Mati da Jehovaba ǃgôasiba nî mā ǃgammeba nî ǀapeǁgui

1-2. Jehovaba tae-e sadu ǃgammeb tsēs ǃaroma ra ǂhâba?

ǃGAMMEHE du nîsa du mîmaibahe hâ? Ti-i nî īs ga iob ge nēba ǁaeb ǃgâiaǂgaob diba tsî du ge a ǀhape ǃgammeb tsēsa ǀapeǁguis ǀkha. Jehovab ge sadu ǃgammeb ǃnâ ǃgâiǃgâibasensa ūhâ. Jehovab ge ra ǂhâba î du ǃgammeb tsēsa ai ǃgâi ǁaeba ūha tsî hānîǁaeb ǃnâ ǀguiba ǃgâiaǂgaoba ūha.—ǂKhm. 5:18, ǀG.ǁna. 3:11.

² Kaise i ge a ǂhâǂhâsa î-i ǃgammeb tsēsa Jehovaba ǃgôasiba ǁgau. Tae-i ǃaroma tsî mati da ǁnāsa a dī ǁkhā? Nē ǁkhāǁkhāǃâs ge ǃgōsase ǃgammeba ra ǀapeǁgui khoera ǃoa hâ. Xawe i ge nēpa ra ǃhoaǃgaohe Elobmîs tsoatsoade hoa da a hui ǁkhā, î da ǂkhaisiba Jehovaba mā ǃgammeb ǃoa da ga ǁkhauǂûiheo. Tamas ka io da ga ǃgamme ra khoe-aogu ra xa sida ǂâiǀgauba ǂganheo.

TAE-I ǃAROMA DA JEHOVABA ǃGÔASIBA NÎ ǁGAU?

3. ǃGammeba ra ǀapeǁgui khoe-aogu ra tae-e ǂâis ǃnâ nî ūhâ tsî tae-i ǃaroma?

³ ǃGammeba ra ǀapeǁgui Xristeǁî khoe-aogu ra ge ǁîra ǃgammeb tsēs xa ra ga mîǁguiba dīo Elobmîs ai ǃgaoǃgaosase ǁnāsa nî dī. Tae-i ǃaroma? Jehovab ge ǃgamme ga ǂnûiǂgā amaga. ǁÎb ge Adammi tsî Eva hâra ǃgammeba ge ǂnûiǂgā. (Gen. 1:28; 2:24) Jehovab ge ǃgammeba ǂnûiǂgā amaga ra ge ǃgammeba ra ǀapeǁgui khoe-aogu ra mati ra Jehovaba ǃgôasiba nî ǁgaus xa nî ǂâi.

4. Mâ ǀnî hâ ǃaromaden ǃgammeba mîmâiba gu hâ khoena ūhâ Jehovaba ǃgammeb tsēs ai ǃgôasiba ǁgausa?

⁴ ǀNî hâ ǂhâǂhâsa ǃaromadi ge hâ tae-i ǃaroma du Jehovab tsâsiga ǂâis ǃnâ nî ūhâsa ǃgammeb tsēs ai. ǁÎb ge sadu di ǀhomsi ǁGû tsî ǃgâi ǀhōsaba. (Heb. 12:9) Tsî du ge amase ǁîb ǀkhā du ūhâ ǃgâi ǀhōsagusisa ra ūhâ ǀgara ǂgao. ǃGammeb tsēs tamas ka io ǀnî hâ tsēs ai du ge Jehovaba nî tsûtsû xū-e du ge dī ǂgao tama hâ. (Psa. 25:14) Jehovab ge dība du xūn hoan tsî noxopab nî dība du xūn xa du ga ǂâiǃgâ, o du ge ǃgammeb tsēs ai ǃgôaǃgâsiba ǁgau bi tsî ǁîba ǂkhaisiba ra mā xūna nî dī.—Psa. 116:12.

MATI DU JEHOVABA ǃGÔASIBA ǁGAU ǁKHĀ?

