ǁNaeǁgaudi Sida Xristeǁî ûib tsî aoǁnâ sîsenni sîsen ǂkhanib
OKTOBERI 7-13
ELOBMISA XU HÂ ǂÛǂÛSA MÎDI | JAKOBUB 3-5
“Eloba xu hâ gā-aisiba ǁgau”
(Jakobub 3:17) Xawe ǀgapiseba xu hâ gā-aisib ge ǂgurose a ǃanu, ǁnās khaoǃgâ ǂkhîxaǃnâ, tsauraǃnâ, mîbakaisenxa, ǀkhomxaǂgaosib tsî ǃgâi ǂûn xa ǀoa hâ; tsîb a ǂhauǃnâ tsî hînaoǃnâ.
cl-E 221-222 ¶9-10
‘ǀGapiseba xu hâ gā-aisiba’ sîsenǂuiba ūhâ sadu ûib ǃnâ?
9 “ǂGurose a ǃanu.” ǃAnu di hâ mîs ge ǃauga ǀgui ǃanus ǃoa ǁnaeǁgau tama hâ xawe ǂgânagab ǃnâs tsîna ǃanus ǃoa ra ǁnaeǁgau. Elobmîs ge gā-aisiba ǂgaob ǀkha ra ǃkhōǀhao. Xawe ǀhomsi gā-aisib ge ǂgaob hîna ǀurixa ǂâis, turagu tsî ǁgai ǂâibasendi xa ǀoahe hâb ǃnâ a ǂgâ ǁoa. (ǂKhoamîdi 2:10; Mateub 15:19, 20) Xawe sida ǂgaob ga ǃanu o, ǀoasa tama da hâ xawe, o da ge “ǂkhababa xu” nî ǂgō tsî “ǃgâiba” nî dī. (Psalmdi 37:27; ǂKhoamîdi 3:7) ǁNā-amagas ge ǃanusiba gagasi ǀgaugu ǃgao a ǂguro. ǁNās xōǀkhā da ga sida tanisen ǀgaub tsî gagasise ǃanu tama io, o mati da ǀgapiseba xu ra hā gā-aisiba a ǁgau ǁkhā?
10 “ǁNās khaoǃgâ ǂkhîxaǃnâ.” ǀHomsi gā-aisib ge ra hui da î da ǂkhîba ôa. Tsî ǁnāb ge Elob gagab di ǂûba. (Galateǁîn 5:22) ǁNā-amaga da ge nî dītsâ î da tā “ǂkhîb di ǃgaeǁaresa” khôa hîna Jehovab khoena ra ǀhaoǀhaoba. (Efeseǁîn 4:3) Sida ǀkhāba xus tsîna da ge nî dītsâ ǂkhîb ga ǀgai o, ǂkhîba omkhâisa. ǁNāsa tae-i ǃaroma a ǂhâǂhâsa? Elobmîs ge ra mî: “ǃAruǀî . . . ǂkhîbagu re, tsî Elob ǀnammi tsî ǂkhîb tsîkha dib ge sadu ǀkha nîra hâ.” (2 Korinteǁîn 13:11) ǂKhîb ǃnâ da ga ra hâǀhao o, ob ge Eloba sida ǁaegu nî hâ. Sida ǃgâsana da ra hâ ū ǀgaub ge ra ǁgau tae-i ǀhōsagusisa da Jehovab ǀkha ūhâsa. Mati da a ǁgau ǁkhā, ǂkhîba kuru-ao da a ǃkhaisa? Saora aiǁgaus xa ǂâi re.
(Jakobub 3:17) Xawe ǀgapiseba xu hâ gā-aisib ge ǂgurose a ǃanu, ǁnās khoaǃgâ ǂkhîxaǃnâ, tsauraǃnâ, mîbakaisenxa, khomxaǂgaosib tsî ǃgâi ǂûn xa ǀoa hâ, tsîb a ǂhauǃnâ tsî hînaoǃnâ.
cl-E 223-224 ¶12
‘ǀGapiseba xu hâ gā-aisiba’ sîsenǂuiba ūhâ sadu ûib ǃnâ?
12 “Tsauraǃnâ” tamas ka io ǁnâuǃāxa. Tsauraǃnâsiba tae-e ra ǂâibasen? ǂAnsa ūhâ khoen ge ra mî, Grikegowab mîs “tsauraǃnâ” di hâs hîna Jakobub 3:17 tawa ra hōhes ge a ǃgom ǂnûiǃkhunisa. ǂNûiǃkhuni-aon ge “tsaura,” “ǃnūǃnâxa” tsî “ǃgâixasib” di ra ǂnûiǃkhunisi. New World Translations Baibels ge “hara ǂâixa” tamas ka io “ǁnâuǃāxa” di ǂnûiǃkhunusi hâ. Mati da a ǁgau ǁkhā, nē ǃâb ǀgapiseba xu hâ gā-aisib dib sida ûib ǃnâ ra sîsensa?
cl-E 224-225 ¶14-15
‘ǀGapiseba xu hâ gā-aisiba’ sîsenǂuiba ūhâ sadu ûib ǃnâ?
14 “Mîbakaisenxa.” Grikegowab mîs “mîbakaisenxa” di hâs ge Grikegowab Xoadi ǃnâ hōhe tama hâ. ǀGui ôaǃnâ-ao-i ǃoagus ge nē mîsa “soldagu a ǁnâuǀnamxa ǀgauba ǃoa ra ǁnaeǁgau.” Nē mîs ge “ǁnâuǀnamxa” tsî “ǃnaga hâs” ǃoas tsîna ra ǁnaeǁgau. Khoe-i hîna ǀgapigaba xu hâ gā-aisib xa ra ǂgaeǂguihe i ge Elobmîs ra mî xūna ra ǁnâuǀnam. ǁÎ-i ge mîǁgui-e dī tsî ǂkhā tama hâ ǁnās xa daoǁgauhesa. Xawe Elobmîsa xu i ga huihe o, o ǃhaese ǁî-i di ǂâi ǀgauba ra ǀkharaǀkhara. Sadu tsîna ǁnāti a ǂansa ǃgâsan xa?
