ǁNaeǁgaudi Sida Xristeǁî ûib tsî aoǁnâ sîsenni sîsen ǂkhanib
NOVEMBERI 4-10
ELOBMÎSA XU HÂ ǂÛǂÛSA MÎDI | 1 JOHANEB 1-5
“Tā ǀnam ǃhūbaib karao, ǃhūbaib ai hân karao”
(1 Johaneb 2:15, 16) Tā ǀnam ǃhūbaib karao, ǃhūbaib ai hân karao; khoe-i ga ǃhūbaiba ǀnamo, ǁî-i ǃnâb ge ǁgûb di ǀnamma hâ tama hâ; 16 ǃhūbaib ai hân hoan, ǁgans di turab kas, mûdi di turab kas, ûib di kaikaisens kas hoas ǁGûba xu hâ tama i tsî ǃhūbaiba xu hâ xuige.
w05-E 1/1 10 ¶13
Jesub ge ǃgoroba da aiǁgausa ǀûs ose sao-ai
13 ǃHūbaib ǃnâ hâ xūn hoan tsū tama din ge ǀnî khoena ra ǂâi. Nēs ga ama, xawe i ge ǃhūbaib tsî ǁîb ǃnâ hâ ǁkhoaxa xūna Jehovaba xu a nanabē da ǁkhā. Tsî ǃhūbaib di xūn ge hukas tsîna Jehovab ǀkha da ūhâ ǀhōsagusisa ǀgaiǀgai tide. ǁNā-amaga da ge kaise ǁkhōǁkhōsa mâsib ǃnâ ra mâisen. ǃHūbaib di xūna da ga ǀnam tsoatsoa o, ǁnā xūn ga tsū tama i xawe. (1 Timoteub 6:9, 10) Sopisob ge ǃhūbaiba kai-amse ǁgai xūn xa ǀoa hâ, tsî sida a ǂgaeǂhapu ǁkhā. Muvin tsî Tvs ai ra ǀhuru xūn hîna ǃkhams, mari ǀnams tamas ka io ǀaiba ra ǃkhōǃkhōna da ga kō o, o da ge ǁaeb ǀkha nē xūna ǁnaeti tsî ega nî ǃâitsâhe. Khoen hîna ǁîn ûi ǀgaub tsî mari-e kurus ai ǂâisa ǂnûi hân ǀkha da ga hâ o, on ge nē xūna sida tsîna nî ǂhâǂhâsaba.—Mateub 6:24; 1 Korinteǁîn 15:33.
(1 Johaneb 2:17) Tsî ǃhūbaib ge ra ǃgû-ī turab âb ǀkha; xawe Elob ǂâisa ra dī-i ge ǀamosib kōse ra hâ-e.
w13-E 8/15 27 ¶18
ǂÂi re, mâ ǃnôa khoe du nîsa
18 Johaneb mîdi: “Tsî ǃhūbaib ge ra ǃgû-ī turab âb ǀkha; xawe Elob ǂâisa ra dī-i ge ǀamosib kōse ra hâ-e” di hâdi ge ‘ǃhūbaib ai hâ’ xūna xu ǃnūse hâs ǀkha ra huida. (1 Johaneb 2:17) Satanni ǃhūbaib ge hâhâ nî khama ra mûsen. Xawe i ge ǀgui tsē nî dīkākāhe. Satanni ǃhūbaib ǃnâ da ra hō xūn hoan ge hâhâ tide. Nēsa da ga ǂâis ǃnâ ūhâ o, o da ge ǁGâuab ǃâitsâgu xa nanahe tide.
Gagasi xūna ǀō-aisase ôaǃnâs
(1 Johaneb 2:7, 8) ǃGâsado, ǀasa mîmā-e ta xoaba du tama, xawe ǀoro mîmā-i, tsoatsoasa xu du ge ūhâ i-e; nē ǀoro mîmās ge ǁnā mîs, tsoatsoasa xu du ge ǁnâusa. 8 ǁKhawa ta ge ǀasa mîmā-i, ǁîb ǃnâ tsî ǁkhāti sadu ǃnâ a ama-ai-e ra xoaba du; ǃkhaenab ra ǃgû-ī tsî ǀnaib ama-ai ǃnâba ra ǀkhâu xui-ao.
w13-E 9/15 10 ¶14
Jehovab di ǂâiǂâiǃnâde da ge a ǂgomǃgâ ǁkhā
14 ǀGamǁî testaments ǃnâ da ge ǂgui ǃnāde ra hōhōǃnâhe î da ǀnamma ūhâbagu. Jesub ge ge mî: “Sa ǀgūkhoebats ge nî ǀnam sats ǁkhāts khami” di hâ mîmās ge ǀgamǁî kai mîmāsa di. (Mat. 22:39) ǁKhā ǀgaub ǃnâb ge Jakobub, Jesub di stief ǃgâsaba, ǀnamma ‘gao-aosi ǂhanub’ di ge ǂgai. (Jak. 2:8) Johaneb ge ge xoa: “ǃGâsado, ǀasa mîmā-e ta xoaba du tama, xawe ǀoro mîmā-i, tsoatsoasa xu du ge ūhâ i-e.” (1 Johaneb 2:7, 8) “ǀOro mîmā-i” dib ge mî, ob ge Johaneba tae-i ǃoa gere ǁnaeǁgau? ǀNammi di mîmās xab ge gere ǃhoa. Jesub ge nē mîmāsa kurigu ǃkharu hâse ge mā, “tsoatsoasa xu,” ǁnā-amagas ge “ǀoro” ti ra mîhe. ǁKhā ǁaeb ais ge “ǀasa” ti ra mîhe, ǃgom mâsigu hîna noxoba nî hâ gu ǃnân ǁkhāǁkhāsabena nē ǀnamma nî ūhâbaguse i xui-ao. Jesub di ǁkhāǁkhāsaben ase da ge nē hōhōǃnâde kaise ra ǃgôaǃgâ. ǁÎdi huib ǀkha da ge nē ǃhūbaib ǃnân khoena ūhâ ǂūba xu ra ǂgōsen, sida ǀgūkhoeba da ūba hâ ǀnamma a ǃkhai kai ǁkhāba.
