Tsū turaga du ǃkhamǃoa ǁkhā ǀgaus

1. ǀOasa kurusa ūhâ tama khoen hoana tae-e ra hōǃâ?

JEHOVAB mā-am tama xū-e dīs turaba du ūhâ tsâ hâ? Ti i nî is gao tā ǂkhabuǂâi. Elobmîs ge ra mî: “ǀNî ǃâitsâ-i ge sado hāǂam tama hâ, khoesi ǃâitsâ-i ǀgui-i.” (1Kor. 10:13) Nes ge ra ǂâibasen mâ ǁgai tura-i sadu ra hōǃâ-i hoa-en ge naun tsîna ra hōǃâ. ǀGuri du ge hâ tama Jehovab huib ǀkha du ge nē ǃkhamsa nî dan.

2. Mâ ǃâitsanan ǀnî Xristeǁîn tsî Elobmîsa ra ǁkhāǁkhāsen khoen tsîna ra hōǃâ? (Ai-īsiba mû re.)

² Elobmîs tsîn ge ra mî: “Xawe ra ǃâitsâ da gu ge sada di ǂkhaba turagu hîa ǂgaeǂhapu tsî ra nanabē daga.” (Jak. 1:14) Nē xoas ge ra hui da î da mû khoen ǃkharagagu xūn xa ǃkharagagu ǀgaugu ǃnâ ra ǃâitsâhesa. Aiǁgause ǀnî Xristeǁî-i ge ra ǃâitsâhe ǀaisa tamas ka io i ge ǀnî Xristeǁî-e tarese ǁgoe-ugus tamas ka io aorese ǁgoe-ugus xa ra ǃâitsâhe. ǁGauoǃnâ ai-īsin tsî ǁgoe-ugub vidioga ra kō ǃgâsan ge ra ǃâitsâhe ǁnā xūna ǁkhapa kōsa. ǂGuin hîna ge ǀhubuǀhubusen xūn tamas ka io xûi-i ǀkha ǃgomsina ūhâ în ge ǁkhā ǃgomsina ra hōǃâ. ǁNān ge turagu ǀnî Xristeǁîn tsî Elobmîsa ra ǁkhāǁkhāsen khoen ra hōǃâ ga. Hoa da ge ǀnî ǁae gu ai Apostel Paulub gere tsâ khami ra tsâ: “ǃGâiba ta ra dī ǂgao, xaweb ge ǂkhababa tātsēs tsîna ǁnāxū te tama hâ.”—Rom. 7:21.

3. ǃNās hoasa ǁgai turugu ǃoagu ǃkhamsa khoe-e mati a tsâ kai ǁkhā?

³ ǃNāsa ǁaeba du ga ǀgui ǁgai turab ǃoagu ǀgui ǃkham, o du ge tsâ ǁkhā ǀgaiba du ūhâ tamasa î du ǂhanu xū-e dī. Tsî du ge ǀnîsi a ǂâi ǁkhā Jehovab mā-am du tidesa î du ǀamose ûi nē ǁgai turaba du ūhâ amaga. ǂGomǃgâsiba ūhâ re nē ǂâiǀgaub ama tamasa. Nēsa ǁguiǃās ǃaromas ge nē ǁkhāǁkhāǃâsa ǀgam dî ra nî ǃeream: (1) Nē tsâsiga mâpa xu ra hā? (2) Mati du ǁgai turagu ǃoagu ǃkham ǁkhā?

MATI DA NÎ TSÂSAB ǁGÂUABA RA ǂHÂBA?

4. (a) Tae-i ǃaromab ǁGâuaba ra ǂhâba î da ǀgai-e da ūhâ tama khami tsâ? (b) Tae-i ǃaroma da ǂgomǃgâsiba ūhâ ǂhanu tama turaga da ǃkhamǃoa ǁkhāsa?

