ǁNaeǁgaudi Sida Xristeǁî ûib tsî aoǁnâ sîsenni sîsen ǂkhanib
JANUARIB 6-12
ELOBMÎSA XU HÂ ǂÛǂÛSA MÎDI | GENESIS 1-2
“Jehovab ge hoa xūna ǃhūbaib ai ge kuru”
(Genesis 1:3, 4) Ob ge Eloba ge mî: ǃNâba ab hâ! Ob ge ǃnâba ge hâ. 4 Tsî Elob ge ge mû, ǃnâb a ǃgâi ǃkhaisa; tsî Elob ge ǀgorasa ǃnâb tsî ǃkhaenab tsîkha ǁaegu ge dī.
(Genesis 1:6) Ob ge Eloba ge mî: ǃĀǂuisaba ab hâ ǁgamgu ǁaegu, îb ǁîba ǀgorasa dī, ǁgamgu tsî ǁgamgu ǁaegu.
(Genesis 1:9) Ob ge Eloba ge mî: A gu ǁgamga ǀhommi ǃnaga ǀgui ǃkhais ǀguis tawa ǀhao, îb ǂnâsaba mûhe! Tsî i ge ǁnāti ge ī.
(Genesis 1:11) Ob ge Eloba ge mî: Ab ǃhūba ūǀkhī, ǀgân tsî ǁhaon ǃkhomna ra tsoron tsî ǂûtani ra hain, ǁîn di ǃnôab ai ra ǂûtanin, ǃkhommi âna ǁîn ǃnâ ūhâna ǃhūbaib ai! Tsî i ge ǁnāti ge ī.
it-1-E 527-528
Kurus
Elob ge ǂguro tsēs ai “ǃnâba ab hâ!” ti a mî o i ge ǃnâba ǃnâudi ǃnâ-ū ge mûsen tsoatsoa ǃhūbaib aib ge ǁnā ǃnâba ǃgāsa tama hâ i xawe. Nē ǃnâb ge ǂause ge mûsen tsoatsoa. J. W. Wattsi ge nēs xa a mî khami: “Tsîb ge ǃnâba ǁaeb ǀkha ge hā.” (Gen. 1:3, A Distinctive Translation of Genesis) Elob ge ǃnâb tsî ǃkhaenab ǁaegu ǀgorasa ge kuru. ǃNâbab ge tsē di ge ǂgai tsî ǃkhaenaba tsuxub di. Nēs ge ra ǁgau ǃhūbaib ge sores ǂnamipe gere dawasen ǃkhaisa, hoa ǀkhāgu ǃnâb tsî ǃkhaenab tsîna nî hōse.—Gen. 1:3, 4.
ǀGamǁî tsēs aib ge Eloba “ǁgamgu ǁaegu” ǀgorase ge dī tsî soaba ge kuru. ǁGammi ge ǃhūbaib ai ge hâ ǀgara xawe i ge ǃnâsa ǁgamme ǃhūbaib ǀgapise ge hâ i tsî i ge nē ǁgamkha ǁaegu soaba ge hâ. Elob ge nē soaba ǀhommi di ge ǂgai. Xawe nēs ge ǀgamirodi tsî nau planeet di tsîna ǃkhōǂgā tama hâ, ǃhūbaib ǀgapise ge hâ i ǁgammi ge ǁîna ǃkhoǂgā tama hâ i amaga.—Gen. 1:6-8; mû re SOABA.
ǃNonaǁî tsēs aib ge Elob di buruxa ǀgaiba ǃhūbaib di ǁgamga ge ǀaoǀao tsîb ge ǃhūba ge mûsen tsoatsoa tsîb ge Eloba nēba ǃhūbaib di ge ǂgai. ǁNā tsēs aib ge Eloba ǁgaraba ge mâ tsîs ge nēsa ge ǃaroma în ǀgân tsî ǁhaon ǃkhomna ra tsoron tsî ǂûtani ra hain tsîna ǂoaxa. Nēn hoan ge “ǁîn di ǃnôab” ǃoa ge ǂguiǂguisen ǁkhā i.—Gen. 1:9-13.
(Genesis 1:14) Ob ge Eloba ge mî: An ǃnâna hâ ǀhommi di ǃāǂuisab tawa, ǀgorasan nî dīse tsēs tsî tsuxub tsîra ǁaegu; saosen nî īse kamagu tsî tsēdi tsî kurigu tsîn dise.
(Genesis 1:20) Ob ge Eloba ge mî: A gu ǁgamga ǃnāǂamsase ūǀkhī gons ûitsama ǀomdi disa, în anina doe ǃhūbaib ǂamǃnâ ǀhommi di ǃāǂuisab ǃnâ!
(Genesis 1:24) Ob ge Eloba ge mî: Ab ǃhūba ūǀkhī ûitsama ǀomde ǁîdi di ǃnôaba ǃoa, tsî ǂhanaben tsî ǀgurun ǃhūbaib din tsîna ǁîn di ǃnôaba ǃoa! Tsî i ge ǁnāti ge ī.
(Genesis 1:27) Ob ge Eloba khoeba ge ǂnubi ǁîb di ība ǃoa. Īb Elob dib ǃoab ge ǁîba ge ǂnubi, aob tsî taras tsîra aseb ge ǁîra ge ǂnubi.
it-1-E 528 ¶5-8
Kurus
Genesis 1:16 ǃnâs ge ba·raʼʹ di hâ Hebregowab mîs hîna “kuru” di ra ǂâibasensa sîsen-ūhe tama hâ. ǁÎs soas ǃnâ i ge ʽa·sahʹ di hâ Hebregowab mîs hîna “dī” di ra ǂâibasensa sîsen-ūhe hâ. Sores, ǁkhâb tsî ǀgamirodi ge Genesis 1:1 ǃnâ ra mîhe “ǀhommi” ǃnâ ǃkhōǂgāsa. ǁNā-amagan ge nēn hoana hakaǁî tsēs aisi ǀnai ge kuruhe. “Ob ge Eloba ge mî: An ǃnâna hâ ǀhommi di ǃāǂuisab tawa” di i ra mîhe o, o i ge ra ǁgau nē ǃnâgu ge ǃhūbaiba xu a mûsen tsoatsoa ǃkhaisa. Nē ǃnâgu ge “kamagu tsî tsēdi tsî kurigu” tsîn di saose ge hâ i tsî ēga khoena gere daoǁgau.—Gen. 1:14.
Koroǁî tsēs ai-i ge ǂguro ûitsama ǀomde ǃhūbaib ai ge kuruhe. ǃKharagaǃnâgu xamanin ge Elob ǀgaib ǃnâ-ū ge kuruhe. ǀGui xamani-i hîna ge nau xamani-i ǃnâ a ǀkharaǀkharasen i ge kuruhe tama. Elobmîs ge ra mî: “Tsî Elob ge kai ǂkharaga ge dī tsî ûitsama gon ra ǀoms hoas, ǁgamgu ge ǃnāǂamsase ūǀkhīsa ǁîs di ǃnôab ǃoa, tsî ǁgaboxa anin hoana ǁîn di ǃnôaba ǃoa.” Elob ge ge ǂkhî i kurub ge xūn hoan ǀkha tsî nēna ge ǀkhae în “ǂguiǂguisen”. Nē xamanina ǂguiǂguisens ge ge īǁkhā i, Elob ge mâ i hoa i nî ǁî-i “di ǃnôab ǃoa” ǂguiǂguisens di ǁkhasib ǀkha a kuru nî amaga.—Gen. 1:20-23.
ǃNaniǁî tsēs aib “ge Eloba ge mî: Ab ǃhūba ūǀkhī ûitsama ǀomde ǁîdi di ǃnôaba ǃoa, tsî ǂhanaben tsî ǀgurun ǃhūbaib din tsîna ǁîn di ǃnôaba ǃoa!” Nēn ge Elob ge kuru xūn naun khami ge ǃgâi i.—Gen. 1:24, 25.
