Matits ǁgau ǁkhā Jehovabats ra gangansa ǁîb ǀGôab ǃaroma?

1-2. Xoremarib ǁguibasa tae-e dīsa ra ǂkhâǃnâ da tsî tae-i ǃaroma? (2 Korinteǁîn 5:​14, 15) (Ai-īsiba mû re.)

OMS xa ǁnā-aihe tsî a ǂoaxa ǁoa khoe-i ga ǀnî hâ khoe-i xa hui-e, oi mati ǁnā khoe-i ǃoa nî tsâ? ǁÎ-i ga nau khoen tsîna huiǂui xawets ge satsa ǁî-e ǀgurihâse ǃgôaǃgâsiba a ǁgau ǁkhā. Tsî tātsē ǁî-i ge dība tsi xū-ets ǀuru tidesa ǁî-e nî mîba.

² ǃKharugo ǁkhāǁkhāǃâs go ǁguiǃā khami da ge khoe-e ǂhâhâ ǁoreb tsî ǁōb tsîna xu nî ǃnorakai da-e. Jehovab ge nēsa ge dī (1) ǁîb ǀgôabab ge ge mā da î-i sida ǁorena ǀûbahe (2) î da ǀoasa kurus ǃâubasensa ūhâ tsî (3) ǁîb ǀkha ǀgū ǀhōsagusisa ūhâ. Xoremarib ge ra īǁkhā kai î da ǀamose ûis ǃâubasensa ūhâ. Jesub ge khoenab ūba hâ ǀnamma ǁîb ûiba ǁguibas ǃnâ-ū ge ǁgau. Tsîb ge khoesiba ǃhūbaib aib nî hās aiǃâ ge ǀnamm-i. (ǂKhm. 8:​30, 31) Apostel Paulub ge ge xoa: “Xristub di ǀnammi ge sige ra ǂgaeǂgui.” (Khomai re 2 Korinteǁîn 5:​14, 15 sa.) Nēs ge ra ǂâibasen î da Jesub ǀnamma ǃgôaǃgâsiba ǁgau tsî ǁîb ge dība da-e tā ǀuru.

3. Tae-i ǃaroma i sats Jesub ǁguibasa ganganxasiba ra ǁgau ǀgauba nauna xu ra ǀkhara?

³ Xoremarib ǁguibasats mati ǃgôaǃgâsiba a ǁgau ǁkhā? Sa ǃereams ge nau khoe-i disa xu a ǀkhara ǁkhā. Nēsa da ge sao rase a ǂkhō ǁkhā: Mûnan-ai re ǃnona khoen ge ǀgui ǃāsa ǃoa ra ī. Xawe i ge mâ khoe-i hoa-e ǀkhara ǃāsa xu ra ǃnari tsoatsoa. ǁîn ge ǃkharagagu daogu ai nî ǃnari în ǁnā ǃās tawa sī. Tae-ets ra sīǃnâ ǂgao? Sa ganganxasiba xoremariba ǁgau re. Sats ǃgôaǃgâsiba xoremariba ra ǁgau ǀgaub ge nî ǀkhara: (1) ǀNîsits Elobmîsa ra ǁkhāǁkhāsen, (2) ǁāǁnâsa Xristeǁî tamas ka io (3) gagasise ǃkhai hâ.

ELOBMÎSA RA ǁKHĀǁKHĀSEN KHOEN

4. Jehovaba Elobmîsa ra ǁkhāǁkhāsen khoen xa mati ra tsâ?

⁴ Nēs xa ǂâi re Jehovab tsî Elobmîs ǁkhāǁkhādi xats ge ra ǁkhāǁkhāsen ǂgao: ǁNās ge ra ǁgau Jehovab ǂhâba hâsa îts ǁîb ǀhōsa kai tsîb ge ra hui tsi ǁnāsa dīsa. (Jhn. 6:44; ǃNǃkh. 13:48) ‘ǃKhūb ge ǂgaoga ra ôaǃnâ.’ Nēs ge ra ǂâibasen, ǁîb ge ra ǃgaoǃgâ ǁîb xa ǁkhāǁkhāsens ǃgaots ra dī ǁgutsâte. Tsîb ge kaise ra ǃgâiaǂgao mûb ga o sa ûib ǃnâts ra dī ǀkharaǀkharana. (ǂKhm. 17:3; 27:11) Xoremarib ge ra īǁkhā kai î da Jehovab ǀkhā ǀgū ǀhōsagusisa ūhâ. (Rom. 5:​10, 11) Tātsē da ge ǁnāsa ǀūru tide.

