ǁNaeǁgaudi Sida Xristeǁî ûib tsî aoǁnâ sîsenni sîsen ǂkhanib

DESEMBERI 2-8

ELOBMÎSA XU HÂ ǂÛǂÛSA MÎDI | ǂHAIǂHAIS 7-9

“Jehovab ge ǃgôahe ǁoasa kai ǂnubis khoena ra ǀkhae”

(ǂHaiǂhais 7:9) Nēn khaoǃgâ ta ge ge kō; tsî mû, kai ǂnubis, khoe-i xare-i a ǃgôa ǁoas, ǀūbeǁaedi tsî ǃhaodi tsî ǁaedi tsî gowagu tsîn hoan dis ge trons tsî ǁKhaob aiǃâ ge mâ, ǃuri saraga ana hâse, tsî palmhais di ǂgonaga ǁîn ǃomǁae ūhâse.

it-1-E 997 ¶1

Kai ǂnubis

Os ge dîsa ra hā: Kai ǂnubis ga khoen hîna sâuhe tsî ǃhūbaib ai nî ûina ga ǂnûǁkhaeba o, o i tae-i ǃaroma ǁîn ge ‘Elob trons tsî ǁKhaob aiǃâ mâ’ ti ra mîhe? (J.ǂHa. 7:9) “Mâ” ti i ga Elobmîs ǃnâ a mîhe o,o i ge ǀnî ǁaegu ai ūǃoahesa ǃoa ra ǁnaeǁgau. (Psa. 1:5; 5:5; ǂKhm. 22:29, AT; Luk. 1:19) Nēs aisi hâ danaǃâs ǃnâ da ge ra mû, “ǃhūbaib di gao-aogu tsî kaigu tsî ǃkhū hâgu tsî ǀoadisin ǂamkhoegu tsî ǀgaisagu tsî ǃgān hoan tsî ǃnorasan hoan” ra sâusen ǃkhaisa, “ǁnāb trons ai ǂnôab di aisa xu, tsî ǁKhaob di ǁaiba xu; kaitsēs ǁîb dis go hā xuige; tsî tari-e nî mâ ǁkhā?” (J.ǂHa. 6:15-17; ǀgopeǀnō re Luk. 21:36.) ǁNā-amaga da ge a mî ǁkhā, “kai ǂnubis” ge Elob kai ǁaib ǁaeb ǃnâ sâuhe tsî ge “mâ” khoena ǃoa ra ǁnaeǁgau. ǁÎn ge Elob tsî ǁKhaob xa ūǃoahe hâ.

(ǂHaiǂhais 7:14) O ta ge ǁîb ǃoa ge mî: ǃKhūtse, sats ge a ǂan. Ob ge tita ǃoa ge mî: Nēn ge ǁnān, kai ǁgâiǀāba xu go ǀkhīn, tsî saran âna ǁKhaob di ǀaob ǃnâ ǁā tsî ǃuriǃuri hâna.

it-2-E 1127 ¶4

ǁGâiǀāb

ǃNona dîsi kurigu Jerusalems ge dīkākāhes khaoǃgâb ge apostel Johaneba kai ǂnubis khoen hîna hoa ǁaedi, ǃhaodi tsî gowaga xu hân xa nēti ge mîbahe: ‘Nēn ge ǁnān, kai ǁgâiǀāba xu go ǀkhī’ na. (J.ǂHa. 7:13, 14) Nē kai ǂnubis ‘kai ǁgâiǀāba xu go ǀkhī’ ǃkhais ge ra ǁgau ǁîn ge sâuhesa. ǃNaeǃkhaidi 7:9, 10 tsîn ge nēti i xu-e ra mî: “Elob ge [Joseb] ǀkha ge hâ i, tsî ge ore bi ǁîb di ǁgâiǀāgu hoaga xu.” Joseb ge ǁgâiǀāgu hoaga xu a orehe ǃkhais ge ra ǂâibasen ǁîb nē ǃgomsigab nî tani-ū ǀgaiba a mâhe ǃkhaisa. Tsîb ge ǁnā mâsib xa ge ǃaromahe xūn hoan ǃnâ a mâǀgaisa.

(ǂHaiǂhais 7:15-17) ǁNā-amagan ge Elob di trons aiǃâ hâ, tsî ǁîba tsēs tsî tsuxub tsîra tempeli âb ǃnâ ra ǃoaba; tsî trons ai ǂnôab ge ǁîn ǂama ǁan-aisa nî dībasen. ¹⁶ On ge ǃaruǀî ǃâ tide tsî ǃaruǀî ǁgâ tide, tsî sores tsî ǀnî ǀgam-i xare-i ge ǁîn ai ǁkhāti ǁnā tide; ¹⁷ ǁKhaob trons ǁaegub ǃnâ hâb ǁîna ǃûi tsî ûitsama ǁgamǀaude ǃoa nî ǂgaeǂgui xui-ao; tsî Elob ge ǁgamron hoana ǁîn di mûde xu nîra ǀomǁnâ.

it-1-E 996-997

Kai ǂnubis

Hamna? Kai ǂnubis tae-e ra ǂnûǁkhaeba ǃkhaisa da ga ǂan ǂgao o, o da ge ǂHaiǂhais di hûǁî danaǃâs ǃnâ i ǁîs xa taena ra mîhe ǃkhaisa nî kō. ǁNā xoas ǀkha a ǀgui xoadi tsîna da ge nî kō. ǂHaiǂhais 7:15-17 ge ra mî Elob “ǁîn ǂama ǁan-aisa nî dībasen” ti, tsîn “ûitsama ǁgamǀaude ǃoa” ra daoǁgauhe ǃkhaisa. Tsîb Eloba “mûdi âna xu ǁgamron hoana” nî ǀombē ǃkhaisa. ǂHaiǂhais 21:2-4 tawa da ge ǁkhā ǂâide ra mû: “Tabernakeli Elob dib ge khoen tawa hâ” tsîb Eloba “mûdi âna xu ǁgamron hoana nî ǀombē” tsîb “ǁōba ǃaruǀî hâ tide” ǃkhaisa. Nē ǁapos ge ǀhommi ǃnâ hâ ǀhomǃgāna ǃoa ǁnaeǁgau tama xawe ǃhūbaib ai hâ khoena ǃoa ra ǁnaeǁgau. ‘ǀAsa Jerusalems’ ge ǀhomma xu ra ǁgôaxa.

Gagasi xūna ǀō-aisase ôaǃnâs

(ǂHaiǂhais 7:1) Tsî nēn khaoǃgâ ta ge haka ǀhomǃgāgu, haka ǁhôadi ǃhūbaib didi ai mâga ge mû, haka ǂoagu ǃhūbaib diga ra ǃkhōǀgaraǃâ, ǂoa-i xare-i ǃgom tidese ǃhūbaib ais karao, hurib ais karao, mâ hai-i hoa-i ǃoas karao.

re-E 115 ¶4

Elob di ǂkhauhesan

⁴ Nē haka ǀhomǃgāgu ge haka ǀhomǃgāgu di ǂnubide ra ǂnûǁkhaeba. Jehovab ge ǁîga ge ǁgaumâi îgu ǀgoraǃgâsa ǃkhō-oa ǂhanu ǁaeb nî hās kōse. ǀHomǃgāgu ga nē ǂoade a ǁaxu o, o di ge ǀgui ǁaeb ai noordes, suides, oostes tsî westes sa xu ǃgom tsî kai ǂkhôaba nî dī. Jehovab ge Elammi ǂama haka ǂoade ra sîsen-ūse ǁîna ǀgaruǀgaru tsî dīkākā khami di ge nē ǂoade nî i. Xawe ǁîdi ge ǁnās xa ǃnâsa sîsenǂuiba nî ūhâ. (Jeremiab 49:36-38) Nē ǂoaǂamsa ǂoas ge Jehovab ge Amonni ǃnâ ge hâ-i khoena a dīkākā-ū “sareb” xa noxoba a ǀgaisa. (Amob 1:13-15) Nē ǃhūbaib ai hâ ǂnubidi hîna Satanni xa ra sîsen-ūhe di ǀgui-i tsîn ge Jehovab ǁaib tsēs ai mâǀgai tide. ǁNā ǁaeb aib ge Jehovaba ǁîb a ǂhanu ǂgaeǂgui-ao ǃkhaisa nî ǃgāsa kai.​—Psalmdi 83:15, 18; Jesajab 29:5, 6.

(ǂHaiǂhais 9:11) Tsîn ge ǁîn ǂama abisuǂgâb di ǀhomǃgāba gao-aob ase ge ūhâ i; ǀons âb ge Hebreǁîgowab ǃnâ Abadon ti ge ǂgaihe, tsî Grikegowab ǃnâb ge Apolion ti ge ǀon hâ i.

it-1-E 12

Abadon

Abadon, abisuǂgâb di ǀhomǃgāba a ham?

ǂHaiǂhais 9:11 ǃnâb ge “abisuǂgâb di ǀhomǃgāba” “Abadon” di ra ǂgaihe. Grikegowab ǀons Apolion di hâs hîna “Abadon” di hâs ǀkha a ǀguis ge “dīkākā-aob” ti ra ǂâibasen. 1801 sa xu 1900 kurigu ǃnâs ge nē kēbosa Emperor Vespasian, Muhammad tsî Napoleona ǃoa ra ǁnaeǁgause gere ūǃoahe. Nē ra mîhe ǀhomǃgāb ǁGâuab ǀkhaba xu hâ tis tsînan ge khoena gere ǂâi. Xawe ǂHaiǂhais 20:1-3 ǃnâb ge nē “abisuǂgâb di ǀhomǃgāba” Eloba ra ǂnûǁkhaeba se ra ǁgauhe. Tsîb ge ǁGâuaba xu hā tama xawe Satanna ǃgae tsî abisuǂgâb ǃnâ ra aoǂgā. ǂHaiǂhais 9:11 xas ge The Interpreter’s Bible sa ra mî: “Abaddonni ge Satanni ǃgā tama xawe a Elob di tsîb ge Elob xab mîbahe hâ khama ǀgui dīkākās sîsen-e ra dī.”

