ǁNaeǁgaudi Sida Xristeǁî ûib tsî aoǁnâ sîsenni sîsen ǂkhanib
SEPTEMBERI 2-8
ELOBMÎSA XU HÂ ǂÛǂÛSA MÎDI | HEBREǁÎN 7-8
‘Pristera ǀamosib kōse Melxisedeki dommi ǃoa’
(Hebreǁîn 7:1, 2) Nē Melxisedeki ge Salems tawa gao-ao tsî Hoan xa ǀGapib di prister ge i, Abrahamma ge ǃgûǃoab, gao-aoga ǃkhamdā tsîb ge hāo, tsî ǁîba ge ǀkhaeb, 2 Abrahammi ge ǁkhāti ūb hân hoan di disiǁî ǃâsa ǀgorababa. ǁÎb ge ǂgurosa ǂhanu-aisib di gao-ao; ti ra ǂnûiǃkhunihe; tsî ǁnās khaoǃgâb ge ǁkhāti Salems di gao-ao, ǁnāb ge ǂkhîb di gao-aoba.
it-2-E 366
Melxisedeki
Salems di gaob tsî Jehovab hîna “Hoan xa ǀGapi Elob di” pristeri. (Gen. 14:18, 22) ǁÎb ge ǂguro pristeri hîna Elobmîs ǃnâ ra ǂgaiheba. ǁÎb ge 1933ǁî kurib aiǃâ gere ǂgaeǂgui, nēs ge Jesub hās aiǃâsa. Salems ge “ǂkhîb” di ra ǂâibasen. ǁNāsa ǂâis ǃnâ ūhâseb ge apostel Pauluba Melxisedeka ‘ǂkhîb di gao-aob’ di ge ǂgai tsî ‘ǂhanu-aisib di gao-aob’ di. (Heb. 7:1, 2) Jerusalems ge Salems ge ǀoro ǁaeb ai mâ i ǃkhaib ai ge omhe. ǁNās ǀkhas ge “Salems” di hâ mîsa Jerusalems ǀons di ǃâ.—Psa. 76:2.
Abrammi (Abrahammi) ge torob ǃnâb ge Kedorlaomeri tsî ǁîb ǀkha ǃgaeǀhaosa ge ūhâ i gao-aogab ge dans khaoǃgâ, “ǃgoaǃnāb Skaveb” dib tamas ka io “gao-aob di ǃgoaǃnāb” tawa ge sī. ǁNā ǁaeb aib ge Melxisedeka “pereb tsî ǂauxûib tsîkha ge ūǀkhī” tsî Abrahamma ǀkhae tsî ge mî: ‘Ab Abramma ǀkhaehe hâse ī Elob, Hoan xa ǀGapib, ǀhommi tsî ǃhūbaib tsîkha ūhâba. Îb karehe hâse ī Hoan xa ǀGapi Elob, khākhoen âtsa sa ǃomǁae go māba.’ Abrahammi ge Melxisedeki hîna ge gao-ao tsî prister îba ‘disiǁî ǃâsa mā xūn hoan xa’ tamas ka io “disiǁî ǃâs ǁkhâuǁnâs disa” ge mâ.—Gen. 14:17-20; Heb. 7:4.
(Hebreǁîn 7:3) ǁGûo, surio, tsî ûitsēdi di tsoatsoa-i tsî ǀam-e ūhâ tamab; tsîb ge Elob Ôab ǀkha ǀguiti-ī, tsîb ge pristerse nîra hâ ǀamosib kōse.
it-2-E 367 ¶4
Melxisedeki
Melxisedeka tae-i ǃaroma “ûitsēdi di tsoatsoa-i tsî ǀam-e ūhâ tamab” ti ge ǂgaihe?
Paulub ge ǀo-aisa xū-e Melxisedeki xa ge mî: “ǁGûo, surio, tsî ûitsēdi di tsoatsoa-i tsî ǀam-e ūhâ tamab; tsîb ge Elob Ôab ǀkha ǀguiti-ī, tsîb ge pristerse nîra hâ ǀamosib kōse” dib ge mî o. (Heb. 7:3) Melxisedeki ge nau khoen hoan khami ǃnae tsî ge ǁō. Xawes ge Elobmîsa ǁîb di ǁgûra, surib, ǀgôanab ge ūhâ-is tsî matib ge ǁōs xa ǃhoa tama. ǁNā ǀgaus aib ge Jesub Xristuba ǃamkuse ge ǂnûǁkhaeba, Jesub pritersis ǀam tide xui-ao. Melxisedeki aiǃâ tsî ǁîb khaoǃgâb ge hama prister i ǃkhaisas Elobmîsa mî tama hâ ǃkhais ge Jesub pristersis ǀkha ra ǃgûǀhao. Jesub khami i prister i ge ǁîb aiǃâ ge ǀkhai i tsîs ge Elobmîsa ra ǁgau tatsē i ǁîb khaoǃgâs tsîna ǀkhara-e hâ tidesa. Jesub ge ge gao-aob Davib di omaris ǁani i hîna ge Judab gaosib suri iba. Xaweb ge ǁnās xa ǃaromahe hâse pristersisa hō tama tamas ka io ǀumi tama. Nēs ge Jehovab ge ǁîba nûba mîdi di sîsenǂuiba.
(Hebreǁîn 7:17) Nēti ǁîb xa ra ǀhûǀguitimîhe xui-ao: Sats ge pristertsa ǀamosib kōse Melxisedeki dommi ǃoa.
it-2-E 366
Melxisedeki
Xristub di pristersis ǁgauǁgaus. Mesiab xa hâ kēbodi di ǀguis ǃnâb ge Jehovaba Davib di ‘ǃKhūba’ ǃgoa: “Sats ge pristertsa ǀamosib kōse, Melxisedeki di dommi ǃoa” ti ge mî. (Psa. 110:1, 4) Nē kēbosa ǂâis ǃnâ ūhâsen ge Hebreǁîna Mesiab nî gao-ao tsî ǁkhāǁaeb ai prister ǃkhaisa ge ǃâubasen hâ i. Apostel Paulub ge nēsa ge ǁapoǁapo Hebreǁîn ǀhaohâba ǃoab ge xoa sīǂkhanis ǃnâ, “Jesub . . . Melxisedeki di dommi ǃoa ge ǀamosib kōse ǀgapiprister kaiba” dib ge mî o.”—Heb. 6:20; 5:10; mû re ǃGAEǀHAOS.
Gagasi xūna ǀō-aisase ôaǃnâs
(Hebreǁîn 8:3) Mâ ǀgapipristeri hoab ge ra ǂnûiǂgāhe, hōdi tsî ǁguibadi tsînab nî ǁguibase; o i ge ǂhâbasa ge hâ i, nēb on nî ǁguibab nî xū-e ūhâsa.
w00-E 8/15 14 ¶11
Eloba ra ǂkhîǂkhî ǁguibadi
11 Apostel Paulub ge ra mî “mâ ǀgapipristeri hoab ge ra ǂnûiǂgāhe, hōdi tsî ǁguibadi tsînab nî ǁguibase.” (Hebreǁîn 8:3) ǃGaoǃgâ re Paulub ge ǀgapi pristeri ǁguibadi ǁaegu ǀgorasa a dīsa, nēs ge “hōdi” tsî “ǁguibadi” tamas ka io ‘ǁoren ǁguibas’ ǁaegu. (Hebreǁîn 5:1) Khoen ge kai-amse hōdi tamas ka io ǀkhaeba nau khoenan nî ǀnammi tsî ǃgôaǃgâsiba ǁgau, ǀhōsagusisa omkhai tsîn khoen xa nî ǃkhōǃoahe ga ra mâ. (Genesis 32:20; ǂKhoamîdi 18:16) ǁNā amaga di ge ǂgui ǁguibadi hîna Moseb ǂhanub ǃnâga gere mâhede “hōdi” ase nî ǃgôahe, ǁîdi ǃnâ-ūn ge khoena Elob ǃkhōǃoasa gere ôa xui-ao. ǂHanub ǃgoaguts ga ǁore o, ots ge ǁnā ǁoreba nî madawam ǀkhaeb ǀkha tsî ǀûba ǂgans ǃgao ǁnā ‘ǁoren ǃaroma ǁguibasa’ nî mâ. ǂGuro 5 ǂkhanidi Elobmîs ǃnâ hâdi, ǃgosase Eksodus, Levitikus tsî Numeris ge ǃkharagaǃnâgu ǁguibadi tsî hōde ǃamkuse ra ǁguiǃā. Elobmîs ǃnâ hâ ǁguibadi xa xoahe hâ xūn hoana da ǁnâuǃā tsî ūbasen hō tide xawen ge ǀnîna sida xa ǃgaoǃgâhesa anuhâ.
(Hebreǁîn 8:13) ǀAsa ǃgaeǀhaos, tib ra mî hîab ǂgurosa ra ǀoro kai. Tsî ǀoro kaihe hâ-i ge hîkākāhesa a ǀgū-e.
it-1-E 523 ¶5
ǃGaeǀhaos
ǂHanub ǃgaeǀhaosa mati ge “ǀoro”?
Jehovab ge Jeremiab ǃnâ-ū ǀasa ǃgaeǀhaosa a ǂnûiǂgâ ǁaeb ǂûb ais ge hâ ge i ǃgaeǀhaosa ge “ǀoro.” (Jer. 31:31-34; Heb. 8:13) Moseb ǂhanub di ǃgaeǀhaos ge 33ǁî kurib ǃnâ ge ǃkhōǃkhunihe Xristub ge ǃgâuhaib ai a ǁō o. (Kol. 2:14)—Heb. 7:12; 9:15; ǃNǃkh. 2:1-4.
