Tae-i ǃaroma da Xoremariba ǂhâhâ?

1-2. Tae-i ǃaroma da khoe-e ǂhâhâ ǃnorakai da nî-e? (Romeǁîn 7:​22-24) (Ai-īsiba mû re.)

NĒ MÂSIBA mûnan-ai re. Aob hâǃnâ ommi ge ra ǁnā tsîb ge a ǂoaxa ǁoa. ǁÎb ge a ûitsama xaweb ge a huisen ǁoa. ǁÎb a dī ǁkhā xū-i ge huiba ǂgansa tsî ǃâubasensa î-i khoe-e ǁîba hā ūǂui.

² ǁNā aob khami da ge sada tsîna ǁkhā mâsib ǃnâ hâ. Mâǀgaub ǃnâ? Adammi ge Jehovaba a ǁnâuǀnamoǃnâ ob ge ge ǁore-ao kai. ǁÎb suriba xu da ra hā amaga da ge sada tsîna a ǁore-ao. Hoa khoesib ge ǁoreb xa xaǂgāhe hâ, ǂguro xoaǀgoras ǃnâ goro mîhe aob aiǁgaus khami. ǁÎb khammi da ge sada tsîna khoe-e ǂhâhâ î da ǃnorakaihe. Romeǁîna ǃoab ge xoa ǂkhanis ǃnâb ge Pauluba ge mî, hoa da ǁoreb ǃkhōsis ǃnâ hâsa. (Khomai re Romeǁîn 7:​22-24 sa.) ǁÎb ge ge dî, ham-e ǁîba nē mâsiba xu nî ǃnorakai? Paulub ge Adamma xu ǁoreba ge ǀûmi, ǃkhais ǃaromab ge ǁîba ge ǁō. (Rom. 6:23) Sada tsîn ge ǁkhā mâsib ǃnâ hâ. Sada tsîn ge khoe-e ǂhâhâ, ǁōb tsî ǁoreba xu nî ǃnorakai da-e.

3. Xoremariba mâǀgaub ǃnâ nî ore da?

³ Paulub ge hâǃnâb ge hâ i mâsib xab ge mî toa, o ǃâubasensa ge mā da. “Tare-e nē soros ǁōb disa xu nî ore te?” tib ge dîs khaoǃgâb ge Pauluba ge mî: ‘Eloba ta ra gangan Jesub Xristub ǃKhūb diba.’ (Rom. 7:25) Paulub ge Jesub ǁguibas xa ge ǃhoa.a Xoremarib ǁguibas ge ra īǁkhā kai (1) îb Jehovaba sada ǁorena ǀûba, (2) î da hānîǁaeb ǃnâ ǀoasa kurusa ūhâ tsî (3) ǀgū ǀhōsagusisa Jehovab ǀkha a ūhâ ǁkhā. Nē xūn xa da ge ǃnāsase nē ǁkhāǁkhāǃâs ǃnâ nî ǁkhāǁkhāsen. ǂGomǃgâsiba da ge a ūhâ ǁkhā nēs Jehovaba da ūba hâ ǀnamma nî ǀgaiǀgaisa. ǁÎb a “Elob ǃâubasens” di xui-ao. (Rom. 15:13) Nēs tsîn ge nî ǂkhâǃnâ da î da Jesuba ǃgôaǃgâsiba ǁgau, “ǁîb ǃnâ da ores ǁoren ǀûbasa” ra hō amaga.—Kol. 1:14.

