Junib

Jehovab ge ǁîn hoana nē mâsib ǃnân gere hâ ǀgara khami gere ǀkhae. ǂGurokam ǁaeb Xristeǁîn ge ǂgui ǁaegu ai gere mâǃoahe, ǃâubasen taman hâ ǁaegu ais tsîna. Paulub tsî Barnabab tsîn Listras ǃnâ ra aoǁnâ, hîna ge ǁîgu ǀkha a ī xū-i xa ǂâi re. ǁÎkha gere ǃgâ khoen xa gu ge tsoatsoas ǃnâ ǂgurose ǃgâise ge ǁkhoreǁharehe. Xawe î ge ega, mâǃoa-aoga ‘khoena ge khâikhâiǃnâ.’ Tsîn ge ǁkhā khoena xu ǀnîna Pauluba ǀuidi ǀkha gere ǂnoa. Tsî ge ǁnāxūbi ǁōb ge din ge ǂâi o. (ǃNǃkh. 14:19) Xawe Paulub tsî Barnabab tsîn ge aiǃgû tsî ǀkhara ǃkhais ai sī ge aoǁnâ. Tsî tae-e ǁnās ǃnâ-ū ge hā? ǁÎgu ge ‘ǀnî khoena ge ǁkhāǁkhāsabedī’ tsî î ge ǁîgu di mîdi tsî aiǁgaus tsîna nau ǃoaba-aona ge ǀgaiǀgai. (ǃNǃkh. 14:​21, 22) Paulub tsî Barnabab tsîn ge mâǃoahe kha gere o, ǀû tama hâ i ǃkhais ǃaroman ge ǂguina ǃgâiba ge hō. Jehovab ge mā da sîsenni ǃnâ da ga ǀûsen tama io, ob ge ǁîba nî ǀkhaeda. w23.04 16-17 ¶13-14

Gao-ab Davib ge ǂgui ǁkhōǁkhōsa mâǃoa-aona ǁîb ûib hoab ǃnâ ge ūhâ i. Tsîb ge ǁaen ai Jehovab huiba ǀgores ǃnâ-u gere oa. Davib ge ǂgomǃgâsiba ge ūhâ i Jehovab ge ǁîb ǀgorede ǁnâu tsî gere ǃereamsa. Sadu tsîn ge ǁkhā ǂgomǃgâsiba ūhâ ǁkhā. Elobmîs ge ra ǁgau da, Jehovab gā-aisiba a māda ǁkhāsa. Tsî ǀgaib tsîna î da mâǀgai ǁkhā. ǁÎb ge sida gagasi omaris tamas ka io ǁnān hîna ǁîba ǃoaba tama hâna a sîsenū ǁkhā, în ǀnî ǀgaugu ǃnâ hui da. Jehovab ga sida ǀgorede ǃâubasen da ra ǀgaub ǃnâ ǃeream tama i, xawe da ge a ǂan ǁîb ǁîde ra ǃereamsa. ǁÎb ge ǂhâ da hâ xū-e, ǂhâ da hâ ǁaeb ai nî māda. ǁNā-amaga aiǃgû tsî ǂgomǃgâsiba ūhâse ǀgore re, Jehovab nēsis tsî hānîǁaeb ǃnâs tsîna ‘ûitsaman hoana ǂhâban hân ǀkha nî ǁâǁâsa.’—Psa. 145: 16. w23.05 8 ¶4; 13 ¶17-18

Sadu ǂâisa du mâ ǀkhaegu ai a ǂnûi ǁkhā? Elobmîsa khomais tsî sadu di ǀgorede ǃgâiǃgâis ga sadu mîǁgui o. Nēs mati Jehovab ǀkha du ūhâ ǀhōsagusisa nî ǀgaiǀgai ǀgaub xa ǂâi re. (Psa. 145:​18, 19) Xristeǁî ǀgauba ǃgâiǃgâis ga sadu mîǁgui, o naun ǀkha du ūhâ ǀhōsagusisa i nî ǃgâiǃgâi ǀgaub xa ǂâi re. (Kol. 3:14) Sadu mîǁguiba du ra sīǃnâ ǃaromade du tae-i ǃgao xoaǁnâ tama hâ? ǁAeba xu ǁaeb ǀkha ǁnā du go xoaǁnâ xūna kōǃgâ tsî ǂkhâǃnâ du ran ǀkha hâ ǀhao. (ǂKhm. 13:20) Ama as ge sida hoada ge turaba da ūhâ tama hâ tsēde ūhâ. Nēsa ra ǂâibasen sida di mîǁguib ai da a sîsen ǁoasa? Hî-i. Sida di mîǁguiba da ga ǂkhâǃnâhe hâse da ga tsâ, o ǀgui a dī. O da ge ǁnāsa ǀnîsi sīǃnâ hō tide. w23.05 27-28 ¶5-8

Dī da ra mîǁguigu ǃaroma da ǃereamsa tani hâs ge ra ǂkhâǃnâ da î da sida ǁorena ǁguiǁnâ, dīsāna ǂhanuǂhanu tsî tā ǁkhāpa ǁkhā dīsāna nî dī. ǁNā xūna dīs ge a huida ǁkhā, î da ûib ǃkhoeǀnûgus ǃnâ ǃkhoeǀgara. Tae-e da ge dīsās xa ǂâis xa, da ge hâǃnâ da a mâsiba nî ūǃoa. Tā sadu ǁaeb tsî ǀgaib tsîna sîsenū, ǂhanu du ge isa ǁgaus ǃaroma, tamas ka io nau khoen a ǂhanusa. Xawe sadu dīsānaǂanǃgâ tsî dī ǁkhā du ana nēsi dī re. Dīsā du ge xū-i xa du ga ǀhapixase tsâ, o ǃgamǃgamsenxase Jehovaba ǃoa ǀgore, ǁore du go sa ǂanǃgâ tsî ǁîb ai ǀûbaba ǂgan. (Psa. 25:11; 51:​3, 4) ǀNîsi du ge tsūdī du ge khoen ai ǀûbaba ǂgan tsî ǂhâbasa î ga o, ǀhaohâb ǃûi-aogu di huiba a ôa ǁkhā. (Jak. 5:​14, 15) Sadu dīsāna xu ǁkhāǁkhāsen tsî dītsâ, î du tā ǁkhāwa ǁnā-e dī. Nēsadu ra dī khami du ge ǂgomǃgâ ǁkhā, Jehovab ǀkhomxaǂgaosiba ǁgau tsî ǂhâ du hâ ǂkhâǃnâsa nî mā dusa.—Psa. 103:​8-13. w23.08 28-29 ¶8-9