Elobmîs khomai ǃâs
(Hebreǁîn 7:1-17) Nē Melxisedeki ge Salems tawa gao-ao tsî Hoan xa ǀGapib di prister ge i, Abrahamma ge ǃgûǃoab, gao-aoga ǃkhamdā tsîb ge hāo, tsî ǁîba ge ǀkhaeb, 2 Abrahammi ge ǁkhāti ūb hân hoan di disiǁî ǃâsa ǀgorababa. ǁÎb ge ǂgurosa ǂhanu-aisib di gao-ao; ti ra ǂnûiǃkhunihe; tsî ǁnās khaoǃgâb ge ǁkhāti Salems di gao-ao, ǁnāb ge ǂkhîb di gao-aoba; 3 ǁgûo, surio, tsî ûitsēdi di tsoatsoa-i tsî ǀam-e ūhâ tamab; tsîb ge Elob Ôab ǀkha ǀguiti-ī, tsîb ge pristerse nîra hâ ǀamosib kōse. 4 Kō ǁnâi re, matikōseb a kai ǃkhaisa, nēb, abo Abrahammi ge ǁkhāti disiǁî ǃâs ǁkhâuǁnâs disa māba. 5 Tsî Levib ôan digu pristersisa ra hōgu ge mîmā-e ūhâ, ǁaes, ǁnās ge ǁîgu di ǃgâna xu gu nî ǂhanub ǃoa disiǁî ǃâsa ūsa, Abrahammi di kamanaba xun ge ǀkhī xawe; 6 xawe ǁnāb, ǁîn ǃhaos di tama ge ib ge Abrahamma xu disiǁî ǃâsa ū, tsî ǁnāb mîmâisa ge ūhâ iba ge ǀkhae. 7 O i ge hoaragase ǃhoaǃoaheǁoasa, ǂkharib ra ǃnā bi hâb xa ǀkhaehesa. 8 Tsî amase nēpan ge ǁō nîse ī khoena disiǁî ǃâsa ra ū; xawe ǁnāpab ra ǀguib, ûib hâ, ti ra ǀhûǀguitimîbaheba ū. 9 Tsî nēti ta ga mî ǁkhā, ob ge ǁkhāti Levib, disiǁî ǃâsa ra ūba Abrahammi ǃnâ disiǁî ǃâsa ge mā; 10 goroseb ge ǁgûb di kamanab ǃnâ hâ i xui-ao, Melxisedeki ge ǃgûǃoa bi ǃnubai. 11 ǀOasasib ga Leviǁî pristersisa xu īo (ǁîs ǃnâs ge ǁaesa ǂhanuba hō xui-ao), tarexa i kha ǂhâbasa, mîhe nîsa, Melxisedeki di dommi ǃoab nî ǀkhara pristeri, Aronni dommi ǃoa hâ tamaba khâi ǃkhaisa? 12 Pristersis ga ǀkharaǀkharaheo, o i kom ǂhâbasao, ǂhanub on nî ǀkharaǀkharahesa; 13 ǁnāb, ǁîb xan ra nēna mîheb ge a ǀkhara ǃhaos di xui-ao, ǁîsa xu i tātsē khoe-i xare-e altarsa ǃoaba tamasa. 14 ǂHaisa i komo, sada ǃKhūb ge Judab ǃhaosa xu ǀkhīsa, ǁî ǃhaos xab ge Moseba pristersis xa xū-i xare-e mî tama hâ. 15 Tsî ǃnā hâse i kom a ǂhaisao, Melxisedeki di dommi ǃoab ga ǀkhara pristera khâio. 16 ǁGansi ǂnûiǂgās di ǂhanub ǃoa pristerse dīhe tamab, xawe kāǁoasa ûib di ǀgaib ǃoa; 17 nēti ǁîb xa ra ǀhûǀguitimîhe xui-ao: Sats ge pristertsa ǀamosib kōse Melxisedeki dommi ǃoa.
SEPTEMBERI 9-15
ELOBMÎSA XU HÂ ǂÛǂÛSA MÎDI | HEBREǁÎN 9-10
“ǃGoaxa xūn di somma”
(Hebreǁîn 9:12-14) Tsî ǁkhāti pirigu tsî tsâugu tsîn di ǀaob ǀkha ǂgâ tama i, tsîb ge ǀgui ǃnās ǀguisa ǁîb di ǀaob ǂûb ǀkha ǃanusib ǃnâ ǂgâ, tsî ǀamo ore-e ge hā-ū; 13 ǁgōgu tsî pirigu di ǀaob tsî ǂkham gomas di tsaob, ǃanuoǃnân ra ǀgapi-ūheb ga ǁgans di ǃanuǃanusens ǃoa ǃanuǃanuo, 14 matikō ǃnā hâseb Xristub, ǁî-aitsama ūose ǀamo Gagaba xu Eloba ge ǁguibasenni di ǀaoba sadu ǂâide ǁō hâ sîsenga xu nîra ǃanuǃanu, ûitsama Eloba du nî ǃoaba ǁkhāse?
it-1-E 862 ¶1
ǀÛbagus
Moseb ǂhanub ǂgaoǀkhas ge, khoe-i ga Elob tamas ka io ǁîn ǀgukhoe-i ǃoagu a ǁore tsî gara ǀûbahe ǂgao o, o i ge tsūdī i go xu-e ǂhanuǂhanu tsî ǁguibasa nî dī. (Lev. 5:5–6:7) ǁNā amagab ge Pauluba: “Tsî ǁaupe xūn hoan ge ǂhanub ǃoa ǀaob ǀkha ra ǃanuǃanuhe tsî ǀaoǂnâxūs ose i ge ǀûba-i xare-e ī tama hâ” ti ge xoa. (Heb. 9:22) Xamanin ǀaob ge ǁorena ge ūbe ǁoa-i tsî ǁnās ǀkha khoe-e ǀoasa ǃgâiǂâisa ge mā ǁoa-i. (Heb. 10:1-4; 9:9, 13, 14) Jesub xoremarib ǁguibas ai a ǃgaoǃgaosa ǀasa ǃgaeǀhaos ge ama ǀûbasa ra īǁkhā kai. (Jer. 31:33, 34; Mat. 26:28; 1Kor. 11:25; Efe. 1:7) Jesub ge ǃhubaib aib ge hâ io ǃkhora khoena ǂuruǂurus ǃnâ-u ge ǁgau, khoen ǁorena ǀûbas ǁkhasibab ūhâsa.—Mat. 9:2-7.
(Hebreǁîn 9:24-26) Xristub ge ǃomgu ǀkha dīhe hâ ǃanusib, ama-aib dib ǃoa-ai ge hâ ib ǃnâ ǂgâ tama i, tsî ǀhommi ǂûb ǃnâ ǂgâ xui-ao, Elob di ais aiǃâb nî sada ǃaroma ǂhaiga; 25 tsîb nî ǁkhāti ǂgui ǃnāde ǁguibasense tama, ǀgapipristeri kurikorobe ǁîb ǂûb di tama ǀaob ǀkha ǃanusib ǃnâ ra ǂgâ khami; 26 ǁnāti ga ī tama io, ob ga ǃhūbaib di ǃgaoǃgaosa xu ǂgui ǃnāde tsâ hâ; xaweb ge nēsi ǃhūbaib di ǀuniga ǁaegu ǃnâ ǀgui ǃnāsa ge ǂhai, ǁorenab nî ǁaudīga ǁî-aitsama ǁguibasens ǀkha.
cf-E 183 ¶4
‘Tita sao’
4 Xoadi ge Jesub ge ǀhomma ǃoa a oasī o i ge mati tsâ ī ǀgaus xa xu-e mî tama hâ. Xawes ge Elobmîsa ǁaeb aisi ǀnāi ge mî tae-i nî īsa Jesuba oasī toa tsî. Jodeǁî khoen ge ǁnaetisase ǀō-aisa ǁaxasiga 1500 kurigu ǀgaiba gere ǁhao. Mā kurib hoab ǃnāb ge ǀgapi pristera hoan xa ǃanub tawa gere sī tsî ǀaoba, ǂkhîbagus di tsēs ǁguibadi ǃgao gere ǀgapi. ǁNā tsēs aib ge ǀgapi pristera Mesiaba ra ǂnûǁkhaeba. Jesub ge nē kēbos di ǂâibasensa, ǀhomma ǃoab ge oa o ge dīǀoaǀoa. ǁÎb ge Jehovab di trons aiǃâ ge sī—hoan xa a ǃanu ǃkhaisa—tsî ǁîb di xoremariba ǁîb ǁGûba ge mā-oa. (Hebreǁîn 9:11, 12, 24) Jehovaba nēsa ūǃoa ib ge?