5. Elobmîsa mati ǃgammeba ra ǀapeǁgui khoera nî hui î ra ǃgâi mîǁguiga ǃgammeb tsēs xa dī?

⁵ Elobmîs ge dīhe tsî dīhe tide xūna xoaǁgui tama hâ, Xristeǁîn tae-e ǃgamme gu ai nî dīs xa. ǁNā-amaga î ge ǃgamme ra khoera ǁîra mâsib ǃoagu ǃgammeba ǀapeǁgui ǁkhā tsî hâǃnâ ra ra ǀkharib ǃnân khoena taena ǁnaeti hâs ǃoagu. Ama Xristeǁî ge ǂhanub ǃgammeb xa mā hâ ǁgaraga nî sao. (Mat. 22:21) Xawe Elobmîs ǁgaragu ai ǃgaoǃgaosase ro ga ǃgammeba ǀapeǁgui, o ro ge Jehovaba ǃgôasiba nî ǁgau. Mâ Elobmîs tsoatsoade du ǂâis ǃnâ nî ūhâ?

6. Tae-i ǃaroma i a ǂhâǂhâsa ǃgammeba mîǁgui hâ khoe-aogu ra ǂhanub ǁgaragu ǃgammeb xa hâ ga nî saosa?

⁶ ǂHanub ǂgaoǀkhāde ǁnâuǀnam. (Rom. 13:1, 2) ǀNî ǃhūgu ge ǁgaraga ūhâ ǃgamme ǂgao ra khoera nî sao ga ǃgamme ra nîs aiǃâ. ǁÎra ra hâǃnâ ǃhūb ǃnâ ra ge ǃgamme ǂgao ra khoe-aogura nē ǁgaragu a taesa aibe nî ǂanǂûi. Nē ǁgaragu a taesa du ga ǂanǂûi ǂgao, o du ge sadu ǀhâohab ǃûi-aogu ai huiba a ǂgan ǁkhā.b

7. ǃGammeba mâǃnôa ǁaxasi?

⁷ Nē ǁaxasib tawa i ge ǃgôasiba nî hâ. (1Kor. 10:31, 32) Dītsâ re îs ǃgammeb tsēsa îxa ǀgaugu Elob ǃAnu gagab xa ra omkhâihe ga ǁgau, ǃhūbaib ǀgaugu ose. (Gal. 5:19-26) ǃGammera khoeb a ǀasa omaris di dana xui-aob ge ǁîba nî dītsâ, ǃgôasib nē ǃgammeb ǁaxasib ai nî hâsa. ǃGammeba mati ǃgôasiba ǁgau ǁkhā? ǃGamme ra khoen ge ra ǁhûi în Elobmîs ai ǃgaoǃgaosa ǃhoasa ūhâ. ǃHoasa ra mā ǃgâsab ga ǃgôasib tsî ǀnamxaǃnâ ǀgaub ǃnâ nē ǃhoasa dī, oi ge ǁnâu ra khoen tsîna nî hui în ǁnâuǃā, ǃgammeb Jehovaba xū ra hā ǀkhaesa. ǃGammeb tsēsa ra hâǃnâ khoen tsîna i ge nî hui în mû matikōseb ǃgammeba ǂhâǂhâsa ǃkhaisa. ǁNā-amagan ge ǃnāsa Xristeǁîn ǃgamme rana ra ǁhûi, î-i nē ǃhoasa īǁkhāsib ga hâo saali tawa ūhâ-e. Sadu ga ǃhoasa Saali tawa ūhâ ǂgao, o du ge sîǂkhanisa ǀhâohab ǃûi-aoga ǃoa nî xoa ǁnāsa ra ǂgan-amse.

8. ǃGammeb tsēs ǁâudiba ūhâsa du ga ǁhûi, o du mâǀgaub ǃnâ nî ǃgaoǃgâ î-i ǃgôasiba Jehovaba ǁgau? (Romeǁîn 13:13)

⁸ Khomai re Romeǁîn 13:13 sa. Sadu ga ǁhûi o î du ǃgammeb ǁâudiba ūhâ, o du mâǀgaub ǃnâ ǂgōsen ǁkhā î-i tā ǃhūbaib ǀgauba ǁgau? Grike gowab mîs ǁgauoǃnâ ǃgâiǃgâisens, Romeǁîn 13:13 ǃnâ ra hōhes ge ǁkhoaxa ǁaeb hînan khoena kaise ā tsî ǃuis ǀams kōse musik-e ra ǀhurusa ǃoa ra ǁnaeǁgau. ǁHûi du ga o xûi-e ǃgammeb ai māsa, o du ge ǁaeb aiǃgâ ǀnai nî mîǁgui tae-e du nî dīsa î-i khoe-e ta ǃnāsase ā.c Tsî i ga musik-e ǀhuru-eo, ǃgaoǃgâ re î-i tā ǃgarise ǀhuru-e în ǁkhauhe hâ khoena noxopa ǁgam ǁkhā. Mâǃnôa musik-e nî ǀhuruhesa ǃgâise ǁhûi tsî mîn amdi ǃnâ hâna ǃgâise ǃgâ, în tā khoena ǃnôakaihe.

