Augustub

ǃGaoǃgâ re ǀgam ǂhâǂhâsa xūna nē psalms ǃnâ: (1) ǂHanu-ai khoen ge ǃgomsina ra hôǃâ. (2) Jehovab ge ǃgomsina xu ra ǃnoraǃnora da. Jehovaba mati ra ǃnoraǃnora da? ǀGui ǀgaub hînab da hui dab ge ǂhanu ǂâi ǀgauba, nē ǃhūbaib ǃnâ ūhâsa. Jehovab ge ra mîmâi ǁîba da ga ǃoaba, o da ǃgâiaǂgaoba nî hōǃâ ti. Xaweb ge nēsi da sada ûib ǃnâ ǃgomsina hōǃâ tide ti mîmâi tama hâ. (Jes. 66:14) ǁÎb ge ra ǂkhâǃnâ da î da hānîǁaeb ai ǂâisa ǂnûi, hîna da ǀamose ǁîb ǂhâba hâse ǃgâiaǂgaob ǀkha nî ûiba. (2Kor. 4:​16-18) Xawe nē ǁaeb ǃnâb ge ra hui da, î da ǁîba tsēs hoasa ǃoaba ǀgara. (ǃG.am. 3:​22-24) Taena da ǁkhāǁkhāsen ǁkhā, ǂgomǂgomsa ǃoaba-aon Jehovab dina xu, sada tsēdi ǃnâ hâna? Mû da nî khami da ge ǃâubasen tama da hâ ǃgomsina nî hōǃâ. Xawe da ga Jehovab ai ǂgomaiǂnûi, ob ge tāstē ǁnāxuǃnâ da tide. Tsî hoaǁae nî hui da.—Psa. 55:22. w23.04 14-15 ¶3-4

Josefi tsî Marias di aiǁgausa xu da ge a ǁkhāǁkhāsen ǁkhā. ǁÎra ge māsenxase ǂhanuga ge ǁnâuǀnam nēs ge ǁîra ǃgomba i xawe. (Luk. 2:​1-6) Marias ge 9 ǁkhâga ǀgamǀkhā i ǁaeb ǃnâ ra ge kaise ǃgom xū-e ge hōǃâ. ǁNā ǁaeb aib ge Augustub Romeǁîn Gaosib di ǂgaeǂgui-aoba ge ǂgaoǀkhā în khoena sī xoamâisen. Josefi tsî Marias tsîn ge Betlehemsa ǃoa ge ī, ǁnā daob ge 150 kilometerga kaise ge ǃnū i. ǁNā daob ge Marias ǃaroma ga ǃgâi tama hâ. ǁÎra ge noxopa ǃnae tama ǀgôarob tsî Marias di ûib xa gere ǂâiǂhânsen. ǁNā ǀgôabas ga hō hâ, o i ga mati i hâ? ǁÎs ge hānî Mesiaba ge tani hâ i. ǁÎra ǂhanub di ǁgaraga ga ǁnâuǀnam tama hâ? Josefi tsî Marias tsîn ge ǂâiǂhânsen ra gere xawe ǂhanuba ge ǁnâuǀnam. Jehovab ge ǁîra di ǁnâuǀnamxasiba ge ǀkhae. Marias ge ǃnorasase Betlehems ǃnâ ge sī tsî îxa ǀgôaroba ge hō. ǁÎs ge nēs ǃnâ-ū Elobmîs kēbosa dīǀoaǀoas ǃnâ ǃâ-e ge ūhâ i.—Mix. 5:2. w23.10 8 ¶9; 9 ¶11-12

Tae-e du nî dī ǀhao di tawa du ga ǃeream ǂgao xawe du ga ǃao o? Huiba du ge a hō ǁkhā ǃgâise du ga aiǂhomiseno. (ǂKhm. 21:5) ǃHoaǃgaohe ra xūna du ga ǃgâise ǂan, o du ge supuse nî ǃeream. Sadu di ǃereams tsîna ǃnubuse ūhâ re. (ǂKhm. 15:23; 17:27) ǃNubu ǃereamsa du ga mā, o du ge ǁnātikōse ǃao tide. ǃNubu ǃereamsa du ga sadu mîdi ǃnâ mā, o du ge nî ǁgau ǃgâise du aiǂhumisen hâsa. Tsî du ǁnāpa ra ǃhoaǃgaohe xūn tsîna ǃgâise ra ǁnâuǃāsa. Tae-e du nî dī nē ǀapemāde du dītsâ hâs khoaǃgâ du ga noxopa ǀgui tamas ka io ǀgam ǃeream ra māsa ǃao o? ǂGomǃgâsiba du ge ūhâ ǁkhā, Jehovab sadu ǁgūtsâde ra ǃgôaǃgâsa. (Luk. 21:​1-4) Jehovab ge dīǁkhā da as xa ǃnāsa-e dī kai da tama hâ. (Fil. 4:5) Kō re tae-e du a dī ǁkhāsa, mîǁguiba ǁî-i xa dī re. Tsî ǃnomsa ǂgaoba ǀgoreba. ǁNā mîǁguib ge ǀnîsi ǃnubu ǃeramsa māsa. w23.04 21 ¶6-8

Apostel Paulub ge soldagu ǂkhaikarise ra hâ gu tsî torob di sarana ana hâ gu ǀkha ra ǀgopeǀnō da. Soldab ge ra ǂgaoǀkhāhe îb hoaǁae ǃkhams ǃaroma aiǂhumisen. ǁNās ge sida ǀkha a ǀgui. Jehovab di tsēs ǃaroma da ge aiǂhumisen hâse ra hâ. ǂGoms tsî ǀnammi di ǁkhaiǁkhausaraba da ga ana o. Tsî ǃâubasens di toroǀgapas tsîna. ǁKhaiǁkhausarab ge soldab ǂgaoba ra ǁkhauba. ǂGoms tsî ǀnammi tsîn ge sada di ǂgaoba ra ǁkhauba. ǁÎn ge ra hui da, î da aiǃgû Eloba ǃoabas ǃnâ tsî Jesub tsîna sao. ǂGoms ge ra ǂâiǂâiǃnâ da ǂgomǃgâsiba da ūhâ ǁkhāsa, Jehovab ǁîba da sida ǂgaob hoab ǀkha ra ôa amaga nî mādawamsa. (Heb. 11:6) Tsî î ge nî hui da, î da Jesub ǃoagu ǂhauǃnâse hâ ǃgomsina da ga hōǃâ xawe. Sida ǂgomsa da ge omkhâi ǁkhā naun di aiǁgaude xu ǁkhāǁkhāsens ǃnâ. Aiǁgause, ǃgâsan hîna ge mâǃoahen tamas ka io marisi ǃgomsina gere hōǃâna xawe noxopa ǁîn di ǂgomsa ǀgaisase gere ūhâna. Tsî da ge mari ǀnamsa xu ǂgōsen ǁkhā, ǁnān hîna ge Gaosib ǃaroma ǀgui ǃgupu ûiga ra ûin di aiǁgaude ǁgaes ǃnâ-ū. w23.06 10 ¶8-9