(1 Johaneb 5:16, 17) Khoe-i ga ǁî-i ǃgâsab tawa mûo, ǁore-i ǁōba anu tama-eb ra ǁore ǃkhaisa, a-i Eloba ǀgore, ob ge ûiba nî mā bi, ǁnān ǁōba anu tamase ra ǁorena. ǁOre-i ge hâ, ǁōba anu hâ-e, ǁî-i nî ǀgorebahesa ta mî tama. 17 ǂHanuoǃnâsi-i hoa-i ge a ǁore; tsî i ge ǁore-i, ǁōba anu tama-e hâ.
it-1-E 862 ¶5
ǀÛbab
ǂHâbasa i ge a ǃgâsan Elob xa nî ǀûbahesa da nî ǀgoreba ǃkhaisa. Hoa ǀhaohâb tsîna du ge a ǀgoreba ǁkhā. Moseb ge ǁkhā xū-e ge dī, Israelǁaes di ǁorenab ge Jehovab aisi sī-ū tsî ǀûbaba gere ǂganba nî o. Jehovab ge ǁÎba ge ǁnâu-am. (Num. 14:19, 20) Tempeli gere māǁnâhe o, ob ge Salomoba ge ǀgore îb Jehovaba ǁÎb khoena ǀûba, dīsā tsîn ga ǁîba xu a dawasen o. (1Gao. 8:30, 33-40, 46-52) Esrab ge Jodeǁîna ra ǂnûǁkhaebase ǁîn ǁorena Jehovab aisi ge ǁguiǁnā. ǂGaoba xub ge ǀgore tsî Jehovaba a ǀkhoma os ge Israelǁaesa tsâǀkhāhe tsî Jehovab ǀûbaba ge ôa tsoatsoa. (Esr. 9:13–10:4, 10-19, 44) Jakobub ge gagasise ǂkhabu hâna ge ǂkhâǃnâ în ǀhaohâb ǃûi-aoga ǂgai tsî ǀgorebahe, “ǁorena i ga dī hâ io, o i ge ǁîna nî ǀûbahe.” (Jak. 5:14-16) Xawe, “ǁore-i ge hâ, ǁōba anu hâ-e.” Nēs ge ǃanu gagab ǃoa-ai ǁoresa, ǂanabega ǁoreb hîna ǀûbahe ǁoaba. ǃGâsa-i hîna ǃanu gagab ǃoa-ai ra ǁore-e da ge tā nî ǀgoreba.—1Jhn. 5:16; Mat. 12:31; Heb. 10:26, 27; mû re ǁOREB, I;GAGAB.
Elobmîs khomai ǃâs
(1 Johaneb 1:1–2:6) Tsoatsoasa xu ge hâ i-i, ǁnâu ge ge i, sige mûdi ǀkha ge ge mû-i, ǃgapaǀî ge ge-i, tsî sige ǃomgu ǀkha ge ge tsâǀkhā-i, ûib di mîs xa: 2 (Tsîb ge ûiba ge ǂhai, tsî ge ge mû, tsî ge ge ra ǃkhō-am tsî aoǁnâ du ǁnā ǀamo ûib, ǁGûb tawa ge hâ ib tsî sige ge ǂhaiǂhaibaheba). 3 Mû tsî ge ge ǁnâu-i, ǁnā-e ge ge sige sado ra aoǁnâba, sadu on nî sige ǀkha amǃnâxasiba ūhâga; îb sada amǃnâxasiba ǁkhāti ī ǁGûb ǀkha tsî ǁîb di Ôab Jesub Xristub ǀkha. 4 Tsî ge ge nēna ra xoaba du, sadu di ǃgâiaǂgaob nî ǀoaga. 5 Tsî nēs ge ǂhôas, ǁîsa ge ǁîba xu ǁnâu tsî sado ra aoǁnâbasa, Elob a ǃnâ, tsî ǃkhaena-i xare-i ǁîb ǃnâ hâ tamasa. 6 ǁÎb ǀkha da amǃnâxasiba ūhâ, ti da ga mîo, tsî da ga ǃkhaenab ǃnâ ǃgûo, o da ge ra ǂhumi, o da ge amaba dī tama hâ; 7 xawe ǃnâb ǃnâ da ga ǃgûo, ǁîb ǃnâb ǃnâ hâs ǁkhās xase, o da ge amǃnâxasiba ūhâǀîgu hâ; tsî ǀaob Jesub Xristub ǁîb Ôab dib ge ǁoren hoana xu ra ǃanuǃanu da. 8 ǁOre-i xare-e da ūhâ tama, ti da ga mîo, o da ge ǁî-aitsama ra ǂgaeǂhapusen, ob ge amaba sada ǃnâ hâ tama hâ. 9 Sada ǁorena da ga ǁguiǁnâo, ob ge a ǂgomǂgomsa tsî ǂhanu-ai, ob ge sada ǁorena ra ǀûba da tsî ǂhanuoǃnâsib hoaba xu ra ǃanuǃanu da. 10 Tsî ǁore tama da hâ, ti da ga mîo, o da ge ǁîba ǂhumi-aose ra dī, os ge ǁîb di mîsa sada ǃnâ hâ tama hâ.
2 Ti ôarodo, nēna ta ge ra xoaba du, ǁore du tidega. Tsî khoe-i ga ǁore xawe da ge ǁGûb tawa aigowaba-aoba ūhâ: Jesub Xristub ǂhanu-aiba. 2 Tsî ǁîb ge ǂkhîbagus sada ǁoren dis di; tsî sada din ǀguin di tama, tsîb ge a ǁkhāti ǃhūbaib hoab din di ǂkhîbagu. 3 Tsî nēsa da ge a ǂan, ǁîba da ǂansa, ǁîb di mîmāde da ga sâuo. 4 ǁÎba da ǂan hâ, ti mî tsî ga ǁîb di mîmāde sâu tama i-i, ǁnā-i ge a ǂhumi-ao, tsî ǁnāti ī-i ǃnâb ge amaba hâ tama hâ; 5 xawe ǁîb di mîsa ga sâu-i, ǁnāti ī-i ǃnâb ge Elob di ǀnamma amase dīǀoaǀoahe hâ; nēs tawa da ge a ǂan, ǁîb ǃnâ da hâsa. 6 ǁÎb ǃnâ da hâ, ti ra mî-i ge surude hâ, ǁîb ge tanisens ǁkhās khami i nî ǁî-aitsama ǁkhāti tanisensa.
NOVEMBERI 11-17
ELOBMÎSA XU HÂ ǂÛǂÛSA MÎDI | 2 JOHANEB 1–JUDAB
“ǃGarise da ge nî ǃkham, i da amab ǃnâ hâǀgara”
(Judab 3) ǀNamsabedo, sada hoada di ǃgâiǃōsib xa ta nî xoaba dusa ta ra ǃhaeǃhaesen hîa ta ǂhâba hâse ūhâ, sado xoaba tsî ta nî ǁnamasa, î du ga ǂgoms, ǀgui ǃnāsa ǃanuna māǁnâhe hâs ǃaroma ǃkham.
w04-E 9/15 11-12 ¶8-9
“ǃKhūb ǃnâ ǀgai”
8 Satanni ra dī xūna da ge a ǂan, Elobmîs ǁîb di ǀgauga ǃamkuse ra ǁguiǃā amaga. (2 Korinteǁîn 2:11) ǂGomǂgomsa khoeb Joba khôaǁnâs ǃaromab ge Satanna marisi ǁgaib, omaris ǁanin ǁōb, omaris mâǃoas, ǀaeb tsî ǀhōsan xa mîǁgaiǁgaihes tsîna ge sîsen-ū. Jobi ge kaise ge tsûaǂgao tsî Elob ǁîba ǀuru hâ khama ge tsâ. (Job 10:1, 2) Nētsēb Satanna ǁkhā mâsiga ǃaroma tama xaweb ge ǂgui Xristeǁîn ra hōǃâ ǃgomga ra sîsen-ū îb ǁîn ǂgomsa ǂkhabuǂkhabu.
