Wunstaxtsēs, Julib 16
ǃKhūb ge gā-ain di ǂâidi a harebeoǃnâ ǃkhaisa ǂan.—1Kor. 3:20.
Khoesi ǂâiǀgauba xu da ge nî ǂgōsen. Xūna da ga khoen di mûǂuib ǃoagu kō o. O da ge Jehovab tsî ǁîb di ǂhanugu tsîna a ǁnāxu ǁkhā. (1Kor. 3:19) “Nē ǃhūbaib di gā-aisib” ǃnāsa ǁaegu ai khoena ra ǂkhâǃnâ, în tā Eloba ǁnâuǀnam. ǀNî Xristeǁîn hîna Pergamums tsî Tiatiras tsîn ǃnâ gere hân ge nē ǃgâi tama hâ ǀgauga ge omkhâi. Jesub ge nē 2 ǀhaohâga ǀgaisase ge ǃkhâikhom, ǁîn ge ǃgâi tama hâ ǁgoe-ūgu ǀgauga gere ūǃoa amaga. (J.ǂHa. 2:14, 20) Nētsēn ge khoena a ǁgari da ǁkhā, î da ǃgâi tama hâ ǂâi ǀgauga ūǃoa. Omaris ǁanin tamas ka io ǀhōsan ge a ǂgom kai da ǁkhā, tsū tama i hâsa Jehovab ǂhanuga ǃgûǂamsa. Aiǁgause, ǁÎn ge ra mî sida turagu ǃnâ mâǁnâsens tsū tama hâsa. Tsî Elobmîs di ǁgaragu a ǃgomsa. ǀNî ǁaegu ai da ge a ǂâi ǁkhā, Jehovab ra māda daoǁgaudi ǃgāsa tama hâsa. ǀNîsi da ge nî ǃâitsâhe î da tā “xoahe gena ǁnâuǀnam.”—1Kor. 4:6. w23.07 16 ¶10-11
Donertaxtsēs, Julib 17
Hoa ǁaen ge ǀhōsana ǀnamma ra ǁgau tsî sa ǃgâsan ge ǂhâb ǃnân nî hui ga ge ǃnae.—ǂKhm. 17:17.
Jesub mamas, Marias ge ǀgaiba ge ǂhâhâ i. ǁÎs ge ge ǃgamme tama hâ i xawes nî ǀgamǀkhā. ǁÎs ge ǀgôa-e kaikais di ǂansa ge ūhâ tama hâ i. Xawes ge nē nî ǃnae ǀgôarob, Mesia kai nîba nî kōǃgâ. Marias ge aorekhoeb ǀkha ge ǁgoeǀhao tsâ tama hâ i. Xawes Josefa ǁîs ǀgamǀkhās xa mati nî mîǃāba? (Luk. 1:26-33) Mariasa ǀgaiba mati ge hō? ǁÎs ge nau khoena xu huiba ge ūǃoa. Aiǁgauses ge Gabriela ge ǂgan, îb ǃnāsa ǃgāsasiba māsi nē ǁgaumâis xa. (Luk. 1:34) ǁAero i khaoǃgâs ge ǁîs ǀaokhoes Elisabetsa “ǃhomxa ǀkharib” Judab dib ǃnâ sī ge sari. Elisabets ge Mariasa ge ǂkhâǃnâ tsîb ge Jehovaba ǁîsa ge hui, îs Mariasa ǁîs ǃnae tama ǀgôab xa hâ kēbosa mîba. (Luk. 1:39-45) Marias ge ge mî, Jehovab ge “ǀgaisa dī-e . . . ǁîb di ǁôab ǀkha” ge dī. (Luk. 1:46-51) Gabrieli tsî Elisabets ǃnâ-ūb ge Jehovaba Mariasa ge ǀgaiǀgai. w23.10 14-15 ¶10-12
Fraitaxtsēs, Julib 18
ǁÎb ge gaosise tsî pristerse ge dī da, ǁîb di Elob tsî ǁGûba nî ǃoabase.—J.ǂHa. 1:6.
ǀOro ǃgôab ǁkhāǁkhāsaben Xristub din ge ǃanu gagab ǀkha ǂhausa, tsî ǀō-aisa ǀhōsagusisa Jehovab ǀkha ūhâ. Nē ǀguikaidisi tsî hakadisihakaǀaǀoadisi (144 000) khoen ge Jesub ǀkha ǀhommi ǃnâ pristerse nî ǃoaba. (J.ǂHa. 14:1) Tabernakeli di ǃanub ge Elob gagasi ǀgôasen ǃhūbaib ai hâ, hînan ūǂgāhe hâsa ra ǂnûǁkhāeba. (Rom. 8:15-17) Haon xa ǃanu ǃkhaib ge ǀhomma ra ǂnûǁkhaeba, Jehovab ǁanǃkhaisa. ‘ǃAnu ǃkhaiba ge hoanxa ǃanu ǃkhaiba xu gere ǀgora lapip ge Jesub sorosa gere ǂnûǁkhaeba, ǁîb ǁgansi soros ǀkhab ge kai ǀGapi pristerse gagasi tempeli ǃnâ ǂgâ ǁoa-isa. ǁÎb ǁgansi sorosab ge khoen ǃaroma ǁguiba, ob ge dao-amde hoa ǂkhauhesa Xristeǁîn ǃaroma ge ǁkhowa-am. ǁÎn tsîn ge ǁîn ǁgansi sorode nî māǁnâ în ǀhomsi mādawa-amsa hōǁkhā.—Heb. 10:19, 20; 1Kor. 15:50. w23.10 28 ¶13