Kaira khoen ge ǀhaohâba ǂgui ǀgaugu ǃnâ hui ǁkhā
ǃGâsas Konies, 83 kurixas ge saorase ra mî: “Kō oa ta ga, o ta ge ra buru matikō xūna ta ge dī ǁkhā īsa ǂkham ta ge io. Nēsisa ta go kaira, o ta ge ǂkhamsis ǃnâ ta goro dī xūna dīhō tama hâ.”
Sadu tsîn ge ǀnîsi kairasis xa ǃaromahe hâse a ǂau. Jehovaba du ge ǂgomǂgomsase ǃoaba xawe du ge mâsib xa ǃaromahe hâse ǁgai ǂâina a ǂâi tsoatsoa ǁkhā. Aiǁgause, ǀnîsi du ge ǀnai du gere dī xūna nēsi du a dī ǁkhā xūn ǀkha a ǀgopeǀnō tsoatsoa ǁkhā. Tae-e a hui du ǁkhā ǁnāti ī ǂâiǀgauba du ga ūhâo?
JEHOVABA TAE-E SADO XU RA ǃÂUBASEN?
Dîsen re, ‘Jehovaba tae-e tita xu ra ǃâubasen?’ ǁKhaeǂgaosa da ge Deuteronomium 6:5 ǃnâ hâ mîdi saorade xu a hō ǁkhā: “ǃKhūb sa Eloba sa ǂgaob hoab ǀkha, sa ǀoms hoas ǀkha tsî sa ǀgaib hoab ǀkha ǀnam.”
ǁNā xoas ge ra ǁgau Jehovab ra ǃâubasensa î du ǁîba sadu ǂgaob, ǀoms tsî ǀgaib ǀkha ǃoaba. ǁNās ge nî hui du, î du tā naun ǀkha ǀgopeǀnōsen tamas ka io ǂkham du ge io du gere dīhō xūn ǀkha.
Nēs xa ǂâi re: ǂKham du ge io, du ge Jehovaba tae-e gere mā? ǃNāsa khoen ge nî mî Jehovaban ge ǁîn ǁkhāsib hoaba a māsa. Sadu ǃaroma du ge ǁkhā du a-i hoa-e gere dī sadu mâsib gere mā-ams kōse. Xawe sadu ǁkhāsiba dawa hâ? Nētsē du Jehovaba tae-e a mā ǁkhā? Ama as ge ǀnîsi du ge ǁkhā du a-i hoa-e nētsē ra dī. Nē ǀgaub ǃnâ du ga ǂâi, o du ge nî ǂanǃgâ Jehovaba du ǁkhā du a-i hoa-e nē ǁaeb ǃnâ ra māsa, ǃkharu ge ǁaeb ǃnâ du gere mā khami.
ǂKhamsis ǃnâ du ge Jehovaba ǁkhā du a-e ge dība tsî nēsis tsîna kairasis ǃnâ ǁkhā xū-e ra dī
ÛIB ǃNÂ DU ǁKHĀǁKHĀSEN HÂN GE NAUNA HUI ǁKHĀ
Nētsē du dī hō tama xūn xa ǀgui ǂâis xa du ge ǂgui ǀgaugu ǃnâ ǂâi ǁkhā mati du nauna a hui ǁkhāsa, sadu kairasis ǃnâ. Ama as ge sadu kairasis ǃnâ du ǂkhamsis ǃnâ du ge dīhō tama hâ i xūna ra dīhōsa. Aiǁgause du ge saora xūna a dī ǁkhā:
Sadu ûib ǃnâ du ǁkhāǁkhāsen hâ xūna naun ǀkha ǀgoragu. Saora aiǁgaudi Elobmîs ǃnâ hâde ǃgaoǃgâ re:
Gao-aob Davidi: “ǂKham ta ge ge i, tsî ta ge nēsi kaira hâ xawe ta ge ǂhanu-ain ge ǁnāǃgâhe hâ i tsē-i, tamas ka io ǁîn ôan ge pere-e ǂgan hâ i tsē-e a ǀū.”—Psa. 37:25.
Josuab: “Ti ǁōǁaeb ge nēsi go ǀgūtoa. Mâ ǀgui-i sadu di i hoa-i ge ǁî-i ǂgaob tsî ǀoms ǃnâ a ǂan, ǃKhūb sadu Elob ge mîmâiba dub ge ǃgâi xūn hoana a mā du ǃkhaisa. ǁÎb ge dīb ge mîmâis hoasa ge dīǀoaǀoa, ǀguis xawes ge dīǀoaǀoahe tama i tama hâ.”—Jos. 23:14.
ǀNîsi du ge sadu tsîna ǁnāti gere tsâ. Davidi tsî Josuab tsîkha gere mî xūn ge kaise ge ǂhâǂhâsa, ǁîkha ge ǃkharuǃnâkha gere xūna gere mî amaga. Nē ǂgomǂgomsa ǃgāgu Jehovab dikha ge mû tsîkha gere ǁnâu xūn xa gere ǃhoa. ǁNās ge kaise a ǀō-aisa.
Jehovaba du ga gaxuse ǃoaba, o du ge sadu tsîna nau khoena a mîba ǁkhā matib Jehovaba sado hui hâ ǀgaub xa. ǂÂihō i du ra, ǁaeb hîna du ge Jehovab huiba mûsa ǀō-aisa ǀgaub ǃnâ. ǁNāti-i ga io nauna mîba re. ǁNās ge sadu ge khoakhoahe khami nauna a khoakhoa ǁkha. Sadu ǃgâsana du ge a ǂkhâǃnâ ǁkhā ǃkharuǃnâ du ge xūna du ga ǁîn ǀkha ǀgoraguo.—Rom. 1:11, 12.
