Julib

Jesub ge mî tsî gere dī xūn ǃnâ ǀoasase ǁîb di ǁGûb ǂâiǀgaub tsî tsâsiga gere ǁgae, ǁîb di buruxa dīgu tsîna ǃkhōǂgā hâse. (Jhn. 14:9) Jesub di buruxa dīga xu da tae-e ǁkhāǁkhāsen ǁkhā? Jesub tsî ǁîb ǁGûb tsîn ge kaise a ǀnamda. Jesub ge ǃhūbaib aib ge hâ io ǁîb di kai ǀnamma, buruxa dīgu ǃnâ-ū gere ǁgau ǃgomma ra tsâ khoena huis ǃnâ-ū. ǀNî ǃnā-e kha ge ǀgam ǂgī khoekha ge ǀkhomabi îb hui kha. (Mat. 20:​30-34) ǃGaoǃgâ re, Jesub ge ǁîkha “kaise ge ǀkhom” tsî ge ǂgauǂgau kha. Nēba ra sîsenūhe Grike gowab mîs, “ǀkhom” ti hâs ge ǂgaob ǃgamsib ǃnâ da ra tsâ ǀgauba ǃoa ra ǁnaeǁgau. ǁNā ǀkhomi ǃnâ-ūb ge Jesuba gere ǁgau, khoenab a ǀnam ǃkhaisa. ǁNās ge Jesub tsîna gere ǂkhâǃnâ ǃâ a khoena ǂûmā tsî ǃomamaxa ǁōsa ge ūhâ i khoeba ǂgauǂgau. (Mat. 15:32; Mrk. 1:41) ǂGomǃgâ ǁkhā da ge a, Jehovab “ǀkhomxaǂgaosib” di Elob tsî ǁîb ǀGôab tsîn kaise a ǀnam dasa. Tsî sida ǃgomsigu xa tsūse ra tsâsa. (Luk. 1:78; 1Pet. 5:7) ǁÎkha ge ra ǁkhore, ǃgomsin hîna khoesiba ra tsâǀkhāna ūbesa. w23.04 3 ¶4-5

Tsî da ge ǃgarise a dītsâ ǁkhā, î da tā ǁGâuab ǃhūbaib ǃnâ hâ ǂâiǀgaugu xa khomai tsî ǃâ. Sida ǂâide da ge ǃanu ǂâidi ǀkha a ǀoaǀoa ǁkhā. Elobmîsa khomais tsî ǁîsa ôaǃnâs ǃnâ-ū. ǀHoade hâǃnâs tsî aoǁnâ sîsenni ǃnâ ǁhaos tsîn ge sida ǂâiǀgauba a ǁkhauba ǁkhā. Jehovab ge ra mîmâiba da, ǁÎb ǁkhā da as ǂamai ǃâitsâhe mā-am tidesa. (1Kor. 10:​12, 13) Sida hoa da ge ǃnāsase nî ǀgore, î da nē ǃgom ǀuniga tsēdi ǃnâ ǂgomǂgomsase hâ Jehovab ǃoagu. Mâ tsēs hoasa ǁaeba ǁamaǂui tsî ǂgaob ǃgamsiba xu ǀgore re. Jehovab ge ra ǂhâba î da ‘ǁîb aiǃâ sida ǂgaoba ǁhōǂui.’ (Psa. 62:8) ǁÎba koa tsî dīb ra xūn hoan ǃaroma gangan re. ǁÎba ǂgan îb hui du ǁkhoaǂgaose aoǁnâsa. Mâ ǃgomsi-i tsî ǃâitsâ-i hoa-i ǃnâ mâǀgais di ǀgaiba ǂgan re. Khoe-i tamas ka io xū-i xare-e tā mā-am î-i Jehovaba ǃoa hoaǁae ǀgoresa ǁkhae du. w23.05 7 ¶17-18

Tae-i ǃaroma da ǀhaode ra hâǃnâ? ǂGuro ǃaromas ge Jehovaba da ra koa ǂgao amaga. (Psa. 26:12; 111:1) ǀKhara ǃaromas ǀhaode da ra hâǃnâs ge, î da sida ǃgâsana ǂkhâǃnâ nē ǃgom ǁaegu ǃnâ. (1Tes. 5:11) ǀHaodi tawa da ga ǃeream, o da ge nē ǀgam xūna ra dī. Xawe xūn ge hâ ǁnāsa a ǃgom kai ǁkhāna, ǃeream ǂgoa da ga, o da ge a ǃao ǁkhā. Tamas ka io da ge ǀnîsi turaba ūhâ ǃereamsa xawe da ge ǃereams ǃēsa hō tama hâ. Tae-e a hui da ǁkhā nē ǃgomsiga sîsen ǂamsa? Apostel Paulub ge ge mî, î da ‘ǂkhâǃnâgus’ ai sida di ǂâisa ǂnûi. Mû da ga o naun mati ra ǂkhâǃnâhesa, sida di ǂgomsa da ǃnubu ǃereamdi ǃnâ-ū ra ǁguiǃā ǀgauba, o da ge nî ǂkhâǃnâhe ǃnāsase ǃereamsa. Tsî da ga ǀnî ǁaegu ai ǃereams ǃēsa māhe tama io, o da ge nî ǂkhî naun ǃēsa ra māhe amaga în ǁîn tsîna ǃeream ǁkhā.—1Pet. 3:8. w23.04 20 ¶1-3

Gao-aob ge ge mā-am în Jodeǁîn hîna Babilons ǃnâ 70 kuriga ǃkhosis ǃnâ ge hâ îna, Israela ǃoa oa. (Esr. 1:​2-4) Jehovab ǀguib ge nēsa ga īǁkha kai hâ. Babilons ge ǂgui ǁaegu ai ǁîs di ǃkhōsabena ge ǁnāxu tama hâ i. (Jes. 14:​4, 17) Babilons ge danhe toas khaoǃgâ, î ge ǀasa ǂgaeǂgui-aoba ge hâ i. Tsîb ge ǁîba Jodeǁîna ge mā-am în Babilonsa xu ǂoa. Mâ Jodeǁî-i hoa-i tsî oms di danagu tsîn ge ǂhâǂhâsa mîǁguiba ga dī hâ, Babilonsan nî ǁnāxu tamas ka ion ǁnāpa nî hâsa. ǁNāti-i mîǁguiba dīs ge ge supu tama hâ i. Kairasib xa ǃaromahe hâsen ge ǂguina ge oa ǁoa-i. ǂGui Jodeǁîn tsîn ge Babilons ǃnâ ge ǃnaehe tsîs ge ǁnāsa ge ǁîn di omm-i. Israeli ge ge ǁîn di om tama hâ i xawe ǁō gen di om ge ī. ǀNî Jodeǁîn ge Babilons ǃnâ kaise ge ǃkhū tsîn ge ǀnîsi ge ǃgombahe i ǁîn di omdi tsî mari kuru ǃkhaiga ǁnāxu tsî ǀūn ge ī ǃās ǃnâ sī hâsa. w23.05 14 ¶1-2