XOREMARIB ǁOREN ǀÛBAS

4-5. Tae-i ǃaroma da hoa da xoremariba ǂhâhâ? (Aoǁnâ-aob 7:20)

⁴ Xoremariba da ge ǂhâhâ îb Jehovaba sida ǁorena ǀûba. Mî tamas ka io da ra dī xūn ǃnâ da ge hoa da ra dīsā. (Khomai re Aoǁnâ-aob 7:20 sa.) ǀNî ǁoren ge a ǀgaisa. Aiǁgause, Moseb ǂhanub ge ra mî, Israelǁî-i ga ǃgammekhôa tamas ka io nau khoe-e ǃgam, oi ǁî-i tsîna nî ǃgamhesa. (Lev. 20:10; Num. 35:​30, 31) Xawe hâs ge ǁoreb ga ǀgaisa tama i xaweb ge a ǁore. Aiǁgause, Davidi ge ge mî: “Ti daoga ǃûi, tsî ta ge ti namsa ǁoreba xu nî ū-oa.” (Psa. 39:1) Nēs tsîn ge ra ǁgau sida mîdi ǃnâ-ū da a ǁore ǁkhāsa.—Jak. 3:2.

⁵ Sats tsîna khoe-e xū-e mî tsâ hâ tsî ēga ge ǃhausen? ǃKharuge ǁaeb ǃnâ da hoa da ǃhausen kai da ra xū-e dītsâ hâ? Hoa da ge tsū xū-e mî tsî dītsâ hâ. Elobmîs ge ra mî: “Tsî sada ga ǁore-e da ūhâ tama ti mî, o da ge ǁî-aitsama ra gāsen tsîb ge amaba sada ǃnâ a ǀkhai.”—1Jhn. 1:8.

6-7. Tae-e ge īǁkhā kai îb Jehovaba sada ǁorena ǀûba? (Ai-īsiba mû re.)

⁶ Sida ǁorenab nî ǀûbas ǃaromab ge Jehovaba, Jesuba ge sî îb sida ǃgao hā ǁō. (Efe. 1:7) Jehovab ge sada ǁorena xoremarib ǃaroma ra ǀûba. Xawes ge nēsa ǂâibasen tama ǁîb sida ra dī ǁoren ǀkha ǁae tama hâsa. Jehovab ge ǁoreba ǃhui hâ. (Jes. 59:2) Jehovab a ǂhanu-ai amagab ge xū-e ge dī îb sida ǁorena ǀûba ǁkhā.

⁷ Moseb ǂhanub ge gere ǂgaoǀkhā î-i Israelǁaes khoe-e xamanni-i ǁguibasa ǁî-i ǁoreb ǃgao ǁguiba. (Lev. 4:​27-31; 17:11) Nē ǁguibadi ge ǁgauǁgaus ase ge î-i, ǁgau gere te Jesub ǁguibas tae-e hā nî dīs tsî mâ ǀkhaega nî hausa. Jesub ǁguibas ge ge īǁkhā kai îb Jehovaba ǁorena ǀûba. Paulub ge mâ ǃgâigu Jesub ǁguibasa xu nî hāsa gere ǁnâuǃā. Korintes ǃnâ hâ Xristeǁîna ǃoab ge xoa, ob ge ǃkharu ge ǁaeb ǃnân gere dī ǁgai xūna ǂgaikhâi toa tsî saorase ge mî: “Xawe du ge ǃKhūb Jesub Xristub di ǀons tsî sada Elob di Gagab ǃnâ ǁāhe, ǃanuǃanuhe tsî ge ǂhanu-ai kaihe.”—1Kor 6:​9-11.