“ǀKhomxaǂgaosib tsî ǃgâi ǂûn xa ǀoa hâ”
15 “ǀKhomxaǂgaosib tsî ǃgâi ǂûn xa ǀoa hâ.” ǀKhomxaǂgaosib ge kaise ǂhâǂhâsa ǃâba ra kuruǂui ǀgapiseba xu hâ gā-aisib diba. ǁNāti gā-aisib ge “ǀkhommi xa ǀoa hâ.” Mû î du go, “ǀkhommi” tsî “ǃgâi ǂûn” ge ǀguiba ra ǂgai ǀhaohe. Elobmîs ǃnâb ge ǀkhomma nau khoe-e tsâbasa ǃoa ra ǁnaeǁgau. Nē ǀkhomxaǂgaosib ge dīb ǃnâ-ū ra ǁgauhe. ǀGui ǂkhanis ge ǀkhomma sao rase ra ǁguiǃā: “Khoe-e ǀkhoms hîna ǃgâi tama mâsib ǃnâ hâ-e tsî ǁî-e xū-e dības” di ra mî. Elosi gā-aisib ge ǂnâsa tamas ka io karoǂgaoxa tama hâ. Xawe a ǀgamsa, ǀkhomxa tsî ra tsâba. Mati da a ǁgau ǁkhā ǀkhomxaǂgao da asa?
(Jakobub 3:17) Xawe ǀgapiseba xu hâ gā-aisib ge ǂgurose a ǃanu, ǁnās khoaǃgâ ǂkhîxaǃnâ, tsauraǃnâ, mîbakaisenxa, khomxaǂgaosib tsî ǃgâi ǂûn xa ǀoa hâ, tsîb a ǂhauǃnâ tsî hînaoǃnâ.
cl-E 226-227 ¶18-19
‘ǀGapiseba xu hâ gā-aisiba’ sîsenǂuiba ūhâ sadu ûib ǃnâ?
18 “ǂHauǃnâ.” Elosi gā-aisib ge ǃhao ǀgoras tsî ǁaedi ǂnīsasib ǀgapiga hâ. ǁNā gā-aisiba da ga mā-am o, îb daoǁgau da, o da ge sida ǂgaob ǃnâ ǀgorasa ra ǃaroma xūna nî ūbē. (Jakobub 2:9) ǀNî ǃgâsana da ǁîn ǁkhāǁkhās, ǃkhūsib tsî ǀhaohâb ǃnân ūhâ ǃereamdi ǃgao ǃgâise ra hâ ū? Tsî ǁnā xūna ūhâ tama ǃgâsana ra ǃgôaǁnā? ǁNāsa da ge dī ǂgao tama hâ. Jehovab ge ǁnān hîna da ra ǃgôaǁnāna a ǀnam. ǁNā-amaga da ge nē ǃgâsana ǀnamma nî ǁgau.
19 “Hînaoǃnâ.” Grikegowab mîs ge “ǀhuruǃâ-e ra ǀhuru khoe-i ǃoa ra ǁnaeǁgau.” ǀOrokamǁaeb ǃnân ge Grikeǁîn tsî Romeǁîn tsîna maskerde aidi ai gere ǂnûi ǀhuruǃâ-en gere ǀhuru o. ǀNî mîdi ǃnâs ge Grikegowab mîs “hînaoǃnâ” di hâsa ai-e ǁamasa ǃoa ra ǁnaeǁgau. So, elosi gā-aisib ge nî hui da î da sida ǃgâsana ǃgâise sîsen-ū tsî ǁîn ra tsâ khami tsâ.
Gagasi xūna ǀō-aisase ôaǃnâs
(Jakobub 4:5) Tsî ǂâi du kha hâ, xoas ra ǁause mî ǃkhaisa: “Gagas sada ǃnâ ǁan hâs ge surixase ra ǁkhore da?”
w08-E 11/15 20 ¶6
Jakobub tsî Petrub ha kha di ǂkhanira xu ra mâǂoa xūn
4:5—Jakobuba mâ xoasa ra ǁgae nēpa? Jakobub ge ǀō-aisa ǁaraǃā-e ǁgaeǁgae tama hâ. Xawe ǀgapiga hâ ǁaraǃās ge hoaǃnâ-aixase Genesis 6:5; 8:21; ǂKhoamîdi 21:10 tsî Galateǁîn 5:17 ai a ǃgaoǃgaosa.
(Jakobub 4:11, 12) Tā ǀhoegu, ǃgâsado. ǁî-i ǃgâsaba ra ǀhoe tsî ǁî-i ǃgâsaba ra ǀgoraǃgâ-i ge ǂhanuba ǀhoe tsî ǂhanuba ra ǀgoraǃgâ-e. tsî ǂhunabats ga ǀgoreǃgâo ots ge ǂhanu di dī-ao tama i, tsîts ge a ǁîb di ǂhanuǂhau-ao. 12 ǀGui ǂhanuǂnûiǂgā-aob tsî ǂhanǂhanu-aob ǀguib hâ, sâu tsî hîkākā ǁkhāba. Taritsa kha sats nau-e ra ǀgoraǃgâtsa?
w97-E 11/15 20-21 ¶8
Sida ǂgoms ge ra ǃnūǃnâxa kai da tsî ǀgores ǃnâ ra hâhâ kai da
8 ǁOre da ge ra sida ǃgâsana da ga ra ǀhoe o. (Jakobub 4:11, 12) ǀNî ǃgâsan ge mâǃoaxas ǀguisa i, aitsaman ra ǃgôasin xui-ao. În naun ǀgapiga hâ tsî ǁnās ǀkha nau ǃgâsana ra ǃgôaǁnā. (Psalmdi 50:20; ǂKhoamîdi 3:29) Grikegowab mîs “ǀhoe” di hâs ge ǁaib, xū-e kaikais tsî ǂhumi ǂgā-ams ǃoa ra ǁnaeǁgau. Nēs ge ra ǃaroma î da sida ǃgâsana ǁgaise ǀgoraǃgâ. Mati da ‘ǂhanuba ǀhoe tsî ǂhanuba ra ǀgoraǃgâ ǁkhā’? Xoaǂansabegu tsî Farisegu tsîn ge Elob ǂhanuba ǀgui ǀkhāb ai mâi tsî khoena ǁîgu ǂâi ǀgaub ǃoagu gere ǀgoraǃgâ. (Markub 7:1-13) ǁNās ǁkhās khami da ga Jehovab ǀgoraǃgâ tama ǃgâsa-e ǀgoraǃgâ o, o da ge ‘Elob ǂhanub di ǀgoraǃgâ-ao.’ Tsî da ge ǁnās ǀkha a mî ǁkhā, Elob ǂhanub ǃgâi tama hâ di. Tsî sida ǃgâsana da ga ǂhanuoǃnâse mîǁgaiǁgai o, o da ge ǀnammi ǂhanuba dīǀoaǀoa tama hâ.—Romeǁîn 13:8-10.