9. ǃGamme ra khoe-aogu ra ǁîra ǃgammeb tsēs ǁâudib tawa tae-e ǂâis ǃnâ nî ūhâ?

⁹ ǀNî ǃhūgu ǃnâ ǃgammeb tsēs ǁâudib tawan ge ǀhōsan tsî omaris ǁanin tsîna ǃgamme ra khoe-aogu ra dîde dî tsî ǁîra xa xū-e ra mî. ǀNî ǃgammeb tsēs tawa i ge vidion tsî ai-īsin tsîna ra hâ, ǃgamme ra khoe-aogura ra ǁgauna tsî ǀnî hâ xūron tsîna. Nēti-i xūron ge tsēsa ra ǁkhoaxa kai. Xawe da ge ǂâis ǃnâ nî ūhâ neti-i xūron ge nî omkhâi. (Fil. 4:8) Dîsen re: Nēti-i xū-e nauna ǃgôasiba nî ǁgau? ǃGammeba-i ǃgôasiba nî ǁgau? Tsî ǂhâǂhâsase dîsen re ‘Jehovaba i ǃgôasiba nî ǁgau?’ ǂHanu-i ge a khoe-i ga ǀkhōnxa xūrona mîo xawe-i ge tā ǁgauoǃnâ ǃhoa xūn, ǁgoe-ūgub xa khoena nî ǂâi kai xūna nî mî. (Efe. 5:3) Sadu ǀhōsan tsî omaris ǁanin ga ǃgammeb ǁâudib ai xū-e mî, on ge nî ǁnâuǃā mâǃnôa xūn saro ǃgammeb tsēs ai mîhe tidesa.

10. ǃGamme ra khoe-aogu ra tae-i ǃaroma tā hoa khoen xa nî mûhe ǂgao ǃgammeba ra ga ǀapeǁguio?(1 Johaneb 2:15-17)

¹⁰ Tā hoa khoen xa mūhe ǂgao. (Khomai re 1 Johaneb 2:15-17 sa.) Jehovaba ǀnam khoen ge ǁîn ǁkhāsib ǃnâ hâ i hoa-e ra dītsâ în ǁîba ǃgôasiba ǁgau tsî tā hoa khoen xa mûhe ǂgao. ǁNā-amaga i ge ǃgamǃgamsenxa Xristeǁîna kai mari-e sisen-u ǂgao tama hâ în ūn hâ xūn ǀkhā ǂnīǂnīsen. Mati du ǃgâiba ǀama ǁkhā ǀguiǃgūpu ǃgammeba du ga ūhâo? ǃGâsab Mike Norwaib ǃnâ ra hâb aiǁgaus xa ǂâi re. ǁÎb ge ra mî, “surdeba xûm ge ge hâbē tsîm ge ge aiǃgû ǁkhā i aimaba-ao sîsenni ǀkhā. Sîm ǃgammeb ge ge ǀguiǃgupu i xawe ǁkhā ǁaeb ai kaise ge îxa-i.” ǃGâsas Tabithas Indiab ǃnâ ra hâs ge ra mî: “ǂGui ǂâiǂhansende xûm ge ge ǂgōsen. Sîm ǃgammebam ge ǀguiǃgupuse ūhâ, oi ge ǀorose xūna ge hâ i ǀapeǁgui ǃaroma . ǁNās amaga da ge ǀorose gere ǂnôagu.”

11. ǃGamme ra khoe-aogu ra mati a ǁgau ǁkhā ǃgâi sara ana ǀgauba ra nî ǁhûisa? (Ai-īsiga mû re.)

¹¹ Tae-e ro ǃgammeb tsēs ai nî anasa ro mîǁgui hâ? Ama as ge îxase ro ge ra mûsen ǂgao. Elobmîs ǁaeb ǃnâs tsîna ra ge ǃgamme ra khoe-aogu ra ǃgōsase mati ra nî mûsen ǀgaub ai ǂâisa gere ǂnûi. (Jes. 61:10) Ama as ge ǃgammeb tsēs ai du ra ana xū-i ge ǀnî hâ ǁaxasi ǃoa du ra ana xū-e xu nî ǀkhara. Xawe i ge tā ǃgammeb ai du ra ana xū-e khoena nî ǃnôa kai. (1Tim. 2:9) tTā mā-am re î-i ana du ra ǀgaub, mûsen du ra ǀgaub tsî ū du hâ xūn tsîna sadu ǃgammeb tawa ra ī xūn hoan ǂam-ai ǂhâǂhâsa.—1Pet. 3:3, 4.

