ǁNaeǁgaudi Sida Xristeǁî ûib tsî aoǁnâ sîsenni sîsen ǂkhanib
FEBRUARIB 4-10
ELOBMÎSA XU HÂ ǂÛǂÛSA MÎDI | ROMEǁÎN 1–3
“Sadu ǃgâiǂâisa omkhâi re”
(Romeǁîn 2:14, 15) ǀŪben, ǂhanu-e ūhâ taman ga khoeǂūsiba xu ǂhanub dina dīo, on ge ǂhanu-e ūhâ tamana ǁî-aitsama a ǂhanu. 15 (ǁGauǂuin ra xui-ao, ǂhanub di sîsenni ǁîn di ǂgaogu ǃnâ xoaǂgāhe hâsa, ǁîn di ǂâis ra ǁîna ǃkhō-am, tsî ǁîn di ǂâiǂâisendi ra ǀanaǃgâgu tsî ǀhapiokaisen amaga.)
lvs-E 18 ¶6
ǃGâiǂâisa Elob ǀkha ūhâ re
6 Khoen hîna Jehovaba ǃoaba tama hân tsîn ge a mûǂan ǁkhā tae-i a ǂhanus tsî tae-i a tsūs tsîna. Elobmîs ge ra mî: “ǁÎn di ǂâis ra ǁîna ǃkhō-am, tsî ǁîn di ǂâiǂâisendi ra ǀanaǃgâgu [ǂgari-am, NW] tsî ǀhapiokaisen amaga.” (Romeǁîn 2:14, 15) Aiǁgause, khoen ge a ǂan ǃgams tsî ǃnaris tsîn a tsū ǃkhaisa. Nēsan ga mûǂan tama i xawen ge ǁîna ǁîn ǃgâiǂâisa ra ǃgâ hînab ge Jehovaba ǁîna a kuru ūsa. Tsîs ge nēsa ǁîna ra hui tsūn tsî ǃgâin ǁaegu ǀgorasa. ǁÎn ge Elobmîs tsoatsoadi tamas ka iob ge Jehovaba hoaǃnâ-aixase a ǁkhāǁkhā da xūn tsîna ra sao ǃgâi mîǁguiga dīs ǃnâ.
(Romeǁîn 2:15) (ǁGauǂuin ra xui-ao, ǂhanub di sîsenni ǁîn di ǂgaogu ǃnâ xoaǂgāhe hâsa, ǁîn di ǂâis ra ǁîna ǃkhō-am, tsî ǁîn di ǂâiǂâisendi ra ǀanaǃgâgu tsî ǀhapiokaisen amaga.)
lvs-E 19-20 ¶8-9
ǃGâiǂâisa Elob ǀkha ūhâ re
8 ǀNî khoen ge ra ǂâi ǃgâiǂâisa ǃgâs tsâsiba saos ti ra ǂâibasen di. ǁÎn ge ra ǂâi ǁîn ǂhâban hâ khami a dī ǁkhā di, nēs ga ǃgâise ga ra tsâ kai nî o. Xawe sida tsâsigu ge ǀoasa kurusa ūhâ tama hâ tsî a ǂgaeǂhapu da ǁkhā. Sida tsâsigu ge sida ǃgâiǂâisa a ǂgaeǂhapu ǁkhā. Elobmîs ge ra mî: “Îbe gāxaǃnâ tsî a tsū xūb ge ǂgaoba, ā, ǁōǁōsa xūb ge. Tari-e ǁîba ǂan ǁkhā?” (Jeremiab 17:9) ǁNās ǀkha da ge tsū xū-i tsîna ǃgâi xū-i ase a mû ǁkhā. Aiǁgause, Paulub ge Xristeǁî kaib nîs aiǃâ Elob khoena gere ǃgam tsî ǁnās ǀkha ge ǂâi hâ i ǃgâi xū-eb ra dī di. ǁÎb ǂâis ǃoagub ge ǁîba ǃgâi ǃgâiǂâisa ge ūhâ i. Xaweb ge ega ge mî: “ǃKhūb [Jehoavb, NW] ge tita nîra ǀgoraǃgâba.” (1 Korinteǁîn 4:4; ǃNaeǃkhaidi 23:1; 2 Timoteub 1:3) Paulub ge mûǂan o Jehovab mati ra tsâsa nēs xa ob ge ǁîba ǁîb ǀgauga ge dawa. ǁNās ǀkha da ge xū-e da nî dīs aiǃâ nî dîsen, ‘Jehovaba tae-e ta nî dīsa ra ǂgaoǀkhā?’
9 Khoe-ets ga ǀnam o, ots ge ǁî-i di ǂgaoba tsûtsû ǂgao tama hâ. ǁNās ǀkha da ge Jehovaba da a ǀnam ǃkhais ǃgao ǁîba hoaǁae ra ǂkhîǂkhî ǂgao. Jehovaba ǂkhîǂkhî ǂgaos ge kaise nî ǀgaisa. Nēsa da ge Nehemiab aiǁgausa xu a mû ǁkhā. ǁÎb ge ǁîb ǃharosa ge sîsen-ū tama hâ i, îb ǃkhū. Tae-i ǃaroma? ǁÎb ge ‘eloǃaoǃgâsib ǃaromab’ ǁnāsa ge dī. (Nehemiab 5:15) Nehemiab ge xū-e ge dī ǂgao tama hâ i, Jehovaba ra ǂkhîoǃnâ kai-e. Nehemiab khami da ge sida tsîna Jehovaba ra ǂkhîoǃnâ kai xū-e dī ǂgao tama hâ. Jehovaba ra ǂkhîǂkhî xūna da ge Elobmîs ǃnâ a khomai ǁkhā.—6ǁÎ ǀarosa ǃgāsasiba khomai re.
Gagasi xūna ǀō-aisase ôaǃnâs
(Romeǁîn 3:4) Tātsē! Xawe nēti ī: Elob a ama-ai, khoen hoan a ǂhumi-ao, xoamâihe hâ khami: “Îts ga satsa ǂhanu-ai sa mîdi ǃnâ, îts ga dan, ǀgoraǃgâhets kao,” ti.
w08-E 6/15 30 ¶5
Romeǁîn ǂkhanisa xu ra mâǂoa xūn
3:4. Khoen ra mî xūn ga Elobmîs ǀkha ǀguiǃnâxa tama io, o da a ǂans ge “Elob a ama-ai” ǃkhaisa. Elobmîs ǃnâ ǂgoms ge a hui da ǁkhā î da Elob ǂâisa dī. Ôasase aoǁnâ tsî ǁkhāǁkhāsabedīs ge nî hui da în aoǁnâba da ra khoena Eloba ama-aise mû.