ǃNaniǁî tsēs ra ǀam ǃgû ǁaeb ǃnâb ge Eloba xamanin xa a ǀgapi kurusabeba ge kuru. Xaweb ge ǀhomǃgāgu ǃnâga hâ kurusa ge ūhâ-i. Nē khoeb ge Elob īb ǃoa ge kuruhe. Genesis 1:27 ge “aob tsî taras tsîra aseb ge ǁîra ge ǂnubi” di ǀgui ra mî. Xawes ge Genesis 2:7-9 sa Elob ge khoeba ǃhūb tsaraba xu a kuru tsî ǂgui-āra ǃnâ ǀoms ûib disa a ǃnâiǂgā di ra mî. Nē khoeb ge ge ûitsama ǀom kai tsîb ge ǂû-i tsî hâǃkhais tsîna paradais ǃnâ ge ūhâ-i. Nē ǃnâs aib ge Eloba ǃhūbaib di xuna ra sîsen-use khoeba ge kuru tsîb ge nē khoeb di ǀaraba xu khoesa ge kuru. (Gen. 2:18-25) Tarare khoes ge kuruhe ǁaeb aib ge khoeb di ‘ǃnôaba’ ge ǀoasa.—Gen. 5:1, 2.
Gagasi xūna ǀō-aisase ôaǃnâs
(Genesis 1:1) Tsoatsoas ǃnâb ge Eloba ǀhommi tsî ǃhūbaib tsîkha ge kuru.
w15-E 6/1 5
Kurusǂans sadu ûiba ra tsâǀkha ǀgaub
ǀHommi tsî ǃhūbaib tsîna a matikō kurixa?
Kurusǂansabegu ge ǃhūbaib 4 biliuns ǀgūse hâ kuriga ūhâ ti ra mî. Tsîb hoaraga ǀhomma 13 sa xu 14 biliuns ǁnaegu hâ kuriga ūhâ ti. Elobmîs ge ǀhommi tsî ǃhūbaib di kurin xa xu-e mî tama hâ. ǃHūbaib ǀoadisidi ǃnâ hâ kurina ūhâ tis tsînas ge mî tama hâ. Elobmîs ǃnâ hâ ǂguro xoas ge “tsoatsoas ǃnâb ge Eloba ǀhommi tsî ǃhūbaib tsîkha ge kuru” di ra mî. (Gen. 1:1) Nē mîdi a hoaǃnâ-aixa ǃkhais ge kurusǂansabega soa-e ra mâ ī-gu ǁî-gu ǂansa ra sîsen-ūse mîǁgui mâǁaeb ge ǀhommi tsî ǃhūbaib tsîna a kuruhesa.
(Genesis 1:26) Tsîb ge Eloba ge mî: A ge khoena dī, sage di īb ǃoa, sage di ǀguiti-ība ǃoa, în gaosîsen ǁaun hurib din ǂama, tsî anin ǀhommi din ǂama, tsî ǀgoan ǂama, tsî ǃhūbaib hoaragab ǂama, tsî ǂhanaben, ǃhūb ai ra ǂhanan hoan ǂama.
it-2-E 52
Jesub Xristub
Kuru hui-ao tama ge hâ i. ǀGôab ge kurus ǃnâ ǃâ i ǃkhais ge ǁîb Īb di kuru hui-aob a ti ǂâibasen tama hâ. Kurus di ǀgaib ge Eloba xu ge hā ǁîb ǃanu gagab ǃnâ-ū. (Gen. 1:2; Psa. 33:6) Jehovab a ûib hoab di ǀau amagan ge hoa ûitsama xun, mûheran tsî mûhe tamana ǁîn ûiga ǁîba xu ra hō. (Psa. 36:9) ǀGôab ge Kuru hui-ao tama hâ i xaweb ge Jehovaba ǁîba ra sîsen-ūse xuna ge kuru. Jesub tsîn ge Elobmîs ǃnâ Elob a kuru-ao ti ge mî.—Mat. 19:4-6; mû re KURUS.
Elobmîs khomai ǃâs
(Genesis 1:1-19) Tsoatsoas ǃnâb ge Eloba ǀhommi tsî ǃhūbaib tsîkha ge kuru. 2 Tsî ǃhūbaib ge ǃū-aisa tsî ǀkhaiǃnâ ge i, tsî ǃkhaenab ge ǃgammi di ais ai ge hâ i, tsî Gagab Elob dib ge ǁgamgu ai gere ǀnaremas.3 Ob ge Eloba ge mî: ǃNâba ab hâ! Ob ge ǃnâba ge hâ.4 Tsî Elob ge ge mû, ǃnâb a ǃgâi ǃkhaisa; tsî Elob ge ǀgorasa ǃnâb tsî ǃkhaenab tsîkha ǁaegu ge dī. 5 Tsî Elob ge ǃnâba tsēb ti ge ǂgai, tsî ǃkhaenabab ge tsuxub ti ge ǂgai. ǃNubai i ge ǃui ge i tsî i ge ǁgoa ge i; ǂguro tsēs. 6 Ob ge Eloba ge mî: ǃĀǂuisaba ab hâ ǁgamgu ǁaegu, îb ǁîba ǀgorasa dī, ǁgamgu tsî ǁgamgu ǁaegu. 7 ǃNubaib ge Eloba ǁnā ǃāǂuisaba ge dī, tsîb ge ǀgorasa ge dī ǁgamgu ǃāǂuisab ǃna hâgu tsî ǁgamgu ǃāǂuisab ǂamǃnâ hâgu ǁaegu. Tsî i ge ǁnāti ge ī. 8 Tsî Elob ge ǃāǂuisaba ǀhommi ti ge ǂgai. ǃNubai i ge ǃui ge i tsî i ge ǁgoa ge i; ǀgamǁî tsēs. 9 Ob ge Eloba ge mî: A gu ǁgamga ǀhommi ǃnaga ǀgui ǃkhais ǀguis tawa ǀhao, îb ǂnâsaba mûhe! Tsî i ge ǁnāti ge ī. 10 Tsî Elob ge ǂnâsaba ǃhūb ti ge ǂgai, tsî ǁgamgu ǀhaosab ge hurib ti ge ǂgai. Tsî Elob ge ge mû ǃgâi i a ǃkhaisa. 11 Ob ge Eloba ge mî: Ab ǃhūba ūǀkhī, ǀgân tsî ǁhaon ǃkhomna ra tsoron tsî ǂûtani ra hain, ǁîn di ǃnôab ai ra ǂûtanin, ǃkhommi âna ǁîn ǃnâ ūhâna ǃhūbaib ai! Tsî i ge ǁnāti ge ī. 12 Ob ge ǃhūba ge ūǀkhī ǀgân tsî ǁhaon, ǃkhomna ra tsorona ǁîn di ǃnôab ai tsî ǂûtani ra hain, ǃkhomna ǁîn ǃnâ ūhâna ǁîn di ǃnôab ai. Tsî Elob ge ge mû, ǃgâi i a ǃkhaisa. 13 ǃNubai i ge ǃui ge i, tsî i ge ǁgoa ge i; ǃnonaǁî tsēs. 14 Ob ge Eloba ge mî: An ǃnâna hâ ǀhommi di ǃāǂuisab tawa, ǀgorasan nî dīse tsēs tsî tsuxub tsîra ǁaegu; saosen nî īse kamagu tsî tsēdi tsî kurigu tsîn dise, 15 ǃnân nîse ǀhommi di ǃāǂuisab ai, ǃhūbaiban nî ǃnâǃnâse. Tsî i ge ǁnāti ge ī. 16 Tsî Elob ge ǁnā ǀgam kai ǃnâkha ge dī, ǁnā kai ǃnâba tsēsab nî gaose tsî ǁnā ǂkhari ǃnâba tsuxubab nî gaose tsî ǀgamirodi ona. 17 Tsî Elob ge ǁîna ǃāǂuisab ǀhommi dib ai ge ǂnûi, ǃhūbaiban nî ǃnâǃnâse, 18 tsî gaoǂamn nîse tsēs tsî tsuxub tsîra, tsî ǀgorasan nî dīse ǃnâb tsî ǃkhaenab tsîkha ǁaegu. Tsî Elob ge ge mû, ǃgâi i a ǃkhaisa. 19 ǃNubai i ge ǃui ge i tsî i ge ǁgoa ge i, hakaǁî tsēs.