(Hebreǁîn 10:1-4) ǂHanub ga ǃgoaxa xūn di somma ūhâo tsî xūn di ǀguiti-ība tama, ob kom tātsē kurikorobe ǁkhā ǁguibadi, hugaǀgui ra ǁguibahedi ǀkha ǃgûsī rana a dītoa ǁoao. 2 ǁNāti ga ī tama io, o di ga ǁguibade ǀû hâ, ǁnān eloǃoabasa ra dīn ga ǀguitsē ǃanuǃanuhe hân ase ǁoren di ǂâisa ūhâ tama i hâ xui-ao. 3 Xawe ǁîdi ǀkhas ra kurikorobe ǁoren di ǂâiǂâisensa dīhe. 4 Ī ǁoa i kom ao, ǁgōgu tsî pirigu di ǀaob ǀkhan nî ǁorena ūbēhesa.
it-2-E 602-603
Dīǀoaǀoasasib
Moseb ǂhanub di dīǀoaǀoasasib. Moseb ǃnâ-ūs ge Isrelǁaesa a māhe ǂhanub ge pristergu di ǂnûiǂgās tsî xamanin di ǁguibas tsîna ge ǃkhōǂgā hâ-i. Eloba xun ge hâ-i tsîn ge dīǀoaǀoasa-i xawen ge nē ǂhanub, pristersis tsî ǁguiban tsîna dīǀoaǀoasiba nē ǂhanub ǃnâga ge hâ-i khoena ge mā ǁoa-i, apostel Paulub ge mî khami. (Heb. 7:11, 19; 10:1) Khoena ǁoreb tsî ǁōb tsîna xu ǃnōraǃnōras xa ge ǁoreba ǃgāsa kais ǀguisa a dī. (Rom. 3:20; 7:7-13) Jehovaba xu hâ xūn hoan ge ǁîb xan ge māhe hâ-i ǂâibasende ge dīǀoaǀoa. Nē ǂhanub ge ǂgōǀau-aob ase ge ī-i hîna ge khoena Xristuba ǃoa gere daoǁgauba tsî ǁnās ǀkha “ǃgoaxa xūn di somma” ǀoasase gere kuru. (Gal. 3:19-25; Heb. 10:1) “ǂHanub ge dī ǁoa ī-i, ǁgans xab ge ǂkhabuǂkhabuhe hâ i amaga” (Rom. 8:3) dib ge Pauluba a mî o, ob ge ǁgansi ǀgapi pristergu di ǂkhabusasin xa gere ǃhoa. ǁÎgu ge ǂhanub xa ge ǂnûiǂgāhe īgu ǁguibade dī tsî hoan xa ǃanub dawa ǂkhîbagus di tsēs ai sī ǂgâ tsî ǀaob ǁguibasa dī. Tsîgu ge ǁnān hîna gu gere ǃoabana ‘hoaragase ge a ǃgâiǃō kai’ Hebreǁîn 7:11, 18-28 ra mî khami. Aronni ǃnâga ge hâ-i pristergu xa gere dīhe ǁguibadi ge khoena gere hui în Elob mûǁae ǃgâi masiba ūhâ ǀgara. Xawe i ge ǁîna ǀoasase ǁoreba xu ge ore tama hâ-i. Apostel Paulub ge ǁnāsa ǃoa gere ǁnaeǁgau, mîb ge o ǂkhîbagus di ǁuibadi ge ‘ǃgûsī rana a dītoa ǁoa’ tamas ka io ǁîn di ǃgâiǂâis ǃoagu dīǀoaǀoa kai tama hâ. (Heb. 10:1-4; ǀgopeǀnō re Heb. 9:9.) ǀGapi pristeri ge ǂhâsa xoremarib ǁguibasa ge mâ ǁoa i în khoena sâuhe ǁkhā. Xristub di pristersi sîsenni tsî ǁguibas tsîn ǀguin ge nēsa ge īǁkha kai.—Heb. 9:14; 10:12-22.
Gagasi xūna ǀō-aisase ôaǃnâs
(Hebreǁîn 9:16, 17) ǃGaeǀhaos hâpa, ǁnāpab nî ǃgaeǀhaosa ge dīb di ǁōba ǂanǂanhe xui-ao. 17 ǃGaeǀhaos kom ǁō hân ǀguin ǂama a sîsenxa, ǃgaeǀhaosa ge dīb ûi hâ hîas ǀgai-e ūhâ tama amaga.
w92-E 3/1 31 ¶4-6
Khomai-aon dîdi
Paulub ge, ǁōb ge ǂhâsa Elob tsî khoen tsîn ǁaegu hâ ǃgaeǀhaosa ǁapoǁapos ǃgao ti ge mî. Aiǁgause, Moseb ǂhanub ǃgaeǀhaosa. Moseb ge ge mâba-ao i, hîna ge Elob tsî Israelǁaes ǁaegu hâ ǃgaeǀhaosa gere īǁkhā kaiba. ǁNā amagab ge Moseba kaise ǂhâǂhâsa ǃâsa gere ǀhuru tsîb ge Isrealǁaes khoen hîna ge nē ǃgaeǀhaos ǃnâ gere ǂgâna gere mûǂgam. Moseb ge ge ǃgaeǀhao-ao i, Jehovab tsî Israelǁaes ǁaegu ge hâ-i ǃgaeǀhaos dība. Xaweb ge Moseba ǁîb di ǀaoba ǂnâxu is nē ǃgaeǀhaosa īǁkha kaihe? Hâ-a. ǁNās nî īs xa i ge xamanina gere ǁguibahe, ǁîn ǀaob ge Jesub diba gere ǂnûǁkhaeba xui ao.—Hebreǁîn 9:18-22.
O ǃgaeǀhaos hîna ge Jehovab tsî gagasi Israels ǁaegu hâ-is? Jesub Xristub ge nē ǃgaeǀhaosa ge dī, ǁîb Jehovab tsî gagasi Isrealǁaes ǁaegu ra mâ xui-ao. Jehovab ge nē ǃgaeǀhaosa a ǂnûiǂgâ xawes ge Jesub Xristub ǁguibas ai ge ǃgaoǃgaosa ī. Jesub ge nē ǃgaeǀhaosa dīs ǀguisa hî tama, xaweb ge khoen hîna ǁîsa xu nî ǀamana ǃhūbaib aib ge hâ io gere mûǂâm. (Lukab 22:20, 28, 29) ǁNās xōǀkhab ge ge ǂhunumâ khoe-i nē ǃgaeǀhaos dīǀoaǀoasa ǁguibasa nî mâba. ǁÎb ge xamani-e ǁguiba tama i tsî ǁîb ǀoasa ûiba ge mâ. ǁNā amagab ge Paulub xa ǀasa ǃgaeǀhaos di ǃgaeǀhao-aob ti ge ǂgaihe. “Xristub ge . . . ǀhommi ǂûb ǃnâ ǂgâ xui-ao, Elob di ais aiǃâb nî sada ǃaroma ǂhaiga.” ǁNā ǁaeb ais ge ǀasa ǃgaeǀhaosa ge sîsen tsoatsoa.—Hebreǁîn 9:12-14, 24.
Apostel Paulub ge Jesub tsî Moseb tsîkha a ǃgaeǀhao-ao ti ge mî, xaweb ge ge ǂâibasen tama hâ i ǁîkha ge nē ǃgaeǀhaode a ǂnûiǂgā ǃkhaisa, Elob ge ǁîde aitsama a ǂnûiǂga amaga. Xawe kha ge ǁîkha gere īǁkhā kai ī ra nē ǃgaeǀhaora ǃamkuse sîsen. Hoa ǃgaeǀhaora nî sîsen ga i ge ǁōba ge ǂhâsa i—xamanin ǀaob ge Moseba ra ǃkhōǃkhuni tsîb ge Jesuba ǁîb di ǀaoba ǁnān hîna ǀasa ǃgaeǀhaos ǃnâ hân ǃgao ra mâ.
(Hebreǁîn 10:5-7) ǁNā-amagab ra ǃhūbaib aib ra hā hîa mî: ǁGuibadi tsî hōdi tsînats ge ǂgao tama hâ, xawets ge sorosa ge ǂhomiba te. 6 Khauǁguibadi tsî ǁoreǁguibadi ǃnâts ge ǃgâiǃgâibasen-e ūhâ tama hâ i. 7 O ta ge tita ge mî: Mû, ǃgoaxa ta a (ǂkhanis di tsoatsoas ǃnâ tita xa xoamâihe hâ), sa ǂâisa ta nî dīse, o Elotse.
it-1-E 249-250
ǁĀǁnâs
Jesub ge ǁîb ǁāǁnâs tsēs ai gere ǀgore dib ge Lukaba ge xoa. (Luk. 3:21) Paulub ge mî o, Jesub ge ‘ǃhūbaiba’ ǃoa ge hā ti (ǁnās ge, Jesub ge ǃhubaib ai a ǃnâehesa ǂâibasen tama kaiseb ge ǂkhariro i amaga xawe ǁîb ge ǁāǁnâ kaisen tsî a aoǁnā tsoatsoa ǁaeb xa ra ǃhoa) ob ge Psalmdi 40:6-8 ǀkha ǀguiǃnāxa se gere ǃhoa, mîra sa: “ǁGuibadi tsî hōdi tsînats ge ǂgao tama hâ, xawets ge sorosa ge ǂhomiba te. . . . Mû, ǃgoaxa ta a (ǂkhanis di tsoatsoas ǃnâ tita xa xoamâihe hâ), sa ǂâisa ta nî dīse, o Elotse.” (Heb. 10:5-9) Jesub ge ge Jodeǁaes di ǁani-i hîna ge Elob ǀkha ǂhanub ǃgaeǀhaosa ūhâ īsa. (Eks. 19:5-8; Gal. 4:4) ǁNā amagab ge Jesuba ǀnāi Jehovab ǀkha ǃgaeǀhaos ǃnâ ge hâ i, Johanneba ǃoab ge ǁāǁnâhes ǃgao a sī o. ǁNā ǁaeb aib ge Jesuba ge māǁnâsen, îb Moseb ǂhanub ǃnâ ǂganhe tama hâ xū-e dī. ǁÎb di khoesi soros, Jehovab xab ge ‘ǂhomibahesa’ ǁguibas ase mā tsîb ge xaminin di ǁguibade ge ǀam kai. Apostel Paulub ge ge mî: “ǁÎb di ǂâis ǃnâ da ǀgui ǃnās ama ǃanuǃanuhe hâ Jesub Xristub soros di ǁguibas ǀkha.” (Heb. 10:10) ǁÎb Îb ǂâisa dīs ge Gaosib di ǃgâi ǂhôas xa aoǁnâs tsîna ge ǃkhōǂgâ hâ i. Jesub ge nēs ǃgaos tsîna ge māsenxa i. (Luk. 4:43; 17:20, 21) Jehovab ge ǁîb ǀGôab di māǁnâsensa ūǃoa tsî ǃanu gagab ǀkha ge ǀnauǂgâ mîrase: “Sats ge ti Ôats ǀnam ta ats, ǃgâiǃgâibasensa ta ūǃnâ hâtsa.”—Mrk. 1:9-11; Luk. 3:21-23; Mat. 3:13-17.
