ǃÂitsâba xu ǁkhaubasen

1-2. (a) Matib ge Jesuba ǁîb ǁkhāǁkhāsabe ga ǃkhâikhom? (b) Tae-i ǃaroma gu ge ǁkhāǁkhāsabe ga ǁîba ǃkhoebē xu? (Ai-īsiga mû re.)

“GAGAS ge amase a māsenxa, xawes ge sorosa a ǂkhabusa.”a (Mat. 26:41) ǁNā mîdi ǀkhab ge Jesuba ge ǁgau, ǀoasa kurusa da ūhâ tama ǃkhaisab ra ǁnâuǃā tsî da ra dīsā ǃkhaisa. ǁÎb mîdi ǃnâ-ūb ge ra ǃkhâikhom da, î da tā ǂâi ǀgaisa da a tsî da ǁore tide ti. ǁAeba ǃkharu hâse Jesub ǁnā mîde nî mîs aiǃâ gu ge ǁkhāǁkhāsabe ga ge mîba bi, tātsēs tsîna gu xūbi tide ti. (Mat. 26:35) ǁÎgu di ǂâibasens ge ge ǃgâi i xawe gu ge ge ǁnâuǃā tama hâ i, ǃhaese gu a ǂkhabu ǁkhā ǃkhaisa ǃgom mâsigu ǃnâ gu ga ǂgâ o. ǁNā-amagab ge Jesuba ǃkhâikhom tsî ge mî: “ǂKhaikari hâ, î ǀgore, î go tā ǃâitsâb ǃnâ ǁnā.”—Mat. 26:41.

² Tsûtsûsa as ge Jesub ǁkhāǁkhāsabegu ge ǁîb ge mîba gu khami ge dī tama hâ i. Jesub ge ǃkhōsis ǃnâ ūhe, o gu ge ǁîb ǁkhāǁkhāsabe ga ǁîb ǀkha hâ ǀgara tamas ka io gu ge ǃhuri tsî ǃkhoebē? ǂAnbasen tsî gu ge ǂkhaiǂkhari hâ tama hâ i amaga gu ge, Jesub di ǁkhāǁkhāsabe ga ǁîba gu ge mîmâiba xū-e dī tama i tsî ge ǃkhoexu bi.—Mat. 26:56.

3. (a) Jehovab ǃoagu da ga ǂgomǂgomsase hâ ǂgao, o da tae-i ǃaroma nî ǂanbasen kaise ǂgomǃgâsensa? (b) Nē ǁkhāǁkhāǃâs ǃnâ da tae-e nî ǃhoaǃgao?

³ Hoaǁae da ǀgaisase hâhâ tsî ǂhanu xū-e nî dī ti da ge tā nî ǂâi. Ama as ge ǁkhā da an hoana da ge nî dī, î da tā Jehovaba ǂkhîoǃnâ kai. Xawe ǁoreb ǃnâ ǃnaehâ khoeda ase i ge a supu ǃâitsâ-e da ga o tsū xū-e dīsa. (Rom. 5:12; 7:​21-23) ǃÂubasen tama hâse da ge ǃâitsâhe tsî ǃkhaese tsū xū-e a dī ǁkhā. ǂGomǂgomsase da ga Jehovab tsî ǁîb ǀGôab ǃoagu hâ ǀgara, o i ge a ǂhâǂhâsa Jesub di ǁnamasa ǁnâuǀnamsa. Mî rasa, ǂkhaikari hâ î tā ǃâitsâb ǃnâ ǁnā. Nē ǁkhāǁkhāǃâs ge nî hui da î da ǁnāsa dī. ǂGurose da ge nî ǃhoaǃgao, mâǃnôa mâsigu ǃnâ da ǂkhâikari nî hâsa. ǁNāpaxu da ge nî ǃhoaǃgao, mati da nî ǁkhaubasensa ǃâitsâhe da ga o. ǀAms ai da ge nî kōǃgâ, mati da ǂkhaikari nî hâhâsa.

SA ǂKHABUSASIGA ǂANǃGÂ

4-5. Tae-i ǃaroma da ǂkhari ǁorena xus tsîna nî ǁkhaubasen?

⁴ ǀNî ǁoren ge naun xa a ǂkhariro, xawe Jehovab ǀkha da ūhâ ǀhōsagusisa a ǂkhapuǂkhapu ǁkhā. Nē ǁoren ge a ǃaroma ǁkhā its kai ǁorena dī.