⁴ ǁGâuab ge ra ǂhâba î da ǀgai-e ūhâ tama khami tsâ ǃâitsâhe da gao. Jesub ge gere ǂanǃgâ ǃâitsâhe da nîsa, ǁîb ǁkhāǁkhāsabegab ge sao ra ǀgoresa ǁkhāǁkhāo: “Î tā ǃâitsâb ǃnâ ǂgaeǂgui da, î ǂkhababa xu ore da.” (Mat. 6:13) ǁGâuab ge ra mî khoen Jehovaba ǁnâuǀnam tidesa tsū xū-e dīs ǃâitsâban ga hōǃâo. (Job. 2:​4, 5) Tae-i ǃaromab ǁGâuaba ti ra ǂâi? ǁGâuab ge aitsama ǁîb turagu xa ge ǂgaeǂhapuhe tsîb ge ǂgomǂgomsase Jehovab ǃoagu ge hâ ǀgara tama hâ i. Mûǃāxaseb ge ǁGâuaba ra ǂgom ǁîb khami ǀgui da īsa tsî ǃâitsâhe da gao Jehovaba nî ǁnāxu ǃkhaisa. ǁGâuab ge gere ǂâi ǀoasa kurusa ūhâ ǀGôab Jehovab dibab nî ǃâitsasa îb ǂhanu tama xū-e dī. (Mat. 4:​8, 9) Amabes ǃnâ i a ǃgom ǂhanu tama turaga ǃkhamǃoasa? Tātsē! Sao ra mîdi Apostel Paulub ge xoade da ge ra ǃkhōǃgâ: “Tita ge hoa xūna a ǁkhā, ǁnāb tita ra ǀgaiba māb ǃnâ-u.”—Fil. 4:13.

5. Mati da a ǂan Jehovab ǂgomǃgâsiba ūhâsa ǂhanu tama turaga da a ǃkhamǃoa ǁkhā ǃkhaisa?

⁵ Jehovab ge ǂgomǃgâsiba ūhâ ǁgai turaga da a ǃkhamǃoa ǁkhā ǃkhaisa. Mati da ǁnāsa ǂan? Jehovab ge mîmâi amaga kai ǂnubis khoen ǁîb ǃoagu ǂgomǂgomsase hâ tsî kai ǁgâiǀāba nî ûi ǃkharusa. ǁNās tae-e ra ǂâibasens xa ǂâiǃgâ re. Jehovab ǂhumi tamab ge ra mî kai ǂnubis khoen ǀasa ǃhūbaib ǃnâ, ǃanuse nî ǂgāsa “saran âna ǁKhaob di ǀaob ǃnâ ǁā tsî ǃuriǃuri hâna.” (J.ǂHa. 7:​9, 13, 14) Amseb ge Jehovab a ǂan ǁgai turaga da a ǃkham ǃoa ǁkhā ǃkhaisa.

6-7. Tae-eb ǁGâuaba ra ǂgom kai da ǂgao?

⁶ ǁGâuab ge ra ǂhâba î da ǂgom ǁgai turaga da ūhâ amagab Jehovaba ǀamo ûiba mā da tidesa. ǁGâuaba tae-i ǃaromab nēti ra ǂâi kai da ǂgao? ǁGâuab ge tātsē Jehovab xa ūǃoahe tide tsîb ge nî hîkākāhe tsî ǀamosib kōse ûi tide. (Gen. 3:15; J.ǂHa. 20:10) ǁGâuab ge ǁaixa hâ sida ǀamosib kōse ûis ǃâubasensa ūhâ ǃkhais ǃaroma. ǁNā-amagab ge ǃgarise ra dītsâ î da ǁîb khami ī tsî ǃâubasen-e ūhâ tama khami tsâ, xawe da ge tātsē ǁîb khami ī tama. Elobmîs ge ǂgomǃgâsiba ra mā da Jehovab ra hui da ǂgaosa î da ǀamosib kōse ûi. ǁÎb ge “khoe-i nî kāǁō ǃkhaisa ǂgao tama hâ, xawe hoan nî ǃhobasensa.”—2Pet. 3:9.