Nē da go kō Hebreǁî xoadi ǃnâ i ge a ǃgāsa, ʼavad·dohnʹais di hâ mîs Sheols tsî ǁōb ǀkha a ǀgui ǃkhaisa. Jesub Xristub ge ǂHaiǂhais 1:18 ǃnâ ra mî: “Ûi ta hâ ǀamosib hoab kōse. Tsî ta ge ǁkhowa-amkha ǁōb tsî Hadeb tsîkha dikha ūhâ.” Lukab 8:31 ge ǁîb abisuǂgâb ǂamai ūhâ ǀgaib xa ra ǃhoa. Hebreǁîn 2:14 ge ra ǁgau ǁîb dīkākās di ǀgaiba ūhâsa tsîb Satanni tsîna a dīkākā ǁkhā ǃkhaisa. Nē xoas ge ra ǁgau Jesub ge ǀaob tsî ǁgan kai ǃkhaisa “ǁōb ǀkhab nî ǁnāb, ǁōb di ǀgaiba ūhâba hîkākāse, ǁgâuab ge a ǁî.” ǂHaiǂhais 19:11-16 ge ǃgāsase ra ǁgau Jesub ge Elob xa dīkākā-aob tamas ka io ǀgoraǃgâ-aob ase ǁgaumaihe ǃkhaisa.​—mû re APOLION.

Elobmîs khomai ǃâs

(ǂHaiǂhais 7:1-12) Tsî nēn khaoǃgâ ta ge haka ǀhomǃgāgu, haka ǁhôadi ǃhūbaib didi ai mâga ge mû, haka ǂoagu ǃhūbaib diga ra ǃkhōǀgaraǃâ, ǂoa-i xare-i ǃgom tidese ǃhūbaib ais karao, hurib ais karao, mâ hai-i hoa-i ǃoas karao. ² Tsî ta ge ǀnî ǀhomǃgāb, sores ra ǁhai ǀkhāba xu ra ǀkhība ge mû, ǂganamsaos ûitsama Elob disa ūhâba; tsîb ge kai dommi ǀkha ǁnā haka ǀhomǃgāgu, ǃhūb tsî hurib tsîkha gu nî ǂkhôaǂkhôase ī ǀgaiba māhe hâgu ǃoa ǂgai ³ tsî ge mî: Tā ǂkhôaǂkhôa ǃhūbaib karao, hurib karao, haidi karao, ǃgāgu sige Elob diga ge ǁîgu di ǃūdi ai nî ǂganamsaoǂnûis kōse. ⁴ Tsî ta ge saoǂnûihe hân di ǃgôaba ge ǁnâu: ǀGuikaidisi tsî hakadisihakaǀaǀoadisin Israeli ôan ǃhaodi hoadi din ge saoǂnûihe ge hâ i: ⁵ Judab ǃhaos din xan ge disiǀgamǀaǀoadisise saoǂnûihe hâ i; Rubenni ǃhaos din xan ge disiǀgamǀaǀoadisise saoǂnûihe hâ i; Gadi ǃhaos din xan ge disiǀgamǀaǀoadisise saoǂnûihe hâ i; ⁶ Aseri ǃhaos din xan ge disiǀgamǀaǀoadisise saoǂnûihe hâ i; Naftalib ǃhaos din xan ge disiǀgamǀaǀoadisise saoǂnûihe hâ i; Manaseb ǃhaos din xan ge disiǀgamǀaǀoadisise saoǂnûihe hâ i; ⁷ Simeonni ǃhaos din xan ge disiǀgamǀaǀoadisise saoǂnûihe hâ i; Levib ǃhaos din xan ge disiǀgamǀaǀoadisise saoǂnûihe hâ i; Isaskari ǃhaos din xan ge disiǀgamǀaǀoadisise saoǂnûihe hâ i; ⁸ Sebulonni ǃhaos din xan ge disiǀgamǀaǀoadisise saoǂnûihe hâ i; Joseb ǃhaos din xan ge disiǀgamǀaǀoadisise saoǂnûihe hâ i; Benjaminni ǃhaos din xan ge disiǀgamǀaǀoadisise saoǂnûihe hâ i. ⁹ Nēn khaoǃgâ ta ge ge kō; tsî mû, kai ǂnubis, khoe-i xare-i a ǃgôa ǁoas, ǀūbeǁaedi tsî ǃhaodi tsî ǁaedi tsî gowagu tsîn hoan dis ge trons tsî ǁKhaob aiǃâ ge mâ, ǃuri saraga ana hâse, tsî palmhais di ǂgonaga ǁîn ǃomǁae ūhâse. ¹⁰ Tsîn ge kai dommi ǀkha ǂgai tsî ge mî: ǃGâiǃōba ab sida Elob, trons ai ǂnôab di, tsî ǁKhaob di! ¹¹ Tsî ǀhomǃgāgu hoagu ge trons tsî ǂnomdomgu tsî haka ûitsamaga ge mâǂnamipe; tsî gu ge ǁîgu di ais ai ǁnā, tsî Eloba ǀgoreǀî, ¹² tsî ge mî: Amen, koas tsî ǂkhaisib tsî gā-aisib tsî gangans tsî ǃgôasib tsî ǀgaib tsî ǁkhāsib tsîna an sida Elob di ǀamosib hoab kōse! Amen.

DESEMBERI 9-15

ELOBMÎSA XU HÂ ǂÛǂÛSA MÎDI | ǂHAIǂHAIS 10-12

“‘ǀGam ǀhûǀguitimî-aokha’ ge ǃgamhe toa tsî ǁkhawa ge ûi-ûihe”

(ǂHaiǂhais 11:3) O ta nî ti ǀgam ǀhûǀguitimî-aokha ǀgaiba mā, o kha nî kēbo ǀguiǀoadisiǀgamkaidisi tsî ǃnanidisi tsēdi kōse; ǁhōgu ǀkha anahe hâse.

w14-E 11/15 30

Khomai-aon dîdi

ǀGam ǀhûǀguitimî-aokha hîna ǂHaiǂhais di 11ǁî danaǃâs ǃnâ ra mîhe kha a ham?

ǂHaiǂhais 11:3 ǃnâ i ge ǀgam ǀhûǀguitimî-aokha hîna 1 260 tsēde nî kēbo kha xa ra ǃhoahe. ǁNāpa xus ge xoasa ra ǁgau ǁîkha “ǀgurub” xa ‘danhe, tsî nî ǃgamhe’ ǃkhaisa. Xawe kha ge “ǃnona tsēdi tsî tsē-i ǃkhare-i” khaoǃgâ ǁkhawa nî ûi-ûihe. Nēs ge mûra khoen hoana nî buru kai.​—J.ǂHa. 11:7, 11.

ǀGam ǀhûǀguitimî-aokha a ham? Nē xoas ge nî huida i da ǃereamsa hō. ǂGurose da ge ra mîbahe ǁîkha ‘ǀgam ǀkherahaira tsî ǁnā ǀgam lamp ra’ xa ra ǂnûǁkhaebahe ǃkhaisa. (J.ǂHa. 11:4) Nēs ge Saxariab kēbos ǃnâ ra mîhe lamp ra tsî ǀgam ǀkherahaira xa ra ǂâi kai da. ǀKherahaira ge “ǀkherahais ǂgonakha” tamas ka io ǀgam ǂkhauhesa kha ra ǂnûǁkhaeba. Nē ǂkhauhesa kha ge ǂgaeǂgui-aob Serubabeli tsî ǀgapi pristeri Josuab tsîkha hîna “ǃKhūb ǃhūbaib hoaragab dib aiǃâ mâkha.” (Sax. 4:1-3, 14) ǀGamǁîse kha ge nē ǀgam ǀhûǀguitimî-aokha Moseb tsî Elijab tsîn gere dī buruxa dīga gere dī.​—ǂHaiǂhais 11:5, 6 ǀgopeǀnō re Numeri 16:1-7, 28-35 tsî 1 Gao-aogu 17:1; 18:41-45 ǀkha.

Tae-e nē xoadi hoadi ǃnâ ra mâǂoa? Nē xoadi hoadi ge ǂkhauhesan hîna Elob khoen ge ǃgom ǁaega gere hōǃâ ǁaeb ai gere ǂgaeǂguin ǃoa ra ǁnaeǁgau. Nēs ra ǂâibasens ge ǂkhauhesa ǃgâsagu hîna ge Elob Gaosib ge 1914ǁî kurib ǃnâ a ǂnûikhâihe ǁaeb ai Jehovab khoena gere daoǁgauga ‘ǁhōga’ ana hâse ǃnona tsî ǃkhare kuriga a aoǁnâsa. Nēs ǀkha gu ge nē kēbosa ge dīǀoaǀoa.

ǁHōgu ǃnâgu ge aoǁnâ toas khaoǃgâ gu ge ǂkhauhesa ǃgâsaga, kēbos ǃoagu ge ǃgamhe, ǃnupu ǁaeba gu ge ǃkhōsis ǃnâ ǂnôa i xui-ao. ǁNā ǃnupu ǁaeb ge kēbos ǃnâ ǃnona tsî ǃkhare tsēdi ǀkha ra ǀgau. Elob khākhoen ge kaise ge ǂkhî ǂkhauhesagu gere dī sîsen-i ge ǀam din ge ǂâi amaga.​—J.ǂHa. 11:8-10.

Kēbos ǃnâ ra ǂoaxase kha ge ǀgam ǀhûǀguitimî-aokha ǃnona tsî ǃkhare tsēdi khaoǃgâ ǁkhawa ge ûi-ûihe. Nē ǂkhauhesagu ge ǃkhōsisa xu ge ǂoaxa. ǂGomǂgomsase ge hâ ǃgâsan ge ǀō-aisa ǁgaumâisa Elob xa ge māhe, Jesub Xristub ǃnâ-ū. 1919ǁÎ kurib ǃnân ge ge “ǂgomǂgomsa tsî gā-ai ǃgāb” di ǃâ kai, hîna nē ǀuni tsēdi ǃnâ Elob khoena gagasise ra ǂûmāba.​—Mat. 24:45-47; J.ǂHa. 11:11, 12.

ǂHaiǂhais 11:1, 2 ge nē ǁaxasiga gagasi tempeli ge ǀnōhe ǁaeb ǀkha ra ǀgopeǀnō. Maleaxib di 3ǁî danaǃâs tsîn ge gagasi tempeli di ôaǃnâs tsî ǃanuǃanus xa ra ǃhoa. (Mal. 3:1-4) Nē ôaǃnâs tsî ǃanuǃanus di sîsen-e matikō ǁaeba ge ū? 1914ǁÎ kuriba xu 1919ǁî kurib tsoatsoas kōse ge hâ i. Nē ǁaeb ge 1 260 tsēdi (42 ǁkhâgu) tsî ǃnona tsî ǃkhare tsēdi hîna ǂHaiǂhais di 11ǁî danaǃâs ǃnâ ra mîhe di tsîna ǃkhōǂgā hâ.

