ǁNaeǁgaudi Sida Xristeǁî ûib tsî aoǁnâ sîsenni sîsen ǂkhanib
AUGUSTUB 5-11
ELOBMÎSA XU HÂ ǂÛǂÛSA MÎDI | 2 TIMOTEUB 1-4
“Elob ge ǃaob di gagasa mā da tama”
(2 Timoteub 1:7) Elob ge ǃaob di gagasa mā da tama i, tsî ǀgaib tsî ǀnammi tsî ǂuru ǂâis disa mā da xui-ao.
w09-E 5/15 15 ¶9
ǂKhamkhoedo—Aiǃgû dura ǃkhaisa ǃgāsa kai re
9 Timoteubab nî hōhōǃnâ gab ge Pauluba “Elob ge ǃaob di gagasa mā da tama i, tsî ǀgaib tsî ǀnammi tsî ǂuru ǂâis disa mā da xui-ao” ti ge mî. (2Tim. 1:7) ‘ǂUru ǂâisa’ ūhâs ge ǃamkuse xū-e ǂâiǂûisa ǃkhōǂgā hâ. Nēs ge ra ǂâibasen xūna da īn ase nî ūǃoasa, tsî sida ra ǂhabases ose. ǀNî ǂkhamkhoen hîna ǂâiǀgaub ǃnâ kai taman ge ǃgom mâsiga xū ra ǃkhoebē tsî TVs, ǀhuwuǀhuwusen xūn, alkohol-i, ǂnāǃgûs tsî ǀaib ai ra ǂgāmâisen. “Eloxoresasib tsî ǃhūbaib di turagu tsîna ǀūxū, tsî da nî tanisen tsî ǂhanu-aise tsî eloǃaoǃgâxase nē ǃhūbaib ai ûi” ǃkhaisan ge Xristeǁîna ge ǂhâǃnâhe.—Titub 2:12.
(2 Timoteub 1:8) ǁNā-amaga ǃKhūb di ǀhûǀguitimîs tsî tita ǁîb di ǃkhōsata xa tā tao; î ǃgâiǂhôas ǀkha ǁgâiǀāna tani Elob ǀgaib ǃoa.
w03-E 3/1 9 ¶7
‘ǀGaisa îts ǃgâiǂâixa re!’
7 Paulub ge Timoteuba ge mîba: ‘Elob ge ǃaob di gagasa mā da tama xawe ǀgaib disa . . . ǁNā-amaga ǃKhūb di ǀhûǀguitimîs xa tā tao.’ (2 Timoteub 1:7, 8; Markub 8:38) Nē xoade da ga khomai o da ge nî dîsen: ‘ti ǂgomsa ta ra tao tamas ka io ǁkhoaǂgao i ta a? Ti sîsen ǃkhaib tsî skoli ai hâ khoena ǂân-e Jehovab ǀHûǀguitimî-ao ta asa, tamas kai o ta nē-e ǁîna xū ra sâu? Khoena xū māǂoasa ta ra tao tamas kai o ta Jehovab ǀkha ta ūhâ ǀhōsagusisa ǂnīsase khoena ra ǁgau?’ Khoe-i ga ǃgâiǂhôas xa aoǁnās tamas ka io ǃhūbaib khoena xu māǂoasa gara tao o, o a-i Jehovab ge Josuaba a mā ǁnamas “ǀgaisa îts ǃgâiǂâixa” dī hâs xa ǂâi. Tā ǀuru re, Jehovab tsî Jesub di mûǁae ǃgâi ǀonsa ūhâs ge ǂhâǂhâsa, khoen mûǁae ǃgâise mûsens xa.—Galateǁîn 1:10.
Gagasi xūna ǀō-aisase ôaǃnâs
(2 Timoteub 2:3, 4) Satsa ǁnâi Xristub Jesub di ǃgâi ǃkhamaose ǁgâiǀāna tani. 4 Torob ǃnâ ra ǃoaba-i xare-i ge ûib di ǂhansendi ǀkha ǁae tama hâ, toroǃoabas ǃoa ǁî-e ge ǃgaeba-i nî ǃgâiǃgâibase.
w17.07-E 10 ¶13
Ama ǃkhūsisa ôas
13 Timoteub ge ǀgaisa ǂgomsa ge ūhâ-i. “Xristub Jesub di ǃgâi ǃkhamaob” di Timoteuba ǂgai toa tsîb ge Pauluba ge mî “torob ǃnâ ra ǃoaba-i xare-i ge ûib di ǂhansendi ǀkha ǁae tama hâ, toroǃoabas ǃoa ǁî-e ge ǃgaeba-i nî ǃgâiǃgâibase.” (2Tim. 2:3, 4) Nētsēn ge Xristeǁîna ǁkhān as kose ra dītsâ în nē ǁnamasa ǁîn ûigu ǃnâ ûiǂûi. “ǀKhupi kab ge a ǁîb tawab ra ǀkhupib di ǃgā” di hâ tsoatsaosa ǂâis ra ūhasen ge ǁîna ǃhūbaib xūna ra mâǃoa tsî ǃkhūsib ai ǂgâmaisen tama. (ǂKhm. 22:7) Satanni ge kaise a ǃgâibahe sida ga sida ǁaeb tsî ǀgaib tsîna sîsen-ū o ǃkhūsisa ôas ǃnâ. Sida ra mîǁgui xūn ge kai surudeb ǃnâ a ǂgā da ǁkha. Oms, skolgu, audos tamas ka io kai ǃgamegu di surudegu ge kai marisi ǁgâib ǃnâ a ǂgā da ǁkha. Sida ûiba ǀguiǀgui tsîda ga surudena a ǀoroǀoro o, o da ge kaise ǃgâi xū-e ra dī. ǁNās ǀkha da ge Jehova Eloba ǃnorasase a ǃoaba ǁkha ǃkhūsiba da nî saurus xa.—1 Tim. 6:10.
(2 Timoteub 2:23) Î gâre tsî ǁkhoaoǃnâ ǂnoagu-aide aoxū; ǃkhams ǀguisa di ra ūǀkhī ǃkhaisats a ǂan xuige.
w14-E 7/15 14 ¶10
Jehovab khoen mati “ǂhanuoǃnâsiba” xu ra ūbēsen ǀgaub
10 Nētsē da ge hînaǃnâsiba ǀhaohâb ǃnâ kai-amse hōǃâ tama hâ. Xawe da ge Elobmîs ai ǃgaoǃgaosa tama ǁkhāǁkhādi tsî ǂgomsa xū ǁnāǁgôa hâ khoena xū nî ǂgōsen. ǁÎn ǀkha da ge ta nî ǂkhawa tsî internets ain ûhâ ǂhawegu ai xūna nî xoa. ǁÎna huis ǂâis ǀkha da ga nēsa a dī, xawe i ge Elobmîsa xū hâ ǂgōǀaus ǀkha ǃgûǀhao tide. ǁNā amaga da ge Jehovab khoen ase hînaxa tamas ka io ǁnāǁgôahâ khoena xū nî ǂgōsen.