⁵ Hoa da ge nî ǃâitsâhe tsî tsū xū-e a dī ǁkhā. Hoa da ge ǃkharagagu ǂkhabusasiga ūhâ. ǃGōsasen ge ǀnî xūna a ǃâitsâ da ǁkhā î da tsū xū-e dī. Aiǁgause, i ge ǀgui khoe-e ǀais di ǃâitsâba ra hōǃâ, ǀnî khoe-i ge ǃanuoǃnâ xun ǀkha ra ǃâitsâhe, ǁnān ge skomolsens tsî ǀōǀkhā khoen xūna kōs tsîna. Tsî ǀnîn ge sao ra xūn ǀkha ǃgomsiba ūhâ, ǃhaese ǁaixas, ǀgapiǂâixasib tsî khoena ǃaos tsîna. Mû da ge ra tae-i ǃaromab ge Jakobuba a mîsa: “Xawe mâ-i hoa-i ge ra ǃâitsâhe, ǁî-i di turab ǂûb xa i ra ǂgaeǁnâhe tsî nanaheo.”—Jak. 1:14.

6. Tae-i ǀkha da nî ǂhauǃnâ-ūsen?

⁶ ǂAn i du a mâ xūn xa du supuse ra ǃâitsâhesa? ǁKhōǁkhōsa i ge a sida di ǂkhabusasiga da ga kōǃkharu tsî ǂâi o, ǀgaisa da a tsî da tātsē ǁore-e dī tide ti. (1Jhn. 1:8) ǂÂis ǃnâ ūhâ re Paulub ge ge mî, ‘Elob di gagab xa ra ǂgaeǂguihen’ tsîn ge ǁoreb ǃnâ nî ǁnā ǂkhâikarin ga hâ tama io. (Gal. 6:1) ǂHauǃnâ-ūsen da ge nî tsî da ge nî ǂanǃgâ mâpa da a ǂkhabusasa.—2Kor. 13:5.

7. Tae-e xu da ǃgōsase nî ǁkhaubasen? Aiǁgau-e mā re.

⁷ ǃNāsase ra ǃâitsâ da xūna da ga ǂanǂûis khaoǃgâ da tae-e nî dī? ǃGarise sîsen tsî da ge ǁnā ǃâitsâna nî ǃkhamǃoa. Aiǁgause, Elobmîs ǁaeb ǃnâ i ge ǃās ǂnamipe hâ mîrigu di heksa ge ǂkhabusa ǃâ-i. ǁNā-amaga gu ge ǂgui ǃûi-aoga heks tawa gere mâ i gu ǃāsa ǁkhauba. ǁNās ǁkhās khami sida ǂkhabusasiga da ge nî ǃgaoǃgâ, î da ǃâitsâna ǃkhamǃoa ǁkhā.—1Kor. 9:27.

MATI DA ǃÂITSÂB TSÎ ǁOREB TSÎNA NÎ MÂǃOA?

8-9. Matib ga ǂkhamkhoeb hîna ǂKhoamîdi 7ǁî danaǃâs ǃnâ ra ǃhoaǃgaoheba ǀgaisa ǁoreba dīsa mâǃoa hâ? (ǂKhoamîdi 7:​8, 9, 13, 14, 21)

⁸ Mati da ǃâitsâb tsî ǁoreb tsîna nî mâǃoa? ǃGaoǃgâ re, tae-e da a ǁkhāǁkhāsen ǁkhāsa ǂKhoamîdi 7ǁî danaǃās ǃnâ ra ǃhoaǃgaohe ǂkhamkhoeba xu. ǁÎb ge ǀai-aos ǀkha ge ǀai 22ǁî ǁaraǃās ge ra mîba da nē ǂkhamkhoeb ge ‘ǃnoesase’ ǁîsa a saosa. ǃKharugo ǁaraǃādi ra ǁgau khamib ge ǁîba, ǃgâi tama mîǁguiga ge dī hîna ge supu kai ga îb ǁore.

⁹ Tae-eb ge nē ǂkhamkhoeba dī ǀgaisa ǁorebab nî dīs aiǃâ? ǂGuroseb, ge ǃui karab ai “tarekhoes ra hâ ǁhôas ǀgūse ǃkharu tsî ǁîs hâǃkhaisǀî garu daob ai” ge ǃgû. Tsîb ge ǁîs omsa ǃoa ge ǃgû. (Khomai re ǂKhoamîdi 7:​8, 9 sa.) Nē tarekhoesab ge mû xaweb ge ge tawasen tama hâ i. ǁÎs xa ǁoahesab ge ge mā-am tsî dīs ge ǁguibadi xas ra ǃhoa hîna gere ǃgâ. ǁÎs ge gere ǂhâba îb ǁîs a ǃgâi khoe ti ǂâi. (Khomai re ǂKhoamîdi 7:​13, 14, 21 sa.) Nē gâre xūnab ga dī tama hâ, ob ge nē ǃâitsâna mâǃoa tsî ga ǁore tama hâ.