Gao-aob Joasi ge Jojadab aiǁgausa xu ǃgâiba ge hō. Nēs xa ǃaromahe hâseb ge gao-aoba ǂkhamsis ǃnâ Jehovaba gere ǂkhîǂkhî ǂgao. Xaweb ge Joasa, Jojadab ge ǁō o Eloba ǃoaba tama ǁgai ǂgaeǂgui-aoga gere ǃgâ. (2Kro. 24:​4, 17, 18) Nēs xab ge tsûtsûhe hâ-i xaweb ge Jehovaba “kēbo-aoga ǁîna ge sîba, ǁîna gu nî ǂgōǀause, xawen ge ǃgâ ǂgao tama ge i.” ǁÎn ge Saxariab, Jojadab ǀgôab tsîna ge ǃgâ tama hâ i. Hîna ge Jehovab di kēbo-ao tsî pristers ǀguisa ī tama hâ î ba xawe Joasi ǃgâba. Gao-aob Joasi ge Saxariaba ge ǃgam kai. Saxariab omaris xab ge huihe xawes tsîna. (2Kro. 22:11; 24:​19-22) Joasi ge eloǃaoǃgâxasiba ge ūhâ ǀgara tama hâ i. Jehovab ge ge mî: ‘Tita ra ǃharaxūn ge nî ǃharaxūhe.’ (1Sam. 2:30) Siriaǁîn ǂkhari toroǂnubis ge Joasi di “kai toroǂnubisa” ge dan. Tsî kaise ge tsûtsûbi. (2Kro. 24:​23-25) Siriaǁîna xub ge oas khaoǃgâb ge Joasa ǁîb di ǃgāgu xa ge ǃgamhe, Saxariabab ge ǃgam ǃkhais ǃaroma. w23.06 18-19 ¶16-17

Paulub ge ǁaeroba Efeses ǃnâ ge hâ i, ǁkhāǁkhā tsî ǃgâiǂhôasa ra aoǁnâse. (ǃNǃkh. 19:​1, 8-10; 20:​20, 21) ǁÎb ǃgâsanab ge kaise ge ǀnam i tsîb ge gere hui nî ǂgao în ǂgomǂgomsase Jehovab ǃoagu hâ. Amaban ge ǁkhāǁkhāsen tsî Xristeǁî kais aiǃân ge, Efeseǁîn Paulub ge xoabana ǃgāsis ǃnâ ge ūhe hâ i ama tama ǂgomdi xa. Efeseǁîn ge ge ǂansa i ǃgâi tama ǁgoe-ugu ǀgaun ǁîn din ǃaroma. Tsîn ge ge tao tama hâ i ǁîn di ǁgai tanisen ǀgaugu ǃaroma. ǀGoe tamas ka io ǁgai ǃhoa-ugu ǀgaub ge hoaǁae gere ǁnâuhe ǁîn di ǂgomdi ge ǁaxasiga ūhâ i ǃkhais tawa. (Efe. 5:3) ǂGui Efeseǁîn ge ‘ǂgaogu an ǃnâ ge karo’ hâ i. Nēs ge ra ǂâibasen ǁîn ge tsû-i xare-e tātsē ge hōǃâ tama hâ i. (Efe. 4:​17-19) Tae-i ama ǂhanu tamasan nî ǁkhāǁkhāsens aiǃân ge, Efeseǁîna ge ǁae tama hâ i ǂhanu tamas ka io ǃgâi xū-e dīsa. ǁNā-amagab ge Pauluba saorase ǁîn xa ge mî, “ǁÎn di ǂâidi ge a ǃkhae ǁîn di ǂgaogu di karosasib tsî ǁae tama īsib xa ǃaroma-e hâsen ge Eloba xu hâ ûiba xu a ǁaraǂuisa.” ǀNî Efeseǁîn ge ǃkhaenab ǃnâ ge hâ ǀgara tama hâ i. w24.03 20 ¶2, 4; 21 ¶5-6

Gideonni ǁgaumâis ge sorosi sîsen-e kaise ge ǃkhōǂgā hâ i. Mîdiaǁîn ge ǃui-a gu ra ǃkham hîna a ǃkhoebē o, ob ge Gideonna ǁîna Jesreelsa xu Jordan ǃāb kōse ge sauru. (ǂHǂh. 7:22) Gideonna Jordanni tawa ge mâ? Hî-i. ǁÎgu ge tsau hâ î xaweb ge Gideonni tsî ǁîb 300 khoega ǃāba ǃkharu tsî ge aiǃgû saurus ǀkha. ǁNāpaxū gu ge Midiaǁîna ǀhao-ū tsî ǁîga ge dan. (ǂHǂh. 8:​4-12) Gideonni ge ge ǂgomǃgâ Jehovab nî ǀgaiǀgaibisa. Tsîb ge Jehovaba amabes ǃnâ ǁnāsa ge dī. (ǂHǂh. 6:​14, 34) ǀGui ǃnās aib ge Gideonni tsî ǁîb khoegu tsîna Mîdiaǁîn gao-aoga ǁîgu di ǂaidi ǀkha gere sauru. ǁNā gao-aogu ge ǀnîsi ǃnaiga ge ūhâ i. (ǂHǂh. 8:​12, 21) Xaweb ge Jehovaba ge hui gu, î gu ǁîkha sīǃnâ tsî sī ǃkhō ǁkhā. ǀHaohâb ǃûi-aogu ge ǁkhā ǀgaub ǃnâ, Jehovab ai a ǂgomaiǂnûi ǁkhā. ǁÎb hîna ‘tsau tamas ka io ǂkhabu tamaba.’ ǁÎb ge ǁîga ǂkhâgu hâ ǀgaiba nî mā.—Jes. 40:​28, 29. w23.06 6 ¶14, 16