Elobmîs khomai ǃâs
(2 Timoteub 1:1-18) Pauluta, Jesub Xristub di apostelta, Elob di ǂâisa xu, Xristub Jesub ǃnâ hâ ûib di mîmâis ǃoa. 2 Timoteub ti ǀnamǀnamsa ǀgôab ǃoa: ǀKhommi tsî ǀkhomxaǂgaosib tsî ǂkhîb tsîna, Elob ǁGûb tsî sada ǃKhūb, Xristub Jesuba xu. 3 Eloba ta ra gan-gan, ti ǁnaosana xu ta ǃanu ǂâis ǃnâ ra ǃoababa, tsuxub tsî tsēs tsîna ta ti ǀgoredi ǃnâ sats xa ra ǂâiǂâisen ǃkhaisa 4 tsî ta kaise ra ǁkhore, satsa ta nî mûsa, sa ǁgamron xa ta ra ǂâio, ǃgâiaǂgaob ǀkha ta nî ǀoase; 5 tsî ǂâiǂâisen ta rao ǃūmû ǂgoms, sats ǃnâ hâs, sa ǁnaos Lois tsî sa îs Eunikes tsîra ǃnâ aibe ge ǁan hâ isa; tsî ta ǂanǁapo hâ, sats ǃnâs ǁkhāti ǁan hâ ǃkhaisa. 6 ǁNā-amaga ta ra ǂâiǂâiǃnâ tsi, ti ǃomkha ǁgui-aisa xu sats ǃnâ hâ Elob hōsats nî ǂkhaiǂkhaisa. 7 Elob ge ǃaob di gagasa mā da tama i, tsî ǀgaib tsî ǀnammi tsî ǂuru ǂâis disa mā da xui-ao. 8 ǁNā-amaga ǃKhūb di ǀhûǀguitimîs tsî tita ǁîb di ǃkhōsata xa tā tao; î ǃgâiǂhôas ǀkha ǁgâiǀāna tani Elob ǀgaib ǃoa; 9 ǁîb sada ǃgâiǃō kai tsî ǃanu ǂgai-i ǀkha ge ǂgaib, sada sîsengu ǃoa tama i, tsî ǁîb di ǂâibasens tsî ǀkhommi ǃoa, ǃhūbaib di ǁaeb aiǃâ Xristub Jesub ǃnâ sada ge māheb, 10 tsî nēsi ǂhaiǂhaihe hâba sada ǃGâiǃōdī-aob Xristub Jesub di ǂhaiǂhaisens ǀkha, ǁōba ge ǁaudīb, tsî ûib tsî kāǁoasib tsîkha ge ǃnâb ǃoa ūhāba ǃgâiǂhôasa xu; 11 ǁîs ǃaroma ta mâihe hâ aoǁnâ-aose tsî apostelse tsî ǀūben di ǁkhāǁkhā-aose. 12 ǁÎ ǃkhais ǃaroma ta ǁkhāti nēna ra tsâ, xawe ta taotaohe tama; ǂan ta a amaga, tari-i ǃnâ ta ge ǂgom ǃkhaisa, tsî ta ra ǂanǁapo, ǁîb tawa ta ǁguibēbahe hâ ǁauǁauxūbab nî ǁnā tsēs kōse sâuba tesab a ǁkhā ǃkhaisa. 13 Aiǁgaus ǂuru mîdi, tita xuts ge ǁnâudi dis tawa ǃkhōǀgaipe ǂgoms tsî ǀnammi tsîra, Xristub Jesub ǃnâ hâra ǃoa. 14 Nē ǃgâi ǁguibēbahets hâ ǁauǁauxūba sâubasen re, ǃAnu Gagab sada ǃnâ ǁan hâba xu. 15 Hoagu Asiab ǃnâ hâgu, ǁîgu ǃnâ kha Figelub tsî Hermogeneb tsîkha hâgu ge ǁnāxū te ǃkhaisats a ǂan. 16 Ab ǃKhūba Onesiforub di omma ǀkhomxaǂgaosiba mâ; ǃnuriseb ge tita khoakhoa, tsî ti ǃgaeǃnons xab tao tama ge i xui-ao; 17 tsî Romes tawab ge sī ǃnubaib ge tita ôasase ôa, tsî ge hō te. 18 Ab ǃKhūba mā bi, îb ǁnā tsēs ai ǃKhūb tawa ǀkhomxaǂgaosiba hō! Tsî matikōseb tita Efesus tawa gere ǃoaba ǃkhaisats kaise a ǂan.
AUGUSTUB 12-18
ELOBMISA XU HÂ ǂÛǂÛSA MÎDI |TITUB 1–FILEMONNI
“ǂNomdomga [ǀHaohâb ǃûi-aoga] ǂnûiǂgā”
(Titub 1:5-9) ǁÎ ǃkhais ǃaroma ta ge Kretas tawa ǃgoro kai tsi, gorose tôasi hâna aiǃâb ǃoa dī-unu, tsîts nî mâ ǃās hoas ǃnâ ǂnomdomga ǂnûiǂgāsa, mîmā tsi ta ge khami, 6 Khoeb ga ūose īo, tsîb ga ǀgui taras di ao-o, tsîb ga ǂgomsa ǀgôana ūhâo, supuǂâixa ûib xa ǀanaǃgâhe ǁoan tsî ǁnâuǀnamoǃnâ tamana. 7 Mûǂamaob ge nî ūose ī Elob ommi di ǂhûiǂui-aose, îb tā ǁîǂâibe, îb tā ǁaixa, îb tā ā-ao, îb tā ǃkhamao, îb tā taotaosa hōbasen-e ôabasen; 8 îb ǃhaokhoena sâu ǂgao, îb ǃgâina ǀnam, îb ǃûisen, îb ǂhanu-ai, îb ǃanu, îb îǂhôa; 9 îb ǁkhāǁkhās ǃoa hâ ǂgomǂgomsa mîs ai ǃkhōǀgaipe, ǁkhāb nîga, ǂuru ǁkhāǁkhās ǀkha ǁnamasa tsî ǃhoaǃoa rana mîdansa.
