâsiba ūhâ Jehovab nî hui dasa î da sida ǃgomsigu ǃnâ mâǀgai. Tae-i ǀgui-e da ga ǃkharuǃnâ xawe da ge ǂkhîba a ūhâ ǁkha.

17. Tae-i ǃaroma du ū du hân ǀkha ra ǂâu ǂgao?

¹⁷ Jehovab ge ra ǂhâba î du ū du hân ǀkha ǂâu. (Psa. 131:​1, 2) ǁKhā du a-i hoa-e dī î du ū du hân ǀkha ǂâusa ǁkhāǁkhāsen. ǃGarise sîsen tsî da ga ganganxasiba omkhâi, ǃgamǃgamsenxa tsî sida ǃâubasensa ǀgaiǀgaio da ge a mî ǁkha: Ū da hân ǀkha ǂâus ge “ǃgâiba te.”—Psa. 16:​5, 6.