(Romeǁîn 3:24, 25) Tsîn ge xū-i ama tama ǀkhoma xu ra ǂhau-ai kaihe, Xristub Jesub ǃnâ hâ oresa xu; 25 ǁÎbab ge Eloba ǀkhom tronse ge mâi-aiǃâ, ǁîb ǀaob ǃnâ ǂgomsa xu, ǁîb ǂhanu-aisib di ǁgauǂuis axase, aiga Elob di tani ǀnaxasib ǃnâ gere ǃnae ǁoren di ǀûbas ǃaroma;
w08-E 6/15 29 ¶6
Romeǁîn ǂkhanisa xu ra mâǂoa xūn
3:24, 25—“Xristub Jesub ǃnâ hâ oresa;” mati ge matare-e kharu ge “ǁoren” nî ǃgū-aihes aiǃâ? Mesiab kēbos hîna ge ǂgurose Genesis 3:15 ǃnâ a xoamâihes ge 33ǁî kurib sida ǃgôab ǁaeb dib ǃnâ ge dīǀoaǀoahe. Jesub ge ǃgâuhaib ai a ǁō o. (Gal. 3:13, 16) Jehovab ge ǁnā kēbosa a ǂhôa ǁaeba xus ge xoremariba ǁîb mûǂuisa xu ǀnai matare-e hâse i. Xū-i ge a ǀkhai Eloba a ǁkhae ǁkhā-e îs tā ǁîb ǂâisa ī. Jesub Xristub ǁguibas ǃnâ-ūb ge Jehovaba Adammi ǀgôan hoan di ǁorena a ǀûba ǁkhā. ǀŌ-aisasen ga ǂgomsa Jesub ǃnâ ūhâ o. Xoremarib ge Xristeǁîn ǁaeb aiǃâ ge ǁō khoen tsîna khâisa ge īǁkhā kaiba.—ǃNaeǃkhaidi 24:15.
Elobmîs khomai ǃâs
(Romeǁîn 1:1-17) Pauluta, Jesub Xristub ǃgāta, ǂgaihesa apostelta, Elob di ǃgâiǂhôasa ǁhûiǂuibahe hâ ta, 2 ǁîb di kēbo-aoga xub ge aiga mîmâisa ǃanu xoadi ǃnâ, 3 ǁîb di Ôab xa, ǁgans ǃoa Davib di suriba xu ǃnae hâb, 4 tsî ǀgaisase Elob Ôab ase ǁgauǂuisen hâba ǃanuǃanusis di Gagaba ǃoa, ǁō hâna xub ge khâio, Jesub Xristub sada ǃKhūb; 5 ǁîba xu ge ge sige ǀkhommi tsî apostelsis tsîra hōba, ǁnâuǀnamxasib ǂgoms diba ge hoa ǀūben ǃnâ nî ǀkhī kaise ǁîb di ǀons ǂama; 6 ǁîn ǃnâ du ge ǁkhāti sadu Jesub Xristub di ǂgaihesado; 7 Romes ǃnâ hâdu hoado, Elob di ǀnamǀnamsa tsî ǂgaihesa ǃanudo: ǀKhomma ab hâǀkhā du, tsî ǂkhîba, Elob sada Îb, tsî ǃKhūb Jesub Xristuba xu! 8 ǂGurosa ta ge ti Eloba Jesub Xristuba xu ra gangan sadu hoadu ǃaroma, sadu ǂgoms xan ra ǃhūbaib hoab ai ǂhôa ǃkhaisa. 9 Elob ge a ti ǀhûǀguitimî-ao, ǁîb Ôab di ǃgâiǂhôas ǃnâ ta ti gagas ǀkha ra ǃoababa, mati ta ǀûs ose sadu xa ra ǂâi ǃkhaisa. 10 Tsî mati ta mâ ǁaeb hoab ai ra ǀkhoma ǃkhaisa, īse ta ga ǀnîsi ǃgâiǃgâbahe tide ǃkhaisa, Elob ǂâisa xu ta nî sadu tawa sī ti. 11 Kaise ta ra ǁkhore, mû tsî ta nî sado ǀnî gagasi hō-e ause, ǀgaiǀgaiǃnâhe du nîga; 12 ǁnās ge sadu ǃnâ ta nî ǁkhaeǂgaoǀhaohega, sada ǁaegu hâ ǂgoms, sadu dis tsî tis tsîra xu. 13 Xawe ta ǂgao tama, ǀūǂamse du nî hâsa, ǃgâsado, ǃnurise ta gere ǂâibasen ǃkhaisa, sadu tawa ta nî sīse (xawe ta go nēsis kōse ǂhanihe hâ i), î ta sadu on ǃnâ ǀnî ǂû-e hō ti, nau ǀūben ǃnâ ta ūhâ khami. 14 Tita ge surude-aota, Grikeǁîn tsî Grikeǁî taman, gā-ain tsî gâren tsîn hoan di ta. 15 ǁNā-amaga ta ge a māsenxa, tita tawa i hâs kōse, ǁkhāti sadu Romes tawa hâdo ǃgâiǂhôasa aoǁnâbasa. 16 ǃGâiǂhôas Xristub dis xa ta tao tama xui-ao; Elob ǀgais kom a ǁîs, ǂgom hân hoana ǃgâiǃōsib ǃoa hâbasao, ǂgurosa Jodeǁîn tsî ǁkhāti Grikeǁîn tsîna. 17 ǂHanu-aisib Elob dib ra ǂgomsa xu ǂgoms ǃoa ǁîs ǃnâ ǂhaiǂhaihe xui-ao; xoamâihe hâ khami: “ǂHanu-ai-i ge ǂgomsa xu nîra ûi,” ti.