Kaise da ge ra ǂkhî Jehovab ge ǁîb khoen hîna ǃgâi sîsenga ra dīna gagasise a ǃanuǃanu ǃkhaisa. (Titub 2:14) ǂKhauhesa ǃgâsagu hîna ge ǃgom ǁaegu ǃnâ ǀgam ǀhûǀguitimî-aokha ase ǂgomǂgomsase mâǀgai gu di ǃgâi aiǁgausa da ge ra ǃgôaǃgâ.

(ǂHaiǂhais 11:7) Tsî ǁîkha di ǀhûǀguitimîsa kha ga dītoao, ob ge ǀgurub, abisuǂgâba xu ra ǂoaxaba ǁîkha ǀkha torodī, tsî dan, tsî ǁîkha nî ǃgam.

(ǂHaiǂhais 11:11) Tsî ǃnona tsēdi tsî tsē-i ǃkhare-i khaoǃgâ i ge ûib di gaga-i, Eloba xu go ǀkhī-e ǁîkha ǃnâ ge ǂgâ, o kha ge ǁîkha di ǂaidi ai ge mâ; ob ge kai ǃaoba ǁîkha ra ǃgapaǀîn ai ge ǁnā.

Gagasi xūna ǀō-aisase ôaǃnâs

(ǂHaiǂhais 10:9, 10) O ta ge ǀhomǃgāb tawa sī tsî ǁîb ǁga ge mî: ǂKhanirosa mā te re! Ob ge tita ǃoa ge mî: Ū, î ǁîsa hapu, os ge sa ǃnāba nî au-au, xawe sa ams ǃnâs ge danib xase nî ǂkhon. ¹⁰ O ta ge ǂkhanirosa ǀhomǃgāb di ǃomǁaeba xu ū tsî ge hapu si; os ge ti ams ǃnâ danib xase ge ǂkhon, xawe haputoa si ta ge ǃnubaib ge ti ǃnāba ge au.

it-2-E 880-881

Scroli, ǂkhanis

ǁGauǁgaus ase ra sîsen-ūhe. “ǂKhanis” tamas ka io scroli ge Elobmîs ǃnâ ǂgui ǃnāde ǁgauǁgaus ase ra sîsen-ūhe. Esegieli tsî Saxaria hâkha ge scroli hîna hoa ǀgam ǀkhāga ai xoa-aihe hâba ge mû. Kai-amse i ge ǀgui ǀkhāb ai ǀgui ra xoahe. Hoa ǀgam ǀkhāga ai i xoahe hâ ǃkhais ge haisi-ams kaise a ǂhâǂhâsa ǃkhaisa ra ǁgau. (Ese. 2:9–3:3; Sax. 5:1-4) ǂHaiǂhais ǃnâ hâ ǁhapos ǃnâb ge trons ai ǂnôaba scroli hîna hû ǂganamsaode ūhâba amǀkhāb ǃomi ǃnâ ūhâ. Elob ǁkhaob ga nē saode ǁkhowa-am ǁaeb ai ǀguis ge haisi-amsa nî ǂhai. (J.ǂHa. 5:1, 12; 6:1, 12-14) ǁNā ǁhapos ǃnâb ge Johaneba ega scrola māhe tsî ge ǂû khaihe. ǂKhonseb gere ǁkhoa xawe ge Johaneb ǃnāba a au kai. Scroli ge ǂganamsa tama hâ i ǃkhais ge ra ǁgau ǁnā ǁaeb ais ga haisi-amsa ǁnâuǃāhe hâsa. ǁÎb ge ǁnā haisi-amsa ‘ǂkhonse’ ge hō, xawe ǁîsa kēbos ǃnâ mâǃkharus ge kaise ge au i. (J.ǂHa. 10:1-11) Esegieli ge ǁkhā xū-e ge hōǃâ “ǃgae-amdi tsî ǀhâimâinǀomdi” tsî tsûga ūhâ scrolab ge māhe o.​—Ese. 2:10.

(ǂHaiǂhais 12:1-5) Tsî i ge kai sao-e ǀhommi ǃnâ ge mûhe: Taras sores ǀkha anahe hâsa, tsî ǁkhâb ge ǁîs di ǂaira ǃnaga ge hâ i, tsî ǁîs di danas ai i ge kron-e ge hâ i disiǀgamǀa ǀgamiron ǀkha, ² tsîs ge ǀgamǀkhā ge i, tsîs ge ge ǂgai, ǁoratsûba ūhâse tsî tsûb ǃnâ hâse. ³ Tsî i ge ǀnî sao-e ǀhommi ǃnâ ge mûhe; tsî mû, kai ǀapa draki, hû danadi tsî disi ǁnâga ūhâb, tsî ǁîb di danadi ai hû gao-aosi kronde ūhâba; ⁴ tsî ǁîb di ǂareb ge ǀhommi ǀgamiron di ǃnonaǁî ǃâsa ǃkhara, tsî ǁîna ǃhūbaib ai ge aoǁnâ. Ob ge draka taras ǁora nîs aiǃâ ge mâ, îb ga, ǁoras gao, ǀgôaro-i âsa hapu, ti. ⁵ Os ge aore ǀgôaba ge ǁora, ǁaedi hoade ǂnūǀuri gaohais ǀkha nî gaoǂamma, tsîb ge ǁîs di ôaba Elob tsî trons âb ǃoa ge tsuwubēhe.

it-2-E 187 ¶7-9

ǀGôa-e hōs tsûgu

Apostel Johaneb ge ǁhapos ǃnâ ǀhommi ǃnâ “ǁoratsûba ūhâse tsî tsûb” ǃnâ hâ tarekhoesa ge mû. Aore ǀgôab ge ge ǃnaehe, “ǁaedi hoade ǂnūǀuri gaohais ǀkha nî gaoǂamma.” Draki ge ǀgôaba gere dīkākā ǂgao xaweb ge ǀgôaba “Elob tsî trons âb ǃoa ge tsuwubēhe.” (J.ǂHa. 12:1, 2, 4-6) ǀGôab ge Elob ǃoa a sī-ūhe ǃkhais ge re ǁgau ǁîb ge ūǃoahe ǃkhaisa. ǃKharu ge ǁaeb ǃnân ge ǀgôana aibe ǁgûba ǃoa gere sī-ūhe, ǁnās ǀkhab ge ǀgôa-e gere ūǃoa. (mû re ǃNAEHE.) Nēs ge ra ǂâibasen “taras” a Elob di kaikhoe di hîna “Jerusalems, ǀgapise hâs” Xristub tsî ǁîb ǃgâgasu di ǁgûs.​—Gal. 4:26; Heb. 2:11, 12, 17.

Elob di ǀhomsi “taras” ge ǀoasa kurusa nî ūhâ tsî ǀgôa-e hōs tsûga hōǃâ tide. ǀGôa-e hōs tsûgu ge “taras” ǃgao ǁgauǁgaus ase nî ī, hîna ǁîsa ra ǂanǂanga ǀgôa-es ǀgūǁae nî hōsa.​—J.ǂHa. 12:2.

“Aore ǀgôaba” nî ham-i? ǁÎb ge “ǁaedi hoade ǂnūǀuri gaohais ǀkha nî gaoǂamma.” Nēs ge Elob Gaosib di Gao-aob xa Psalmdi 2:6-9 tawa ge mîhe. Xaweb ge Johaneba nēsa ǁhapos ǃnâ ge mû Xristub ge ǃhūbaib ai ǃnaehe, ǁō tsî khâisa a hōs khaoǃgâ. Nē ǁhapos ge ǁnās ǀkha Elob di Gaosib Gao-aob Jesub Xristub di ǃnaesa ǃoa ra ǁnaeǁgau hîna ge khâisab ge hō o, “Elob amǀkhāb ǁôab ai ǀamos kōse ge ǂnû; tsî ǃaruǀî ra ǃâu, ǁîb di khākhoen nî ǁîb ǂaira di ǂaimâi-aidas ase ǁguihes kōse.”​—Heb. 10:12, 13; Psa. 110:1; J.ǂHa. 12:10.

Elobmîs khomai ǃâs

(ǂHaiǂhais 10:1-11) Tsî ta ge ǀnî ǀgaisa ǀhomǃgāb ra ǀhomma xu ǁgôaxa ǃkhaisa ge mû, ǀnanu-i ǀkha anahe hâba; tsî ǀapiǃhana-i ge danas âb ai ge hâ i, tsî ais âb ge sores khami ge ī i, tsî ǁîb di ǂaira ge ǀaexa ǂkhâǃnâhaira xase ge ī i; ² tsîb ge ǁîb di ǃommi ǃnâ ǂkhaniro-i ǁkhowa-amsa-e ge ūhâ i; tsîb ge amǀkhāb ǂais âba hurib ai, tsî ǁareǀkhāb disa ǃhūb ai ge mâi; ³ tsîb ge kai dommi ǀkha ge ǂgai, xammi ra ǃgurus ǁkhās xase; tsî ǂgaib geo, o gu ge hû ǃguruga ǁîgu di domga ge ǀō kai. ⁴ Tsî hû ǃgurugu ge domgu âga ǀō kaio, o ta ge ge xoaǁga, xawe ta ge ǀhomma xu dom-e ge ǁnâu, tita ǃoa ra mî-e: ǂGanam re hû ǃgurugu go mîna, î ǁîna tā xoamâi. ⁵ Tsî ǀhomǃgāb, hurib tsî ǃhūb tsîkha ai mâse ta ge mûb ge ǃommi âba ǀhommi ǃoa ge ǀhōǃapa; ⁶ tsîb ge ge nū ǀamosib hoab kōse ra ûib tawa, ǁnāb ǀhommi tsî ǁîb ǃnâ hân, tsî ǃhūbaib tsî ǁîb ai hân, tsî hurib tsî ǁîb ǃnâ hân tsîna ge kurub tawa, ǁae-i ǃaruǀî hâ tidesa; ⁷ xawe hûǁî ǀhomǃgāb dommi di tsēdi ai, xâib nî ǃnubaib ge Elob di ǂganǃgâsiba nîra dītoahe, ǁîb di ǃgāgu kēbo-aogab gere ǂhôa khami. ⁸ Tsî dommi, ǀhomma xu ta ge ǁnâub ge ǁkhawa tita ǀkha ǃhoa, tsî ge mî: ǃGûsī, î ǂkhaniros, ǁkhowa-amsa tsî ǁnā ǀhomǃgāb, hurib tsî ǃhūb tsîkha ai mâb di ǃommi ǃnâ hâsa ū. ⁹ O ta ge ǀhomǃgāb tawa sī tsî ǁîb ǁga ge mî: ǂKhanirosa mā te re! Ob ge tita ǃoa ge mî: Ū, î ǁîsa hapu, os ge sa ǃnāba nî au-au, xawe sa ams ǃnâs ge danib xase nî ǂkhon. ¹⁰ O ta ge ǂkhanirosa ǀhomǃgāb di ǃomǁaeba xu ū tsî ge hapu si; os ge ti ams ǃnâ danib xase ge ǂkhon, xawe haputoa si ta ge ǃnubaib ge ti ǃnāba ge au. ¹¹ Ob ge tita ǃoa ge mî: Sats ge ǁkhawa nî kēbo ǂgui ǁaedi tsî ǃhaodi tsî gowagu tsî gao-aogu tsîn ǂama.