12. ǃGamme ra khoe-aogu ra tae-i ǃaroma xoadi ai ǃgaoǃgaosa tama ǁnaetiga xu ǃnūse nî hâ ǁîra hâǃnâ ǃkhaib tawa?

¹² Tā Elobmîs ǀkhā ǃgûǀhao tama xūna dī. (J. ǂHa. 18:4) Nē da ûiǃnâ hâ ǃhūbaib ǃnân ge ǃgammena ǃnāsa ǁaega ama tama ǂgoms ǀkhā dī xū-e ūhâ xūna ra dī. Jehovab ge ǃgāsase ra ǃkhâikhom da î da nēti ī ǃanuoǃnâ xūna xu ǃnūse hâbe. (2Kor. 6:14-17) Sadu ra ǁan ǃkhaib tawa i ga ǁnaetigu tsî ǃhaoǃnâbe dī xūna hâ tsî du ga ǀūo Elobmîs tae-e nē ǁnaetigu xa ra mîsa, o du ge ôaǃnasa nî dī. Tsî Elobmîs ǃnâ ǁgaraga nî ôa hui du nî ga î du ǃgâi mîǁguiga dī sadu ǃgammeb tsēs tawa i ga hāo.

13. ǃGamme ra khoe-aogu ra mati Jehovab mûǂûiba ǁgae ǁkhā ǀkhae xūn tawa i ga hāo?

¹³ Sadu ra hâǃnâ ǃkhaib tawa i mā-amsa în khoena ǃgamme ra khoe-aogu ra ǀkhae xūna mā? ǃKhū hâ khoe-i ge ǀgâsa khoe-i xa ǀkhara ǀkhae xūna mā ǁkhā. Ama as ge Xristeǁî-i ge ra ǂkhâǃnâhe î-i mā, ǁnās ǁî-e ra ǂkhî kai xui-ao. (ǂKhm. 11:25; ǃNǃkh. 20:35) Xawe ǃgamme ra khoe-aogu ra tā ǁîra ǁkhau hâ, khoena nî tsâ kai xū-en nî māsa. Tamas ka io tā ǁkhau ra hâ khoena ǁgaise nî tsâ kai, kai marisa ra ǂgan ǀkhae xūnan ga māhō tama io. Jehovaba da ge ra ǁgae, māhe da ra xūn hoan ǃoagu da ga ǃgôaǃgâsiba ǁgau o, ǁîn ǁgarihes ǃnâ-ū mā tama xawe ǂgaoba xu ra mā amaga.—2Kor. 9:7.

ǃGOMSIGA ǂGŌSENS TSÎ MÂǃKHARUS

14. Mâǃnôa ǃgomsinan ǀnî ǃgamme ra khoena ra hōǃâ?

¹⁴ Jehovaba ǂkhaisiba ra mā ǃgammeba du ga ǀapeǁgui, o du ge ǃgomsina hōǃâ ǁkhā. Aiǁgause du ge ǀnîsi nî ǃgombahe ǀguiǃgupu ǃgammeba ǀapeǁguisa. ǃGâsab Charlieb, Solomon ti ǀon hâ Islandi tawa ra hâb ge ra mî: “Sîm ge kaise ge ǃgombahe-i mîǁguisa ham-em nî ǁkhausa. ǂGui ǀhōsanam ge ūhâ. Tsî sîm ǃhaos ǃoagun ge hoa khoena ra ǃâubasen ǁkhauǂûihen nîsa.” ǃKharugo xoaǀgoras ǃnâ go ǃhoaǃgaohe Tabithas ge ra mî: “Tita ra hâǃnâ ǃās ǃnâ i ge kai ǃgammeb ǁâudiga hoaǁae ra dīhe. Sîm ǁgûra ge ǁaeba ge ū, dīm ge mîǁguiba ūǃoasa. Sîm ge 100 khoen ǀguina ǃgammeba ǃoa ge ǁkhau.” Saras, Indiab ǃnâ ra hâs ge ra mî: “ǂGui khoen ge matikō mari-en ūhâs tsî naun tae-e ǁîn xa ra ǂâis ai, ǁîn ǂâisa ra ǂnûi. Ti ǁnurisab ge kaise ǂoaǂamsa ǃgammeba ge ūhâ i tsî ta ge tita ǁgâiba ge hōǃâ î ta tita tsîna ǁnās xa ǃnāsase ǀgapi ǃgammeba ūhâ.” Tae-e hui du ǁkhā î du nē ǃnôa ǃgomsin tsî ǀnî hân tsîna mâǃkharu?