FEBRUARIB 11-17
ELOBMÎSA XU HÂ ǂÛǂÛSA MÎDI | ROMEǁÎN 4–6
Ob ge Eloba ǁîb di ǀnamma sada ǃoa ra ǀgaiǀgai
(Romeǁîn 5:8) Ob ge Eloba ǁîb di ǀnamma sada ǃoa ra ǀgaiǀgai, sada ganupe a ǁore-ao hîab ge Xristuba sada ǁōba ǃkhais ǀkha
(Romeǁîn 5:12) ǁNā-amaga, ǀgui khoeba xub ge ǁoreba ǃhūbaib ai hā khami, tsî ǁoreba xu ǁōba, tsîb ge ǁōba ǁnāti hoa khoena ge ǃgûǃnâǃganu, hoan gere ǁore amaga.
w11-E 6/15 12 ¶5
Ob ge Eloba ǁîb di ǀnamma sada ǃoa ra ǀgaiǀgai
5 Paulub ge nēsa ge ǁguiǃā sao rase: “ǁNā-amaga, ǀgui khoeba xub ge ǁoreba ǃhūbaib ai hā khami, tsî ǁoreba xu ǁōba, tsîb ge ǁōba ǁnāti hoa khoena ge ǃgûǃnâǃganu, hoan gere ǁore amaga.” (Rom. 5:12) Nē ǃkhaisa da ge nēsi ra ǁnâuǃā mati i ge khoen ûiba a tsoatsoa ǀgausa tsî Elob ge ǁnās ǀkha ge hui da. Jehovab ge Adammi tsî Evas tsîna ge kuru. Jehovab ǀoasa kurusa ūhâ ǃkhais ǃgao ra ge ǁîra tsîna ǀoasa kurusa ge ūhâ i. Xaweb ge Jehova Eloba ǁîra ge ǂkhā î ra tā ǀgui xū-e dī tsî ǁîra ge mîba ǁnâuǀnamoǃnâ ra ga o, o ra nî ǁō ǃkhaisa. (Gen. 2:17) Xawe ra ge Jehova Elob ǁnâuǃāxa ǁgaraba ge ǁnâuǀnamoǃnâ tsî ǁnās ǀkha ǁîba ǂhanub mā-aob ase tsî ǁîb ǂgaeǂguis tsîna ge mâǃoa.—Deu. 32:4, 5.
(Romeǁîn 5:13, 14) ǁoreb ge ǃhūbaib ai ge hâ i ǁkhāti ǂhanub aiǃâ; xaweb kom ǁoreba ǃgôabahe tamao, ǂhanu-i ga hâ tama io. 14 Ob ge ǁōba Adamma xu Moseb kōse gere gaosîsen, ǁnān tsîn ǂama, ǁkhā ǃûǂams ǀkha ǁore taman Adammi khami; ǁîb ge hā nîb di ai-ī ge i.
w11-E 6/15 12 ¶6
Ob ge Eloba ǁîb di ǀnamma sada ǃoa ra ǀgaiǀgai
6 Adammi ge ǁoreb khaoǃgâ ǀgui ǀgôana ge hō tsîb ge ǁîb surib hoaba ǁoreba ge ǀumi. Ama as ge Adammi ǀgôan ge Jehovab ǂhanuba ǃgûǂam tama hâ isa. ǁÎn ge ǃereamsa tani tama hâ, ǁîb ǁoreb ǃgao. Moseb ǂhanub nî ǂnûiǂgāhes aiǃâ. (Gen. 2:17) Nēn hoan ǂam-aib ge Adammi surib hoaba ǁoreba ge ǀumi. ǁNās ǀkhab ge ǁoreba Israelǁaes ge Moseb ǂhanuba a ǃkhōǃoas kōse gere ǂgaeǂgui. Tsî nēs ge gere ǁgau khoen a ǁore-ao ǃkhaisa. (Khomai re Romeǁîn 5:13, 14.) ǁOreb ūhâ sîsenǂuib ge khoen nētsē ūhâ ǀaegu ǃnâ ra ǁgauǁgauhe, aiǁgause ǀaob ǃnâ ra hōhe ǀaeb [anemia] khami. ǀNîsi du ge ge khomai Alexisi Russian Czar Nicholas II tsî Alexandras di ǀgôab ge nē ǀaeba a ǀumi ǃkhaisa. Xawe ǀnî omaridi ǃnâs tsînan ge ǀnî ǀgôana ǁnāti i ǀaega xu ǀae tama hâ xawe ǂhī-aose ra hâ. Xawe i ge ǁoreb ǀkha di ī tama hâ. Adamma xu da ge ǀumi ǁoreba xu da ge a ǁkhaesen ǁoa. Hoa da ge ǁîb ǃnaga hâ, nē ǁoreb ge a ǁkhōǁkhōsa. Tsî ǃnaehe ra ǀgôan hoan xa ra ǀumihe. ǁNā ǃgom mâsiba danhe ǁkhāb a?
(Romeǁîn 5:18) Tsî ǀgui dīsāsa xub ge ǀâxarexūsiba hoa khoen ǂama hā khami, ǁnās ǁkhās xaseb ge ûib di ǂhanu-ai kaisiba ǀgui ǂhanu-aisiba xu hoa khoen ǂama ge hā.
(Romeǁîn 5:21) ǁOreb ge ǁōb ǃnâ gaosîsens ǁkhās khamib nî ǁkhāti ǀkhomma gaosîsen ga ǂhanu-aisiba xu ǀamo ûib ǃoa, Jesub Xristub sada ǃKhūba xu.
w11-E 6/15 13 ¶9-10
Ob ge Eloba ǁîb di ǀnamma sada ǃoa ra ǀgaiǀgai
9 Grikegowab mîra tae-i ǂâibasensa ra mā sao ra ǀgam mîra xa “ǂhanu-aisib ǃoa” tsî “ǂhanu-ai kaisiba”? di hâra. ǀGui Elobmîs ǂnûiǃkhuni-aob ge sao ra-e ge mî: “Nēs ge ǂhanu ǀgopeǀnōsa xū-e ǃgâise ra mûsen kai. Nēs ge ǀkharaǀkharas khoe-i Elob ǀkha ūhâs xa ra ǃhoa. Khoe-i ǁî-i ǃnâ ūhâ ǀkharaǀkharasens ose . . . Nē ǀgopeǀnōs ge Eloba ǀgoraǃgâ-aob hîna ǀhapiǂhā-amhe hâ khoe-e ǁîb mā-amsa ra māb ase ra ǁgau. Nē khoe-i ge Elob aiǃâ ge hau-e, ǂhanuoǃnâse i ǂgā-amhe hâ ǃkhais ǃgao. Xaweb ge Eloba nē khoe-e ǀhapioǃnâse ra hō.”