10. Mati-i nētsē khoe-e nē ǂkhamkhoeb khami ǁkhā dīsāna a dī ǁkhā?

¹⁰ Salomonni khomai ǃâs ǃnâ i ge ra ǁgauhe tae-i, Jehovab di ǃoaba ao-i hoa-i ǀkha a īǁkhāsa. ǁÎ-i ge ǀgaisa ǁoreba dītoa tsî a mî ǁkhā ǃâubasen tama i hâ hîna î ge nē xū-e ǃkhaese īsa. Xawe î ge ǂâi-oa i ga o ǀnîsi nî mû gâre mîǁguiga i ge dīsa ǁore-i nîs aiǃâ. ǀNîsi i ge ǃgâi tama ǀhōsana ǁhûi, ǃgâi tama xūna kō, ǃgâ tsî Xristeǁîn ǃaroma ǃgâi tama ǃkhaina ǃoa gere ǃgû. ǀNîsi i ge ǀgore ǀû, Elobmîsa khomai ǀû, ǀhaode ǃoa īǀû tamas ka io aoǁnâ sîsenni tsîna ge dī ǀû. ǂKhamkhoeb ǂKhoamîdi ǃnâ ra mîheb khami i ge nē ǁoreba ‘ǀūǃgâsib’ ǃnâ ge ī tama hâ i. Xawe ǂgui ǁgai mîǁguigu hînab ge dī gu ge ge ǁore kaibi.

11. Tae-e da nî dī, î da tā ǁore?

¹¹ Tae-e da nēsa xu ra ǁkhāǁkhāsen? ǁOreba xu ǀgui da ge ǂgōsen tide xawe da ge ǁoreba a ǃaroma ǁkhā xūna xus tsîna nî ǂgōsen. Nēsab ge Salomona tae-i ge ǂkhamkhoeb tsî ǀai-aos ǀkha a ī toas khaoǃgâ ge ǁguiǃā. ǀAi-aos xab ge ǃhoa, ob ge ge ǀapemā: “Tā ǁîs daogu ǃnâ kāǁhapu.” (ǂKhm. 7:25) ǁÎb ge ǀaro tsî ge mî: “ǃNūse ǁîsa xū hâ, î tā ǁîs oms di daos tawa ǀgū.” (ǂKhm. 5:​3, 8) ǁOreba xu da ga ǁkhaubasen ǂgao, o da ge xūn tsî mâsin tsū xū-e dīsa a ǃaroma ǁkhāna xu nî ǂgōsen.b Nēs ge ra ǂâibasen xū-i ga Xristeǁîn ǃoagu tsū tama i xawe da nēsa xu nî ǂgōsa, î da tā ǃâitsâb ǃnâ ǁnā tsî tsū xū-e dī.—Mat. 5:​29, 30.

12. Mâ ǁaposa mîǁguibab ge Joba dī? Tsî matib ge hui-e ǂkhaikari hâ tsî ǃâitsâba mâǃoasa? (Job 31:1)

¹² ǁOreba a ǃaroma ǁkhā mâsiga xu ǂgōsens ǃnâ-ū da ge ǂhanu mîǁguiba nî dī. Jobi ge ǁnāsa ge dī. ǁÎb ge “ǁîb mûra ǀkha ge mîmâi,” tarekhoesab ǁgoe-ūs di turab ǀkha kō tidesa. (Khomai re Job 31:1 sa.) Nē mîmâisa dīs ge nî huibi îb tātsē tā ǀai. Sada tsîn ge a mîǁgui ǁkhā, î da ǃâitsâb ǃnâ nî ǂgā da xūna xu ǂgōsen.

13. Tae-i ǃaroma da sida ǂâi ǀgauba nî ǁkhauba? (Ai-īsiga mû re.)

¹³ Sada ǂâi ǀgaub tsîna da ge nî ǁkhauba. (Eks. 20:17) ǀNî khoen ge ra ǂâi, ǁgai xūna dīsa mûnan-ais tsū tamasa, ǁnā ǁoreban dī tamas kōse. Nē ǂâiǀgaub ge ǂhanu tama hâ. Khoe-i ga ǁgai turab xa hoaǁae ǂâi, o i ge ǁnā turaba ra ǀgaiǀgai. ǁNāsa i ga dī, o i ge nî ǃgom ǁnā ǁgai xū-e dī tama isa. Ama as ge tsū xū-e dīsa da ǁae-i ǃnâ nî ǂâisa. ǁNās ga ī, o i ge kaise a ǂhâǂhâsa ǁnā ǁgai ǂâide ǃkhaese ūbe tsî ǃgâi xūn xa ǂâi tsoatsoasa. Nēsa dīs ǃnâ-ūs tsîna da ge tsū ǁoreba dīsa xu ra ǂgōsen, ǁgai turaba da mā-am tama hâ xui-ao.—Fil. 4:8; Kol. 3:2; Jak. 1:​13-15.

