Jehovab ǀnamma ūǃoa

1. Tae-i ǃaroma du ge mîǁgui Jehovaba sadu ûib hoaba ǃoabasa? (Ai-īsiba mû re.)

ǂÂI-OA du ra, ǀgore tsî du ge Jehovaba a mîbasa sadu ûib hoaba du ge ǁîba ra ǃoaba ǂgaosa? ǁNā mîǁguiba du ge ǁîba du a ǂan tsî a ǀnam amaga ge dī. Mîǁgui du ge ge ǁîba du ǂgurose sadu ûib ǃnâ nî mâisa tsî du aiǃgû tsî ǁîba nî ǀnamsa sadu ǂgaob, ǂâis tsî ǂgaob hoab ǀkha. (Mrk. 12:30) ǁÎba du ge ǂansa xu i ge sadu di ǀnamma ge ǀgai. Mati du nî ǃeream khoe-i ga dî du o, “Jehovabats a ǀnam?” Îganǀgē tamase du ge nî mî, “ǁîba ta ge hoa xūn ǂam-ai a ǀnam.”

2-3. Tae-i ǂgomǃgâsiba da nî ūhâsab Jehovaba ra ǂhâba tsî tae-e da nē ǁkhāǁkhāǃâs ǃnâ nî ǃhaoǃgao? (Jeremiab 31:3)

² Jehovaba da kaise a ǀnam ǃkhaisa da ǂan xawe da ge îganǀgē ǁkhā Jehovab sida a ǀnamsa. ǀNîsi da ge ra ǂâi ǁîb xa ǀnamhesa da anu tamasa. ǀGui ǃgâsas hîna ge ǀnamoǃnâ omaris ǃnâ kaikaihes ge ra mî: “Tita ge Jehovaba ti ǂgaob hoab ǀkha a ǀnam, ǁnās ǂgomǃgâsiba da ge ūhâ. Xawe ta ge ǃnāsa ǁaeba ra îganǀgē Jehovab a ǀnamtesa.” Tae-e hui du ǁkhā î du ǂan Jehovab mati sadu xa ra tsâsa?

³ Jehovab ge ra ǂhâba î du ǁîb a ǀnam du ǃkhais di ǂgomǃgâsiba ūhâ. (Khomai re Jeremiab 31:3 sa.) Jehovab ge ra ǂhâba î du ǁîb xa ǃnāsase ǁkhāǁkhāsen tsî ǁîb di ǀhōsa kai. Māǁnâsen tsî du ge ǁāǁnâ kaisen ob ge ǀō-aisa ǀkhaeba ge mā du, ǁîb di ǂgomǂgomsa ǀnamma. ǁNās ge ra ǂâibasen ǁîb ǃgam ǀnamma ūba du hâsa tsîb tātsē ǁnāxu du tidesa. ǁNā-amagab ge ǁîb di ǃoaba-aona “ǃgomǀgausa” xū-i ase ra mû sadu tsîna ǃkhōǂgā hâse. (Mal. 3:17) Jehovab ge ra ǂhâba î du sadu tsîna Apostel Paulub gere tsâ khami tsâ. Paulub ge ǂgomǃgâsib ǀkha ge xoa: “ǂAn ta a xui-ao, ǁōb kas, ûib kas, ǀhomǃgān kas, ǀhomsi danaǂgaeǂgui-aogu kas, ǀgaigu kas, nēsi hân tsî ǃgoaxan kas, ǀgapib tamas ka io ǃgammi kas tsî ǀnî kurusabe-i kas hoasa i ge Elob ǀnammi, Xristub Jesub, sada ǃKhūb ǃnâ-ū sada diba xu a ǀgora da ǁoa.” (Rom. 8:​38, 39) Nē ǁkhāǁkhāǃâs ǃnâ da ge nî ǃhoaǃgao tae-i ǃaroma i a ǂhâǂhâsa î da Jehovab ǀnam da ǃkhais ǂgomǃgâsiba ūhâ. Tsî tae-i ǃaroma da ǁnā ǂgomǃgâsiba nî ūhâ ǀgarasa.