10 Mâ ǃkhais ǃgaob “ǂhanuǂhanu-aob ǃhūbaib hoaragab diba” ǂhanuoǃnâ khoe-e ǀhapioǃnâse a hōǁkhā? (Gen. 18:25) ǃGaoǃgaoba ǁguis ǃgaob ge Jehova Eloba ǁîb di ǀguise ǃnae hâ ǀGôaba ǃhūbaiba ǃoa ge sî. Jesub ge ǁîb ǁGûb ǂâisa ǃamkuse ge dī, ǃâitsâhe, ǃkhāǃkhāhe tsîb gere mîǁgaiǁgaihe xawe. ǁŌb kōseb ge ge mâǀgai ǂgomǂgomsase. (Heb. 2:10) ǁÎb ǀoasa ûiba ǁguibas ase mās ǃnâ-ūb ge Jesuba, Adammi surib hoaba ǁoreb tsî ǁōba xu ge ore.—Mat. 20:28; Rom. 5:6-8.
Gagasi xūna ǀō-aisase ôaǃnâs
(Romeǁîn 6:3-5) ǂAn tama du ǁnâi hâ, Xristub Jesub ǃnâ ǁāǁnâhe hâda hoada ǁîb di ǁōb ǃnâ ǁāǁnâhe hâ ǃkhaisa? 4 O da ǁnâi ǁîb ǀkha ǁkhōhe hâ ǁāǁnâs ǀkha ǁōb ǃnâ: Xristub ge ǁō hâna xu ǂkhaiǂkhaihe khami ǁGûb di ǂkhaisiba xu, ǁnāti da nî ǁkhāti ǀasasib ûib dib ǃnâ ûiga. 5 (ǁÎb ǁōb di ǀguiti-īsib ǃnâ da ga ǁîb ǀkha ǀgui ǂgā kaio, o da kom khâis ǃnâ ǁnās ǁkhās xase nîra io;)
w08-E 6/15 29 ¶7
Romeǁîn di ǂkhanisa xu ra mâǂoa xūn
6:3-5—Xristub ǃnâ ǁāǁnâhes tsî ǁîb ǁōb ǃnâ ǁāǁnâhes tsîna tae-e ra ǂâibasen? Jehovab ga Xristub saosabena ǃanu gagab ǀkha ǂkhau o, on ge ra ǀgui Xristub ǀkha tsî ra ǀhaohâ kai hîna ra Xristub di soro kaisa. ǁNās xōǀkhāb ge Xristuba a ǁnā soros di dana. (1Kor. 12:12, 13, 27; Kol. 1:18) ǁNās ge ǁîn ǁāǁnâsa Xristub ǃnâ. ǂKhauhesa Xristeǁîn tsîn ge ‘ǁāǁnâs ǀkha [Xristub] ǃnâ ra ǁō,’ ǁnās ǀkhan ge ǁîn ûiba ǁguibas ase ra mā în tā ǃhūbaib ai ǀamose ûi. ǁÎn ǁōb tsîn ge ǁguibas ase a mûhe ǁkhā, xawe ǁîn ǁōb ge xoremaris ǀkha ǀgui tama hâ. Nē ǁāǁnâs Xristub ǁōb ǃnâs ge ǁîn ga ra ǁō tsî ǀhommi khâisa hō ǁaeb ai ǀgui ra dīǀoaǀoahe.
(Romeǁîn 6:7) ǁŌ ge-i ge ǁoreba xu ǂhanu-ai kaihe hâ-e xui-ao.
w14-E 6/1 11 ¶1
Tae-i ǃâubsensan ti ǁō ǂoa ge kai ǁgûna ūhâ?
ǂHanuoǃnân ga ra khâisa hō o, on ǃkharu ge ǁaeb ǃnân gere dī ǁoreb ǃgao nî ǀgoraǃgâhe? Hî-î. Romeǁîn 6:7 ge ra mî: “ǁŌ ge-i ge ǁoreba xu ǂhanu-ai kaihe hâ-e xui-ao.” ǂHanuoǃnâ khoen ge ǁîn ǁōb ǀkha ǁîn ǁoreba ra matare. ǁNās ǀkhan ge khâis khaoǃgân ra dī xūn ǃgao nî ǀgoraǃgâhe. Tsî ǁōn nîs aiǃân gere dīn ǃgaos ose. Matin ǃgâiba nēsa xu a hōǁkhā?
Elobmîs khomai ǃâs
(Romeǁîn 4:1-15) Tare-e da ǁnâi nî mî Abrahammi, ǁgans ǃoa sada îb xa? Mâ xū-eb ge hō? 2 Nēti da ra mî: Abrahammi ga sîsenga xu ǂhanu-ai kaiheo, ob ge koasen-e ūhâ, xawe Elob tawa tama. 3 Tare-es ra xoasa mî? Abrahammi ge Eloba ge ǂgom, tsî ǁîs ge ǁîba ǂhanu-aisise ge ǃgôabahe. 4 Sîsen ra-i ge amǃnâsa ǀkhommi ǃoa ǃgôabahe tama hâ, xawe ǃoaǂuibasens ǃoa. 5 Tsî sîsen tama-i tsî eloxoresana ra ǂhanu-ai kaib ǃnâ ra ǂgom-i ge ǁî-i ǂgomsa ǂhanu-aisise ra ǃgôabahe-e. 6 Davib on ra ǁnā khoe-e ǃgâiǃōse kare khami, Elob ra ǁî-e ǂhanu-aisiba sîsengu ose ǃgôaba-e: 7 ǃGâiǃōn ge hâ ǂhanuoǃnâsigu âna ǀûbahe hân tsî ǁoren âna ǃgū-aihe hâna; 8 ǃgâiǃōb ge hâ ǁnā khoeb, ǃKhūb ǁore-i xare-e ǃgôaba tama hâba, ti. 9 Nē ǃgâiǃōse karesa kha ǃgaohe hân ǀguina hâba tsî ǃgaohe tamana hâba tama hâ? Mî da kom rao, Abrahammi ge ǂgomsa ǂhanu-aisise ǃgôabahe hâ ǃkhaisao. 10 Matib ǁnâi ǃgôabahe hâ? ǃGaos ǃnâb hâ hîasa? Aikhōb ǃnâb hâ hîasa? ǃGaos ǃnâb hâ hîa tamas, xawe aikhōb ǃnâb hâ hîas komo. 11 Tsîb ge ǃgaos di saosa ǂgoms di ǂhanu-aisib, aikhōb ǃnâb hâ hîab ge ūhâ ib di ǀgaiǀgais ase ge hō, aikhōb ǃnâ ra ǂgomn hoan di ǁgû kaib nîga, în ǁîn tsîna ǂhanu-aisiba ǃgôabahe ti; 12 tsîb nî ǁkhāti ǃgaos di ǁgû kaiga, ǁnān ǃgaosa xu hân ǀguin di tamab, xawe ǁkhāti sada îb Abrahammi di ǂgoms, aikhōb ǃnâb ge ūhâ is di daogu ǃnâ ra ǃgûn diba. 13 ǂHanuba xu tamas ge ǁnā mîmâisa Abrahammi tsî ǁîb suriba ge hāba, ǃhūbaib di ǀumi-ao kaib nîsa ti mîsa; xawe ǂgoms di ǂhanu-aisiba xus kom ge io. 14 ǂHanub din ga ǀumi-ao kaio, os ga ǂgomsa a ǁau, os ga mîmâisa hîkākāhe hâ, 15 ǂhanub ra ǁî-e sîsen amaga; ǂhanu-i hâ tamapa, ǁnāpa i ǁkhāti ǃûǂam-e hâ tama.