⁷ ǁGai turaga ǃkhamǃoas ǃaroma da ǀgaib tamas ka io ǃâubasen-e ūhâ tama ti da ga ǂgom, o da ge ǁGâuab ra ǂhâba khami ra ǂâi. Nēsa da ga ǃgāsase ǁnâuǃā, o i ge nî hui da î da mâǀgai.—1Pet. 5:​8, 9.

ǀOASA-OǃNÂSIB RA TSÂ KAI DA ǀGAUB

8. Tsū xūna dīs ǂam-ai i ǁoreba taena ǃkhōǂgā hâ? (Psalmdi 51:5) (Mû re “ǁGuiǃāhe ra mîs” ti hâ ǃâba.)

⁸ ǁGâuab ǂam-ai i ge ǀnî hâ xū-e hâ, ǀgaio tsî da ǃâubasen-e ūhâ tama tsū turagu ǃoagu ǃkhams khami a tsâ kai da ǁkhā-e. Tae-e ti a tsâ kai da ǁkhā? Sida ǂguro ǁgûna xu da ge ǀumi ǁoreb.a—Job 14:4; khomai re Psalmdi 51:5 sa.

9-10. (a) ǁOreba Adammi tsî Eva hâra mati ge tsâǀkhā? (Ai-īsiba mû re.) (b) ǁOreba mati sada ra tsâǀkhā?

⁹ Adammi tsî Eva hâra mati ǁoreb xa ge tsâǀkhāhe? Jehovaba ra ge ǁnâuǀnam tama hâ i amaga ra ge gau tsî ǁîra sorode ge ǃgū-ai. Insight on the Scriptures, ge sao rase ra mî: “ǁOreb ge ǁîra ǀhapitsâsen tsî ge ǂâiǂhansen kai.” Adammi tsî Eva hâra ge tātsē Jehovab ǀkha ǀgū ǀhōsagusisa ūhâ ǁkhā tide. Tae-i ǀgui-e ra ge dī xawe ra ge gere ǂâiǂhansen ǀoasa kurusa ra ge ūhâ tama hâ i amaga.

¹⁰ Adammi tsî Eva hâra khami da ge ǁkhā mâsib ǃnâ hâ tama. ǁÎra ge xoremariba xu ǀama tide. Xawe da ge sida xoremarib xa ra hui-e în sida ǁorena ǀûbahe tsî ǀgū ǀhōsagusisa Jehovab ǀkha ūhâ. (1Kor. 6:11) Xawe da ge ǁoreb tsî ǀoasa-oǃnâsib tsîna ge ǀumi. ǁNā-amaga da ge ǀhapitsâsen, ǂâiǂhansen tsî ra tao. Elobmîs ge ra mî ǁoreb khoen ai ǀgaisa sîsenǂuiba ūhâsa. “ǁNān hîa ǁoren ân ǃnâ Adammi ge ǃûǂam khami ge ǃûǂam tama hâ in tsîna” ǃkhōǂgā hâse. (Rom. 5:14) Xawe da ge tā nî tsâ ǁoreb ǀkha da ǃnae hâ amaga da ǂhanu xū-e dī hō tidesa tsî da ǃâubasen-e hānîǁaeb ǃaroma ūhâ tamasa. ǁNāti ī ǁgai tsâsiga da ge ǃkhamǃoa ǁkhā. Mâǀgaub ǃnâ?

11. ǁGai turaga ǃkhamǃoas ǃoagu da ǀgaio khami da ga tsâ, o da Romeǁîn 6:12 ǃoagu tae-e a dī ǁkhā?