JANUARIB 13-19
ELOBMÎSA XU HÂ ǂÛǂÛSA MÎDI | GENESIS 3-5
“ǂGuro ǂhumib ūhâ ǁgai sîsenǂuib”
(Genesis 3:1-5) Tsî ǀaob ge ǃaub di ǀgurun ǃKhūb Elob ge dīn hoan ǂamai gāxaǃnâ ge i, tsî taras ǃoa ge mî: O kha, mîb ge xare Eloba: Saro ge ǂû tide mâ hai-i nē ǃhanab di-i hoa-i xa, ti? 2 Os ge tarasa ǀaob ǃoa ge mî: Sim ge ǂûn nē ǃhanab ǃnâ hâ haidi din xa ra ǂû; 3 xawe ǂûn nē ǃhanab ǁaegub ǃnâ hâ hais din xab ge Eloba ge mî: ǁÎn xa tā ǂû, î ro ǁîna ǁkhāti tā tsâǀkhā, ǁō ro tidega. 4 Ob ge ǀaoba taras ǃoa ge mî: Tātsē ro kom ǁō tideo; 5 xawe Elob ge a ǂan, ǁîs xa ro ga ǂû tsēsa xu di saro di mûde nî khowahe ǃkhaisa, o ro ge Elob ǁkhāb khami nî ī, tsî ro ge nî ǂan mâ-i a ǃgâi tsî mâ-i a ǂkhaba ǃkhaisa.
w17.02-E 5 ¶9
Jehovab di ǂâibasens ge nî dīǀoaǀoahe
9 Satanni ge ǀaoba ra sîsen-ūse Evasa ge gaxaǃnâ is ǁîs ǁGûb Jehovaba ǁnauǀnamoǃnâ. (Khomai re Genesis 3:1-5; J.ǂHa. 12:9) Satanni ge Elob ge ǁîb ôan ǃhūbaib ai hâna a mâ mîmâs “mâ hai-i nē ǃhanab di-i hoa-i” xan ǂû tidesa kai xū-i ase ge mûsen kai. ‘ǂGao du ra xū-e du hana a di ǁoa?’ dib ra dī khami i ge ge tsâ i. Saoraseb ge ǂhumi tsî ge mî: “Tātsē ro kom ǁō tideo.” “Xawe Elob ge a ǂan, ǁîs xa ro ga ǂû tsēsa xu di saro di mûde nî ǁkhowahe ǃkhaisa” dib ge mî ob ge Evasa gere ǁgau ǂhâbasa tama i hâsa Eloba ǁnâuǀnamsa. Satanni ge gere ǁgau ǂgao Jehovab ǁîra haisa xu ǂû tsî nî gā-ai ǃkhaisa ǂgao tama hâsa. Tsîb ge Satanna ǂhumi mîmâisa ge mā “tātsē ro kom ǁō tideo” tib ge mî o.
(Genesis 3:6) Os ge tarasa ge mû hais xa ǂûs a ǃgâi tsî ǃgapaǀîs a ǀnamǀnamsa ǃkhaisa, tsî turahesa hais asa, gā-ai kais ra amaga; os ge ǂûs xa ū tsî ge ǂû; tsîs ge aob tsîna ge mā tsîb ge ge ǂû.
w00-E 11/15 25-26
ǂGuro khoe aogu ra xu da ge a ǁkhāǁkhāsen ǁkhā
Evas di ǁoreba ge ǁkhaehe ǁoa i? Hî-i. ǁÎs di ǂaidi ǃnâ mâisen re. ǁNā ǀaob di ǂhumib ge Elob tsî Adammi ge mî mîde ge dawa. Mati du nî tsâ ǀū du a khoe-i ga sadu ǀnam tsî ǂgomǃgâ hâ khoe-e a ǂhumi ǂgā-am o? Evas ge ǀkharati ga tanisen hâ. Nē ǂhumib ge ǁîsa ǁaixa kai tsî ga ui-uisaba hâ, ǃgâ ǂgaos tsînas dī tidese. Amase nē ǀaoba a ham, hîna Elob di ǂhanu-aisib tsî ǁîs aob mîsa ra dawaba? ǁÎs oms danaba ǃgôasiba mâs ǃaromas ga aibe ǁîba dî hâ? Sida tsîn ge ǁnās ǁkhas khami nî dī Elob mā da hâ ǁgaraga xu ra ǀkhara xū-e da ga ǁnâu o. Evas ge ǃaitsâ-aob di mîde ge ǂgomǃgâ tsî aitsama tsūn tsî ǃgâin ǁaegu ǀgoraǃgâsa gere mîǁgui ǂgao. Nē xūnas gere ǂâiǃgâs kōse i ge ǁîsa ge ǃgâiba i. ǁNā tsū xūna ǂgomǃgâs xas ge nē ǂâide ga ūbē hâ tamas ka io ǁîs oms danab ǀkha ga ǃhoa hâ.—1Kor. 11:3; Jak. 1:14, 15.
Adammi ge ǁîb taras di domma ge ǃgâ
Evas ge Adamma ǁîs ǁoreb ǃnâ ge ǃâ kai tsîb ge ǁîba ǂnoagu i ose nēs ǃnâ ge māǁnâsen. Mati da ǁîb di tanisen ǀgauba a ǁguiǃā ǁkhā? (Gen. 3:6, 17) Adammi ge hami ǀkhabab nî ǁhûi ǃkhaisa ge ǀū-i. ǁÎb Kuru aob hîna ge hoa xuna mā bib tsî ǀnamǀnamsa taras Evasa mā bibab nî ǁnâuǀnam? Elob di daoǁgaudeb ga ôa hâ? Tamas ka iob ǁîb taras ǀkhaba ga ǁgûi hâ? Adammi ge ge ǂan i Evas di ǃâubasens ǁnā ǂkhāsa hais xa ǂûs dis ǃgâi xū-e hau-ū tidesa. Apostel Paulub ge ge xoa: “Adammi ge ǂgaeǂhapuhe tama; xawe taras ge ǂgaeǂhapuhe, tsî ǃûǂams ǃnâ ge ǁnā.” (1Tim. 2:14) Adammi ge ǂanapegase Jehovaba ge ǁnâuǀnamoǃnâ. ǁÎb tarasa ǂgoaǃnâs di ǃaob ge ge kai i ǁîb ǂgomǃgâsib Jehovab nē mâsiba nî dī-ūnus dib xa.
(Genesis 3: 15-19) Tsî tita ge ǃhuigusa nîra ǂnûiǂgā sats tsî taras tsîro ǁaegu, sa surib tsî ǁîs di surib ǁaegu. ǁÎb ge sa danasa nîra ǂkhūǂkhū tsî sats ge ǁîb ǃnôara nîra ǂkhūǂkhū.16 Tsî taras ǃoab ge ge mî: Sa tsûna ta ge tita kaise nîra ǂguiǂgui, ǀgamǀkhās ka ǃnubai, tsûb ǀkhas ge ǀgôana nîra ǁora; tsî ǁkhoreb âs ge aobǀî nî hâ tsîb ge ǁîba nî sa ǃkhū. 17 Tsî Adammi ǃoab ge ge mî: Sa taras di dommats go ǃgâ tsî ǃkhâi tsi ta ge hais, ǁîs xats ǂû tide ti ta ge mîs xats go ǂû amagab ge ǃhūba ǀâxarexūhe hâ sats ǃaroma; ǂhansendi ǀkhats ge ǁîba xu nîra ûi, sa ûitsēdi hoade; 18 tsîb ge ǁkhāti ǁkhūn tsî ǀgamen tsîna nîra ūǀkhība tsi, tsîts ge ǁhaon ǃhūb dina nîra ǂû. 19 Sa ais di aosenni ǃnâts ge sa pereba nîra ǂû, ǁkhawats nî ǃhū kais kōse, ǁîba xuts ūhe hâ amaga; tsarats kom satsao, tsîts kom ǁkhawa nîra tsara kaio.
w12-E 9/1 4 ¶2
Eloba amabes ǃnâ tare khoede ra tsâba?