FEBRUARIB 18-24
ELOBMISA XU HÂ ǂÛǂÛSA MÎDI | ROMEǁÎN 7-8
“ǁKhoaǂgaosib ǀkha du ra mâǀgai?”
(Romeǁîn 8:19) Kurusaben ge danasa ǃhâ tsî Elob ôan di ǂhaiǂhaihesa ra ǁkhore xui-ao.
w12-E 7/15 11 ¶17
Ab Jehovaba ama ǃnorasasib ǃoa ǂgaeǂgui du re
17 Jehovab ǁîb ǃoaba-aona ǃhūbaib ai ūba hâ ǃnorasasib xab ge Pauluba ge xoa: “Kurusaben ge danasa ǃhâ tsî Elob ôan di ǂhaiǂhaihesa ra ǁkhore xui-ao.” ǁNāpaxūb ge ge mî: “Kurusaben on nîra ǁauǁausib di ǃgaesa xu ǃnoraǃnorahe ǃkhaisa, Elob ôan ǂkhaisib di ǃnorasis ǃoa.” (Rom. 8:19-21) “Kurusaben” di hâ mîs ge ǃhūbaib di ǃâubasensa ūhâ khoena ǃoa ra ǁnaeǁgau. ǁNān hîna Elob gagasi ǀgôagu di “ǂhaiǂhaihesa” xu ǃgâiba nî hōna. ǁNā ǂhaiǂhaihes ge nē ǀgôagu ga gagasi khâisa a hō o, o nî ī. Tsî gu ge Xristub ǀkha ǀguiba ǁgai khoena nî dīkākā tsî “kai ǂnubis” khoena nî hui în ǀasa ǃhūbaib ǃnâ sâu ǃkharuhe.—J.ǂHa. 7:9, 14.
(Romeǁîn 8:20) Kurusaben ge ǁauǁausib ǃnaga mâihe hâ amaga, ǁîn di ǂâis ǀkha tama, xawe ǁîna ǁauǁausib ǃnaga ge mâib di ǂâis ǃaroma, ǃâubasens ǃoa.
w12-E 3/15 23 ¶11
A da sida ǃâubasens ǃnâ ǃgâiaǂgao re
11 Nē “ǃâubasens” ge Jehovab ge mîmâi “kaira ǀaob” Satanni hîna a ǁGâuaba xūb nî ore da ǃkhaisa. Mîmâisa “surib” ǃnâ-ū. (J.ǂHa. 12:9; Gen. 3:15) ǁNā “surib” ge a Jesu Xristu. (Gal. 3:16) Jesub ǁōb tsî khâis ǃnâ-ūn ge khoen di ǃnoraǃnorahesa ge ǁapoǁapohe ǁoreb tsî ǁōb tsîkha xu. Nē ǃâubasens ge ‘Elob ôan di ǂhaiǂhaihes’ ǀkha ǃkhōǀhaosa. Tsî ǂkhaiǂkhaisa ǂkhauhesan ge ǀgamǁî ǃâb ǁnā “surib” diba ra kuruǂui. ǁÎn ge nî ‘ǂhaiǂhaihe’ Xristub ǀkha ǀguiba în Satanni ǃhūbaiba dīkākā. (J.ǂHa. 2:26, 27) Nēs ge oresa nî hau nau gūn hîna kai ǁgâiǀāba xu ra ûi ǃkharun ǃgao.—J.ǂHa. 7:9, 10, 14.
(Romeǁîn 8:21) Kurusaben on nîra ǁauǁausib di ǃgaesa xu ǃnoraǃnorahe ǃkhaisa, Elob ôan ǂkhaisib di ǃnorasis ǃoa.
w12-E 3/15 23 ¶12
A da sida ǃâubasens ǃnâ ǃgâiaǂgao re
12 Tae-i buruxa xūna nî ī ‘khoesib ǀkha’, Xristub di ǀoadisi kurigu ǂgaeǂguis ǃnâ. ǁNā ǁaeb ai gu ge “ Elob ôan [ǀgôaga]” nî ‘ǂhaiǂhaihe’ pristergu ase Xristub ǀkha. Tsî gu ge nî kōǃgâ îs Xristub di xoremarisa ǃgâise khoen ǂam-ai sîsenǂui. “Kurusaben” hoan ge ǁoreb tsî ǁōba xu nî orehe ǀHomsi Gaosib xa. ǁNâuǀnamxa khoen ge “ǁauǁausib di ǃgaesa xu” nî ǃnora kaihe. Jehovab ǃoa-ain ga ǂgomǂgomsase ǀoadisi kurigu di ǀuniga ǃâis ǃnâ mâǀgai o, on ge “ûib” di ǂkhanis ǃnâ nî xoamâihe. (J.ǂHa. 20:7, 8, 11, 12) ǁNās ge kaise ǂoaǂamsa ǃâubasensa.
Gagasi xūna ǀō-aisase ôaǃnâs
(Romeǁîn 8:6) Tsî ǁgans di ǂâiǂâisens ge a ǁō; xawe Gagab di ǂâiǂâisens ge ûi tsî a ǂkhî xui-ao.
w17-E 06 3
ǂÂihō î du ra?