¹¹ ǀOasa kurusa da ūhâ tama amaga da ge ǀnî ǁaega ǂâi ǁkhā ǁgai turaga da a ǃkhamǃoa ǁoasa. Nē ǁgai turaga ga da tātsē ǃkhamǃoa hō ǁoa khami ra mî dom-e da ge a ǁnâu ǁkhā. Xawe da ge tā ǁnā domma nî ǃgâ. Tae-i ǃaroma? Elobmîs ge ra ǁkhāǁkhā da ǁoreb aiǃgû tsî “gaoǂam” da tidesa î da tsū xū-e dī. (Khomai re Romeǁîn 6:12 sa.) Nēs ge ra ǂâibasen ǁhûi ǁkhā da asa î da tā ǁgai turaga sîsenǂui. (Gal. 5:16) Jehovab ge sida ǃnâ ǂgomǃgâsiba ūhâ ǃâitsâga da a mâǃoa ǁkhāsa. Sida ǃnâb ga ǂgomǃgâsiba ūhâ tama hâ, ob ge ga ǂgan ta tama hâ ǁnāsa dīsa. (Deu. 30:​11-14; Rom. 6:6; 1Tes. 4:3) ǃGāsase da ge ǀgaio tama ǁgai turaga ǃkhamǃoasa.

12. ǃÂubasen-e da ūhâ tama khami da ga tsâo da mati nî tanisen?

¹² ǁNās ǁkhās khami da ga ǃâubasen-e da ūhâ tama khami tsâ tsîb Jehovaba ǁgai turaga da ūhâ amaga ūǃoa da tidesa, o da ge ǁnāsa sida ǀoasa-oǃnâsib ra “ǃhoa” khami nî mû tsî tā nî ǃgâ. Tae-i ǃaroma? Elobmîs ge ra mîba da Jehovab ra ǁnâuǃāsa ǁoreb ǀkha da ǃnae hâsa. (Psa. 103:​13, 14) ǁÎb ge “hoaragana” sida xa a ǂan, mati da ǀûmi da ge ǁoreb xa ra tsâǀkhāhe ǀgaus tsîna. (1Jhn. 3:​19, 20) Sida turagu ǃoagu ǃkham tsî da ga ûiǂui tama i, ob ge Jehovaba ǃanuse nî ūǃoa da. Tae-i ǃaroma da ti a mî ǁkhā?

13-14. ǁGai turaga ūhâsa ra ǂâibasen Jehovab xa da ūǃoahe tidesa? ǁGuiǃā re.

¹³ Elobmîs ge ra ǁgau kai ǃkharagagusib ǁgai turaga ūhâ tsî ǁgai turaga sîsenǂuis ǁaegu hâsa. Hoaǁae da ge ǁgai turaga ūhâsa ǁkhae ǁoa xawe da ge ǁgai turaga sîsenǂuisa xu ǁkhaesen ǁkhā. Aiǁgause i ge ǀnî Xristeǁîn Korintes ǃnâ ge hâ īna aorega aoregu ǀkha tsî tarade taredi ǀkha gere ǁgoe. Paulub ge ge xoa: “ǀNîn âdu ge ǁnāti ge ī i.” Nēsa gere ǂâibasen ǁîn ge ǁnā ǁgai turaga ǁkhapa hōǃâ tama hâ isa? Hî-i, nēti ī turaga ǀûs a ǃgom xui-ao. Xawe Xristeǁîn aitsama ǃkhō-aosen tsî ge nē turaga sîsenǂui tama hâ în ge Jehovab xa gere ūǃoahe. ǁÎn “ǃanuǃanuhe” hâ khamib ge ǁîna gere mû. (1Kor. 6:​9-11) Sida tsîn ge nē xūna hōǃâ ǁkhā.

¹⁴ Mâ ǁgai tura-i ǀgui-e du ga ūhâ xawe du ge a dan ǁkhā, ǁîn xa du ga hoase ǂâi ǀû ǁoa xawe du ge aitsama a ǃkhō-oasen ǁkhā. Tsî “sada soros tsî ǁnâuǃāb” ra ǂgao ǀgauba sao tide. (Efe. 2:3) Mâ xūna du a dī ǁkhā î du ǁgai turaga ǃkhamǃoa?

ǃÂITSÂGA DU DAN ǁKHĀ ǀGAUS

15. ǁGai turagu ǃoagu da ga dan ǂgao, o da tae-i ǃaroma nî ǂhauǃnâ-ūsen?

