Dinstaxtsēs, Augustub 5
ǁNā-i hîa ǂoab mâsiba ra ǃâu-i ge xū-i xare-e ǃhana tide.—Aoǁn. 11:4.
ǃKhō-oasens ge tsâsigu tsî dī du ra xūna xu ǃkhō-oasensa ǃkhōǂgā hâ. Xawe ǃkhō-oasens tsîn ge ǂhâbasa î-i mîǁguiba sīǃnâs ǀkha ǂkhâǃnâ da. ǃGōsase xū-i ga ǃgom tamas ka io da ga turaba ūhâ tama io. ǂÂis ǃnâ ūhâ re, ǃkhō-oasens tsîn ge gagasi ǂūb di ǃâ. ǁNā-amaga Jehovaba ǂgan re, îb ǃanu gagab ǀkha hui du, î du nē ǂhâǂhâsa ǀgauba omkhâi. (Luk. 11:13; Gal. 5:22, 23) Tā hānî ǃgâi ǁaeba ǃâu. Nē ǃhūbaib ǃnân ge xūna hoaǁae ǃgâi tide. Nēn nî ǃgâisa da ga ǃâu, o da ge sada mîǁguiba sīǃnâ tide. Turaba da ūhâ tama hâ khami da ge a tsâ ǁkhā, sida mîǁguib kaise a ǃgomsa sīǃnâs ǃaroma. Sadu ga ti a tsâ, o du ǀnîsi ǁnā mîǁguiba ǂkhari ǃârogu ǃnâ a dī ǁkhā? ǀNîsi du ga mîǁgui o gagasi ǀgauga omkhâisa, o tae-i ǃaroma du ǂkhari ǃârogu ǃnâ dī tsoatsoa tama hâ? Elobmîsa khomais di mîǁguiba du ga ūhâ, o tae-i ǃaroma du ǁîsa khomais di ǀapeǁguiba ǃnuburose ūhâ tama hâ? w23.05 29 ¶11-13
Wunstaxtsēs, Augustub 6
ǂHanu-ain di daob ge ǁgoas ǃnâb khami ī, ǀoasases nî soresa ǁhais aiǃâ, ǃaruǀî ǀgui ra ǃnâǃāba.—ǂKhm. 4:18.
ǀUniga tsēdi ǃnâb ge Jehovaba ǁîb ǀapeǂhumis ǃnâ-ū Elobmîs ai ǃgaoǃgaosa ǂûna ra māda. Tsî nē ǂûn ge ra hui, î da hoa da “ǃanu daob” ai ǃgû ǀgara. (Jes. 35:8; 48:17; 60:17) Mî ǁkhā da ge a, khoe-i ga Elobmîs ǁkhāǁkhāsa ūǃoa ǃnâs hoasa î ge ǁî-e “ǃanu daob” ai ra ǃgû tsoatsoa ti. ǀNîn ge ǃnūbu ǁaeroba nē daob ai ǃgû tsî ra ǀû. Naun ge ra mîǁgui nē daob ai ǃgû ǀgarasa ǀamose. ǀAmose nē daob ai ǃgûsa a tae? ǀHommi ǃâubasensa ūhân ge “ǃanu daob” ai ra ǃgû. Hîna ‘Elob di Paradaisa’ ǃoa ra ība ǀhomma ǃoa. (J.ǂHa. 2:7) ǁNān hîna ǃhūbaib ǃâubasensa ūhân ge 1 000 kurigu khaoǃgâ nî hâ ǀamo ûib daob ai nî ǃgû ǀoasa kurusa ūhâse. ǁNā daob ai du ga nētsē ga ra ǃgû o, tā dawasen xawe aiǃgû. Tsî tā ǀûsen ǀasa ǃhūbaib daob ǀams ai du nî sīs kōse. w23.05 17 ¶15; 19 ¶16-18
Donertaxtsēs, Augustub 7
Sada ge a ǀnam, ǁîb ge ǂguro sada ǀnam amaga.—1Jhn. 4:19.
Jehovab ge dība du xūn hoan xa du ga ǂâi, o du ge ganganxase tsâ tsî ǁîb ǃoa ra māǁnâsen ǂgao. (Psa. 116:12-14) Elobmîs ge Jehovaba “mâ ǃgâi tsî dīǀoaǀoasa mās hoas” ti mā-aob ase ra ǂgai. (Jak. 1:17) Hoanxa kai ǀkhaeb hînab ge Jehovaba mādab ge ǁîb ǀgôab ǁguibasa. ǂÂis ǀguisa hî re. Xoremarib ge ge īǁkhā kai î du Jehovab ǀkha ǀgū ǀhōsagusisa ūhâ. ǀAmose ûis di aiǂhanub tsînab ge ge mā du. (1Jhn. 4:9, 10) Māǁnâsens ge ǀgui ǃgâi ǀgaub hîna du Jehovaba ǃgôaǃgâsiba ra ǁgauba. ǁÎb kai ǀnammi tsî nau ǀkhaegu hînab ge mā du gu ǃaroma.—Deu. 16:17; 2Kor. 5:15. w24.03 5 ¶8