Eloba tare khoede ǀāxare hâ?
Hî-i. “Kaira ǀaob, ǁgâuab tsî Satanni ti ra ǂgaiheb” ge Elob xa ge ǀāxare-e. (J.ǂHa. 12:9; Gen. 3:14) Adammi ge ǁîb tarasa ‘ǃkhūb’ ase nî ība dib ge Eloba a mî ǃkhais ge nē mâsibab ra ǃkhō-am ti ǂâibasen tama hâ. (Gen. 3:16) ǁÎb ge ǁîra ǁoreb xa ge ǃaromahe mâsib xa ǀgui gere ǂâibasen.
w04-E 1/1 29 ¶2
Genesis ǂkhanisa xu ra mâǂoa dana ǂâidi—I
3:17—ǃHūba mati ge ǀāxarehe tsî matiko ǁaeba? ǃHūb ge ǀāxarehe ǃkhais ge ǃhanadīsa kaise ge ǃgom gai. ǃHūb a ǀāxaresa amaga ge ǂôaxa ǁkhūn ge Noaxi dadab Lamexi ǁaeb ǃnâs tsîna gere mûhe. ǁNā-amagab ge nē mîde ge mî: “Sida ǃomgu di tsûb ǂama, ǃhūbaib ǃKhūb ge ǀâxarexūb ǂama.” (Gen. 5:29) Kai ǁgammi dâus khaoǃgâb ge Jehovaba Noaxi tsî ǁîb ǀgôaga ge ǀkhae tsî ǁîb ǂâibasens ǃhūbaib ǀkhab ūhâs xa ge mîba. (Gen. 9:1) Nēs ǀkhas ge ǃhūb di ǀāxaresa ǀnîsi ge ǀamǀamhe.—Gen. 13:10.
it-2-E 186
ǁOras tsûb
ǀGôa-i ra ǃkhae ǁaeb ais ǁgûsa ra hōǃgâ tsûb. Elob ge ǂguro tare khoes Evasa ǃoa ge a mî, ǁores ges khaoǃgâs mâ mâsib ǃnâ ǀgôana nî hō ǃkhaisa. ǁÎs ga Eloba ǁnâuǀnam hâ o, os ge Elob di ǀkhaeba ga hō hâ. ǀGôana hōs ge kai ǃgâiaǂgaob ǀguiba ga ǀkhī-ū hâ “ǀkhaeb ǃKhūb dib ra ǃkhū kai, tsî tsû-i xare-eb ǁîba dīǀaro tama” hâ xui-ao. (ǂKhm. 10:22) Xawes ge ǀoasakurusa ūhâ tama hâ sorosa tsûba nî hōǃgâ. ǁNā-amagab ge Eloba ge mî (ǀnî ǁaegu ain ge ǁîb ra mā-am xuna ǁîb xan ra ǃaromahe khami ra ǁguiǃāhe): “Sa tsûna ta ge tita kaise nîra ǂguiǂgui, ǀgamǀkhās ka ǃnubai, tsûb ǀkhas ge ǀgôana nîra ǁora.”—Gen. 3:16.
Gagasi xūna ǀō-aisase ôaǃnâs
(Genesis 4:23, 24) Ti domma ǁnâu re, saro Lamexi tararo, ǁnâu ro re ti mîsa! Amase ta ge tita khoeba nî ǃgam tita kara tsuiba tsî ǂkhamkhoeb tita kara tsûtsûba. 24 Kainni ge hû ǃnādi kōse nîra ǀkhaohe xui-ao, xawe Lamexa hûdisi ǃnādi di hû ǃnādi kōse.
it-2-E 192 ¶5
Lamexi
Lamexi ge ǁîb tarara a xoaba ǁnaetsanas (Gen. 4:23, 24) ge ra ǁgau matikōsen ge ǁnā ǁaeb khoena ǂkhabaxa i ǀgauba. ǁNaetsanas ge nēti ra tsoatsoa: “Ti domma ǁnâu re, saro Lamexi tararo, ǁnâu ro re ti mîsa! Amase ta ge tita khoeba nî ǃgam tita kara tsuiba tsî ǂkhamkhoeb tita kara tsûtsûba. Kainni ge hû ǃnādi kōse nîra ǀkhaohe xui-ao, xawe Lamexa hûdisi ǃnādi di hû ǃnādi kōse.” Nēs ǀkhab ge Lamexa gere ǁgau ǀhapiob a ǃkhaisa tsîb Kainni khami ǂanapegas ǃnâ khoeba ǃgam tamasa. Lamexi ge ǁîba ge ǂnau tsî kaise a tsûtsû khoebab ge ǁkhaubaseni ra hîna a ǃgam di ge mî. ǁNās ǀkhab ge ǀkhaobi ǂgao gere khoena xu gere ǁkhaubasen.
(Genesis 4:26) Tsî Seti ge ǁkhāti ǀgôaba ge ǁorabahe, tsîb ge ǀons âba Enob ti ge ǂgai. ǁNāǃnubain ge ǀons ǃKhūb disa ge ǂgaiǀîtsoatsoa.
it-1-E 338 ¶2
ǃKhāǃkhās
“ǁNāǃnubain ge ǀons ǃKhūb disa ge ǂgaiǀîtsoatsoa” Enob ǁaeb ǃnâ, kai ǁgammi dâus aiǃgâ ti i ra mîhe o i ge ǃgâi ǀgaub ǃnâ ǂgaiǀîsa ǃoa ǁnaeǁgau tama hâ. ǂGomǃgâ ǁkhā da ge a Abeli ge Elob ǀonsa gere sîsen-ū ǃkhaisa. (Gen. 4:26; Heb. 11:4) Xoadi ôaǃnâ-aogu ra mîses ga nē ǂgaiǀîsa Elob ǀonsa khoen ǃao sîsen-ūs tamas ka io ǁgai ǀgaub ai sîsen-ūsa ǃoa a ǁnaeǁgau o, os ge nēsa Eloba ǃkhāǃkhās ase a mûhe ǁkhā.—mû re ENOB.
Elobmîs khomai ǃâs
(Genesis 4:17–5:8) Tsî Kainni ge taras âba ge ǂan, os ge ǀgamǀkhā tsî Henoxa ge ǁora; tsîb ge ǃāsa ǂnubi tsî ǁnā ǃāsa ǁîb ôab Henoxi di ǀons ǃoa ge ǂgai. 18 Tsî Henoxi ge Irada ge ǁorabahe; tsî Iradi ge Mehujaela ge hō; tsî Mehujaeli ge Metusaela ge hō; tsî Metusaeli ge Lamexa ge hō. 19 Tsî Lamexi ge ǀgam tarara ge ū. ǂGuros ge Adas ti ge ǀon hâ i tsî naus ge Silas ti ge ǀon hâ i. 20 Tsî Adas ge Jabala ge ǁora. Nēb ge tentomdi ǃnâ ǁan hân di îba tsî ǀgoaǂgari-aon diba. 21 Tsî ǃgâsab âb ge Jubali ti ge ǀon hâ i. Nēb ge harps tsî ǂāǀkhōxūn ǀkha ra ǀkhōn hoan di îba. 22 Tsî Silas ge ǁkhāti Tubal-Kainna ge ǁora, ǂaib tsî ǂnūǀuriba ra sîsenūn hoan di ǁgauǃnâ-aoba; tsî ǃgâsas Tubal-Kainni dis ge Naamasa ge i. 23 Tsî Lamexi ge ǁîb di tarara ǃoa ge mî: Adas tsî Silas tsîro, ti domma ǁnâu re, saro Lamexi tararo, ǁnâu ro re ti mîsa! Amase ta ge tita khoeba nî ǃgam tita kara tsuiba tsî ǂkhamkhoeb tita kara tsûtsûba. 24 Kainni ge hû ǃnādi kōse nîra ǀkhaohe xui-ao, xawe Lamexa hûdisi ǃnādi di hû ǃnādi kōse. 25 Tsî Adammi ge taras âba ǁkhawa ge ǂan, os ge ǀgôaba ge ǁora, tsîs ge ǀons âba Set, ti ge ǂgai. Elob ge tita Abeli ǃās ǃnâ ǀnî ǃkhomma go mâiba tis ge ge mî, Kainni ge ǁîba ǂnauǃan xui-ao. 26 Tsî Seti ge ǁkhāti ǀgôaba ge ǁorabahe, tsîb ge ǀons âba Enob ti ge ǂgai. ǁNāǃnubain ge ǀons ǃKhūb disa ge ǂgaiǀîtsoatsoa.