JEHOVAB ǀNAMMA ŪǃOAS ǂHÂǂHÂSASIB

4. Mati da ǁGâuaba mâǃoa ǁkhā?

⁴ Jehovab di ǀnamma ūǃoas ǃnâ-ū da ge “ǁGâuab di ǀhôagao ǀapede” ǃkhamǃoa ǁkhā. (Efe. 6:11) ǁGâuab ge xū-i hoa-e a dī ǁkhā îb Jehovaba ǃoabasa xu ǁkhae da. ǀGui ǀapes ǁGâuab ra sîsenus ge Jehovab ǀnam da tama ti ǂgom kai da sa. Tā da ge nî ǀuru ǁGâuab a ǃē ǃkhō-aosa. Elobmîs ge ǁGâuaba xami ǀkha ra ǀgopeǀnō. (1Pet. 5:​8, 9) Xamgu ge ǃnāsa ǁaeba ǂkhabusa tsî aitsama ǁkhaubasen ǁoa xaminina ra ǁnāǂam. ǁNās ǁkhās khamib ge ǁGâuaba ra ǁnāǂam da ǂkhabuǂâi, tsau, ǃkharuge ǁaeb ǃnâ da ge hōǃâ xūn xa tsûaǂgao tsî da ga ǃgomsina hōǃâ tsî hānîǁaeb ǃnâ nî ī xūn xa ǃao ǁaeb ǃnâ. (ǂKhm. 24:10) ǁGâuab ge ra ǃâubasen î da ǂkhabu tsî Jehovaba ǃoaba ǀû. Xawe da ge ǁGâuab tsî ǁîb di “ǀhôagao ǀapedi” tsîna mâǃoa ǁkhā. ǁKhā da a i hoa-e dī tsî da ga Jehovab a ǀnamdas ǂgomǃgâsiba omkhâio.—Jak. 4:7.

5. Tae-i ǃaroma i a ǂhâǂhâsa Jehovab ǀnam du tsî ra ǃgôaǃgâ dusa hōǃâsa?

⁵ Jehovab di ǀnamma da ga ūǃoa o da ge ǁîba ǀgū ǁkhā. Tae-i ǃaroma da ti ra mî? Jehovab ge ǀnamma ǁgauhes tsî ǀnamma ǁgaus ǂhâsib ǀkha ge kuru da. Khoe-i ga ǀnamma ǁgau da o i ge ra ǂkhâǃnâ da î da ǁî-e ǀnamma ǁgau. Jehovab xa da ǀnamhe tsî ra ǃgôaǃgâhe ti da ga tsâ khami i ge ǁîba da uba hâ ǀnamma ra kai. (1Jhn. 4:19) Sida ǀnammi ǁîb ǃnâ ra kai khami i ge ǁîb di ǀnamma sida ǃnâ ra kai. Elobmîs ge ǃgāsase ra mîba da: “Elob ǃoa du hā re, ob ge ǁîba sadu ǃoa nî hā.” (Jak. 4:8) Tae-e da a dī ǁkhā î da Jehovab ǀnamdas ǂgomǃgâsiba ūhâ?

TAE-E A HUI DA ǁKHĀ JEHOVAB ǀNAMMA ŪǃOASA?