Elobmîs ge ra ǂkhâǃnâ da î da aiǃgû tsî mâǀgaixasib, ǀkhomxaǂgaosib, ǀnammi tsîna omkhâi. Lukab 21:19 ge ra mî: “Mâǁapo, o du ge ama ûiba nî hōbasen.” Koloseǁîn 3:12 ge ra mî: “Taniǀnamxasib di ǂgaob ǀkha ǂgaeǂgāsen re.” Tsî 1 Tesalonikaǁîn 4:​9, 10 ge ra mî: “Elob ge aitsama sado ǀnamgu du nî ǃkhaisa ǁkhāǁkhā amaga. . . xawe ta ge ǃgâsado, ra ǀkhoma du ǃaruǀîǀgui du nî nēsa ǃnāǂamsasib ǃnâ dī ǃkhaisa.” Nē mîdi ge ǁkhāǁkhāsaben hîna ǀnai mâǀgaixasib, ǀkhomxaǂgaosib tsî ǀnammi tsîna gere ǁgauna ǃoa ge xoahe. Xawen ge aiǃgû tsî nē ǀgauga ga omkhâi hâ. Sada tsîn ge ǁkhā xū-e nî dī. Sado huis ǃaroma du ge nî ǃhoaǃgao, matin ge ǂgurokam ǁaeb Xristeǁîna mâǀgaub hoab ǃnâ nē ǀgauga gere ǁgau ǀgausa. ǁNāpaxū du ge nî mû, mati du ǁnā Xristeǁîna a ǁgae ǁkhā ǀgausa. Tsî ǀams ai nî ǁgau, kai ǂōǂōsib ǃaroma du aiǂhomisen hâsa. Tsîb ga kai ǂōǂōsiba tsoatsoa, o du ge ǀnai a aiǂhumisa. ǁKhāǁkhāsen du go amaga mati du nî mâǀgaisa tsî nî mîǁguisa mâǀgai ǀgara du nîsa. w23.07 3 ¶4, 8

Nēsi da ga ǂkhauhesan tamas ka io “ǀnî gūn” di ǃâ xawe da ge sida hoada “ǃanu daob” ai nî hâ ǀgara. ǁNā daob gagasi paradaisa ǃoa ra ība tsî Gaosib di ǀkhaega nî mā daba. (Jhn. 10:16.) Jesub di ǃnaes khaoǃgâ 1919, î ge miliuns di aogu tsî taradi tsîna Babilons kaisa ǁnāxu tsî ǃanu daob ai ge ǃgû tsoatsoa. Jehovab ge Babilonsa gere ǁnāxu Jodeǁîn di ǃgomsiga gere ūbe. (Jes. 57:14) O nētses di “ǃanu daob” xa? ǂGui kuriga 1919ǁî kurib aiǃâb ge Jehovaba Eloǃaoǃgâxasiba ge ūhâ i khoega ge sîsen-ū, îgu nauna hui Babilons kaisa xu ǂoasa. (ǀGōpeǀnō re Jesajab 40:3.) ǁÎgu ge ǂhâbasa sîsen-e ge dī, ǁnās ge gagasi sîsen-e în ǃgâi ǂgaoba ûhā khoena ama tama hâ ǃoabasa ǁnāxū. Tsî Jehovaba ǁîb di khoen ǀkha ǃoaba. w23.05 15-16 ¶8-9

Jehovab ge ra ǂhâba, î da ǂgaoba xu ǃoaba bi tsî ǁnāsa māsenxase dī. (2Kor. 9:7) ǁNāsa ra ǂâibasen î da gagasi mîǁguib ai sîsen ǂhâba tama da ga ī xawe? Apostel Paulub di aiǁgausa kō re. ǁÎb ge ge mî: “Xawe ta ge ti sorosa ǀgaisase ǃâi tsî ra ǃgādī.” (1Kor. 9:​25-27) Paulub ge ge ǁgarisen îb ǂhanu xū-e dī, ǀkhara xūnab gere dī ǂgao xawe. Jehovaba Paulub ge dī xūn ǀkha ge ǂkhîǂâixa ī? Jehovab ge kaise ge ǂkhî-i. Tsî Pauluba ǁîb di dītsâdi ǃaroma ge ǀkhae. (2Tim. 4:​7, 8) ǁKhā ǀgaub ǃnâ Jehovab ge a ǂkhîǂâixa mûb ga o, sida di mîǁguib ai da ra sîsensa turaba da ūhâ tama hâ xawe. ǁÎb ge ra ǃgâiaǂgao ǂan-i a amaga, ǁnā xū-e da a ǀnam ǃkhais ǃgao da nē-e dī tamasa. Xawe ǁîba da a ǀnam amaga. Jehovab ge Pauluba a ǀkhae khamib ge sida ǁgūtsâdi tsîna nî ǀkhae. (Psa. 126:5) Tsî Jehovab di ǀkhaeba da ra hōǃâ khami da ge turaba nî hōǃâ tsoatsoa. w23.05 29 ¶9-10

Paulub ge ǁnān hîna Jehovab di tsēsa ûiǃkharu tidena ǁom ra khoen ǀkha ra ǀgopeǀnō. ǁÎn ge ǁaeb tamas ka io tae-i ǁîn ǂnamipe ra īsa a ǀū. ǁNās ǀkhan ge ǂhâǂhâsa xū-i ga īo a ǀū tsî xū-e ǁnās xa a dī ǁoa. ǂGui khoen ge nētsē gagasise ǁom hâ. (Rom. 11:8) ǁÎn ge “ǀuniga tsēdi” ǃnâ da ûi hâsa ǂgom tama tsî i kai ǁgâiǀāba ǀgūǁae nî hāsa. (2Pet. 3:​3, 4) Xawe da ge sida a ǂan, mâ tsēs hoas ra ǃkharu khami i haisi-amsa ra ǂhâǂhâsa kai ǃkhaisa. (1Tes. 5:6) Tae-i ǃaroma da ǃnomsa tsî ǃgāsase nî hâ? Nēs ge nî hui, î da tā nē ǃhūbaib di xūn tsî ǂgīǂgōsi xūn tsîn ǃnâ ǀkhā-e ǁhûi. Nē xūn ǃnâ ǃâ-e ūhâs di ǁgâib ge ǀgaisas ǀguisa nî di, Jehovab di tsēs ra ǀgū khami. Xawe da ge ǁîna da nî ǃeream ǀgaub xa ǂâiǂhansen tide. Jehovab di gagab ge nî hui, î da ǃnomsase hâ tsî ǃgāsa ǃgâiǂâis tsîna ūhâ tsî ǃgâi mîǁguiga dī.—Luk. 12:​11, 12. w23.06 10 ¶6-7