5 Nēs ge ǂkhanis Adammi ǃhaos disa. Elob ge khoeba ǂnubi tsēs aib ge ǁîba Elob di īsib ǃoa ge dī. 2 Aob tsî taras tsîra aseb ge ǁîra kuru tsî ge ǀkhae ra, tsîb ge ǁîra ǀonsa khoe ti ge ǂgai, ǁîra ge kuruhe tsēs ai. 3 Tsî Adammi ge ǀguikaidisiǃnonadisi kuriga ûi tsî ǀgôaba ge hō ǁîb di īsib ǃoa, ǀguiti-īsib âb ǃoa, tsîb ge ǀons âba Set, ti ge ǂgai. 4 Tsî Adammi di tsēdi ge Setab ge hō hâ is khaoǃgâ ǁkhaisakaidisi kuri ge i; tsîb ge ǀgôagu tsî ǀgôadi tsîna ge hō. 5 O di ge tsēdi Adammi ûib didi hoade khoesekaidisi tsî ǃnonadisi kuri ge i; tsîb ge ge ǁō. 6 Tsî Seti ge ǀguikaidisi tsî koro kuriga ûi tsî Enoba ge hō. 7 Tsî Seti ge Enobab ge hō hâ is khaoǃgâ ǁkhaisakaidisi tsî hû kuriga ge ûi, tsîb ge ǀgôagu tsî ǀgôadi tsîna ge hō. 8 O di ge tsēdi Seti didi hoade khoesekaidisi tsî disiǀgamǀa kuri ge i; tsîb ge ge ǁō.
JANUARIB 20-26
ELOBMÎSA XU HÂ ǂÛǂÛSA MÎDI | GENESIS 6-8
“Ob ge ge dī . . . mîmās ǁkhās khami”
(Genesis 6:9) Nēdi ge ǃnaeǃkhaidi Noaxi dide. Noaxi ge ǂhanu-ai tsî ǂhauǃnâ ao ge i, ǃhaodi âb ǃnâ. Noaxi ge eloǃaoǃgâxase gere tanisen.
(Genesis 6:13) ǁNā-amagab ge Eloba Noaxi ǃoa ge mî: ǁGans hoas di ǀams ge ti ais aiǃâ go hā; ǃhūbaib go ǁîna xu ǁgaidīb xa ǀoa xui-ao; tsî mû, tita ge ǁîna ǃhūbaib ǀkha nîra hîkākā.
Noaxi, Danieli tsî Jobi tsîgu di ǂgoms tsî ǁnâuǀnamxasib tsîna ǁgae re
4 ǃGomsin Noaxi gere hōǃân. Noaxi di kai ǁgûb Henoxi ǁaeb ǃnân ge khoena, kaise ge eloxoresa i. ǁÎn ge “karosa” tsî ui-uisa mîde Jehovab ǃoa ai gere mî. (Jud. 14, 15) ǂKhabadīb ge gere ǀoa. Noaxi tsēdi ǃnâ i ge ǃhūbaiba “ǂkhabadīb xa ge ǀoa hâ i.” ǁGauoǃnâ ǀhomǃgāgu ge khoegu khami dīsen tsî khoede ǃhūbaib ai hā gere ǃgamme tsî ǁaixa hâ, hābaǃnâgu hâ ǀgôana ge hō. (Gen. 6:2-4, 11, 12) Xaweb ge Noaxa gere mâǂoa. “Noaxi ge ǀkhomma ge hō ǃKhūb mûǁae . . . Noaxi ge ǂhanu-ai tsî ǂhauǃnâ ao ge i, ǃhaodi âb ǃnâ. Noaxi ge eloǃaoǃgâxase gere tanisen.”—Gen. 6:8, 9.
(Genesis 6:14-16) Arka ǁnâi dībasen goferhain ǀkha; hâǃnâǃkhaide ūhâse nē arka dī, tsîts ge ǁîba nî ǂkhau ǃnāb ǃnâ tsî ǃaugab ai ǂkhau-ūxū-i ǀkha. 15 Tsîts ge ǁîba nēti nî dī: Ab arka ǃnonakaidisi ǂhâgu kōse gaxu, îb korodisi ǂhâgu kōse ǂhaba, îb ǃnonadisi ǂhâgu kōse ǀgapi. 16 Îts mûǂuidao-e dī arki ai, tsîts ge ǁî-e ǀgui ǂhâb kōse ǀgapiba xu nî dītoa; tsî ǁāb arki dibats ge ǃnammi âb ai nî ǂnûi; tsîts ge ǁîba ǃnaga hâ tsî ǀgamǁî tsî ǃnonaǁî ǀgora-aidi ǀkha nî dī.
w13-E 4/1 14 ¶1
ǁÎb “ge eloǃaoǃgâxase gere tanisen”
Nē sîsenni ge ǀnîsi 40 sa xu 50 kuriga ge ū. Haide ǁkhâǁnâ tsîn ge sîsen-ūhen nî ǀgauba ǃoa gere aiǂhomi. Arki ge ǃnona māǂamaigu hâ ǃâgu hîna ǁîgu tsîna a ǀgorasagu tsî ǃaugaba ǃoa ra ǂoa daosa ge ūhâ-i. Vensterdi ge ǀgapiga arki daks ǀūse ge hâ i tsîs ge daksa ǁaegub ǃnâ ǂgarirose ge ǀgapi i ǁgammi ni ǃkhoeǁgôase.—Gen. 6:14-16.
(Genesis 6:22) Ob ge Noaxa ge dī; Elob ge ǁîba mîmās ǁkhās khami.
w11-E 9/15 18 ¶13
ǃKhoeǀhûgus ǃnâ ǀunis kose mâǀgai re
13 Tae-e nē ǃoaba-aon Jehovab dina ge hui în mâǀgai tsî ǃkhoeǀhûgusa dan? Kō re Paulub ge Noaxi xa a xoa xū-e. (Khomai re Hebreǁîn 11:7.) ‘ǁGammi dâus’ ǃhūbaib ai ge hās hîna ge ‘ǁgans hoasa’ a hîǀhurus ge Naoxi xa ‘ganupe mûheǁoasase’ ge ī-i. (Gen. 6:17) ǀNai ge i tama hâ i xū-i ge nē-e. Xaweb ge Noaxa hukas tsîna i i tide ti ge ǂâi tama hâ i. Tae-i ǃaroma? ǁÎb ge Jehovab di mîdi ǃnâ ǂgomǃgâba ge ūhâ-i. Noaxi ge Jehovab xab ge dī kai-e xu-i ge kaise ǃgom i ti ge ǂâi tama hâ i. Xaweb ge ge dī mîmāheb ge “ǁkhās khami.” (Gen. 6:22) Noaxi ge dī xūn hoan xa ǂâi re. ǁÎb ge arka om, xamanina ǀhaoǀhao, ǁîb omaris tsî xamanin di ǂû-e ǀhaoǀhao, aoǁnâ sîsen-e dī tsî ǁîb omarisa gagasise gere omkhâi. Mîmāheb ge “ǁkhās khami” dīs ge ge ǂkhari sîsen tama hâ i. Xawes ge Noaxi di ǂgoms tsî mâǀgaisa ǁîb tsî ǁîb di omarisa ûib tsî ǀkhaeba ge mā.
