Wunstaxtsēs, Augustub 27
Xawe ta ge ti soros ǃnâ ǀkhara ǂhanu-i, ti ǂâis di ǂhanub ǀkha ra ǃkham-e ra mû. ǁOreb di ǂhanub ge tita ǃnâ sîsen tsî tita ǃkhōsis ǃnâ ūhâ.—Rom. 7:23.
Sadu ǁoren xa du ga ǂkhabuǂâi, o du ge mîmâis Jehovab ǃoa-ai du ge māǁnâsens xa a ǂâiǃgâ ǁkhā, ǁnās ge nî hui du sadu turaga ǃkhamǃoasa. Mâ ǀgaub ǃnâ? ǃÂitsâga du ga hōǃâ os ge māǁnâsens mîmâisa nî hui du. Jehovab ǃoa-ai du ga māǁnâsen, o du ge ra ǀuxusen. Nēs ge ra ǂâibasen sadu turagu, ǁgūbasen du ra xūn Jehovaba ra ǂkhîoǃnâ kaina ǁnāxusa. (Mat. 16:24) ǃÂitsâga hō tsî du ga ǃgom mâsiga hōǃâ, o du ge tā nî ǂâiǂhansen tae-e du nî dī ǃkhaisa. ǀGui xū-i xa ǀgui du ge nî ǂâi, nēs ge ǂgomǂgomsase Jehovab ǃoa-ai mâǀgarasa. ǁAposase mâǀgara tsî du ge Jehovaba nî ǂkhîǂkhî. ǁNāsa du ga dī, o du ge Jobi khami nî ī. Kaise ǃgom ǃâitsâgab ge ǃkharu ǃnâ xaweb ge ǂgomǃgâsib ǀkha ge mî: “ǁŌ ta nî tsēs kōse ta ǀhapio ta asa nî mî.”—Job. 27:5. w24.03 9 ¶6-7
Donertaxtsēs, Augustub 28
ǃKhūb ge ǁîba ra ǂgaiǀîn hoana ǀgūse hâba; hoan ǁîba amab ǃnâ ra ǂgaiǀîna.—Psa. 145:18.
Jehovab, ‘ǀnammi Elob’ ge sida ǀkha hâ. (2Kor. 13:11) ǁÎb ge mâ ǀguiǀguibe khoe-i hoa-i ǃnâ ǃgâiǃgâibasensa ūhâ. ǂGomǃgâ da ge ra “ǁîb di hâhâ ra ǀnammi” sida ǂnamipe hâ ǃkhaisa. (Psa. 32:10) ǁÎb ǀnamma ra ǁgau da ǀgausa da ra ǂâiǃgâ khami da ge nî hōǃâ matikōseb ra tsâba da ǃkhâisa. ǁÎb ǀgūse da hâ khami da ge nî tsâ. ǃAo tamase da ge harase ǁîb ǃoa nî ǀgore tsî nî mîbabi matikōse da ǁîb ǀnamma ǂhâhâsa. Sida ǂâiǂhânsendi hoade da ge ǁîb ǀkha nî ǀgoragu. ǂGomǃgâsiba da ūhâ amaga ǁîb ra ǁnâuǃā tsî sida hui ǂgao ǃkhaisa. (Psa. 145: 19) ǀGamsa ǀaes ǀgūse da ǃkhai tsēs ai ra hâ khami da ge Jehovab di ǀgamsa ǀnammi ǃgao ǁîb ǀgūse ra hâ. Jehovab di ǀnammi ge kaise ǀgaisa tsî ǀnamxaǃnâ. ǁNā-amaga ǃgâiaǂgao Jehovab ǀnam du amaga. A da hoa da “tita ge [Jehovaba] ǃKhuba ǀnam ti mî.”—Psa. 116:1. w24.01 31 ¶19-20
Fraitaxtsēs, Augustub 29
Tita ge sa ǀonsa ǁîna ge ǂanǂan.—Jhn. 17:26.
Jesub ge ǃnāsa-e gere dī khoena Elob ǀons a Jehovasa mîbas xa. Jodeǁîn hînab gere ǁkhāǁkhān ge ǀnai Elob ǀonsa ge ǂan i. Xaweb ge Jesuba daoba ge ǁgau tsî “Elob xa ge mîba da.” (Jhn. 1:17, 18) Aiǁgause Hebreǁî Xoadi ge ra mîba da Jehovab ǀkhomxasib tsî ǀkhommi xa ǀoa hâsa. (Eks. 34:5-7) Jesub ge amaba ǃgāsase ge ǁgau, kā hâ ǀgôab di ǂkhōs ǃnâ-ū. “ǃNūsib aib ǃgôaxa” hînab ǁgûba ǁîb ǀgôaba ǃkhoeǃoa tsî ra ǁnamǂgā ǀgausa da ga khomai, o da ge Jehovab ǀhommi tsî ǀkhomxaǂgaosib xa ǀoa hâsa ra mû. (Luk. 15:11-32) Jesub ge khoena ge hui în ǁnâuǃā Jehovab a mâǃnôa khoesa. w24.02 10 ¶8-9