ǃKhō-oasens ge tsâsigu tsî dī du ra xūna xu ǃkhō-oasensa ǃkhōǂgā hâ. Xawe ǃkhō-oasens tsîn ge ǂhâbasa î-i mîǁguiba sīǃnâs ǀkha ǂkhâǃnâ da. ǃGōsase xū-i ga ǃgom tamas ka io da ga turaba ūhâ tama io. ǂÂis ǃnâ ūhâ re, ǃkhō-oasens tsîn ge gagasi ǂūb di ǃâ. ǁNā-amaga Jehovaba ǂgan re, îb ǃanu gagab ǀkha hui du, î du nē ǂhâǂhâsa ǀgauba omkhâi. (Luk. 11:13; Gal. 5:​22, 23) Tā hānî ǃgâi ǁaeba ǃâu. Nē ǃhūbaib ǃnân ge xūna hoaǁae ǃgâi tide. Nēn nî ǃgâisa da ga ǃâu, o da ge sada mîǁguiba sīǃnâ tide. Turaba da ūhâ tama hâ khami da ge a tsâ ǁkhā, sida mîǁguib kaise a ǃgomsa sīǃnâs ǃaroma. Sadu ga ti a tsâ, o du ǀnîsi ǁnā mîǁguiba ǂkhari ǃârogu ǃnâ a dī ǁkhā? ǀNîsi du ga mîǁgui o gagasi ǀgauga omkhâisa, o tae-i ǃaroma du ǂkhari ǃârogu ǃnâ dī tsoatsoa tama hâ? Elobmîsa khomais di mîǁguiba du ga ūhâ, o tae-i ǃaroma du ǁîsa khomais di ǀapeǁguiba ǃnuburose ūhâ tama hâ? w23.05 29 ¶11-13

ǀUniga tsēdi ǃnâb ge Jehovaba ǁîb ǀapeǂhumis ǃnâ-ū Elobmîs ai ǃgaoǃgaosa ǂûna ra māda. Tsî nē ǂûn ge ra hui, î da hoa da “ǃanu daob” ai ǃgû ǀgara. (Jes. 35:8; 48:17; 60:17) Mî ǁkhā da ge a, khoe-i ga Elobmîs ǁkhāǁkhāsa ūǃoa ǃnâs hoasa î ge ǁî-e “ǃanu daob” ai ra ǃgû tsoatsoa ti. ǀNîn ge ǃnūbu ǁaeroba nē daob ai ǃgû tsî ra ǀû. Naun ge ra mîǁgui nē daob ai ǃgû ǀgarasa ǀamose. ǀAmose nē daob ai ǃgûsa a tae? ǀHommi ǃâubasensa ūhân ge “ǃanu daob” ai ra ǃgû. Hîna ‘Elob di Paradaisa’ ǃoa ra ība ǀhomma ǃoa. (J.ǂHa. 2:7) ǁNān hîna ǃhūbaib ǃâubasensa ūhân ge 1 000 kurigu khaoǃgâ nî hâ ǀamo ûib daob ai nî ǃgû ǀoasa kurusa ūhâse. ǁNā daob ai du ga nētsē ga ra ǃgû o, tā dawasen xawe aiǃgû. Tsî tā ǀûsen ǀasa ǃhūbaib daob ǀams ai du nî sīs kōse. w23.05 17 ¶15; 19 ¶16-18

Jehovab ge dība du xūn hoan xa du ga ǂâi, o du ge ganganxase tsâ tsî ǁîb ǃoa ra māǁnâsen ǂgao. (Psa. 116:​12-14) Elobmîs ge Jehovaba “mâ ǃgâi tsî dīǀoaǀoasa mās hoas” ti mā-aob ase ra ǂgai. (Jak. 1:17) Hoanxa kai ǀkhaeb hînab ge Jehovaba mādab ge ǁîb ǀgôab ǁguibasa. ǂÂis ǀguisa hî re. Xoremarib ge ge īǁkhā kai î du Jehovab ǀkha ǀgū ǀhōsagusisa ūhâ. ǀAmose ûis di aiǂhanub tsînab ge ge mā du. (1Jhn. 4:​9, 10) Māǁnâsens ge ǀgui ǃgâi ǀgaub hîna du Jehovaba ǃgôaǃgâsiba ra ǁgauba. ǁÎb kai ǀnammi tsî nau ǀkhaegu hînab ge mā du gu ǃaroma.—Deu. 16:17; 2Kor. 5:15. w24.03 5 ¶8

Nē ǃhūbaib ra ǂkhâǃnâ ǁgai ǀgaugu xa da ga ǂgâi, o da ge ǂhanu-ai aob Loti khami ra tsâ. ǁÎb ge “tsēsa xu tsēs ǁga gere tsûtsûhe, ǁîn di ǂhanuo sîsengu xa.” ǂAn î ge i amaga Jehovab ǁgai tanisen ǀgauga ǃhui hâsa. (2Pet. 2:​7, 8) Loti ge Jehovabab ge ǀnam-i tsî gere ǃgôa amaga, ǁnā khoen ûhā ǁgai ǀgauga xu ge hâbe. Sîda tsîn ge Jehovab di ǀgauga ǃgôaǃgâ tama khoen ǁaegu hâ. Xawe da ge sîda tsîna ǁnā ǀgauga xu a ǂgōsen ǁkhā. Jehovaba da ga ǀnam tsî eloǃaoǃgâxasiba ūhâba o. Jehovab ge ra hui da î da ǁnāsa dī, ǂKhoamîdi ǂkhanis ǃnâ-ū. Hoa Xrîsteǁî aorekhoegu, tarekhoedi, ǂkhaman tsî kairan tsîn ge ǃgâiba ra hō ga-ai ǁnamas ǁnāpa hâsan ga ūǃoa o. Jehovaba da ga ǃao, o da ge ǁnān hîna ǁgai xūna ra dīn ǀkha ǀhōgu tide. w23.06 20 ¶1-2; 21 ¶5