Elobmîs khomai ǃâs
(Jakobub 3:1-18) Tā ǂgui ǁkhāǁkhā-ao kai re, ti ǃgâsado, î du ǂan, ǁnās ǃgâ-ai kai ǀgoraǃgâ-e ge nîra hō ǃkhaisa. 2 Kaise da kom xūn hoan ǃnâ ra ǃnôao; khoe-i, mîs ǃnâ dīsā tama-i ge dīǀoaǀoasa khoe-e, soros hoasa ǃkhōǀgara ǁkhā hâ-e. 3 Mû, hāna da ge tomde ra ǂgâ-amǃnâ, sadan nî ǁnâuǀnamga, tsî da ge ǁîn ǀkha soros ân hoasa ra ǂgae-ūnu. 4 Mû, ǁkhāti doe-omga, matikōse gu a kai tsî ǃgom ǂoagu xa ra doeǁgamahe, xawe gu ge ama ǂkhari ruri ǀkha ra unuhe, ǂgaeǂgui-aob ra ǂgao ǀkhāb hoab ǃoa; 5 nētis ge namsa ǁkhāti a ǂkhari uniǁaero, xawes ge kai xūn xa ra koasen. Kō, ǂkhari ǀaero-e, matikō kai haiǀgomsa i a ǂhubi ǁkhā ǃkhaisa! 6 Tsî nams on ge a ǀae, ǂkhabab xa ǀoa hâ ǃhūbaisa. Nētis ge namsa sada uniǁaedi ǃnâ ge mâihe, os ra soros hoasa ǂnaoǂnao, tsî ǂūsib di ǀnūsa ra ǂhubi, tsîs ra ǁîsa ǀamo ǀaeba xu ǂhubihe. 7 Mâ ǂūsi-i hoa-i ge ra ǂauǂauhe, ǀgurun di-i karao, anin di-i karao, ǂhana ran tsî hurib ǀgurun di-i karao, tsî i ge ǀnai khoeb di ǂūsiba xu gere ǂauǂauhe; 8 xawe namsa i ge khoe-i xare-e a ǂauǂau ǁoa, ǁnā dāhe ǁoasa ǂkhabas, ǁōǁōsa ǃgāb xa ǀoa hâsa. 9 ǁÎs ǀkha da ǃKhūb tsî ǁGûba ra kare, tsî ǁîs ǀkha da khoen, Elob īb ǃoa ge kuruhena ra ǀâxare. 10 ǁKhā amsa xu kha ra ǂoaxa ǀkhaeb tsî ǀâxareb tsîkha. Tā as ǁnāti ī, ti ǃgâsado. 11 ǀAu-e kha ǀgui mû-e xu ǂkhon-e tsî au-e ra ôa? 12 Īǁkhā i a, ti ǃgâsado, ǀnomahais nî ǀkheraǂûna ūǀkhīsa, tsî ǂauxûiǂûhaisa ǀnomaǂûna? ǁNās ǁkhās khami i ge ǀau-i xare-e ǀū tsî ǂkhon ǁgam-e a ūǀkhī ǁoa. 13 Tari-e kha sadu ǃnâ gā-ai tsî ǁnâuǃāxa? A-i ǁî-i ǃgâi tanisensa xu ǁî-i sîsenga ǁgau tsamtsiǃnâ gā-aisib ǃnâ. 14 Xawe au surib tsî ǀguriǂâibasens tsîra du ga ǂgaob ǃnâ ūhâo, tā koasen î tā amab ǃoagu ǂhumi. 15 Nē gā-aisib ge ǀgapiseba xu ǁgôaxa tama; tsîb ge a ǃhūsi tsî ǂūsi tsî ǁgâuasi; 16 surib tsî ǁîǁâsens tsîra hâpa, ǁnāpa i ge domoǃnâsib tsî mâ ǂkhaba dī-i hoa-e hâ. 17 Xawe ǀgapiseba xu hâ gā-aisib ge ǂgurose a ǃanu, ǁnās khaoǃgâ ǂkhîxaǃnâ, tsauraǃnâ, mîbakaisenxa, ǀkhomxaǂgaosib tsî ǃgâi ǂûn xa ǀoa hâ; tsîb a ǂhauǃnâ tsî hînaoǃnâ. 18 Tsîb ge nē ǂûtanib ǂhanu-aisib diba ǂkhîbagusa ra dīna ǂkhîb ǃnâ ra tsorobahe.
OKTOBERI 14-20
ELOBMISA XU HÂ ǂÛǂÛSA MÎDI | 1 PETRUB 1-2
“ǃAnu, tita a ǃanu xuige”
(1 Petrub 1:14, 15) Î ǁnâuǀnamxa ǀgôadu ase tā ǀguiti-īkaisen aibe du ǀūǂams ǃnâ ge ī i tura-aigu ǃoa; 15 î du sado ge ǂgaib a ǃanus ǁkhās khami sado ǁkhāti ǃanu sadu tanisens hoas ǃnâ.
w17.02-E 9 ¶5
Xoremarib ge “ǀoasa ǀkhaeba” ǁGûba xu
5 Mati da a ǁgau ǁkhā Jehovab ǀonsa da a ǀnam ǃkhaisa? Sida tanisen ǀgaub ǃnâ-ū. Jehovab ge ra ǂhâba î da ǃanu. (Khomai re, 1 Petrub 1:15, 16.) Nēs ge ra ǂâibasen î da Jehovab ǀguiba ǀgoreǀî tsî ǁîba ǁnâuǀnam sida ǂgaob hoab ǀkha. Mâǃoahe da ga ra xawes tsîna. Dītsâ da ge nî î da Elob mîmādi tsî ǂhanugu ǃoagu ûi. ǂHanu xūna dīs ǃnâ-ū da ge sida ǃnâba ra ǃnâ kai tsî Jehovaba ǃgôasiba ra mā. (Mat. 5:14-16) ǃAnu khoen ase da ge sida ûiba da ra ûi ǀgauba nî ǁgau Jehovab ǂhanugu a ǃgâi ǃkhaisa. Tsî ǁGâuab ǂgā-amdi ama tamasa. Dīsā da ga ra o, o da ge nî ǃhausen tsî nî ūdawasen Jehovab ǃhui hâ xūna xu.—Psa. 79:9.
(1 Petrub 1:16) Xoamâihe hâ xuige: “ǃAnu, tita a ǃanu xuige,” ti.
lvs-E 77 ¶6
Mati da sida ǁkhoaxasiba nî ǁhûi ǀgaub
6 Jehovab ge ra mîba da: “ǃAnu, tita a ǃanu xuige.” (1 Petrub 1:14-16; 2 Petrub 3:11) Jehovab ge sida ǀgoreǀîsa ǃanu da ga o, o ǀgui nî ūǃoa. (Deuteronomium 15:21) Sida ǀgoreǀîs ge a ǃanu ǁoa Jehovab ǃhui hâ xūna da ga ra dī o. Aiǁgause, ǁgauoǃnâsib, ǂkhabadīb tsî demongu ǀkha dī xū-e ūhâs khami. (Romeǁîn 6:12-14; 8:13) Xawe nēs ge Jehovaba a ǂkhîoǃnâ kai ǁkhā, nēti ī xūn xa da ga ra ǁkhoaxabahe o. Nēs ge sida ǀgoreǀîsa a ǃanuo kai ǁkhā. Tsî Jehovab xa ūǃoahe tide tsî sida ǀhōsagusis Jehovab ǀkha da ūhâsa nî khôa.