14. Tae-i tsîna noxoba a huida ǁkhā, ǃâitsâga xu ǁkhaubasens ǀkha?

¹⁴ Tae-i tsîna da a dī ǁkhā î da ǃâitsâga xu ǂgōsen? ǂÂis ǃnâ da ge nî ūhâ Jehovab di ǁgaragu sida ǃgâib ǃgao ǀgui hâsa. ǀNî ǁaegu ai i ge a ǃgomba da ǁkhā sida ǂâi ǀgaugu tsî turagu tsîna Jehovab ǂâis ǀkha ǀguiǃnâxa kaisa. Xawe ǁkhā da-e da ga dītsâ, o da ge nî ǃgâiaǂgao.

15. ǂHanu turaba omkhâisa mati ǃâitsâb ǃoagu ǃkhams ǀkha nî hui da?

¹⁵ ǂHanu turaga da ge nî omkhâi. ǁKhāǁkhāsen da ga “tsū xūna ǁkhan” tsî “ǃgâina ǀnamsa,” o da ge sida mîmâisa nî ǀgaiǀgai ǂhanu xū-e dī tsî ǁoreba a ǃaroma ǁkhā mâsiga xu ǂgōsensa. (Amo. 5:15) ǂHanu turaba ūhâs ge nî supuba da ǃâitsâhe da ga ǁaeb ai tsî da ge nēsa xūs tsîna nî ǁkhaubasen.

16. Gagasi ǁaxasigu ǃnâ ǁhaosa mati a huida ǁkhā? (Ai-īsiba mû re.)

¹⁶ Mati da ǂhanu turaga a omkhâi ǁkhā? Gagasi ǁaxasigu ǃnâ da ge nî ǁhao. Xristeǁî ǀhaode da ga hâ ǃnâ tsî ga aoǁnâ, o da ge ǀgaisa turaba ra omkhâi Jehovaba ǂkhîǂkhîsa. Tsî ǁnās ǀkha ǃâitsâhe tide ǁgai xūna dīsa. (Mat. 28:​19, 20; Heb. 10:24, 25) Elobmîsa khomai, ôaǃnâ tsî ǂâiǃgâs ge nî hui da, ǃgâina ǀnam tsî ǁgaina ǁkhansa. (Jos. 1:8; Psa. 1:​2, 3; 119:​97, 101) ǂÂi oa re Jesub ge ǁîb ǁkhāǁkhāsabe ga ge mîba: “ǀGore, î go tā ǃâitsâb ǃnâ ǁnā.” (Mat. 26:41) Jehovab ǃoa da ga ǀgore, o da ge ǁîba ǃēsa ra mā, îb huida î da mîǁgui ǁîba ǂkhîǂkhîsa.—Jak. 4:8.

ǂKHAIKARISE HÂ ǀGARA

17. Mâ ǂkhabusasib ǀkhab ge Petruba ǃgomsiba ūhâ i?

¹⁷ Īǁkhāsib ga hâ, o da ge sada ǂkhabusasiga a ǃkham dan ǁkhā. Xawe da ge ǀnî ǁaegu ai aiǃgû tsî ǀnî ǂkhabusasiga nî ǃkham ǀgara. Apostel Petrub aiǁgausa ǃgaoǃgâ re. ǁÎb ge khoena gere ǃao amagab ge Jesuba ǃnona ǃnādi kōse ge ǀū xu. (Mat. 26:​69-75) Xaweb ge Petruba ega nē ǂkhabusasiba ge dan, ǁkhoaǂgaoseb ge ǀāpemāǃnans aiǃâ Jesub xa aoǁnâ o. (ǃNǃkh. 5:​27-29) Kuriga ǃkharu hâseb ge Jode Xristeǁî taman ǀkha ge ǂû ǀû, “Jodeǁîgu nî mî xūnab gere ǃao amaga.” (Gal. 2:​11, 12) Petrub ǂkhabusasib ge ge oaǀkhī tsîb ge ǀoasase ge ǃnōra tama hâ i nē ǂkhabusasiba xu.