5. Elobmîsa ra ǁkhāǁkhāsen khoe-e mati Filipeǁîn 3:16 sîsenū ǁkhā?

⁵ Elobmîsats ga ǁkhāǁkhāsen ots mati ganganxasiba xoremariba a ǁgau ǁkhā? ǀGui ǀgaub ge apostel Paulub ge Filipeǁîna a mā ǀapemāsa saosa: “A da ǀnai ta ge ǃkhōǃoan ǃoa ǀgui ûi re.” (Fil. 3:16) ǀNî Elobmîs ge nē xoasa saorase ǂnuiǃkhuni hâ: “Nēsi da garu ai daob ai da ge nî ǃgû ǀgara.” ǁNā-amaga tā mā-am î-i xū-i tamas ka io khoe-e ǂhani tsi ûib daob ai ǃgûsa.—Mat. 7:14; Luk. 9:62.

6. Elobmîsa ra ǁkhāǁkhāsen khoena tae-e nî dī ǀkharaǀkharana dīs xan ga ǃgombaheo? (Deuteronomium 30:​11-14) (Ai-īsiba mû re.)

⁶ ǀNîsi i ge a ǃgomba tsi ǁkhā Elobmîs ǁkhāǁkhāsa ūǃoasa. Ti-i ga io tae-e a hui tsi ǁkhā? Nē ǁkhāǁkhās xa ôaǃnâsa dī tsî Jehovaba ai huiba ǂgan re îb hui tsi nēsa ǃgâise ǁnâuǃāsa. (Psa. 86:11) Nē ǁkhāǁkhāsa ǁnâuǃās ga noxopa ǃgomba tsi, o aibe ǁaeroba nēs xa ǂâiǂhansen ǀû re tsî Elobmîs ǁkhāǁkhāsens ǀkhā aiǃgû. Īǁkhāsib ga hâ ots ge nēsa ēga ǃnāsase a ǁnâuǃā ǁkhā. Tamas ka iots ge ǀnîsi a ǃgombahe Jehovab ūǃoa tama xū-e dī ǀûsa. ǂÂis ǃnâ ūhâ re Jehovab ge ǀoasaoǃnâ kurusa ūhâ tama khoe-e xu dīhō ǁoa-i a xū-e ǃâubasen tama hâ. Jehovaba ra ǂkhîǂkhî ǀgaub ǃnâts ge a ûi ǁkhā. (Khomai re Deuteronomium 30:​11-14 sa.) Jehovab ge ra mîmâi satsab nî huisa. (Jes. 41:​10, 13; 1Kor. 10:13) Jehovaba ǁnâuǀnam ǀgara re. Tā kaise a ǃgombatsi xūn xa ǂâi re xawe hoa ǃgâi xūn Jehovab ge dība tsin xa, ǃgōsase xoremariba. Jehovabats ūba hâ ǀnammi ra ǀgai khamits ge nî mûǂan ǁîb mîmādi “ǃgom tama hâsa.”—1Jhn. 5:3.a