Simsonni ǀons xa du ga ǁnâu, o du tae-i xa ra ǂâi? ǁÎb ge ǀgaisa i ǀgaus xa du ge ǀnîsi ra ǂâi. ǁNās ge a ama. Simsonni ge ǁgai mîǁguigu kai tsûba ge ǃaroma ga ge dī. Xawe ǁnās ǂam-aib ge Jehovaba, Simsonni ge ǁîba ǃoabas ǃnâ gere dīn ai ǂâisa ge ǂnûi. Tsîb ge Simsonni ǂgomǂgomsasiba, Elobmîs ǃnâ sida ǃgâib ǃaroma ge xoamâi kai. Jehovab ge Simsonni ǃnâ-ū buruburuxa xūna ge dī, îb Israelǁaesa hui. Tsî 1 000 kuriga Simsonni ǁōb khaoǃgâb ge Jehovaba, apostel Pauluba Simsonni ǀonsa ǂgomǂgomsa khoegu ǁaegu ge xoa kai. (Heb. 11:​32-34) Simsonni aiǁgaus ge a ǂkhâǃnâ da ǁkhā. ǁÎb ge ǃgom mâsigu ǃnâs tsîna Jehovab ai ge ǂgomaiǂnûi. Simsonni di aiǁgaus ge ra ǂkhâǃnâ da tsî ǂgui xūna ra ǁkhāǁkhā da. w23.09 2 ¶1-2

Sada mâǀgaisa da ge a ǀgaiǀgai ǁkhā. Hoaǁae da ga ǀgores ǃnâ-ū, sada di ǂhansenan hoana Jehovab ǀkha ǀgoragu o. (1Tes. 5:17) ǀNîsi du ge nēsi kai ǃgomsiga ūhâ tama hâ. Ti i ga ī, xawe du Jehovaba ǃoa ǀgore tsî huiba ra ǂgan, ǂkhabuǂâi hâse du ga tsâ ǁaeb hoab tamas ka io du ga tae-e du nî dīsa ǀū o? Nēsi du ga hoaǁae Jehovaba ǃoa ǀgore tsî ǂkhari ǃgomsin ǃaroma huiba ǂgan. O du ge îganǀgē tide kai ǃgomsin ga hā o, ǁîb ai huiba ǂgansa. Tsî du ge nî ǂgomǃgâ ǁîb ǃgâise a ǂansa, mâǀgaub ǃnâ sado huisa. (Psa. 27:​1, 3) Kai ǂōǂōsiba da ge a mâǀgai ǁkhā, ǀnai da ga nēsi sida ǃgomsin ǃnâ a mâǀgai o. (Rom. 5:3) Tae-i ǃaroma da ǁnāsa a mî ǁkhā? ǂGui ǃgâsan ge ra mî, mâ ǃnās hoas ain ga ǃgomsin ǃnâ mâǀgai, on aiǂhumisasa hā nî ǃgomsin ǃnâ mâǀgaisa. ǃGomsiban ga Jehovab huib ǀkha a mâǀgai o. On ge ǃnāsa ǂgomsa ge ūhâ i, Jehovab ǁîna ra hui ǂgaosa. Tsîs ge ǂgomsa ǁîna ge hui în hānî ǃâitsâ-e mâǃkharu ǁkhā.—Jak. 1:​2-4. w23.07 3 ¶7-8

Jehovab di ǀgaugu ge a ǀoasa tsî a ǁnâuǃāxa. ǁîb ge ǃgari tamas ka io khoen ǀkha ǁgai ǀgaub ǃnâ hâ tama. Aiǁgause kō re matib ge Jehovaba Isreallîn ǃoagu ǁnâuǃāxasiba a ǁgau ǀgausa. ǃkhū hân tsî ǀgâsana xub ge ǀguidigo ǁguibasa ge ǂgaoǀkhā tama hâ i. ǀNî ǁaegu aib ge mâ khoe-i hoa gere mā-am î-i ǁguibade ǁî-i di mâsib ǃoagu dī. Jehovab di ǃgamǃgamsenxasib tsî ǀkhomxaǂgaosib tsîn ge ra ǂkhâǃnâ bi, îb ǁnâuǃāxa. Aiǁgause Jehovab di ǃgamǃgamsxasib ge ge mûhe ǁkhā i, Sodoms eloxoresa khoenab gere dīkākā ǂgao o. ǁÎb ǀhomǃgāgu ǃna-ūb ge Jehovaba Lota ge mîba îb ǃhomxa ǀhariba ǃoa ǃkhoe. Loti ge gere ǃao ǁnāpa īsa. ǁNā-amagab ge ge ǀkhoma îb ǁîb tsî ǁîb omarisa mā-amhe sâu ǃkhai-e ôasa ǂkhari ǃaros Soars ǃnâ. Hînab ge Jehovaba dîkākāb nî di a mîǁguisa ǃoa. Jehovab ge ǀnîsi Lota ga ǂgaoǀkhā hâ, îb ǁîb ge mîba bi khami ǀgui di. Xawe Jehovab ge Lota ge mā-am îb Soarsa ǃoa ī tsîb ge ǁnā ǃāsa ge dīkākā tama hâ i. (Gen. 19:​18-22) ǂGui kurin gaoǃâb ge Jehovaba, Neneves di ǁanǂgāsaben ǃoagu ǀkhomxaǂgaosiba ge ǁgau. ǁÎb ge kēbo-aob Jonaba ge sî, îb Neneves di eloxoresa khoena sī mîba. ǁÎn tsî ǁîn ǃās nî dīkākāhesa. Xawe Nenevaǁîn ge ǃhobasen ob ge Jehovaba ǁîna ge ǀkhom tsî Nenevesa dīkākā tama ge i.—Jon. 3:​1, 10; 4:​10, 11. w23.07 21 ¶5