15. Tae-i ǃaroma da nî ǀgore ǃgammeb ǀapeǁguiga da ra dī ǁaeb ai?

¹⁵ Sadu ǃgammeb ǀapeǁguib xa ǀgore. Jehovaba du ge ǀgores ǃnâ hōǃâ du ra ǃgomsin tsî tsâsigu tsîna mîba ǁkhā. (Fil. 4:6, 7) ǂGan bi ǁkhā du ge a îb hui du, î du ǃgâi mîǁguiga dī, ǃnomsase hâ ǂâiǂhansen du ga o tsî ǁkhoaǂgaosiba ǁgau ǂhâbasa i ga o. (1Pet. 5:7) Jehovab ǃnâ du ūhâ ǂgomǃgâsib ge nî ǀgai mû du ga o matib sadu ǀgorede ra ǃereamsa. Tabithas ǃkharugo xoaǀgoras ǃnâ da go ǃhoaǃgaos ge ra mî: “Sîm ǁaegum nî ǂkhabasam ge kaise gere ǂâiǂhansen. Tamas ka iom sîm omaris ǁanin ǀkhā nî ǂnôagusa. ǁNā-amagab ge ǃgammeb ǀapeǁguib xam gere ǃhoa ǃnās hoasa ǀgores ǀkhā gere tsoatsoa. Jehovab huibam ge ge hōǃâ. Tsîm ge ǂkhîba sîm ǁaegu tsî omaris ǁanin ǀkhas tsîna ge ūhâ-i.”

16-17. ǃGâise ǃhoa-ūgusa mati hui da ǁkhā ǃgammeba da ga ǀapeǁguio?

¹⁶ ǃGāsase tsî ǃgôasib ǃnâ ǃhoa-ūgu. (ǂKhm. 15:22) ǃGamme nî khoe-aogu ro ase ro ge ǂgui mîǁguiga nî dī saro ǃgammeb tawa i ga hā o. Mâ tsēs ai ro nî ǃgammes, matikō mari-e ro nî sîsen-ūs tsî ham-e ro nî ǁkhausa ro ge nî mîǁgui, ǀnî xūn ǂam-ai. Mîǁguiba ro nî dīs aiǃgâ, ǀguiba dī ro nî mîǁguigu xa ǃhoaǃgao tsî Elobmîs ai ǃgaoǃgaosa ǁgaragu saro nî huigu tsîna. Tsî gagasise kaiǀoa hâ Xristeǁîn tawas tsîna huiba ǂgan. Saro ga omaridi ǀkhā ǃhoaǃgao taena ro ǂhâba hâsa, o ǃgâi ǀgaub ǃnâ ǁnāsa dī, nau khoen tsâsiga ǂâis ǃnâ ūhâse. Saro ǁgûn ga aiǁgause xū-e ǃgammeb tsēs ai dī ǂgao, o ǁnâuǃāxa i ga o ǁîra ra ǂhâba hâ khami dī re. Nēs ge ǁîra ǃaromas tsîna nî ǀō-aisa. ǁÎra go ǂgan xū-e ro ga dīhō tama io ǃgâi ǀgaub tsî ǀnammi ǃnâ ǁguiǃā re tae-i ǃaroma ro nē xū-e dī ǁoasa. (Kol. 4:6) Saro omaris ǁanina ǃgâise ǁguiǃāba re, sīǃnâ ǂgao ro ra xū-i ge, Jehovaba ǂkhaisiba nî mā ǃgammeba ūhâsa.

¹⁷ Saro ǁgûn ga Jehovaba ǃoaba tama io, i ge ǀnîsi mîǁguiga ǁîna ǁguiǃābasa nî ǃgom xawe ro ge ǃgâi ǀgaub ǃnâ ǁîna hui ǁkhā în ssaro mûǂuiba ǁnâuǃā. ǃGâsab Santhoshi Indiab ǃnâ ra hâb ge ra mî: “Sîm omaris ge ama tama ǂgomdi ai ǃgaoǃgaosa xūna sîm ǃgammeb ai gere dī ǂgao. Sîma i ge kai ǁaeba ge ū, îm mîǁguiba ǁguiǃāba nî. Tsîm ge ǀnî ǁaegu ai ǁîra ǂhâba hâ xūn ǀkha ge ǃgūǀhao Jehovaba i ge tsûtsû tama hâ io. Aiǁgausem ge ǃgammeb ai nî ǂûhe ǂûna ge dawa, ǁîna ǃgâibahe ǂûna ǃoa. Tsîm ge ge mîǁgui î-i tā sîm ǃgammeb tsēs ai ǁnaehe tamas ka io ǂnāhe, nēn ama tama ǂgomdi ǀkhā ra ǃgūǀhao xui-ao.”