Gagasi xūna ǀō-aisase ôaǃnâs
(1 Petrub 1:10-12) ǁÎ ǃgâiǃōsiba gu ge kēbo-aogu, sado ge hāba ǀkhommi xa gere kēboga ôa-am tsî ge dîǃgâ. 11 dîga ra ǃâ mâ tsî tareba ǁaeb aib ra ǁîgu ǃnâ hâ Gagab Xristub diba ǁgausa, Xristub ai nî hā tsâgu tsî ǁnās khaoǃgâ nî hā ǂkhaisib xa ge aiǀhûǀguitimîba. 12 o gu ge ge ǂhaiǂhaibahe, ǁî-aitsama tama i tsî gu nî sada ǃoabasa nē xūn, nēsi du ǀhomma xu ge sîhe ǃAnu Gagab ǃnâ ǃgâiǂhôasa gere aoǁnâgu xa ra ǂhôahen, ǁîn ǃnâ gu nî kōǂgâsa gu ǀhomǃgāga ǁkhore hâ.
w08-E 11/15 21 ¶10
Jakobub tsî Petrub ha kha di ǂkhanira xu ra mâǂoa xūn
1:10-12. ǀHomǃgāgu tsîn ge ǃgam amab Elob kēbo-aogu gere Xristeǁîn ǀhaohâb xa xoa xūn ǃnâ ǃgâiǃgâibasensa ge ūhâ i. Xawe nē xūn ge ge ǃgāsa Jehovab ge ǀhaohâb ǀkha sîsen tsoatsoa o. (Efe. 3:10) Sada tsîn ge ǀhomǃgāgu aiǁgausa a sao ǁkhā. Tsî “Elob di ǃgamsib ona” a ôaǃnâ ǁkhā.—1Kor. 2:10.
(1 Petrub 2:25) ǁHapuma ra gūse du ge ī, xawe du kom nēsi ǃhobasen hâo sadu ǀomdi di ǃÛi-aob tsî Mûǂamaob ǃoa.
it-2-E 565 ¶3
Mûǂam-aob
ǀGapi Mûǂam-aob. ǂGuro Petrub 2:25 ge Jesajab 53:6 sa xu ūhe hâ, “ǁhapuma ra gūse du ge ī,” dib ge Petruba ra mî: “Xawe du kom nēsi ǃhobasen hâo sadu ǀomdi di ǃÛi-aob tsî Mûǂamaob ǃoa.” Nē xoas ge Jehova Elob ǃoa ra ǁnaeǁgau. Petrub ge nēsa xoa o, on ge ǂguina Jesuba ge sao tama hâ i, xawe Jesub ǃnâ-ūn ge Jehova Elob ǃoa nî oa, khoen di Kai mûǂam-aoba. (Psa. 23:1; 80:1; Jer. 23:3; Ese. 34:12) Jehovab ge mûǂam-aoba hîna ôaǃnâ sîsenna ra dība. (Psa. 17:3) Nē ôaǃnâs (Gr., e·pi·sko·peʹ) tsîn ge Jehovab ǀgoraǃās ǃoas tsîna a ǁnaeǁgau ǁkhā. Aiǁgause, Jesub ǀhomi ǁkha oa hâ hîna ge Jerusalems ǀkha ī-i xa ǂâi re. Hamna Jerusalems di “ôaǃnâsa [Gr., e·pi·sko·pesʹ]” ge ǃgaoǃgâ tama hâ i. (Luk. 19:44) Nēs tsîn ge ǃgâi sîsenǂuiba ūhâ tsî ǁnās ǀkha Eloba ǂkhaisiba a ǁgau ǁkhā, ǁîb “ôaǃnâs [Gr., e·pi·sko·pesʹ]” tsēs ai.—1Pet. 2:12.
Elobmîs khomai ǃâs
(1 Petrub 1:1-16) Petruta, Jesub Xristub di apostelta. ǁNā ǃhaokhoen, Pontub tsî Galatiab tsî Kapadosiab tsî Asiab tsî Bitiniab ǃnâ ǀgaruǀgaruhe hân ǃoa, 2 Elob ǁGûb di aimûǂans ǃoa ǃkhōǂuihe hân, Gagab di ǃanuǃanusis ǃnâ, ǁnâuǀnamxasib tsî Jesub Xristub ǀaob di ǀgapi-ais ǃoa: A du ǀkhommi tsî ǂkhîb tsîkha ǂguiǂguibahe! 3 Ab karehe Elob tsî ǁGûb sada ǃKhūb Jesub Xristub dib, ǁîb di kai ǀkhomxaǂgaosiba ǃoa sada ǁkhawaǃnae kai hâba ûitsama ǃâubasens ǃoa, Jesub Xristub di ǁō hâna xu khâis ǀkha; 4 ǁgaoǁoasa tsî ǂnaoǂnaohe ǁoasa tsî ǃūǁoasa ǀumi-i, ǀhommi ǃnâ du sâubahe hâ-i ǃoa, 5 sadu, ǂgomsa xu Elob di ǀgaib ǃnâ ra sâuhedo ǁāǁāhe hâ ǃgâiǃōsib, ǀuni ǁaeb ai nîra ǂhaiǂhaiheba ǃoa. 6 ǁÎb ǃnâ du ra ǃgâiaǂgaob, sadu (ǂhâba i ga io) nēsi ǂkharirose ǂguiǃnâgu ǃâitsâdi ǃnâ ǃoa hâdo. 7 ǃÂitsâhe hâ ǂgoms âdu nî kā ra ǃhuniǀurib, ǀaes ǀkha ra ǃâitsâheb ǂamai ǃgomǀgausase hōhese, koas tsî kares tsî ǂkhaisib ǃoa, Jesub Xristub di ǂhaiǂhaisens ǃnâ; 8 ǁîba du mû tama xawe du ǀnam hâb; ǁîb ǃnâ du nēsis kōse du mû bi tama hâ xawe ǂgom hâse ra dâba ǃhoaǂuiheǁoasa tsî ǂkhaisa ǃgâiaǂgaob ǀkha, 9 sadu ǂgoms di ǀams ǀomdi ǃgâiǃōsib disa ra ūbēbasenǃâ. 10 ǁÎ ǃgâiǃōsiba gu ge kēbo-aogu, sado ge hāba ǀkhommi xa gere kēboga ôa-am tsî ge dîǃgâ; 11 dîǃgâ raǃâ, mâ tsî tarebe ǁaeb aib ra ǁîgu ǃnâ hâ Gagab Xristub diba ǁgausa, Xristub ai nî hā tsâgu tsî ǁnās khaoǃgâ nî hā ǂkhaisib xa ge aiǀhûǀguitimîba; 12 o gu ge ge ǂhaiǂhaibahe, ǁî-aitsama tama i tsî gu nî sada ǃoabasa nē xūn, nēsi du ǀhomma xu ge sîhe ǃAnu Gagab ǃnâ ǃgâiǂhôasa gere aoǁnâgu xa ra ǂhôahen; ǁîn ǃnâ gu nî kōǂgâsa gu ǀhomǃgāga ǁkhore hâ. 13 ǁNā-amaga kamanagu sadu ǁnâuǃāb diga ǃgae, î ǂkhaikari hâ, î hoaragase ǂgomaiǂnûi ǁnā ǀkhommi, Jesub Xristub di ǂhaiǂhaisens ǃnâ du ra ūhâbaheb ai; 14 î ǁnâuǀnamxa ǀgôadu ase tā ǀguiti-īkaisen aibe du ǀūǂams ǃnâ ge ī i tura-aigu ǃoa; 15 î du sado ge ǂgaib a ǃanus ǁkhās khami sado ǁkhāti ǃanu sadu tanisens hoas ǃnâ. 16 Xoamâihe hâ xuige: “ǃAnu, tita a ǃanu xuige,” ti.