6. Jehovab ǀnamma ūǃoas ǃaroma da tae-e nî ǀgoreba?

⁶ Jehovaba ǃoa ǀgore ǀgara îb hui du î du ǁnâuǃā tae-i ǃaromab a ǀnam dusa. (Luk. 18:1; Rom. 12:12) Jehovaba ǃoa du ge ǂgui ǃnāde tsēs hoasa ǀgore ǁkhā îb hui du î du ǂan matib sadu xa ra tsâsa. ǀNî ǁaegu ai du ge sadu xa ǁgaise ra tsâ. Tsî i ge a ǃgom kai ǁkhā Jehovab ǀnam dusa ǂgomsa. Xawe ǂâis ǃnâ ūhâ Jehovab ge sadu ǂgaob xa a kai. (1Jhn. 3:​19, 20) ǁÎb ge sadu ǃgâi ǀgauga ra mû, sadu aitsama mû tama ga. (1Sam. 16:7; 2Kro. 6:30) Jehovaba mîba re tsâ du ra ǀgausa tsî ǁîba ǂgan re îb hui du î du ǁîb ǀnamma ūǃoa. (Psa. 62:8) ǀGore toa du gas khaoǃgâ i ge a ǂhâǂhâsa î du sao ra xūna dī.

7-8. Psalmde mati ra hui da î da Jehovab ǀnam dasa ǂgomǃgâ?

⁷ Jehovab ra mî xū-e ǂgomǃgâ. Jehovab ge ǁîb ǃanu gagaba Elobmîsa ge xoa khoega ge mā, ǁnā-amaga da ge ǁîgu ge Jehovab xa mî xūna ra ǂgom. Davidi ge Psalmdi ǃnâ Jehovab ra tsâba da ǀgauba îxase ge xoa: “ǃKhūb ge ǁnān ǂgaogu ân khôaǂkhūsan ǀgūse hâ.” (Psa. 34:18) ǀNîsi du ga tsûaǂgao, o du ge ǂâi ǁkhā khoe-i sado ǁnâuǃā tamas ka io hui ǂgao tamasa. Jehovab ge ge mîǁgui ǁnā ǁaegu ǃnâb sadu ǀgūse nî hâsa taena du ra ǃkharuǃnâ ǃkhaisab ra mû amaga. ǀNî hâ Psalms ǃnâb ge Davida ge xoa: “Tsîts ge ti ǁgamrona khōxapas ǃnâ ge ǂgā.” (Psa. 56:8) Jehovab ge sadu ǃgomma ra tsâsa ra mû. ǁÎb ge sado ra tsâba tsî sadu tsûba ra hōǃâ. ǃGabas ǃnâ hâ ǁgammi ǃgarob ǃnâ hâ khoe-i ǃaroma kaise a ǂhâǂhâsa khami i ge sadu ǁgamrona Jehovaba a ǂhâǂhâsaba. ǁÎb ge ā tsî du ra tsûba hōǃâ ǃnās hoasa ra ǂâihō. Psalmdi 139:3 ǃnâ da ge ra khomai: “Tsîts ge ti daogu hoaga ǃgâise a ǂan.” Jehovab ge sadu ra dī xūn hoana ra mû tsîb ge dī du ra ǃgâi xūn ai ǂâisa ra ǂnûi. (Heb. 6:10) Tae-i ǃaroma? ǁÎb sadu ra dī xūn hoana ra ǃgôaǃgâ amaga.a

⁸ ǁKhaeǂgao ra mîde Elobmîs ǃnâ sîsenus ǃnâ-ūb ge Jehovaba ra mîba da, mâtikōseb sida ǀkha ǁgae hâsa tsî a ǀnam dasa. Aiǃâ da go ǁkhāǁkhāsen khamib ge ǁGâuaba Jehovab ǀnam da tama ti hâ ǂhûmiba ra ǂkhâǃnâ. Jehovab ǀnam du ǃkhais xa du ga îganǀgē o dîsen re; ‘ham-e ta nî ǂgom “ǂhumib di îb” tamas ka io “amab di Eloba”?’—Jhn. 8:44; Psa. 31:5.