DESEMBERI 16-22

ELOBMISA XU HÂ ǂÛǂÛSA MÎDI | ǂHAIǂHAIS 13-16

“Tā ǃaoǃaoxa ǀguruga ǃaore”

(ǂHaiǂhais 13:1, 2) Tsî ta ge huriba xub ǀguruba ra ǂoaxa ǃkhaisa ge mû, hû danadi tsî disi ǁnâga ūhâba, tsî ǁîb di ǁnâgu ai di ge disi gao-aosi kronde ge hâ i, tsî ǁîb di danadi ai di ge ǃkhāǃkhās di ǀonde ge hâ i. ² Tsî ǀgurub, mû ta geb ge ǀgarub xase ge ī i, tsî ǁîb di ǂaidi ge bēri ǂaidi xase ge ī i, tsî amǃnâb âb ge xammi di amǃnâb xase ge ī i; tsî draki ge ǁîba ǀgaib âb tsî trons âb tsî kai ǁkhāsib tsîna ge mā.

w12-E 6/15 8 ¶6

Jehovab ge ‘ǂganǃgâsiga ra ǂhaiǂhai’

⁶ Jesub khâis khaoǃgâb ge Jesuba apostel Johaneba ǂgui ǂoaǂamsa ǁhapode ge mā. (J.ǂHa. 1:1) ǀGui ǁhapos ǃnâb ge Johaneba ǁGâuaba draki aseb hurib ais ai mâ hîna ge mû. (Khomai re ǂHaiǂhais 13:1, 2.) Johaneb ge noxobab mû tsâ tama hâ ǀguruba ge mû hîna ge ǁnā huriba xu ǂoaxa tsî ǁGâuab xa ǀgaiba a māheba. ǀHomǃgāb ge ega Johaneba ge ǁguiǃāba hû danadi skarlakǀapa ǀgurub didi hîna ǂHaiǂhais 13:1 ǃnâ ra mîhe ǀgurub di īb ‘hû gao-aogu’ tamas ka io ǂhanuga ra ǂnûǁkhaeba ǃkhaisa. (J.ǂHa. 13:14, 15; 17:3, 9, 10) Johaneb ge nē ǂkhanisa gere xoa ǁaeb ai di ge korode ǀnai ge ǁnā hâ i, ǀguis ge ǁnā ǁaeb ai gere ǂgaeǂgui tsî ǀguis ge “gorose hā tama” ge hâ i. ǁNā gaosiga ge ham-i? ǀKhīre i da ǂHaiǂhais ǃnâ ra mîhe ǀgurub di danade ǀguiǀguibes ǃnâ ǃhoaǃgao. Danieli ge xoa xūn mati nē gaosigu xa ǃgāsasiba ra mâ ǀgaub tsîna da ge nî mû, ǀnî ǁaeba kurigu aisi.

(ǂHaiǂhais 13:11) Tsî ta ge ge mû, ǀnî ǀgurub ǃhūba xu ra ǂoaxa ǃkhaisa; tsîb ge ǀgam ǁnâkha ǁkhaob dikha xase īkha ge ūhâ i, tsîb ge draki xase ge ǃhoa.

(ǂHaiǂhais 13:15) Tsîb ge ge māhe, ǀgurub di ībab nî gaga-e māsa, ob ge ǀgurub di ība ǁkhāti ǃhoa tsî ge dī, ǁnān ǀgurub di ība ǀgoreǀî taman nî ǃgamhesa.

re-E 194 ¶26

ǀGam ǀgaisa ǀgurukha mâǃoa

²⁶ Tae-e i ra ǂâibasen? Anglo-American World Powers ge ǂguro ǀgurub dî hûǁî danas ǀkha a ǀgui xawe ǀō-aisa sîsen-e ūhâ. ǀGuri hâ ǀgurub ase da ga ǁîba a ūǃoa o, o da ge ǁîb ǃhūbaib ai ūhâ sîsenǂûiba ǃamkuse nî mû. Nē ǀgam ǁnâkha ūhâ ǀgurub ge ǀgam gaosikha hîna ǀgui ǁaeb ai ra ǂgaeǂgui xawe mâb hoaba ǀguri hâse ra sîsen kha ra ǂnûǁkhaeba. “ǁKhaob dikha xase” ī ǁnâkhab ūhâ ǃkhais ge ra ǁgau ǁîb tsaura tsî tsū dī tide tsîb ǂoaǂamsa ǂgaeǂguis hîna hoaraga ǃhūbaiba nî ǀamasab ūhâ khama ra dîsen. Xaweb ge “draki xase” ra ǃhoa ǁîb ǂgaeǂguis ūǃoahe tama ǃkhaib hoab aib ǃaogagas, ǁkhamasa mâsib tsî ǃgâi tama tanisen ǀgauga ra ūhâ xui-ao. Elob Gaosib nî saohe ǃkhaisa ǂkhâǃnâ tama i tsîb ge Satanni hîna a draka ǂgurose ra mâi. ǃHao ǀgoras tsî ǃhuigub tsînab ge ra omkhâi. Nēs ge ǀgurub di ǃoabasa ra ǂkhâǃnâ.

re-E 195 ¶30-31

ǀGam ǀgaisa ǀgurukha mâǃoa

³⁰ ǃKharuge ǁaeb ǃnâ ge ī xūn ge ra ǁgau nēs ge Britaini tsî Amerikab xa tsoatsoa-e hâ tsî ǂkhâǃnâ-e hâ ǀapeǂhumis hîna ǂgurose League of Nations di a ǂgaihesa ra ǂnûǁkhaeba ǃkhaisa. ǂHaiǂhais di 17ǁî danaǃâs ǃnâb ge ǀkhara ǁgauǁgausa ūhâ. Ûitsama skalakǀapa ǀgurub hîna ǀguri hâse ra sîsenni. Nē ǀapeǂhumis hîna ǃhūbaib ǂhabase hâ ǃnânde ǃkhōǂgâ hâs ge ǁîs ǀguis ǂkhîb tsî ǃnorasasiba ǃhūbaib ai nî hā-ū di ra mî. Xawen ge ǁanina kai-amse ǂkhaba tsî ra khôaǁnâgu. ǁAnin hîna ǁnâuǀnam ǂgao tama hân ge ǀapeǂhumisa xun nî ǃhaeǂûihe di ra mîbahe. League of Nations ge ǂgui ǃhūgu hîna ǁîs ra mî xūna sao ai tama hâ ga ge ǃhaeǂûi. Kai ǁgâiǀnāb tsoatsoas aib ge ǀgurub di īb di ‘ǁnâkha’ ǀgaisa sîsenǂûiba nî ūhâ.​—ǂHaiǂhais 7:14; 17:8, 16.

³¹ ǀGamǁî ǃhūbaib torob ǁaeba xub ge ǀgurub di īb hîna nēsi United Nations ǃnâ-ū ra sîsenna ǀnai ǂguina ge ǃgam. Aiǁgause, 1950ǁî kurib ǃnâs ge UN sa torob hîna North Koreab tsî South Koreab ǁaegu ge hâ īb ǃnâ ge ǃâ. UNs tsî South Koreab ge 1 420 000 ǃgôab ǃnâ hâ North Koreab tsî Chinab khoena ge ǃgam. 1960sa xu 1964ǁî kurib kose gu ge United Nations di soldaga Congo (Kinshasab) ǃnâ ge hâ i. Pristergu Paul VI tsî John Paul II hâkha tsîn ge nē ǀapeǂhumis ǃnû-ūn khoena hâ hâ nî ǂkhîba nî ūhâ di hâ ǂâisa ge mâ. Khoen ga ǁîs ǃnâga hâ tama ion ǃgâi ǀamǂoasa ūhâ tide din ge ra ǂgom. Nēs ǀkhan ge khoen hîna nē ība ǃoaba tsî ǁnâuǀnam tamana ǁgauǁgaus ase ǃgamhe hâ.​—Deuteronomium 5:8, 9.

(ǂHaiǂhais 13:16, 17) Tsîb ge ra dī, on ǂkharin tsî kain, ǃkhū hân tsî ǀgâsan, ǃnorasan tsî ǃgān tsîn hoana sao-e ǁîn di amǀkhāb ǃommi tsî ǁîn di ǃūdi ai māhe, ¹⁷ khoe-i xare-i ǁama tsî ǁamaxū tidese, ǁnā-i sao-i kas, ǀgurub di ǀons kas, ǁîb ǀons di ǀgaus kas hoasa ūhâ-i ǀgui-i.

w09-E 2/15 4 ¶2

ǂHaiǂhais ǂkhanisa xu ra mâǂoa dana ǂâidi—II

13:16, 17. Tsēkorobe da ra dī xun aiǁgause ‘ǁama tsî ǁamaxūs’ a ǃgom xawe da ge tā ǀguruba nî mā-am îb sida ûiga ǂgaeǂgui. Sao-e da ga “amǀkhāb ǃommi tsî . . . ǃūdi ai” a māhe o, o da ge ǀguruba ra mā-am îb sida dīgu tsî ǂâi ǀgauba ǂgaeǂgui.