Elobmîs khomai ǃâs
(Hebreǁîn 9:1-14) Tsîs ge ǀnai ǂguro ǃgaeǀhaosa eloǃoabas di ǂhanugu tsî ǃaugasi ǃanusiba ge ūhâ i; 2 tabernakeli ǂgurob ge ǁāǁāhe hâ i xui-ao, ǁîb ǃnân ge kandelari tsî tāb tsî ǁgauperegu tsîna ge hâ i; ǁîb ge ǃanub ti ra ǂgaiheba. 3 Tsî ǀgamǁî ǂgāmâisab ǃgâb aib ge tabernakela ge hâ i, hoan xa ǃanub ti ra ǂgaiheba; 4 ǁîb ǃnân ge hâ i: ǃHuniǀuriǀanǀansoas, tsî ǃgaeǀhaos di ǂgaes, hoaragase ge ǃhuniǀurib ǀkha ǃkhûǃgâhe hâ is, ǁîs ǃnân ge ǃhuniǀurixapas, manab hâǃnâs tsî Aronni haib ǀom geb tsî ǃgaeǀhaos di xoa-aidara tsîna ge hâ i; 5 tsî ǁîs ǂamǃnâkha ge xerukha ǂkhaisib dikha, ǀkhommi tronsa ra somsomǂamkha ge hâ i; ǁî xūn xa i ge nēsi ǀguiǀguibes ai ǃhoahe ǁoa. 6 Tsî nēn nēti ǂhomihe hâ hîa gu ge pristerga hugaǀgui ǂguro tabernakeli ǃnâ gere ǂgâ, eloǃoabasa gu nî dīse; 7 xawe ǀgamǁîb ǃnâb ge ǀgapipristeri ǀguiba kurikorobe ǀgui ǃnās ǀguisa gere ǂgâ, ǀaob ose tama, ǁîbab ge ǁîb ǂûb tsî ǁaes di ǃûǂamdi ǃaroma ǁguibaba; 8 tsî nēs ǀkhab ra ǃAnu Gagaba ǁgauǂui, ǃanusib ǃoa garu daob ganupe ǂhaiǂhaihe tamasa, ǂguro tabernakeli ga mâs kōse: 9 Nē hâ ǁaeb di ǁgauǁgaub ge ǁîba i, ǁîb ai di ge hōdi tsî ǂāǁguibadi tsîna gere ǁguibaheb, ǃoabasa ra dī-i di ǂâisa dītoa ǁoana; 10 ǂûs tsî ās ǀguis ǃnâ mâna, tsî ǃkharaga ǁāsen-aidi ǃnâ, tsî ǃaugakam ǂhanu-aisigu ǃnâ, dī-unus ǁaeb nî hās kōse ǁgui-aihe hâna. 11 Xawe Xristub ge ǃgoaxa xūn di ǀgapipristerse ge hā, tsîb ge naub ǃgâ-ai kai tsî dītoahesa tabernakeli, ǃomgu ǀkha dīhe tamab, ǁnāb nē kurus di tamab, 12 tsî ǁkhāti pirigu tsî tsâugu tsîn di ǀaob ǀkha ǂgâ tama i, tsîb ge ǀgui ǃnās ǀguisa ǁîb di ǀaob ǂûb ǀkha ǃanusib ǃnâ ǂgâ, tsî ǀamo ore-e ge hā-ū; 13 ǁgōgu tsî pirigu di ǀaob tsî ǂkham gomas di tsaob, ǃanuoǃnân ra ǀgapi-ūheb ga ǁgans di ǃanuǃanusens ǃoa ǃanuǃanuo, 14 matikō ǃnā hâseb Xristub, ǁî-aitsama ūose ǀamo Gagaba xu Eloba ge ǁguibasenni di ǀaoba sadu ǂâide ǁō hâ sîsenga xu nîra ǃanuǃanu, ûitsama Eloba du nî ǃoaba ǁkhāse?
SEPTEMBERI 16-22
ELOBMÎSA XU HÂ ǂÛǂÛSA MÎDI | HEBREǁÎN 11
“ǂGomsa tae-i ǃaroma a ǂhâǂhâsa?”
(Hebreǁîn 11:1) Tsî ǂgoms ge khoe-i ra ǃâubasen xūn di ǁaposa mûmâinǃgâsa, tsî khoe-i mû tama xūn di ǂanǁaposisa.
w16.10-E 27 ¶6
Jehovab di mîmaidi ǃnâ ǂgomsa ūhâ re
6 Hebreǁîn 11:1 ǃnâs ge ǂgoms di ǂâibasensa ra ǁguiǃāhe. (Khomai re.) ǂGoms ge ǀgam mûheǁaosa xūna ǃkhōǂgâ hâ: (1) “Khoe-i ra ǃâubasen xūn”—nēs ge mîǁguidi hîna hānîǁaeb ǃnâ nî dīǀoaǀoahe di ǃoa ra ǁnaeǁgau. Aiǁgause, eloxoresan nî dīkākāhes tsî ǀasa ǃhūbaib nî hâs. (2) “Khoe-i mû tama xūn di ǂanǁaposisa.” Nē ǃkhais ǃnâs ge Xrikegowab mîs “ǁaposa mûmâinǃgâsa” di ǂnûiǃkhunihe hâsa mûheǁoasa xūn aiǁgause Jehova Elob, Jesub Xristub, ǀhomǃgāgu tsî ǀhomsi gaosib nēsi ra īǁkhā kai xûna ǃoa ra ǁnaeǁgau. (Heb. 11:3) Mâ ǀgaugu ǃnâ da sida ǃâubasens tsî Elobmîs ǃnâ xoahe hâ xūn hîna da mûǁoan ǃnâ da ǂgomsa ūhâsa nî ǁgau? Sida mîdi tsî dīgu—nēn oses ge sida ǂgomsa ǁōhâ.
(Hebreǁîn 11:6) Xawe ǂgoms ose Eloba ǃgâiǃgâibas ge a ī ǁoa; Elob tawa ra sī-i nî ǂgom amaga, hâb a ǃkhaisa, tsîb a ǁîba ra ôan di dīdawa-amao ǃkhaisa.
w13-E 11/1 11 ¶2-5
“ǁÎba ra ôan di dīdawa-amao”
Tae-e a ǂhâbasa Jehovaba da ga ǂkhîǂkhî ǂgao o? “ǂGoms ose Eloba ǃgâiǃgâibas ge a ī ǁoa” dib ge Pauluba ge xoa. ǃGaoǃgâ re, Paulub ge ǂgoms ose Jehovaba ǃoabas a ǃgom ti mî tama hâ. Xaweb ge nēs tā tsē a ī ǁoasa ge ǁgau da. ǃNî mîdi ǃnâ, ǂgoms ge kaise a ǂhâǂhâsa Jehovaba ǂkhîǂkhîs ǃgao.
Mâ ǃnôa ǂgomsa da nî ūhâ? Elob ǃnâ da ūhâ ǂgoms ge ǀgam xūna ǃkhōǂgā hâ. ǂGurose, da ge “nî ǂgom . . . hâb a ǃkhaisa.” ǀNî Elobmîdi ge nē xoasa “Elob a ama ǃkhaisa ǂgom” tsî “Elob ama hâsa ǂgom” di ǂnûiǃkhuni hâ. Mati da amabes ǃnâ Eloba a ǂkhîǂkhî ǁkhā ǁîb hâsa da ga ǂgom tama i o? ǁNās xōǀkhās ge ǂgoms ǀguisa ǂâu tama, demongu tsîn Jehovab hâsa ra ǂgom xui-ao. (Jakobub 2:19) Sida ǂgoms ge nî ǁgarida ida Jehovab ǂgao hâ ǀgaub ǃnâ ûi.—Jakobub 2:20, 26.