w14-E 11/15 28-29
Khomai-aon dîdi
Elobmîs ge ge mîǃā tama hâ i matigu ge ǀhaohâb ǃûi-aoga gere ǂnûiǂgāhe ǀgausa, xawe da ge ǁgauǁgaude ra mû ǁnās ge mati gere dīhe ǀgaus xa. Mû da ras ǃoa i ge Paulub tsî Barnaba hakha ǁîkha di sîsen-e xū ge oaǀkhī “tsî kha ge mâ ǀhaohâb hoab ǃnâ ǃomǁgui-ais ǀkha ǂnomdomga ge ǂnûiǂgā, tsî ǀgore tsî ǂûtamahâ, tsî ǁîna ǃKhūba ge māǁnâ, ǁîb ǃnân ge ǂgomma.” (ǃNaeǃkhaidi 14:23) Kurina ǃkhāru tsîb ge Pauluba ǁîb ǀkha gere ǃnârima khoeb, Tituba ge mîba: “ǁî ǃkhais ǃaroma ta ge Kretas tawa ǃgoro kai tsi, gorose tôasi hâna aiǃâb ǃoa dī-unu, tsîts nî mâ ǃās hoas ǃnâ ǂnomdomga ǂnûiǂgāsa, mîmā tsi ta ge khami.” (Titub 1:5) Timoteub hîna ge ǁîb tsîna Paulub ǀkhā ǃnāsase gere sîsenni tsîn ge ǁnāti-i ǁgaumâisa ge mâhe. (1Tim. 5:22) Nēs ra ǂâibasens ge, !narimâra mûǂamaogu ǀguigu ge nē ǁgaumâide ge dīǁkha i, apostelgu tsî ǁîgu ǀkha ge Jerusalems ǃna ǀguiba gere sîsen ǀkhao ǃgâsagu ose.
Nē Elobmîs aiǁgausa ǂâis ǃna ūhâses ge ǂGaeǂguira soros Jehovab di ǀHûǀguitimî-aon disa ǀhaohâb ǃûi-aogu tsî ǀhaohâb hui-aogu tsîn da ǁgaumaihe ǀgauba ge dawa. ǂGuro Septemberi 2014ǁî kurib diba xu i ge saora ǀkharaǀkharana ge dīhe: mā !narimâra mûǂamaob hoab ge ǁgaumâihe nî ǃgâsab ǃgao ra mîhe xūna ǃamkuse nî kōǃgā. ǀHaohâbab ra sari ǁaeb ǃnâb ge ǁîba ǁgaumaihe nî ǃgâsaga ǃnasase nî ǂān ǁîgu ǀkhāb aoǁnā sîsenni ǃnâ ra ǁhaose tsîb ge ǁnās khaoǃgâ ǀhaohâb ǃûi-aogu ǀkha ǁgam tsî mîǁguiba nî dī. Nē ǀgaub ain ge xūna aipekam Xristeǁîn ǁaeb ǃnâ-i gere dīhe khami ra dīhe.
Hām-e nê ǃkharagaǃnâgu ǃkharode ra mû-ǂam? ǀNāis khamib ge ‘ǂgomǂgomsa tsî gā-ai ǃgāba’ ǃereamsa ūhâ Jehovab khoena gagasise ǂûmāsa. (Mat. 24:45-47) Nēs ǀkha gu ge xoade ǃanu gagab xa ra dauǁgauhese ra ôaǃnâ, igu Elobmîs tsoatsoadi mati ûib ǃnâ nî ûiǂûihesa ǂan tsî ǀhaohâb ǃnâ sîsen-ū. ǂGomǂgomsa tsî gā-ai ǃgāb ge hoa !narimâra mûǂamaogu tsî ǁNâub ǀapeǀhaos di ǁānigu tsîna ra ǁgaumai. ǁNâub beros ge ǂhâǃnâsa ǀhaohâga ra ma igu ǁnā ǁgaumaide ǃgâi ǀgaub ǃnâ sîsenǂam. Mā ǀhaohâb ǃûi-aogu ǃnans hoas ge ǂhâǂhâsa ǁgui-aisa ūhâ îs ôaǃnâde dī ǁgaumaihe ǂgao ra ǃgâsagu ǂgaoǀkhade ra sīǃnâ ǃkhaisa. Mā !narimâra mûǂamaob hoab ge ǂhâǂhâsa ǁgui-aisa ūhâ îb ǀgorehâse ǃgâsaga ǂnûiǂga.
Gagasi xūna ǀō-aisase ôaǃnâs
(Titub 1:12) ǀGuib ân, ǁîn di kēbo-ao ge īb gere mî: Kretaǁîn ge hugaǀgui a ǂhumi-ao tsî ǁaixa ǀguru tsî ǀopesa ǃnā.
w89-E 5/15 31 ¶5
Khomai-aon dîdi
ǁÎb ge Kretaǁîn xa gere mîhe ǁgai xuna ge ǃkhō-am tama hâ-i. ǁNāsa da ge a ǂgom ǁkha Paulub ge ǂān-i amaga, Kretas ǃnā hâ ǃgâsan Jehovab ǃkhoǃgâsa ūhâ tsî ǁîb gagab ǀkha ǂhauhe hâ sa. (ǃNaeǃkhaidi 2:5, 11, 33) ǂGui ǂgomǂgomsa Xristeǁîn ge ǁnā ǃās ǃnā ge hâ-i ǀhāohâga “mâ ǃās hoas ǃnâ” a kuru ǁkhāse. ǂGomǃgâ ǁkhā da ge a, nē ǃgâsan ge ǂkhabusasinan ge ūhâ-i xawe ǀōpesa ǂhūmi-ao tama hâ-isa. ǁNā ǀgausin ge Jehovab ǃkhoǃgâsa ga ūhâ tama hâ. (Filipeǁîn 3:18, 19; ǂHaiǂhais 21:8) Nētsēs khoen khami-i ge Kretas ǃnâ khoen hîna ǃgâi ǂgaoga ge ûhâ-ina kaise tsūse gere tsâ, khoen ge ǃgâi tama xūna gere dī-o tsî ǁnās ǀkha ǃgâi ǂhôasa gere ǃgâ.—Esegieli 9:4; ǀgopeǀnō re ǃNaeǃkhaidi 13:48.
(Filemonni 15, 16) ǀNîsib ge ǂkhari ǁaeroba ǀgoraxū tsi hâ i, ǀamosets nî ǁkhawa ūhâ biga, 16 ǃaruǀî ǃgāse tama, xawe ǃgāb xa ǃnāsase, ǀnam ǃgâsab ase; ǀō-aib ge tita ībase, matikō ǃnāǂamseb nî satsa ǁnāti ība ǁgans ǃnâ tsî ǃKhūb ǃnâ.
w08-E 10/15 31 ¶4
Titub, Filemonni tsî Hebreǁîn ǂkhanide xu ra mâǂoa xūn
15, 16—Pauluba tae-i ǃaroma Filemonna ge mîba tama hâ î, îb Onesimuba ǃnora kai? Paulub ge ge ǂkhani kaisen ǂgao tama hâ î ǁîb ǁgaumais ‘Elob di gaosiba aoǁnâs, tsî ǃKhūb Jesub Xristub xa ǁkhāǁkhās’ tsîna xū. ǁNā amagab ge ǀhûhâsib xūn ǀkha ge ǁāxa ǂgao tama hâ î.—ǃNaeǃkhaidi 28:31.