Joasi aiǁgausa xu da tae-e a ǁkhāǁkhāsen ǁkhā? ǁÎb ge ǂhēre ǃnomaga ūhâ hais khami ge ī-i, hîna ge ǁnâub ai ǃkhōbasen hâ îba. Jojadab hîna ge ǁîba gere ǂkhâǃnâb ge ǁō, ob ge Joasa Eloba ǃoaba tama khoena ge ǃgâ tsoatsoa. Tsîb ge Jehovaba ge ǁnâuǀnâm ǀû. Nē aiǁgaus ge ra ǁgau, î da tā Jehovaba sida omaris tamas ka io ǀhâohâb ǃnâ hâ khoen ǃgâi aiǁgaude ra ǁgauda, ǃkhais ǃaroma ǀgui ǁnâuǀnam. Jehovab ǀgūse da ga hâ ǂgao, o da ge ǁîba da ūba hâ ǀnammi tsî ǃgôasib tsîna nî ǀgaiǀgai. Elobmîsa tsēs hoasa khomais, ǂâiǃgâs tsî ǀgores ǃnâ-ū. (Jer. 17:​7, 8; Kol. 2:​6, 7) Jehovab ge ǂgui xūna da nî dīsa ǂgaoǀkhā tama hâ. ǁÎb ra ǂgaoǀkhā da xūn ge Aoǁnâ-aob 12:13 ǃnâ ǃkhōǀhaohe hâ, mî rase: ‘Eloba ǃaoǃgâ î mîmādi âba ǁnâuǀnam . . .nēs di ǃaromas khoesib ge ǂnubibahes a ǁî xuige.’ Eloǃaoǃgâxasiba da ga ūhâ, o da ge ǂgomǂgomsase ǁîb ǃoagu nî hâ tsî ǃâitsâna nî mâǀgai. Xū-i xare î ge Jehovab ǀkha da ūhâ ǀhōsagusisa khôa hō tide. w23.06 19 ¶17-19

Jehovab ge nē mîdi ǀkha ra tsoatsoa: “Tsîb ge trons ai ǂnôaba ge mî.” (J.ǂHa. 21:5) Nē mîdi ge kaise a ǀō-aisa Jehovab ge ǂHaiǂhais di ǂkhanis ǃnâ ǃnona ǃnādi ǀguide aitsama ǃhoa amaga. Nē ǁapoǁaposa mîdi ge ǀhomǃgā-i tamas ka io khâisa hōhâ Jesub xa mîhe tama hâ xawe Jehovab xa aitsama mîsa. Nē mîdi ge ra ǂgomǃgâ kai da î da saorase ra mîhe mîde ǂgomǃgâ. Tae-i ǃaroma? Jehovab a “ǂhumi” ǁoa amaga. (Tit. 1:2) Nē mîdi ge ǂHaiǂhais 21:​5, 6 ǃnâ xoasa mîde ra ǁapoǁapo. Grike gowab mîs “mû” ti hâs ge ǂguiǃnāde ǂHaiǂhais ǂkhanis ǃnâ ra sîsenūhe. Eloba tae-e saorase ra mî? “Hoana da ra ǀasa kai,” Jehovab ge nē ǀkharaǀkharana hānîǁaeb ǃnâ nî dī. Xaweb nē mîmâide nî ama dīǀoaǀoasab ra ǂgomǃgâ amagab ge, ǀnaib ge nē ǀkharaǀkharana a dī khami ra mî.—Jes. 46:10. w23.11 3-4 ¶7-8

Apostel Petrub ge ǁîb khoesi ǂkhabusasigu ǀkha ǃgomsiga gere hōǃâ. Saora aiǁgaudi xa ǂâi re. Jesub ge a ǁguiǃā o, matib ǃgomatsâ tsî nî ǁōsa î-î Elobmîs kēbode dīǀoaǀoahe. Ob ge Petruba ǁîba ge mîba, nēs Jesub ǀkha ī tidesa. (Mrk. 8:​31-33) ǃNākōrobe i ge Petrub tsî nau Apostelgu tsîna ham-i a kais xa gere ǂnôagu. (Mrk. 9:​33, 34) Jesub di ǀuniga ǃoes, ǁōb nîs aiǃâb ge Petruba khoeb di ǂgaesa ge ǁhāǁnâ. (Jhn. 18:10) ǁKhā ǃoeb ge Petruba ǃaob ǃnâ māǁnâsen tsî Jesub di ǀhōb a ǃkhaisa ǃnona ǃnāde ge ǀūxu. (Mrk. 14:​66-72) ǁNās khaoǃgâb ge Petruba tsûaǂgaoxase ge ā. Jesub ge ǂkhabuǂâi hâ ǁkhāǁkhāsabeb ai ge ǀûsen tama hâ i. Jesub ge khâib ges khaoǃgâ Petrubab kaise a ǀnam ǃkhaisa ge ǁgau. Tsîb ge Petruba ge ǁkhau, îb ǃgamǃgamsenxa ǃûi-aob ase ǁîb gūna ǃûi. (Jhn. 21:​15-17). Petrub ge nē ǁkhauǂuisa ǃgâise ge ǃkhōǃoa. Tsîb ge Jerusalems ǃnâ Pinkstertsēs ai, ǃanu gagab ǀkha ǂguro ǂkhauhegen ǁaegu ge hâ i. w23.09 22 ¶6-7

“Elob di gūn sago ǂgomǃgâbahe hâna ǃûi,” tib ge apostel Petruba ǀhaohâb ǃûi-aoga ge ǀkhoma. (1Pet. 5:​1-4) ǀHaohâb ǃûi-aogo, ǂan da ge a ǃgâsana go a ǀnam tsî ǁîna ra ǃûi ǂgao ǃkhaisa. Xawe go ge ǀnîsi kaise ǂgui xūna ra dī tsî tsau hâ tsî ǁnā ǁgaumâisa go a dī ǁoa khami ra tsâ. Tae-e go a dī ǁkhā? Tsâ go ra ǀgauba Jehovaba mîba. Petrub ge ge xoa: “Tsî khoe-i ga ǃoaba, a i Elob ra ǀkhae ǀgaiba xus ase ǃoaba.” (1Pet. 4:11) Sadu ǃgâsan ge nē ǃhūbaib ǃnâ ǀnîsi, dī-unuhe ǁoa ǃgomsina ūhâ. Xawe ǂâis ǃnâ ūhâ re Jesub Xristub “ǂAmǃûi-aob” ge, sago a hui ǁkhās xa ǃnāsase hui ǁkhā. Nēsis tsî hānîǁaeb ǃnâs tsîna. Jehovab ge ǀhaohâb ǃûi-aoga ra ǂgan, î gu ǃgâsana ǀnam, ǃûi tsî “gūn di aiǁgause” ī. w23.09 29-30 ¶13-14

Khoesi ǂâiǀgauba xu da ge nî ǂgōsen. Xūna da ga khoen di mûǂuib ǃoagu kō o. O da ge Jehovab tsî ǁîb di ǂhanugu tsîna a ǁnāxu ǁkhā. (1Kor. 3:19) “Nē ǃhūbaib di gā-aisib” ǃnāsa ǁaegu ai khoena ra ǂkhâǃnâ, în tā Eloba ǁnâuǀnam. ǀNî Xristeǁîn hîna Pergamums tsî Tiatiras tsîn ǃnâ gere hân ge nē ǃgâi tama hâ ǀgauga ge omkhâi. Jesub ge nē 2 ǀhaohâga ǀgaisase ge ǃkhâikhom, ǁîn ge ǃgâi tama hâ ǁgoe-ūgu ǀgauga gere ūǃoa amaga. (J.ǂHa. 2:​14, 20) Nētsēn ge khoena a ǁgari da ǁkhā, î da ǃgâi tama hâ ǂâi ǀgauga ūǃoa. Omaris ǁanin tamas ka io ǀhōsan ge a ǂgom kai da ǁkhā, tsū tama i hâsa Jehovab ǂhanuga ǃgûǂamsa. Aiǁgause, ǁÎn ge ra mî sida turagu ǃnâ mâǁnâsens tsū tama hâsa. Tsî Elobmîs di ǁgaragu a ǃgomsa. ǀNî ǁaegu ai da ge a ǂâi ǁkhā, Jehovab ra māda daoǁgaudi ǃgāsa tama hâsa. ǀNîsi da ge nî ǃâitsâhe î da tā “xoahe gena ǁnâuǀnam.”—1Kor. 4:6. w23.07 16 ¶10-11