Gagasi xūna ǀō-aisase ôaǃnâs
(Genesis 7:2) Mâ ǃanu ǀgoan hoan xats ge hûhûbese sa tawa nî ū, aoreb tsî tarares âb tsîra xa; xawe ǀgoan hîa ǃanu taman xa ǀgamse; aoreb tsî tarares âb tsîra.
w04-E 1/1 29 ¶7
Genesis ǂkhanisa xu ra mâǂoa dana ǂâidi—I
7:2—ǃAnu xaminin tsî ǃanu tama xamanin ǁaegus ge ǀgorasa mati dīhe? Nē ǀgoras ge ǁguibas ǃnâ nî sîsen-ūhe xamanina ǃoa gere ǁnaeǁgau tsî ǂû-e ǁkhā a xamanina ǃoas ose. Kai ǁgammi dâus aiǃân ge khoena ǁgane ge ǂû tama hâ i. “ǃAnuǃanu” tsî “ǃanuoǃnâ” di hâ mîra ge Moseb di ǂhanub ǁaeb ai ge ǂgâxa tsî ǁnā ǂhanub ge toa o ge ǀam. (ǃN!kh. 10:9-16; Efe. 2:15) Noaxi ge ǀnîsi ge ǂan i mâ xamani-eb Jehovab ǁguibas ǃnâ a sîsen-ū ǁkhāsa. Arka xub ge ǂoaxa khamib ge “Noaxa ǃKhūba altar-e ge ǂnubiba; tsîb ge ǃanu ǀgoa-i hoa-i xa tsî ǃanu ani-i hoa-i xa ū tsî ǁnā altars ai khauǁguibade ge ǁguiba.”—Gen. 8:20.
(Genesis 7:11) ǃNanikaidisiǁî kurib Noaxi ûib dib ǃnâ, ǀgamǁî ǁkhâb ai disihûǀaǁî tsēs ǁkhâb dis ai, ǁnā tsēs ǁkhās ai di ge ǀaudi kai ǃgamsib didi hoade ge ǃkhopa, tsî ǀapib daodi ǀhommi didi ge ge ǁkhowa-amsen.
w04-E 1/1 30 ¶1
Genesis ǂkhanisa xu ra mâǂoa dana ǂâidi—I
7:11—Kai ǁgammi dâus di ǁgamme mapa xu ge hā? ǀGamǁî “tsēs” kurus dis aib ge ǃhūbaib di “ǃāǂuisaba” ge kuruhe. ǁGamgu ge “ǃāǂuisab ǃnaga” tsî “ǁgamgu ǃāǂuisab ǂamǃnâ” ge hâ i. (Gen. 1:6, 7) “ǃNaga” ge hâ i ǁgamgu ge ǃhūbaib ai ge hâ i. “ǃĀǂuisab ǂamǃnâ” ge hâ i ǁgamgu ge ǃhūbaib ǀgapiga ge hâ i “ǀaudi kai ǃgamsib didi” ǃoa ra ǁnaeǁgau. Nē ǁgamgu ge Noaxi tsēdi ǃnâ ǃhūbaiba ǃoa ge ǁhōǂuisen.
Elobmîs khomai ǃâs
(Genesis 6:1-16) Tsî i ge ge ī, khoen ge ǃhūbaib ai ǂguiǂguisentsoatsoa tsî ǀgôaden ge ǁorabahe 2 ǃnubai gu ge Elob ôaga khoen di ôade ge mû îsa di a ǃkhaisa tsî gu ge ǁîdi xa ǂgao gu hâdi hoade tarase ge ūbasen. 3 Ob ge ǃKhūba ge mî: Khoen ge tātsē ti Gagab xa ǂgōǀaukaisen tide, ǁîn a ǁgan xui-ao; o ta ge tita ǁîn di tsēde nî ǀguikaidisi tsî ǀgamdisi kurigu kō kai. 4 ǁNā tsēdi ai gu ge gaxu khoega ǃhūbaib ai ge hâ i, tsî ǁkhāti ǁnās khaoǃgâ gu ge Elob ôaga khoen di ôadi tawa ǂgâ tsî ǀgôana ge hō; nē gu ge ǁnā ǁē-aogu hugasa xu gere gomga. 5 Tsî ǃKhūb ge mûo, khoen di ǂkhabasib ra ǃhūbaib ai ǂgui, tsî ǂgaob ân di ǂâibasende mâ tsēs hoas ai a ǂkhaba ǃkhaisa, 6 ob ge ǃKhūba ge ǃhausen, khoebab ge ǃhūbaib ai dī ǃkhaisa, tsîb ge kaise ge tsûaǂgao. 7 Ob ge ǃKhūba ge mî: Tita ge ǁnā khoeb ǂnubi ta geba ǃhūbaiba xu nîra hîkākā, khoeba xu ǀgoan kōse tsî ǂhanaben kōse, tsî ǀhommi di anin kōse; ǁîna ta ge dī ǃkhais xa ta ǃhausen hâ amaga. 8 Xawe Noaxi ge ǀkhomma ge hō ǃKhūb mûǁae. 9 Nēdi ge ǃnaeǃkhaidi Noaxi dide. Noaxi ge ǂhanu-ai tsî ǂhauǃnâ ao ge i, ǃhaodi âb ǃnâ. Noaxi ge eloǃaoǃgâxase gere tanisen. 10 Tsî Noaxi ge ǃnona ǀgôaga ge hō: Semmi, Xammi tsî Jafeti tsîga. 11 Tsî ǃhūbaib ge ge ǁgao hâ i Elob mûǁae; tsî ǃhūbaib ge ǂkhabadīb xa ge ǀoa hâ i. 12 ǃNubaib ge Eloba ǃhūbaiba ge kōǀî, tsî mû, ǁîb ge ge ǁgao hâ i; ǁgans hoas ge daob âsa ǁgaoǁgao ǃhūbaib ai xui-ao. 13 ǁNā-amagab ge Eloba Noaxi ǃoa ge mî: ǁGans hoas di ǀams ge ti ais aiǃâ go hā; ǃhūbaib go ǁîna xu ǁgaidīb xa ǀoa xui-ao; tsî mû, tita ge ǁîna ǃhūbaib ǀkha nîra hîkākā. 14 Arka ǁnâi dībasen goferhain ǀkha; hâǃnâǃkhaide ūhâse nē arka dī, tsîts ge ǁîba nî ǂkhau ǃnāb ǃnâ tsî ǃaugab ai ǂkhau-ūxū-i ǀkha. 15 Tsîts ge ǁîba nēti nî dī: Ab arka ǃnonakaidisi ǂhâgu kōse gaxu, îb korodisi ǂhâgu kōse ǂhaba, îb ǃnonadisi ǂhâgu kōse ǀgapi. 16 Îts mûǂuidao-e dī arki ai, tsîts ge ǁî-e ǀgui ǂhâb kōse ǀgapiba xu nî dītoa; tsî ǁāb arki dibats ge ǃnammi âb ai nî ǂnûi; tsîts ge ǁîba ǃnaga hâ tsî ǀgamǁî tsî ǃnonaǁî ǀgora-aidi ǀkha nî dī.