7. Jehovaba ra ǃoaba omaris ǁaegu ge kai ǂkhamkhoena tae-e a ǂâiǃgâ ǁkhā?

⁷ Amab ǃnâ ra kaikaihe ǂkhamkhoen tsîn ge a Elobmîs ǁkhāǁkhāsen-ao. ǁGûn ge ǁîna Elobmîsa ǁkhāǁkhāsa ǂhâǂhâsa xū-i ase nî mû. Elobmîs ge ra mî:“Elob ǃoa du hā re, ob ge ǁîba sadu ǃoa nî hā.” (Jak. 4:8; 1Kro. 28:9) Jehovab ǃoa a ǀgū kai tsi ǁkhā xunats ga dī, ob ge ǁîb tsîna xūna nî dī îts ǁîb ǀgū ǀhōsa kai. Jehovab ge sa omaris ǁîba ra ǃoaba ǃkhais ǃaroma ǀgui sats ǃnâ ǃgâiǃgâibasensa ǁgau tama hâ. Xawe sats ǀkhās tsîna ǀgurihâsa ǀgū ǀhōsagusisa ra ǂhâba. Jehovaba tae-e ge dī îts ǁîb ǀkhā ǀgū ǀhōsagusisa ūhâ ǁkhā? ǁÎb ǀGôabab ge ge mā, ǁnās ǀkha tā nē ǀō-aisa ǀkhaeba ǀuru re. (Rom. 5:​1, 2) Jesub ǁōb di ǂâiǂâisens aiǃgâ ǃgamse ǂâiǃgâ re, Jehovab tsî Jesub tsîn ge dība tsi xūn xa. Tsî ǁnās khaoǃgâ ǂâi re matits sa ûiba ra ûi ǂgaos tsî mâ mîǁguigats a dī ǁkhāsa îts Jehovaba ǁgau ǃgôaǃgâts rasa.b

ǁĀǁNÂSA XRISTEǁÎ

8. ǁĀǁnâsa Xristeǁîna mati ǂgomsa xoremarib ǃnâ ge ǁgau?

⁸ ǁĀǁnâsa Xristeǁî-i asets ge ǀnai ǂgui ǀgaugu ǃnâ ra ǁgau xoremaribats ra ǃgôaǃgâsa. Aiǁgausets ge ǀkharaǀkharana sa ûib ǃnâ ge dī îts Jehovaba ǂkhîǂkhî tsî ǁîb ǀgū ǀhōsa kai. Jesub mîmās ǁkhāǁkhāsabe dīs xa hâsa ǁnâuǀnam tsîts ge nauna Jehovab tsî Jesub tsîn xa ra ǁkhāǁkhā. Jehovab ai māǁnâsen tsîts ge ge ǁāǁnâ kaisen. ǀNîsin ge khoena ra mâǃoa tsi Jehovabats ra ǃoaba amaga. (2Tim. 3:12) Jehovabats ge ǂgomǂgomsase ǃoaba hâ tsîs ge nēsa ra ǁgau sats ǁîba a ǀnam tsî xoremariba ra ǃgôaǃgâsa.—Heb. 12:​2, 3.

9. Tae-en ǁāǁnâsa Xristeǁîna nî ǂanbasen?

⁹ ǁĀǁnâsa Xristeǁîn ase da ge ǀgui ǁkhōǁkhōsasiba nî ǂanbasen. ǁAeb ra ī khami da ge xoremarib mati sida ûiba ra tsâǀkhā ǀgauba a ǀuru ǁkhā. ǁNāsa mati a īǁkhā? ǂÂi re tae-i ge Efeses ǃnâ gere hâ Xristeǁîn ǀkha a īsa. ǁÎn ge mâǀgain rasa ge ǁgau tsîb ge Jesuba ǁîna nēs xa gere koa. Xaweb ge Jesuba ǁîna ge mîba: “Sadu ǂguro ǀnamma du ge a ǂhara.” (J.ǂHa. 2:​3, 4) Jesub mîdi ge ra ǁgau Xristeǁî-i ǁnaedīb ase Jehovaba xūna a dība tsoatsoa ǁkhāsa tsî ǀnamma xus ose. ǁNāti-i khoe-i ge ǁnaedīb ase ǀgore, ǀhaode ǃoa ī tsî aoǁnâ sîsenni tsîna a dī ǁkhā. ǁÎ-i ge ǀnammi xa ǂkhâǃnâhe tama ǁnā xūna dīsa. Tae-ets a dī ǁkhā hōǃâts ga o ǂgurots ge Jehovaba ūba hâ-i ǀnammi nēsi ǃkhai hâsa?