Gagasi xūna ǀō-aisase ôaǃnâs

(ǂHaiǂhais 16:13, 14) Tsî ta ge ge mû, draki di ams tsî ǀgurub di ams tsî ǂkhaba kēbo-aob di amsa xu gu ǃnona ǃanuoǃnâ gagagu, ǁgūtsiǁgūben khami īga ra ǂoaxa ǃkhaisa; ¹⁴ ǁgâuagagagu a ǁî xui-ao, saode ra dīga, ǃhūbaib di gao-aogu tsî ǃhūbaib hoaragab kōse ra ǂoaga, ǁnā kaitsēs Hoaǀgaixa Elob dis di torob ǃoa gu nî ǁîna ǀhaoǀhaose.

w09-E 2/15 4 ¶5

ǂHaiǂhais ǂkhanisa xu ra mâǂoa dana ǂâidi—II

16:13-16. “ǃAnuoǃnâ gagagu” ge ǁGâuab nî dī xun hîna ǃhūbaib di ǂgaeǂgui-aogu ǂâide Elob ǁaib di ǃorede nî ǁhōǂûi ǃkhaisa mûǂân tama is ǃnâ ra ǂgom kai tsî nēs ǀkha ǁîga Jehovab ǃoa-ai ra dawasen kai.​—Mat. 24:42, 44.

(ǂHaiǂhais 16:21) Tsî kai ǃnareb mâb hoab korodisi kiloxramgu kōse a ǃgommi ge ǀhomma xu khoen ai ge ǁnā; on ge khoena Eloba ǃnareb di tsûtsû-ais ǃaroma ge ǃkhāǃkhā, ǁîb di tsûtsû-ais ge kaise kai i xui-ao.

w15-E 7/15 16 ¶9

“Sadu ores go ǀgū xuige”

⁹ “ǃGâiǂhôas gaosib dis” ge ǁnā ǁaeb ai aoǁnâhe tide. ǁNāsa dīs di ǁaeb go ǃkharu amaga. ‘ǀAms’ di ǁaeb ge go hā. (Mat. 24:14) Amasen ge Elob khoena ǀaexa haisi-ams, “kai ǃnareb” khama īsa nî ǂhôa. ǁNā ǁaeb ǃnâb ge Satanni di eloxoresa ǃhūbaib di ǀams go ǀkhīsa ǀnîsi nî ǂhôahe. Elobmîs ge nē haisi-amsa ǃnareb ǀkha ra ǀgopeǀō tsî ra mî: “Tsî kai ǃnareb mâb hoab korodisi kiloxramgu kōse a ǃgommi ge ǀhomma xu khoen ai ge ǁnā; on ge khoena Eloba ǃnareb di tsûtsû-ais ǃaroma ge ǃkhāǃkhā, ǁîb di tsûtsû-ais ge kaise kai i xui-ao.”​—J.ǂHa. 16:21.

Elobmîs khomai ǃâs

(ǂHaiǂhais 16:1-16) Tsî ta ge tempela xu kai dom-e ge ǁnâu, hû ǀhomǃgāgu ǃoa ra mî-e: ǃGûsī, î hû ǃoredi Elob ǁaib dide ǃhūbaib ai ǁhōǂui! ² Ob ge ǂguroba ǃgûsī, tsî ǃores âba ǃhūbaib ai ge ǁhōǂui; ob ge tsū tsî tsûtsûsa ǀhapina ǁnā khoen ai ge hā, ǀgurub di saosa ūhân, tsî īb âba ra ǀgoreǀîn ai. ³ Tsîb ge ǀgamǁî ǀhomǃgāba ǃores âba hurib ǃnâ ge ǁhōǂui; ob ge ǁō hâ-i di ǀaob khami ge i; tsî mâ ûitsama xū-i hoa-i ge hurib ǃnâ ge ǁō. ⁴ Tsîb ge ǃnonaǁî ǀhomǃgāba ǃores âba ǃāgu ǃnâ tsî ǁgamǀaudi ǃnâ ge ǁhōǂui; o gu ge ǁgamga ge ǀao kai. ⁵ Tsî ta ge ǁgamgu di ǀhomǃgāb ra mî ǃkhaisa ge ǁnâu: ǂHanu-aits ge a, ǃKhūtse, sats hâ ats, tsî hâ ge its, sats ǃanutsa, nēnats go ǀgoraǃgâ ǃkhais ǃaroma; ⁶ ǃanun tsî kēbo-aogu di ǀaoban ge ǂnâxū amagats ge ǁîna ǁkhāti ǀaoba go āsi, ǁîsan a anu xui-ao. ⁷ Tsî ta ge ǀnîba altarsa xub ra mî ǃkhaisa ge ǁnâu: Ā, ǃKhūtse, Hoaǀgaixa Elotse, sa ǀgoraǃgâdi ge a ama-ai tsî ǂhanu-ai. ⁸ Tsîb ge hakaǁî ǀhomǃgāba ǃores âba sores ǃnâ ge ǁhōǂui; os ge ǀgaiba ge māhe, khoena ǀaes ǀkha ǂhubisa; ⁹ on ge khoena kai ǀgammi ǀkha ge ǂhubihe, on ge Elob, nē tsûtsû-aidi ǂama ǀgaiba ūhâb di ǀonsa ge ǃkhāǃkhā; tsîn ge ǃhobasen tama, ǁîban nî ǂkhaisiba māse. ¹⁰ Tsîb ge koroǁî ǀhomǃgāba ǃores âba ǀgurub di trons ǂamǃnâ ge ǁhōǂui; ob ge gaosib âba ge ǃkhaeǃkhaehe; on ge namdi âna tsûb xa ge nâǂkhū. ¹¹ On ge ǀhommi di Eloba ge ǃkhāǃkhā ǁîn di tsûgu tsî ǁîn di tsuigu ǃaroma; tsîn ge ǁîn di sîsenga xu ǃhobasen tama ge i. ¹² Tsîb ge ǃnaniǁî ǀhomǃgāba ǃores âba kai ǃāb Eufrati ǂamǃnâ ge ǁhōǂui; ob ge ǁgammi âba ge ǂnâ, aiǂoasa xu ga hā gao-aogu nî daoba ǁāǁābahega. ¹³ Tsî ta ge ge mû, draki di ams tsî ǀgurub di ams tsî ǂkhaba kēbo-aob di amsa xu gu ǃnona ǃanuoǃnâ gagagu, ǁgūtsiǁgūben khami īga ra ǂoaxa ǃkhaisa; ¹⁴ ǁgâuagagagu a ǁî xui-ao, saode ra dīga, ǃhūbaib di gao-aogu tsî ǃhūbaib hoaragab kōse ra ǂoaga, ǁnā kaitsēs Hoaǀgaixa Elob dis di torob ǃoa gu nî ǁîna ǀhaoǀhaose. ¹⁵ Mû, ǃnari-ao-i khami ta ra hā; ǃgâiǃō i ge hâ, ǂkhaikari hâ-e tsî ǁî-i sarana ra sâu-e, ǀōǀkhāse i ǃgû tidega, tsî ǁî-i taosib mûhe tidega. ¹⁶ Tsîn ge ǁîna ge ǀhûǀhû, ǃās Hebreǁî gowab ǃnâ Armagedon ti ra ǂgaihes tawa.

DESEMBERI 23-29

ELOBMISA XU HÂ ǂÛǂÛSA MÎDI | ǂHAIǂHAIS 17-19

“Elob di torob ge hoa toroga nî ǀam kai”

(ǂHaiǂhais 19:11) Tsî ta ge ǀhomma ǁkhowa-amsen hâse ge mû; tsî kō, ǃuri hāb, tsî ǁîb ai ǂnôab ge ǂGomǂgomsab tsî Amab ti ra ǂgaihe, tsîb ge ǂhanu-aisib ǃnâ ra ǀgoraǃgâ tsî torodī.

(ǂHaiǂhais 19:14-16) Tsî ǀhommi ǃnâ hân di ǂnubidi ge ǁîba ǃuri hān ai ge sao, ǂkhaisa tsî ǃanu ǁga ǃuri ǃkhaiga ana hâse. ¹⁵ Tsî ǁîb di amsa xub ge ǀā gôaba ge ǀkhī, ǁîb ǀkhab nî ǃhaode ǂnause; ob ge ǁîna ǂnūǀuri gaohais ǀkha nîra ǂgaeǂgui; tsîb ge ǀāǃnâǃores kaise kai ǁaib ǂauxûib Hoaǀgaixa Elob dib disa ra dāǃnâ; ¹⁶ tsîb ge sarab âb ai tsî kamanab âb ai xoamâisa ǀon-e ūhâ: Gao-aogu di Gao-aob, tsî ǃkhūgu di ǃKhūb ti.

w08-E 4/1 8 ¶3-4

Armagedons—Elob torob hîna hoa toroga nî ǀam kaib

Eloxoresa khoen ra ǂgaeǂguis kōsen ge ǂhanu-ai khoena ǂkhîb tsî ǃnorasasiba hōǃâ tide. (ǂKhoamîdi 29:2; Aoǁnâ-aob 8:9) ǂHanuoǃnâ dīgu tsî eloxoresasiba da ge khoen hîna ǁnā xuna ra dīna xu a ǀgoraǁoa. ǁNās ǀkha da ga hâ hâ nî ǂkhîb tsî ǂhanu-aisiba a ǂhawa o, on ge eloxoresa khoena nî ūbēhe. “Eloxoresab ge a ǂhanu-ain di xoremari” dib ge Salomoba ge xoa.—ǂKhoamîdi 21:18.

Elob a ǀgoraǃgâ-ao amaga da ge a ǂgomǃgâ ǁkhā eloxorasan ǂhanu-aise nî ǀgoraǃgâhe ǃkhaisa. “ǁNâi ǂhanuǂhanu-aob ǃhūbaib hoaragab diba kha ǂhanuseb sîsen tide?” dib ge Abrahamma ge dî. Abrahammi ge ge mû Jehovab hoa ǁae a ǂhanu ǃkhaisa. (Genesis 18:25) Elobmîs ge ra ǁgau Jehovab eloxoresa khoena dīkākās ǃnâ ǃgâiǃgâibasen-e ūhâ tama hâ ǃkhaisa. ǁÎb ge nēsa ǀūniga xū-i ase ra dī.—Esegieli 18:32; 2 Petrub 3:9.

it-1-E 1146 ¶1

Hāb

Apostel Johaneb ge ǁhāpos ǃnâ Jesuba ǃuri hāb ai ra ǃgapise tsî toro ǃgam-aogu hîna ǁîgu tsîna ǃuri hāgu ai ǂnôagu ǀkha hâse ge mû. Nē ǁhāpos ge Johaneba gere ǁgau Xristub ǁîb ǁgûb mā-ams ǀkha nî ǃkham torob ǂhanu-aisib ǃgao nî ǃkhamhe ǃkhaisa. (J.ǂHa. 19:11, 14) Xristub ge gao-aose a sîsen tsoatsao tsî ǁnāsa ge sao ǁgâiǀagu ge ǃkharagaǃnâgu hāgu tsî ǁîgu di ǃgapi-aogu xa ra ǂnûǁkhaebahe.—J.ǂHa. 6:2-8.