Jesub mamas, Marias ge ǀgaiba ge ǂhâhâ i. ǁÎs ge ge ǃgamme tama hâ i xawes nî ǀgamǀkhā. ǁÎs ge ǀgôa-e kaikais di ǂansa ge ūhâ tama hâ i. Xawes ge nē nî ǃnae ǀgôarob, Mesia kai nîba nî kōǃgâ. Marias ge aorekhoeb ǀkha ge ǁgoeǀhao tsâ tama hâ i. Xawes Josefa ǁîs ǀgamǀkhās xa mati nî mîǃāba? (Luk. 1:​26-33) Mariasa ǀgaiba mati ge hō? ǁÎs ge nau khoena xu huiba ge ūǃoa. Aiǁgauses ge Gabriela ge ǂgan, îb ǃnāsa ǃgāsasiba māsi nē ǁgaumâis xa. (Luk. 1:34) ǁAero i khaoǃgâs ge ǁîs ǀaokhoes Elisabetsa “ǃhomxa ǀkharib” Judab dib ǃnâ sī ge sari. Elisabets ge Mariasa ge ǂkhâǃnâ tsîb ge Jehovaba ǁîsa ge hui, îs Mariasa ǁîs ǃnae tama ǀgôab xa hâ kēbosa mîba. (Luk. 1:​39-45) Marias ge ge mî, Jehovab ge “ǀgaisa dī-e . . . ǁîb di ǁôab ǀkha” ge dī. (Luk. 1:​46-51) Gabrieli tsî Elisabets ǃnâ-ūb ge Jehovaba Mariasa ge ǀgaiǀgai. w23.10 14-15 ¶10-12

ǀOro ǃgôab ǁkhāǁkhāsaben Xristub din ge ǃanu gagab ǀkha ǂhausa, tsî ǀō-aisa ǀhōsagusisa Jehovab ǀkha ūhâ. Nē ǀguikaidisi tsî hakadisihakaǀaǀoadisi (144 000) khoen ge Jesub ǀkha ǀhommi ǃnâ pristerse nî ǃoaba. (J.ǂHa. 14:1) Tabernakeli di ǃanub ge Elob gagasi ǀgôasen ǃhūbaib ai hâ, hînan ūǂgāhe hâsa ra ǂnûǁkhāeba. (Rom. 8:​15-17) Haon xa ǃanu ǃkhaib ge ǀhomma ra ǂnûǁkhaeba, Jehovab ǁanǃkhaisa. ‘ǃAnu ǃkhaiba ge hoanxa ǃanu ǃkhaiba xu gere ǀgora lapip ge Jesub sorosa gere ǂnûǁkhaeba, ǁîb ǁgansi soros ǀkhab ge kai ǀGapi pristerse gagasi tempeli ǃnâ ǂgâ ǁoa-isa. ǁÎb ǁgansi sorosab ge khoen ǃaroma ǁguiba, ob ge dao-amde hoa ǂkhauhesa Xristeǁîn ǃaroma ge ǁkhowa-am. ǁÎn tsîn ge ǁîn ǁgansi sorode nî māǁnâ în ǀhomsi mādawa-amsa hōǁkhā.—Heb. 10:​19, 20; 1Kor. 15:50. w23.10 28 ¶13

Gideonni ge khoexaǃnâse ge ǃeream. (ǂHǂh. 8:​1-3) ǁÎb ge ǁgaib ǀkha ge ǃeream tama hâ i. ǁÎb ge ǃgamǃgamsenxasiba ge ǁgau, ǁîga gere ǂhani xū-e ǃgâs ǃnâ-ū. Tsîb ge ǃgâi ǀgaub ǃnâ ge ǃhoa-ūgu hîna ge ǃaromasa î gu ǁîgu tsîna ǃnomsa tsoatsoa. Gā-ai ǀhaohâb ǃûi-aogu ge Gideonna ra ǁgae, ǂōrisase ǃgâs ǃnâ-ū. Tsî mîǁgaiǁgaihe gu ga, o khoexaǃnâxase ra ǃeream. (Jak. 3:13) ǁNāsa gu ga dī, o gu ge ǀhaohâb di ǂkhîb ai ra ǀaro. Gideonni ge gere koahe Mîdiaǁînab ge dan amaga. Xaweb ge ǁîba hoa koasa Jehovaba gere mā. ǀHaohâb ǃûi-aogu tsîn ge ǁnāsa a dī ǁkhā. (ǂHǂh. 8:​22, 23) ǁGaumâisa ūhâ ǃgâsaga mati Gideonni aiǁgausa a ǁgae ǁkhā? ǁÎgu ra dī xūn hoan ǃnâ gu ge Jehovaba koasa nî mā. (1Kor. 4:​6, 7) Aiǁgause, ǀhaohâb ǃûi-aob ga ǁîb ra ǁkhāǁkhā ǀgaub xa koahe o. Ob ge ǁîba ǂâisa Elobmîs tamas ka io Jehovab ǀapeǂhumis ra ǁkhāǁkhāda ǀgaub ai ǂnûi ǁkhā. ǀHaohâb ǃûi-aogu ge nî ôaǃnâsen ǀnîsi gu ǂâisa ǁîgu ai ra ǂnûi ǃkhaisa. w23.06 4 ¶7-8