Elobmîs khomai ǃâs
(Titub 3:1-15) ǁÎna ǂâiǂâiǃnâ re, în ǂamkhoegu tsî ǀgaisagu tsîga ǃnaga hâba, în ǁnâuǀnam, în mâ ǃgâi sîsenni hoab ǃoa ǂhomisen hâ, 2 în tā khoe-e ǃkhāǃkhā, în tā ǂkhabaxa, în khoexaǃnâ, în tsamtsiǃnâsib hoaba ǁgau khoen hoan ǃoa. 3 Sada on kom aibe gâre tsî ǁnâuoǃnâ tsî ǁhapu rase ī ge io, ǂguiǃnâgu tura-aigu tsî ǃgâiǃgâisen-aiga ra ǃoabaǃâ, ǁaixasib tsî surib ǃnâ ra ûise, ǃhuigu hâse, tsî nē-i nau-e ra ǁkhanse. 4 Xawe ǀkhomxaǂgaosib tsî khoeǀnamxasib Elob sada ǃGâiǃōdī-aob dib ge ǂhaio, 5 ob ge ge ǃgâiǃō kai da, sada ga dī hâ sîsengu ǂhanu-aisib diga xu tama i, tsî ǁîb di ǀkhomxaǂgaosiba xu, khōǁgams ǁkhawaǃnaes dis tsî ǀasa kaisis ǃAnu Gagab dis ǀkha, 6 ǁîb ge sada ǂama ǃnāǂamsase ǁhōǂuiba Jesub Xristub sada ǃGâiǃōdī-aoba xu; 7 îb di ǀkhomma xu da nî ǂhanuǂhanuhe hâǃâ ǀumi-ao kaiga ǀamo ûib ǃâubasensa ǃoa. 8 Nēs ge amase a ama mî; o ta nēsa ǂgao hâ, nēnats nî ǀgaisase ǁkhāǁkhāsa, în Elob ǃnâ ra ǂgomna ǂhansen, ǃgâi sîsengan nî aimâbasa. Nēn ge khoena ǃgâi tsî harebeba hâna. 9 Xawe ǂkhā re ǂnoagu-aidi tsî suriǂnaudi, tsî ǁhaiǃāgudi, tsî ǂhanub ǂama ra hā ǂnoagudi tsîde; harebeo tsî di a ǁau xuige. 10 ǀGorasa ra dī khoeba ǂgōxū ǂguro tsî ǀgamǁî ǁnamas khaoǃgâ; 11 î ǂan nēti īb a ǂkhaba tsîb ra ǁore ǃkhaisa; ob ge ǁî-aitsama ra ǀgoraǃgâsen. 12 Artemab tamas ka io, Tixikuba ta ga sîo, o ǃhaeǃhaesen î Nikopolis tawa tita ǁga hā; ǁnāpa ta nî saoba hâǂuise ta ǂâibasen hâ xuige. 13 Senab ǂhanuǂansabeb tsî Apolob tsîkha ǃgâise huiǃgûǃgû, î kha xū-e tā tôasi. 14 În ǁkhāti sada dina ǁkhāǁkhāsen, ǃgâi sîsenga aimâbasa, ǂhâbasa i hâ khami, în tā ǂûoǃnâse hâ. 15 Tita ǀkha hân hoan ra tawede tsi. ǂGoms ǃnâ a ǀnam gena tawedeba te. ǀKhomma ab sadu hoadu ǀkha hâ.
AUGUSTUB 19-25
ELOBMÎSA XU HÂ ǂÛǂÛSA MÎDI | HEBREǁÎN 1-3
“ǂHanu-aisiba ǀnam i ǂhanuoǃnâsiba ǃhui”
(Hebreǁîn 1:8) Xawe ǀgôab xab ra mî: Sa trons ge hugaǀgui tsî ǀamose ra hâ, o Elotse; gaohais sa gaosib dis ge a ǂhanu-ai gaohai.
w14-E 2/15 5 ¶8
Koa re Xristub, goa-aogu di Goa-aoba
8 Jehovab ge ǁÎb ǀGôaba 1914ǁî kurib ǃnâ ǂhauhesa Gao-aob ase ge ǁgaumâi. ‘Gaohais ǁîb gaosib dis a ǂhanu-ai gaohai’ amaga da ge a ǂan ǂhanu-aise tsî khoen ǁaegu ǀgora-e ūhâ tamaseb nî ǂgaeǂgui ǃkhaisa. ǁÎb ǂgaeǂguis Jehovab ai a ǃgaoǃgaosa amagab ge Jesuba a ǂhanu khoe ǂgaeǂgui nîba. Jesub di trons ge “ǀamose ra hâ.” Kaise da ge ra ǃgâiaǂgao, Jehovaba Jesub Xristub di ǂoaǂamsa ǂgaeǂguis ǃnâga ǃoabasa.
(Hebreǁîn 1:9) ǂHanu-aisibats ǀnam hâ, tsî ǂhanuoǃnâsibats ǁkhan hâ amagab ge sa Eloba satsa, o Elotse, ǃgâiaǂgaob di ǁnui-i ǀkha ge ǂkhauǀkhā sa horesagu ǂamai.
w14-E 2/15 4-5 ¶7
Koa re Xristub, goa-aogu di Goa-aoba
7 Khomai re Psalmdi 45:6, 7. Jesub ge ǂhanu-aisiba a ǀnam tsî ǁîb ǁGûba nî ǂkhîoǃnâ kai xūn hoana a ǃhuisa. ǁNā amagab ge Jehovaba ǁîba ǁÎb Gaosib di Gao-aob ase ge ǁgaumâi. Jesub ge “ǃgâiaǂgaob di ǁnui-i” ǀkha ge ǀnauǂgāhe ǁîb “horesagu” Davib di surib ǃnâ ge hâ-igu xa ǃnāsase. Mati-i io? ǂGuroseb ge Jesuba Jehovab xa aitsama ge ǀnauǂgāhe. Saorase, Jehovab ge ǁîba Gao-aob tsî ǀGapi Pristeri ase ge ǀnauǂgā. (Psa. 2:2; Heb. 5:5, 6) ǀArorase, Jesub ge ǁnui-i ǀkha ge ǀnauǂgāhe tama hâ-i xawe ǃanu gagab ǀkha tsîb ge ǁîb di gaosiba ǃhūbaisi gaosi tama hâ xawe a ǀhomsi gaosi.