ǀNîsi du ge ǀaokhoen xa ǀnai ra mâǃoahe. Tamas ka io du ge ǃnāsa mari-e kuru tsî xūna ǁamasa xu ra ǂgōsen Elob Gaosiba ǂgurose sadu ûib ǃnâ mâis ǃaroma. (Mat. 6:33) ǁNāti i ga ī o du ge a ǂgomǃgâ ǁkhā, Jehovab ǁîba du ra dīban hoana a ǂansa. (Heb. 6:10) ǀNîsi di ge sao ra mîdi Jesub tide sadu ûib ǃnâ ge ama kai: “ǁÎ-i di oms, ǃgâsan, ǁgûra, ôasan tamas ka io ūn hâ xūna ga tita tsî ǃgâiǂhôas ǃaroma ǁnāxū-i hoa-i, ge ǂanǂansase nî mādawa-amhe. ǁÎn ge kaidisi ǃnādi kōse omdi, ǃgâsan, ǁgûdi tsî ūn ge hâ i xūna nē hâ ǁaeb ǃnâ nî ǃkhōǃoa, xawe nēn hoana ǃgôaǃgondi ǀkha. Tsî ǃgoaxaǁaeb ǃnâ nēn hoan tawa ǀamo ûiba nî ǀarobahe.” (Mrk. 10:​29, 30) Sadu hō hâ ǀkhaegu ge amabes ǃnâ kaise a ǂgui sadu ǁguibadi ǂam-ai.—Psa. 37:4. w24.03 9 ¶5

Judeab ǃnâ ge hâ i Xristeǁîn ge kai ǃâtsūǀkhāba a hōǃâ o ob ge Antoxias ǃnâ ge hâ i ǀhaohâba ǃâtsūǀkhāb xa a ǁnâu toas khaoǃgâ, ǁîn ǃgâsan hîna Judeab ǃnâ hâna ge tsâba. Tsîn ge ǁîn ǀkhomxaǂgaosiba dīb ǃnâ-ū ge ǁgau. ǁNāpaxūn ge “ǁkhāǁkhāsabena ge mîǁgui tsî î ge mâ-i hoa-e ǁî-i ǁkhāsib ǃoa, ū-i hâ xū-i hoa-e ge mā. ǁÎn di ǃgâsa ǂgomsaben hîa Judeab ǃnâ hâna nî huise.” (ǃNǃkh 11: 27-30) ǁÎn di ǃgâsan ge ǃnūse gere hâ xawen ge Antoxiab ǃgâsana ge mîǁgui ǁîna huisa. (1Jhn. 3:​17, 18) Sida tsîn ge nētsē ǀkhomxaǂgaosiba a ǁgau ǁkhā ǁnâu da ga o, sida ǃgâsan tsūkēǃgâb xa ǁnāǂamhe hâsa. ǃHaese da ge ra dītsâ huisa. ǀNîsi ǀhaohâb ǃûi-aoga dîs ǃnâ-ū, xū-i hâsa sida a hui ǁkhā-e. ǃHūbaib ǂhawase ra dīhe sîsenni ǃaromas tsîna da ge marisise a hui ǁkhā. Tsî da ge ǁnān hîna tsūkēǃgâb xa tsâǀkhāhe hân tsîna a ǀgoreba ǁkhā. Sada di ǃgâsan ge ǀnîsi huiba nî ǂhâ, ûib ǂhâsin ǃaroma. Sada Gao-aob Jesu Xristub ga khoena ǀgoraǃgâs ǃaroma a hā, o da ge ǀkhomxaǂgaosiba da ra ǁgau hîna ǁîb xa ra hō-e ǂgao. ǁKhauǂuida ǁkhāb nîga î da ‘Gaosiba ǀumi.’—Mat. 25:​34-40. w23.07 4 ¶9-10; 6 ¶12

Jesub ge Jehovab di ǁnâuǃāxasiba ge ǁgae. ǁÎb ge ǃhūbaiba ǃoa ge sîhe, îb ‘Isreali di kā hâ gūna’ aoǁnâba. Xaweb ge ge ǁgau ǁîb a ǁnâuǃāxasa khoenab da aoǁnâba hîna. Aiǁgauseb ge Israelǁî tama kaikhoes xa ge ǀkhoma-e, îb ǁîs di ǀgôas hina ‘ǁgâuab xa hâǃnâhesa’ ǂuruǂuru. Jesub ge ǀkhomxaǂgaosiba ǁgau tsî kaikhoes ge ǂganbi khama ge dī, ǁîs di ǀgôasa ǂurǂurus ǃnâ-ū. (Mat. 15:​21-28) ǀKhara aiǁgausa kō re. Jesub ge aoǁnâ tsoatsoab ge o, ge mî: ‘Xawe mâ-i hoa-i tita ga ǀūxū-i, ǁî-e ta ge nî ǀūxu.’ (Mat. 10:33) Xawe Petrub hîna ge ǁîba ǃnona ǃnāde ǀūxūbab ge ǀūxū? Hî-i, Jesub ge ge ǂan i Petrub ge kaise dīb ge xūn ǃaroma ǃhausen tsî ǂgomǂgomsa īsa. Jesub ge ǁōba xu a khâi, ob ge Petrub tawa ǂhai. Tsî ǁîba ge mîba ǀûbabib ko ǃkhaisa tsîb noxopa ǀnambisa. (Luk. 24:​33, 34) Jehovab tsî Jesub tsîn a ǁnâuǃāxasa da ge go ǁkhāǁkhāsen. O sida? Jehovab ge ra ǂhâpa î da sida tsîna ǁnâuǃāxa. w23.07 21 ¶6-7

Mati da khoena a ǂgomǃgâ kai ǁkhā nē xūn nî ama īsa? ǂGurose, Jehovab ge aitsama nē mîmâisa ge dī. ǂHaiǂhais di ǂkhanis ge ra mî: “Tsîb ge trons ai ǂnôaba ge mî: Mû, hoana ta ra ǀasa kai!” ǁÎb ge gā-aisib, ǀgaib tsî turab tsîna ūhâ ǁîb mîmâisa ama kaisa. ǀGamǁîse, Jehovab ge ǁîb mîmâis ǃnâ ǂgomǃgâsiba ūhâ tsî i ge ǁîb mûǁae ǀnai i dīǀoaǀoasa khami ī. ǁNā-amagab ge ra mî: “ǁÎb mîdi ama tsî ǂgomǂgomsa . . . tsî dītoahe hâsa.” ǃNonaǁîse, xū-i ge Jehovaba a ǁkhae ǁoa tsoatsoab hâ xū-e dītoasa. ǁNā-amagab ge mî ǁkhā: “Tita ge Alfata tsî Omegata, tsoatsoa tsî ǀunita.” Jehovab ge nî ǁgau ǁGâuab a ǂhûmi-ao ǃkhaisa. Tsîb Jehovaba ǁkhae hō tidesa ǁîb ǂâisa dīǀoaǀoasa. Khoe-i ga “nēs ge kaise a buruburuxa, ǂgom tama ta ge hâ ama ī-i nîsa” ti a mî o. Khoe-e ǂHaiǂhais 21:​5, 6 sa khomaiba tsî Jehovab mati ra ǂgomǃgâ kai dasa ǁgau re.—Jes. 65:16. w23.11 7 ¶18-19