9. Mâ ǂgomǃgâsibab Jehovaba ǁîba a ǀnam khoena ra mā? (Eksodus 20:​5, 6)

⁹ Jehovab ǁîb a ǀnamman xa ra tsâ ǀgauba ǂâiǃgâ re. ǃGaoǃgâ re Jehovab ge tae-e Moseb tsî Israelǁîn tsîna a mîbasa. (Khomai re Eksodus 20:​5, 6 sa.) Jehovab ge ra mîmâi ǁîb aiǃgû tsî ǂgomǂgomsa ǀnamma ǁîba a ǀnammna nî ǁgausa. Jehovab a ǂgomǂgomsa amaga da ge ǂgomǃgâsiba a ūhâ ǁkhā tātsēb Jehoavaba ǁîba a ǀnam khoena xu ǁîb ǀnamma ǃkho-oa tidesa. (Neh. 1:5) ǁNā-amaga du ga ǀnî ǁaegu ai Jehovab ǀnîsi ǀnam du tama ti ǂâi o dîsen re, ‘Jehovaba ǀnam i ta a?’ Nēs xa ǂâi re, Jehovaba du ga ǀnam tsî ǁkhā du a i hoa-e dī ǁîba ǂkhîǂkhîsa, o du ge ǂgomǃgâsiba a ūhâ ǁkhā ǁîb kaise a ǀnam dusa. (Dan. 9:4; 1Kor. 8:3) ǁNās ge ra ǂâibasen Jehovaba du a ǀnams ǂgomǃgâsiba du ga ūhâo du ge a îganǀgē ǁoa ǁîb sado a ǀnamsa. ǂGomǃgâsiba du ge ūhâ ǁkhā ǁîb hoaǁae ǀnam du tsî tātsē ǁnāxu du tidesa.

10-11. Jehovaba tae-e ra ǂhâba î du Xoremarib xa ǂâihō? (Galateǁîn 2:20)

¹⁰ Xoremarib xa ǂâiǃgâ. Jesub Xristub di ǁguibas ge Jehovab di ǀkhaeba khoen ǃaroma. (Jhn. 3:16) Xawe Jehovaba ǁîb ôaba ge sî îb sadu ǃaroma ǁō? Îo. Apostel Paulub di aiǁgausa ǃgaoǃgâ re. Xristeǁî kaib nîs aiǃâb ge tsū ǁorena ge dī tsîb ge aiǃgû tsî noxopa ǁnā ǂkhabusasiga gere ǃkhamǃoa. (Rom. 7:​24, 25; 1Tim. 1:​12-14) Xaweb ge ǁnā ǂgomǃgâsiba ge ūhâ i Jehovab ge Xoremariba ǁîb ǃaroma a māsa. (Khomai re Galateǁîn 2:20 sa.) ǂÂis ǃnâ ūhâ re Jehovab ge Pauluba nē mîde ǁîb mîs ǃnâ ge xoa kai. Jehovab ge ra ǂhâba î da Paulub mîde xu ǁkhāǁkhāsen. (Rom. 15:4) Jehovab ge ra ǂhâba î du ǂgom Jesub di ǁguibas ǀkhaeb ase sado ībasa. Xoremariba du ga nē ǀgaub ǃnâ mû, o du ge sadu ǂgomǃgâsiba ra omkhâi Jehovab a ǀnam dusa.

¹¹ Jehovaba da ge ra gangan Jesubab ge sî ǃkhais ǃaroma îb ǁōba da. Xawe ǀnî ǃaromas Jesub ge ǃhūbaiba ǃoa hās ge khoena Elob xa hâ amaba mîbasa. (Jhn. 18:37) Jesub tsîn ge amaba ge ǁkhāǁkhā da, mâtikōseb Jehovaba ǁîb ǀgôana a ǀnamsa.

JEHOVAB ǀNAMMA ŪǃOAS ǀKHAB JESUBA RA HUI DA ǀGAUB

12. Tae-i ǃaroma da Jesub ge Jehovab xa mî xū-e ǂgom ǁkhā?

¹² ǃHūbaib aib ge hâ i ob ge Jesuba ge ǁgau Jehovab ge mâ ǀgauga ūhâ isa. (Luk. 10:22) Jesub ge Jehovab xa mî xūna da ge a ǂgom ǁkhā. Tae-i ǃaroma? Jesub ge ǁîb dadasab ǀkha gaxuse ǀhommi ǃnâ hâ i amaga. (Kol. 1:15) Jesub ge ge ǂan i mâtikōseb ǁîb di dadasaba ǁîba a ǀnam ǃkhaisa. Tsîb ge ge mû matib ge dadasaba ǂgomǂgomsa ǀhomǃgān tsî ǂgomǂgomsa khoen tsîna ǃhūbaib ai ǀnamma ǁgau ǀgausa. Jesuba mati nau khoena ra hui în mûǂan Jehovab xan ǀnamhesa?