Gagasi xūna ǀō-aisase ôaǃnâs
(Hebreǁîn 1:3) ǁîb ge ǂkhaisib âb di ǀkhâuǂuib, tsî īsib âb di ǁgâiǂuihesa ība, tsîb ge xūn hoana ǁîb di ǀgaisa mîs ǀkha ra tani; tsî ǁîb ǂûba xub ge ǃanuǃanusis sada ǁoren disa dītoao, ob ge amǀkhāb ǁôab ǀgapiseb ǃnâ hâ kaisib dib tawa ge ǂnû.
it-1-E 1185 ¶1
Īsib
Jesub Xristuba ǁîb ǁGûb di ǀgauga ǀoasase hoaǁae gere ǁgauǂui?
Jehovab di ǂguroǃnaesab, hina ge ega Jesub di a ǂan-eb ge ǁîb di Îb khami-i. (2Kor. 4:4) Jehovab ge ǁnā ǀGôab ǀkha gere ǃhoa, mîb gere o: a kham “khoena dī,” sakham “di īb ǃoa” ti. Nēs ra ǂâibesens ge ǀGôab ge ǁîb di ǁGûb īsiba kuru-aob xab ge kuruhe ǁaeba xū ge ūhâ tsoatsoa. (Gen. 1:26; Jhn. 1:1-3; Kol. 1:15, 16) ǀOasa kurusabeb aseb ge ǃhūbaib-ai hâ io, ob ge Jesuba gere dītsâ ǁîb Îb di ǀgauga ǀoasase ǁgauǂûisa khoesi ǃnubusin ge hâ-i xawe. ǁNā-amagab ge ge mî: “tita ra mû-i kom ǁGûba ra mû-eo.” (Jhn. 14:9; 5:17, 19, 30, 36; 8:28, 38, 42) ǁÎb ge ǃnāǂamsase ǁîb di Îb ǀgauga ǁōba xûb ge khâisa māhe tsîb ge gagasi soros ǀkhā ǀhomma ǃoa-a io, o gere ǁgau, ǁnapab ge “hoa ǀgaiba ǀhommi ǃnâ tsî ǃhūbaib ai” a māhe amaga. (1Pet. 3:18; Mat. 28:18) Jehovab ge Jesuba “kaise ge ǀgapiǀgapi,” ǁnā-amagab ge ǁîba ǁîb ǁGûb īsiba ǂguroseb gere ǁgares xa kaise ǃnāǂamsase gere ǁgare. (Fil. 2:9; Heb. 2:9) Nēsisab ge ǁîba “īsib âb [Elob] di ǁgâiǂuihesa ība.”—Heb 1:2-4.
(Hebreǁîn 1:10-12) Tsî: Sats ǃKhūts ge tsoatsoas ǃnâ ǃhūbaiba ge ǃgaoǃgao, tsî ǀhomgu ge sa ǃomkha di sîsenga. 11 ǁÎgu ge nîra kā, xawets ge satsa nîra hâhâ; tsîn ge ǁîn hoana sara-i xase nîra ǀoro, 12 tsî ǂamsara-i xasets ge ǁîna nîra ǃgami; on ge nîra ǀkharaǀkharahe; xawets ge satsa a ǁkhā, tsî kurigu âts ge ǀam tide.
it-1-E 1063 ¶7
ǀHommi
Psalmdi 102:25, 26 ge Jehovaba ǃoa ra ǁnaeǁgau, xaweb ge apostel Pauluba nē xoasa Jesuba ǃoa ra ǁnaeǁgauses tsîna ge sîsen-ū. Elob ge ǁÎb ǀguise ǃnae hâ ǀgôaba ge sîsen-ū îb ǀhommi tsî ǃhūbaib tsîkha kuru. Paulub ge ge mî Elob ge ǂhâbab ga hâ o ǀhommi tsî ǃhūbaib tsikha ‘ǂamsara-i khami ga ǃgami hâ,’ ǁkhawan hâ tide se. Xaweb ge Elob ǀGôaba ǀamose nî ûi.—Heb. 1:1, 2, 8, 10-12; ǀgopeǀnō re 1Pet. 2:3.
Elobmîs khomai ǃâs
(Hebreǁîn 1:1-14) ǃNuriǃnādi tsî mâ dommi hoab aib Eloba hugasa xu kēbo-aogu ǃnâ ǁgûgu ǃoa gere ǃhoas khaoǃgâb ge nē ǀuni tsēdi ǃnâ sada ǃoa ge ǃhoa ǀGôab ǃnâ; 2 xūn hoan di ǀumi-aoseb ge mâib, ǁîba xub ge ǁkhāti ǃhūbaiba dība; 3 ǁîb ge ǂkhaisib âb di ǀkhâuǂuib, tsî īsib âb di ǁgâiǂuihesa ība, tsîb ge xūn hoana ǁîb di ǀgaisa mîs ǀkha ra tani; tsî ǁîb ǂûba xub ge ǃanuǃanusis sada ǁoren disa dītoao, ob ge amǀkhāb ǁôab ǀgapiseb ǃnâ hâ kaisib dib tawa ge ǂnû; 4 tsîb ge ǁnātikōse ǀhomǃgāgu ǃgâ-ai ge ǃgâi, ǁîgu xab ge ǂoaǂamsa ǀonsa ǀumis kōse. 5 Mâ ǀhomǃgāb ǃoab kha Eloba ǀguitsē ge mî: “Sats ge a ti Ôa, nētsēts ge go ti ôa kai.” Tsî ǁkhawa: “Tita ge nî ǁîb di ǁGû, tsîb ge nî ǁîba ti Ôa,” ti? 6 Tsî ǁkhawa, ǂGuroǃnaesabebab ra ǃhūbaib ǃnâ ūǂgâxa ǃnubaib ra mî: “Tsî gu ge ǀhomǃgāgu hoaga ǁîba nî ǀgoreǀî.” 7 ǀHomǃgāgu xab ra mî: “ǁÎb ge ǀhomǃgāgu âba gagase ra dī, tsî ǃgāgu âba ǀaes ǁhabuse.” 8 Xawe ǀgôab xab ra mî: Sa trons ge hugaǀgui tsî ǀamose ra hâ, o Elotse; gaohais sa gaosib dis ge a ǂhanu-ai gaohai; 9 ǂhanu-aisibats ǀnam hâ, tsî ǂhanuoǃnâsibats ǁkhan hâ amagab ge sa Eloba satsa, o Elotse, ǃgâiaǂgaob di ǁnui-i ǀkha ge ǂkhauǀkhā sa horesagu ǂamai. 10 Tsî: Sats ǃKhūts ge tsoatsoas ǃnâ ǃhūbaiba ge ǃgaoǃgao, tsî ǀhomgu ge sa ǃomkha di sîsenga. 11 ǁÎgu ge nîra kā, xawets ge satsa nîra hâhâ; tsîn ge ǁîn hoana sara-i xase nîra ǀoro, 12 tsî ǂamsara-i xasets ge ǁîna nîra ǃgami; on ge nîra ǀkharaǀkharahe; xawets ge satsa a ǁkhā, tsî kurigu âts ge ǀam tide. 13 Tsî mâb ǀhomǃgāgu dib ǃoab kha ǀguitsē ge mî: Ti amǀkhāb ǁôab ai ǂnû, sa khākhoena ta nî sa ǂaira di mâi-aidase dīs kōse? 14 ǁÎgu hoaga kha ǃoaba ra gaga tama hâ, ǃgâiǃōsiba nî ǀumin di ǃoabahes ǃaroma sîǂuihe hâga?