Sida tsîn ge ǁkhā ǀgaub ǃnâ a mâǀgai ǁkhā ǃgomsiga da ga hōǃâ o. Jehovab ai ǂgomaiǂnûi. Kō re Baraki ge mati a dansa, Jehovab daoǁgausab ge ǂgomǃgâ amaga. ǁNā ǁaeb ai i ge Israelǁîna ge aiǂhomisa tama hâ i ǃkhams ǃaroma. Xaweb ge Jehovaba Baraka ge mîba, îb ī tsî Kannani ǂgaeǂgui-aob Siserab tsî ǁîb khoen ǃoagu sī ǃkham. Hîna ge ǂgui xūna ǃkhams ǃgao ūhâ îba. (ǂHǂh. 5:8) Kēbo-aos Deboras ge Baraka ge mîba, îb ǃhomga xu ǁgôa tsî ǂhāba ǃhūba ǃoa ī. Îb Siserab tsî ǁîb 900 toro kunidi ai hâ khoegu ǀkha sī ǃkham. ǁNā kunidi ǃoagu ǂhāba ǃhūb ai ǃkhams ge kaise Israelǁaesa ga ǃgomba hâ. Nēsab ge Baraka ǂan-i xaweb ge ge ǁnâuǀnam. ǃKham-aogu Taborǃhomma xu ra ǁgôaxa hînab ge Jehovaba ǀgaisa ǀanusa ge tsoatsoa kai. Siserab di kunidi ge ǂgoab xa ge ǃkhōhe tsîb ge Jehovaba Baraka dansa ge mā. (ǂHǂh. 4:​1-7, 10, 13-16) ǁKhā ǀgaub aib ge Jehovab tsîna sida dansa a mā ǁkhā, ǁîb tsî ǁîb daoǁgaudi ǃnâ da ga ǂgomaiǂnûi o. Hînab ǁîb ǂnûǁkhaeba-aogu ǃnâ-ū ra māda na. w23.07 19 ¶17-18

ǀAmo ûiba da ga hō ǂgao, o da ge ǃnūǃnâxasiba nî ūhâ. Jehovaba ge ǂgomǂgomsase ǃkharu ge kurigu ǃnâ gere ǃoaba khoen khami da ge nî ǃâu ǀgara. Elob ǁîb di mîmâide nî dīǀoaǀoas kōse. (Heb. 6:​11, 12) Elobmîs ge sida hâǃnâ mâsiba ǃhana ǂgā-aob ǀkha ra ǀgopeǀnō. ǃHana ǂgā-aob ge ǁîb di ǃhanaba ǂgā tsî ra ǂnâ xaweb ge a ǀū mâǁae i nî ǂoaxasa. Xaweb ge ǃhana ǂgā-aoba ǃnūǃnâxase ra ǃâu, ǂgomǃgâxase ra ǃâu ǃhanab nî ǂûtanisa. ǁNās khami da ge gagasi xūn ǀkha nî ǀhabe, ‘mâ tsēs aib [sida] ǀhonkhoeba nî hāsa’ da a ǀū amaga. (Mat. 24:42) ǃNūǃnâxasib ǀkha da ge ra ǃâu ǂgomǃgâsiba ūhâse, Jehovab mîmâib ge xūna ǀgū ǁae nî dīǀoaǀoasa. ǃNūǃnâxa tama da ga i, o da ge ǃâu tsau tsî amaba a ǁnāxū ǁkhā. Tsî da ge ǀnîsi nēsi a ǂkhîǂkhî da ǁkhā xūn ai ǂâisa ǂnûi tsî ǁîna nî ǁgūba. Xawe da ga ǃnūǃnâxa, o da ge ǀamosib kōse mâǀgai tsî nî sâuhe.—Mix. 7:7. w23.08 22 ¶7

Nē kēbosa nau kēbodi Danieli 2: 41-43 tsî ǂHaiǂhais ǂkhanis ǃnâ xoasa di ǀkha ǀgopeǀnōs ǃnâ-ū da ge ra ǁnâuǃā, ǂaidi Amerikab tsî Britanjeb hîna ǀguiba ra sîsen ǀhaokha ra ǂnûǁkhaebasa sida ǁaeb ǃnâ ǀgaisa ǂhanuga. Nē ǀgam ǃhūkha xab ge Daniela ra mî: “Nē Gaosib ǃkharese ǀgaisa tsî ǃkharese nî ǂkhabusasa.” Tae-i ǃaroma i ǃkharese a ǂkhabusa? ‘Nē Goasib ǃnâ hâ khoen di ǀguisib a mâǁapo ǁoa amaga.’ Danieli ge ǁguiǃā ai-īsiba xu da ge ǂgui amana a ǁkhāǁkhāsen ǁkhā. ǂGurose, î ge Amerikab di ǀgaisa ǂgaeǂguisa ǁîb ǀgaiba ǀnî ǀgaugu ǃnâ ge ǁgau. Aiǁgause, Amerikab tsî Britanjeb tsîn ge ǃhūgu di ǀguib hîna ge ǃhūb ǂhawase ge hâ i ǂguro tsî ǀgamǁî torokha a dan ga. Xawe nē ǀgam ǃhūkha ge ge ǂkhabusa kaihe tsîti nî hâhâ. ǁÎn di khoen ra ǃkhamgu tsî ǂhanub ǃoagus tsîna ra ǃkham amaga. ǀGamǁîse, Anglo-Amerikab ge nî ǀuni Gaosi-i hîna nî ǂgaeǂguiba. Elob di Gaosib hoa khoesi gaosiga nî dīkākās aiǃâ. w23.08 10-11 ¶12-13

ǀNî ǁaen aib ge Davida gere ǂâiǂhansen, ǃgomsin tsî ǃâitsân hōǃâb geren xa. (Psa. 18:​4, 5) Xawe i ge Jehovab di ǀnamxaǃnâ kōǃgâsa gere khoakhoabi. Jehovab ge ǁîb tsauhâ ǀhōsaba ǀgâxa ǃkhaidi ǃnâ “ǁgoe kai tsî ǃnōsa ǁgamgu ǃoa ra ǂgaeǂgui.” ǁNās xa ǃaromahe hâseb ge Davida ǁîb di ǀgaiba hō-oa tsî Jehovaba ǃgâiaǂgaob ǀkha ge ǃoaba ǀgara. (Psa. 18:​28-32; 23:2) ǁNās ǁkhās khami, “hâhâ ra ǀnammi ǃKhūb dib ǃaromas ge hîǀhuruhe tama da hâsa” ǃgomsina da ga sida ûib ǃnâ hōǃâ o. (ǃG.am. 3:22; Kol. 1:11) Davidi ûib ge hoaǁae ǁkhōǁkhōsa mâsib ǃnâ ge hâ i. ǁÎb ge ǂgui ǀgaisa khākhoena ge ūhâ i. Xaweb ge Jehovab ǀnamma ǃnorasa tsî sâuhe hâse gere tsâ kaibi. Davidi ge gere hōǃâ Jehovab ge hoaǁae ǁîb ǀkha hâ isa tsî ǁnās ge ǁîba ǂgomǃgâsiba gere mā. ǁNā-amagab ge saorase ge ǁnae ǁkhā i: “[Jehovab] ge hoaraga ǃaob tiba xu ge ore te.” (Psa. 34:4) Davidi ge kaise ǀnî ǁaen ai gere ǃao, xawe Jehovab ǀnammi ge ge ǀgaisa i ǁîb ǃaob ǂam-ai. w24.01 30 ¶15-17

