Tae-e a ǃgâiǂhôa ǂgomdi xa?

1. Hoa ǂgomde a ǃgâi?

Hîna-oǃnâ khoen ge mâ ǂgoms hoas ǃnâ hâ. ǁNās ǀkha i ge a ǃgâiǂhôa Elob ta ǁîna mû tsî ǁîna tsâba ǃkhaisa. Xawe ǂgomdi ǀons ǃnâ i ge ǃkhauǃkhausase ǂgui ǁgai xūna ra dīhe. (2 Korinteǁîn 4:3, 4; 11:13-15) ǂHôan ta mîs ǃoa-ai i ge ǀnî ǂgomde terrorismeb ǀkha ǁaxa, khoena ǃgams ǃnâ ǁhao, torogu tsî ǀgôarona ǁores tsî ǀgaiǃkhōs ǀkha a ǁaxa. Nēs ge kaise ama ǂgom-aona ra ǂkhabuǂâi kai.​—Khomai re Mateub 24:3-5, 11, 12.

Ama ǂgoms ta Eloba ǂkhî kai, hîas ge ama tama ǂgomsa ǁÎba ra tsûtsû. Elobmîs ǃnâ ǀkhai xūna di ge ra ǁkhāǁkhā, ǁnāsa ǃkhōǂgā hâs ge Elob tsî ǁōhân di mâsib xa ǂhomiba ǁkhāǁkhāsa. Xawe Jehovab ǁkhoreb ge hoa khoen ǁÎb xa amaba nî ǂan ǃkhaisa.​—Khomai re Hesekieli 18:4; 1 Timoteub 2:3-5.

2. Tae-e a ǃgâiǂhôa ǂgomdi xa?

ǃGâi ǃkhais ge Elob gāxaǃnâhe tama hâsa ǂgomdi hîna ǁîba di ǀnam timî tsî xawe ǁGâuab di ǃhūbaiba a ǀnam di xa. (Jakobub 4:4) Elobmîs ge hoa ama tama ǂgomde “Babilons kais” di ra ǂgai. Babilons ge ge ǀoroǁaeb di ǃā i ǂhomi ǂgomdi ge tsoatsoa ǃnâ sa, Noab ti tsēdi kai ǁgammi dâus khaoǃgâ. ǀAeseb, ge Eloba ǂgomde nî dīkākā khoena gāxaǃnâ tsî ra ǁgâiǀade.​—Khomai re ǂHaiǂhais 17:1, 2, 5, 16, 17; 18:8.

ǁNapa i ge noxoba ǃgâiǂhôa-e hâ. Jehovab ge hîna-oǃnâ khoena ǀuru tama hâ nē ǂhomi ǂgomdi ǃnâ hâna. ǁÎb ge nēsi ǁnā khoena ra ǀhaoǀhao ama ǁkhāǁkhā di ǃnâ-ū.​—Khomai re Mixab 4:2, 5.

3. Hîna-oǃnâ khoena tae-e nî dī?

Jehovab ge khoena ra tsâba ǃgâi xūn tsî amaba a ǀnam na. ǁÎb ge ǁîna ra mîba in ama tama ǂgomde xu ǂoa. Eloba ǀnam khoen ge ǂhâbasa ǀkharaǀkharade ra dī ǁÎban ra ǂkhîǂkhî ǂgao amaga.​—Khomai re ǂHaiǂhais 18:4.

ǂGuro kurib sida ǃgôa ǁaeb dib ǃnân ge hîna-oǃnâ khoena ǃgâiǂhôasa apostelga xu ǁnâu tsî gere ǃgâiaǂgao. ǁÎn ge ǀasa ûiǀgauba Jehovaba xu ge ǁkhāǁkhāsen, ǂkhîsa ûib ǀgaub ǂâibasensa ūhâba. ǁÎn ge nētsē sida kaise ǃgâi aiǁgause iba, ǃgâiǂhôasa ūǃoa tsîn ge Jehovaba ǂgurose ǁîn ûib ǃnâ ge mâi.​—Khomai re 1 Tesalonikaǁîn 1:8, 9; 2:13.

Jehovab ge ǁnân hîna ama tama ǂgomsa xu ra ǂoaxana ǀgamsa ǁkhoreǁharesa ra mā ama ǀgoreǀîs tawa. ǁNā ǀgamsa ǁkhauǂuisats ga ūǃoa o, ots ge ǁÎb ǀhōsasis tsî ǀasa ǀnamǀnamsa omarisa nî hō sida ǀkha ǀguiba Jehovaba ra ǀgoreǀî ǃgâsan ǀkha, tsî ǀamo ûib tsîna.​—Khomai re Markub 10:29, 30; 2 Korinteǁîn 6:17, 18.

4. Eloba mati ǂkhîba hoa ǃhūbaib ai nî hā-ū?

Hā nî ǀgoraǃgâs ama tama ǂgomdi tis ge a ǃgâiǂhôa. Nē ǀgoraǃgâs ge hoa ǃhūbaiba ǁgâiǀaba xu nî ǃnora kai. ǁKhapas ge ama tama ǂgomsa khoena ǂgaeǂhabu tsî ǀgora tite. Hoaraga khoen hîa ǁnā ǁaeb ai nî ûin ge ama Eloba ǀgoreǀîs ǃnâ nî ǀguiǃnâxa.​—Khomai re ǂHaiǂhais 18:20, 21; 21:3, 4.