AUGUSTUB 26–SEPTEMBERI 1
ELOBMÎSA XU HÂ ǂÛǂÛSA MÎDI | HEBREǁÎN 4-6
“ǁGūtsâ re Elob sâb ǃnâ ǂgâsa”
(Hebreǁîn 4:1) A da ǁnâi ǃao, î-i tā ǀnîsi ǀgui-i âdo, ǁîb di sâb ǃnâ ǂgâ ǁkhās di mîmâis hâ hîa, khaoǃgâ i hâse hōhe.
(Hebreǁîn 4:4) Tsîb ge ǃkhai-i tawa hûǁî tsēs xa nēti ge ǃhoa: “Tsîb ge Eloba hûǁî tsēs ai ǁîb di sîsengu hoaga xu ge sâ.”
w11-E 7/15 24-25 ¶3-5
Elob sâ tsēsa a tae?
3 ǀGam xūn ge ra ǁgauda Jehovab ge ǂgurokam Xristeǁîn ǁaeb ǃnâ noxoba sâtsēs ǃnâ hâ isa. Jesub ge sâtsēs ai khoena gere ǂgauǂgau o, ob ge gere ǃkhāǃkhāhe ǁîb ra sîsen din ge ǂâi amaga. ǂGurose, hāda ǁîb ge ǃeream ǀgauba kō re. “Ti îb ge nēsis kōse ra sîsen, o ta ge tita ona ra sîsen” tib ge Jesuba ge mî. (Johaneb 5:16, 17) Nēsa tae-e ra ǂâibasen? Khoen ge Jesub ge sâtsēs ai ra sîsen ti gere mî. “Ti îb ge nēsis kōse ra sîsen” tib ge mî o, ob ge ǁîn ǂâiǀgaub ge ǂhanu tama hâ isa ge ǁgau. ‘Tita tsî ti Îb ge ǀgui sîsen-e ra dī. Ti Îb nēsis kose ra sîsens gera ǂâibasen tita tsîn a sîsen ǁkha ǃkhaisa, sâtsēs ais ga xawe.’ ǁNā mîdi ǀkhab ge Jesuba gere ǁgau, Jehovab di sâ tsēs ge Jesub ǁaeb ǃnâ toa tama hâ-i sa.
4 ǀGamǁîse ige apostel Paulub mîdi tsîna a huida ǁkha. Elob sâtsēsa ǃoa ra ǁnaeǁgauseb ge Genesis 2:2 sa ǁgae tsî ge mî: “sada ǂgom ra da ge sâb ǃnâ nî ǂgâ.” (Heb. 4:3, 4, 6, 9) Nēs ra ǂâibasens ge, Jehovab ge Paulub ge ûi hâ-i ǁaeb ǃnâs tsîna ǁîb sâtsēs ǃnâ ge hâ-i. Matikō gaxū ǁaebab Jehovaba nî sâ?
5 ǁNā dîsa da ga ǃeream ǂgoa o, o da ge aibe hûǁî tsēs di ǂâibasens xa nî ǂâi. Genesis 2:3 ge ra mî: “Elob ge hûǁî tsēsa ǀkhae tsî ge khai.” ǁNā tsēs ge Jehovab xa ‘ge khaihe’—ǀō-aisase ge ǁkhûihe—îb ǁîb ǂâibasensa dīǀoaǀoa. Nē ǂâibasens ge ǁnâuǀnamxa khoen nî ǃhūbaib ai ûi tsî xamanin tsî nau hâ xūn hoana nî kōǃgâ ǃkhaisa. (Gen. 1:28) ǁNā ǂâibasens nî dīǀoaǀoahe ga, kha ge Jehovab tsî Jesub, ‘sâtsēs di ǃKhūba’ “nēsis kōse ra sîsen.” (Mat. 12:8) Xristub ǀoadisi kurigu di ǂgaeǂguis ǀams ai kha ge Elob sâtsēs ǂâibasens xa ǃkhōǂgahe hâ xūn hoana nî dīǀoaǀoa.
(Hebreǁîn 4:6) O i ge ra ǃgau, ǀnîn nî sâb ǃnâ ǂgâsa, tsî ǁnān, aibe ge ǃgâiǂhôasa aoǁnâbahen ge ǂgomoǃnâsib ǃaroma ǂgâ tama isa.
w11-E 7/15 25 ¶6
Elob sâ tsēsa a tae?
6 Elob ge ǁÎb ǂâibasensa Adammi tsî Eva hara ge mîba, xawe ra ge ǁîra ǁîb ǀkha ge sîsenǀhao tama hâ i. Adammi tsî Eva hara ge ǂguro khoera hîna ge Eloba a ǁnauǀnam ǀû ra. ǁÎra khaoǃgâ i ge miliundi xa a ǃnâsa khoena ǁîra ǂgaroba ge sao. Israelǁaes tsîn ge ǁîra khami Eloba ge ǁnâuǀnamoǃnâ, Jehovab di khoen ge i xawe. Paulub ge ǂguro Xristeǁîna ge mîba, ǁîn tsîn ǁkhā masib ǃnâ a ǂgâ ǁkha ǃkhaisa, Isrealǁaes khami. ǁÎb ge ge mî: “a da ǁnâi ǃhaeǃhaesen, ǁnā sâb ǃnâ da nî ǂgâsa, î-i tā ǀgui-e ǁkhā aiǁgaus ǂgomoǃnâsib dis ǃnâ ǁnā.” (Heb. 4:11) ǃGaoǃgâ re, Paulub ge ǁnauǀnamoǃnâsiba Elob sâb ǃnâ ǂgâsa ǂoaǃnâs ǀkha ra ǀhaoǀhao. Nēsa tae-e ra ǂaibasen ba da? Hana da ga Elob ǂâibasensa a mâǃoa o, dī dara xūn ǀkha, o Elob sâb ǃnâ ǂgâ i da nî? Nē dîs ǃgao ǃereamsa ūhâs ge kaise a ǂhâǂhâsa ba da, nēsa da ge nî ǃkhoaǃgao. Ha re îda Elob sâb ǃnâ ǂgâs xa ǁkhāǁkhāsen Isrealǁaes di ǁgai aiǁgausa xū.