Joasi ge dī ǁgai mîǁguiga xu ǁkhāǁkhāsen. ǀGapi Pristeri Jojadab ge ǁōs khaoǃgâb ge Joasa ǁgai xūna gere dī kaibi ǀhōsana ge hō. (2Kro. 24:​17, 18) ǁÎb ge Judab di ǂgaeǂgui-aogu, Jehovaba ǀnam tama gu aiǁgausa ge sao. ǁÎna xub ge ga hâbē hâ, ǃgâi tama xūnan gere dī amaga. Xaweb ge ǁîb di ǁgai ǀhōsana ge ǃgâ tsî ǁîb ǃgâb Saxariab ge mî-unubabi, ob ge Joasa ǁîba ge ǃgam kai. (2Kro. 24:​20, 21; Mat. 23:35) Nēs ge kaise ǁgai tsî ge gâre i. Joasi ûib ge ǃgâise ge tsoatsoa xaweb ge ega Jehovaba ǃoaba ǀû tsî ge ǃgam-ao kai. Tsîb ge ǀams ai ǁîb sîsen-aon xa ge ǃgamhe. (2 Kro. 24:​22-25) Aiǃgû tsîb ga Jehovab tsî ǁîba a ǀnamna ǃgâ hâ, ob ge ǁîb ûiba ǃgâise ga ǀamǂoa hâ. w23.09 9 ¶6

Jesub ge ge ǂan i apostel Petrub ǂgomǂgomsase a hâ ǁkhā ǃkhaisa. ǁNā-amagab ge Jesuba, Petruba ge mîba îb “tā ǃao.” Jesub ge Petrub ǃnâ ūhâ i ǂgomǃgâsib ge Petrub di ûiba ge dawa. Petrub tsî ǁîb ǃgâb Andreab tsîkha ge ega ǁîkha di ǁauǃkhō sîsen-e ǁnāxu, tsî ǀoasase Mesiaba ge sao tsoatsoa. Tsîb ge Jehovaba ǁîkha ǂgui ǀgaugu ǃnâ ge ǀkhae. (Mrk. 1:​16-18) Petrub ge ǂgui ǃgâi xūna ge hōǃâ, Xristub di sao-aob ase. Jesub ǀaehana ǂgauǂgau, demonga ǃkhaeǂui tsî ǁō hana khâisa gere mâ ǃkhaisab ge ge mû. (Mat. 8:​14-17; Mrk. 5:​37, 41, 42) Petrub ge Jesub hānîǁaeb di Gao-aoseb nî ǂgaeǂgui ai-īsiba ge mû. ǁÎb ge tatsē nēsa ge ǀuru tama hâ i. (Mrk. 9:​1-8; 2Pet. 1:​16-18) Petrub ge Jesubab ga sao tama hâ, ob ga mû tama hâ xūna ge mû. Kaiseb ge ge ǂkhî i, ǃgâi tama ǂâiǀgauga sîsenǂam tsîb ge nē ǀkhaega a hōǃâ o. w23.09 21 ¶4-5

ǁÎb di ǂguro sîǂkhanis ǃnâb ge apostel Petruba “ǀaexase ǀnamgu” ti hâ mîsa ge sîsenū. ǁNāti-i ǀnammi ge “ǂgui ǁorena” ra ǃgū-ai. (1Pet. 4:8) ǀNîsib ge Petruba kurin ǃkharu hâseb ge Jesuba ǀûbab xa ǁkhāǁkhābi xū-e ge ǂâihō. ǁNā ǁaeb aib ge Petruba ǀnîsi gere ǂgom khoexaǃnâsibab ge ūhâ isa, mîb ge o ǁîb ǃgâsa-eb “hû ǃnādi” kōse a ǀûba ǁkhāsa. Jesub ge ǁîb tsî hoa da tsîna ge mîba î da “hûdisi ǃnādi di hû ǃnāde” ǀûbagu. (Mat. 18:21) Tā ǂhabuǂâi re nē ǀapemāsa du ga dī ǁoa o. Jehovab ǃoaba-aon ǀoasa kurusa ūhâ tama hân ge ǀnî ǁaeb ai a ǃgombahe ǀûbasa. Nēsi ǂhâǂhâsas ge î du dī ǁkhā du a, xū-i hoa-e dī sadu ǃgâsa-e ǀûba tsî ǂkhîba kuru. w23.09 29 ¶12

ǁAub ǃnāb ǃnâb hâ hînab ge Jonaba ǂgomǃgâsiba ge ūhâ i, Jehovab ǁîb ǃgamǃgamsenxa ǀgoresa nî ǁnâusa tsîb Jehovaba nî huibisa. Jehovab ge Jonaba ge sâu tsîb ge ega mā-eb ge hâ i ǁgaumâisa ge dīǀoaǀoa. (Jon. 2:10–3:4) ǃGomsiga du ga hōǃâ ǁaeb ai i a ǃgom, Jehovaba ǃoa ǀgoresa? Tamas ka io du ǂkhabusase ǁkhāǁkhāsens ǃaroma ra tsâ? ǂÂis ǃnâ ūhâ, Jehovab ge sadu di mâsiba ǃamkuse ra ǁnâuǃā. ǃNubu ǀgoresa du ga dī xawe ǂâis ǃnâ ūhâ re, Jehovab ge ǂhâ du hâ-e ǁnā ǁaeb ai nî mā du. (Efe. 3:20) ǀNîsi du ga ǀaeb tamas ka io ǃgâi tama tsâsigu xa ǃaromahe hâse khomai tamas ka io ǁkhāǁkhāsen hō tama io, o du ge ǃkhōǁnâsa Elobmîs khomaiǃâde ǃgâ tsî ǁîs ai a ǃgaoǃgaosa ǂkhinin tsîna a khomai ǁkhā. ǀApeǂhumisa xu hâ ǁnae-amde ǃgâ tsî du ge jw.orgs ai hâ vidiogu tsîna kō ǁkhā. Jehovab ge ra ǀgaiǀgai du, ǁîba ǃoa du ga ǀgore o. Tsîb ge ǁîba sadu ǀgorede Elobmîs tsî nau xūn ǃnâ-ū nî ǃeream. w23.10 13 ¶6; 14 ¶9