ǀGores ǃnâ da ra ǂgan xūna da ga hō tama io, o da ge dîsen ǁkhā. ‘ǂHanu xū-e ta ra ǀgoreba?’ ǀNî ǁaega da ge ra ǂâi, ǂan da asa tae-i sida ǃaroma a ǃgâisa. Xawe ǂgan da ra xūn ge ǀnî ǁaegu ai sida ǃaroma ǃgâi tama. ǃGomsi i ǃaroma da ga ǀgore, o i ge ǀnîsi ǀnî hâ ǃereamsa hâ sida ra ǂâis xa, ǁnā ǃgomsib ǃaroma. Tsî ǀnî xūn hîna da ra ǂganan ge Jehovab ǂâis ǀkha ǀgui tama hâ. (1Jhn. 5:14) Aiǁgause, ǀgapiga da goro ǃhoaǃgao ǁgûn di aiǁgaus xa ǂâi re. Jehovaba ra ge ge ǂgan, îb ǁîra ǀgôaba aiǃgû tsî ǁîba ǃoaba ǀgara. ǁNā ǂgan ǀgaub ge ǂhanuse ra ǀō. Xaweb ge Jehovaba khoe-i xare-e ǁgari tide ǁîba ǃoabasa. ǁÎb ge ra ǂhâba î da hoa da ǁhûi ǁîba ǃoabasa, sida ǀgôana ǃkhōǂgā hâse. (Deu. 10:​12, 13; 30:​19, 20) O ra ge ǁgûra aiǁgause Jehovaba ga ǂgan hâ îb hui nî î ra ǁîra ǀgôab ǂgaoba tsâǀkhā îb ǂkhâǃnâhe, Jehovaba ǀnam tsî ǁîb di ǀhōsa kaisa.—ǂKhm. 22:6; Efe. 6:4. w23.11 21 ¶5; 23 ¶12

Tae-i ǃaroma i ǃgâsana ǁkhaeǂgaosa ǂhâǂhâsa ǀgau, ǀnamma ǁgaus diba? ǀNî ôaǃnâs ge ra mî, Paulub ge sîsenū mîs “ǀgaiǀgaiǃnâ” ti hâs ge ra ǂâibasen, “khoe-i xōǀkhā mâ tsî ǁî-e ǂkhâǃnâsa. Tsî ǁî-e huisa î-i ǀamo ûiba ǃoa garu daob ai ǃgû ǀgara.” Nau ǃgâsana da ǁkhaeǂgao, tamas ka io ra ǀgaiǀgai ǃnās hoasa da ge ra ǁgau ǁî-e da a ǀnamsa. (2Kor. 7:​6, 7, 13) Khoe-e tsâba tsî ǁkhaeǂgaos ge ra ǃgûǀhao. Mâ ǀgaub ǃnâ? ǀKhomxaǂgao khoe-i ge nau-i ǃgoma ra tsâ, o i ge ra ǂkhâǃnâhe nau khoe-e huisa. ǁNā-amaga da ge ǂgurose khoe-e ǀkhom tsî ǁnāpaxu ǁî-e nî ǁkhaeǂgao. ǃGaoǃgâ re Paulub ge ra ǁguiǃā, matib Jehovab di ǀkhomxaǂgaosiba, ǁkhaeǂgaos hînab ra mās ǀkha ra ǃgûǀhao ǀgausa. Paulub ge Jehovaba ‘ǁGûb ǀkhomxaǂgaosigu dib tsî Elob hoa ǁkhaeǂgaob dib’ ase ra ǁguiǃā.’—2Kor. 1:3. w23.11 9-10 ¶8-10

Xristub di saosaben hoan ge ǁgâiǀāba nî ǃâubasen. Apostel Paulub aiǁgaus xa ǂâi re. ǁÎb ge ǁnān hîna Tesalonikas ǃnâ hâna ǃoa ge mî: “Sige gere ganupe ge noxopa sadu ǀkha hâ hîa sado ǃgôaǃgonhe ge nî ǃkhaisa mîba xui-ao; tsîs ge nēsa ǁnāti ge ī.” (1Tes. 3:4) Tsî Korinteǁîna ǃoab ge ge xoa: “ǃGâsago, ǂgao ge ra ǃkhais ge sige ǀkha ge ī ǃgomsigu xa go nî ǂansa, . sige ûib xa ge ge îganǀgēs kōse.” (2Kor. 1:8; 11:​23-27) Nētsēs di Xristeǁîn tsîn ge ǁgâiǀāba a ǃâubasen ǁkhā. (2Tim. 3:12) Jesub ǃnâ ǂgom tsî du ǁîba ga sao, on ge sadu ǀhōsan tsî ǀaokhoen tsîna ǀnîsi gere ǃkhāǃkhā du. ǁÎn ge ǀnîsi ǁgaise gere ûi-ū du. Sadu ǂgomǂgomsasib hoa xūn ǃnâ du ūhâba sadu sîsenni tawa ǃgomsina gere ǃaroma? (Heb. 13:18) ǂHanub xa mâǃoahesa du ge hōǃâ tsâ hâ i, sadu ǃâubasensa du naun ǀkha ra ǀgoragu ǃkhais ǃaroma? Paulub ge ra mî, mâ ǀgaub ǀguib hoab ǃnâ da ga ǁgâiǀāba hōǃâ xawe da ge nî ǃgâiaǂgao. w23.12 10-11 ¶9-10

Jakob ge ǂgui ǃgomsina ge ǃkharuǃnâ. Jakob di ǀgam ǀgôakha Simeoni tsî Levib tsîkha ge taoba ǁîga omarisa ge ǀkhī-uba. Tsî Jehovab ǀônsa ge ǁgaiǁgai. ǁNās xōǀkha î ge ǁîb di ǀnamǀnamsa taras Raxelsa, ǁîra di ǀgamǁî ǀgôabas ra hō hîna ge ǁō. ǁÎb kaira tsēdi ǃnâb ge Jakoba ǃâtsūǀkhāb xa ǃaromahe hâse, Egibteba ǃoa ge doe. (Gen. 35:​16-19; 37:28; 45:​9-11, 28) Nē ǃgomsin hoan ǃnâb ge Jakoba, ǁîb di ǂgomsa Jehovab ǃnâ tātsē ge ǂoaǃnâ tama hâ i. Tsî ǁîb di mîmâidi ǃnâ. Tsîb ge Jehovaba Jakoba ge ǁgau, ǁîb ǀkhab a ǂkhî ǃkhaisa. Aiǁgause, Jehovab ge Jakoba ǂgui xūn ǀkha ge ǀkhae. Tsî ǂâis ǀguisa di re matikōseb Jakoba Jehovab ǃoa ge ganganxa isa. ǁÎb di ǀgôab Josefi ge ǁō dib ge ǂâi hâ îbab, ge ǁkhawa mû o. Jehovab ǀkhab ge ûhā i ǀgū ǀhosagusis ge Jakoba ge hui, îb ǁîb di ǃgomsigu ǃnâ mâǀgai. (Gen. 30:43; 32:​9, 10; 46:​28-30) Jehovab ǀkha da ga ǀgū ǀhosagusisa ga ûhā ǀgara. O da ge sîda tsîna, ǃâubasen tama da hâ ǃgomsin ǃnâ a mâǀgai ǁkhā. w23.04 15 ¶6-7