OKTOBERI 21-27
ELOBMISA XU HÂ ǂÛǂÛSA MÎDI | 1 PETRUB 3-5
“ǀAms xūn hoan dis go ǀgū”
(1 Petrub 4:7) Tsî ǀams xūn hoan dis go ǀgū. ǀKhaiǃnâse hâ re, î ǂkhaikari hâ re ǀgoresa ǃoa.
w13-E 11/15 3 ¶1
“ǀKhaiǃnâse hâ re, î ǂkhaikari hâ re ǀgoresa ǃoa”
“ǁGOAS nî hās aiǃâ ǂkhaikarise hâs ge kaise a ǃgom,” dib ge ǀgui sîsen-aoba ra mî. ǀNîn hîna ǃuia ǂkhaikarise ra hân tsîn ge ǁnāsa ra ǃkhō-am. Nētsēs tsînan ge Xristeǁîna ǁGâuab gaxu ǃuis ǃnâ ǁkhā xū-e ra hōǃâ. Nē ǃhūbaib ge kaise a ǃkhae. (Rom. 13:12) Matikōse i nî ǁkhōǁkhōsa ǀuniga iri ǃnâ ǁomsa. Kaise i ge a ǂhâǂhâsa “ǀkhaiǃnâse hâ” tsî da nî ‘ǂkhaikari hâsa tsî nî ǀgoresa.’—1Pet. 4:7.
(1 Petrub 4:8) Î du hoan ǂamai ǀaexa ǀnamguba ūhâ; ǀnammi ra ǁoren di ǂguiba ǃgū-ai xuige.
w99-E 4/15 22 ¶3
Mati da gagasi ǂkhabusasiba nî mûǂan tsî nî dan
ǂÂis ǃnâ apostel Petrub ǀapemāsa ūhâ re: “ǀAms xūn hoan dis go ǀgū. ǀKhaiǃnâse hâ re, î ǂkhaikari hâ re ǀgoresa ǃoa. Î du hoan ǂamai ǀaexa ǀnamguba ūhâ; ǀnammi ra ǁoren di ǂguiba ǃgū-ai xuige.” (1 Petrub 4:7, 8) Kaise i ge a supu ǀnî ǃgâsan di ǂkhabusasib tsî sida dib tsîna sida ǂgaob tsî ǂâis ǀkha ūsa. Xawe ǁnās ge a ǃnôa kai da ǁkhā. Tsî ǁGâuab ge ǁnāsa a ǂan. ǁNā-amaga da ge ǃhaese tsūdīhe da ga ra o, o ǀnammi ǀkha tsūdība nî ǃgū-ai. Tsî ‘î da ǁGâuaba tā ǃkhai-e mā.’—Efeseǁîn 4:25-27.
(1 Petrub 4:9) Sâuǀnamgu [ǃhaokhoeǃkhōǃoaxa] du re ǀaras ose.
ǃGâi ǀgaub ǃhaokhoeǃkhōǃoas—dib ge kaise a ǂhâǂhâsa!
2 Petrub ge ǁîb ǃgâsana hoan ǂam-ai ge a ǂkhâǃnâ: “Sâuǀnamgu” [ǃhaokhoeǃkhōǃoaxa]. (1Pet. 4:9) Nē mîs “ǃhaokhoeǃkhōǃoaxa” di hâs ge Grikegowab ǃnâ “khoexaǃnâsiba ǃhaokhoena ǁgau” di ra ǂâibasen. Xaweb ge Petruba nēs ǂam-ai ge mî î da sida Xristeǁî ǃgâsan ǃoagu “sâuǀnamgu,” [ǃhaokhoeǃkhōǃoaxa] nēn ge ǀnai da ǀguiba ra hâ ǀhao-ū khoen tsîna ǃkhōǂgā hâ. ǃHaokhoeǃkhōǃoaxasiba mati ra hui nî?
3 Nēs ge ǁîna nî ǀguiǃnâxa kai. Sadu aiǁgaus xa ǂâi re. Khoe-i di omsa ǃoa ǁkhauhe tsâ î du hâ? ǁNā ǁkhauǂuisa ǃgâi ǂâidi ǀkha xu du tama hâ? Sadu ǀhaohâb ǃnâ hâ ǃgâsa-i ǀkha du ge ǁkhoaxa ǁaeba ūhâ i ǃkhaisa, sadu ǀhōsasisa ǁî-i ǀkha ǀgaiǀgai tama hâ? ǃHaokhoeǃkhōǃoaxasib ge ra hui da î da sida ǃgâsana ǃgâise ǂan ǁkhā. Petrub tsēdi ǃnâ ge hâ i Xristeǁîn ge ǀguiba gere hâǀhao, ǁîn mâsib ge ǃgâi tama hâ i amaga. ǁNās tsîn ge a ama sada hîna “ǀuni tsēdi” ǃnâ ûi hâ da ǃgao.—2Tim. 3:1.