ǀGamǁîse, da ge “nî ǂgom” Elob a “dīdawa-amao” ǃkhaisa. ǀGaisa ǂgomsa ūhâ khoe-i ge ǂan Eloba i ra dība ǃgâi sîsengu hoagu hukas tsîna ǀhuruhe tidesa. (1 Korinteǁîn 15:58) Mati da amase Jehovaba a ǂkhîǂkhî ǁkhâ ǁÎb nî mādawam da ǃkhaisa da ga ǂgomǃgâ tama i o? (Jakobub 1:17; 1 Petrub 5:7) Khoe-i hîna Elob ǁae tama, ganganoǃnâ tsîb a ǀgîxa ti ra ǂâi i ge ama Eloba a ǀu.
Jehovaba ham-e ra dīdawa-am? ‘ǁÎba ra ôana,’ tib ge Pauluba ra mî. Elobmîs ǂnûiǃkhuni-aon ra sîsen-ū ǁnaeǁgaudi ǂkhanidi ǀguis ge Xrikegowab mîs “ra ôana” di hâs “ǃgûǂoa tsî ôas” ti ǂâibasen tama, xawes Elob tawa “sī tsî ǃoabas” ti ra ǂâibasensa ra ǁgau. ǀNî ǂkhanis ge ra ǁgau nē Xrikegowab sîsenmîs ǀgaisa ǁguiǂgāsensa ǂkhōǂgā hâsa. Î, Jehovab ge ǁnān hîna ǂgoms xa ǁgarihe hâse ǂgaob tsî ǂâis ǀkha ǁguiǂgāsen hâse ra ǃoababina ra dīdawa-am.—Mateub 22:37.
(Hebreǁîn 11:33-38) ǁÎgu ǂgoms ǀkha gaosiga ge danga, ǂhanu-aisiba ge sîsenga, mîmâide ge hōga, xamgu di amǃnâga ge ǂganamga, 34 ǀaes di ǀgaiba ge ǀariga, gôab di ǀāba xu ge ûiga, ǂkhabusasiba xu ge ǀgaiba hōga, ǃkhams ǃnâ ge ǀgaiga, ǃhaokhoen di ǂnubide ge ǃhū kaiga. 35 Taradi ge ǁîdi ǁō hâna khâisa xu ǁkhawa ge hō; naun ge ge ǂnauǂkhūkaisen, ǃnora kaihesa ǃkhōǃoa tama i tsî, ǁnās ǃgâ-ai ǃgâi khâisan nî hōga. 36 Naun ge ǃhōhes tsî ǂnauhes, tsî ǁnās tawa ǃgae-ūdan tsî ǃkhōsis tsîna ge tsâ; 37 tsîn ge ǀuiǁhomhe, tsî saxaǃāhe, ǃâitsâhe, tsî gôab ǀkha ge ǃgamhe; tsîn ge khōn tsî pirikhōn ǃnâ gere ǃgûma, tôasib ǃnâ hâse, tsî ǁgâiǀāhe rase, tsî tsūse ra sîsenūhese; 38 ǁîn ǃhūbaiba ge anuba tama i tsî ǃgaroǃhūgu ǃnâ, tsî ǃhomgu ai tsî ǃhūb di ǁhoagu tsî ǁhāgu ǃnâ gere ǁhapumana.
w16.10-E 23 ¶10-11
ǃÂubasendi ǃnâ du ūhâ ǂgomsa ǀgaiǀgai re
10 Apostel Paulub ge Hebreǁîn 11ǁî danaǃâs ǃnâ ǂgomǂgomsa khoen hîna ǃgomsin hoan ǃnâ ge a māǀgain xa ge xoa. Aiǁgauseb ge kaikhoes hîna ǀgôab xa ǁō xu-e tsî ge ǁōba xu a hō-oaheb xa ge xoa. Khoen hîna “ǃnora kaihesa ǃkhōǃoa tama i tsî, ǁnās ǃgâ-ai ǃgâi khâisan” nî hōn xab ge ǁnās khaoǃgâ ge xoa. (Heb. 11:35) ǀOndeb ge xoa tama hâ i xaweb ge ǀnîsi khoen hîna Naboti tsî Saxariab khami Jehovaban ge ǁnauǀnam tsî ǁîb ǂâisa dī ǃkhais ǃao ge ǀuiǁhomhen xa gere ǃhoa. (1Gao. 21:3, 15; 2Kro. 24:20, 21) Danieli tsî ǁîb ǀhogu ge “ǃnora kaihesa” ga ǃkhōǃoa hâ Jehovab ǃoa-ai gu ga ǂgomǂgomsase mā tama hâ o. Xawe ǀgaisa ǂgoms ǀkha gu ge “xamgu di amǃnâga” ge ǂganam tsî ‘ǀaes di ǀgaiba ge ǀari’ gu khama ge māǀgai.—Heb. 11:33, 34; Dan. 3:16-18, 20, 28; 6:13, 16, 21-23.
11 Mikajab tsî Jeremia hagu ge ǁîgu ǂgoms ǃao ‘ǃhōhe’ tsî “ǃkhōsis . . . tsîna ge tsâ.” ǀNîn ge Eliab khami “ǃgaroǃhūgu ǃnâ, tsî ǃhomgu ai tsî ǃhūb di ǁhoagu tsî ǁhāgu” ǃnâ gere ǁhapuma. ǁÎn ge nē xūn hoan ǃnâ ge māǀgai ‘ǃâubasenan ge hâ i xūn di ǁaposa mûmâinǃgâsan’ ge ūhâ i amaga.—Heb. 11:1, 36-38; 1Gao. 18:13; 22:24-27; Jer. 20:1, 2; 28:10, 11; 32:2.
Gagasi xūna ǀō-aisase ôaǃnâs
(Hebreǁîn 11:4) ǂGomsa xub ge Abela Kainni dis ǃgâ-ai ǃgâi ǁguibasa Eloba ge ǁguiba, ǁîsa xub ge ǃkhō-am-e ge hō, ǂhanu-aib a ǃkhaisa, Elob ge ǁîb di hōs xa ǃkhō-am ǃnubai; tsî ǂgomsa xub ra ganupe ǃhoa ǁōb ge xawe.
it-1-E 804 ¶5
ǂGoms
ǃKharuge ǁaeb ǃnâ ge ǂgomsa ūhâ i khoen. ‘Kai ǀhûǀguitimî-aon di ǀnanus’ hînab ge Pauluba (Heb. 12:1) ǂgaikhâin ge hoan hîna ǃaromas ǃgao ǂgomsa ge ūhâ-i. Aiǁgause, Abeli ge Elob di mîmâis, “surib” hîna “ǀaob” danasa nî ǂkhūǂkhūs xa ge hâ isa ge ǂan i. Tsîb ge Jehovab ǁkharab ge ǁîb ǁgûra ai ūhâ-i sîsenǂûiba aitsama ge mû. Adammi tsî ǁîb omaris ge Edens ǃhanab ǃauga kai ǀhupub ǀkha ǂû-e gere hō, ǃhūb ge ǀâxarexūheb hâ amaga ǁkhūn tsî ǀgamen tsîna gere ūǀkhība bi xui-ao. Abeli ge ge mû matis Evasa Adammi ǀgūse ǁgui gere hâ ǂgaosa tsîb ge Adamma ǁîsa gere gaoǂām ǀgausa. ǂGomǃgā ǁkhā da ge a Evas ge tsûb tsî ǃgomi ǀkhas ǀgôana ra hōsa ǁîna gere mîbasa. Edens ǃhanab ge xerugu xa ge ǃûihe hâ i, tsî ǀaexa gon ra gôab ge ǁnapa ge hâ i. (Gen. 3:14-19, 24) Nē xūn hoan ge Abela mû tamab hâ xūn di “ǂanǁaposisa” ge mâ tsî ‘surib di mîmâis’ ǃnâ-ū ǀguis oresa nî hâ ǃkhaisa ge ǁapoǁapo. ǁNā amagab ge ǂgoms xa ǁgari-e hâse Kainni dis xa a “ǃgâi ǁguibasa Eloba ge ǁguiba.”—Heb. 11:1, 4.
(Hebreǁîn 11:5) ǂGomsa xub ge Henoxa ge ūbēhe, ǁōbab mû tidese, tsîb ge hōhe tama ge i, Elob ge ūbē bi amaga; ǁîb di ūbēhes aiǃâb ge ǀnai ǃkhō-amsa ge hō, Elobab ge ǃgâiba isa.
wp17.1-E 12-13
“Elobab ge ǃgâiba isa”
Henoxa mâ ǀgaub ǃnâ ge “ūbēhe” “ǁōbab mû tidese”? Jehovab ge ǀnîsi Henoxa tsû-eb tsâ tama hâ ǀgaub ǃnâ ge ǁō kai. Xaweb ge aibe Henoxa “ǃkhō-amsa ge hō, Elobab ge ǃgâiba isa.” Mâ ǀgaub ǃnâ? ǁŌb nîs aiǃâb ge ǀnîsi ǁhapos ǃnâ-ū ge ǁgauhe ǃhūbaib nî paradais kai ǀgauba. ǁNā ǃgasa ǁgauǁgaus Jehovab ǃgōǃâs dis ǀkhab ge ǁōb ǃnâ ge sâ. Henoxi tsî nau ǂgomǂgomsa khoen xab ge Pauluba ge mî: “Nēn hoan ge ǂgoms ǃnâ ge ǁō.” (Hebreǁîn 11:13) Henoxi khākhoen ge ǁîb sorosa gere ôa, xawes “ge hōhe tama ge i.” Jehovab ge ǀnîsi Henoxi sorosa ge dīkākā, îs tā ǃgâi tama ǀgaub ǃnâ tamas ka io ǂhumi ǃoaba di ǃnâ sîsen-ūhe.