¹⁵ ǁGai turaga ǃkhamǃoas ǃaroma du ge ǂhauǃnâ-ūsen tsî sadu ǂkhabusasiga nî ǂanǃgâ. ǂAnbasen re î da aitsama ‘ǂgaeǂhapusen’ ǂhumi ǂâiǀgaugu ǀkha. (Jak. 1:22) Aiǁgause khoe-i hîna xûi-e ās ǀkha ǃgomsiba ūhâ i ge a ǂâi ǁkhā, ǁî-i ǃgomsib ǁgai tamasa nau khoen ǁîb xa ǃnāsase ra ā amaga. Tamas ka io khoe-i hîna ǁgauoǃnâ ai-īsin tsî ǁgoe-ugub vidioga kōs ǃgomsiba ūhâ i ge nau khoena a ǂgā-am ǁkhā. Tsî a mî ǁkhā ‘nēti ī turuba ta ge ga ūhâ tama hâ, ǀnama ta ga ǁgauhe hâo.’ Nēti ī ǂâiǀgauba du ga ūhâo i ge nî supu ǃâitsâb ǃnâ māǁnâsensa. Tā tsū xū-e du ga dīo ǀhapioǃnâ kaisen, ǃereamsa ū dī du ra tsū xūn ǃaroma.—Gal. 6:7.

16. Mati du ǂhanu xū-e dī mîǁguiba ǀgaiǀgai ǁkhā?

¹⁶ ǂHauǃnâ-ūsens ǃgâ-ai du ge nî mîǁgui sadu turagu ǃnâ du māǁnâsen tidesa. (1Kor. 9:​26, 27; 1Tes. 4:4; 1Pet. 1:​15, 16) ǂÂi re tae-i ǃnāsase ra ǃâitsâ dusa tsî mâǁae. ǀNî ǃnôa ǃâitsâ-i tamas ka io ǀnî ǁaeb tsēs dib ai du ge ǃnāsase a ǃâitsâhe ǁkhā. Aiǁgause du ǀnîsi tsau du hâ hîna nî ǃgombahe ǃâitsâ-e mâǃoasa tamas ka io du ǃuia a ǃâitsâhe ǁkhā? Aiǂhumisen tsî mîǁgui re tae-e du nî dīsa nē mâsib ǃnâ du ga ǂgâo. ǃGâi ǁaeb nēsa du a dī ǁkhās ge ǃâitsâb nî hās aiǃâ.—ǂKhm. 22:3.

17. Tae-e da Josefi aiǁgausa xu a ǁkhāǁkhāsen ǁkhā? (Genesis 39:​7-9) (Ai-īsiga mû re.)

¹⁷ ǃGaoǃgâ re Josefi ge tanisen ǀgauba, Potifari taras xab ge ǂgaeǂhapuheo. ǁÎb ge ǁkhā ǁaeb ai mâǃoasi tsî ǃgāsase ge ǂkhā. (Khomai re Genesis 39:​7-9 sa.) Tae-e da nēpaxu ǁkhāǁkhāsen ǁkhā? Josefi ge ǀnai ge mîǁgui hâ i ǂhanu xū-e dīsa Potafari taras nî ǃâitsâbis aiǃâ. ǁKhā ǀgaub ǃnâ du ge nî mîǁgui ǂhanu xū-e dīsa ǃâitsâhe du nîs aiǃâ. ǁNā ǀgaub ǃnâ i ge nî ǃgâi ǂhanu xū-e dīsa ǀnai du mîǁgui hâ xui-ao.

“AITSAMA DU ǃÂITSÂSEN”

