ǁNaeǁgaudi Sida Xristeǁî ûib tsî aoǁnâ sîsenni sîsen ǂkhanib
FEBRUARIB 3-9
ELOBMÎSA XU HÂ ǂÛǂÛSA MÎDI | GENESIS 12-14
“ǃGaeǀhaos sado ra tsâǀkhās”
(Genesis 12:1, 2) Tsî ǀnaib ge ǃKhūba Abrammi ǃoa ge mî hâ i: Doeǂoa sa ǃhūba xu tsî sa ǀaokhoexagusa xu tsî sa îb di omma xu, ǁnā ǃhūb tita nîra ǁgau tsiba ǃoa. 2 Tsî ta ge tita kai ǁaese nîra dī tsi tsî nîra ǀkhae tsi, tsî kai ǀon-e nîra dība tsi; îts ǀkhaese ī!
it-1-E 522 ¶4
ǃGaeǀhaos
Abrahammi ǀkha ge dīhe ǃgaeǀhaos. ǀAsa ǃgaeǀhaos ge Abrammi (Abrahammi) Kanaana ǃoa garu tsî Eufratǃāba ra ǃkharu hîna ge ǂnûiǂgāhe. ǂHanub ǃgaeǀhaos ge 430 kurigu ǃkharu hâ hîna ge ǂnûiǂgāhe. (Gal. 3:17) Jehovab ge Abrahammi Urs, Xaldeǃhūb dis hîna Mesopotamiab ǃnâ hâs aib ǁan hâ hîna ǁîb ǀkha ge ǃhoa. ǁÎbab ge ge mîba îb ǁgauheb nî ǃhūba ǃoa doe. (ǃNǃkh. 7:2, 3; Gen. 11:31; 12:1-3) Eksodus 12:40, 41 (LXX) ge ra mî Israelǁaes ge 430 kurigan Kanaanǃhūb tsî Egipteǃhūb ǃnâ ǁan hâs khaoǃgâ, “ǁnā tsēs ǁkhās ai” ǁnāpaxū a doeǂoa ǃkhaisa. ǁÎn ge 1513ǁî kurib di 14ǁî Nisanni, Pasxab tsēs ai Egipteǃhūb di ǃkhōsisa xu ge ǂoa. (Eks. 12:2, 6, 7) Nēs ge ra ǁgau Abrahammi ge Eufratǃāba ǃkharu tsî Kanaanǃhūb ǀkha gau isa 1943ǁî kurib di 14ǁî Nisanni ai. Abrahammi di ǃgaeǀhaos ge ǁnā ǁaeb ai ge ǂnûiǂgāhe. Kanaan ǃhūb ǃnâ hâ Sexems kōseb Abrahamma sī hâ hînab ge Eloba ǁkhawa ǁîb tawa ge ǂhai. ǁNā ǁaeb aib ge Eloba ǁîb mîmâis ai ǀaro tsî ge mî, “sa suriba ta ge tita nē ǃhūba nîra mā.” Nēs ǀkhab ge ge ǁgau nē ǃgaeǀhaos Edens ǃhanab ǃnâb ge mā mîmâis ǀkha dī xū-e ūhâsa. Tsî ǁnās ǀkha ge ǁgau nē “surib” khoe-i ase nî hā ǃkhaisa. (Gen. 12:4-7) ǃNāsa ǃgāsasibab ge Jehovaba ega Genesis 13:14-17; 15:18; 17:2-8, 19; 22:15-18 ǃnâ ge mā.
(Genesis 12:3) Tita ge nîra ǀkhae ǁnān satsa ra ǀkhaena, tsî nîra ǀâxare ǁnān satsa ra ǀâxarena, tsî sats ǃnâ di ge ǃhūbaib di ǃhaodi hoade nîra ǀkhaehe.
w89-E 7/1 3 ¶4
Tae-i ǃaroma du Abrahamma nî ama ǂan?