Gagasi xūna ǀō-aisase ôaǃnâs
(1 Petrub 3:19, 20) ǁÎs ǃnâb ge ǁkhāti ǃgûsī, tsî ǃkhō-oms ǃnâ hâ gagade gere aoǁnâba. 20 ǁnādi aiga ǁnâuǀnam tama ge ide, Elob di ǃnūǃnâxasib Noaxi tsēdi ai gere ǃâuo, arki gere ǁāǁāhe ǃnubai, ǁîb ǃnâ di ge ǀorodi, ǁnādi ge ǁkhaisa ǀomde, ǁgamma xu ge sâuhe.
w13-E 6/15 23
Khomai-aon dîdi
Elobmîs ge ra mî, Jesub ge “ǃkhō-oms ǃnâ hâ gagade” ge aoǁnâba. (1Pet. 3:19) ǁNāsa tae-e ra ǂâibasen?
▪ Petrub ge nē gagana ‘Elob di ǃnūǃnâxasib Noaxi tsēdi ai gere ǃâu’ ǁaeb ǃnâ ge hâ în ǃoa ra ǁnaeǁgau. (1Pet. 3:20) ǃGāsa as ge Petrub ge ǀhomǃgāgu hîna ge ǁGâuab ǀkhāb ai a mâgu xa ra ǃhoa. Judab tsîn ge nē ǀhomǃgāgu hîna “ǁîgu di ǂnûiǂgāde ǃkhōǀgaipe tamagu, tsî ǁîgu di hâǃkhais ǂûsa ge ǁnāxūgu” xa ra ǃhoa. Tsîb ge ra mî, ǁîgu ‘ge ǀamo ǃgae-ūdan ǀkha ǃkhaenab ǃnâ kaitsēs di ǀgoraǃgâsa ge sâubahe.’—Judab 6.
Mâ ǀgaub ǃnâ gu ge nē ǀhomǃgāga Noaxi tsēdi ǃnâ ǁnauǀnamoǃnâ ī? Kai ǁgammi dâus aiǃâgu ge nē ǀhomǃgāga khoesi sorodi ǃnâ ge ǀkharaǀkharasen tsî ǁnāsab ge Eloba ge mā-am tama hâ i. (Gen. 6:2, 4) ǁNā ǀhomǃgāgu ge tarekhoedi ǀkha sorosise gere ǂharugu tsî ǁnās ge ge ǃgâi tama hâ i. Elob ge ǀhomǃgāga kuru tama hâ îgu tarekhoedi ǀkha sorosise ǂharugu. (Gen. 5:2) Nē ǁnâuǀnamoǃnâ ǀhomǃgāgu ge nî dīkākāhe Elob xa. Judab ge mî khami gu ge “ǃkhaenab” ǃnâ hâ, gagasi ǃkhō-oms ǃnâ.
Mâǁae tsî matib ge Jesuba nē “ǃkhō-oms ǃnâ hâ gagade” aoǁnâba? Petrub ge ra mî nēs ge Jesub ge ‘Gagasi’ khâisa a hō o, o ge a ī. (1Pet. 3:18, 19) Mû du go, Petrub ge ra mî Jesub ge ‘aoǁnâ’ ǃkhaisa. Petrub nî ǁîb ǂguro sîǂkhanisa xoas aiǃâs ge ǁnā ǃnaeǃkhaisa ge ī. Jesub ge ǁōba xub ge khâi toas khaoǃgâ nē gagade ge ǂanǂan ǁkharab hîna gu nî hōb xa. Nē aoǁnâs ge ǁîga ǃâubasen-e ge mā tama hâ i. ǀGoraǃgâs aoǁnâ ge îs ge. (Jonab 1:1, 2) Jesub ge ǁîb ǂgoms tsî ǂgomǂgomsasib tsîna ǁōb kōse ge ǁgau tsî khâisa ge hō. Tsî ǁnās ǀkha ge ǁgau ǁGâuab ǃkhō ǃkhai-e ǁîb ai ūhâ tama hâsa. ǀNî mîdi ǃnâb ge Jesuba ǃgaoǃgaoba ge ūhâ i, ǁnāsa dīsa.—Johaneb 14:30; 16:8-11.
Hānîǁaeb ǃnâb ge Jesuba ǁGâuab tsî ǁîb ǀhomǃgāgu tsîna ǃkhō-oms khami ī mâsib ǃnâ nî ǂgā. (Lukab 8:30, 31; J.ǂHa. 20:1-3) ǁNā ǁaeb nî hās kōse gu ge nē ǁnâuǀnamoǃnâ ǀhomǃgāga gagasi ǃkhaenab ǃnâ nî hâ tsî ǁîgu dīkākāhes ge nî ama ī.—J.ǂHa. 20:7-10.
(1 Petrub 4:6) Nēs ǃoas ge ǃgâiǂhôasa ǁō hân tsîna aoǁnâbahe xui-ao, ǁgans ǃnâ hâ khoesib ǃoan ga ǀgoraǃgâhe xawen nî gagas ǃnâ Eloba ûibaga.
w08-E 11/15 21 ¶8
Jakobub tsî Petrub ha kha di ǂkhanira xu ra mâǂoa xūn
4:6—“ǁŌ hân” hîna ge “ǃgâiǂhôasa” a aoǁnâbahena ge ham i? Nēn ge ǁnān hîna ge ǁîn “ǃûǂamdi tsî ǁoren tsîn” ǃnâ a ǁō hâna. Tamas ka io gagasise a ǁō hâna, ǃgâiǂhôasan nî ǁnâus aiǃâ. (Efe. 2:1) ǃGâiǂhôas ǃnân ge ǂgom tsoatsoa o, on ge ǁkhawa gagasise ge ‘ûi.’