(ǂHaiǂhais 19:19, 20) Tsî ta ge ǀgurub tsî ǃhūbaib di gao-aogu tsî ǁîgu di toroǂnubidi tsîna ǀhû hâse ge mû, toroban nî dīse ǁnāb, hāb ai ǂnôab tsî ǁîb di toroǂnubis ǃoagu. ²⁰ Ob ge ǀguruba ge ǃkhōhe tsî ǂkhaba kēbo-aob ǁîb ǀkha, ǁîb mûǁae gere saode dība, ǁîdi ǀkhab ge ǀgurub di saosa ge ǃkhōǃoan tsî īb âba ge ǀgoreǀîna ǂgaeǂhapude; o kha ge ǁî ǀgamkha ûitsamase ǀaes hurib, sulfuri ǀkha ra khaub ǃnâ ge aoǂgāhe;

re-E 286 ¶24

Armagedons aib ge Gao-aoba ra dan

²⁴ Hû danadi tsî dîsi ǁnâga ūhâ ǀgurub hîna ge huriba xu a ǂaoxab hîna Satanni di ǂgīǂgōsi ǀapeǂhumisa ra ǂnûǁkhaebab ge ǀūǃgâsib ǃnâ nî ǂgâ. Ama tama kēbo-aogu tsî hûǁî ǃhūbaib ǂgaeǂgui-aob tsîn ge ǁkhā mâsib ǃnâ nî hâ. (ǂHaiǂhais 13:1, 11-13; 16:13) “Ûitsamase” tamas ka io noxoba gu Elob khoena ra ǁgâiǀa hîna gu ge “ǀaes tsî sulfuri di ǀaus” ǃnâ nî aoǂgāhe. Nē ǀausa ǁgauǁgaus ase ī? Ama tama ǀgurub kēbo-aoba ra ǂnûǁkhaeba khami ǀguis ge nē ǀausa ǁgauǁgaus ase ī. Nēs ge hoase dīkākāhes, ǁkhawa ûis di ǃē-i a ǀgai mâsiba ra ǂnûǁkhaeba. Nēpab ge ǁōb, Hadeb tsî ǁGâuab tsîna ēga nî aoǂgāhe. (ǂHaiǂhais 20:10, 14) Nēb ge kai ǀaeb hînan Eloxoresana ǀamosib kōse ǁkhara ǃnâhe tamaba. Nē ǂâiǀgaub Jehovaba a ui-uisaba amaga.—Jeremiab 19:5; 32:35; 1 Johaneb 4:8, 16.

(ǂHaiǂhais 19:21) Tsî naun ge ge ǃgamhe ǁnāb, hāb ai ǂnôab di gôab, ams âba xu ra ǂoaxab ǀkha; tsî anin hoan ge ǁîn di ǁgans xa ge ǁâ.

re-E 286 ¶25

Armagedons aib ge Gao-aoba ra dan

²⁵ ǁNān hîna ǀūǃgâse nē ǂhanuba gere ǂkhâǃnân ge nî “ǃgamhe ǁnāb, hāb ai ǂnôab di gôab” ǀkha. Jehovab ge ǁîna ǁōba anu hase nî ǀgoraǃgâ. ǁÎn xa i ǀaexa ǀaus xa ǃhoa-e tama hâ amaga da khâisan nî hō ǃkhaisa nî ǃâubasen? Jehovab xa ǀgoraǃâ-aob ase ǁgaumaihe hâb xa nî dīkākā-e khoen di khâisa hōs xas ge Elobmîsa ǃhoa tama. Jesub ge mî khami, ‘gūn’ ase ūǃoahe taman hoan ge “ǀamoǀaeb ǁgâuab tsî ǁîb ǃgāga ǂhomibahe hâba” nēb ge ‘ǀamo ǁkharaba’ ǃoa nî ǃgû. (Mateub 25:33, 41, 46) Nēs ǀamǂgoas ge “ǀgoraǃgâtsēs tsî eloxoresa khoen di kāǁōtsēs” ǃoa ra ǁnaeǁgau.—2 Petrub 3:7; Nahummi 1:2, 7-9; Maleaxib 4:1.

Gagasi xūna ǀō-aisase ôaǃnâs

(ǂHaiǂhais 17:8) ǀGurub mûts gob ge hâ ge ib tsî hâ tamaba; tsîb ge abisuǂgâba xu ǀkhī tsî nî kāǁō; tsîn ge ǃhūbaib ai ǁan hâna nîra buru, ǁîn di ǀondi ǃhūbaib di ǃgaoǃgaosa xu ûib di ǂkhanis ǃnâ xoaǂgāhe tamana, ǁnā ǀgurub, hâ ge ib tsî hâ tamaba tsî nîra hâban ga mûo.

re-E 247-248 ¶5-6

ǂGānǃgâsib ǃnâ ge hâ-i xu-e ǁnâuǃnās

⁵ “ǀGurub . . . ge hâ ge ib.” Î, ǁîs ge League of Nations ase Januarib 10, 1920ǁî kuriba xu ge hâ i. ǁÎs ge 63 ǃhūga ǁanin ase ge ūhâ i. Xawe Japanni, Germanib tsî Italib ge ge ǂgae-oasen. ǂGurokham Soviet Unions ge ge ǃhaeǂûihe. Septemberi, 1939ǁî kurib ǃnâb ge Germanib ǂgaeǂgui-aoba ǀgamǁî ǃhūbaib toroba ge tsoatsoa. ǃHūbaib ais ge ǂkhîba ǀkhī-ū hō tama hâ i amagas ge abisuǂgâb ǃnâ ge ǂgâ, xu-ets a dīǁoa mâsib ǃnâ. 1942ǁî kurib ǃnâs ge ǀnai ge ǃkharu xū-i ase ge mûhe. ǁNā ǁaeb ǂûb aib ge Jehovaba nē ǁhāpos di ǂâibasensa ǁîb khoena ge ǃgāsa kaiba. ǃGâsab N. H. Knorri ge New World Theocratic ǂkharis ǀhaos tawa ‘ǀgurub . . . tsî hâ tamab’ xa gere ǃhoa. ǁÎb ge ge dî, “League ga abisuǂgâb ǃnâ nî hâ toa?” ǂHaiǂhais 17:8 sa ǃoa ra ǁnaeǁgauseb ge ge ǃeream: “ǃHūbaib di ǁaedi ǂnubis ge ǁkhawa nî ǀkhī.”

Abisuǂgâba xu ra ǂoaxa

⁶ Skarlakǀapa ǀgurub ge abisuǂgâba xu ge ǂoaxa. Junib 26, 1945ǁî kurib ǃnâ gu ge 50 ǃhūga San Francisco, Amerikab ǃnâ ǀhao tsî United Nations di tsoatsoahesa ge ǁhûi. Nē ǀapeǂhumis ge “ǃhūbaib ǂhawase ǂkhîb tsî ǃnorasasiba nî ūhâ ǀgara.” UNs tsî League of Nations ge ǂgui ǀgaugu ǃnâ a ǀgui. The World Book Encyclopedias ge ra mî: “ǀNî ǀgaugu ǃnâs ge UN sa League of Nations hîna ge ǀgamǁî ǃhūbaib torob khaoǃgâ a ǂoaxas ǀkha a ǀgui. ǂGui ǃhūgu hîna ge UN sa a tsoatsoa gu ge League of Nations sa ge tsoatsoa. League of Nations khamis ge UN sa ǃhūgu ǁaegus ǂkhîba nî ūhâ ǀgara ga ge tsoatsoahe. UNs tsoatsoa-aon ge League of Nations din ǀkha a ǀgui.” UNs ge ǁnās ǃaroma skarlakǀapa ǀgurub hîna ge oaǀkhîba. UNs ge 190 ǁani ǃhūga ūhâ. League of Nations ge 63 ǁaniga ge ūhâ i. UNs ge ǃnāsa sîsen-e ra dī.

(ǂHaiǂhais 17:16, 17) Tsî disi ǁnâgu, ǁîgats go ǀgurub ai mûgu ge ǀai-aosa ǁkhan tsî nîra ǀguriǃgâ kai tsî ǀōǀkhā kai si; tsî gu ge ǁîs di ǁgansa ǂû tsî ǁîsa ǀaes ǀkha nîra khauǃkhū. ¹⁷ Elob ge ǁîgu di ǂgaogu ǃnâ mā xui-ao, ǁîb di ǂâisa gu nî dīsa, tsî ǀgui ǂâis ǀguisa gu nî dīsa, tsî ǁîgu di gaosisa gu nî ǀguruba māsa; Elob di mîdi nî dītoahes kōse.

w12-E 6/15 18 ¶17

Jehovab ge “ǃhaese nîra īna nî” ǁgau

¹⁷ Ama tama ǂgomdi ge bēs ǀguisa dī tide. ǀAi-aos ge kai sîsenǂuiba noxaba gao-aogu ai nî ūhâ. ǁÎs ge nî gao-gaosen Jehovab gao-aogu di ǂgaogu ǃnâs ǀkhara ǂâi-e nî ǂgās kōse. (Khomai re ǂHaiǂhais 17:16, 17.) Jehovab ge ǀgūǁae Satanni ǃhūbaib di polotieks hîna United Nations xa ra ǂnûǁkhaebahesa nî sîsen-ū, îb ama tama ǂgomde ǁnāǂam. ǁÎn ge ǁîs ūhâ ǀgaiba nî ūbē tsî ǁîs ǃkhusisa nî dīkākā. ǁNāti i xū-i ge disi kuriga ǃkharu hâse ga ǃâubasen-e tama hâ. Nētsēs ge kai ǀai-aosa skarlakǀapa ǀgurub di ǁâb ai ǂnû tsî ra an. Xawes ge ǂause ǁnās ǂnôa ǃkhaisa xu ǁgôa tide. ǁÎs ge ǃhaese tsî ǁgaise nî ǁnâ.—J.ǂHa. 18:7, 8, 15-19.