10. Paulub ge Timoteuba mîba ǀapemāsa da mati sada Xristeǁî ûib ǃnâ a sîsenū ǁkhā? (1 Timoteub 4:​13, 15)

¹⁰ Apostel Paulub ge Timoteuba ge mîba, îb Jehovabab ra ǃoaba ǀgauba kōǃgâ tsî ǁîba ǂgaob hoab ǀkhā ǃoaba. (Khomai re 1 Timoteub 4:​13, 15 sa.) ǁNā ǀapemās ǀkhā ra ǃgû ǀhaosets ge ǀgaugu xa a ǂâi ǁkhā, matits ôasa gagas ǀkhā Eloba a ǃoaba ǀgara ǁkhāsa. (Rom. 12:11) Aiǁgause, ǀnîsits ge ǃamkuse a aiǂhomisen ǁkhā ǀhaodi ǃaroma, nēs ge nî hui tsi îts ǃgâise ǀhaodi dawa ǁnâuǃā. Elobmîsats ga ôaǃnâ ots ge ǃnōsa ǃkhai-e ǃoa a īǁkhā îts ǂhani-e tamase ǁkhāǁkhāsents go xūna ǂâiǃgâ. Nēs ǃnâ-ūts ge Elobmîsa aitsama ôaǃnâsa xu a ǀama ǁkhā. ǀAesa da ra khauris ǁkhās khami da ge nē xuna nî dī ǀkhara î da ǃgôaǃgâsiba xoremarib tsî Jehovab ge dība da xūna ǁgau. Jesub ǁōb di ǂâiǂâisens aiǃâ hâ wekhegu ǃnâts tae-i ǃaroma Jehovab ge ǁîb khoena dība ǀō-aisa xūn xa ǂâiǃgâ tama hâ? ǁNās ge nî hui tsi its ǃnāsase ǃgôaǃgâsiba xoremariba ūhâba, nēs ge īǁkhā kai amaga îts Jehovab ǀkhā ǀgū ǀhōsagusisa ūhâ.

11-12. ǁAero-i ǃnâts ga turaba ǂoaǃnâ, oi ra ǂâibasen Jehovab ǁîb ǃanu gagaba mā tsi ǀû hâsa? ǁGuiǃā re. (Ai-īsiba mû re.)

¹¹ ǂGurosets ge Jehovaba ǁîb ǃoabas ǃnâ ūba hâ i ôasasibats ga ǂoaǃnâ, oi ge ǂâibasen tama hâ Jehovab ǁîb ǃanu gagab ǀkhā hui tsi ǀû hâsa. ǂÂihō î du ra apostel Paulub ge Korinteǁîna a mîbasa, ǁae-i ǃnâb ge ǁîb tsîna aoǁnâ sîsen-e ‘māsenxase dī’ tama hâ īsa. Xaweb ge aiǃgû tsî gere aoǁnâ ǁîb ǁgaumâis asab ge ǂan-i amaga. (1Kor. 9:17) Tae-e da ǁîba xu a ǁkhāǁkhāsen ǁkhā?

¹² Paulub tsîn ge ǁaen ai aoǁnâ sîsenni ǃgao turaba ge ūhâ tama hâ i. Xaweb ge ge mîǁgui îb aoǁnâ ǀgara ǀnî ǁaegu aib ge dī tsâ xawe. Sats tsîn ge ǁnāsa dīsa a mîǁgui ǁkhā. Nēsa dīs turabats ga ūhâ tama hâ i xawe mîǁgui re ǂhanu xū-e dīsa. Jehovaba ǂgan “māsenxa tsî du nî ǁîb di ǃgâi ǂâibasens ǃaroma ǁkhāse.” (Fil. 2:13) Jehovab ǃoa ǀgū kai ǁkhā tsi xuna dī ǀgara re. ǂGomǃgâsibats ge ūhâ ǁkhā ǁaero-i khaoǃgâ i Jehovabats ūba hâ ǀnamma ǁkhawa nî ǀgaisa.