Elobmîs khomai ǃâs
(1 Petrub 3:8-22) Î du ǀams ai sadu hoado ǀguiǂâixa, ǀkhomxa, ǃgâsaǀnamxa, ǀkhomxaǃnâ, ǃgamǃgamsenxa, 9 tā ǂkhaba-e ǂkhaba-i ama mādawa, tsî ǀaumî-e ǀaumî-i ama; î du ǁnās ǃoagu ǀkhae, î ǂan, ǀkhaeba ǀumis ǃoa du ge ǂgaihe ǃkhaisa. 10 Ûiba ǀnam tsî ga ǃgâi tsēde mû ǂgao-e, a-i ǁî-i di namsa ǂkhababa xu ǃnōǃnō, tsî ǁî-i di amǁgaukha, î kha tā gāxaǃnâ; 11 a-i ǂkhababa xu ǂgō, î-i ǃgâiba dī; a-i ǂkhîba ôa, î-i ǁîba sauruǃgon, 12 ǃKhūb di mûra ge ǂhanu-ain ai hâ, tsî ǁîb di ǂgaera ǀgores ân ai xuige; xawe ǃKhūb di ais ge ǂkhababa ra dīn ǃoagu hâ. 13 Tsî tari-e kha sado ǂkhôa-e a dī ǁkhā, ǃgâib di ǁgaeǁgae-ao du kao? 14 Tsî ǂhanu-aisib ǃaroma du ga tsâ xawe du ge a ǃgâiǃō. ǁÎn di ǃaoǃaosa tā ǃao, î du tā ǃhuri. 15 Î du ǃKhūb Eloba sadu ǂgaogu ǃnâ ǃanuǃanu. Î du hugaǀgui ǂhomisen hâ, sadu ǃnâ hâ ǃâubasens xa ga ǃereamsa ǂgaoǀkhā du-i hoa-e ǃereamsa māsa, tsamtsiǃnâsib tsî ǃaob tsîkha ǀkha. 16 Î du ǃgâi ǂâisa ūhâ, în taotaohe, sadu xan ga ǂkhabadī-aodu axase ǀhoeo, ǁnān sadu ǃgâi tanisens Xristub ǃnâ hâsa ra ǃkhāǃkhāna. 17 ǁNās ǃgâ-ai i kom a ǃgâio, Elob di ǂâis karao, ǃgâidī rase du nî tsâsa, ǂkhabadī rase tsâs xa. 18 Xristub on ge ǀgui ǃnāsa sada ǁoren ǃaroma ǁō xui-ao, ǁîb ǂhanu-aiba ǂhanuoǃnân ǃaroma, Elob tawab nî sada ūsīga; tsî ǁgans ǃnâb ge ǃgamhe, xaweb ge Gagas ǃnâ ge ûi-ûihe; 19 ǁîs ǃnâb ge ǁkhāti ǃgûsī, tsî ǃkhō-oms ǃnâ hâ gagade gere aoǁnâba, 20 ǁnādi aiga ǁnâuǀnam tama ge ide, Elob di ǃnūǃnâxasib Noaxi tsēdi ai gere ǃâuo, arki gere ǁāǁāhe ǃnubai, ǁîb ǃnâ di ge ǀorodi, ǁnādi ge ǁkhaisa ǀomde, ǁgamma xu ge sâuhe; 21 ǁîb ǃoas ge ǁāǁnâs sada nēsi ra ǃgâiǃō kaisa, ǁîs sorosi ǀurixasib di ǁguiǁnâ tamas, xawe a ǃgâi ǂâis di turab Elobǀî, Jesub Xristub di khâisa xu; 22 ǁîb Elob amǀkhāb ǁôab tawa hâb, ǀhommi ǃoa ge ǃapab, ǀhomǃgāgu tsî ǀgaigu tsî ǁkhāsigu tsîgu ǁîb ǃnaga dīhe hâba.
OKTOBERI 28–NOVEMBERI 3
ELOBMISA XU HÂ ǂÛǂÛSA MÎDI | 2 PETRUB 1-3
“ǃÂu î du ǃnoeaǂgao ǃKhūb [Jehovab, NW] hās di tsēsa”
(2 Petrub 3:9, 10) ǃKhūb ge mîmâis ǀkha ǀhape tama hâ (ǀnîn ǁîsa ǀhapes ase ūhâ khami) tsîb ge a ǃnūǃnâxaba da, tsîb ǂgao tama, khoe-i nî kāǁōsa, xawen nî hoan ǃhobasen ǃkhaisa. 10 tsîs ge ǃKhūb di tsēsa ǃnari-ao-i tsuxuba ra hā-i khami nîra hā, ǁîs ai ǀhomga ǂkhupib ǀkha nîra ǃgû-īs, tsî hoa xūn ǀgammi xa nîra tsuni, tsî ǃhūbaib tsî ǁîs ai hâ sîsengu nîra khauǃkhūba.
w06-E 12/15 27 ¶11
Jehovab ge xūna ra “ǂhanuǂhanuba”
11 Mati da ra ǁnâuǃā, Jesub ra mî ǃkhaisa, Jehovab ge ‘ǃhaese’ xūna nî ǂhanuǂhanu? Elobmîs ge ra mî: “ǃKhūb [Jehovab, NW] ge mîmâis ǀkha ǀhape tama hâ.” (Lukab 18:7, 8; 2 Petrub 3:9, 10) Kai ǁgammi dâus ge Noaxi tsēdi ǃnâ ǁgai khoena ge dīkākā, mîmâisa ǁaeb ai. ǁNās ǁkhās khami i ge Loti tsēdi ǃnâ ǀaesa ǀhomma xu hā o, on ge ǁgai khoen ǀguina ge dīkākāhe. Jesub ge ge mî: “ǁNās ǁkhās xase i ge Khoen Ôab nî ǂhaiǂhaisen tsēs ai nîra ī.” (Lukab 17:27-30) ǁGai khoen ge ǁkhawa sida ǁaeb ǃnâ ‘ǃhaese’ nî dīkākāhe. (1 Tesalonikaǁîn 5:2, 3) ǂGomǃgâsiba da ge a ūhâ ǁkhā, Jehovab ge ǁGâuab ǂgaeǂguisa ǀhapese mā-am tide îs aiǃgû, ǂhâbasa i as xa.
(2 Petrub 3:11, 12) Tsî nē xūn hoan ga kāo, mati īse du kha ǃanu tanisens tsî eloǃaoǃgâxasib ǃnâ ga ī? 12 ǃâu î du ǃnoeaǂgao ǃKhūb hās di tsēsa, ǁîs ai gu ǀhomga ǀaes xa ra khause nîra kās, tsî hoa xūn ǀgammi xanîra tsunisa.
w06-E 12/15 19 ¶18
“Kaitsēs ǃKhūb dis ge a ǀgū”
18 Buruburuxa tama hâ ǃkhais ge apostel Petrub ra hōhōǃnâ dasa î da “ǃKhūb [Jehovab, NW] hās di tsēsa” ǂâis ǃnâ ūhâ. Mati da ǁnāsa a dī ǁkhā? ǀGui ǀgaub ge “ǃanu tanisens tsî eloǃaoǃgâxasib” xūn ǃnâ ǁhaosa. (2 Petrub 3:11, 12) Gagasi xūn ǃnâ ǁhaos ge nî hui da î da “ǃKhūb [Jehovab, NW] hās di tsēsa” ǂâis ǃnâ ūhâ. Grikegowab mîs “ǃnoeaǂgao” di hâs ge “ǃhaese” di ra ǂâibasen. Xawe khoe da ase da ge Jehovab tsēsa ǃhaese a hā kai ǁoa. Xawe ǁnā tsēsa da ǃâu hâ hînab ge ǁaeba kaise ǃhaese nî ǃkharu Elob sîsen gu ǃnâ da ǀhape hîna.—1 Korinteǁîn 15:58.