Tabernakeli tsî tempelgu hîna ge Jerusalems ǃnâ gere omhe gu ge ǀguiti gere mûsen. ǂGanaga î ge ǀgam kamera ge hâ i. ‘ǃAnu ǃkhaib’ tsî ‘Hoan xa ǃanu ǃkhaib’ ti ge ǂansa i ra. Nē ǀgam ǃkhaira ge lapip ǀkha ge ǀgorasa i. (Heb. 9:​2-5; Eks. 26:​31-33) ǃAnub ǂganaga î ge ǃhuniǀuriba xu kurusa lamdi, altars ǃgâi ham xūn nî ǂhūbi-aihes tsî tafels tsîna ge hâ i. “ǂKhauhesa Pristeri” ǀguib ge ge mā-amsa i, ǃanub ǃnâ ǂgâsa îb ǁgaumâiheb hâ sîsenne dī. (Num. 3:​3, 7, 10) Hoan xa ǃanu ǃkhaib ge ǃhuniǀuriba xu kurusa arki ǃgaeǀhaos tiba ge ūhâ i ǁîb ge Jehovab hâsa gere ǂnûǁkhaeba. (Eks. 25:​21, 22) Mâ kurib hoabab ge ǀGapipristeri ǀguiba ge mā-amsa i ǁnā ǀapip ǃnâ-ū hoan xa ǃanub ǃnâ ǂgâsa, ǀûbagus tsēs ai. (Lev. 16:​2, 17) Xamanin ǀaob ǀkhab ge gere ǂgâ, îb ǀûbagusa ǁîb tsî hoa ǁaes ǁoren ǃaroma dī. Jehovab ge tabernakeli ǃnâ ge hâ i xūn tae-e ra ǂnûǁkhaeba ǃkhaisa ge ǂanǂan.—Heb. 9:​6,7. w23.10 27 ¶12

ǁAeba xu ǁaeb ǀkha da ge “ǀnamgu re” ti hâ mîmāsa, Elobmîs ǃnâ ra khomai. (Jhn. 15:12; Rom. 13:8; 1Tes. 4:9; 1Pet. 1:22; 1Jhn. 4:11) Xawe ǀnammi ge ǂgaob ǂganagaba xu hâ tsâsiba, nē tsâsib ge khoe-i xa mûheǁoa. ǁNās ǀkha da mati ǃgâsana ǀnamma a ǁgau ǁkhā? ǁNāsa da ge sida mîdi tsî dīgu ǃnâs tsîna ǁgau ǁkhā. Amase ǂgui ǀgaugu ge hâ sida ǃgâsana da ǀnamma a ǁgau ǁkhāga. Saora aiǁgaude kō re: “ǀGūkhoe-i â-i ǀkha amaba ǃhoa.” (Sax. 8:16) ‘ǂKhîb ǃnâ sa ǀgūkhoe-i ǀkha ûi.’ (Mrk. 9:50) ǂGurose “ǃgôasiba ǁgausa turaxaba.” (Rom. 12:10) ‘ǃKhōǃoagu re.’ (Rom. 15:7) ‘A i nē-e nau-e . . . ǀûba.’ (Kol. 3:13) “A i nē-e nau-i di ǃgomma tani.” (Gal. 6:2) ‘ǀGaiǀgaiǃnâgu ǀgara.’ (1Tes. 4:18) ‘Omkhâigu ǀgara.’ (1Tes. 5:11) ‘ǀGorebagu du re.’—Jak. 5:16. w23.11 9 ¶7-8

Tsēs hoasa da ge mîǁguiga ra dī hîna ǀgaisa ǂgomsa ǂgaoǀkhā hâ ga. Aiǁgause mîǁguiga da ge ra dī hîna sida ǀhōsan, ǁkhoaxa ǁaeba da nî ūhâ ǀgaus, ǁkhāǁkhāsens, ǃgammeb, ǀgôan tsî sida sîsenni tsîna ǃkhōǂgā hâga. ǃGâise da ge ra dī dîsen da ga o: ‘Ti mîǁguiga ǁgau i ra tita ra ǂgom ǃkhaisa nē ǃhūbaib nî ǀam tsî ǀgūǁae nî ǃkhōǃhunihesa Elob ǀasa ǃhūbaib ǀkha? Tamas ka io ti mîǁguiga ra ǂgaeǂkhapuhe, khoen hîna ǁōb tawan hoa xūna ra ǀamse ra ûin xa?’ (Mat. 6:​19, 20; Luk. 12:​16-21) Sada di ǂgomsa da ga ǀasa ǃhūbaib ǃkhaese nî ǀkhīs ǃnâ ga ǀgaiǀgai, o da ge ǃgâi mîǁguiga nî dī. ǀGaisa ǂgomsa ǂgaoǀkhā hâ ǃgomsin tsîna da ge ra hōǃâ. ǀNîsi da ge ǃgôaǃgonhe, ǂgauhe ǁoasa ǀaeb tamas ka io da ge ǀkhara xūn hîna a ǂkhabuǂâi kai ǁkhā dana ra hōǃâ. ǂGuro da ge ǀnîsi a tsâ ǁkhā sida di ǃgomsigu ǃnâ da a mâǀgai ǁkhā di. Xawe nēti ī ǃgomsin ge gaxu ǁaeba a aiǃgû ǁkhā. ǁNā-amaga da ge ǀgaisa ǂgomsa ǂhâba hâ î da mâǀgai ǁkhā. Tsî Jehovaba ǃgâiaǂgoab ǀkha ǃoaba ǀgara.—1Pet. 1:​6, 7. w23.04 27 ¶4-5

Jehovab ge ra ǂgaoǀkhā da, î da sida ǃâba dī ǀgore toa da ga o. Aiǁgauseb, ge ǃgâsaba Jehovaba a ǂgan ǁkhā îb hui-e sîsen-e xu ǂgan ǁnāsensa tsî ǀkharib kai ǀhaosa hâǃnâ ǁkhā. Jehovaba ǁnā ǀgoresa mati a ǃeream ǁkhā? ǀNîsib ge nē ǃgâsaba ǂhâb hâ ǁkhoaǂgaosiba a mā ǁkhā îb ǁîb di ǀhonkhoeb ǀkha sī ǃhoa. Xaweb ge nē ǃgâsaba khâima tsî ǁîb di ǀhonkhoeb ǀkha sī ǃhoa tsî nî ǂganǁnâsen. ǀNîsib ge ǂgui ǃnāde nî ǂgan. ǀNîsib ge ǀnî sîsenǁare-aob ǀkha nî ǃhoa îkha sîsen ǁaega dawa. Tsî ǂhâbasa i ga ob ge ǀnîsi a mî ǁkhā, matarehe tamaseb ge sîsen-e xu a ī ǁkhā ti. Jehovab ge ra ǂgaoǀkhā da î da hoaǁae sida di ǂhansendi ǃaroma ǀgore. Jesub di mîde xu da ra ǁnâu khammi i ge sida di ǂgande ǁkhā ǁaeb ai ǃereamhe tide. (Luk. 11:9) ǁNā-amaga da ge tā nî ǀûsen. ǂGaoba xu da ge hoaǁae nî ǀgore. (Luk. 18:​1-7) Aiǃgû tsî da ga xū-i ǃaroma ǀgore, o da ge Jehovaba ra ǁgau nē da ra ǂgan xū-i a ǂhâǂhâsaba da ǃkhaisa. Tsî da ge ǂgomsa ra ǁgau ǁîb nî huidasa. w23.11 22 ¶10-11