Nē buruburuxa mîmâisab ge Abrahamma ǀgam ǃnāra ge ǁnâu. (Gen. 18:18; 22:18) ǁÎsa dīǀoaǀoas ǃgaob ge Eloba ǁōǂoa ge omaridi tsîna khâisa nî mā. Nē khoen ge amase ǀkhaehesa ûiba nî ūhâ, ǃnāsan ǃhūbaib paradais ǃnâ ǀkharaǀkharahe hâ hîna khâisa nî hō amaga. ǁNās khaoǃgân ge nî ǁkhāǁkhāhe matin ǀamo ûiba a hō ǁkhāsa.—Gen. 2:8, 9, 15-17; 3:17-23.
(Genesis 13:14-17) Tsîb ge ǃKhūba Loti ge ǁîba xu ǀgoras khaoǃgâ Abrammi ǃoa ge mî: ǃGapakhâi îts nēsi ǁîs aits hâ ǃkhaisa xu kō ǀapasǀî tsî ǃkhawagasǀî, tsî aiǂoasǀî tsî huriǂoasǀî. 15 Nē ǃhūb sats ra mûb hoaragaba ta ge tita satsa nîra mā tsî sa suriba ǀamosib kōse. 16 Tsî tita ge sa suriba nîra mâi ǃhūbaib di tsarab khami, o i ge khoe-e tsarab ǃhūb dib ga ǃgôahe ǁkhā, o ǁkhāti sa suriba nî ǃgôa ǁkhā. 17 Khâi îts nē ǃhūba ǃgûmaǃnâ, gaxu tsîb a ǂhaba khami; satsa ta ge tita ǁîba nîra mā xuige.
it-2-E 213 ¶3
ǂHanub
ǃKharu ge ǁaeb ǃnân xūna gere dīhe ǀgaub ǂansa ūhâ khoegu ge ra mî ǃhūba gere ǁama ǂgao khoe-i ǃamkuse i ǃhūb hoaba nî mû ǁkhā ǃkhai-i ai mâ tsî ǃhūba gere ǁgauhesa. ǁAma-aob ga “mû ta ra” ti gere mî ob ge ūǃoab ra ǃkhaisa gere ǁgau. Jehovab ge Abrahamma Kanaan ǃhūb di mîmâisa a mā ob ge ǁîba ge mîba îb hoa ǀkhāga ǃoa kō. Abrahammi ge “mû ta ra” ti ge mî tama hâ i Elob ge ǃhūba ǁîb di suriba a mîmâiba amaga. (Gen. 13:14, 15) Moseb ge Israelǁaes di ǂnûǁkhaeba-aob ase ge mîbahe îb ǃhūba “mû.” Nē da go mû xū-i ga ama o, os ge Israelǁaesa ǃhūba ge māhe tsî Josuab ǂgaeǂguis ǃnāga nē ǃhūba ge ū. (Deu. 3:27, 28; 34:4; Mat. 4:8 tawab ge Satanna Jesuba a mîba xū-i tsîna ǂâis ǃnâ ūhâ re.) ǀNî hâ ǀgau ge ib ge ǃhūba ǃgû ǃnâsa tamas ka io ǃhūba ūs di ǂâibasens ǀkha ǂgâsa. (Gen. 13:17; 28:13) ǀNî ǀoro ǃhūb ǁamaxūs di ǂkhanigu ǃnâ i ge ǃhūb ǃnâ hâ haidi ǃgôab tsîna ge xoa mâihe hâ i.—ǀGopeǀnō re Gen. 23:17, 18.
Gagasi xūna ǀō-aisase ôaǃnâs
(Genesis 13:8, 9) Ob ge Abramma Loti ǃoa ge mî: A-i tā ǂnoagu-e hâ tita tsî sats tsîkhom ǁaegu, tsî ti ǃûi-aogu tsî sa ǃûi-aogu ǁaegu, sakhom a khoeǃgâgu xuige. 9 ǃHūb hoaragaba kha sa ais aiǃâ hâ tamab hâ? ǁNâi ǀgoraxū te re! Sats ga ǁareǀkhābǀî ǃgû ǂgao, o ta ge tita amǀkhābǀî nî ǃgû, tsî sats ga amǀkhābǀî ǃgû ǂgao, o ta ge tita ǁareǀkhābǀî nî ǃgû.