9 ǀUni tsēdi ǃnân ge gagasise a ǂkhabu kai da ǁkhā xūna a ǂgui. Nē ǃhūbaib ǃnâ i ge mari-e gagasi xūn ǀgapiga ra ǃgôahe. ǀAib ge ǃgâi xū-i hîna ǂkhîba ra hau i ase ra mûsen kaihe, ǃgomgu hîna i ra ǃaromana ǁgau tama i tsî. Tsî ǂgui khoen ge ‘turaba Elob ǃgâ-ai a ǀnam.’ (2 Timoteub 3:1-5) “ǃKham” tama da ga io, ob ge nē ǂâi ǀgauba sida gagasise a ǂkhabu kai ǁkhā.—Judab 3.
Gagasi xūna ǀō-aisase ôaǃnâs
(Judab 4) ǀNî khoen ge ǀkhuriǂgâ xui-ao, ǂomxa ǁaeba xu nē ǀgoraǃgâsa ǃoa aixoahe hân, eloxoresan, Elob ǀkhomma ra sîsenūsān, tsî ǀguise hâba da gaosab Elob tsî sada ǃKhūb Jesub Xristuba ra ǀūxūna.
(Judab 12) ǁÎn ge ǂnaon, sadu ǀnamǂûǁaedi ǃnâ saub [ǃaob] ose ǂûǀhao tsî ǁî-aitsama ra ǂûbasenna; ǁgamoǃnâ ǀnanun, ǂoagu xa ra doeǁgamahen ge ǁîn, ǂûo tsî ǀgam ǃnāra go ǁōtoa tsî ǃnomao hain ǁkhunab din xase īna.
it-2-E 279
ǀNamǂûǁaedi [ǀNam ǁaxasigu]
ǀNamǂûǁaedi tawa i ge tae-e gere dīhes tsî matikō ǃnāde di gere ūhâhes tsînas ge Elobmîsa mî tama hâ. (Judab 12) Jesub Xristub tamas ka io apostelgu ge nē ǀnamǂûǁaede ge ǂnûiǂgā tama hâ i, ǁnā-amaga di ge ǂhâǂhâsase mûhe tide. ǀNî khoen ge ra mî, ǃkhū hâ ǃgâsan ge kai ǂûǀhaosa aiǂhomi tsî ǁîn ǀgâsa ǃgâsana gere ǁkhau. Nēpan ge ǁgû-on, ǃoa taradi, ǃkhū hân tsî ǁnān hîna mari-e ūhâ tamana gere ǂûǀhao, ǁîn gagasi ǃgâsan ǀkha.
it-2-E 816
Kai ǀuib [ǂNaon]
Grikegowab mîs spi·lasʹ di hâs ge kai ǀui-i tamas ka io kai ǀuigu hîna hurib ǃnaga ǂguise ǀgui ǃkhaib ai hâgu ǃoa ra ǁnaeǁgau. Judab ge nē mîsa ra sîsen-ūse ǀhôakao khoegu hîna ǁgai ǂâibasens ǀkha Xristeǁî ǀhaohâb ǃnâ ge ǂgāga ge ǂkhō. ǁGammi ǃnaga a sâusa ǀuigu ǂgaude a ǁkhōba khami gu ge nē khoega ǀhaohâb ǁanina ǁkhōǁkhōsa mâsib ǃnâ gere mâi. ǁÎb ge “ǁîn ge ǂnaon, sadu ǀnamǂûǁaedi ǃnâ saub [ǃaob] ose” ra ǂûǀhaona ti ge mî.—Judab 12.
(Judab 14, 15) Tsîb ge ǁkhāti Henoxi, Adamma xu hûǁîba ǁîn xa aikēbo, tsî ge mî: “Mû, ǃKhūb ge ǁîb di ǂgui ǀoadisi ǃanun ǀkha ra hā,” 15 ǀgoraǃgâsab nî dīse hoan ǂama, tsî ǁkharab nîse ǁîn ǃnâ hâ eloxoresan hoana, ǁîn di dīgu, eloxoresasen gere dīgu hoagu ǃaroma, tsî hoa karosa mîdi, eloxoresa ǁore-aon ǁîb ǃoagu gere ǃhoadi ǃaroma.
wp17.1-E 12 ¶1
“Elobab ge ǃgâiba isa”
Henoxa tae-e ge kēbo? Nēti ra mî: “Mû, ǃKhūb ge ǁîb di ǂgui ǀoadisi ǃanun ǀkha ra hā, ǀgoraǃgâsab nî dīse hoan ǂama, tsî ǁkharab nîse ǁîn ǃnâ hâ eloxoresan hoana, ǁîn di dīgu, eloxoresasen gere dīgu hoagu ǃaroma, tsî hoa karosa mîdi, eloxoresa ǁore-aon ǁîb ǃoagu gere ǃhoadi ǃaroma.” (Judab 14, 15) ǂGurose, du ge ra mû Henoxi nē xūn xa ǀnain ge ī khami ra ǃhoasa, Elob nē kēbosa dīǀoaǀoa hâ khami. ǂGui kēbodi ǁnās khaoǃgâ ge māhe di ge ǁkhā aiǁgausa ra sao. ǃAromas ge a nē: Kēbo-aob ge ǁnātikōse nē xūn nî ī ǃkhais ǃnâ ǂgomǃgâsiba ūhâ tsîn ge ǀnain ge ī khami ra ǁguiǃāhe.—Jesajab 46:10.