Elobmîs khomai ǃâs
(Hebreǁîn 11:1-16) Tsî ǂgoms ge khoe-i ra ǃâubasen xūn di ǁaposa mûmâinǃgâsa, tsî khoe-i mû tama xūn di ǂanǁaposisa. 2 ǁÎsa xu gu ge kaiga ǃkhō-am-e hō xui-ao. 3 ǂGomsa xu da ra mûǂan, ǃhūbaib Elob mîs ǀkha ǁāǁāhe hâsa, on ge mû da rana mûhe rana xu ǀkhī tama hâ. 4 ǂGomsa xub ge Abela Kainni dis ǃgâ-ai ǃgâi ǁguibasa Eloba ge ǁguiba, ǁîsa xub ge ǃkhō-am-e ge hō, ǂhanu-aib a ǃkhaisa, Elob ge ǁîb di hōs xa ǃkhō-am ǃnubai; tsî ǂgomsa xub ra ganupe ǃhoa ǁōb ge xawe. 5 ǂGomsa xub ge Henoxa ge ūbēhe, ǁōbab mû tidese, tsîb ge hōhe tama ge i, Elob ge ūbē bi amaga; ǁîb di ūbēhes aiǃâb ge ǀnai ǃkhō-amsa ge hō, Elobab ge ǃgâiba isa. 6 Xawe ǂgoms ose Eloba ǃgâiǃgâibas ge a ī ǁoa; Elob tawa ra sī-i nî ǂgom amaga, hâb a ǃkhaisa, tsîb a ǁîba ra ôan di dīdawa-amao ǃkhaisa. 7 ǂGomsa xub ge Noaxa, ganupe mûheǁoa xūn ǂamab ge elosi mîmā-e hō ǃnubai ǃaoǃgâsib ǀkha arka ge ǁāǁā ǁîb oms din di sâuhes ǃoa; ǁîs ǀkhab ge ǃhūbaiba ǀgoraǃgâ, tsî ǂgomsa xu ra ǀkhī ǂhanu-aisib di ǀumi-ao kai. 8 ǂGomsa xub ge Abrahamma ge ǁnâuǀnam, ǂgaiheb geo, ǁnā ǃkhais, ǀumis aseb nî hōs ǃoab nî ǃgûǂoasa; ob ge mapab nî sīsab a ǀūse ge doeǂoa. 9 ǂGomsa xub ge mîmâis di ǃhūb ǃnâ ǁanǂgā-aose ge hâ, ǃhao ǃhū-i ǃnâs khami, Isaki tsî Jakob tsîkha, ǀhaoǀumi-ao ge ikha ǁhao-omdi ǃnâ ra ǁanse. 10 ǃĀs, ǃgaoǃgaoba ūhâsab ge ǃâubasen xui-ao, ǁîs di om- tsî kuru-aob ge Eloba. 11 ǂGomsa xus ge ǁkhāti Sarasa ǀgaiba ge hō, ǃhao-es nî ǃgaoǃgaose, tsî kairas hâ xawes nî ǁorase; ǁîsa ge mîmâibas ge ǂgomǂgomsase ūhâ i amaga. 12 ǁNā-amagan ge nētikō ǂguina nē ǀguib, ǁō hâ khami ība xu ge hā, ǀhommi ai hâ ǀgamiron tsî hurib ammi ai ǁgoe ǀgopagu di ǃgôaheǁoasa ǀgaus kōse. 13 Nēn hoan ge ǂgoms ǃnâ ge ǁō, tsî mîmâisa hō tama ge i, tsîn ge ǃnūseba xu mû tsî ǂgom tsî ǃgâiaǂgaoxase ge ǃkhōǃoa si, ǃhūbaib ain ge a ǃhaokhoe tsî ǁaerob ǀguib di ǁanǂgā-ao ǃkhaisa ǂan tsî. 14 Nēna ra mîn ge ǂhaisase ra ǁgauǂui, ǁgûxan ǃhū-en ra ôa ǃkhaisa. 15 Tsî amase naub, ǁîba xun ge ǂoa ǃhūb xan ga ǂâi hâo, on ga ǁaeba ūhâ i, ǁkhawan nî ǁnāǀî oaga. 16 Xawen kom naub ǃgâ-ai ǃgâib ǀhommi diba ra turao. ǁNā-amagab ge Eloba ǁîn xa tao tama hâ, ǁîn di Eloseb nî ǂgaihesa, ǃā-eb ǁîna ǁāǁāba hâ xui-ao.
SEPTEMBERI 23-29
ELOBMÎSA XU HÂ ǂÛǂÛSA MÎDI | HEBREǁÎN 12-13
“ǁNamas ge Jehovab di ǀnamma ra ǁgau”
(Hebreǁîn 12:5) Tsî du ge ǀuru hâ ǁnā ǁnamas, sado ǃoa ǀgôadu ase ra ǃhoasa: Ti ôatse, ǃKhūb di ǁkharaba tā ǂkharise ǃgôa, î tā ǂkhabuǂâi, ǁîb xats ga ǁkharaheo
w12-E 3/15 29 ¶18
Tā “khaos ai hân ǃoa” kō
18 Tsûtsûsa ǁnamas. ǀNî ǁaega i ge a ǃgom tsûtsûda ge ǁnamasa ǀurusa. Nēs ai ǂâisa ǂnûis ge os hâ o tsûaǂgao tsî ǀgai-e ūhâ tamase ra tsâ kai da—tsî da ge nî “ǂkhabuǂâi” tsoatsoa. (Heb. 12:5) ǁNamasa da ga “ǂkharise ǃgôa” tamas ka io ūǃoa tsî ǁnāpaxū a “ǂkhabuǂâi” tsoatsoa, xaweb ge sîsenǂûiba a ǀgui. ǁNamas nî huida tsî ǀkharaǀkhara da sa da ge mā-am tama hâ. Salomoni mîde sao-ais ge nēs xa a ǃgâi: “ǂGōǀausa ǃkhōǀgara îts tā ǁnāxū si; ǁîsa ǃkhōǀgaipe, ǁîs a sa ûi xuige.” (ǂKhm. 4:13) Audosa ra ǃnari khoe-i daoǁgausaode ra sao-ai khami da ge ǂgōǀausa ūǃoa, sîsenǂam tsî nî aiǃgû.—ǂKhm. 4:26, 27; khomai re Hebreǁîn 12:12, 13.
(Hebreǁîn 12:6, 7) ǃKhūb ǀnam hâ-i, ǁî-eb ra ǁkhara xuige; tsîb ra mâ ǀgôab hoab, ǃkhōǃoab raba ǁkhara. 7 ǁKharaba du ga tanio, ob ge Eloba ǀgôadu ase ra sîsenū du; mâ ǀgôaba kha hâ, ǁgûb ǁkhara tamaba?
w12-E 7/1 21 ¶3
“ǀGore du kao, nēti mî: Sida Îtse”
ǀNamxaǃnâ ǁgûb ge ǀgôan ga kai on nî ūhâ ǂub xab ra ǂâi amaga ra ǁnama nî, ǂkhamsisa xu. (Efeseǁîn 6:4) ǁNā ǁgûb ge ǀnîsi ǁoreba ǃkhōǃkhō tama xaweb ge karoǂgaoxase ǀgôana ǁnama tama. ǁKhā ǀgaub aib ge Jehovaba sida ra ǁnama. Xawe Elob ge ǀnammi ǃnâ ra dauǁgauda tsî ǁkhara da ǂgaob ra amaga dī tama. ǁÎb ǁGûb khamib ge Jesuba ge karoǂgaoxa tama hâ i, ǁîb ǁkhāǁkhāsabegu ge ǃhaese ǂhabasa ǀkharaǀkharana dī tama hâ i xawe.—Mateub 20:20-28; Lukab 22:24-30.
(Hebreǁîn 12:11) Tsî ǁkharab hoab, hâb rao, ǃgâiaǂgaose ība da tama i tsî ǃoase ra ība da; xawe ǁnās khaoǃgâb ge ǁîb ǃnâ ǁkhāpesen hâna ǂhanu-aisib di ǂkhîxa ǂû-e ra ūǀkhība.
‘ǃGâ te tsî ti ǂgōǀausa ǁnâu, î du gā-ai’
18 ǁNamahes a tsûtsûsa xawe i ge ǀgui xū-e hâ kaise ra tsûtsû tsî a ǁkhōǁkhōsa-e. ǁNās ge ǁnamasa ūǃoa ǂgao tama isa. (Heb. 12:11) Kainni tsî Gao-aob Sedekiab aiǁgau ra xa ǂâi re. Kainni ge Abeli ǃoagu ǃhui tsâsiba ūhâ i o, ob ge Eloba Kainna ge mîba: “Tare xū-i ǃaromats kha go ǁaixa? Tsî tare xū-i ǃaromab kha sa ais di īsiba go ǀkhara? ǁNāti ī tama hâ; ǃgâidīts ka ots ra ǀgapiǀgapihe, xawe ǃgâidī tamats ga io, ob ge ǁoreba dao-ams aiǃâ ǁgoe. Turab âb sa ǃoa hâse ī, xawets ge ǁîba nî gaoǂam.” (Gen. 4:6, 7) Kainni ge ge ǃgâ tama hâ i. ǁOreb ge ǁîba ge a dan. Kainni ge ǂhâbasa tama tsûb tsî ǃgommi tsîna ge haubasen. (Gen. 4:11, 12) Elosi ǁnamas ra mā tsûb ge kaise a tsaura.