w16.05-E 5 ¶12
ǀNammi ǃnâ ǁnâusāgude sîsenǂam
Abrahammi tsî Loti di ǃâb ge Elob ǃgān ge ǂkhîb ǃnâ kaise ǁkhamasa mâsiba a sîsenǂam ǀgausa ra ǁgau. Hoa ǀgamkha ge ǂgariba ge ūhâ-i tsî gu ge gure-aoga ǃû-aib soa-i ǃaroma gere ǂkhaba. ǂKhababa ǀam kais ǃaromab ge Abrahamma Lota ge mîba îb ǂgurose ǁhûi mâ ǀkhāb ais ǁîb omarisa nî ǁan ǃkhaisa. (Gen. 13:1, 2, 5-9) Kaise a ǃgâi aiǁgaus ge. Abrahammi ge ǂkhîba gere ôa tsî ǁîb xa ǀgui ge ǂâi tama hâ i. ǁÎb di khoexaǃnâsib ǃaromab ge xū-e ǂoaǃnâ? Hî-i. Nē mâsiba ǃkharu toa tsîb ge Jehovaba kai ǀkhaeba Abrahamma ge mîmâiba. (Gen. 13:14-17) Jehovab ge ǁîb ǃoaba-aon hîna ǁîb tsoatsoade ǂâis ǃnâ ūhâse ǀnammi ǃnâ ǁnâusāgude ra sîsenǂamna xū-e ǂoaǃnâsa mā-am tide.
(Genesis 14:18-20) Tsî Melxisedeki, gao-aob Salems dib ge pereb tsî ǂauxûib tsîkha ge ūǀkhī; tsîb ge ǁîba pristeri Hoan xa ǀGapi Elob di ge i. 19 Tsîb ge ǀkhae bi tsî ge mî: Ab Abramma ǀkhaehe hâse ī Elob, Hoan xa ǀGapib, ǀhommi tsî ǃhūbaib tsîkha ūhâba! 20 Îb karehe hâse ī Hoan xa ǀGapi Elob, khākhoen âtsa sa ǃomǁae go māba! Tsîb ge disiǁî ǃâsa ǁîba ge mā xūn hoan xa.
(Hebreǁîn 7:4-10) Kō ǁnâi re, matikōseb a kai ǃkhaisa, nēb, abo Abrahammi ge ǁkhāti disiǁî ǃâs ǁkhâuǁnâs disa māba. 5 Tsî Levib ôan digu pristersisa ra hōgu ge mîmā-e ūhâ, ǁaes, ǁnās ge ǁîgu di ǃgâna xu gu nî ǂhanub ǃoa disiǁî ǃâsa ūsa, Abrahammi di kamanaba xun ge ǀkhī xawe; 6 xawe ǁnāb, ǁîn ǃhaos di tama ge ib ge Abrahamma xu disiǁî ǃâsa ū, tsî ǁnāb mîmâisa ge ūhâ iba ge ǀkhae. 7 O i ge hoaragase ǃhoaǃoaheǁoasa, ǂkharib ra ǃnā bi hâb xa ǀkhaehesa. 8 Tsî amase nēpan ge ǁō nîse ī khoena disiǁî ǃâsa ra ū; xawe ǁnāpab ra ǀguib, ûib hâ, ti ra ǀhûǀguitimîbaheba ū. 9 Tsî nēti ta ga mî ǁkhā, ob ge ǁkhāti Levib, disiǁî ǃâsa ra ūba Abrahammi ǃnâ disiǁî ǃâsa ge mā; 10 goroseb ge ǁgûb di kamanab ǃnâ hâ i xui-ao, Melxisedeki ge ǃgûǃoa bi ǃnubai.