13. Tae-e da Jehovab xa nî ǁnâuǃāsab Jesuba ra ǂhâba?

¹³ Jesub ge ra ǂhâba î da ǂan Jehovab mati sida xa ra tsâsa. ǃGâiǂhôas ǂkhanidi ǃnâb ge Jesuba Jehovaba ǃoa “ǁGûb” ase gere ǁnaeǁgau 160 xa ǃnāsa ǃnāde. ǁÎb saosaben ǀkhab gere ǃhoa ob ge Jesuba “sadu Îb” tamas ka io “sadu Îb ǀhommi ǃnâ hâba” ti hâ mîde gere sîsenu. (Mat. 5:16; 6:26) Jesub ǃhūbaib ai nî hās aiǃân ge Jehovab ǃoaba-aona Jehovaba ‘Hoaǀgaixab,’ ‘Hoan xa ǀgapib,’ ‘Kuru-aob’ tsî ǀkhara ǂgai ǀondi ai gere ǂgai. Xawe Jesub ge Jehovaba ǃnāsa ǁaeba sida Îtsē ti gere ǂgai. ǁNās ge ra ǁgau Jehovab ra ǂhâbasa î-i ǁîb ǃoaba-aona ǁîb ǀgūse tsâ, ǀgôa-i ǁgû-i ǀgūse ra tsâ khami. Hā re î da ǃnāsase ǁkhāǁkhāsen Jesub ge ǀgam ǃnāra “ǁGûb” ti hâ mîsa sîsenu ǀgausa Jehovaba ǃoab gere ǁnaeǁgauo.

14. Jesuba mati ge ǁgau sida Jehovab mûǁae a ǀō-aisasa? (Mateub 10:​29-31) (Ai-īsiba mû re.)

¹⁴ ǂGurose hā re î da mû Jesub ge tae-e Mateub 10:​29-31 ǃnâ a mîsa. (Khomai re.) ǀHommi anirodi ge kaise ǂkhariro tsî tātsē Jehovaba ǀnam tamas ka io ǃoaba tide. Xaweb ge sida ǀHomsi ǁGûba mâ aniros hoasa ǃgâise a ǂan. Jehovab ga ǀhommi ǂkhari anirosa ǃgôaǃgâ, o da ge ǂgomǃgâsiba ūhâ ǁkhā ǁîb sida ǃnāsase ra tsâbasa. Sida ǁîba ǀnam tsî ra ǃoaba xui-ao. Jesub ge ge mî, sida ǀhommsi ǁGûb a ǂansa mâtikō ǀûna da danas ai ūhâsa. Jehovab sida xa hoa xūna a ǂan amaga da ge ǂgomǃgâsiba a ūhâ ǁkhā ǁîb sida ra tsâbasa. ǃGāsa i ge a Jesub ra ǂhâbasa ǃgôasiba ūhâ tsî da sida ǀhommsi ǁGûb mûǁae a ǀō-aisasa.