Gagasi xūna ǀō-aisase ôaǃnâs
(2 Petrub 1:19) O da ge ǁnās ǃgâ-ai kēbosi mîsa ǁaposase ūhâ; tsî du ga ǃgâise dī, ǁîsa du ga ǃgaoǃgâo, ǃkhae ǃkhai-i ai ra ǃnâ ǃamamǀae-i axase, ǁgoas nî ǃnâ tsîs nî ǁgoaǀgamirosa sadu ǂgaogu ǃnâ ǁhais kōse.
w08-E 11/15 22 ¶2
Jakobub tsî Petrub ha kha di ǂkhanira xu ra mâǂoa xūn
1:19—“ǁGoaǀgamirosa” a ham, mâǁaes ge ǂoaxa tsî mati da a ǂan nēs ge ama īsa? “ǁGoaǀgamiros” ge Jesub Xristub hîna Gaosib ǀgaiba ūhâb ǃoa ra ǁnaeǁgau. (J.ǂHa. 22:16) 1914ǁÎ kurib ǃnâb ge Jesuba hoa kurusaben aiǃâ Gao-aob ase ge ǁgaumâihe. ǁNās ǀkhab ge ǁGoaǀgamiros ase ra ǂanǃgâhe. Kēbos ge Jesub ǂkhaisib tsî Gaosib ǀgaib tsîkha ra ǁgau. Nēs ge ra ǁgau Elobmîs matikōse a ǂgomǂgomsa ǃkhaisa. Kēbode ôaǃnâs ge sida ǂgaoga ra ǃnâǃnâ tsî da ge ǁnās ǀkha ra ǂanǂanhe ǁGoaǀgamiros ra ǂoaxa ǃkhaisa.
(2 Petrub 2:4) Elob ge ǁore ge ǀhomǃgāga sâu tama is ǁkhās xase, tsîb ge ǁîga ǃkhaenab di ādi ǃnâ ǀamo ǀaeb ǃnâ gu nî ǂhāǁgôahesa māǁnâs ǁkhās xase, ǀgoraǃgâs ǃoa gu nî sâuhega.
w08-E 11/15 22 ¶3
Jakobub tsî Petrub ha kha di ǂkhanira xu ra mâǂoa xūn
2:4—“Tartarus” tamas ka io ‘ǃkhaenab di āde’ a tae tsî Jehovaba ge mâǃoa ǀhomǃgāga mâǁae ǁnāpa ge aoǂgāhe? Nē ǃkhaenab ādi ge ǃkho-oms khami ī mâsib hînan gagasi kurusaben ǀguina ra ǂgāheba, khoen ose. Nēs ge ǁîga Elob di ǃnâba xu ǁîga ra ǁkhae. ǀHomǃgāgu hîna ǃkhaenab ādi ǃnâ hâgu ge ǃâubasen-e ūhâ tama hâ, hānîǁaeb ǃgao. Elob ge Noaxi tsēdi ǃnâ ge ǁnâuǀnamoǃnâ ǀhomǃgāga ǃkhaenab ādi ǃnâ ge ǂgā. Tsî ǁîgu ge ǁnapa nî hâ, dīkākāhe gu nî tsēs kōse.
Elobmîs khomai ǃâs
(2 Petrub 1:1-15) Simon Petruta, Jesub Xristub di ǃgā tsî apostelta, ǁnān sige ǀkha sada Elob tsî ǃGâiǃōdī-aob Jesub Xristub di ǂhanu-aisib ǃnâ ǁkhā ǃgâi ǂgomsa ge hōn ǃoa: 2 ǀKhommi tsî ǂkhîb tsîkha a kha sado ǂguiǂguibahe Elob tsî Jesub sada ǃKhūb di ǂans ǃnâ. 3 ǁÎb di elosi ǀgaib ge ûib tsî eloǃgâiǃōsib ǃoa harebe hân hoana ǀkhae da khami, ǁnāb, ǁîb di ǂkhaisib tsî ǁkhāsib ǀkha ge ǂgai dab di ǂansa xu, 4 ǁîba xu di hoan xa kai tsî ǀgapiǃgôahesa mîmâide sada ǀkhaehe hâb, ǁîde xu du nî elosi ǂūsib ǃnâ amǃnâxase, ǃhūbaib di turagu ǃnâ hâ kāǁōsiba du ga ǁhâxūo: 5 ǁÎs ǁkhāsa ǃoa ǁnâi ôasasib hoaba dī, î du sadu ǂgoms tawa ǃgâi ǂūba ǀaro, tsî ǃgâi ǂūb tawa ǂans, 6 tsî ǂans tawa ǁkhaesens, tsî ǁkhaesens tawa taniǀnamxasib, tsî taniǀnamxasib tawa eloǃaoǃgâxasib, 7 tsî eloǃaoǃgâxasib tawa ǃgâsaǀnamgus tsî ǃgâsaǀnamgus tawa ǀnamma hoan ǃoa. 8 Nē xūn ga sadu tawa hâ tsîn ga ǃnā, on kom ǀopesase tsî ǂûtanioǃnâse hâ kai du tideo sada ǃKhūb Jesub Xristub di ǂans ǃnâ; 9 xawe nē xūn ǁî-i ǃnâ hâ tama-i, ǁnā-i ge ǂgī hâ, tsî ǃnūse mû tama, tsî aibekam ǁoren di ǃanuǃanusisa ra ǀuru. 10 ǁNā-amaga, ǃgâsado, ǁnās ǃgâ-ai ôasa, sadu di ǂgaihes tsî ǃkhōǂuibasenhesa du nî ǁapoǁaposa; nēna du ga dīo, o du kom tātsē ǃnôa tideo. 11 O du ge ǁnāti ǃkhū hâse nîra ǀarobahe sada ǃKhūb tsî ǃGâiǃōdī-aob Jesub Xristub di ǀamo gaosib ǃnâ ǂgâsa. 12 ǁNā-amaga ta ǀhawe tide, sado ta nî hugaǀgui nēn xa ǂâiǂâiǃnâ, ǁîna du a ǂan, tsî hâ a amab ǃnâ du ǀgaiǀgaihe hâ xawe. 13 Tsî ta nēsa ǂhanuse ūhâ, nē tabernakeli ǃnâ ta nî hâs kōse ta nî ǁnamas ǀkha ǂkhaiǂkhai du ǃkhaisa; 14 ǂan ta a xui-ao, ǃhaese ta nî ti tabernakela ǁguiǁnâsa, sada ǃKhūb Jesub Xristub ge ǁkhāti ǂhaiǂhaiba te khami. 15 O ta ge nî ôasa, î du ga ǁkhāti ti ǃgûǂoas khaoǃgâ hugaǀgui nē xūn xa ǂâiǂâisensa ūhâ.