wp17.1-E 12 ¶3
“Elobab ge ǃgâiba isa”
Henoxi di ǂgoms ge sida nētsē ra hui î da, Elob ra ǃhūbaiba mû khami mû. Henoxi gere ǃhoa ǀgoraǃgâs ge noxoba nî hā. Nē da ûi ǃnâ hâ ǃhūbaib ǃoa i ra ǁnaeǁgau amaga. Henoxi di ǃkhâikoms ǀkha ǀguiǃnâxaseb ge Jehovaba, Noaxi ǁaeb ǃnâ ge ûi hâ i eloxorasa khoena, kai ǁgammi dâus ǀkha ge dīkākā. Xawe ǁnā khoen di dīkākāhes ge hānîǁaeb ǃaroma sada aiǁgaus ase ība. (Mateub 24:38, 39; 2 Petrub 2:4-6) Nētsēb ge Eloba ǁnā ǁaeb ǃnâb ge dī hâ is khami, ǁÎb ǀhomǃgāgu ǀkha ǃâu hâ Îb nē eloxoresa ǃhūbaiba dīkākā. Hoada ge Henoxi di ǃkhâikomsa ǂgaob ǀkha ū, tsî nâu khoena nî mîba. Sida omaris ǁanin tsî ǀhōsan tsîn ga sida ǀkha mâ tama i xawe. ǀNîsi da ge ǀguri ǀgui da hâ khami nî tsâ. Xaweb ge Jehovaba Henoxa ǀguri ge xu mâi tama hâ i tsî hukas tsîna ǁÎba ǂgomǂgomsase nētsē ra ǃoaba khoena xūǃnâ tide.
Elobmîs khomai ǃâs
(2 Johaneb 1-13) Ti ôarodo, nēna ta ge ra xoaba du, ǁore du tidega. Tsî khoe-i ga ǁore xawe da ge ǁGûb tawa aigowaba-aoba ūhâ: Jesub Xristub ǂhanu-aiba. 2 Tsî ǁîb ge ǂkhîbagus sada ǁoren dis di; tsî sada din ǀguin di tama, tsîb ge a ǁkhāti ǃhūbaib hoab din di ǂkhîbagu. 3 Tsî nēsa da ge a ǂan, ǁîba da ǂansa, ǁîb di mîmāde da ga sâuo. 4 ǁÎba da ǂan hâ, ti mî tsî ga ǁîb di mîmāde sâu tama i-i, ǁnā-i ge a ǂhumi-ao, tsî ǁnāti ī-i ǃnâb ge amaba hâ tama hâ; 5 xawe ǁîb di mîsa ga sâu-i, ǁnāti ī-i ǃnâb ge Elob di ǀnamma amase dīǀoaǀoahe hâ; nēs tawa da ge a ǂan, ǁîb ǃnâ da hâsa. 6 ǁÎb ǃnâ da hâ, ti ra mî-i ge surude hâ, ǁîb ge tanisens ǁkhās khami i nî ǁî-aitsama ǁkhāti tanisensa. 7 ǃGâsado, ǀasa mîmā-e ta xoaba du tama, xawe ǀoro mîmā-i, tsoatsoasa xu du ge ūhâ i-e; nē ǀoro mîmās ge ǁnā mîs, tsoatsoasa xu du ge ǁnâusa. 8 ǁKhawa ta ge ǀasa mîmā-i, ǁîb ǃnâ tsî ǁkhāti sadu ǃnâ a ama-ai-e ra xoaba du; ǃkhaenab ra ǃgû-ī tsî ǀnaib ama-ai ǃnâba ra ǀkhâu xui-ao. 9 ǃNâb ǃnâ ta hâ, ti mî tsî ga ǁî-i ǃgâsaba ǁkhan-i, ǁî-i ge ǃkhaenab ǃnâ nēsis kōse hâ. 10 ǁÎ-i ǃgâsaba ǀnam hâ-i ge ǃnâb ǃnâ hâ-e, tsî ǁgonǁgonǂgao-i ge ǁî-i ǃnâ hâ tama hâ; 11 xawe ǁî-i ǃgâsaba ra ǁkhan-i ge ǃkhaenab ǃnâ hâ tsî ǃkhaenab ǃnâ ra ǃgû-e, tsî i ge a ǀū, mâǀî i ra ǃgû ǃkhaisa; ǃkhaenab ge ǁî-i di mûra ǃkhae kai amaga. 12 ǀGôarodo, xoaba du ta ra, ǁorena du ǁîb di ǀons ǃaroma ǀûbahe hâ amaga. 13 Xoaba go ta ra, ǁgûgo, tsoatsoasa xu hâba du ge a ǂan amaga. Xoaba go ta ra, ǂkhamkhoego, ǂkhababa go ge dan amaga.
NOVEMBERI 18-24
ELOBMÎSA XU HÂ ǂÛǂÛSA MÎDI | ǂHAIǂHAIS 1-3
“Sa sîsenga ta ge a ǂan”
(ǂHaiǂhais 1:20) ǂGanǃgâsib ǁnā hû ǀgamirodi, ti amǀkhāb ǃommi ǃnâts go mûdi dib tsî hû ǃhuniǀuri kandelargu diba: Hû ǀgamirodi ge ǀhomǃgāgu hû ǀhaohâgu diga, tsî hû kandelargu, mûts gogu ge hû ǀhaohâga.
w12-E 10/15 14 ¶8
Mâ ǃnôa gagaba du nî ūhâ?
8 ǁNā ǃnôa gagaba xu ǂgōsens ǃaroma da ge nî hōhōǃnâsen, Jesub “ǁîb di amǀkhāb ǃommi ǃnâ hû ǀgamirode” ūhâ dis Elobmîsa ra mîsa. “Gamirodi” ge ǂkhauhesa mûǂam-aoga ra ǂnûǁkhaeba tsî ǀhaohâgu di mûǂam-aogu hoaga ǃkhōǂgā hâ. Jesub ge ǁîb ǃommi ǃnâ hâ ‘ǀgamirode’ ǁîb ǂhâba hâ khami ra daoǁgau. (J.ǂHa. 1:16, 20) ǁNās ǀkhab ge Jesuba, Xristeǁî ǀhaohâb di danab ase, ǀhaohâb ǃûi-aogu hoaga ra mûǂam. ǀHaohâb ǃûi-aob ga tsûdī o, ob ge ǁnāb ‘mûra âb ǀaes di ǁhabu-i xase’ ība nî kōǃgâ îb ǁnamahe, ǁÎb ǀgaub tsî ǁaeb ai. (J.ǂHa. 1:14) Nēn hoan ǃnâ da ge ǃanu gagab ǀkha ǁgaumâihe hâ ǃgâsaga ǃgôasiba nî ǁgau. Paulub ge ge mî: “Sadu aiǃgû-aoga ǁnâuǀnam, î ǁîga ǃnaga hâba; ǁîgu ge sadu ǀomdi ǂama ra ǃûi, ǃereamsa nîra māgu ase; î gu ǁîsa ǃgâiaǂgaob ǀkha dī, î gu tā ǀhâimâinǀoms ǀkha dī, ǁîs ǃgâiba du tide xuige.”—Heb. 13:17.