Gagasi xūna ǀō-aisase ôaǃnâs
(Hebreǁîn 12:1) ǁNā-amaga ǁkhāti sada, nētikō kai ǀhûǀguitimî-aon di ǀnanu-e da sada ǂnamipe ūhâ amaga, a da ǃgommi hoab tsî hugaǀgui ra ǂae-ai da ǁoreba ǁguiǁnâ, î da ǀûs ose sada mâibahe hâ ǃkhams ǃnâ ǃgû;
w11-E 9/15 17-18 ¶11
ǀUnis kose ǃkhoeǀhûgus ǃnâ māǀgai
11 ‘Kai ǀhûǀguitimî-aon di ǀnanus’ ge mā tsî kēs ǀguisa ge dī tama hâ-i. Xawen ge ǁîn tsîna ǀnai ǁnā ǃkhoeǀhûgusa ge dan hâ-i. Nē ǂgomǂgomsa ǃgâsan ge tôasin ge xawe ǀasa ǃkhoe-aona noxopa gere ǂkhâǃnâ aiǁgaus hînan ge ǃgoros ǃnâ-ū. ǃKhoeǀhûgura ǃkhoe-i ge amase ǃgâise nî tsâ ǀnai ge dan hâ i khoen xa i ga kōhe o. Nēs ge nî ǁgaribi îb ûb hâ ǀgaib hoab ǀkha ǃkhoeǂuisen. ǂGurokam ǁaeb di ǀhûǀguitimî-aon ge ge ǁgau nē gagasi ǃkhoeǀhûgus kai ǀgaibas ga ū xawe a danhe ǁkhā ǃkhaisa. ǁNā amagan ge ǂgurokam ǁaeb di Hebreǁî Xristeǁîna ‘ǀûs ose mâibahen hâ ǃkhams’ ǃnâ ǁkhoaǂgaose ga aiǃgû hâ, ‘kai ǀhûǀguitimî-aon di ǀnanus’ aiǁgausa ra saose. Sida ge nētsē ǁkhā aiǁgausa ra sao.
(Hebreǁîn 13:9) ǃKharaga tsî ǃhao ǁkhāǁkhā-aidi xa tā doeǁgarimakaisen; ǃgâi ǃkhais komo, ǂgaob nî ǀkhomma xu ǀgai ǃkhaisa, tsî ǂûna xu tama, ǁîna xun ge ǁîna ra sîsenūna harebe-i xare-e ūhâ tama hâ.
w89-E 12/15 22 ¶10
Jehovaba ra ǂkhîǂkhî ǁguibade mâ
10 Hebreǁîn ge ǁnā amaga Jodeǁî Xristeǁîn hîna ge ǀhaohâb ǃnâb Moseb ǂhanuba nî saohesa gere ǂhawan di ‘ǃkharaga tsî ǃhao ǁkhāǁkhā-aide’ xu tā ga doeǁgarimakaisen hâ. (Galateǁîn 5:1-6) Nē ǁkhāǁkhā-aidi ge amab ǃnâ māǀgais ǀkha ga huini tama hâ xawe ǁîn ǂgaob ge “[Elob] ǀkhomma xu ǀgai” tsî ga ǃkhōǀgaipe nî hâ. ǀNî khoen ge ǂûn tsî ǁguibadi hîna nî mâhedi xa gere ǂkhaba. Xaweb ge Pauluba ge mî ǁîn ǂgaob ǀgaib ǂûn ra xuna xu ǀgī tama hâsa, ǂû-i ‘ǁîna ra sîsenūna harebe’ tama hâ amaga. Gagasise kais ge eloǃaoǃgâxasib tsî xoremariba ǃgôaǃnâsiba ūhâbasa xu ge hâ-i tsî ǂû-e ǁkhā xūn tsî ǀō-aisa tsēde tsēdīs ǃnâ-us ose. (Romeǁîn 14:5-9) ǁNāsxoǀkhab ge Xristub ûib ǁguibasa, Moseb ǂhanub ǃnaga gere dīhe ǁguibade ge ǀgaio kai.—Hebreǁîn 9:9-14; 10:5-10.
Elobmîs khomai ǃâs
(Hebreǁîn 12:1-17) ǁNā-amaga ǁkhāti sada, nētikō kai ǀhûǀguitimî-aon di ǀnanu-e da sada ǂnamipe ūhâ amaga, a da ǃgommi hoab tsî hugaǀgui ra ǂae-ai da ǁoreba ǁguiǁnâ, î da ǀûs ose sada mâibahe hâ ǃkhams ǃnâ ǃgû; 2 î da Jesub, ǂgoms di ǂgaeǂgui-aob tsî dītoa-aob ai kō; ǁîb ǁgui-aiǃâbaheb ge hâ i ǃgâiaǂgaob di amǃnâs ǃnâ ǃgâuhaiba ge tsâb, taosiba ǃgôa tama i, tsî Elob trons di amǀkhāb ǁôab ai ǂnôaba. 3 ǂÂiǂâisen ǁnāb, ǁore-aon xa nēti ī ǃhoaǃoasa ǁîb ǃoagu gere tanib xa, î du tā sadu ǀomdi ǃnâ tsō tsî tsanaǁkhui. 4 Ganupe du ge ǁoreba ǃkhamǃoas ǃnâ ǀaob kōse ǃkham tama hâ. 5 Tsî du ge ǀuru hâ ǁnā ǁnamas, sado ǃoa ǀgôadu ase ra ǃhoasa: Ti ôatse, ǃKhūb di ǁkharaba tā ǂkharise ǃgôa, î tā ǂkhabuǂâi, ǁîb xats ga ǁkharaheo; 6 ǃKhūb ǀnam hâ-i, ǁî-eb ra ǁkhara xuige; tsîb ra mâ ǀgôab hoab, ǃkhōǃoab raba ǁkhara. 7 ǁKharaba du ga tanio, ob ge Eloba ǀgôadu ase ra sîsenū du; mâ ǀgôaba kha hâ, ǁgûb ǁkhara tamaba? 8 Tsî ǁkharab ose du ga hâo, hoan ge amǃnâxaba, o du ge a ǀaib ǀgôa tsî ǂhau ǀgôa tama. 9 Tsî da ga sorosi îga ǁkhara-aose ūhâ tsî ǁîga ǃao-o, matikō ǃnāǂamsase da nî gagagu di Îb, ǁîba da ra ûibaba ǃnaga hâba? 10 Naugu ge ǀnî tsērode ǃgâiba gu ge i khami gere ǁkhara da; xawe nēb ge harebes ǃoa ra ǁkhara da, ǁîb di ǃanusiba da nî amǃnâxaga. 11 Tsî ǁkharab hoab, hâb rao, ǃgâiaǂgaose ība da tama i tsî ǃoase ra ība da; xawe ǁnās khaoǃgâb ge ǁîb ǃnâ ǁkhāpesen hâna ǂhanu-aisib di ǂkhîxa ǂû-e ra ūǀkhība. 12 ǁNā-amaga ǁgarasa ǃomga ūkhâi î ǂkhabusa ǁgoade ǁkhawa ǀgaiǀgai; 13 î sadu ǂaide ǂhanu ǂgaroga dība, î-i ǃhora-e tā ǃoe, î-i ǂgau. 14 Hoan ǀkha du nî ǂkhîse hâsa sauruǃgon tsî ǃanuǃanusens, ǁîs ose i khoe-i xare-e ǃKhūba mû tidesa; 15 î ǃgaoǃgâ, î-i tā khoe-e Elob ǀkhomma xu khaoǃgâ hâ, î-i tā ǀnîsi au-ausens di ǃnoma-e ǀomkhâi, î-i tā gongonǃnâ-e dī, în tā ǁî-e xu ǀnîsi ǂguina ǀuriǀurihe. 16 Î i tā ǀgui-e ǀai-ao tamas ka io xorexūsa Esaub khami, ǀgui ǂû-ai-i ama ǁîb di ǂguroǃnaesisa ge ǁamaxūba; 17 ǂan du a xuige, ǁnās khaoǃgâb ge ǁkhāti aoxūhe ǃkhaisa, ǀkhaebab ge ǀumi ǂgao-o; ǃhausensoa-eb ge hō tama i xui-ao, ǁgamron ǀkhab ge ǁî-e ôa xawe.
SEPTEMBERI 30–OKTOBERI 6
ELOBMÎSA XU HÂ ǂÛǂÛSA MÎDI | JAKOBUB 1-2
“ǁOreb tsî ǁōba ǃoa gau daob”
(Jakobub 1:14) Xawe mâ-i hoa-i ge ra ǃâitsâhe, ǁî-i di turab ǂûb xa i ra ǂgaeǁnâhe tsî nanaheo.
g17.4-E 14
ǃÂitsâb
ǃÂitsâb ge xū-i hîna ra ǂgaeda-e—ǃgōsase ǃgâi tama xū-e. Aiǁgause, stors tawats ge kaise īsa xū-e go mû. Os ge ǃaris ǂâisa go hāǂgam tsî, ǃkhōǃnâhets tide tits ra ǂâi xūi-ao. Xawes ge sa ǃgâi ǂâisa, tādī ti ra mî. Ots ge ǁgai ǂâisa ūbē tsî ra ǃgûbē. Nēs ǀkhas ge ǃâitsâba go dan, sao-ai tamats go i amaga.