Jehovab ge Abrahammi hîna ge 75 kurixa i tsî ǀgôa-e ge ūhâ tama hâ îba ǁnā mîmâisa ge mîba. Abrahamma ǁnā mîmâis ge dīǀoaǀoahe ǀgauba mû îb ge? Hî-i, ǀoasaseb ge mû tama hâ. Eufratǃābab ǃkharu toa tsîb 25 kuriga ǃâu hâ, hînab ge Abrahamma buruxa xū-e ge mû. ǁÎb di ǀgôab Isaki ge ge ǃnaehe. Tsî 60 kurigu khaoǃgâ i ge ǁîb di ǁnurisakha Esaub tsî Jakobi tsîna ge ǃnae-e. (Heb. 6:15) Xawe Abrahammi ge ge mû tama hâ i, ǁîb surib kai ǁae kai tsî mîmâisa ǃhūb ǃnâ a ǂgâ ǀgausa. Xawe ǁnā ǂgomǂgomsa-aob ge ǀgū ǀhōsagusisa ǁîb di Kuru-aob ǀkha ge ūhâ i. (Jak. 2:23) Abrahammi ga khâisa hō, ob ge kaise nî ǂkhî ǁnâub ga o, ǁîb di ǃnūǃnâxasib tsî ǂgoms ǃaroma i ge hoa ǃhaode ǃhūbaib ai ǀkhaehesa. (Gen. 22:18) Tae-e da ra ǁkhāǁkhāsen? ǀNîsi da ge Jehovab ge mîmâi xūn hoan ra dīǀoaǀoahe ǀgausa nēsi mû tide. Xawe Abrahammi khami da ga ǃnūǃnâxa, o da ge ǂgomǃgâsiba Jehovab ǃnâ ūhâ ǁkhā. ǁÎb nēsi tsî ǃnāsase ǀasa ǃhūbaib ǃnâ nî mādawa-am dasa.—Mrk. 10:​29, 30. w23.08 24 ¶14

Usiab ge ǁîb ǂkhamsis ǃnâ ge ǃgamǃgamsenxa i. ǁÎb ge Ama Eloba “ǂgomǂgomsase” ǃoabasa ge ǁkhāǁkhāsen. ǁÎb ge 68 kuriga ge ûi tsî ǁîb di ǃnāsa ûi kuriga Jehovab xa ge ǀkhaehe. (2Kro. 26:​1-4) Usiab ge ǂgui ǁaedi hîna ge ǁîn ǀkha khākhoe i te ge ǃgam tsî Jerusalemsa ǃgâise ge ǁkhauba. (2Kro. 26:​6-15) Usaib ge Jehovab huib ǀkhab ge dī xūn ǀkha kaise ge ǂkhî i. (Aoǁn. 3:​12, 13) Gao-aob Usiab ge nau khoena daoǁgaus ǁnaetiba ge ūhâ i. ǁNāsa gere ǂâi kaibi, ǂhâbab ta xū-i hoa-eb nî dīsa? ǀGuitsēb ge Usiaba Jehovab di tempeli ǃnâ mā-amhe tamab hâ hîna, ǀgapiǂâixase ǂgâ tsî gao-aogu mā-amhe tama ǀanǀanǁguibasa ge dī. (2Kro. 26:​16-18) ǀGapi pristeri Asariab ge ǁîba gere mî-ūnuba ǂgao xaweb ge Usiaba kaise ge ǁaixa. Tsûaǂgaoxaseb ge Usiaba Jehovab ǃoagu ǂgomǂgomsase ge hâ tama hâ i. Tsîb ge Jehovaba ǁîba khōb ǀaeb ǀkha ge ǁkhara. (2Kro. 26:​19-21) ǁÎb ûib ge ǃgâise ga dawa hâ, ǃgamǃgamsenxaseb ga hâ ǀgara hâ o. w23.09 10 ¶9-10

ǂKhauhesa Xristeǁî kaib ge xaweb ge apostel Petruba noxopa, ǁîb di khoesi ǂhabusasigu ǀkha ǃgomsiba ge ūhâ i. 36ǁÎ kurib ǃnâb ge Eloba Petruba Korneliuba ǃoa ge sî, hîna ge Jodeǁî tama ība. ǁNābab ge Korneliuba ǃanu gagab ǀkha ge ǂkhauhe. ǁNās ge ge ǃgāsa i, ‘Elob ǀgorahe ūhâ tamasa.’ Tsîn Jodeǁî taman tsîna a Xristeǁî ǀhaohâb di ǃâ kai ǁkhā ǃkhaisa. (ǃNǃkh. 10:​34, 44, 45) ǁNās khaoǃgâb ge Petruba harase gere tsâ Jodeǁî tama khoen ǀkha ǂûǀhaosa. ǁNāti-i xū-eb ge ais ai ge dīǁoa i. Xawen ge ǀnî Jodeǁîna gere tsâ, Jodeǁîn tsî Jodeǁî taman tsîn ǀguipa a ǂûǁoasa. ǁNāti i ǂâiǀgauba ūhân ge Antioxias ǃoa a ǀkhī, ob ge Petruba Jodeǁî tama ǃgâsan ǀkha ge ǂû ǀû. Jodeǁî Xristeǁînab nî tao kaisab gere ǃao amaga. Apostel Paulub ge Petrub gere dī xū-e mû tsî ǁîba nau khoen aiǃâ ge mî-ūnuba. (Gal. 2:​13, 14) Nē dīsās ǂamaib ge Petruba ge mâǀgai. w23.09 22 ¶8

