ǀKhurub—Elobmîsa tae-e ra mî?

“Chinab ge ra ǃnuri nē kurib ǃnâb kaise ǀgaisa ǀgammi tsî 3ǁî ǂnāsa ǁaeba hâ isa.”—The Guardian ǂhôan ǂkhinib, Septemberi 7, 2022.
“Saoguraseb ge Afrikaba 5 kurigu ǃnâ aiǃgura ǀkhuruba ra hōǃâ.” UN ǂhôan, Augustub 26, 2022.
“ǀKhurub di ǁkhōǁkhōsasib ge Europi ǃkhare ǃâb xa ǃnāsase ra hōǃâhe. Tsî nēb ge nau ge hâ i ǀkhurugu xa a ǀgaisa, 500 kurin ǃnâ.”—BBC ǂhôan Augustub 23, 2022.

ǂAnsa ūhâ khoen ge ra mî nēti i ǀkhurub aiǃgû tsî ǁgais ǀguisa nî hîsa. ǃGâi ǃâubasen sa da hānîǁaeb ǃaroma ūhâ? Elobmîsa tae-e ra mî?

ǀKhurub tsî Elobmîs Kēbodi

Elobmîs ge ra mî:

‘ǃKharagagu ǃkhaidi ai i ge . . . ǃâtsūǀkhāga nîra ī.’—Lukab 21:11.

ǀKhurub ge ǃnāsa ǁaeba ǂû-i ǃnubusiba ra ǃaroma. Nēti i ǂû ǃnubusigu, ǃgomsin tsî ǁōb hîna ǀkhurub xa ra ǃaromaheb ge Elobmîs kēbode ra dīǀoaǀoa.—ǂHaiǂhais 6:6, 8.

ǀKhuruba tae-i ǃaroma ra ǁgaiǂoa?

Elobmîs ge ra ǁgau tae-i ǃaromab ǀkhuruba ra ǀarosensa. Mîra:

“Khoe-i ǃgû ra-i di ǃkhai tamas ge ǁî-i ǃgûdaoba ǂansa.”—Jeremiab 10:23.

Nēs ge ra ǂâibasen khoe-i ge ǁî-i “ǃgûdaoba” ǂan tamas ka io a ǂgaeǂgui ǁoasa. ǁÎn di ǁgai mîǁguigu ge ǃnāsa ǁaeba ǀkhurub tamas ka io ǁgammi ǃnubusiga ra ǃaroma.

Kurus ǂansa ūhâ khoen tsîn ge ra ǃkhō-am, khoen ra dī xūn ra ǃaromasa î-î ǀkhuruba ǃhūbaib ǂhawase ǀarosen.
Kai ǂgaoxa khoen tanisen ǀgaugu tsî hānîǁaeb xa ǂâi tamasen khoena ra dī mîǁguigu ge ǃgarob, ǁkhōǁkhōsa ham xūn hîna ǃhūbaiba ra ǁgaiǁgain. Tsî ǃhūbaib ūhâ xūna ǃgâi tamase sîsenūs ra ǃaromasa î-î ǁgamme ǀurixa.

Elobmîs ge ǃâubasen sa ra mā.

Hānîǁaeba tae-i ǃâubasen sa ūhâ?

Elobmîs ge ra mîmâi, Elob nē hâ ǁgammi ǃgomsiba nî ūbēsa. Mati?

1. Elob ge ǁnān hîna ‘ǃhūbaiba ra hîkākāna nî hîkākā.’ (ǂHaiǂhais 11:18) ǁÎb ge ǁgammi ǃnubusiba ra ǃaroma ǁgai, kai ǂgaoxa khoen hîna ǃhūbaiba ra ǁgaiǁgaina nî ūbē.—2 Timoteub 3:1, 2.
2. “ǀGamsa ǀgopaǃhūb ge nî ǃkhubi kai.” (Jesajab 35:1, 6, 7) Elob ge ǀkhurub xa ra ǃaromahe mâsiba nî ūbē. Tsî nē ǃhūbaiba ǂâusa ǁgamme ūhâ paradais ǃnâ nî dawa.
3. “Sats ge ǃhūba sari tsî ǃnāǂamsase ra ǃkhū kai.” (Psalmdi 65:9) Elob ǀkhaeb ǀkhab ge ǃhūbaiba ǂâusa ǂû-i tsî ǁgammi tsîna nî ūhâ.