Jehovab ge ǁîb ǀhōsab Abrahamma ge mîmâiba, hoaraga ǁaedi ǃhūbaib ai hâ di ǁîb ǃnâ-ū nî ǀkhaehesa. (Gen. 15:5; 22:18) Abrahammi ge ǀgaisa ǂgomsa Elob ǃnâ ūhâ i, amagab ge gere ǂgom Elob mîmâidi nî ama kaisa. Xaweb ge Abrahamma ge 100 kurixa i tsî ǁîb tarasa 90. Nē ǂgomǂgomsa khoe-aogu ra ge ǀgôa-e ge ūhâ tama hâ i. (Gen. 21:​1-7) Elobmîs ge ra mî: “Abrahammi ge ǃâubasens tsî ǂgoms ǃnâ ǁîb ǃâubasensa mâtib ga mâsiba ǃâubasen-e ūhâ tama khami ī, xawe ge ǁgui. ǁNā-amagab ge ǂgui ǁaede ǁgûse ge ība.” (Rom. 4:18) ǂAn du ase î ge Abrahammi ǃâubasensa ge dīǀoaǀoahe. ǁÎb ge ge Isaki dadasa kai. Tae-i ǃaromab ge Abrahamma ǂgomǃgâsiba ūhâ i Jehovab ǁîb mîmâisa nî dīǀoaǀoasa? Jehovab ǀkhab ge ūhâ i ǀgū ǀhōsagusis xab ge Abrahamma ǀoasase ge ǂan i, “Elob mîmâib gena dīsa a ǁkhā ǃkhaisa.” (Rom. 4:21) Jehovab ge Abrahammi ǀkha ge ǂkhî-i tsî ǁîb ǂgoms ǃaroma ǂhanu-aib a ti ge mî.—Jak. 2:23. w23.12 8 ¶1-2

ǂGomǃgâhe ǁkhāb asa ra ǁgau ǃgâsab ge, māheb hâ ǃereamde ra dīǀoaǀoa. Jesub di aiǁgausa ǃgaoǃgâ. ǁÎb ge ǂgomǃgâhe ǁkhāb asa hoaǁae gere ǁgau. Jesub ge Jehovab ge mîmābi xūn hoana ge dī, nēs ge ǀnî ǁaega ǃgom ī xawes tsîna. Jesub ge khoena kaise ge ǀnam-i, ǃgōsase ǁîb di ǁkhāǁkhāsabega. Tsîb ge ǁîba ǁnās ǀkha māsenxase ǁîb ûiba ǁîn ǃaroma ge mā. (Jhn. 13:1) ǁNās ǀkha Jesuba ǁgaes ǃnâ-ū māhets ta ǁgaumâidi hoade dī re. Nēsats mati nî dīsats ga ǀū, o nau ǃgâsagu ai huiba ǂgan re. Nēs ǃnâ-ūts ge ǃgamǃgamsenxasiba ra ǁgau. Tā māhets hâ ǁgaumâidi ǃnâ ǂkhari ǃârogu ǀguiga dī. (Rom. 12:11) ǁNās ǀkha sa ǁgaumâis ǃnâ “khoe-i ǃaromas ose xawe ǃKhūba ra sîsenba khami sîsen re” tsî ǁîsa dītoa. (Kol. 3:23) Tsî ǂâis ǃnâ ūhâ re ǀoasasets kuruhe tama hâ amagats ge a dīsa ǁkhā. ǁNās ǀkha māsenxase sa dīsāde mûǂan re.—ǂKhm. 11:2. w23.12 26 ¶8

Kaise kai ǃgâiaǂgaob ge ǁāǁnâhe tsî Jehovab omaris di ǁani kaisa. Nē aiǂhanuba ūhân ge Psalmdi xoa-aob Davidi mîde ra ǃkhō-am nēti ra mîde: “ǀKhaehe i ge hâ ǁnā-i ǁî-ets ra ǁhûi tsî ǀgūǀgū-e.” (Psa. 65:4) Jehovab ge mā-am tama hâ î-i mā khoe-i hoa-e ǁîb omaris di ǁani kai. ǃKharugo ǁkhāǁkhāǃâs ǃnâ i go ǃhoaǃgaohe khamib ge Jehovaba ǁîb ǀgū ǀhōsase ra hâ ǂgaon ǀguina ǁîba ǃoa ra ǂgae. (Jak. 4:8) Jehovab ai māǁnâsen tsî du ga ǁāǁnâhe o du ge ǀō-aisa ǀgaub ǃnâ Jehovab ǀgūse ra hâ. ǁĀǁnâs khaoǃgâ du ge a mû ǁkhā Jehovab “ǀhommi di mûǂuidaode ǁkhowa-am tsî ǃnāǂamsa ǀkhaeba” ǁhōǂuibatsi ǁkhā ǃkhaisa. (Mal. 3:10; Jer. 17:​7, 8) ǁĀǁnâs ge a tsoatsoa Jehovaba ǃoabasa. ǁKhā du a-i hoa-e du ge nî dī ǂgao, māǁnâsens mîǁguiba dīǀoaǀoa. ǂGomǂgomsase du ge nî hâhâ ǃâitsâhe du ga xawe. (Aoǁn. 5:​4, 5) Jesub ǁkhāǁkhāsabe-i ase du ge ǁîb aiǁgaudi tsî mîmâidi tsîna ǂōrisase nî sao.—Mat. 28:​19, 20; 1 Pet. 2:21. w24.03 8 ¶1-3