(ǂHaiǂhais 2:1, 2) ǀHomǃgāb Efeseǁî ǀhaohâb diba xoaba: Nēnab ra ǁnāba mî, hû ǀgamirode ǁîb di amǀkhāb ǃommi ǃnâ ǃkhō hâb, hû ǃhuniǀuri kandelargu ǁaegu ra ǃgûmaba: 2 Sa sîsenga ta ge a ǂan, tsî sa ǀhupuba, tsî sa taniǀnamxasiba, tsî ǂkhabanats tani ǁoasa, tsî apostelse ra dīsen xawe ǁnāti ī tamagats ge ǃâitsâ tsî ǂhumi-aose hō ǃkhaisa.
w12-E 4/15 29 ¶11
Jehovab ge ûiǃkharu da nî ga ra sâu da
11 ǂHaiǂhais di ǀgamǁî tsî ǃnonaǁî danaǃâra ǃnâ hâ ǃâb ǃnâb ge Jesub Xristuba ǂkhari Asiab ǃnâ hâ hû ǀhaohâga ra kōǃgâ. Nēs ge Jesub hoa xūna ra mû ǃkhaisa ge ǃgāsa kai. ǀNî ǃkhaidi aib ge ǃgâsana ǀondi ai ǂgai hâ tsî ǃnâs hoasa ǂhâbasa ǁnamas tamas ka io koasa ra mā. Nēsa tae-e ra ǁgau? Nē kēbos di dīǀoaǀoas ge ǂkhauhesan hîna 1914ǁî kurib khaoǃgâ nî hāna ǃoa ra ǁnaeǁgau. Hû ǀhaohâgu ge a māhe ǁnamas ge nētsē ǃhūbaib ǂhawase hâ ǀhaohâgu xa a sîsen-ūhe ǁkhā. ǁNā-amaga da ge ra ǂgomǃgâ Jehovab ǁîb di ǀGôab ǃnâ-ū ǁÎb khoena ra daoǁgausa. Nē daoǁgausa xu da mati ra ǀama?
w01-E 1/15 20-21 ¶20
Jehovab di ǀapeǂhumis ǀkha ǀguiǃnâxase hâ re
20 Jehovab di ǀapeǂhumis ǀkha da ga ǀguiǃnâxase a hâ ǂgao o, o da ge Jesub Xristub a “ǀhaohâb di dana” ǃkhaisa nî mûǂan. (Efeseǁîn 5:22, 23) Jesajab 55:4 ǃnâ da ge ra mîbahe: “Mû, tita ge ǁîba ǁaedi di ǀhûǀguitimî-aose ge mā, ǁaedi di gao-ao tsî mîmā-aose.” Jesub ge amase a ǂan matib nî daoǁgausa. ǁÎb ge ǁîb gūn tsî ǁîn dīn tsîna a ǂan. ǂKhari Asiab ǃnâ hâ hû ǀhaohâgab gere kōǃgâ ǁaeb aib ge koro ǃnāde: “Sa sîsenga ta ge a ǂan” di ge mî. (ǂHaiǂhais 2:2, 19; 3:1, 8, 15) Jesub ge sida ǂhâ hâ xūna a ǂan, Jehovab ǂûb khami. Sida Îtse ǀgoresab ge mās aiǃgâb ge Jesuba ge mî: “Sadu Îb kom ǂhâba du hâna a ǂan, sadu nî ǂgans aiǃâo.”—Mateub 6:8-13.
Gagasi xūna ǀō-aisase ôaǃnâs
(ǂHaiǂhais 1:7) Mû, ǃgoaxab a ǀnanudi ǀkha, tsî mâ mûs hoas ge ǁîba nîra mû, ǁkhāti ǁnān, ǁîba ge ǃkhāǃganun, tsî ǃhūbaib di ǃhaodi hoadi ge ǁîb ǂama tsûsase nîra ā. Ā, Amen.
kr-E 226 ¶10
Elob Gaosib ge ǁîb khākhoena ra ūbē
10 ǀGoraǃgâs go ǂhôahe. Elob Gaosib di khākhoen ge ǁnā ǁaeb ai ǁîna noxoba nî ǃao kai xū-e nî mû. Jesub ge ra mî: “ǁNāǃnubain ge Khoen Ôaba kai ǀgaib tsî ǂkhaisib tsîkha ǀkha ǃgoaxase nîra mû.” (Markub 13:26) Nē ǀō-aisa ǀgaub ǃnâb ga ǀgaiba ǁgauhe o, ob ge Jesub ǀgoraǃgâs nî ǂhôahe ǁaeba go ǀgū. Nē kēbos, ǀuni tsēdi dis ǃnâb ge Jesuba ǀgoraǃgâs di ǂhôahes xa ǃgāsasiba ra mā. Gūn tsî pirin di ǂkhōs ǃnâ da ge nē ǃgāsasiba ra hō. (Khomai re Mateub 25:31-33, 46.) Elob Gaosib ǀkhāb ai hâ khoen ge ‘gūn’ ase nî ǀgoraǃgâhe, tsî danade nî “ǃhâkhâi,” “ores go ǀgū” ǃkhaisa mûǂan tsî. (Lukab 21:28) Xawen ge Gaosiba ra mâǃoa khoena ‘pirin’ ase nî ǀgoraǃgâhe tsî nî “ā,” “ǀamo ǁkharab” ǃoan gau ǃkhaisa mû tsî.—Mat. 24:30; J.ǂHa. 1:7.
(ǂHaiǂhais 2:7) ǂGaera ūhâ-e a-i ǁnâu, Gagab ra ǀhaohâgu ǃoa mî-e. Dan ra-i ǁî-e ta nîra ǂûmā ûib di hais, paradais Elob dis ǁaegu hâs xa.
w09-E 1/15 31 ¶1
ǂHaiǂhais ǂkhanisa xu ra mâǂoa dana ǂâidi—I
2:7—“Paradais Elob” disa a tae? Nē mîdi ǂkhauhesa ǃgâsana ǃoa mîhe hâ ǃkhais ge ra ǁgau da, Elob paradais ǁîn ǀhommi ǃnâ nî hōǃâ paradais khami tsâ mâsiba ǃoa ra ǁnaeǁgau ǃkhaisa. Jehovab ǀgūsen nî hâ xui-ao. ǂGomǂgomsase nî hâ ǂkhauhesa ǃgâsan ge ‘ûib di haisa’ xu nî ǂû. ǁÎn ge ǁō tide.—1Kor. 15:53.