8. Jesub di ǁōb ǂâiǂâisensats nē kuri ra aiǂhomi hînats tae-e a ǂâiǃgâ ǁkhā?

⁸ Jesub di ǁōb ǂâiǂâisensats nî hâǃnâs aiǃâ ǁaeba ū tsî ǂâiǃgâ re Jehovab ǀûbaǀnamxasib tae-e satsa ra ǂaibasenba ǃkhaisa. Aiǁgause, xoremarib ǃaroma i ge ǃkharu ge ǁoreb xa ǀhapitsâsensa ǂhâbasa tama hâ ǀnaits ge ǃhobasenba amaga. ǃGombahe its a ǂgomsa amabes ǃnâts ge ǃkharu ge ǁaeb ǃnâts ge dī ǁorena ǀûbahesa? ǀNîsits ge ra mîbasen ǁnâuǃā ta ge ra Jehovab a ǀûba ǁkhā ǃkhaisa xawe ta ge aitsama a ǀûbasen ǁoa. ǁNatits ga tsâo nēs xa ǂâi re, Jehovab ge ra ǀûba tsîb ge ǁîb ǀgôab Jesuba aiǂhanuba ge mā îb ǀgoraǃgâ da. Jehovab ge sats tamas ka io nau khoesiba mā-am tama hâ în ǁhûi ham-i nî ǀûba nî tamas ka io ǀûba nî tidesa. Elobmîs ge ra mî: “Xawe da ga ǃnâb ǃnâ ǃgû, ǁîb ǃnâb ǃnâ hâ khami, ob ge ǁîb ôab Jesub Xristub di ǀaoba sada hoa ǁorena xu ra ǃanuǃanu.” (1Jhn. 1:​6, 7) Nēs a amasa da ge a ǂgomǃgâ ǁkhā nau Elobmîs ǁkhāǁkhāde da ra ǂgomǃgâ khami. Xoremarib ge ra īǁkhā kai îb Jehovaba ǀûba da. Elobmîs ge ra mî: ǁîb ge a “ǀûbaǀnam.”—Psa. 86:5.

XOREMARIB GE GE ĪǁKHĀ KAI Î DA ǀOASA KURUS ǃÂUBASENSA ŪHÂ

9. Elobmîs ǃnâ ǁoreb ti hâ mîsa tae-e ra ǂâibasen? (Psalmdi 51:5)

⁹ Elobmîs ǃnâs ge “ǁoreb” ti hâ mîsa, dīga ǃoa ǀgui ǁnaeǁgau tama hâ xawe ǃnaeǃnâ da ge mâsiba ǃoas tsîna ra ǁnaeǁgau. (Khomai re Psalmdi 51:5 sa.) ǁOreba da ge ǀumi amaga da ge ǀnî ǁaegu ai ǁgai ǂâin tsî tsū dīgu ǀguiga dī tama. Xawe sida di soros ge Jehovab ge kurusi khami sîsen tama hâ tsî da ge ǀaesen, kaira tsî ra ǁō. Nēs ǀkhan ge ǃnaera ǀgôaron tsîna ǁore taman hâ ī xawe ǀaesen tsî ra ǁō. ǁGau i ge ra ǃgâi khoen tsî tsū khoen tsîn hoan tae-i ǃaroma ǃgomsin tsî ǁōb tsîna ra hōǃâsa. Adammi ǁoreb ǃaroma da ge hoa da nē ǁgai mâsib ǃnâ hâ.

10. Adammi tsî Evas hâra mati gere tsâ ǁore ra ges khaoǃgâ?

¹⁰ ǂÂi re matib ge Adammi tsî Eva hâra gere tsâsa ǁore ra ges khaoǃgâ ra ge ǀoasa kurusa a ǂoaǃnâo. ǁOreb ge ǁîra ǀoasa tsâsiga ǁgai ǀgaub ǃnâ ge tsâǀkhā. ǁOre ra ges khaoǃgâ ra ge Adammi tsî Eva hâra ǁgaise ge tsâ tsoatsoa. Jehovab ǂhanub ǁîra ‘ǂgaogu ai ge xoasa’ îba ra ge ǁnâuǀnamoǃnâ amaga. (Rom. 2:15) Xū-i ǁîra ǃnâ ǃgâi tamasa ra ge ge hōǃâ tsoatsoa. Mûǂan ra ge o ǀōǀkhāse ra hâsa, o ra ge ǁîra di sorode ana ai tsî ǁîra Kuru-aoba xu gere sâusen. (Gen. 3:​7, 8) ǂGuroǃnās ase ra ge Adammi tsî Eva hâra ǀhapixase tsâ, tao tsî gere ǂâiǂhansen. Nē tsâsiga ra ga hōǃâ hâs ge ǁōra nî tsēs kōse.—Gen. 3:​16-19.