Tae-i ǃkharagagusiba “ǁgans di ǂâiǂâisens” tsî “gagab di ǂâiǂâisens” ǁaegu hâ? (Rom. 8:6)
Khoe-i hîna ǃkharu ge xūn turagu tsî ǁgansi xūn xa ra ǂâi i ge hoaǁae ǁgansi xūn xa ra ǃhoa tsî ǁgansi xūna ǂkhaisiba ra mā. Khoe-i hîna ǁî-i ǂâisa Elob xūn ai ra mâi i ge ǃanu gagab xa ra ǂgaeǂguihe. ǃKharu ge xūn ge ǁōba ǃoa garu xawe ǀasan ge ûib tsî ǂkhîb di ra ǂâibasen.—w16-E 12, 15-17ǁî ǂhawekha.
(Romeǁîn 8:26, 27) ǁNātib ge ǁkhāti Gagaba sada ǂkhabusasiga ra hui; tare xū-e da nî anu i hâ khami ǀgoresa da ǂan tama amaga; ob ge Gagab ǂûba ra ǀgoreba da mîǂuiheǁoasa ǀhâimâinǀomdi ǀkha. 27 Tsî ǂgaoga ra ôaǃnâb ge a ǂan, mâ-i a Gagab di ǂâi ǃkhaisa; Elob ǂâis ǃoab ra ǃanuna ǀgoreba amaga.
w09-E 11/15 7 ¶20
Sida ǀgorede tae-e sida xa ra mî?
20 ǀNî ǁaegu ai da ge a ǀū tae-e da sida ǀgoredi ǃnâ nî mî ǃkhaisa. “ǃGomsib hîna hâb ge ǀgoreba da nî xūna da ge ǀnî ǁaegu ai a ǀū” dib ge Pauluba ge xoa, “ǁNātib ge ǁkhāti Gagaba sada ǂkhabusasiga ra hui; tare xū-e da nî anu i hâ khami ǀgoresa da ǂan tama amaga; ob ge Gagab ǂûba ra ǀgoreba da mîǂuiheǁoasa ǀhâimâinǀomdi ǀkha. Tsî ǂgaoga ra ôaǃnâb ge a ǂan, mâ-i a Gagab di ǂâi ǃkhaisa; Elob ǂâis ǃoab ra ǃanuna ǀgoreba amaga.” (Rom. 8:26, 27) Jehovab ge ge mā-am î di ǂgui ǀgorede Elobmîs ǃnâ xoa-e. Jehovab ge nē ǀgorede ǀkhomadi hîna da ra dī tsî dīǀoaǀoa ǂgaon ase ra mû. Jehovab ge a ǂan da tsî gagab ge Elobmîs xoa-aogu ǃnâ-ū a mî xūn di ǂâibasendi tsîna. Jehovab ge sida ǀgorede ra ǁnâu-am gagab ga ‘ǀkhomaba’ da o. Xawe Elobmîs xa da ra ǂan khami da ge sida ǂâidi ai ǂgurose ra hā xūn xa ra ǀgore.
Elobmîs khomai ǃâs
(Romeǁîn 7:13-26) Tsîb kha ǁnâi ǃgâiba tita ge ǁō kaiba? Tātsē! Xaweb ge ǁoreba ǁō kaiba te, ǁoreb aseb nî ǂhaiga, ǃgâib ǀkhab ra ǁōba sîsenba te hîa; îb ga ǁoreba ǀgaus ose ǁorexa mîmāsa xu. 14 ǂAn da a xui-ao, ǂhanub a gagasi ǃkhaisa; xawe ta ge tita a ǁgans di, ǁoreb ǃnâ ǁamaxūhe hâ ta. 15 Tare-e ta ra dīsa ta kom a ǀūo; ǂgao ta ra-i, ǁnā-e ta dī tama, tsî ǁkhan ta ra-i, ǁnā-e ta ra dī xui-ao. 16 Tsî ǂgao tama ta hâ-e ta ga dīo, o ta kom ǂhanub ǀkha ra ǀguio, ǃgâib a ǃkhaisa. 17 O ta nēsi tita ǁî-e dī tama, xaweb kom tita ǃnâ ǁan hâ ǁoreba ǁî-e ra dīo. 18 ǂAn ta a xui-ao, tita ǃnâ, ǁnās ge ti ǁgans ǃnâ i ge ǃgâi-i xare-e ǁan tama ǃkhaisa, ǂgaos ge tita tawa hâsa, xawe ǃgâiba sîsenǂuisa ta ge hō tama hâ. 19 ǃGâib, ǁnā ǂgao ta raba ta kom dī tamao; xawe ǂkhabab, ǁnā ǂgao tama ta hâba ta kom ra dīo. 20 Tsî ǁnā ǂgao tama ta hâ-e ta kara dīo, o ta ge tita ǁî-e dī tama, xaweb kom tita ǃnâ ǁan hâ ǁoreba ǁî-e ra dīo. 21 O ta ge nē ǂhanu-e tita ǃnâ ra hō, ǃgâiba ta ga dī ǂgao-o, ob ge ǂkhababa ra ǁgoeǀgara te. 22 Elob di ǂhanub ǃnâ ta ra ǃgâiaǂgao, ǃnāb di khoeb ǃoa; 23 xawe ta ge ti uniǁaedi ǃnâ ǀkhara ǂhanu-e ra mû, ti ǂâis di ǂhanu-e ra ǂnoagu-ū-i, tsî ǁoreb di ǂhanu-i, ti uniǁaedi ǃnâ hâ-i ǃnâ ra ǃkhō te-e. 24 Ti tsūǀkhāxa khoeta! Tari-e nî xore te nē ǁōb di sorosa xu? 25 Eloba ta ra gangan Jesub Xristub sada ǃKhūba xu. 26 O ta ge tita ǂâis ǀkha Elob di ǂhanuba ra ǃoaba, xawe ǁgans ǀkha ta ge ǁoreb di ǂhanuba ra ǃoaba.