ǂHauǃnâ-usen tsî mû mapa go ǀkharaǀkharana a dī ǁkhāsa, xawe tā ǂkhabuǂâi re. ǃKhūb di ‘ǃgâisib’ ge nî hui go, ǀkharaǀkharana dīsa. (1Pet. 2:3) Apostel Petrub ge ra ǃgomǃgâ kai da: ‘ǀKhommi di Elob, ǁîb . . . ǃoa ǂgai du hâb nî ǁapoǁapo gosa.’ Petrub ge Jesub ǀkha hâsab anu tama hâ khami gere tsâ. (Luk. 5:8) Xawe Jehovab tsî Jesub tsîn di ǀnamxaǃnâ ǂkhâǃnâs ǀkhab ge ǂgomǂgomsase Xristuba ge sao. ǁNās ǀkhab ge Petruba ge mā-amhe îb “ǃKhūb tsî ǃGâiǃōdī-aob, Jesub Xristub di ǀamo Gaosib ǃnâ” ǂgâ. (2Pet. 1:11) ǁNās ge kaise ge kai i mādawa-amsa. Petrub khami mâǀgai tsî du ga Jehovaba mā-am îb ǁkhāǁkhā du, o du ge sadu tsîna ǀamo ûib mādawa-amsa ǃkhōǃoa ǁkhā. Tsî du ge ǂgoms di ǂâibasensa nî ǃkhōǃoa.”—1Pet. 1:9. w23.09 31 ¶16-17

Tabernakeli ge ǀgui kai yardsa ge ūhâ i hîna ge drab ǀkha omǂnamihe hâ isa, ǁnāpa gu ge pristerga ǁîgu sîsenne gere dī. Kai altars kopper-e xu ge kuruhe hâ îs, khauǁguiba di gere dī-aihes ge nē ai-ommi ǃnâ ge hâ i. Kopper-e xu kurusa ǁgammi ǃores, pristergu ǃanu ǃoabasa gu nî dīs aiǃâ gere ǃanuǃanusen ūs tsîn ge nē ai-ommi ǃnâ ge hâ i. (Eks. 30:​17-20; 40:​6-8) Nētsēn ge ǃgau hâ ǂkhauhesa ǃgâsana ǂgomǂgomsase ǃhūbaib ai gagasi tempeli, ai-ommi dib ǃnâ ra ǃoaba. ǁNā kai ǁgammi ǃores ge kai ǂâiǂâisens ase ge ī tsî hoa Xristeǁîna ǃoas tsîna a ǂhâǂhâsa în gagasise ǃanuse hâ. Mâpan “kai ǂnubis” khoena nî ǃoaba? Apostel Johaneb ge trons ‘aiǃân mâse’ ge mû nî, ǁnās ge ǃaugab ai-omi ǀkha a ǀgui. ǁNāpan ge “Elob trons aiǃâ hâ, tsî tsēb tsî tsuxuba ǁîba ǁîb di tempeli ǃnâ ra ǃoaba.” (J.ǂHa. 7:​9, 13-15) Kaise da ge Jehovaba ra ǃgôaǃgâ kai aiǂhanub ǁîb ǃanu tempeli ǃnâ ǃoabas tib ǃaroma. w23.10 28 ¶15-16

ǀGui ǀgaub Jehovab sida ǀgaiba ra māb ge ǀhaohâb ǃûi-aogu ǃnâ-ū. (Jes. 32:​1, 2) ǂÂiǂhansen du ga, o ǀhaohâb ǃûi-aoga mati du ra tsâsa mîba re. ǁÎgu ga hui du ǂgao, o ǁîgu huiba ūǃoa re. ǁÎgu ǃnâ-ūb ge Jehovaba ǀgaiǀgai du ǁkhā. Sida ǃâubasens Elobmîs ai a ǃgaoǃgaosas ge ǀamose ûis di aiǂhanuba ūhâ, ǀamosib kōse ǃhūbaib ai Paradais tamas ka io ǀhommi ǃnā ûisa. ǁNās ge a ǀgaiǀgai da ǁkhā. (Rom. 4:​3, 18, 19) Sada ǃâubasens ge ra ǀgaiǀgai da, î da ǃgomsina mâǀgai, ǃgâiǂhôasa aoǁnâ tsî ǃkharagagu ǁgaumâide dīǀoaǀoa ǀhaohâb ǃnâ. (1Tes. 1:3) ǁKhā ǃâubasens ge apostel Pauluba ge ǀgaiǀgai. ǁÎb ge “ǂōǂōsib,” “îganǀgē,” “ǃgôaǃgonhe,” tsî “ǂnauǁguihe” hâse gere tsâ. ǁÎb ûib ge ǁkhōǁkhōsa mâsib ǃnâ ge hâ i. (2Kor. 4:​8-10) Paulub ge mâǀgais ǁkhāsiba ge hō, ǁîb ǃâubasens ai ǂgomaiǂnûis ǃnâ-ū. (2Kor. 4:​16-18) Paulub ge ǁîb hānî ǃâubasens ǀhommi ǃnâ ûis tis ai ǂâisa ge ǂnûi hâ i. Paulub ge ǁnā ǃâubasens xa gere ǂâi tsî ǁnās ǀkha tsēsa xu tsēs ǀkha gere “ǀasa kaihe.” w23.10 15-16 ¶14-17

ǀGore da ga ǁaeb ai da nî ǃgaoǃgâ, Jehovab ti ǀgoresa nî ǁnâu-am ǁaeba? Nēsi di sida ǀgorede nî ǃereamhe ti da ge a tsâ ǁkhā. Xawe Jehovab ge ǂhanu ǁaeba a ǂan huidab nîba. (Heb. 4:16) ǂGan da ra xū-e da ga ǁnā ǁaeb ai hō tama io, o da ge a ǂâi ǁkhā Jehovab ǃereams a ‘hî-i’ ti. Xawe ǁîb ǃereams ge ǀnîsi ‘nēsis ose.’ Aiǁgause, ǂkham ǃgâsab ge ge ǀgore îb ǁîb di ǀaeba xu ǂgauǂgauhe. Xaweb ge ge ǂgau tama hâ i. Jehovab ga buruburuxa ǀgaub ǃnâ ǁîba ǂgauǂgau hâ, ob ge ǁGâuaba ga mî hâ nē ǃgâsab Jehovab xab ǂgauǂgauhe hâ ǃkhais ǃaroma ǀgui ǁîba ra ǃoabasa. (Job 1:​9-11; 2:4) Jehovab ge ǀnai ǁaeba mîmâi hâ hoa ǀaegab nî ūbēsa. (Jes. 33:24; J.ǂHa. 21:​3, 4) ǁNā ǁaeb nî hās kōse da ge Jehovaba xu a ǃâubasen ǁoa, îb buruburuxa ǀgaub ǃnâ ǂgauǂgau da. ǁNā-amagab ge nē ǃgâsaba Jehovaba a ǂgan ǁkhā îb ǀgaib tsî ǁnā ǂkhîb tsîna māhe, nē ǀaeb ǃnâ mâǃkharu tsî Jehovaba ǂgomǂgomsase ǃoabasa. w23.11 24 ¶13