Elobmîs khomai ǃâs
(ǂHaiǂhais 1:1-11) Nēs ge ǂhaiǂhais Jesub Xristub dis, Elob ge mā bisa, ǁîb di ǃgāgab nî ǃhaese nîra īna ǁgauga, tsî ǀhomǃgāb âb ǀkhab ge sîs tsî ǁîb di ǃgāb Johanebab ge ǂanǂansa, 2 Elob mîs tsî Jesub Xristub di ǀhûǀguitimîsa ge ǃkhō-ammi, tsî mûb gen hoan tsîna. 3 ǃGâiǃō i ge hâ khomai ra-i tsî ǁnān, nē kēbosis di mîde ra ǁnâun, tsî ǁnān, ǁîs ǃnâ xoahe hâna ra sâubasenna; ǁaeb a ǀgū xui-ao. 4 Johaneta hû ǀhaohâgu, Asiab ǃnâ hâgu ǃoa: ǀKhomma ab hâǀkhā du tsî ǂkhîb tsîna ǁîb hâ ab, tsî hâ ge ib, tsî hā nîba xu, tsî hû Gagagu, ǁîb di trons ai hâgu tsîga xu, 5 tsî Jesub Xristub, ǂgomǂgomsa ǀhûǀguitimî-aob, ǁō hâna xu ǂguroǃnaesabeb tsî ǃhūbaib gao-aogu di ǂamgaosab tsîna xu, ǁîb, sada ge ǀnam hâ ib, tsî ǁoren âda xu ǀaob âb ǃnâ ge ǁāb, 6 tsî Elob tsî ǁGûb âba sada gao-aose tsî pristerse ge dībab, ǁîba ab ǂkhaisib tsî ǀgaib tsîkha ūhâ ǀamosib hoab kōse! Amen. 7 Mû, ǃgoaxab a ǀnanudi ǀkha, tsî mâ mûs hoas ge ǁîba nîra mû, ǁkhāti ǁnān, ǁîba ge ǃkhāǃganun, tsî ǃhūbaib di ǃhaodi hoadi ge ǁîb ǂama tsûsase nîra ā. Ā, Amen. 8 Tita ge Alfata tsî Omegata, Tsoatsoata tsî ǀUnita tib ra ǃKhūba mî, ǁîb hâ ab, tsî hâ ge ib, tsî hā nîrab, Hoaǀgaixaba. 9 Tita, Johaneta, ǁkhāti sadu di ǃgâsata, tsî ǀhao-amǃnâxa ra ta ǁgâiǀāb tsî gaosib tsî Jesub Xristub di ǃnūǃnâxasib ǃnâ ǃnāǃnuis Patmos ai ge hâ i, Elob mîs tsî Jesub Xristub di ǀhûǀguitimîs ǃaroma ta. 10 ǃKhūb di tsēs ai ta ge Gagab ǃnâ ge hâ i; o ta ge ti ǃgâb ai kai dom-i, ǀgapadas di-i xase ī-e ge ǁnâu, 11 nēti ra mî-e: Tita ge Alfata tsî Omegata, ǂGurota tsî ǀUnita; îts mûts rana ǂkhani-i ǃnâ xoa, î ǁîna Asiab ǃnâ hâ hû ǀhaohâga ǃoa sî: Efesus ǃoa, tsî Smirnas ǃoa, tsî Pergamums ǃoa, tsî Tiatiras ǃoa, tsî Sardis ǃoa, tsî Filadelfias ǃoa, tsî Laodiseas ǃoa.
NOVEMBERI 25–DESEMBERI 1
ELOBMÎSA XU HÂ ǂÛǂÛSA MÎDI | ǂHAIǂHAIS 4-6
“Haka hā ǃgapi-aogu”
(ǂHaiǂhais 6:2) O ta ge kō; tsî ge mû, ǃuri hāba, tsî ǁîb ai ǂnôab ge khā-e ge ūhâ i, tsîb ge kron-e ge māhe; ob ge dan raǃâ tsî danni nîga ge ǂoa.
wp17.3-E 4 ¶3
Haka hā ǃgapi-aoga a ham?
Hama ǃuri hāba ǃgapi hâ? ǂHaiǂhais di ǂkhanis ǃnâ da ge ǁîb xa hâ ǃgāsasiba nî hō. ǁÎs ǃnâb ge “Elob Mîs” ti ra ǂgaihe. (ǂHaiǂhais 19:11-13) ǂGai ǀons, Elob Mîs di hâs ge Jesub Xristuba ǃoa ra ǁnaeǁgau, ǁîb Elob haisi-amde ra ǂhôa xui-ao. (Johaneb 1:1, 14) ǁNās xōǀkhāb ge “Gao-aogu di Gao-aob, tsî ǃkhūgu di ǃKhūb” tsî “ǂGomǂgomsab tsî Amab” ti ra ǂgaihe. (ǂHaiǂhais 19:16) ǃGāsa a, ǁîb ge ǂhanu Gao-ao tsî ǁîb ǀgaiba ǂhanu tama ǀgaub ǃnâ sîsen-ū tama hâ. Xawe da ge dîde a ūhâ ǁkhā.
wp17.3-E 4 ¶5
Haka hā ǃgapi-aoga a ham?
Hā ǃgapi-aoga mâǁae ge ǃgapi tsoatsoa? Jesub, ǂguro ǃgapi-aob ge kronsab ge hō o, o ge ǃgapi tsoatsoa. (ǂHaiǂhais 6:2) Jesuba mâǁae ǀhommi ǃnâ Gaob ase ge ǁgaumâihe? Nēs ge ǀhomǃapab ges khaoǃgâ ge ī tama hâ i. Elobmîs ge ra ǁgau ǁaerobab ge ǃâu ǃkhaisa. (Hebreǁîn 10:12, 13) Jesub ge ǁîb ǁkhāǁkhāsabena nē ǃâus nî ǀam ǁaeba ge mîba. Tsî ǁîb di ǂgaeǂguis mâǁae nî tsoatsoas tsîna saodi ǃnâ-ū ge ǁgau. Torogu, ǃâtsūǀkhāgu tsî ǂgui ǀaegu ge nî hâ. (Mateub 24:3, 7; Lukab 21:10, 11) ǂGuro ǃhūbaib torob ge 1914ǁî kurib ǃnâ tsoatsoa o, on ge khoesib hoaba Elobmîs ra “ǀuni tsēdi” di ǂgai ǁaeb ǃnâ ge a ǂgâ.—2 Timoteub 3:1-5.
(ǂHaiǂhais 6:4-6) Ob ge ǀnî hāb, ǀapa ge iba ge ǂoaxa; tsî ǁîb ai ǂnôab ge ǀgaiba ge māhe, ǂkhîbab nî ǃhūbaiba xu ūbēse, în ga ǃgamgu ti; tsîb ge kai gôaba ge māhe. 5 Tsî ǃnonaǁî ǂganamsaosab ge ǁkhowa-am ǃnubai ta ge ǃnonaǁî ûitsamab ra: Hā! ti mîsa ge ǁnâu. O ta ge kō; tsî ge mû, ǂnū hāba, tsî ǁîb ai ǂnôab ge ǀguiro-ūdaba ǁîb ǃomǁae ge ūhâ i. 6 O ta ge haka ûitsamagu di ǁaegub ǃnâ dom-e ge ǁnâu: ǀGui ǀguiros ǃhorob disa ǀgui denari ama, tsî ǃnona ǀguirodi gerstǃhorob dide ǀgui denari ama; î olib tsî ǂauxûi-i tsîna tā ǂkhôa, ti ra mî-e.
wp17.3-E 5 ¶2
Haka hā ǃgapi-aoga a ham?