13. Mati da nî “ǃâitsâsen” ǀgara ǂgoms ǃnâ da ûi hâsa?

¹³ ǁAeba xu ǁaeb ǀkha ǂâi re matits ra ûisa Paulub ge mî khami, 2 Korinteǁîn 13:5 ǃnâ: “ǃÂitsâsen tamas ka io ôaǃnâsen re, ise du ǂgoms ǃnâ ûi hâ ǃkhaisa.” Aiǁgausets ge a dîsen ǁkhā: ‘Ti ûiba ra ǁgau Jehovab gaosib a ǂhâǂhâsasa?’ (Mat. 6:33) ‘Ti sâǁaeb ǃnâ ta dī tsî ra kō xūna ra ǁgau ǁgai xūna da ǃhûi hâsa?’ (Psa. 97:10) ‘ǂKhîb tsî ǀguiǃnâxasib tsîna ǃgâsan ǁaegu ra ǂkhâǃnâ xūna ta ra dī?’ (Efe. 4:​2, 3) Jesub ǁōb di ǂâiǂâisen ge ǃgâi ǁaeb hînats nē xūna nî ǂâiǃgâba. Jehovab tsî Jesub ge dība da xūn xa da ra ǂâiǃgâ, Xristuba da ra ûiba tsî da aitsama ûibasen tamasa Paulub ge mî khami.

GAGASISE ǃKHAI HÂ KHOE-I

14. ǀNî ǃgâsana tae-i ǃaroma ǀhaode ǃoa ge ī ǀû?

¹⁴ ǀNî ǃgâsan ge ǀhaode ge hâǃnâ ǀû ǂgui kurigan Jehovaba ǃoaba hâ xawe. Tae-i ǃaroma? ǀNîn ge “ûib ǂâiǂhâsendi xa ra ǂkhabuǂâi” tsî ǁkhāsi-en ūhâ tama khami ra tsâ Jehovaba ǃoabasa. (Luk. 21:34) ǀNîn ge ǃgâsan ǀhaohâb ǃnâ ra mî tsî dī xūn xa ge tsūbahe. (Jak. 3:2) ǀNîn ge kai ǁorena ge dī tsî ra tao huiba ǂgansa. Mati ǀgui i ga ī xawets nēsi tae-e dī ǁkhā nēsits ga Jehovab omaris ǀkha ǀguiba ǃoaba tama io? Xoremarib tsî Jehovabats ūba hâ ǀnamma tae-e ra ǂkhâǃnâ tsi dīsa?

15. Jehovaba mati ra ǁgau ǁîba ǃoaba ǀûhân matib ra tsâ ǃkhaisa? (Esekiel 34:​11, 12, 16)

¹⁵ Jehovab ǁîba ǃoaba ǀû hân xa ra tsâǀgaub xa ǂâi re. ǁÎb ge ǁîn ǀkha ǁaixa tama hâ tsî ǁîna ǀuru tama hâ xaweb ge ǁîna ra ôa. ǁÎna gagasise ǂûma tsîb ge ǁîna ra hui în oaǀkhī. (Khomai re Esekiel 34:​11, 12, 16 sa.) Jehovaba sats tsîna ǁkhā xū-e a dība ǁkhā? Îo. Sats nē ǁkhāǁkhāǃâsa ra khomai ǃkhais ge ra ǁgau ǁîbats noxopa ra ǃoaba ǂgaosa. Jehovab ge sats ǃnâ ǃgâi xū-e ge mû tsî ǁnās ǀkha ge hui tsi îts ǁîba ǂan tsî ǁîb khoen di ǃâ kai. ǁÎb ge nēsis tsîna sats ǃnâ ǃgâi xūna ra mû tsî ra ǂhâba îts ǁîb omarisa ǃoa oaǀkhī.