ELOBMÎS RA MÎS
ǃÂitsâbats ra hōǃgâ ǃkhais ge ǁgai khoets a ti ǂâibasen tama hâ. Elobmîs ge hoa khoen ra ǃâitsâba hōǃgâ ti ra mî. (1 Korinteǁîn 10:13) ǃÂitsâhets ga ra ots ra tanisen ǀgaub ǀguib ge ra ǃgôa. ǁNî khoen ge ǁgai ǂâis hîna go hāsa ūbē tama i tsî ēga ǂâi i goro ǁgai xūna ra dī. Xawen ge ǀnîna kaise ǃhaese ǁnā ǁgai ǂâisa ra ūbē.
“Mâ-i hoa-i ge ra ǃâitsâhe, ǁî-i di turab ǂûb xa i ra ǂgaeǁnâhe tsî nanaheo”—Jakobub 1:14.
(Jakobub 1:15) ǁNās khaoǃgâ, turab ga ǃkhōǃoao, ob ra ǁoreba ǁora; tsî ǁoreb ga dītoaheo, ob ra ǁōba ǁora.
g17.4-E 14
ǃÂitsâb
Elobmîs ge ǁgai dīn ǃoa gau daoba ǃamkuse ra ǁguiǃâ. Jakobub 1:15 ge ra mî: “[ǃGai tama] turab ga ǃkhōǃoao, ob ra ǁoreba ǁora.” ǁGai turagu xa da ga ǂâi ǀkhara o, o i ge sida ǃnâ ra om khâisen. Tsî ēga ǀkhamǀkha khoes ǀgôaro-e ǃnae-i nî ǁaeb ai a ǃkho-oa ǁoa khami, sida tsîna ǁnā tsû xū-e dī sa xū ǃkho-oasen hō tide. Xawe ga-ai da ga o, o da ge ǁgai ǂâidi xa ǃgāǃkhōhe tide. ǁÎde da ge a dan ǁkhā.
Gagasi xūna ǀō-aisase ôaǃnâs
(Jakobub 1:17) Mâ ǃgâi hō-i tsî mâ dīǀoaǀoasa hō-i hoa-i ge ǀgapiseba xu ra ǁgôaxa, ǃnâgu di ǁGûba xu, ǁîb ǃnâ ǀkharasi-i xare-i tsî dawaǃkhupusens di som-i xare-i hâ tamaba.
it-2-E 253-254
ǃNâb
Jehovab ge “ǃnâgu di ǁGûba.” (Jak. 1:17) ǁÎb ge “soresa ǃnâse tsēsa ra māb, ǁkhâb tsî ǀgamirodi tsîna tsuxub di ǃnâse” (Jer. 31:35) ǀgui māda tama. Xaweb ge ǁÎba gagasiseb ra om khâida se ǃnâba ra māda. (2Kor. 4:6) Jehovab ǂhanub, ǂhanu ai mîǁguidi tsî ǁîb mîs ge ǁnân hîna ra ǃgâna ǃnâb as ība. (Psa. 43:3; 119:105; ǂKhm. 6:23; Jes. 51:4) Davib ge ge mî: “Sa ǃnâb ǃnâ da ge ǃnâba ra mû.” (Psa. 36:9; ǀgopeǀnō re Psa. 27:1; 43:3.) Sores di ǃnâb ǁgoa ǁaeb ai ǂause ra “ǀgai tsēs ra ǀoas kōse,” khamib ge ǂhanu-ain gau ai daoba Elob ga-aisiban ra ūǃoase, ob ra ǃnâ o, ra ǃnâ. (ǂKhm. 4:18) Jehovab mî hâ khami da ga ûi o da ǁÎb ǃnâb ǃnâ ra ǃgû. (Jes. 2:3-5) Xawe i ga khoe-i ǁgai ǂâis ǀkha Jehovab xūn hoana a ūǃoa tamas ka io ǁgai ǀkhāba ǃgoa ǀgui a ǂâi, o ige ǁî-e ǃgam gagasi ǃkhaenab ǃnâ mâ. Jesub ge mî khami: “ǃNâb sats ǃnâ hâb ga ǃkhaeo, matikōseb ǃkhaenab ǂûba nî kai.”—Mat. 6:23; ǀgopeǀnō re Deu. 15:9; 28:54-57; ǂKhm. 28:22; 2Pet. 2:14.
(Jakobub 2:8) Gao-aosi ǂhanuba du ga dīǀoaǀoao, xoas ǃoa: “Sa ǀgūkhoebats ge sats ǁkhāts khami nî ǀnam,” o du ge ǃgâise ra dī.
it-2-E 222 ¶4
ǂHanub
“Gaosi ǂhanub.” Nē ǂhanub ge ‘gao-aosi ǂhanub’ di ra ǂgaihe, ǁîb gao-aob nau khoen xa a ǀgapi khami, nau hâ ǂhanugu hîna khoen ǃoa-ai da ni tanisen ǀgauba ra ǁkhāǁkhāda gu xa a ǀgapi amaga. (Jak. 2:8) ǂHanub ǃgaeǀhaos tamas ka io Moseb ǂhanub ge ǀnammi ai ge ǃgaoǃgaosa i. Gao-aosi ǂhanub ge “sa ǀgūkhoebats ge nî ǀnam sats ǁkhāts khami” ti ra mî. Nēs ge ǀgamǁî mîmās hînab Moseb ǂhanub ǃnâ hâ xūn tsî kēbo-aogu di mîdi tsîna a ǃgaoǃgao-aisaba. (Mat. 22:37-40) Xristeǁîn nētsē ǂhanub ǃgaeǀhaos ǃnaga hâ tama, xawen ge Gao-aob Jehovab, tsî ǁÎb ǀGôab, Gaob Jesub Xristub di ǂhanub ǃnaga hâ, ǀasa ǃgaeǀhaos ǃnâ-ū.
Elobmîs khomai ǃâs
(Jakobub 2:10-26) Khoe-i ga ǂhanub hoaba ǃkhōǀgaipe, tsî i ga ǀgui xū-i ǃnâ dīsā, o i ge hoan tawa a ǀhapixa. 11 “ǃGamebats ge khôa tide,” ti ge mîb ge ǁkhāti: “ǃGamts ge tide!” ti ge mî. O ǃgamekhôa tamats ga i xawets ga ǃgamo, ots go ǂhanub di ǃûǂamao kai. 12 Nēti ǃhoa, î nēti dī ǂhanub ǃnorasasis dib ǀkha nîra ǂhanuǂhanuhedu ase; 13 ǀkhomoǃnâ ǀgoraǃgâ-i ge ǀkhomxaǂgaosi-e dī tama-i ǂama nîra hā xuige; tsî ǀkhomxaǂgaosib ge ǀgoraǃgâs ǃoa-ai ra koasen. 14 Tare-e nî harebe, ti ǃgâsado, khoe-i ga: ǂGomsa ta ūhâ ti mî, tsî i ga sîsenga ūhâ tama io? ǂGomsa kha ǁî-e ǃgâiǃō kai ǁkhā? 15 O ǃgâsab ga, ǃgâsas ga ǀōǀkhā hâo, tsîn ga tsēkorobe ǂû-e tôasio, 16 tsî khoe-i sadu di-i ga ǁîna ǃoa: ǂKhîb ǃnâ ǃgû, sâ î du ǁâ ti mî tsî i ga ǁîna soros di ǂhana mā tama io, tare-e kha nî harebe? 17 ǁNās ǁkhās xases ge ǁkhāti ǂgomsa ǁîs ǂûs ǃnâ ǁō hâ, sîsengas ga ūhâ tama io. 18 Xawe khoe-i ga mî: Sats ge ǂgomsa ūhâ, o ta ge tita sîsenga ūhâ; sa ǂgomsa sîsengu âtsa xu ǁgau te, o ta ge tita tsîna ti sîsenga xu ti ǂgomsa nî ǁgau tsi. 19 Sats ge ra ǂgom, ǀgui Elob a ǃkhaisa. ǃGâisets ra dī. ǁGâuagu on kom ra ǂgom tsî ǀkhūo. 20 Tsî ǂan ǂgaots ra, gâre khoetse, ǂgoms sîsengu ose ǁō hâsa? 21 Abob Abrahammi, sîsenga xu ǂhanu-ai kaihe tamab hâ, ǁîb di ôab Isakab ge altars ai ǁguiba ǃnubai? 22 Ots kom ra mûo, ǂgoms ge sîsengu âb ǀkha sîsenǀhao ǃkhaisa, tsî ǂgoms ge sîsenga xu ǀoa ǃkhaisa. 23 Os ge xoasa ge ǀoa, nēti ra mîsa: “Tsî Abrahammi ge Eloba ge ǂgom, ob ge ǁîsa ǂhanu-aisise ge ǃgôabahe,” tsîb ge Elob khoese gere ǂgaihe. 24 O du kom ra mûo, khoe-i sîsenga xu ra ǂhanu-ai kaihesa, tsî ǂgoms ǀguisa xu tama. 25 Tsî ǁnās ǁkhās khami ǀai-aos Raxasa, sîsenga xus kha ǂhanu-ai kaihe tama hâ, sîsabega ǃkhōǃoa tsîs ge ǁîga ǀkhara daoba-ū ǂoa kai ǃnubai? 26 Soros gagas ose ǁō hâs ǁkhās khamis ge ǁkhāti ǂgomsa sîsengu ose ǁō hâ.