Nē hā ǃgapi-aob ge toroba ra ǂnûǁkhaeba. ǁÎb ge ǂkhîba ǀgui ǃhūba xu ǀgui ūbē tama i tsî hoaraga ǃhūbaiba xu nî ūbē. 1914ǁÎ kurib ǃnâb ge ǂguro ǃnāsa ǃhūbaib ǂhawasa toroba ge tsoatsoa. Nēb ge ǀgamǁî ǃhūbaib torob xa ge saohe, ǂgurob xa ge ǃaoroxa ība. 1914ǁÎ kurib khaoǃgâ hâ torogu tsî ǃkhamdi ǃnân ge 100 miliuns xa ǃnāsa khoena ge ǁō, ti i ge ra mîhe. ǁNās xōǀkhān ge ǂgui khoena ge ǃhora.
wp17.3-E 5 ¶4-5
Haka hā ǃgapi-aoga a ham?
“O ta ge kō; tsî ge mû, ǂnū hāba, tsî ǁîb ai ǂnôab ge ǀguiro-ūdaba ǁîb ǃomǁae ge ūhâ i. O ta ge haka ûitsamagu di ǁaegub ǃnâ dom-e ge ǁnâu: ǀGui ǀguiros ǃhorob disa ǀgui denari ama, tsî ǃnona ǀguirodi gerstǃhorob dide ǀgui denari ama; î olib tsî ǂauxûi-i tsîna tā ǂkhôa, ti ra mî-e.”—ǂHaiǂhais 6:5, 6.
Nē ǃgapi-aob ge ǃâtsūǀkhāba ra ǂnûǁkhaeba. Nēpa da ge ra mû, ǂû-i ǁnātikōse a ǀorosa tsî i ge ǀgui tsēs sîsen-i marisa gere ǂgan ǃkhaisa. (Mateub 20:2) Nē ǂû-e matiko ǁaeba ga hâ hâ, kai omarisa ǂûmāsa? ǁNā-amagan ge khoena gere mîbahe în tsēkorobe ǂû-e ǃgâise sîsen-ū.
(ǂHaiǂhais 6:8) O ta ge kō; tsî ge mû ǀhai hāba; tsî ǁîb ai ǂnôab di ǀons ge a ǁō, tsî Hadeb di ǂamsab ge ǁîba gere sao. Tsî kha ge hakaǁî ǃâs ǃhūbaib dis ǂama ǀgaiba ge māhe, ǃgam kha nîse gôab ǀkha, tsî ǃâtsūǀkhāb ǀkha, tsî ǂhīǁōb ǀkha, tsî ǃhūbaib di ǀgurun ǀkha.
wp17.3-E 5 ¶8-10
Haka hā ǃgapi-aoga a ham?
Hakaǁî hā ǃgapi-aob ge ǀaegu tsî ǀkhara xūn xa ǃaromahe hâ ǁōba ra ǂnûǁkhaeba. 1914ǁÎ kurib khaoǃgâb ge Spanish flu di ǀon hâ ǀaeba disidi ǃnâ hâ miliuns di khoena ge ǃgam. ǁAubexa 500 miliuns khoen ge nē ǀaeba ge hō. ǁNās ra ǂâibasens ge, 3 khoena xu i ge 1 khoe-e nē ǀaeba a hōsa.
Xawe nē Spanish flu i ge ǀaeb di tsoatsoas ǀguisa ge i-e. ǂAnsa ūhâ khoen ge ra mî smallpox di ǀon hâ ǀaeb ge kaidisidi miliundi khoena 1901ǁî kuriba xu 2000ǁî kurib kose a ǃgam ǃkhaisa. Nētsēn khoena AIDS, TBs tsî malariasa nî ūbē xūna ra ôa xawen ge ǂgui khoena noxoba ra ǁō.
Torob, ǃâtsūǀkhāb tsî ǀaegu ge ǀgui ǀamǂgoasa ūhâ—ǁōba. ǀHobas ge ǀūs ose khoena ra ǀhaoǀhaobasen, ǃâubasen-e mā nî tamase.
Gagasi xūna ǀō-aisase ôaǃnâs
(ǂHaiǂhais 4:4) Tsî trons ǂnamipe di ge ǀgamdisihakaǀa tronde ge hâ i; tsî trondi ai ta ge ǀgamdisihakaǀa ǂnomdomga ge mûǂnôa, ǃuri sarana ana hâga, tsî gu ge ǃhuniǀuri kronde ǁîgu danadi ai ge ūhâ i.
(ǂHaiǂhais 4:6) Tsî trons aiǃâ i ge xlahuri-i, kristali xase ī-e ge hâ i. Tsî trons ǁaegub ǃnâ tsî trons ǂnamipe gu ge haka ûitsamagu, aiǃâb ai tsî khaoǃgâb ai mûdi xa ǀoa hâga ge hâ i.
re-E 76-77 ¶8
Jehovab ǀhomsi trons ge a ǂoaǂamsa
8 Pristergu tabernakeli ǃnâ sîsens di ǁgaumaisa mâhe hâ ǃkhaisab ge Johaneba ge ǂan i. ǁNās ǁkhab ge nēsib da mû xu-i xa ra buru. “Tsî trons ǂnamipe di ge ǀgamdisihakaǀa tronde ge hâ i; tsî trondi ai ta ge ǀgamdisihakaǀa ǂnomdomga ge mûǂnôa, ǃuri sarana ana hâga, tsî gu ge ǃhuniǀuri kronde ǁîgu danadi ai ge ūhâ i.” (ǂHaiǂhais 4:4) Î, pristergu ǃâs ǃnâ i ge 24 ǀhaohâb ǃûi-aoga trondi ai gaogu ase ǂnôa. Nē ǀhaohâb ǃûi-aoga a ham? Nēn ge ǂkhauhesa ǃgâsan hîna khâisa māhe tsî Jehovab xan ge mîmâibahe trondi ai ǂnôana. Mati da a ǂan?