ǃGamme hâ khoera ga ǃgâibahe tama io ǀguiba hâ ǀhaosa? ǁNāti î ga io, tae-e du a dī ǁkhā? ǀAes di aiǁgaus xa ǂâi re. ǀAes ge ǃkhaese khau tsoatsoa tama hâ. Kai ǀaen ge ǂause nî ǂgāhe. ǁKhā ǀgaub ǃnâ, tae-i ǃaroma ro tsēs ǃnâ ǀgui ǃnâsa hâ ǀhaos ǀkha tsoatsoa tama hâ? Saro a ǃgâiba xū-e ǀguiba dī ǀhao re. (Jak. 3:18) ǂKharirose tsoatsoas ǃnâ-ū ro ge ǀnammi mati ǁkhawa ra kai ǀgauba nî mû. ǃGôasib ge ǃgammeb ǃnâ kaise a ǂhâǂhâsa. ǁÎ-i ge ǂoab hîna ǀaesa ǀgaisase ra khau kai-i khami ī. ǂOab oses ge ǀaesa ǃhaese ra ǁō. ǁKhā ǀgaub ai ǃgôasib ga ǀkhai o, o ra ge ǃgamme hâ khoera nî mû ǁîra ǀnammi ǃkhais ǀguis ra disa. Aob tsî taras ǃgôasiba ǁgaugusa ra dītsâ ra ge, ǁîra di ǀnamma ûitsamase ra ūhâ. Nēsa ǂâis ǃnâ ūhâ re, ǃgôasibats ra ǁgau di ǂâis ge ǂhâǂhâsa tama hâ. Xawe î ge ǃgammets hâ khoe-e nî tsâ ǃgôasiba î ra ǁgauhesa. w23.05 22 ¶9; 24 ¶14-15

Elobmîs ǃnân ge ǂgomǂgomsa ǃoaba-aon Elob dina ǂâiǂhansen tsî gere ǃao, ǁîn khākhoen tsî naun xan gere ǁgâiǀāhe amaga. (Psa. 18:4; 55:​1, 5) ǁNās ǁkhās khami da ge ǀnîsi a mâǃoahe ǁkhā, skoli, sîsenni, omaris ǁanin tamas ka io ǂhanub xa. ǁŌ da nîsa da ge ǀnîsi ra ǃao, ǀaesen da hâ amaga. ǁNāti ī ǁaeb ǃnâ da ge hui-e ūhâ tama ǀgôaro-i khami a tsâ ǁkhā. Jehovaba mati nēti ī ǁaeb ǃnâ ra hui da? ǁÎb ge ǁkhaeǂgao tsî ra khoakhoa, ǁnā-amaga ǃnāsa ǁaeba Jehovab ǀkha ǀgores ǃnâ ǃhoa tsî Elobmîsa khomai. (Psa. 77:​1, 12-14) Nēti ī ǁnaetiba du ga ūhâ, o du ge ǂgurose sadu ǀhomsi ǁGûba ǃoa nî ī, ǂâiǂhansen du ga o. Sadu ǃaob tsî ǂâiǂhasens tsîna Jehovab ǀkha ǀgoragu re. ǁNāpaxu ǁîba ǃgâ re Elobmîsa khomais ǃnâ-ū. ǁNāsa du ga dī o du ge nî mû, ǁkhaeǂgao dub ra ǀgausa.—Psa. 119:28. w24.01 24-25 ¶14-16

Kaise î ge a ǂhâǂhâsa sadu mîǁguiba sīǃnâs ǃaroma ǀgaisa turaba ūhâsa. Mîǁguib ǃgao du ga ǀgaisa turaba ūhâ, o du ge ǃgarise nî sîsen ǁî-e sīǃnâs ǃaroma. ǀGaisa turaba da ga ūhâ, o da ge sida mîǁguiga a sīǃnâ ǁkhā. Tae-e da dī ǁkhā, î da ǀgaisa turaba ūhâ ǁkhā? Turaba ǀgoreba re, ǁîb di ǃanu gagab ǃnâ-ūb ge Jehovaba ǀgaisa turaba a mā du ǁkhā, î du sadu mîǁguiba sīǃnâ. ǀNî ǁaegu ai da ge mîǁguiga ra dī, ǁî-e da nî dīsa da a ǂan amaga. Xawe da ge ǁî-e sīǃnâs di turaba ǀnîsi ūhâ tama hâ. Jehovab ge dība du xūn xa ǂâiǃgâ re. (Psa. 143:5) Apostel Paulub ge Jehovab ge ǁîb ǃoa a ǁgau ǃgâisib xa gere ǂâiǃgâ. Tsî nēs ge ǁîba turaba ge mā, îb ǃgarise Jehovaba sîsenba. (1Kor. 15:​9, 10; 1Tim. 1:​12-14) ǁKhā ǀgaub ǃnâ du ga Jehovab ge dība du xūn xa ǂâiǃgâ, o du ge turaba nî ūhâ sadu mîǁguiga sīǃnâsa.—Psa. 116:12. w23.05 27 ¶3-5

Sada ǀhomsi ǁGûba da ge ra ǂkhîǂkhî ǁîb ǀonsa da ga koa o. (Psa. 119:108) Nēsa ra ǂâibasen Hoaǀgaixa Elob ǀoasa kurusa ūhâ tama khoen khami īsa tsî naun xa koahesa ra turasa? Hî-î. Sada ǀhomsi ǁGûba da ga koa, o da ge ra ǁgau ǀnî hâ ǂhumib ǁGâuab sida xa ge mîb ama tamasa. ǁGâuab ge ra mî khoe-i ǂgomǂgomsase Elob ǀonsa ǁkhaeba tidesa ǃâitsâhe i ga o. ǁÎb ge ra mî nēs sida ǃaroma a ǃgâi ti da ga ǂâi, o da Eloba nî ǃoaba ǀûsa. (Job. 1:​9-11; 2:4) Xaweb ge Joba ǂgomǂgomsase Elob ǃoagu ge hâ tsî ge ǁgau ǁGâuab a ǂhumi-aosa. Sadu tsîna ǂgomǂgomsase Elob ǃoagu nî hâ? Hoa da ge sada ǀhomsi ǁGûb ǀonsa ǁkhauba tsî ǂgomǂgomsase ǃoaba ǀgara ǁkhā. (ǂKhm. 27:11) Amase kai aiǂhanub ge nēsa dīsa. w24.02 8-9 ¶3-5