Dīsāb ge xaweb ge Simsona ge ǀûsen tama hâ i, ǃē-eb ge ge ôa îb Filisteǁîn ǃoagu Elob xab māhe hâ ǁgaumâisa dīǀoaǀoa. (ǂHǂh. 16:​28-30) Simsonni ge Jehovaba ge ǀkhoma nē ǃnās ǀguisa ǁkhawa ǀgaiǀgaite re, “î ta nē ǀgui dīb ǀkha Filisteǁîna ǀkhaobasen.” Ama Elob ge Simsonni di ǀgoresa ge ǃeream tsî ǁkhawa buruburuxa ǀgaiba ge mābi. ǁNās xa ǃaromahe hâseb ge Simsonna ǃnāsa Filisteǁîna nē ǃnās ai ge ǃgam ǀnaib ge dī hâ is xa. Simsonni ge ǁîb dīsā hâ xū-i xa tsûba a hōǃâ xawe î ge nē-e ge ǃaroma tama hâ i îb Jehovab di ǂâisa dī ǀû. Dīsā tsî da ga ǁnamahe tamas ka io aiǂhanu-e ǂoaǃnâ xawe da ge tā nî ǀûsen. ǂÂis ǃnâ ūhâ, Jehovab ge sida ǃnâ ǀûsen tama hâ. (Psa. 103:​8, 9) Dīsā da ga xawe da ge noxopa Jehovab xa a sîsenūhe ǁkhā Simsonni khami. w23.09 6 ¶15-16

Sadu mâǀgais ge Jehovab mā-amsa ra hā-ū. Nēs ge ǂâibasen tama Jehovab sadu ǃgomsina ra hōǃâ ǃkhais xa ǃgâibahesa. Jehovab ge sado ra ūǃoa. Sadu mâǀgais ge mā-amsa mâsib ǃnâ ra ǀamǂoa. Nēb ge ama buruxa ǀkhaeba. (Psa. 5:12) ǂÂihō î du ra, Abrahammi ge ǃgomsina hōǃâ tsî ǂgomǂgomsase gere mâǀgai, ob ge Jehovaba gere ǂkhî ǀgauba. Jehovab ge ǁîba ǂhanu-ai ǀhōsab ase gere mû. (Gen. 15:6; Rom. 4:​13, 22) ǁNās ǁkhās khamib ge sida a ǀnam ǁkhā. Jehovab ge sada matikō sîsen-e ra dīs tamas ka io mâpa da ra ǃoaba bi ǃkhais ǃaroma ǀgui ǂkhî tama. Jehovab ge sida ǀkha a ǂkhî, ǃgomsina da ga hōǃâ xawe da ga ǂgomǂgomsase hâ o. Hoa da ge a mâǀgai ǁkhā matikō kurixa, mâsigu tamas ka io ǁkhāsiga da ga ūhâ xawe. Nēsi du ra hōǃâ ǃgomsin ǃnâ du ǂgomǂgomsase ra mâǀgai? Ti-i nî īs ga o, ǂâis ǃnâ ūhâ Jehovaba du kaise ra ǂgâiaǂgao kaisa. Jehovab sada ǀkha ǂkhî ǃkhaisa da ga ǂan, os ge ǁnāsa sida ǃâubasensa a ǀgaiǀgai ǁkhā. w23.12 11 ¶13-14

Xristeǁî-aob ge khoena ǃgâ tsî ǁîn ǀkha ǁkhāǁkhāsensa nî ǂan. Khoen ǀkha ra ǃhoahe ǀgauba a ǂan khoeb ge naun ra ǃhoa ǁaeb ai ǂōrisase ǃgâ tsî ǁîn di tsâsigu tsîna ra ǁnâuǃā. (ǂKhm. 20:5) ǁÎb ge khoen dommi ra ǀō ǀgaub, ais di ǁgâiǂuisens tsî ǁî-i ra tanisen ǀgaub tsîna a kō ǁkhā. Xawets ge nēsa khoen ǀkha hâǀhaos ǃnâ ǀgui a ǂan ǁkhā. ǃNās hoasats ga selfonni ǃnâ-ū khoen ǀkha ga ra ǃhoa, os ge ǁnāsa nî ǃgombatsi. ǁNās ǀkha hoaǁae ǃēde ūhâ re, khoen ǀkha ǀguiba hâǀhaosa. (2 Jhn. 12) Gagasise ǀgaisa Xristeǁî khoeb ge marisise aitsama kōǃgâsen tsî ǁîb omaris tsîna nî kōǃgâ ǁkhā. (1Tim. 5:8) Kaise i ge a ǃgâi xū-e ǁkhāǁkhāsensa, îts marisise kōǃgâsen ǁkhā. (ǃNǃkh. 18:​2, 3; 20:34; Efe. 4:28) ǃGarise sîsen tsî tsoatsoats go xū-e dītoa re, khoen ge nēsa mû tsî nî ǀgapiǃgôatsi. Nēs ge nî huitsi sîsen-e hō tsî gāxūse sîsen ǀgarasa. w23.12 27 ¶12-13

Elobmîs ga ‘Jehovab tsēs’ xa ǃhoa, os ge ǁaeb ǁîb di khākhoenab nî dīkākās tsî ǁîb di khoenab ni sâus xa ra ǃhoa. ǃKharuge ǁaeb ǃnâb ge Jehovaba, ǁaegu ai ǀnî ǃhaode gere ǁkhara. (Jes. 13:​1, 6; Ese. 13:5; Sef. 1:8) Sida tsēdi ǃnâs ge ‘Jehovab tsēsa’ Babilons kais di ǁnāǂams ǀkha nî tsoatsoa tsî Armagedons tawa nî ǀam. ǁNā “tsēsa” ûiǃkharus ǃaroma da ge nēsi ǀnai nî aiǂhomisen. Jesub ge ge ǁkhāǁkhā “kai ǁgâiǀāb” ǃaroma da ge aiǂhomisens ǀguisa di tide xawe da ge “ǂhomisen hâse nî hâ.” (Mat. 24:21; Luk. 12:40) ǁÎb di ǂguro sîǂkhanis Tesalonikaǁîna ǃoab ge xoas ǃnâb ge Pauluba ǂgui ǁgauǁgaude gere sîsenū. Îb Xristeǁîna hui în Jehovab di kai tsēs ǃaroma aiǂhomisen. Paulub ge ge ǂan-i Jehovab di tsēs ǁnā ǁaeb ai hā tidesa. (2Tes. 2:​1-3) Xaweb ge ǁîb ǃgâsana ge ǂkhâǃnâ în ǁnā tsēs ǁari nî hā khami aiǂhumisen, sida tsîn ge ǁkhā ǀapemāsa sao ǁkhā. w23.06 8 ¶1-2