JANUARIB 27–FEBRUARIB 2
ELOBMÎSA XU HÂ ǂÛǂÛSA MÎDI | GENESIS 9-11
“ǃHūbaib hoaragab ge ǀgui gowab ǀguib tsî ǀguiti-ī mîde ge ūhâ i”
(Genesis 11:1-4) Tsî ǃhūbaib hoaragab ge ǀgui gowab ǀguib tsî ǀguiti-ī mîde ge ūhâ i. 2 Tsî i ge ge ī, aiǂoasa xun ra doe hîan ge ǂgā-e ge hō Sinarǃhūb ǃnâ tsîn ge ǁnāpa ge sī ǁan. 3 Tsîn ge mâ-i hoa-e ǀgūkhoe-i â-e ǃoa ge mî: Hā î da ǂgoaǀuide ǂnubi, î da ǁîde ǀaes ǀkha khauǁanǁan. Tsî ǂgoaǀuis ge ǁîna ǂnubiǀuise ge ība i tsî ǂae ra ǃhūb ge ǁîna ǂae ra ǂgoase ge ība i. 4 Tsîn ge ge mî: Hā î da ǃā-e ǂnubibasen, tsî ǂgō-om-i ǀams â-i ǀhommi kōse nî sī-e; î da ǀon-e dībasen, î da tā ǀnîsi ǃhūbaib hoaragab ai ǀgaruǀgaruhe.
it-1-E 239
Babilons kais
ǀOro ǁaeb Babilons gere mûsen ǀgaub. Babilons di ǃās ge Sinarǃhūb ǃnâ a omhe ǁaeb aib ge Babeli di ǂgō-ommi tsîna gere omhe. (Gen. 11:2-9) Nē ǂgō-ommi tsî ǃās di oms ge Elob di ǀonsa koas ǃaroma ge dīhe tama hâ i xawen ge om-aona ‘ǀon-e dībasens’ ǃao gere dī. Ziggurat towers di ǀon hâ ǂgō-omgu hîna ǀoro ǁaeb Babilons ge hâ i ǃkhaib tsî Mesopotamiab ǃnâs tsîna ra hō-en ge ǃgāsase ra ǁgau ǂguro ǂgō-ommi ge Elo ǃoabas ǃnâ gere sîsen-ūhesa. Jehovab ge nē ǂgō-ommi di omsa a ǀam kai ǃkhais ge ra ǁgau ǁgôatsuiǁgoa elo ǃoabas ǃnâb gere sîsen-ūhesa. Babel ǃās di Hebre gowab ǀons “ǀHomaǀhoma” ti ra ǂâibasen xawe i ge Sumeriaǁî ǀons (Ka-dingir-ra) tsî Akkadiaǁî ǀons (Bab-ilu) di hâra “Elob dao-ams” di ra ǂâibasen. Hâ-ǃau ge ǁanǂgāsaben ge ǃās di ǀonsa ǀāxarexuhes hâ amaga a dawa xawen ge ǀasa tamas ka io ǃkhōǃkhuni-uhe ge ǀonde noxoba ra ǁgau elo ǃoabas ǀkhas ǃāsa dīxu-e ūhâsa.
it-2-E 202 ¶2
Gowab
Genesis ge ra ǁgau matin ge kai ǁgammi dâus aiǃgâ ge ûi hâ-i khoena ǀhao tsî Elob di ǂâibasens hînab ge Noaxi tsî ǁîb di ǀgôaga a mîbasa gere mâǃoa ǃkhaisa. (Gen. 9:1) Doe ǀgora tsî “ǃhūbaiba ǀoaǀoa” tama i tsîn ge ǀhaosase ge ǁan. Nēn ge sī a ǁan ai ǃhūb ge ēga Mesopotamiab ǃnâ hâ Sinarǃhūb ase ge ǂansa. Nē ǃkhaib ge elo ǃoabas di ǂgō-omma ge ūhâ-i tsîn ge khoena ǀnîsi eloǃoabas ǃao ǁnāpa gere ǀhao.—Gen. 11:2-4.
(Genesis 11:6-8) Ob ge ǃKhūba ge mî: Mû, ǀgui ǁaes ǀguis tsîn ge ǀgui gowab ǀguiba ūhâ; tsî nēs ge ǁîn ra dītsoatsoasa, tsî nēsi ǁnâi ǃgaoǁnâbasen tide, dī nîsen ǂâibasen hâ xūn hoana? 7 Hā î ge sage ǁgôa î ge ǁnāpa ǁîn di gowaba ǀhomaǀhoma, î-i mâ-i hoa-e nau khoe-i di gowaba tā ǁnâu. 8 Nētib ge ǃKhūba ǁîna ǁnāpa xu ǃhūbaib hoaragab ai ge ǀgaruǀgaru; on ge ǃāsa ge ǂnubiǀû.
it-2-E 202 ¶3
Gowab
Hoa ǀgaixa Elob ge nē khoen di sîsenna ge mâ kai ǁîn gowaga dawas ǃnâ-ū. Nēs ǀkhab ge sîsenǁareb ǁîn diba ge ǀam kai tsîn ge ǃhūb ǂgapase ge doe ǀgora. ǁÎn gowagu ge dawahe amagan ge ǁnāpa ǀhao tsî Eloba ǁnâuǀnamoǃnâs di ǀgaub ǀkha aiǃgû tide. Nēs ǀkhan ge ǀhao tsî ǁîn ga-āisib tsî ǀgaib tsîna ge sîsen-ū ǁoa i ǁî-aitsama kai-kaisens ǃnâ. ǁNās ǀkhan ge ǀguiba mâǀhao tsî ǀhaoǀhaon hâ ǂans hîna Eloba xu hā tamasa ga sîsen-ū tama hâ. (ǀGopeǀnō re Aoǁn. 7:29; Deu. 32:5.) Gowagu ge dawahe os ge nēsa kai ǀgorasa khoen ǁaegu ge dī. Xawe i ge nēsa ǁîn ǃgâiba ǃoa ge ī-i, ǁîna nî tsûtsû sîsenga xun ge ū dawahe amaga. (Gen. 11:5-9; ǀGopeǀnō re Jes. 8:9, 10.) Sida ǁaeb ǃnâ ra ī xūna ǃoa da ga kō o, o da ge ra mû khoen ǁîn ǂansa ǁgai ǀgaub ǃnâ ra sîsen-ū ǃkhaisa. Jehovab ge ge ǂan i ǁkhā ǁgai mâsib nî hâsa Babeli ga om toahe o.
(Genesis 11:9) ǁNā-amagas ge ǁîs di ǀonsa Babel ti ge ǂgaihe; ǁnāpab ge ǃKhūba gowab ǃhūbaib hoaragab diba ǀhomaǀhoma xui-ao, tsî ǁnāpa xub ge ǃKhūba ǁîna ǃhūbaib hoaragab ai ǀgaruǀgaru xui-ao.
it-2-E 472
ǁAede
Gowagu ge ǀgorahe o-i ge mâ-i hoa-e ǁî-i ǁnaetigu, ǃoaba ǀgaub tsî xunan ra dī ǀgauba ge hōbasen. (Lev. 18:3) Eloba xun ge ǃnūse hâ i amagan ge khoena aitsaman ge ǂâiǂui ǁgôatsuiǁgoa eloga ge kurubasen.—Deu. 12:30; 2Gao. 17:29, 33.
Gagasi xūna ǀō-aisase ôaǃnâs
(Genesis 9:20-22) Tsî Noaxi ge ge ǃhanasîsenao kai tsoatsoa, tsîb ge ǂauxûiǂûǃhanaba ge ǂgā. 21 Tsî ǂauxûib xab ge āo, ob ge ge āǁō, ob ge ǀōǀkhāse tentoms âb ǃnâ ge ǁgoe. 22 Tsî Xammi Kanaanni îb ge ǁgûb di ǀōǀkhāsiba mûo, ob ge ǃgâsakha âb ǃauga hâkha ǁîsa ge sī ǂanǂan.