(Hebreǁîn 4:9-11) ǁNā-amaga i ge sâtsēs di sâ-e Elob ǁaesa ra ǃgauba. 10 ǁÎ-i di sâb ǃnâ ge ǂgâ-i, ǁnā-i ge ǁkhāti ǁî-i di sîsenga xu ra sâ, Elob ge ǁîb diga xu sâ khami. 11 A da ǁnâi ǃhaeǃhaesen, ǁnā sâb ǃnâ da nî ǂgâsa, î-i tā ǀgui-e ǁkhā aiǁgaus ǂgomoǃnâsib dis ǃnâ ǁnā.
w11-E 7/15 28 ¶16-17
Elob sâ tsēsa a tae?
16 ǀNî Xristeǁîn ge nēsis kose Moseb ǂhanub ǃnâ hâ xūna ra sao-ai ǂgao, ǁnāba xūn oresa nî hō din ra ǂai amaga. Paulub ge Efeseǁîna a xoaba mîdi ge kaisa a ǃgāsa: “ǀkhomma xu du ge ǃgâiǃō kaihe ǂgomsa xu xui-ao; tsîs ge ǁîsa sado xu ī tama; Elob di mās komo sîsenga xu tama, khoe-i koasen tidega.” (Efe. 2:8, 9) Mati-i Xristeǁî-e Elob sâb ǃnâ a ǂgâ ǁkha? Jehovab ge hûǁî tsēsa ǁîb sâtsēs ase ge ǂnûiǂûi, ib ǃhūbaib ǃgaob ūhâ ǂâibasensa dīǀoaǀoa. Jehovab ǀkha da ge a sîsen ǀhao ǁkha ǁîb sâ ǁaeb ǃnâ ǁîb ǂâibasensa dīǀoaǀoasa ǁîb ǀapeǂhumis ǃnâ-ū îra ǁgauhe khami.
17 Hana da ga Elobmîs dauǁgaudi hîna da ǂgomǂgomsa tsî gā-ai ǃgāba xū ra hōde a mâǃoa tsî sida ra ǂâi khami dī o, o da ge Elob ǂâibasens ǀkha sîsen ǀhao tama hâ. Nēs ge sida Jehovab ǀkha ūhâ ǀhosagusisa ǁkhōǁkhōsa mâsib ǃnâ a mâi ǁkhā. Saora ǁkhāǁkhāǃâs ǃnâ da ge mâsigu hîna Jehovab khoena nētsē ra tsâǀkha gu xa nî ǁkhāǁkhāsen. Tsî mati-i sida di ǁnauǀnamxasib tamas ka io ǁnauǀnamoǃnâsiba Elob sâtsēs ǃnâ ǂgâsa nî tsâǀkha ǀgaub tsîna.
Gagasi xūna ǀō-aisase ôaǃnâs
(Hebreǁîn 4:12) Elob mîs a ûitsama tsî ǀgaisa xui-ao, tsîs ge hoaǃnamǀā gôab ǃgâ-ai a ǀā, tsîs ge ra ǃganu, ǀoms tsî gagas tsî uniǁaedi tsî ǂgaeb tsînas ra ǀgoraǃās kōse, tsîs ge a ǂâidi tsî ǀapeǀapedi ǂgaob didi di ǀgoraǃgâ-ao
w16.09-E 13
Khomai-aon dîdi
Hebreǁîn 4:12 ǃnâ a xoasa “Elob mîs” hîna “ûitsama tsî ǀgaisa” di ra mîhe sa tae-e ra ǂnûǁkhaeba?
▪ ǁNā danaǃâs ǃnâ hâ xoadi ǀnîdi ge ra ǁgau Paulub ge Elob haisi-ams tamas ka io Elob ǂâibasens hîna Elobmîs ǃnâ xoa mâihe hâs xa gere ǁnaeǁgausa.
Sida ǂkhanin ǃnâs ge Hebreǁîn 4:12 sa kai-amse Elobmîs khoen ûib ǃnâ ūhâ sîsenǂûibas nî ǁgau ga ra sîsen-ūhe. Nē ǀgaub ǃnâ xoasa sîsen-ūs ge a ǂhanu. Xawe da ga nē xoasa nau hâ xoadi ǀkha a kō ǀhao o, o da ge ǃgāsa ǂâibasensa nî hō. Paulub ge Hebreǁî Xristeǁîna ge ǂkhâǃnâ în Elob di ǂâibasendi ǀkha sîsen ǀhao. Nē ǂâibasendi ge Elobmîs ǃnâ xoahe hâ. Paulub ge Isrealǁaes hîna ge Egipteb ǃhūba xū a huiǂûihesa aiǁgaus ase ge sîsen-ū. ǁÎn ge ǃhūb hîna ‘daib tsî danib tsîkha ra dâub’ ǃnâ ǂgâsa ge ǃaubasen hâ-i, ǁnāban sâsase nî ûi amaga.—Eks. 3:8; Deu. 12:9, 10.
ǁNās ge ge Elob di ǂâibasen-i. Xawes ge Isreaǁaesa ǁîs ǂgaoba ǃgâriǃgâri tsî Eloba ǁnauǀnam tama ge i. ǁNās ǀkhan ge ǂguina ǃaubasen ân ge hâ-i sâb ǃnâ ge ǂgâ tama hâ i. (Num. 14:30; Jos. 14:6-10) Paulub ge ge ǀaro “ǁÎb di sâb ǃnâ ǂgâ ǁkhās di mîmâis” noxoba hâsa. (Heb. 3:16-19; 4:1) ǁNā “mîmâis” ge Elob di ǂâibasens ǃnâ ǃkhōǂgahe hâ. Hebreǁî Xristeǁîn ge dī khama da ge sida tsîna nē ǂâibasens xa ǁkhāǁkhāsen tsî nî sīsen ǀhao. Nē mîmâis Elobmîs ai a ǃgaoǃgaosa ǃkhaisab nî ǁgau gab ge Pauluba Genesis 2:2 tsî Psalmdi 95:11 tsîra ǃoa ge ǁnaeǁgau.