18. Tae-e hui du ǁkhā îb sadu ǃgammeba ǃgâise ǃgûǁnâ? (1 Korinteǁîn 14:40) (Ai-īsiba mû re.)

¹⁸ ǃGâise ǀapeǁgui. ǃGâise du ga ǀapeǁgui, o du ge ǂâiǂhansena xū ra ǂgōsen ǃgammeb tsēs ai. (Khomai re 1 Korinteǁîn 14:40 sa.) Wayne, Taiwanni ǃnâ ra hâb ge ra mî: “Tsērode sîm ǃgammeb tsēs aiǃâm ge sîma ǃgammeb tawa nî hui khoen ǀkhā ǂnûsa ge ūhâ. Dī ta ge mîǁguiga ta ge ǁîn ǀkhā ge ǃhoaǃgao. Tsî ge aiǂhomisen ǃgammeb tsēs aim ra dī ǂgao xūna, în hoana ǃgâise ǃgūǁnâ.” ǁKhau du ra khoena ǃgôasiba ǁgaus ǃaroma, ǁkhāsib ǃnâ hâ i hoa-e dī în xūn hoana ǁaeb ai dīhe toa.

19. Tae-e a hui du ǁkhā î-i ǃgammeb ǁâudiba ǃgôasib ǃnâ dīhe?

¹⁹ ǂGui ǃgomsiga xū du ge a ǂgōsen ǁkhā, taen hoan a īǁkhās xa du ga ǂâio. (ǂKhm. 22:3) Aiǁgause, sadu ra hâǃnâ ǃkhaib tawa i ga ǁnaetib ase ǁkhauhe tama khoena ǃgammeba ǃoa ī, o du ge aiǃgâ a ǂâi ǁkhā tae-e du dī ǁkhāsa î-i nēsa tā ǃgammeb tsēs ai īǁkhā. Jehovaba ǃoaba tama ǀaokhoena ǁguiǃāba re tae-en ǃâubasens tsî du ǁnaetisa ǃhaoǃnâbe xūn xa du mati ra tsâsa. ǁÎna du ge “Wat gebeur by Jehovah se getuie se troue” ti hâ khomaiǃâsa jw.orgs ai ǁgau ǁkhā. ǂGomǃgâ du ra ǃgâsaba du ge ǂgan ǁkhā îb mûǂam tae-i ra īsa nē ǃgammeb ǁâudīb tawa. Tsî ǂâiǃgâ re ‘ǁâudīb ǂgaeǂgui-aoba’ ǁhûibasensa. (Jhn. 2:8) ǃGāsase du ga sadu ǃgammeb tsēs di ǀapeǁguiba ǁîb ǀkhā ǃhoaǃgao, ob ge hui du ǁkhā hoa xūn ǀapeǁguihe hâse nî ǃgûǁnâsa.

20. ǃGamme ra khoe-aogu ra tae-e ǁîra ǃgammeb tsēs xa nî ǂâi-oa?

²⁰ ǀNîsi du ge a ǂâiǂhansen ǁkhā ǂâi du ga o taen hoan ǃkhōǂgahe hâsa ǃgammeb tsēsa ǀapeǁguisa. Xawe ǂâis ǃnâ ūhâ ǃgammeb tsēs ge ǀgui tsēs ǀguisa-i. Nēs ge ǂguro tsēsa îxa ûib Jehovaba ǀguiba ǃoabas dība. Sadu ǁkhāsib ǃnâ hâ i hoa-e dī re îs nē tsesa ǀguiǃgupuse tsî ǃgôasiba ra ǁgause ǁkhāse i. Jehovaba ǂgomǃgâ. ǁÎb di daoǁgaus ǀkhā du ge ǃgâi ǃgammeba ǀapeǁgui ǁkhā, kō-oa tsî du ǂkhî xūna nî ǂâihōba ǃhausen tamase.—Psa. 37:3, 4.