Elobmîs khomai ǃâs

(ǂHaiǂhais 17:1-11) Tsî ǀguib hû ǃorede ūhâ ǀhomǃgāgu dib ge hā, tsî tita ǀkha ǃhoa, tsî ge mî: Nēxopa ī, o ta ge kai ǀai-aos ǂgui ǁgamgu ai ǂnôas di ǀgoraǃgâhesa nî ǁgau tsi, ² ǃhūbaib di gao-aogu ǁîs ǀkha ge ǀaigus, tsî ǃhūbaib ai ǁan hân ge ǁîs ǀaib di ǂauxûib xa ǀhoro kaihesa. ³ Tsîb ge Gagas ǃnâ ǃgaroǃhūb ǃoa ge ūǃgû te, o ta ge tara-e ge mû, skarlakǀapa ǀgurub ǃkhāǃkhāǀondi xa ǀoa hâb tsî hû danadi tsî disi ǁnâga ūhâb ai ǂnôase. ⁴ Tsîs ge tarasa purpuri tsî skarlaki tsîkha ǀkha anahe, tsî ǃhuniǀurib tsî anusa ǀuidi tsî karan tsîn ǀkha ge anihe hâ i, tsîs ge ǁîs di ǃomǁae ǃhuniǀuri ǀgabi-i, ǁgaidīgu tsî ǃanuoǃnâsigu tsî ǀaib âs tsîn xa ǀoa hâ-e ge ūhâ i; ⁵ tsî ǁîs di ǃūs ai i ge ǀon-e ge xoamâihe hâ i: ǂGanǃgâsib; Babilons kais, ǀaigu tsî ǃhūbaib ǁgaidīgu di îs ti. ⁶ Tsî ta ge ge mû, taras ǃanun di ǀaob tsî Jesub ǃkhō-amaon di ǀaob xa ǀhoro hâsa; tsî mû si ta geo, o ta ge kaise ge buru. ⁷ Ob ge ǀhomǃgāba tita ǃoa ge mî: Tare xū-i ǃaromats ra buru? Tita ge nî mîba tsi ǂganǃgâsib taras dib, tsî ǁîsa ra tani ǀgurub, hû danadi tsî disi ǁnâga ūhâb diba. ⁸ ǀGurub mûts gob ge hâ ge ib tsî hâ tamaba; tsîb ge abisuǂgâba xu ǀkhī tsî nî kāǁō; tsîn ge ǃhūbaib ai ǁan hâna nîra buru, ǁîn di ǀondi ǃhūbaib di ǃgaoǃgaosa xu ûib di ǂkhanis ǃnâ xoaǂgāhe tamana, ǁnā ǀgurub, hâ ge ib tsî hâ tamaba tsî nîra hâban ga mûo. ⁹ Nēpab ge ǁnâuǃāba hâ, gā-aisi-e ūhâba: ǁNā hû danagu ge hû ǃhomga, ǁîgu ais tarasa ǂnôaga; ¹⁰ tsî gu ge ǁkhāti a hû gao-ao; korogu ge ge ǁnā, tsî ǀguib ge hâ, tsî naub ge gorose hā tama hâ, tsî hāb kao, ob ge ǂkhari ǁaerob ǀguiba nîra hâ. ¹¹ Tsî ǀgurub, hâ ge ib tsî hâ tamab, ǁîb ge a ǁkhaisaǁî gao-ao, tsîb ge a hûgu di, tsîb ge kāǁōsib ǃoa ra ǃgû.

DESEMBERI 30–JANUARIB 5

ELOBMISA XU HÂ ǂÛǂÛSA MÎDI | ǂHAIǂHAIS 20-22

“Mû, hoana ta ra ǀasa kai”

(ǂHaiǂhais 21:1) Tsî ta ge ǀasa ǀhom-i tsî ǀasa ǃhūbai-i tsîna ge mû. ǂGuro ǀhommi tsî ǂguro ǃhūbaib tsîkha go ǃgû-ī, tsî hurib ge ǃaruǀî ǀkhai i xui-ao.

re-E 301 ¶2

ǀAsa ǀhommi tsî ǀasa ǃhūbaib

² ǀOadisidi kurigu Johaneb nî ǃnaehes aisib ge Jehovaba Jesajaba ge mîba: “Tsî kō tita ge ǀasa ǀhommi tsî ǀasa ǃhūbaib tsîga ra kuru, tsî aibekam xūn xa i ge ǃaruǀî ǂâihe tide, tsîn ge ǂgaob ǃnâ khâi tide.” (Jesajab 65:17; 66:22) Nē kēbos ge 537ǁî kurib ǃnâ ge dīǀoaǀoahe Jodeǁîn ge Babilons 70 kurigu ǃkhōsisa xu a oaǀkhî o. Oaǀkhîn ge on ge ǀasa ǃanu ǀhûhâsiba ge kuruǂûi, ‘ǀasa ǃhūbaiba’ ǀasa ǂgaeǂguis ǃnâga, “ǀasa ǀhommi.” Apostel Petrub ge kēbos noxoba nî sîsenǂûi ǀgaub xab ge ǃhoa o nēti ge mî: “Xawe da ge ǁîb di mîmâisa ǃoa ǀasa ǀhommi tsî ǀasa ǃhūbaib tsîkha, ǂhanu-aisib ǁanǃnâ hâkha ra ǃâubasen.” (2 Petrub 3:13) Johaneb ge ra ǁgau nē kēbos ǃKhub tsēs ǃnâ nî dīǀoaǀoahe ǃkhaisa. “ǂGuro ǀhommi tsî ǂguro ǃhūbaib tsîkha” hîna Satanni di ǂgaeǂguisa ra ǂnûǁkhaebab ge nî ǀam. Hurib hîna eloxoresa tsî mâǃoaxa khoena ra ǂnûǁkhaebab ge nî dīkākāhe. ǁNān soas ai i ge ‘ǀasa ǀhommi tsî ǀasa ǃhūbaiba’ nî hā. Nēb ge ǀasa ǀhûhâsib hîna Elob Gaosib ǂgaeǂguis ǃnâga nî hâba.​—ǀGopeǀnō re ǂHaiǂhais 20:11.

(ǂHaiǂhais 21:3, 4) Tsî ta ge ǀhomma xu kai dom-e ge ǁnâu, nēti ra mî-e: Mû, tabernakeli Elob dib ge khoen tawa hâ, ob ge ǁîn ǁaegu nî ǁan, on ge nî ǁîb di ǁae, ob ge Elob ǂûba ǁîn ǀkha nî hâ; ⁴ ob ge Eloba mûdi âna xu ǁgamron hoana nî ǀombē; ob ge ǁōba ǃaruǀî hâ tide, tsî ǃoa-i xare-i tsî ā-i xare-i tsî ǃgomsi-i xare-i ǃaruǀî hâ tide; ǂguron go ǃgôa-ī xui-ao.

w13-E 12/1 11 ¶2-4

“Mû, hoana ta ra ǀasa kai”

“Ob ge Eloba mûdi âna xu ǁgamron hoana nî ǀombē.” (ǂHaiǂhais 21:4) Tae-i xa ra ǃaromahe ǁgamronab nî ǀombē? ǂKhîb xa ra ǃaromahe tamas ka io mûde ǂuruse ra ūhâ ǁgamron ose. Elob di mîmâis ge ǃgomsigu tsî tsûaǂgaob xa ra ǃaromahe ǁgamrona ǃoa ra ǁnaeǁgau. Elob ge ǁgamrona ǀombēs ǀguisa dī tide xawe ǁnā ǁgamrona ra ǃaroma ǃgomsigu tsî tsûaǂgaob tsîna nî ūbē.

“Ob ge ǁōba ǃaruǀî hâ tide.” (ǂHaiǂhais 21:4) Tae-e ǁōb xa ǃnāsa ǁgamrona ra ǃaroma? Jehovab ge ǁnâuǀnamxa khoena ǁōba xu nî ore. Mati? ǁŌba ge tsoatsoas ǃnâ a ǃaroma xū-e ūbēs ǃnâ-ū, nēb ge Adamma xu ge ǀumi-e ǁoreba. (Romeǁîn 5:12) Jehovab ge Jesub di xoremarib ǁguibas ǃnâ-ū ǁnâuǀnamxa khoena ǀoasa kurusa nî mâ. ǁNāpaxūb ge ǁōb hîna a ǀuniga khākhoeba nî “hîkākāhe.” (1 Korinteǁîn 15:26) ǂGomǂgomsa khoen ge ǀoasa ǂurisiba ūhâse Elob ge ǂhâba hâ i khami nî ûi.

“ǃGomsi-i xare-i . . . ǃaruǀî hâ tide.” (ǂHaiǂhais 21:4) Tae ǃnôa tsûba da hōǃâ tide? ǂGaob, ǂâidi tsî soros ǃnâ da gere hōǃâ tsûgu hîna ǀumi da ge ǁoreb xa ǃaromahe hâna. Nē tsûgu ge miluindi khoen ûiga ǁkhoa-o kai hâ.

(ǂHaiǂhais 21:5) Tsî trons ai ǂnôab ge ge mî: Mû, hoana ta ra ǀasa kai. Ob ge tita ǃoa ge mî: Xoa re, nē mîdi a ama tsî ǂgomǂgomsa xuige.

w03-E 8/1 12 ¶14

Jehovab ge amab di Eloba

¹⁴ Jehovab ǁîb mîs ǃnâ ra mîbada xūna da ge ǂgaob ǀkha nî ū. ǁÎb ge mîb ra khami i tsî dīb nî dib ra mî xūna nî dī. Amase da ge Eloba a ǂgomǃgâ ǁkhā. ǂGomǃgâ ǁkhā da ge a “Eloba ǂan tamanab nî ǀkhaose, tsî sada ǃKhūb Jesub Xristub di ǃgâiǂhôasa ǁnâuǀnam taman” tsîna. (2 Tesalonikaǁîn 1:8) Jehovaba da ge a ǂgom ǁkhā ǂhanu-aisib ǃnâ ra ûi khoenab a ǀnam dib ra mî o. Tsî ǁîn ǂgoms ǃoa ai ra ûi khoenab ǀamo ûiba nî mā tib ra mî o. Tsîb tsûb, ā-i tsî ǁōb tsîna nî ūbē ǃkhaisa. Jehovab ge nē ǀuniga mîmâisa da a ǂgomǃgâ ǁkhā ǃkhaisa Johanebab ge dī kai xū-i ǀkha ge ǁapoǁapo: “Xoa re, nē mîdi a ama tsî ǂgomǂgomsa xuige.”​—ǂHaiǂhais 21:4, 5; ǂKhoamîdi 15:9; Johaneb 3:36.