11. ǀOasaoǃnâ kurusa mati ra tsâǀkhā da?

¹¹ Sida tsîn ǀoasaoǃnâ kurusa ūhâ amaga da ge ǀnî ǁaegu ai ǀhapitsâsen, tao tsî ǂâiǂhansens mâsiga ūhâ. ǂKhabuǂâis tsâsigu tsî tsûb tsîn ge ǀoasaoǃnâ kurus xa ra ǃaromahe. Sida ûiba ǃgâiǃgâi tsî da ga ǃgomsina xu a ǂgōsen xawe da ge noxopa ǃgomsina nî hōǃâ. Tae-i ǃaroma? Elobmîs ge ra ǁguiǃā Adammi tsî Evas hâra xu da ge ǁoreba ǀumi amaga da khoesib ase ǃgomsina nî hōǃâsa. (Rom. 8:20) Nēs ge sada ǀgui da tsâǀkhā tama hâ xawe hoa khoesib tsîna. Aiǁgause, ǂhanub ge ra dītsâ î-i ǃhūbaiba kōǃgâhe, ǂkhabadiba ǀam, hoa khoena ǂhân hâ xūna ūhâ tsî torob tsîna ǀam kai. Xawen ge nē ǃgomsina ǀamsa hōba tama. Xawe da ge xoremarib xa ama ǃâubasensa ra māhe.

12. Xoremariba tae-e ra īǁkhā kai?

¹² Xoremarib ge ǃâubasensa ge mā ‘kurus nî kāǁōsib di khobosisa xu ǃnoraǃnorahesa.’ (Rom. 8:21) Nēs ge ra ǂâibasen paradais ǃnâ da ga ǀoasa kurusa ūhâ, o da ǁkhawa ǀaesen tamas ka io ǂâiǂhansens tsâsiga ūhâ tidesa. Tātsēs tsîna da ge ǀhapitsâsens tamas ka io ǂâiǂhansens tsâsiga ūhâ tide. Jesub ‘ǂKhîb di Gao-aob’ hîna ge xoremariba a mātareb ge nî ǂgaeǂgui. ǁÎb ge khoesiba nî hui în aitsaman oresa a hōba ǁoa ǃgomsina xu orehe.—Jes. 9:​6, 7.

13. Jesub ǁōb di ǂâiǂâisensats nî hâǃnâs aiǃâts tae-i tsîna a aiǂhomi ǁkhā?

¹³ ǀOasa kurusats ga ūhâ, ob ûiba nî ī ǀgauba mûnan-ai re. Tsēs hoasats ga khâimâ ots ge ǃgâise nî tsâ. Tsîts ge sats tamas ka io sa ǀnamsabe-i ǂâusa ǂû-e ūhâs, ǀaesen hâs tamas ka io nî ǁōs xa ǂâiǂhânsen tide. Nēsis tsîna da ge ǂkhîba a hōǃâ ǁkhā. “Sida di ǃâubasens hîa anker-i , ǁaposa tsî ǂgomǂgomsa-i” ai ǃgaoǃgaohe hâ amaga. (Heb. 6:​18, 19) Ankeri ǂgauba ra ǃkhōmais ǁkhās khami i ge Xristeǁî-i ǃâubasensa ǁî-i ǂgomsa a ǀgaiǀgai ǁkhā. Tsî a hui-i ǁkhā î-i mâǀgai. ǃGomsigu ǃnâts ge amase ǂgomǃgâsiba a ūhâ ǁkhā, Jehovab “ǁnān ǁîba ra ôana ra mādawa-am ǃkhaisa.” (Heb. 11:6) Nēsits ge ǁkhaeǂgaosa hō tsî ama ǃâubasensa hāniǁaeb xa ūhâ ǁkhā. Xoremarib nēsa ra īǁkhā kai amaga.