ǀNî ǀgaub sadu ǃgâsana du a ǂkhâǃnâ ǁkhāb ge ǀhaode hâǃnâsa. ǁNāsa du ga dīo du ge ra ǂkhâǃnâhe tsî naun tsîna a ǂkhâǃnâ ǁkhā. Konies ge ra mî: “ǀHaodi tawa ta ra hō ǀnammi ge ra hui te, î ta tā ǂkhabuǂâi. Nauna gangansa ǁgaus ǃaroma ta ge ǂkhari ǀkhae xūrona ra mā nî. Tita ge ra dītsâ hoaǁae ti ǃgâsan ǀkha aoǁnâ sîsenni ǃnâ ǂoasa.”
JEHOVAB GE SADU ǂGOMǂGOMSA ǃOABASA RA ǃGÔAǃGÂ
Elobmîs ge ǂgui aiǁgaude ūhâ khoen Jehovab xa ge ǀnam-e în xawe ge Jehovaban ǃnāsa-e a dība ǁoa ti gere tsân xa. Simeonni aiǁgausa ǃgaoǃgâ re, ǁîb ge ǁkhara Israelǁî ge îba tsî Jesub gere ǃnae o ge ûitsama i. Simeonni ge tempela ǃoab ge io ǁnāpa ǂkhamkhoegu ǂhâǂhâsa sîsenna gere dīga ge mû. Xawe Simeonna mati gere tsâ? Khoesi mûǂuiba xub ge ǀnîsi gere tsâ kairasis ǃnâb ǁnā ǂkhamkhoegu khami Jehovaba ǃoaba ǁoa ǃkhaisa. Xaweb ge Jehovaba xūna ǀnî ǀgaub ǃnâ gere mû. Jehovab ge Simeonna “ǂgomǂgomsa” ǃoaba-aob ase gere mû tsî aiǂhanuba ge mābi îb Jesuba mû ǀgôarob ase. Jehovab ge Simeonna ge sîsen-ū îb kēbo, Jesub a mîmâihe Messia ǃkhaisa. (Luk. 2:25-35) Jehovab ge Simeonni sorosi ǀgaib ai ge kō tama hâ i xawe Simeonni ǀgaisa ǂgoms tsî “ǃanu gagab ge ǁîb ai ge hâ i.”
Jehovab ge Simeonna ge ǀkhae îb Jesuba ǂkhari ǀgôarob ase mû tsî ǁîba hānî Mesiab ase kēbo
Sadu tsîn ge ǂgomǃgâsiba ūhâ ǁkhā Jehovab sadu ǂgomǂgomsa ǃoabasa ra ǃgôaǃgâsa ǃnubusiga du ga ūhâ xawe. Jehovab ǃaroma i ge ǁnā “khoe-i di mās di ǁkhāsib ǃnâ i ga hâ o, nî mā khoe-i ge ūhâ tama i hâ xū-e mā tama hâ.”—2Kor. 8:12.
Dī ǁkhā du a xūn ai ǂâisa ǂnûi. Aiǁgause, mâ ǀgaugu ǃnâ du noxopa a aoǁnâ ǁkhā ǀgaub xa ǂâi re, nēsa du ga ǃnubu ǁaerob ǀguiba dī xawe. ǀNîsi du ge ǃgâsan tsîna ǂkhâǃnâ ǁkhā sîǂkhanide xoas tamas ka io ǁîna bels ǃnâ-ū. Nēti ī ǀgaub ǃnâ ǃgâsana ǀnamma ǁgaus ge ǁîna kaise nî ǂkhâǃnâ, ǃgōsase ǂgomǂgomsase sadu khami Jehovaba ǂgui kuriga ǃoaba hâ khoe-e xu-i ra hāo.
ǀNîn ge sorosi ǃnubusiga ūhâ. Nē khomaiǃâs ǃnâ hâ boksis, “Nēs ge ǁîs ûib ti ra ǂâibasen” ti hâs Afrikab oostes ǃnâ hâ ǃgâsas aiǁgausa ǃgaoǃgâ.
ǂÂis ǃnâ ūhâ, Jehovaba du ge ǂgomǂgomsase a ǃoaba tsî noxopa aiǃgû tsî ra ǃoaba ǀgaras ge nauna nî ǂkhâǃnâ. Sadu ge mâǀgais aiǁgau, ǁnās ǀkha du ge ǂgomǃgâsiba ūhâ ǁkhā, “Elob ge ǂhanuoǃnâ tama hâ. ǁÎb ge sadu sîsenni tsî ǁkhāti ǀnammi ǁîb ǀons ǃaroma du ge ǁîb khoena ǃoaba-ūb tsî ganupe ra ǃoabab ǃaroma ǀuru du tide.”—Heb. 6:10.
NAU KHOENA HUIS ǃNÂ ǁHAOS
Ôaǃnâs ge ra ǁgau, kairan nauna huis ǃnâ ra ǁhaon ge ǃgâi ǂurusiba ūhâ, ǃgāsase ǂâi tsî gaixuse ra ûi.
Ama as ge nau khoena ǃgâi dīs ge kairasis xa ra ǃaromahe ǃgomsina ūbē tide. Elob gaosib ǀguib ge kairasis tsî ǁōb xa ra ǃaromahe ǃgomsina nî ūbē.—Rom. 5:12.
Jehovab ra ǂgan du-e dīs ǂam-ai du ge nauna ra hui tsîs ge nēsa ra hui du sadu ǂgomsa ǀgaiǀgaisa. Jehovab ge kairan ǁîb ǃoabas ǃnâ ra dīna ra ǃgôaǃgâ tsîb ge ǀhaohâb tsîna sadu ǂgomsa kaise ra ǃgôaǃgâ.