Psalmdi 23 ǃnâb ge Davida gere ǁgâiǂûisen ǂgomǃgâsibab Jehovab ǀnammi ǃnâ ūhâsa tsîb Jehovaba ǁîba ra tsâbasa. Jehovab tsî ǁîb ǁaegu hâ ǀhōsagusisab ge gere ǁguiǃā tsîb ge ǁîb ǃûi-aob ti gere ǂgâibi. Davidi ge ǃnorasase gere tsâ tsî ge mā-am, îb Jehovaba daoǁgaubi tsîb ge ǁîb ai hoase gere ǂgomaiǂnûi. Davidi ge ge ǂan i Jehovab ǁîb ûib ǃnâ tsēs hoasa ǀnamma nî ǁgaubi ǃkhaisa. Tae-i ǃaromab ge ǁnātikō ǂgomǃgâsiba ūhâ i? Davidi ge kōǃgâheb da ǃkhaisa gere hōǃâ, Jehovab ge hoaǁae ǂhâb hâ xūna gere mābi amaga. Davidi ge ge ǂan i Jehovab ǁîb ǀhōsa tsîb ǁîb mā-amsa ūhâ ǃkhâisa. ǁNā-amagab ge ǂgomǃgâsiba ge ūhâ i tae-i ǀgui-i ga hānîǁaeb ǃnâ ī xaweb Jehovaba aiǃgû tsî ǁîb ǂhâsiga nî kōǃgâsa. Davidi ge ǂgomǃgâsiba ge ūhâ i Jehovab a ǀnambi ǃkhaisa tsîb nî kōǃgâbisa. ǁNās ge ge huibi îb tā ǂâiǂhansen xawe ǂkhî tsî ūb hân ǀkha ǂâu.—Psa. 16:11. w24.01 29 ¶12-13

Jehovab khoen ge ǀgamǁî torob khaoǃgâ ǂkhîb tsî ǃnorasasib tsîna nēsi ǂgui ǃhūgu ra hōǃâ, aoǁnâ sîsenni ǃnâ. ǂGui khoen ge nēs ǃnâ-ū Jehovaba ge ǂan tsî ǁîb di khoen ge noxopa ǃhūbaib ǂhawase aoǁnâs ǀkha ra aiǃgû. Nētsēs tsînab ge ǂgomǂgomsa tsî gā-ai ǃgāba Xristub di daoǁgausa ǃoa ra kō. ǁÎgu ge ra ǂhâba, î-i ǃgâsan ra māhe daoǁgaude Elob di ǂâi ǀgauba ǁîna ǁgau. ǁÎgu ge ǃnarimâra mûǂam-aogu tsî ǀhaohâb ǃûi-aogu tsîna ra sîsenū ǀhaohâba daoǁgaude māsa. ǂKhauhesa ǃgâsagu ge Xristub “amǀkhāb ǃommi” hui-ao. (J.ǂHa. 2:1) Tsî hâ as ge nē ǃûi-aogu ge ǀoasa kurusa ūhâ tama tsî ra dīsā. Moseb, Josuab tsî apostelgu tsîn ge ǁkhā ǀgaub ǃnâ ǁîgu tsîna gere dīsa. (Num. 20:12; Jos. 9:​14, 15; Rom. 3:23) Xawe da ge ǃgāsase ra mû, matib Jesuba ǂgomǂgomsa ǃgāb tsî ǁgaumâihe hâ ǀhaohâb ǃûi-aogu tsîna aiǃgû tsî ra huisa. ǁNā-amaga da ge ǁgaumâihe hâ aogu ǃnâ-ū da ra māhe daoǁgaude kaise ra ǂgomǃgâ. w24.02 23-24 ¶13-14

Nētsē da ge Jehovaba a ǂkhîǂkhî ǁkhā, ǃgôaǃgâsib tsî ǀnammi tsîna da ra ǁgau bi ǀgaub ǃnâ-ū. Aoǁnâ sîsen-e da ga dī, o da ge khoena ra hui în Jehovab ǃoa ǀgū tsî sada khami tsâ. (Jak. 4:8) Kaise da ge ra ǂkhî Elobmîs Jehovaba ra ǁguiǃā ǀgauba da khoena ra ǁgau o. Aiǁgause ǁîb di ǀnammi, ǂhanu-aisib, gā-aisib, ǀgaib tsî ǀnî hâ mâǂoa ra ǀgaugu tsîna. Jehovaba da ge koa tsî ra ǂkhîǂkhî ǁîba ǁgaes ǃnâ-ū. ǁNāsa da ga dī, o da ge nē eloxoresa ǃhūbaib khoena xu ra mâǂoa tsîs ge nēsa ǁîna buru kai ǁkhā. (Mat. 5:​14-16) Tsēkōrobe da ǁîn ǀkha ra hâ khami da ge ǁguiǃāba nî ǁkhā, mati io da ti ra tanisensa. ǁNā ǀgaub ǃnâ da ge Jehovab ǀonsa ra koa. Nēs xa ǃaromahe hâsen ge ǂhauǃnâna sada Eloba ǃoa ra ǂgaehe. Jehovaba nē ǀgaub ǃnâ koas ge ǁîb ǂgaoba ra ǂkhîǂkhî.—1Tim. 2:​3, 4. w24.02 10 ¶7

Gagasise ǀgaisa Xristeǁî kai ǂgaots ga, ots ge tsēkōrobets ûib ǃnâ sîsenū ǁkhā xūna nî ǁkhāǁkhāsen. Nēs ge nî huitsi îts ǀhaohâb ǃnâts ta hō ǁgaumâide dī, sîsen-i tamas ka io omaris ǃnâ ǃgâi ǀhōsagusisa naun ǀkha ūhâ. Saora xūnats ge a ǁkhāǁkhāsen ǁkhā. Aiǁgause, khomais tsî xoas tsîna ǁkhāǁkhāsen re. Elobmîs ge ra ǁgau ǃgâiaǂgao tsî ǃgâiǃgâxa khoeb ge tsēs hoasa Elobmîsa khomai tsî ǃgamse ra ǂâiǃgâ. (Psa. 1:​1-3) Elobmîsats ga tsēs hoasa khomai, ots ge Jehovab di ǂâiǀgauba nî ǁkhāǁkhāsen. Tsî ǁnās ge nî huitsi îts ǃgāsa tsî ǁnâuǃāxa ǂâiǀgauba ūhâ. (ǂKhm. 1:​3, 4) ǃGâsan ge Elobmîsa xu ǁkhāǁkhā tsî ra daoǁgau ǃgâsaga ǃoa ra kō. ǃGâise khomai tsîts ga xoa, ots ge ǂgomsa ra ǀgaiǀgai ǃhoade mā tsî omkhâi ra ǃereamdi tsîna ǁîn ǀkha a ǀgoragu ǁkhā. Nēts ra xoamâi xūn ge sa ǂgomsa nî ǀgaiǀgai tsîts ge naun tsîna a ǂkhâǃnâ ǁkhā. w23.12 26-27 ¶9-11