XOREMARIB GE ǂKHÎBAGUSA RA ĪǁKHĀ KAI

14. ǁOreba mati Jehovab ǀkha da ūhâ ǀhōsagusisa ge tsâǀkhā tsî tae-i ǃaroma?

¹⁴ Adammi tsî Eva hâra ge ǁores khaoǃgâ i ge khoesiba Jehovab ǀkha ǀgū ǀhōsagusisa ūhâ tama. Elobmîs tsîn ge ra mî khoesib Eloba xu a ǃnūsa. (Rom. 8:​7, 8; Kol. 1:21) Tae-i ǃaroma da ti ra mî? Jehovab ge ǀoasa kurusa ūhâ tsîb ge ǁnās ǀkha ǁoreba ǃhui hâ. Elobmîs ge Jehovab xa ra mî: “Sa mûra kom a ǃanuo, ǂkhawadība kōǀîs ǃaroma tsîts kom tsūdīga mûǃhara ǁoao.” (Hab. 1:13) Khoesib ge ǀoasaoǃnâ kais khaoǃgâ i ge ǁîn Jehovab ǀkha ūhâ ǀhōsagusisa ge ǁgaiǁgaihe. Khoe-i xare-i tsîn ge Jehovab ǀkha ǀgū ǀhōsagusisa a ūhâ ǁoa, ǁgaiǁgaihe ge xū-i nî dī-unuhes kōse. Xoremarib ge amase nē ǁgaiǁgaihe hâ xū-e ge dī-unu tsî ge īǁkhā kai î da ǁkhawa Jehovab ǀkha ǀgū ǀhōsagusisa ūhâ.

15. Jesub ǁōba mati ge īǁkhā kai îb khoesiba Jehovab ǀkha ǁkhawa ǀhōsagusisa ūhâ?

¹⁵ Elobmîs ge ra ǁgau Jesub a ‘ǂkhîbagus’ ǁguibasa sada ǁoren ǃaroma. (1Jhn. 2:2) Jesub ǁguibasa mati ge īǁkhā kai îb khoesiba Jehovab ǀkha ǀhōsagusisa ūhâ? Jesub ǁōb ge ge īǁkhā kai îb khoesiba Elob ǀkha ǂkhîbagu tsî ǁîb ǀkha ǀgū ǀhōsagusisa ūhâ. (Rom. 3:​23-26) Jehovab ge Xristub ǁōb aiǃâ, ǁîba ǂgomǂgomsase gere ǃoaban tsîna ǂhanu-ai khoen ase gere mû. (Gen. 15:​1, 6) Nēsa mati ge īǁkhā i? Hānîǁaeb ǃnâ nî mātare-e xoremarib ǁguibas ǃaroma. Jehovab ge ǂgomǃgâsiba ge ūhâ i Jesub xoremarib ǁguibasa nî māsa. (Jes. 46:10) Xoremarib ge ge īǁkhā kai îb khoesiba ǂkhîbagusa Elob ǀkha ūhâ.