18. Tae-e ǃgâi tama turagu ǀkha a ī ǁkhā?

¹⁸ Sada tsîn ge ǁkhā mâsib ǃnâ a hōsen ǁkhā. Mâ ǀgaub ǃnâ? Petrub khami da ge ǂkhabusasigu hina da ge a dan ti da ǂâi hâ gu ǃoagu noxoba a ǃkham ǀgara ǁkhā. Aiǁgause, ǀgui ǃgâsab ge ra ǂanǃgâ: “Tita ge ǀōǀkhā khoena ūhâ xūna 10 kuriga ge kō ǀû tsî ge mîbasen nē ǃgomsib go ǃkharusa. Xawe ta ge ǀnî mâsigu ǃnâ ǁkhawa gere ǃâitsâhe ǀōǀkhā khoena ūhâ xūna kōsa.” Xawe ǃgâi xū-i ge sida ǃgâsab ge nē ǂkhabusasib ǃoagu ge ǃkham ǀgara. ǁÎb ge ge mûǂan nēsab ûib hâ ǁaeb hoaba nî ǃkhamǃoasa, nē eloxoresa ǃhūbaib di ǀams kōse. ǁÎb ge ǁîb taras tsî ǀhaohâb ǃûi-aogu huib ǀkha ra dītsâ îb ǀōǀkhā khoena ūhâ xūna kōsa xu ǂgōsen.

19. Tae-e da noxoba dītsâ ǁkhā ǂkhabusasigu ǃoagu da ga ǃkham ǁaeb ai?

¹⁹ Tae-e da ǁore kai da ǁkhā ǂkhabusasib ǀkha a dī ǁkhā? Jesub ge ǃâitsâb xa a mî ǀāpemāsa da ge nî sao: “ǂKhaikari hâ.” ǁNās ge ra ǂâibasen î da sida ǃâitsâgu ǃoagu ǁkhaubasen. ǀGaisa du a ti du ga ǂansens tsîna aiǃgû tsî ǃâitsâga a ǃaroma ǁkhā xūna xu ǂgōsen. (1Kor. 10:12) Aiǃgû tsî ǂkhabusasiga ǃkhamǃoas ǀkha ra hui du xūna dī ǀgara re. ǂKhoamîdi 28:14 ge ra mî: “ǃGâiǃō i ge khoe-i hoaǁae ǃKhūba ra ǃaoǃgâ-e.”

ǂKHAIKARISE HÂSA XU DA GE ǃGÂINA RA ǀAMA

20-21. (a) Mâ ǀkhaega da nî ǃkhōǃoa sada ǃâitsâb ǃoagu da ga ǃkham o? (b) Sada ǃâba dī tsî da ga ǃâitsâba mâǃoa ob Jehovaba tae-e nî dība da? (2 Korinteǁîn 4:7)

²⁰ ǂGomǃgâsiba da ge ūhâ ǁkhā, ǃâitsâgu ǃoagu ǁkhaubasens sada ǃgâib ǃaroma ǀgui hâsa. ǁOre da ga, o da ge “ǁaerob di ǁkhoab” ǀguiba ūhâ xawe da ga Jehovab ra ǂhâba ǀgaub ǃnâ ûi, o da ge ǀamosib kōse nî ǃgâiaǂgao. (Heb. 11:25; Psa. 19:8) Nēs ge a īǁkhā, Elob di ǀgaugu ǃoagu ûis ǀkha da kuruhe hâ amaga. (Gen. 1:27) Jehovaba ra ǂkhîǂkhî ǀgaub ǃnâ da ga ûi, o da ge ǃanu ǃgâiǂâisa xu ra hā tsâsiba nî ūhâ tsî ǀguitsē ǀamosib kōse nî ûi.—1Tim. 6:12; 2Tim. 1:3; Jud. 20, 21.

²¹ Ama as ge “ǁgans ge a ǂkhabusa.” Xawes ge ǁnāsa ǂâibasen tama hâ ǂkhabusasigu ǃoagu da ǃkham dan hō tidesa. Jehovab ge a aiǂhomisa ǂhâ da hâ ǀgaiba mādasa. (Khomai re 2 Korinteǁîn 4:7 sa.) ǃGaoǃgâ re Jehovab ge ǃnāǂamsa ǀgaiba ra māda. Xawe da ge sada ūhâ ǀgaiba nî sîsenū, î da ǁnā ǃâitsâb ǃoagu ǃkham. Sada ǃâba da ga dī, o da ge ǂgomǃgâ ǁkhā Jehovab sida ǀgorede nî ǃereamsa ǃnāsa ǀgaiba mādas ǃnâ-ū. (1Kor. 10:13) Amase, Jehovab huib ǀkha da ge ǃâitsâgu ǃoagu a ǃkham ǁkhā.