re-E 80 ¶19
Jehovab ǀhomsi trons ge a ǂoaǂamsa
19 Nē ûitsamaga tae-e ra ǂnûǁkhaeba? Esegieli di kēbos ge ǃnāsa ǃgāsasiba ra māda. Esegieli ge Jehovaba trons aib ǂnôase ge mû. ǁNā trons tawa i ge ûitsamaga ge hâ i, Johaneb ge mû khami i ga. (Esegieli 1:5-11, 22-28) Esegieli ge ega nē khuni trons tawa ûitsamaga ge mû. Nē ǃâs aib ge ûitsamaga Xerugu ti ge ǂgai. (Esegieli 10:9-15) Nē haka ûitsamagu ge ǂgom da ra o, Elob di ǂgui xeruga ra ǂnûǁkhaeba. Xerugu ge Jehovab gagasi ǀapeǂhumis ǃnâ ǀgapi sîsen-e ūhâ. Johaneb ge Xerugab ge Jehovab ǀgūse a mû o, ge buru tama hâ i. Tabernakeli ǃnâ ge mâ i arki ai kha ge ǀgam Xeruga hîna ǃhuniǀuri-i ǀkha kurusa ga ge mâ i. Nē trons ge Jehovab di tronsa gere ǂnûǁkhaeba. Nē Xerukha ǁaeguba xub ge Jehovab domma ǁÎb ǁaes ǀkha gere ǃhoa.—Eksodus 25:22; Psalmdi 80:1.
(ǂHaiǂhais 5:5) Ob ge ǂnomdomgu di ǀguiba tita ǃoa ge mî: Tā ā; mû, danni go Judab ǃhaos di Xammi, Davib di ǃnomaba, ǂkhanisa ǁkhowa-am tsîb nî hû ǂganamsaodi âsa khôase.
cf-E 36 ¶5-6
“Mû . . . Judab ǃhaos di Xammi”
5 Xammi ge ǃnāsa ǁaeba ǁkhoaǂgaosib ǀkha ra ǀgōpeǀnōhe. Kai ǀoa hâ aore xamma ǀhao-ū i du ge hâ i? Î ti du ga mî o, o du ge ǀnîsi ǁnā xamma drab ǀkha ǂganamsa parki ǃnâ ǀgui ge mû hâ i. Xawe i ge noxopa ge ǃaoǃaosa i drab hâ xawe. Nē xamma du ais ǃnâ ra kō tsîb ǁîba sado kō mâ hâ, o du ge a ǂân hukas tsînab tawasen tsî sado xu ǃkhoebē tide ǃkhaisa. Elobmîs ge ra mî: “Xammi ǀgurun ǃnâ a ǀgaisab tsî khoe-i xare-i aiǃâba xu oa tamab.” (ǂKhoamîdi 30:30) Xristub ge ǁkhā ǁkhoaǂgaosiba ūhâ.
6 ǀKhî da ǃhoaǃgao Jesub ge ǃnona ǀgaugu ǃnâ xammi khama ǁkhoaǂgaosiba a ǁgau ǀgauba: Elob di amaba ǁkhoaǂgaose ǁkhaubas, ǂhanu-aisib ǀkhab aib mâs tsî mâǃoaheb ge xawe mâǀgais. Tsî da ge nî ǁkhāǁkhāsen hoada Jesub di ǁkhoaǂgaosiba ǁgaesa. Nēsi da ga kurusa xu ǃao gagaba ūhâs tamas ka io ūhâ tama is tsîna.
Elobmîs khomai ǃâs
(ǂHaiǂhais 4:1-11) Nēn khaoǃgâ ta ge ge kō, tsî mû, o i ge ǁā-e ǀhommi ǃnâ ge ǁkhowa-amhe; tsî ǂguro dommi, ǁnâu ta geb ge ǀgapadas dib xase ge ī i, tita ǀkha ǃhoa tsî ra mîba: ǃApahā, o ta ge nēn khaoǃgâ nî īna nîra ǁgau tsi. 2 O ta ge ǁnātimîsi Gagas ǃnâ ge hâ i; tsî mû, trons ge ǀhommi ǃnâ ge mâ i, tsî ǀGuib ge trons ai ge ǂnôa i. 3 Tsî ǁîs ai ge ǂnôa ib di īsib ge jaspis tsî sardius ǀuira dib xase ge ī i, tsî ǀapiǃhana-i ge trons ǂnamipe ge hâ i, īsib â-i ǃnâ smaragǀuis khami ge ī i-e. 4 Tsî trons ǂnamipe di ge ǀgamdisihakaǀa tronde ge hâ i; tsî trondi ai ta ge ǀgamdisihakaǀa ǂnomdomga ge mûǂnôa, ǃuri sarana ana hâga, tsî gu ge ǃhuniǀuri kronde ǁîgu danadi ai ge ūhâ i. 5 Tsî tronsa xu gu ge napagu tsî ǃgurugu tsî domgu tsîga gere ǂoa, tsî hû ǀaexa ǃam-amǀaegu ge trons aiǃâ ge khau, ǁîgu ge hû gagagu Elob diga. 6 Tsî trons aiǃâ i ge xlahuri-i, kristali xase ī-e ge hâ i. Tsî trons ǁaegub ǃnâ tsî trons ǂnamipe gu ge haka ûitsamagu, aiǃâb ai tsî khaoǃgâb ai mûdi xa ǀoa hâga ge hâ i. 7 Tsî ǂguro ûitsamab ge xammi xase ge ī i, tsî ǀgamǁî ûitsamab ge tsâub xase ge ī i, tsî ǃnonaǁî ûitsamab ge khoe-i khami ī aisa ge ūhâ i, tsî hakaǁî ûitsamab ge ǁkhana ra ǃariǃkhās xase ge ī i. 8 Tsî haka ûitsamagu ge mâb hoaba ǃnani ǁgaboga ge ūhâ i; tsî gu ge ǃaugab ai tsî ǃnāb ǃnâ mûdi xa ge ǀoa hâ i; tsî gu ge tsēs tsî tsuxub tsîra ǀûs ose gere mî: ǃAnu, ǃanu, ǃanub ge ǃKhūb Elob, Hoaǀgaixab, hâ ge ib tsî hâ ab, tsî hā nîba. 9 Tsî ûitsamagu ge ǂkhaisib tsî ǃgôasib tsî gangansa māo ǁnāb, trons ai ǂnôab, ǀamosib hoab kōse ra ûiba, 10 o gu ge ǀgamdisihakaǀa ǂnomdomga ǁnāb, trons ai ǂnôab aiǃâ ǁnāǁgoe tsî ge ǀgoreǀî ǁnāb, ǀamosib hoab kōse ra ûiba, tsî gu ge ǁîgu kronde trons aiǃâ aoǂnûi tsî ge mî: 11 Sats ǃKhūts ge a anu, ǂkhaisib tsî ǃgôasib tsî ǀgaib tsîna māhesa; sats ge hoana kuru xui-ao, tsî sa ǂâisa xun hâ tsîn ge kuruhe xui-ao.