FEBRUARIB 25–MAARTI 3
ELOBMISA XU HÂ ǂÛǂÛSA MÎDI | ROMEǁÎN 9–11
‘ǀKherahais di (Olive hais) ǂkhōs’
(Romeǁîn 11:16)Tsî ǂgurob ga ǃanuo, ob ge ǀâpereb ona a ǃanu; tsî ǃnomab ga ǃanuo, o gu ge ǂgonagu ona a ǃanu.
w11-E 5/15 23 ¶13
‘ǃGammi . . . Elob gā-aisib dib’
13 Apostel Paulub ge ǁnān hîna ge Abrahammi surib di kaina ǂgonagu hîna olive hais ai ra kain ǀkha ge ǀgopeǀnō. (Rom. 11:21) Nē hais ge Elob ǂâibasens di dīǀoaǀoahesa ra ǂnûǁkhaeba, Abrahammi di ǃgaeǀhaos ǀkha. Nē hais di ǃnomab ge a ǃanu tsî Jehovaba ra ǂnûǁkhaeba hîna gagasi Israelǁaesa ra ûi-ûiba. (Jes. 10:20; Rom. 11:16) Tsî ǃgaob nē hais dib ge Jesuba Abrahammi di dana surib ase ra ǂnûǁkhaeba. Tsî ǂgonagu ge ‘ǀoasa’ ǃgôab ǃnaga hâ ǃâb Abrahammi di surib diba ra ǂnûǁkhaeba.
(Romeǁîn 11:17) Tsî ǀnî ǂgonagu ga khôaǁnâheo, tsî sats ǃaub di ǀkherahaits ga ǁîgu ǃkhais ǃnâ ǂgāhe, tsîts ga ǂau ǀkherahaib di ǃnomab tsî tsāba amǃnâxao.
(Romeǁîn 11:20, 21) Aio! ǁÎn ge ǂgomoǃnâsib ân ǃaroma ge khôaǁnâhe, tsîts ra satsa ǂgoms ǃnâ mâ; tā ǁnâi ǃguri, î ǃao. 21 Elob ga ǂūsi ǂgonaga sâu tama io: ǂAnbasen, ǀnîsib kom sats ona sâu tideo.
w11-E 5/15 24 ¶15
‘ǃGammi . . . Elob gā-aisib dib’
15 Jehovaba tae-e ge dī îb ǁîb ǂâibasensa dīǀoaǀoa? Paulub ge ge mî ǃgarob ǃnâ ǂgāsa olive hais di khôa hâ ǁnâugu ge ge ǃkhōǃkhunihe ǀasagu ǀkha. (Khomai re Romeǁîn 11:17, 18.) ǂKhauhesa ǃgâsan, ǁaedi din hîna ge Romeǁîn ǀhaohâb ǃnâ hâ în ge olive hais di ǂgāsa ǁnâugu ǀkha ra ǀgopeǀnōhe. Nē ǀgaub ǃnân ge ge Abrahammi di suri kai. Amabes ǃnân ge ǃgarob ǃnâ ge kai olive hais khami ge ī-i. Nēs ǀkhan ge ǃē-e ge ūhâ tama hâ i, ǀō-aisa ǃgaeǀhaos ǃnâ hâsa. Xawe Jehovab ge daoba ge ǁkhowa-amba nî în gagasi Jodeǁî kai.—Rom. 2:28, 29.
(Romeǁîn 11:25, 26) ǂGao tama ta hâ, ǃgâsado, nē ǂganǃgâsiba du nî ǀūǂamse hâsa (ǁî-aitsama du gā-aise ūhâsen tidega): Karokarosens ge ǃkhareǃkharese Israelǁîn ǂama hā ǃkhaisa, ǀūben di ǀoasib nî ǂgâs kōse. 26 ǁNāǃnubais ge Israelǁaes hoasa nîra ǃgâiǃō, xoamâihe hâ khami: Sionsa xub ge Ore-aoba hā, tsî nî eloxoresasiga Jakoba xu ǁkhaebē.
w11-E 5/15 25 ¶19
‘ǃGammi . . . Elob gā-aisib dib’
19 Ama as ge Jehovab ǂâibasens “Elob di Israeli” ǀkhab ge kaise ǂoaǂamsa ǀgaub ǃnâ nî dīǀoaǀoahe. (Gal. 6:16) Paulub ge mî khami, “Israelǁaes” hoas ge nî ǃgâiǃō. (Rom. 11:26) Jehovab ǁaeb ais ge “Israelǁaes” hoasa ǀoasa ǃgôab gagasi Israeli disa nî sīǃnâ. Tsîn ge gao-aoses tsî pristerses tsîna nî ǂgaeǂgui ǀhommi ǃnâ. Xū-i ge Jehovab ǂâibasensa ǁkhae tide.
Gagasi xūna ǀō-aisase ôaǃnâs
(Romeǁîn 9:21-23) Sūǂnubi-aoba kha ǂgoab ǂama ǀgai-e ūhâ tamab hâ, ǁkhā ǂgoab ǀkhab nî ǀgui soa-e ǃgôasib ǃoa tsî nau-e ǃgôaoǃnâsib ǃoa dīsa? 22 Tsî Elob ge, ǁîb di ǁaibab ra ǁgau ǂgao tsî ǁîb di ǀgaibab ra ǂanǂan ǂgao hîa, ǁaib di soadi, kāǁōsiba ǂhomibahe hâde ǃnūǃnâxasib ǀkha gere tani, 23 ǂanǂanni nîga ǁîb ǂkhaisib di ǁuiba, ǀkhomxaǂgaosib di soadi tawa, ǂkhaisibab ge aiǂhomibade.
w13-E 6/15 25 ¶5
As Jehovab ǁnamasa daoǁgau du re
5 Tae-e a ī ǁkhā khoen ga ra ǂkhā o, în Elob xa daoǁgauhe? Xawe matib Eloba, elosi ǂhanuba ra sîsenǂui? ǂÂi re, tae-i ǂgoab ǀkha ra īsa, sîsen-ūhe ǁoa i ga ra o. Tae-i ǃaromab, sūǂnubi-aoba ǀnî hâ xaba-e a kuru ǁkhā tamas ka io khôaǃā ǁkhā? ǂGoa-i ga sîsen-ūhe ǁoa o, ob sūǂnubi-aoba a ǀhapixa? Xawe nēs ge sida Sūǂnubi-aob ǀkha ǀgui tama hâ. (Deu. 32:4) Khoe-i ga mā-am tama io, î-i Jehovab xa daoǁgauhe o i ge ǁî-e ǁnā ǀhapisa nî tani. Jehovab ge ǁîb daoǁgau ǀgauba ra ǀkharaǀkhara tsî nēs ge khoen tanisen ǀgauba xu hâ. ǁNān hîna ǃgâise Jehovab daoǁgausa ǃgâise ra ǃkhōǃoan ge ǃgâiba nî hō. Aiǁgause, ǂkhauhesa Xristeǁîn ge “ǀkhomxaǂgaosib” di xabana hîna “ǃgôasib ǃoa” dīhe hâna. Xawe ǁnān hîna Eloba ǃgâ ǂgao taman ge “ǁaib di soadi [xabadi, NW], kāǁōsiba ǂhomibahe hâde.”—Rom. 9:19-23.