16. Jehovaba ǃoaba ǀû hâ khoe-e mati a hui-e ǁkhā? (Ai-īsiba mû re.)

¹⁶ Oa hā re Jehovaba ǃoa ti hâ ǂkhanib ǃnâ hâ saora ǂkhâǃnâ ra mîdi xa ǂâiǃgâ re: “ǂGomǃgâsiba ūhâ re Jehovab nî hâba tsisa ǁîb ǃoats ga oaǀkhī o. ǁÎb ge nî hui tsi îts ǂhansenaide sîsenǂam, îts ǀhapitsâsensa ūbē, îts ǂkhîba hō tsî ǃanu ǃgâi ǂâisa ūhâ ǂgaoba ūhâ ǁkhā. ǁNās ge ǁkhoreba nî mā tsi îts Jehovaba ǁkhawa ǃoaba nau ǃoaba-aon ǀkha.” ǂÂis ǃnâs tsîna ūhâ re ǀhaohâb ǃûi-aogu ge māsenxase ra hui tsi ǂgao. ǁÎgu ge ‘ǀgaisa ǂoab ǃnâ sâuǃkhaise nî ī; ǀgaisa ǀnanub ǃnâ ǃgareǀuise.’ (Jes. 32:2) ǂAn da ge a sats xoremariba ra ǃgôaǃgâsa, ‘tsîts Jehovaba nēsa ra ǁgau ǂgaosa. ǁNās ǀkha dîsen re: Tae-e da nēsi a dī ǁkhā î da ǀgaisa ǀhōsagusisa Jehovab ǀkha ūhâ? (Jes. 1:18; 1Pet. 2:25) ǀHaodets Sali dawa a hâǃnâ ǁkhā? ǀHaohâb ǃûi-aogu ǀguibats a mîba ǁkhā huibats ǂhâhâsa îts Jehovaba ǃoa oaǀkhī? ǁÎb ge ǀnîsi khoe-e a ǁgaumâi ǁkhā î-i sats ǀkhā Elobmîsa ǁkhāǁkhāsen. ǂGomǃgâsibats ge a ūhâ ǁkhā ǁîba ǃoa oaǀkhīs ǃaromats ra dī ǁgutsâdi hoadeb nî ǀkhaesa.

TAE-ETS NÎ DĪ?

17-18. Mati da sida ǁaeba ǃgâise sîsenū ǁkhā Jesub ǁōb di ǂâiǂâisen aiǃâ?

¹⁷ Jesub ge ge mî Jehovab ge ǁîba sîsa îb ǁîb ûiba xoremarib ase mā, îb “ǁîb ǃnâ ra ǂgomn hoan kāǁō tide, xawen nî ǀamo ûiba ūhâse.” (Jhn. 3:16) Jesub ge a ǁōba da amagab ge Jehovaba ǁoreb tsî ǁōb tsîna xu a ǃnorakai da ǁkhā. Tātsē da ge xoremariba da ūba hâ ǃgôaǃgâsiba ǂoaǃnâ ǂgao tama hâ. (Rom. 3:​23, 24; 2Kor. 6:1) Jesub ǁōb di ǂâiǂâisens wekheb ǃnâ ǁaeba ū tsî ǂâiǃgâ re Jehovab tsî Jesub tsîn ge ǁgau ǀnammi xa. Nēs ge nî ǂkhâǃnâ tsi îts ǃgôaǃgâsiba ǁgau.

¹⁸ Matits xoremariba ǃgôaǃgâsiba nî ǁgau? Sa ǃereams ge naun di ǃereamde xu nî ǀkhara. ǂGomǃgâsibats ge ūhâ ǁkhā Jehovab sa ǁgūtsâdi tsî ǃhūbaib ǂhawese hâ ǃgâsan ǁgūtsâdi hîna “ǁîn ǀguina ûibasen tama” xawe ǁîb hîna ge ǁō tsî ǁōba xu khâib ǀguiba ra ûibasa.—2Kor. 5:15.