Tokyo Japanni ǃnâ i ge 1970 xi ǃnâ, kaise ǀgapi oma ge omhe. Tsîn ge ǁnā oma gere mû khoena gere ǂâi, ǁîb mati hoaǁae ǃhūǂgubiga nî mâǃkharusa. Tae-e ge hui îb ǁnā oma mâ hō ǁkhā? ǁNā oma ge kuru khoegu ge ǀgaub ǃnâ ge kuru, î-i kaise ǀgaisa. Xawe ǃhūǂgubib ga hâ, o ǁkhā ǁaeb ais tsîna gon ǁkhā. Xristeǁîn ge ǁnā kai ommi khami ī. Mâ ǀgaub ǃnâ? Xristeǁîn ge ǁaposase mâs tsî gon ǁkhās ǁaegu ǃgâi ǀgorasa nî ūhâ. ǁÎ-i ge Jehovab di ǂhanugu tsî ǁgaragu tsîna ǁnâuǀnams tawa i ga hā, o ǁaposase nî mâǀgai. ǁÎ-i ge ‘hoaǁae a ǁnâuǀnamxa’ tsî mâǁnâsen tama hâ. Xawe mâsib ga mā-am, o î ge ǁî-e a “tsauraǃnâ” tamas ka io a gon ǁkhā. (Jak. 3:17) Xristeǁî-i hîna nē xūn ǁaegu ǀnōsa mûǂuiba ūhâ î ge hoa xūna ǂkhā tide. Tamas ka io hoa xūna mā-am tide. w23.07 14 ¶1-2

Jesub ge ǁGâuab ǃâitsâ gere mâǃoa tsî Elob ǃoa ǂgomǂgomsase ge hâ. (Mat. 4:​1-11) ǁGâuab ge ǁkhāb an hoana gere dītsâ, îb Jesuba ǁore kai tsî tā xoremariba matare. ǃHūbaib aib gere dī aoǁnâ sîsenni ǃnâb ge Jesuba ǂgui ǃâitsâga gere hōǃâ. ǁÎb khākhoen ge ǁgâiǀābi tsî gere ǃgambi ǂgao. (Luk. 4:​28, 29; 13:31) ǁÎb saosaben ǂkhabusasigu tsînab ge gere tani. (Mrk. 9:​33, 34) ǁÎb ûib gere ǀgoraǃgâhe ǁaeb ǃnâb ge tsûtsûhe tsî gere mîǁgaiǁgaihe. ǁNāpaxub ge ǃgam-ao-i khami ǃgâuhe tsî kaise tsûtsûsa tsî taoxa ǀgaub ai ge ǁō. (Heb. 12:​1-3) ǀUniga ǃâitsâbab ge ǀguri ge mâǃkharu, Jehovab xa ǁkhaubahe tamase. (Mat. 27:46) Ama as ge, Jesub ge ǂgui xūna ge ǃkharuǃnâ îb xoremariba matare. Jesub ge māsenxase a dī ǁguibadi hoa di xa da ga ǂâiǃgâ, o i ge sida ǀnammi ǁîba da ūba hâba ra ǀgai. w24.01 10-11 ¶7-9

ǃNūǃnâxasiba da ge ǂhâhâ naun ǀkha da ga ǃgâi ǀhōsagusisa ūhâ ǂgao o. ǁÎ-i ge ra hui da i da ǃgâise ǃgâ naun ga ǃhoa ǁaeb ai. (Jak. 1:19) ǃNūǃnâxasib tsîn ge ǂkhîba ra aiǃgû kai. ǁÎ-i ge ra hui da î da tā ǃhaese xū-e mî tamas ka io dī ǂâiǂhânsen da ra hîna. Tsî ǃnūǃnâxa da ga, o da ge ǃkhaese ǁaixa tide nau khoe-i ga tsûtsû da xawe. ǃKhamǃoas xa da ge, ‘nē-e nau-e taniǀnam tsî ǃKhūb ge ǁkhāti sada ǀûbas ǁkhās khami da ge sada tsîna nî ǀûba.’ (Kol. 3:​12, 13) ǃNūǃnâxasib tsîn ge a hui da ǁkhā ǃgâi mîǁguiga dīsa. ǃNoesase xū-e dīs xa da ge ǁaeba ǁamaǂui tsî ôaǃnâde ū da hâ xūn xa nî dī. Aiǁgause da ga sîsen-e ga ôa, o da ge hō da ra sîsenni hoa-e ǀnîsi a ūǃoa ǁkhā. ǃNūǃnâxasiba da ga ūhâ, o da ge ǁaeba ǁamaǂui tsî nî ǂâiǃgâ, mati i nē sîsen-e sada omaris tsî Jehovab ǀkha da ūhâ ǀhōsagusis tsîna nî tsâǀkhāsa. ǃNūǃnâxasiba da ga ūhâ, o da ge ǁgai mîǁguiga dīsa xu a ǂgōsen ǁkhā. w23.08 22 ¶8-9

Sadu ǁoren xa du ga ǂkhabuǂâi, o du ge mîmâis Jehovab ǃoa-ai du ge māǁnâsens xa a ǂâiǃgâ ǁkhā, ǁnās ge nî hui du sadu turaga ǃkhamǃoasa. Mâ ǀgaub ǃnâ? ǃÂitsâga du ga hōǃâ os ge māǁnâsens mîmâisa nî hui du. Jehovab ǃoa-ai du ga māǁnâsen, o du ge ra ǀuxusen. Nēs ge ra ǂâibasen sadu turagu, ǁgūbasen du ra xūn Jehovaba ra ǂkhîoǃnâ kaina ǁnāxusa. (Mat. 16:24) ǃÂitsâga hō tsî du ga ǃgom mâsiga hōǃâ, o du ge tā nî ǂâiǂhansen tae-e du nî dī ǃkhaisa. ǀGui xū-i xa ǀgui du ge nî ǂâi, nēs ge ǂgomǂgomsase Jehovab ǃoa-ai mâǀgarasa. ǁAposase mâǀgara tsî du ge Jehovaba nî ǂkhîǂkhî. ǁNāsa du ga dī, o du ge Jobi khami nî ī. Kaise ǃgom ǃâitsâgab ge ǃkharu ǃnâ xaweb ge ǂgomǃgâsib ǀkha ge mî: “ǁŌ ta nî tsēs kōse ta ǀhapio ta asa nî mî.”—Job. 27:5. w24.03 9 ¶6-7