18. Tae-e du dī ǁkhā î du ǁgai turagu ǃoagu hâ ǃkhamsa dan? (2 Korinteǁîn 13:5)

¹⁸ ǁGai turagu ǃoagu hâ ǃkhamsa du ga dan ǂgao, o du ge aitsama nî “ǃâitsâsen.” ǁAeba xu ǁaeb ǀkha ôaǃnâsen i kō mati du ra dīsa. (Khomai re 2 Korinteǁîn 13:5 sa.) Sadu di ǂâiǀgaub tsî dī du ra xūn tsîna kō re tsî ǂhâbasa ǀkharaǀkharana dī. Aiǁgause du ga ǃâitsâ-i ǃnâ māǁnâsen tama i, o du ge a dîsen ǁkhā: ‘Gaxuse ta go ū hî-î ti mîsa?’ Mûǂan du gao ǁkhā ǁaeb ai du ge ǂkhā tama hâ isa, tā ǁaixa ūsen. ǂÂi re tae-e du sao ra ǃnās ai dī ǁkhāsa î du ǁkhaubasen. Sao ra dîna aitsama dîsen re: ‘ǃGâi tama xū-i xa da ga ǂâio da ǃhaese ǁî-i xa ǂâiǀû ǁkhā? Kō, khomai tsî ta ra ǃgâ xūna ra ǃgom kai ǃâitsâga mâǃoasa? ǃHaese ta ǁgauoǃnâ ai-īsiga ta ga mûo ra kē bē? Mûǂan i ta ra Jehovaba ǁnâuǀnams ǃaroma ta ra ǃkhō-oaseno i ti ǃgâib ǃaroma ǀgui hâsa?’—Psa. 101:3.

19. Mati i ǂkharise ra mûsen ǁgai mîǁguiga dīsa a ǃgom kai ǁkhā ǁgai turaga ǃkhamǃoasa?

¹⁹ Ôaǃnâsen du ra hîna tā mā-am re, î du dī du ra tsū xūna xu ǀhapioǃnâ kaisen. Elobmîs ge ra mî: “ǂGaob ge hoa xūn ǃgâ-ai gāxaǃnâ tsî a ǁōǁōsa.” (Jer. 17:9) Jesub ge ge mî ǂgaob ǃnâ di ‘ǂkhaba ǂâide’ ra tsoatsoasa. (Mat. 15:19) Aiǁgause khoe-i hîna ǁgauoǃnâ ǁgoe-ugub vidiogu tsî ai-īsigu tsîna kō ǀû hâ i ge ǁaerob khaoǃgâ a mî ǁkhā, ǁkhōǁkhōsa tama i hâsa ǁgoe-ugub xa hâ vidioga kōsa, nē ai-īsigu ǀōǀkhā khoena ǁgau tama xui-ao. Tamas ka io i ge a ǂâi ǁkhā, ‘tsū tama i ge hâ tsū turagu xa ǂâisa, ǁnāsa ta dīǀoaǀoa tamas kose.’ Khoe-i ga nēti ī xūn xa ǂâi, o i ge ‘sorosi turaga i mati nî ǂkhîǂkhî’ ǃkhais xa ra ǂâi. (Rom. 13:14) Mati du ǁnāsa dīsa xu nî ǂgōsen? ǂAnbasen i ǂkhari ǃgâi tama mîǁguiga dīsa xu ǂgōsen, ǁnās ge a ǃaroma ǁkhā kai ǃgâi tama mîǁguigats a dī ǁkhāsa.b Tsū xū-e dīs ǃnâ māǁnâsens tamas ka io ‘ǂkhaba ǂâide’ a ǃaroma ǁkhā ǀhapioǃnâ kaisensa xu ǂgōsen.

20. Tae-e ǁgai turagu ǀkha nî ī hānîǁaeb ǃnâ tsî mâ ǃaubasensa da ūhâ?

²⁰ ǁKhāǁkhāsen da go khamib ge Jehovaba ǀgaiba ra mā da î da ǃâitsâga ǃkhamǃoa. ǁÎb ǀhomxaǂgaosib xa ǃaromahe hâse da ge ǁoren di ǀûbas tsî ǀamose paradais ǃhūbaib ǃnâ ûis di aiǂhanub tsîna ūhâ. Kaise da ge nî ǃgâiaǂgao Jehovaba ǃanu ǂâis tsî ǂgaob ǀkha ǃoabasa. ǁNā ǁaeb kōse da ge ǃâubasensa ūhâ ǀgaio tsî da ǃâubasen-i ose hâ tamasa ǁgai turaga da ra ǃkham ǁaeb ǃnâ. Jehovab sida di ǁgūtsâde ra ǀkhae amaga da ge a dan ǁkhā.