Gagasi xūna ǀō-aisase ôaǃnâs

(ǂHaiǂhais 20:5) Xawe nau ǁō hân ge ǁkhawa ûi kaihe tama ge i, ǀoadisi kurigu nî ǀoas kōse. Nēs ge ǂguro khâisa.

it-2-E 249 ¶2

Ûib

Adammab ge mā mîmās ǃnâ-ūb ge Eloba ǁîba gere mîba ǁnâuǀnammi ga ra o, ob ǁō tide di. (Gen. 2:17) ǀUniga khākhoeb ǁōb ga dīkākāhe ǁaeb ain ge ǁnâuǀnamxa khoena ǁoreb hîna ǁōba ra ǃaromaba xu nî ǃnora. ǀAmosib kōsen ge ǁō tide. (1Kor. 15:26) ǁŌb ge Xristub di ǂgaeǂguis ǀams ai nî hîkākāhe. ǂHaiǂhais ǂkhanis ge ra ǁgau ǁîb ǂgaeǂguis 1000 kuriga nî hâsa. Gao-aogu tsî pristergu ge “Xristub ǀkha ûi tsî ge gaosîsen ǀoadisi kurigu kōse” di i ge ra mîhe. “Nau ǁō hân” ge “ǀoadisi kurigu nî ǀoas” aiǃgâ ǀoasa kurusa nî hō. Nē ǁaeb ǃnâb ge Satanna abisuǂgâba xu nî ǃnora khaihe tsî ǀuniga ǃaitsâba nî hā-ū. ǀOadisi kurigu di ǀams ain ga khoena ǀoasa kurusa a ūhâ on ge Adammi tsî Evas ge ǁoreb aiǃgâ ūhâ-i mâsiba nî hō. ǁNā ǁaeb ain ge ǀoasa ûiba nî ūhâ. Satanni ǃaitsâs ǁaeb ǃnâ nî mâǀgai khoen ge ǀamose nî ûi.​—J.ǂHa. 20:4-10.

(ǂHaiǂhais 20:14, 15) O kha ge ǁōb tsî Hadeb tsîkha ǀaexa ǀaus ǃnâ ge aoǂgāhe; ǁnāb ge a ǀgamǁî ǁō, ǁnā ǀaexa ǀausa. ¹⁵ Tsî khoe-i ga ûib di ǂkhanis ǃnâ xoamâihe hâse hōhe tama io, o i ge ǀaexa ǀaus ǃnâ ge aoǂgāhe.

it-2-E 189-190

ǀAexa ǀaus

Nē mîdi ge ǂHaiǂhais di ǂkhanis ǃnâ ǀgui hâ tsî ǁgauǁgaus ase ǀgui i. Elobmîs ge nē mîdi ǂâibasensa aistama ra ǁguiǃā. Mî ra: “ǁnāb ge a ǀgamǁî ǁō, ǁnā ǀaexa ǀausa.”​—J.ǂHa. 20:14; 21:8.

ǀAexa ǀaus ǃâgu hîna ǂHaiǂhais ǃnâ ra ǃhoahe gu ge ra ǁgau nē ǀaus a ǁgauǁgau ǃkhaisa. ǁŌb ge ne ‘ǀaexa ǀaus’ ǃnâ nî aoǂgāhe. (J.ǂHa. 19:20; 20:14) ǁŌb ge ama ǀaeb xa a ǂhubihe ǁoa. ǁGâuab hîna gagasi kurusa ūhâb tsîn ge nē ǀaus ǃnâ ra aoǂgāhe. Gagasi kurusab ūhâ amagab ge ama ǀaeb xa tsûtsûhe tide.​—J.ǂHa. 20:10; ǀgopeǀnō re Eks. 3:2 tsî ǂHǂh. 13:20.

ǀAexa ǀaus “a ǀgamǁî ǁō” tsîs ǂHaiǂhais 20:14 sa “ǁōb tsî Hadeb” ǁnāpa ra aoǂgāhe di ra mî amagas ge ǀausa Adamma xu da ge ǀumi ǁōba ǃoa a ǁnaeǁgau ǁoa (Rom. 5:12) tsî ǀhōbasa ǃoas tsîna ǁnaeǁgau tama. ǁNā-amagab ge nē ǁōba ǁgauǁgaus ase i tsî-i ge nē ǁōba xu khâi-e hâ tide. Elobmîs ge ǀaexa ǀaus ǁîs ǃnâ hâna ge mâ ti mî tama hâ, Adamma xu da ge ǀumi ǁōb tsî Hadeb (Sheols) nî dī khami. (J.ǂHa. 20:13) ǁNā-amagan ge ǁnān hîna Elob ǂgaeǂguisa ra mâǃoa tsî ǁîn ǀonde “ûib di ǂkhanis” ǃnâ xoahe tamana ǀaexa ǀaus ǃnâ nî aoǂgāhe. Nēs ge hoasa dīkākāhes tamas ka io ǀgamǁî ǁōb ti ra ǂâibasen.​—J.ǂHa. 20:15.

Elobmîs khomai ǃâs

(ǂHaiǂhais 20:1-15) Tsî ta ge ge mû, ǀhomǃgā-i ǀhomma xu ra ǁgôaxasa, abisuǂgâb di ǁkhowa-ammi tsî kai ǁkhamūda-e ǁîb di ǃomǁae ūhâba. ² Ob ge draki ǀoro ǀaoba ge ǃkhō, ǁgâuab tsî Satanni ge a ǁî, tsîb ge ǁîba ge ǃgae ǀoadisi kurigu kōse, ³ tsî abisuǂgâb ǃnâ aoǂgā tsî ge ǂganam bi, tsî ǁîb ǂamǃnâ ge ǂganamǀgaiǀgai, ǃhaodeb ǃaruǀî ǂgaeǂhapu tidese, ǀoadisi kurigu nî ǀoas kōse; tsî ǁnās khaoǃgâb ge ǃnubu ǁaerob kōse nîra xorehe. ⁴ Tsî ta ge tronde ge mû, tsîn ge ǁîdi ai ge ǂnû, tsîn ge ǀgoraǃgâsa ge māhe; tsî ta ge ǀomdi ǁnān, Jesub di ǃkhō-ams tsî Elob mîs ǃaroma ge ǁhāǁnâdanahen, tsî ǀgurub tsî īb âba ǀgoreǀî taman, tsî saosa ǁîn di ǃūs tsî ǃommi ai ǃkhōǃoa taman dide ge mû; tsîn ge Xristub ǀkha ûi tsî ge gaosîsen ǀoadisi kurigu kōse; ⁵ xawe nau ǁō hân ge ǁkhawa ûi kaihe tama ge i, ǀoadisi kurigu nî ǀoas kōse. Nēs ge ǂguro khâisa. ⁶ ǃGâiǃō-i tsî ǃanu-i ge a, ǂguro khâis ǃnâ ra amǃnâxa-e; nēti īn ǂamab ge ǀgamǁî ǁōba ǀgai-e ūhâ tama hâ; tsîn ge a Elob tsî Xristub di prister, tsîn ge ǁîb ǀkha nîra gaosîsen ǀoadisi kurigu kōse. ⁷ Tsî ǀoadisi kurigu ga toa ǃnubaib ge Satanna ǃkhō-oms âba xu nîra xorehe; ⁸ ǃnubaib ge nîra ǂoa, ǀūbenab nî ǂgaeǂhapuse, haka ǁhôadi ǃhūbaib didi ǃnâ, Gogi tsî Magogi tsîkha, tsîb ge ǁîna torob ǃoa nîra ǀhûǀhû, ǁnān ǀgaus ân hurib di ǀgopab xase īna. ⁹ On ge ǃhūbaib di ǂhabab hoaragaba xu hā, tsî ǃanun di ǁgoeǃkhaisa ge xāǂgā, tsî ǀnamǀnamsa ǃās tsîna; os ge ǀaesa ǀhomma xu ge ǁnā Eloba xu, tsî ǁîna ge hapu. ¹⁰ Tsî ǁgâuab, ǁîna ge ǂgaeǂhapub ge ǀaes tsî sulfuri di ǀaus ǃnâ ge aoǂgāhe, ǀgurub tsî ǂkhaba kēbo-aob tsîkha hâpa; o gu ge ǁnāpa tsēs tsî tsuxub tsîra nîra tsûtsûhe ǀamosib hoab kōse. ¹¹ Tsî ta ge kai ǃuri tronsa ge mû tsî ǁîs ai ǂnôab, ǁîb di ais aiǃâba xu kha ge ǃhūbaib tsî ǀhommi tsîkha ǁhâba; tsî kha ge hâǃkhai-e hōbahe tama ge i. ¹² Tsî ta ge ǁō hâna ge mû, ǂkharin tsî kain tsîna Elob aiǃâ mâse; o di ge ǂkhanide ge khowahe; tsîs ge ǀnî ǂkhanisa ge khowahe, ǁnās ûib disa; on ge ǁō hâna ǂkhanidi ǃnâ xoamâihe hân ǃoa ge ǀgoraǃgâhe, ǁîn di sîsengu ǃoa. ¹³ Ob ge huriba ǁîb ǃnâ hâ ǁō hâna ge mā; o kha ge ǁōb tsî Hadeb tsîkha ǁîkha ǃnâ hâ ǁō hâna ge mā; o i ge mâ-i hoa-e ǁî-i di sîsengu ǃoa ge ǀgoraǃgâhe. ¹⁴ O kha ge ǁōb tsî Hadeb tsîkha ǀaexa ǀaus ǃnâ ge aoǂgāhe; ǁnāb ge a ǀgamǁî ǁō, ǁnā ǀaexa ǀausa. ¹⁵ Tsî khoe-i ga ûib di ǂkhanis ǃnâ xoamâihe hâse hōhe tama io, o i ge ǀaexa ǀaus ǃnâ ge aoǂgāhe.