(Romeǁîn 10:2) ǁÎna ta kom ra ǃkhō-ambao, Elob ǂaman ra tau [ôasa, NW] ǃkhaisao, xawen kom ǁnâuǃāb ose ra dīo.
it-1-E 1260 ¶2
Surib, surib
ǃGâi ǂâibasensa ūhâ tama hâ ôasasib. ǀGui khoe-i ge ǀnîsi ǂhauǃnâse a ôasa tamas ka io xū-e ra suri ǁkhae. Tsî ǁnās ǀkha Eloba ǂkhîǂkhî tama hâ. ǁNās ge a ama ǂgui Jodeǁîn hîna ge sida ǃgôa ǁaeb ǃnâ ûi hâ în xa. ǁÎn ge ǂhanu-aisib nî ǁîn sîsengu ǃnâ-ū Moseb ǂhanub ǃnaga nî hāsa gere ôa-am. Xawe Paulub ge ge ǁgau ǁîn ôasasib ge ǂhanu tama hâ isa, ama ǂansan ge ūhâ tama hâ i ǃkhais ǃgao. ǁNā-amagan ge ama ǂhanu-aisib hîna Eloba xu ra hāba ge ǃkhōǃoa tama hâ i. ǁÎn ge ǁîn dīsāde mûǂan tsî Eloba ga ǀgū hâ Xristub ǃnâ-ū, on ge ǂhanu-aisib tsî ǂhanuba xu ga ǃnora kaihe hâ. (Rom. 10:1-10) Sauli hîna ge Tarsuǁî îb tsîn ge Jodeǁîsisa kaise ǀgaisase ge ôasaba i. Tsî “Elob di ǀhaohâba ǃnāǂamsase ǃgôaǃgon tsî gere hîǀhuru.” ǁÎb ge Moseb ǂhanuba kaise ǃamkuse gere sao “ǂhanub ǃnâ ūose [ǀhapio, NW] ge ī ta” dib ge ge mî. (Gal. 1:13, 14; Fil. 3:6) Xawe ǁîb ôasasib Jodeǁîsis ǃgaos ge ge ǂhanu tama hâ i. ǁÎb ge ge ǂhauǃnâ i, ǁnā-amagab ge Jehovaba ge ǀkhom bi Xristub ǃnâ-ū tsî ama ǀgoreǀîs ǃoa ge ǂgae bi.—1Tim. 1:12, 13.
Elobmîs khomai ǃâs
(Romeǁîn 10:1-15) ǃGâsado, ti ǂgaob di turab tsî ti ǀgores, Israelǁaesa ta Elob aiǃâ ra dības ge ǁîn di ǃgâiǃōsib ǃoa hâ. 2 ǁÎna ta kom ra ǃkhō-ambao, Elob ǂaman ra tau ǃkhaisao, xawen kom ǁnâuǃāb ose ra dīo. 3 Elob di ǂhanu-aisiban mûǂan tama, tsî ǁîn di ǂhanu-aisiban nî ǃkhōkhâi ǃkhaisan ra ôa-am amagan ge Elob di ǂhanu-aisib ǃnaga māsen tama hâ. 4 Xristub ge a ǂhanub di ǀam xui-ao; ǁîb ǃnâ kara ǂgom-i hoa-i, ǁnā-i ge a ǂhanu-ai. 5 Moseb ǂhanuba xu hâ ǂhanu-aisib xa nēti ra xoa xui-ao: Nē xūna kara dī khoe-i ge ǁîn ǃnâ nîra ûi-e, ti. 6 Xawe ǂgomsa xu hâ ǂhanu-aisib ge nēti ra mî: Tā sa ǂgaob ǃnâ mî: Tari-e nî ǀhommi ǃoa ǃapa? ǁNās ge Xristuba ūǁgôaxasa. 7 Tsî: Tari-e nî ǃgammi ǃoa ǁgôa? ǁNās ge Xristuba ǁō hâna xu ūǃapasa. 8 Xawe matib ra mî? Mîs ge sats ǀgūse hâ, sa ams ǃnâ tsî sa ǂgaob ǃnâ. ǁNās ge ǂgoms di mîs sige ra aoǁnâsa. 9 Sa ams ǀkhats ga ǃKhūb Jesuba ǁguiǁnâo, tsî sa ǂgaob ǀkhats ga ǂgomo, Elob ge ǁîba ǁō hâna xu ǂkhaiǂkhai ǃkhaisa, ots kom nîra ǃgâiǃō-o. 10 ǂGaob ǀkhats ra ǂhanu-aisib ǃoa ǂgom, tsî ams ǀkhats ra ǃgâiǃōsib ǃoa ǁguiǁnâ xui-ao. 11 Xoas ra mî xui-ao: ǁÎb ǃnâ kara ǂgom-i hoa-i ge taotaohe tide-e. 12 ǀGora-i xare-i Jodeǁîn tsî Grikeǁîn ǁaegu hâ tama xui-ao; ǁkhāb ge hoan di ǃKhū, ǂgaiǀî bi ran hoan ǂamai ǃkhū hâba; 13 mâ-i hoa-i ǃKhūb ǀonsa ra ǂgaiǀî-i nîra ǃgâiǃō xui-ao. 14 Matin kha ǁnâi nî ǂgaiǀî ǁîb ǃnân ǂgom tamaba? Tsî matin kha nî ǂgom, ǁîb xan ǁnâu tamab ǃnâ? Tsî matin kha nî ǁnâu, aoǁnân rab ose? 15 Tsî mati gu kha nî aoǁnâ, sîhe tama gu ga io? Xoamâihe hâ khami: Matikōse di a ǀnamǀnamsa ǂkhîba ra aoǁnâgu tsî ǃgâiba ra ǂhôagu di ǂaide? ti.