Jehovab, ‘ǀnammi Elob’ ge sida ǀkha hâ. (2Kor. 13:11) ǁÎb ge mâ ǀguiǀguibe khoe-i hoa-i ǃnâ ǃgâiǃgâibasensa ūhâ. ǂGomǃgâ da ge ra “ǁîb di hâhâ ra ǀnammi” sida ǂnamipe hâ ǃkhaisa. (Psa. 32:10) ǁÎb ǀnamma ra ǁgau da ǀgausa da ra ǂâiǃgâ khami da ge nî hōǃâ matikōseb ra tsâba da ǃkhâisa. ǁÎb ǀgūse da hâ khami da ge nî tsâ. ǃAo tamase da ge harase ǁîb ǃoa nî ǀgore tsî nî mîbabi matikōse da ǁîb ǀnamma ǂhâhâsa. Sida ǂâiǂhânsendi hoade da ge ǁîb ǀkha nî ǀgoragu. ǂGomǃgâsiba da ūhâ amaga ǁîb ra ǁnâuǃā tsî sida hui ǂgao ǃkhaisa. (Psa. 145: 19) ǀGamsa ǀaes ǀgūse da ǃkhai tsēs ai ra hâ khami da ge Jehovab di ǀgamsa ǀnammi ǃgao ǁîb ǀgūse ra hâ. Jehovab di ǀnammi ge kaise ǀgaisa tsî ǀnamxaǃnâ. ǁNā-amaga ǃgâiaǂgao Jehovab ǀnam du amaga. A da hoa da “tita ge [Jehovaba] ǃKhuba ǀnam ti mî.”—Psa. 116:1. w24.01 31 ¶19-20

Jesub ge ǃnāsa-e gere dī khoena Elob ǀons a Jehovasa mîbas xa. Jodeǁîn hînab gere ǁkhāǁkhān ge ǀnai Elob ǀonsa ge ǂan i. Xaweb ge Jesuba daoba ge ǁgau tsî “Elob xa ge mîba da.” (Jhn. 1:​17, 18) Aiǁgause Hebreǁî Xoadi ge ra mîba da Jehovab ǀkhomxasib tsî ǀkhommi xa ǀoa hâsa. (Eks. 34:​5-7) Jesub ge amaba ǃgāsase ge ǁgau, kā hâ ǀgôab di ǂkhōs ǃnâ-ū. “ǃNūsib aib ǃgôaxa” hînab ǁgûba ǁîb ǀgôaba ǃkhoeǃoa tsî ra ǁnamǂgā ǀgausa da ga khomai, o da ge Jehovab ǀhommi tsî ǀkhomxaǂgaosib xa ǀoa hâsa ra mû. (Luk. 15:​11-32) Jesub ge khoena ge hui în ǁnâuǃā Jehovab a mâǃnôa khoesa. w24.02 10 ¶8-9

Jehovab ge khoakhoa tsî ra ǁkhaeǂgao da ǃgom ǁaegu ǃnâ. Mati da Jehovaba nau khoena ǀkhoms tsî ǁkhaeǂgaos ǃnâ ǁgae ǁkhā? ǀGui ǀgaub nēsa da a dī ǁkhāb ge, ǁkhaeǂgaosa mās ǀkha dī xū-e ūhâ ǀgauga omkhâisa. Nē ǀgauga a tae? Tae-e nî hui da, î da aiǃgû nau khoena ǀnam tsî tsēs hoasa ‘ǀgaiǀgaiǃnâ’? (1Tes. 4:18) Sao ra ǀgauga da ge a omkhâi ǁkhā, ǀkhomxaǂgaosib, ǃgâsa ǀnamgub tsî khoexaǃnâsib tsîna. (Kol. 3:12; 1 Pet. 3:8) Nē ǀgauga mati a hui da ǁkhā? ǀKhomxaǂgaosiba tsâ tsî da ga, khoexaǃnâse sida ǃgâsana tsâba, os ge ǁnāsa ra hui da î da ǁîna ǁkhaeǂgao ǃgomsinan ga hōǃâ o. Jesub ge ge mî: ‘Sa mîdi ge sa ǂgaob ǃnâ hâna ra ǁgauǂui. ǃGâi khoe-i di ǃgâi ǁuiba xun ge ǃgâi xūna ra hāu.’ (Mat. 12:​34, 35) Sida ǃgâsana ǁkhaeǂgaos ge kaise a ǂhâǂhâsa, nē ǀgaub ǃnâ da ǀnamma ra ǁgau xui-ao. w23.11 10 ¶10-11

Elobmîs kēbode da ga ǁnâuǃā ǂgao, o da ge huiba nî ǂgan. Nē aiǁgausa kō re. ǀNîsi du ge sadu ǀhōsa-i ǀkha ǀū du a ǃkhaisa sī ra sari. Xawe î ge sadu ǀhōsa-e ǁnā ǃkhaisa ǃgâise a ǂan. ǁÎ-i ge a ǂan mâpa du hâsa tsî mâ daob hoab mâpa ra īsa. Amase du ge nî ǂkhî sadu ǀhōsa-i go hâ i ǃkhaisa. ǁNās ǁkhās khamib ge Jehovaba ǁnā huiǃnâxa ǀhōsa-i khami ī. ǁÎb ge sada hānîǁaeb xa ǃamkuse a ǂan. ǁNā-amaga da ga Elobmîs kēbode ǁnâuǃā ǂgao, o da ge ǃgamǃgamxase Jehovab ai huiba nî ǂgan. (Dan. 2:28; 2Pet. 1:​19, 20) ǃGâi ǁgû-i khamib ge Jehovaba, ǁîb di ǀgôana ǃgâiaǂgaoxa hāniǁaeba ra ǂhâbaba. (Jer. 29:11) Khoesi ǁgûn khamis oseb ge Jehovaba hāniǁaeb xa ǂhanu xū-e a mîba da ǁkhā. ǁÎb ge kēbode ǁîb Mîs ǃnâ ge xoamâi kai, î da ǂhâǂhâsa xūn ǀgūǁae nî īn xa ǂan, tsoatsoa-i nîs aiǃâ.—Jes. 46:10. w23.08 8 ¶3-4