16. Tae-i tsînats noxopa a ǂâiǃgâ ǁkhā Jesub ǁōb ǂâiǂâisens aiǃâ hâ tsēdi tsî wekhegu ǁaeb ǃnâ? (Ai-īsiba mû re.)

¹⁶ Jehovab ǀkhats ǀgū ǀhōsagusisa ūhâ amagats ge ǁkhoaxa ûiba ūhâ. Aiǁgause, Jesub ge ǁkhāǁkhā da khami da ge Jehovaba “Sida Îtse” ti ra ǂgai. (Mat. 6:9) ǀNî ǁaegu ais tsîna da ge Jehovaba “ǀHōsab” ase ra ǁnaeǁgau. Jehovaba da ga ti “ǁGû” tamas ka io ti “ǀHōsa” ti a ǂgai o da ge nēsa ǃgam ǃgôasib ǀkha nî dī. Tae-i ǃaroma? ǁOre-ao da a amaga da ge Jehovab ǀkha ǀgū ǀhōsagusisa a ūhâ ǁoa. Xoremarib ǀguib ge ge īǁkhā kai î da Jehovab ǀkha ǁkhawa ǀhōsagusisa ūhâ ǁkhā. Jesub ǃnâ-ūb ge Jehovaba ge īǁkhā kai “xūnab nî ǁîb di ǃgâuhaib . . ǃnâ-ū . . ǂkhîbagu” kaise. (Kol. 1:​19, 20) ǁNā-amaga da ge ǀgū ǀhōsagusisa Jehovab ǀkha a ūhâ ǁkhā, nēsi da ǀoasaoǃnâ kurusa ūhâ xawe.

XOREMARIB GE JEHOVAB ǀKHOMXASIBA RA ǁGAU

17. Xoremariba mati ra ǁgau Jehovab a ǀkhomxaǃnâsa? (Efeseǁîn 2:​4, 5)

¹⁷ Xoremarib ge ra ǁgau Jehovab a ‘ǀkhomxaǃnâsa.’ ǁÎb ge “Xristub ǀkha ge ûi kai da, ǀkhomma xus ge ǃgâiǃō kaihe da gesa.” (Khomai re Efeseǁîn 2:​4, 5 sa.) “ǁNān ǀamo ûiba ǃoa ǃkhōǂuibasenhe” hân ge huiba ra ǂgan, mûǂanan ra amaga ǁoreb ǃkhōsis ǃnân hâsa tsîn orehesa ǂhâhâsa. (ǃNǃkh. 13:48) Jehovab ge nē khoena ra hui în ǃgâiǂhôas Gaosib xa hâs xa ǁkhāǁkhāsen tsî nēs ǃnâ-ū ǁîb tsî ǁîb ǀgôab Jesub tsîn xa ǂan. (Jhn. 17:3) ǁGâuab ge ge ǂâihâ i Adammi tsî Eva hâra ǁoreb Jehovaba nî ǁkhaesa ǁîb ǂâisa dīǀoaǀoasa.

18. Xoremarib xa da ra ǂâiǃgâ ǁaeb ai da tae-e ǂâis ǃnâ nî ūhâ?

¹⁸ Xoremariba xu da ra hō ǃgâigu xa da ga ǂâiǃgâ ǁaeb ai da ge nî ǂâihō, tae-i ǃaromab ge Jehovaba nē ǁguibasa a māsa. Jehovab ge xoremariba sâudab nî ǃkhais ǃaroma ǀgui mā tama. Xawe ǀnî hâ ǂhâǂhâsa xū-eb nî dī ǃkhais ǃaroma ge mā. Xoremarib ǃnâ-ūb ge Jehovaba, ǁGâuab ge Edenni ǃhanab ǃnâ a dî dîsa ra ǃeream. (Gen. 3:​1-5, 15) Xoremarib ǃnâ-ūb ge Jehovaba ra ǁgau, ǁGâuab ge ǁîb xa a mî ǂhomib ama tamasa. ǁÎb ge ǁōb tsî ǁoreba xus tsîna ra saû da, nēs ǃnâ-ū ra ǁgause ǁîb a ǀnammi Elosa. Anu tama da hâ ǃgâisib ǁîb dib ǃnâ-ūb ge Jehovaba ǁore-ao da ga xawe ge mā-am î da ǁGâuab ǂhumib ama tama ǃkhaisa ǁgau. (ǂKhm. 27:11) Mati da a ǁgau ǁkhā xoremariba da ra ǃgôaǃgâsa? Nē dîsa da ge saora ǁkhāǁkhāǃâs ǃnâ nî ǃeream.