Moseb tsî Josub gere ǂgaeǂgui kuriga ǃkharu tsîb ge Jehovaba ǂhanuǂhanu-aoga ge ǁgaumâi, î gu ǁîb khoena daoǁgau. ǁNā ǁaeb ǃnâb ge Jehovaba kēbo-aoga ge ǁgaumâi, î gu ǁîb khoena daoǁgau. ǂGomǂgomsa gao-aogu ge kēbo-aogu gere mā daoǁgausa gere sao. Aiǁgauseb ge Gao-aob Davida ǃgamǃgamsenxase ǁnamasa ge ūǃoa, kēbo-aob Natana xu. (2Sam. 12:​7, 13; 1Kro. 17:​3, 4) Gao-aob Jehosafati ge kēbo-aob Jehasieli ai gere ǂgomaiǂnûi daoǁgaus ǃaroma tsî khoena ge ǂkhâǃnâ, în Elob “kēbo-aob go mîba” nî xūn ǃnâ ǂgom. (2Kro. 20:​14, 15) ǂÂiǂhansenni gere ob ge gao-aob Hiskiaba kēbo-aob Jesajaba ǃoa gere kō daoǁgauhes ǃaroma. (Jes. 37:​1-6) Gao-aogu ge Jehovab di daoǁgausa sao tsî ǃnās hoasa gere ǀkhaehe. ǁNās ǃnâ-ūs ge ǁaes tsîna gere ǁkhaubahe. (2Kro. 20:​29, 30; 32:22) ǃGāsase î ge gere mûsen Jehovab ge ǁîna kēbo-aogu ǃnâ-ū gere daoǁgausa. w24.02 21 ¶8

ǁGâuab ge ra ǂhâba i da ǁnā khoen hîna Jehovaba ǁnâuǀnamsa ra ǃgom kaiba dan ǀkha hâ. ǂÂis ǃnâ da ge nî ūhâ, hâ-ū da ra khoen xa da ga ǃhoa, o i ge internets ǃnâ-ū da ra ǃhoa-u khoen tsîna ǃkhōǂgā hâ. Nē ǃhūbaib di ǂâiǀgaub ǃoagu da ge nî ǃkham hîna ra ǁgauba ǃgâi tama ǁgoe-ugu ǀgaugu a ūǃoahe ǁkhā ti. Sida ge a ǂan nē-i a tsūsa. (Efe. 4:​19, 20) Dîsen ǁkhā da ge a: ‘ǁGutsâ i ta ra î ta tā sîsenǀhao-ū ta ra khoen, ti klas ǃnâ hâ khoen tamasa ka io ǀnî hâ khoen hîna Jehovab ti ǂhanu-ai ǁgaraga ǃgôaǃgâ taman ǀkha hâǀhao? ǁKhoaǂgaose ta Jehovab ǁgaraga ra ǃkhōǀgara khoen xa ta ga mîhe xawe?’ 2 Timoteub 2:​20-22 ra mî khami da ge ǀhōsana da ga ǀhaohâb ǃnâ ǁhûibasen o nî ǂanbasen. ǂÂis ǃnâ da ge nî ūhâ ǀnî ǀhōsan ge hui da tide, î da ǂgomǂgomsase Jehovab ǃoabas ǃnâ hâ ǀgara. w24.03 22-23 ¶11-12

Jehovab ǀgauga mûnan-ai tsâ î du hâ? Jehovab mûhe ǁoa xawes ge Elobmîsa ǁîba ǃkharagaǃnâgu ǀgaugu ǃnâ ra ǁguiǃā. Jehova “Elob ge sore tsî a” ǁkhau-ū khō tsî “hîkākā ra ǀaese” ǂansa. (Psa. 84:11; Heb. 12:29) Elobmîs xoa-aob ge Jehovaba safir ǀui-i, ǂkhai ra ǃnâb tsî ǀapiǃhanab [rainbow] ase ge ǁguiǃā. (Ese. 1:​26-28) Jehovaba da mû tama amaga î ge a ǃgom ǁkhā, ǁîb a ǀnam dasa ǂgomsa. ǀNîn ge ra ǂâi, Jehovab tātsē ǁîna ǀnam tide ǃkhaisa, ǁîn ûigu ǃnân ge hōǃâ hâ-i xūn xa ǃaromahe hâse. Jehovab ge nēti ī tsâsiga ra ǁnâuǃā tsî matin sida ra tsâǀkhāsa. Sida huis ǃaromab ge ǁîb di îsa ǀgauga Elobmîs ǃnâ xoa hâ. Jehovab ge a ǀnam, Elobmîs tsîn ge “Elob a ǀnam” ti ra mî. (1Jhn. 4:8) Dīb ra xūn hoan ge ǀnammi ai a ǃgaoǃgaosa. Elob di ǀnammi ge kai tsî a ǀgaisa tsîb ge ǁîba ǀnam khoen ǀguina ǁnā ǀnamma ǁgau tama, xawe ǁnān ǁîba ǀnam taman tsîna.—Mat. 5:​44, 45, 45. w24.01 26 ¶1-3

Jehovab ge Moseba ge ǁgaumâi, îb Israelǁaesa Egipteba xu ǂgaeǂgui. Tsîb ge Israelǁaesa mûhe ǁkhā ǁgauǁgauna ge mā, ǁînab ge ǃâus ǀkha tsēa gere daoǁgau tsî ǀaes ǀkha ǃui-a. (Eks. 13:21) Moseb ge nē ǃâusa ge sao, ǁîb tsî Israelǁaes tsîna ge ǀapahurib tawa a sī-ūsa. Xawe gu ge Egipteǁîga, Israelǁaesa ge sauru. Tsîs ge Israelǁaesa kaise gere ǃao, Egipteǁîn xan nî ǃkham-e din gere ǂâi amaga. Nēsa dīs ge ge ǂhanu-i. Jehovab ge Moseba ge sîsenū îb ǁaesa ǁnāǀî daoǁgau. (Eks. 14:2) Elob ge ǁnās ǃnâ-ū ǁaesa buruburuxa ǀgaub ǃnâ oresa ge mā. (Eks. 14:​26-28) Moseb ge 40 kuriga ǁnās khaoǃgâ, aiǃgû tsî ǃâus ai ge ǂgomaiǂnûi îb ǃgaroǃhūb ǃnâ daoǁgauhe. (Eks. 33:​7, 9, 10) ǁNā ǃâus ǃnâ-ūb ge Jehovaba Moseb ǀkha ǃhoa tsî daoǁgaude gere mā Jehovab ge tae-e a mîsa. Israelǁaes ge ǃgāsase ge mû ǁkhā i, Jehovab ge Moseba gere sîsenūsa îb ǁîna daoǁgau. w24.02 21 ¶4-5