ǃAo du ga, o Jehovab hānîǁaeb ǃnâ nî dī xūn xa ǂâiǃgâ re. ǀKharib kai ǀhaos tawa i ge 2014 nî ǃnâ ǁgauǁgaus ase ǁGâuab ga hîkākāhe, ob ǃhūbaiba nî ī ǀgaus xa gere ǃhoaǃgaohe. ǁGûb ge omaris ǀkha 2 Timoteub 3:​1-5 sa paradais ǃnâ nî ī ǀgaub xa gere ǃhoa. ǁÎb ge ra mî: “ǀAsa ǃhūbaib ǃnâ i ge ǂkhî ǁaega nî hâ. Khoen ge nauna ǀnam, gagasi xūna ǀnam, ǃgamǃgamsenxa, Eloba koa, ǁgûna ǁnauǀnam, ganganxa, ǂgomǂgomxa, ǃgôaǃgâsiba nau omaride ūhâba, ǃgâise ǁnâugu xa, naun xa ǃgâise ǃhoa, ǃkhō-oasenxa, tsâmtsiǃnâxa, ǃgâiba ǀnam, ǂgomǂgomsa, nauna ais ai mâi, ǃgâiǂâixa, Eloba ǀnam ǃgâiǁaeba ūhâs xa, ama Elo ǃaoǃgâxasiba ūhâ. Nē xūna ra dīn ǀgūse hâ.” Sadu omaris tamas ka io du ǃgâsan ǀkha, matib ûiba ǀasa ǃhūbaib ǃnâ nî ī ǀgaub xa ra ǃhoaǃgao? w24.01 6 ¶13-14

Jehovab ǁîb khoena ǁaes ase ra ūǃoasa ǂans ge kaise ra ǁkhaeǂgao da. Elobmîs ge ra mî: “ǃKhūb ge ǁaes âb ǃnâ ǃgâiǃgâibasensa ūhâ.” (Psa. 149:4) ǀNî ǁaegu ai da ge ǂkhabuǂâi tsî a dîsen ǁkhā, ‘Jehovaba tita ra ūǃoa?’ Elobmîs ǁaeb ǂgomǂgomsa ǃoaba-aon Jehovab din tsîn ge ǀnî ǁaegu ai ǂkhabuǂâis tsâsiga ge ūhâ i tsî gere tsâ Jehovab ǁîna ūǃoa tamasa. (1Sam. 1:​6-10; Job. 29:​2, 4; Psa. 51:11) Elobmîs ge ǃgāsase ra ǁgau, ǀoasa kurusa ūhâ tama khoen tsîn Jehovab xa nî ūǃoahesa. Tae-e da nî dī? Jesub Xristub ǃnâ ǂgomsa ǁgau tsî da ge nî ǁāǁnâhe. (Jhn. 3:16) Nē ǀgaub ǃnâ da ge nauna ra ǁgau, sida ǁoren ǃgao da go ǃhausensa tsî da Eloba ǃoa ra mîmâisa ǁîb ǂâisa dīsa. (ǃNǃkh. 2:38; 3:19) Jehovab ge kaise ra ǂkhî nēn hoana dī tsî da ga ǁîb ǀkha ǀgūǀhōsagusisa omkhâi o. ǁÎba ǃoabas mîmâisa da ga dīǀoaǀoa, ob ge Jehovaba aiǃgû tsî ǁîb ǀgūǀhōsan ase nî ūǃoa da.—Psa. 25:14. w24.03 26 ¶1-2

Jesub ǁkhāǁkhāsabega da ge a ǁgae ǁkhā, ǂhanub ga ǂkhā da xawe aiǃgû tsî aoǁnâs ǀkha. ǂGomǃgâsiba da ge ūhâ ǁkhā Jehovab nî huidasa î da sida aoǁnâ sîsen-e dīǀoaǀoa. ǁNā-amaga ǁkhoaǂgaosib tsî gā-aisib tsîna ǀgoreba. Jehovab ai huiba ǂgan re ǃgomsin ǃnâ mâǀgais ǃgao. Hoa da ge ǃgomsina ra hōǃâ, aiǁgause sorosi ǃnubusigu, ǂâiǂhansendi, ǀnamsabe-e ǁōb ǃnâ ǂoaǃnâs. Omaris ǃgomsigu, ǃgôaǃgonhes tamas ka io ǀnî hâ ǃgomsin tsîna ǃkhōǂgā hâse. Tsî ǀaegu khoraǂuisens tsî torogu tsîn ge noxoba mâǀgaisa ra ǃgom kai. Jehovaba ǃoa ǂgaob ǃgamsiba xu ǀgore re. Sadu tsâsigu xa du ǀgū ǀhōsa-e nî mîbas ǁkhās khami Jehovab tsîna tsâ du ra ǀgauba mîba. ǂGomǃgâ ǁkhā du ge a Jehovab xu-e nî ‘dība’ dusa. (Psa. 37:​3, 5) ǀGores ǃnâ da ga hâhâ, o da ge nî huihe î da “ǁgâiǀāb ǃnâ mâǀgai.” (Rom. 12:12) Jehovab ge a ǂan ǁîb ǃoaba-aon tae-e ra ǃkharuǃnâsa tsîb ge “ǁîn ǀkhomabasensa” ra ǁnâu.—Psa. 145:​18, 19. w23.05 5-6 ¶12-15

ǂHâǂhâsa mîǁguiba da ga dī, o da ge nî ǁnâuǃā tae-i “ǃKhuba a ǃgâiba ǃkhaisa” tsî ôaǃnâde dī tsî ǁîn ǃoagu nî ûi. (Efe. 5:17) Elobmîs ǁgaragu sida mâsigu ǃoagu hâ ga da ga ǂanǂui, o da ge ǀnî mîdi ǃnâ Elob ǂâiǀgauba ra ôa. Tsî da ga nē ǁgaraga ûiǂui, o da ge ǃgâi mîǁguiga nî dī. “ǂKhabab” tamas ka io sida khākhoeb ǁGâuab ge ra ǂhâba î da ǁnātikōse ǀhabe nē ǃhūbaib di xūn ǀkha. Î da tā ǁaeba ūhâ ǁkhā Elob ǃoabas ǃaroma. (1Jhn. 5:19) Xristeǁî-i ge supuse mari-i, ǀgapi ǁkhāǁkhāsens tamas ka io sîsenni ai ǁî-i ǂâisa ǂnûi ǁkhā. Tsî Jehovaba ǃoabasa ǀunigase mâi ǁkhā. ǁNā-e da ga dī, o i ge nî ǁgau mā-am da ra sa î-i sida ǂâiǀgauba nē ǃhūbaib di ǂâiǀgaub xa tsâǀkhāhe. Ama as ge nē xūn tsū tamasa xawen ge tā ǂguro ǃkhaisa sida di ûigu ǃnâ nî ū. w24.03 24 ¶16-17