(Genesis 9:24, 25) Tsî Noaxi ge ǂauxûib âba xu ǃnoaǂkhaio, ob ge ge hōǃâ, tare-eb ǀgôab ǂkhamma go dī ǃkhaisa. 25 Ob ge ge mî: Ab Kanaanna ǀâxarehe hâse ī, îb ǃgāgu di ǃgāse ība ǃgâsakha âba!
it-1-E 1023 ¶4
Xammi
Îǁkhā i ge a Kanaanni ge nepa ǃâ īsa xaweb ge ǁîb dadasab Xamma ǁnamabi tama hâ i ǃkhaisa. Tamas ka iob ge Noaxa ǀnîsi aimûǀarurase ge mî Xammi ge ūhâ-i ǂūb hînab ge Kanaanni tsîna ǀnai ūhâ-ib Kanaanni di surub ǃnâs tsîna nî aiǃgûsa. Nē ǀāxareb ge ge dīǀoaǀoahe Israelǁaes hîna ge Semmi surib di is ge Kanaanǁîna a gaoǂam o. ǁNān hîna ge dīkākāhe tama hâ în (aiǁgause Gibeonǁîn [Jos. 9]) ge ge Israelǁaes di ǃgā kai. ǀOadisi di kuriga ǃkharu tsî i ge Jafeti di surib, Medo-Persia, Greece, tsî Romes tsîna Kanaani di suriba ge gaoǂam.
(Genesis 10:9, 10) Tsîb ge ǃgari ǃau-ao ge i ǃKhūb di ais aiǃâ; ǁnā-amagan ra mî: Nimrodi khami ǁnā ǃgari ǃau-aob ǃKhūb di ais aiǃâ. 10 Tsî tsoatsoas ǁîb gaosis dis ge Babilons, Ereks, Akads tsî Kalnes tsîde ge i, Sinarǃhūb ǃnâ.
it-2-E 503
Nimrodi
Nimrodi di gaosis tsoatsoas ge Babilons, Ereks, Akads tsî Kalnes tsîde ge i, Sinarǃhūb ǃnâ. (Gen. 10:10) ǁNā-amaga da ge a mî ǁkhā ǁîb gaosis ǃnagas ge Babeli di ǂgō-ommi di omhesa a tsoatsoasa. Nēs ge Jodeǁîn di ǃhaoǃnâbe ǂâiǀgaub ǀkha ra ǀgui. Josephusi ge ge xoa: “[Nimrodi] ge ǂaub ǀkha ǁîb ǂgaeǂguis ǃnâ ǂgurose ge mâisen. ǁÎb ǀgaib ain ga khoena ǂgomǃgâ o, o ǀguin Elob di ǃaoba xu ni orehe dib gere ǂâi amaga. Elob ga ǁhawa kai ǁgammi dâusa a hau ob Eloba nî mâǃoa dib ge ge mî. ǁNā-amagab ge ǀgapi ǂgō-omma gere om ǂgao, ǁgammi xa dâuhe tideba tsî nēs ǀkha ǁîn di kai ǁgûna nî ǀkhaoba. Khoen ge ǁîb [Nimrodi] di ǂâiǀgaub xa ge ǃgâibahe, Elob ǃnaga hâsan ge ǃgā-i ase hâs ase gere mû amaga. ǂGō-omman ge ge om . . . tsî i ge oms sîsen-e ǃâubasen taman hâse ǃkhaese ge aiǃgû.”—Jewish Antiquities, I, 114, 115 (iv, 2, 3).
Elobmîs khomai ǃâs
(Genesis 10:6-32) Tsî ǀgôagu Xammi digu ge Kusi, Egipteb, Puti tsî Kanaanni tsîga. 7 Tsî ǀgôagu Kusi digu ge Sebab, Havilab, Sabtab, Ramab tsî Sabtekab tsîga. Tsî ǀgôakha Ramab dikha ge Sebab tsî Dedanni tsîkha. 8 Tsî Kusi ge Nimroda ge hō; ǁîb ge ge ǀgaitsoatsoa ǃhūbaib ai. 9 Tsîb ge ǃgari ǃau-ao ge i ǃKhūb di ais aiǃâ; ǁnā-amagan ra mî: Nimrodi khami ǁnā ǃgari ǃau-aob ǃKhūb di ais aiǃâ. 10 Tsî tsoatsoas ǁîb gaosis dis ge Babilons, Ereks, Akads tsî Kalnes tsîde ge i, Sinarǃhūb ǃnâ. 11 ǁNā ǃhūb ǀkhāba xub ge Asiriab ǁga ǃgûǂoa tsî Ninevesa ge ǂnubi tsî ǁkhāti Rehobot-Irs tsî Kalaxs, 12 tsî Resensa Nineves tsî Kalaxs tsîra ǁaegu, nēs ge ǁnā ǃās kaisa. 13 Tsî Egipteb ge Ludiǁîna ge hō tsî Anamǁîn, Lehabiǁîn, Naftuxǁîn, 14 Patrosiǁîn tsî Kasluxiǁîn, Filisteǁîn ge ǁîna xu ǀkhīn, tsî Kaftoriǁîn tsîna. 15 Tsî Kanaanni ge Sidonni ǂguroǃnaesabeb âba ge hō tsî Heti tsîkha, 16 tsî Jebusǁîb, Amorǁîb, Girgasiǁîb, 17 Hiviǁîb, Arkǁîb, Sinǁîb, 18 Arvadǁîb, Semarǁîb tsî Hamatǁîb tsîna; ǁîna xu di ge Kanaanǁîn di ǃhaoǃnāde ge khoraǂuisen. 19 Tsî ǀkharib Kanaanǁîn dib ge Sidonsa xu Gerars ǃoats ra ǃgû khami Gasas kōse ge ī; Sodoms tsî Gomoras tsîra ǃoats ra ǃgû khami, tsî Admas tsî Seboims tsî Lesas tsîdi kōse. 20 Nēgu ge Xammi di ôaga ǁîgu di ǃhaoǃnāde ǃoa, ǁîgu di gowagu ǃoa, ǁîgu di ǃhūǃâdi ǃnâ, ǁîgu di ǁaedi ǃnâ. 21 ǃAruǀîb ge Semma ǁkhāti ǀgôaga ge ǁorabahe; ǁîb ge Heberi ôagu di îb, Jafeti di ǃgâsab kaiba. 22 Semmi di ôagu ge Elammi, Assuri, Arpaxsadi, Ludi tsî Arammi tsîga ge i. 23 Tsî Arammi di ôagu ge Usi, Huli, Geteri tsî Masi tsîga ge i. 24 Tsî Arpaxsadi ge Selaxa ge hō, tsî Selaxi ge Ebera ge hō. 25 Tsî Eberi ge ǀgam ǀgôakha ge ǁorabahe; ǀguib ge Peleg ti ǀon hâ, ǁîb di tsēdi ǃnâb ge ǃhūbaiba ǀgoraǃāhe xui-ao, tsî ǃgâsab âb ge Joktanni ti ǀon hâ. 26 Tsî Joktanni ge Almodadi, Selefi, Hasarmaveti, Jeraxi, 27 Hadorammi, Usali, Diklab, 28 Obali, Abimaeli, Sebab, 29 Ofiri, Havilab tsî Jobab tsîga ge hō; nēgu hoagu ge Joktanni di ôa ge i. 30 Tsî ǁîgu di ǁanǃkhais ge Mesasa xu Sefarǃhommi aiǂoasǀî ǁgoeb ǃoats ra ǃgû khami ge hâ i. 31 Nēgu ge Semmi di ôaga ǁîgu di ǃhaoǃnāde ǃoa, ǁîgu di gowagu ǃoa, ǁîgu di ǃhūǃâdi ǃnâ, ǁîgu di ǁaedi ǃoa. 32 Nēn ge Noaxi ôagu di ommi dina ǁîn di ǃnaedi ǃoa, ǁîn di ǁaedi ǃnâ, tsî ǁîna xu di ge ǁaede ǃhūbaib ai ge ǀgora, kai dâus khaoǃgâ.