“ǁÎb di sâb ǃnâ ǂgâ ǁkhās di mîmâis” noxoba hâs ge kaise ra ǃgâiaǂgao kai da. ǂGomǃgâ da ge ra nē mîmais hîna Elobmîs ai a ǃgaoǃgaosas ra īǁkha kaisa Elob di sâb ǃnā ǂgâsa tsîs a ama ǃkhaisa, xawe da ge nî dītsâ īda ǁnâ sâb ǃnâ ǂgâ. Moseb ǂhanuba saos tamas ka io Jehovab di ǃkhōǃgâsa ǀnî ha xūna dīs ǃnâ-u hōs ǀkhā da ge nē sâb ǃnâ ǂgâ tide. Xawe da ge Jehovab di ǂâis hîna go ǁguiǃāhes ǀkha hoaǁae ǀguiǃnâxase ra hâ ǂgao. ǃHūbaib ǂhawase ige ǂgui khoena Elobmîsa ge ǁkhāǁkhāsen tsoatsoa tsî Elob di ǂâis xas tsîna ra ǁkhāǁkhāsen. ǂGuin ân ge ǁîn di ûiga ǀkharaǀkhara tsî ǂgomsa ra omkhâi tsî ǁnās ǀkha ra ǁāǁnâ kaisen. Nē khoen ǁîn ûiga ra ǀkharaǀkhara ǀgaub ge ra ǁgau “Elob mîs a ûitsama tsî ǀgaisa” ǃkhaisa. Elob di ǂâis ge Elobmîs ǃnâ i a xaosa khami ǀnai sida ûiga ge ǀkharaǀkhara tsî ûida hâs kōse sida ûigu ǃnâ ǀgaisase nî sîsen.
(Hebreǁîn 6:17, 18) ǁNā-amaga, Elob ge mîmâis di ǀumi-aoba ǃnāǂamsase ǁgau ǂgao-o, ǁîb di ǂâibasens ǁnope tide ǃkhaisa, ob ge nū-i ǀkha ǁaegub ǃnâ ge hā. 18 Î da ga ǀgam ǁnoweǁoasa xūra, ǁîra ǃnâb Eloba ǂhumi ǁoara ǃnâ ǀgaisa ǁkhaeǂgao-e ūhâ ti, sada ǁhâsī geda, tsî ǁkhau-ūhe da ge ǃâubasensa ra ǃkhōǀgaipeda.
it-1-E 1139 ¶2
ǃÂubasens
Nē ǃâubasens ge “ǀhomsi ǂgais ǃnâ ra amǃnâxado” (Heb. 3:1) ǀgoras a ǀkhai ba ǀamo ûiba ra mā, tsîda ge nēsa a ǂgōmǃgâ ǁkhā. Nēs ge ǀgam ǁnoweǁoasa xūn xa ra ǂnâǃnâhe Elob a ǂhumi ǁoasara ra ǁgau amaga. Aiǁgause, ǁÎb nus tsî mîmaidi, nē ǃâubasens ge Jesub ai a ǃgaoǃgaosa, ǁîb ǁō ǁoase ǀhommi ǃnâ hâ xui-ao. ǁNā-amaga da ge “ǁîsa da ǀoms di ǃkhōmâixūse ūhâs, ǁaposa tsî ǀgaisas, tsî ǁkhāti ǂgāmâisab ǃnâ ra ǃgûǂgâsa; ǁîb ǃnâb ge Jesub ai-aiba-aoba sada ge ǃgûǂgâba, Melxisedeki di dommi ǃoa ge ǀamosib kōse ǀgapiprister kaiba.”—Heb. 6:17-20.
Elobmîs khomai ǃâs
(Hebreǁîn 5:1-14) Mâ ǀgapipristeri hoab, khoena xu ra ūheb ge Elob tawa khoen ǃaroma ra dīhen ǂamai ra mâihe, hōdi tsî ǁguibadi tsîdeb nî ǁoren ǃaroma ǁguibase, 2 ǀūǂamse hân, tsî ra ǁhapumanab nî ǀkhom ǁkhāse, aitsamab ǁkhāti ǂkhabusasigu ǀkha ǃnamiǂgāhe hâ xui-ao. 3 ǁÎgu ǃaromab nî, ǁaes ǃaromab ra dī khami, ǁkhāti ǁîb ǂûba ǁguibasenba ǁoren ǃaroma, 4 tsî khoe-i xare-e ge ǃgôasiba ǁîba xu aitsama ūbasen tama, xawe Elob xa ra ǂgaiheba, Aronni khami. 5 ǁNās ǁkhās xaseb ge ǁkhāti Xristuba aitsama ǂkhaiǂkhaisen tama ge i, ǀgapiprister kaib nîse, xawe ǁnāb, ǁîb ǃoa: “Ti Ôats a satsa, nētsēts ge go ti ôa kai,” ti ge mîba. 6 ǀNî ǃkhai-i tawab ra ǁkhāti mî khami: “Sats ge pristertsa ǀamosib kōse Melxisedeki di ǀgaub ǃoa.” 7 Tsî ǁîb ǁgans di tsēdi ǃnâb ge ǁnāb, ǁōba xu ore bi ǁkhāba, ǃgari ǃaus tsî ǁgamron ǀkha ǀgores tsî ǀkhomas tsîra ǁguibao, tsî ǃaoba xub ge ǁnâu-amheo, 8 ob ge ǀGôab a xawe, tsâb ǃnâ ǁnâuǀnamxasiba ge ǁkhāǁkhāsen. 9 Tsî dītoaheb geo, ob ge ǁîba ǁnâuǀnam hân hoana ǀamo ǃgâiǃōsiba ra dī-ao kaiba; 10 tsîb ge Elob xa ǀgapipristeri, Melxisedeki dommi ǃoa hâb ase ge ǂgaihe. 11 ǁÎb xa ge sige ǂgui mîxūna ūhâ, ǁguiǃāsa a ǃgombana, ǁnâusa du ge nētikōse a ǀopesaba amaga. 12 Sadu, ǁaeb ǃoa ǁkhāǁkhā-aose nî īdu ge ǁkhawa ǂhâba hâ ǁkhāǁkhāhe du nîsa xui-ao, mân a ǂguro tsoatsoa Elob mîdi dina ǃkhaisa, tsî du ǁkhawa dai-e ǂhâba hâ, tsî ǀgaisa ǂû-e tama; 13 mâ-i hoa-i, dai-e xu ra ûi-i hoa-i ge ǂhanu-aisib di mîs ǃnâ ǀoasa ǂan-e ūhâ tama hâ xui-ao; ǀgôaro-i komo; 14 xawe ǀgaisa ǂû-i ge a kaiǀoa hân di, ǁîn ǁnaetiba xu, mâ-i a ǃgâi tsî mâ-i a tsūsa ǀgoraǃā ǁkhā ǂâide ūhâna.