15. Jesub mîdi Johaneb 6:44 ǃnâ hâde sadu ǀhomsi ǁGûb xa tae-e ra mîba du?

¹⁵ ǀGamǁî aiǁgaus Jesub ge “ǁGûb” ti hâ mîsa sîsenusa ǃgaoǃgâ re. (Khomai re Johaneb 6:44 sa.) Sadu ǀhomsi ǁGûb ge ge hui du î du ǁîba ǂan tsî ǀnam. Tae-i ǃaroma? ǁÎb ge sadu di ǃgâi ǀgauga ge mû. (ǃNǃkh. 13:48) Jesub ge ǀnîsi Johaneb 6:44 ǃnâ a mî mîdi ge Jehovab ge Jeremiab 31:3 ǃnâ a mî mîde ǃoa ra ǁnaeǁgau. ǁNāpab ge Jehovaba ǁîb khoena ǃoa ge mî: “Tita ge sado ǀamo ǀnammi ǀkha ge ǀnam.” (Jer. 31:3; ǀgopeǀnō re Hoseab 11:4 sa.) ǁNās tae-e ra ǂâibasens xa ǂâiǃgâ. Sida ǀnamxaǃnâ ǁGûb ge hoaǁae sida ǃgâi ǀgaugu aitsama da mû tama ga ra mû.

16. (a) Jesuba tae-e ge ǁkhāǁkhā da tsî tae-i ǃaroma da ǁîba nî ǂgom? (b) Tae-e nî hui du î du Jehovab sadu ǃaroma a ǃgâi ǁGûs di ǂgomǃgâsiba ūhâ? (Boksis “Jehovab ge a ǃgâi ǁGû hoa da ǃaroma” ti hâsa mû re.)

¹⁶ Sada ǁGûb ase Jehovaba ǁguiǃās ǃnâ-ūb ge Jesuba ra mîba da, “Jehovab ge ti ǁGûs ǀguisa hî tama xawe sadu ǁGûs tsîna ī.” Jesub ge ra ǂhâba î du ǂgomǃgâsiba ūhâ Jehovab ǀnam du tsî ra tsâba dusa. ǀNî ǁaeb ai du ga Jehovab ǀnam dusa ǂgom tama io, ǂâi-oa re Jesub ge tae-e a mîsa tsî ǁîba ǂgom re. ǁÎb haoǁae amaba ǃhoa tsî ǃgâise sada ǁGûba a ǂan xui-ao.—1Pet. 2:22.

SADU ǂGOMǃGÂSIBA ǀGAIǀGAI ǀGARA

17. Tae-i ǃaroma da aiǃgû tsî nî ǂgomǃgâ Jehovab ǀnam dasa?

¹⁷ Aiǃgû tsî da ge Jehovab ǀnamdas ǂgomǃgâsiba nî ǀgaiǀgai ǀgara. ǂGuro da go ǁkhāǁkhāsen khamib ge ǁGâuaba ǁkhāb a i hoa-e ra dī îb sida ǁkhae Jehovaba ǃoabasa xu. ǁÎb ge ra ǂkhabu kai da ǂgao ǁnā-amagab ge ra ǂhâba î da ǂgom Jehovab ǀnam da tamasa. Tā da ge ǁGâuaba nî mā-am îb ǂhumiba da.—Job. 27:5.

18. Tae-e du dī ǁkhā î du aiǃgû tsî ǂgom Jehovab ǀnam dusa?

¹⁸ Nē ǁkhāǁkhāǃâs ǃnâ du ge go ǁkhāǁkhāsen tae-e du dī ǁkhāsa î du ǂgomǃgâsiba ūhâ Jehovab ǀnam dusa. ǁÎba ǃoa du ge ǀgore ǁkhā îb hui du ǁnâuǃāsa tae-i ǃaromab a ǀnam dusa. ǃGamse ǂâiǃgâ re xoadi hîna ra ǁgaude Jehovab a ǀnam dusa. ǂÂis ǃnâ ūhâ re Jehovab ge hoaǁae ǁîba ǀnam khoena nî ǀnam. Tātsē tā ǀuru Jehovab ge ǁîb ôaba xoremarib ase mā dusa. ǂGomǃgâ re Jehovab a sadu ǁGûsa Jesub ge mî khami. Khoe-i ga dî o, “ǂgom i du ra Jehovab a ǀnam dusa?” O du ge ǂgomǃgâsib ǀkha “îo ǁîb ge ǀnam te tsî ta ge tsēs hoasa ǁkhā ta a i hoa-e ra dī î da ǁgau ǁîba da a ǀnamsa” ti a mî ǁkhā.