it-2-E 683 ¶1
Pristergu
Salems di gao-aob Melxisedeki ge kaise ge ǀō-aisa prister-ī (ko·henʹ). Elobmîs ge ǁîb surib, ǁîb ǃnaes tsî ǁîb ǁōb xa xū-e mî tama hâ. ǁÎb di pristersis, sîsenni tsî xūn tsînab ge ge ǀumi tama hâ i. Melxisedeki ge gao-ao tsî ge prister-ī. ǁÎb di pristersis ge Leviǁî gu di pristersis xa ge ǀgapi-ī. Levib ge disiǁî ǃâsa Melxisedeka ge mā, Abrahammi ge Melxidedeka disiǁî ǃâsa gere mā tsî ǀkhaeba gere māhe ǁaeb aib ge noxoba ǃnae tama hâ i amaga. (Gen. 14:18-20; Heb. 7:4-10) Nē xūn ǀkhab ge Melxidedeka Jesub Xristub hîna a ‘pristera ǀamosib kōse Melxisedeki dommi ǃoa’ gere ǂnûǁkhaeba.—Heb. 7:17.
Elobmîs khomai ǃâs
(Genesis 12:1-20) Tsî ǀnaib ge ǃKhūba Abrammi ǃoa ge mî hâ i: Doeǂoa sa ǃhūba xu tsî sa ǀaokhoexagusa xu tsî sa îb di omma xu, ǁnā ǃhūb tita nîra ǁgau tsiba ǃoa. 2 Tsî ta ge tita kai ǁaese nîra dī tsi tsî nîra ǀkhae tsi, tsî kai ǀon-e nîra dība tsi; îts ǀkhaese ī! 3 Tita ge nîra ǀkhae ǁnān satsa ra ǀkhaena, tsî nîra ǀâxare ǁnān satsa ra ǀâxarena, tsî sats ǃnâ di ge ǃhūbaib di ǃhaodi hoade nîra ǀkhaehe. 4 Ob ge Abramma ge doe, ǃKhūb ge ǁîb ǃoa mî khami, tsî Loti ge ǁîb ǀkha ge doe; tsî Abrammi ge hûdisikoroǀa kurixa ge i, Haransa xub ge doeǂoa ǃnubai. 5 Ob ge Abramma Sarais ǁîb di taras tsî Loti, ǃgâsab âb di ôaba ū tsî xūn, ǁîkha ge ǀhaoǀhaobasen xūn tsî ǀomdi, Harans ǃnâ kha ge hōdi tsîna, tsîn ge ge doeǂoa, Kanaanǃhūb ǃoan nî doese, tsîn ge Kanaanǃhūb ǃnâ ge sī. 6 Tsî Abrammi ge ǃhūba ge doeǃnâǃganu Sexems ti ǀon hâ ǃās, terpentinhais, Mores kōse; tsî Kanaanǁîn ge ǁnā ǁaeb ai ǃhūb ǃnâ ge hâ i. 7 ǃNubaib ge ǃKhūba Abrammi tawa ǂhai tsî ge mî: Sa suriba ta ge tita nē ǃhūba nîra mā. ǃNubaib ge ǁnāpa ǃKhūb, ǁîb tawa go ǂhaiba altar-e ge ǂnubiba. 8 Tsîb ge ǁnāpa xu ge ǂnauǁnâ ǃhommi, Bet-Elsa xu aiǂoasǀî ǁgoeb ǃoa, tsîb ge tentoms âba ge om Bet-Els huribǀî tsî Ais aiǂoasǀî hâǃâ; tsîb ge ǁîba ǁnāpa ǃKhūba altar-e ge ǂnubiba tsî ǃKhūb ǀonsa ge ǂgaiǀî. 9 ǁNās khaoǃgâb ge Abramma dāǁnâ tsî ǃaruǀî ǃKhawagasǃhūb ǁga ge doe. 10 Tsî ǃâtsūǀkhāb ge ǃhūb ǃnâ ge hā; ob ge Abramma Egipteb ǃoa ge doeǁgôa, ǁnāpab nî ǃhaokhoese hâga, ǃâtsūǀkhāb ǁnā ǃhūb ǃnâ a ǃgom xui-ao. 11 Tsî i ge ge ī, Egipteb ǃnâ sīsab ge ǀgūo, ob ge Sarais ǁîb di taras ǃoa ge mî: Mû, tita ge a ǂan îsa taras a ǃkhaisa. 12 O i ge nî ī, Egipteǁîgu ga sasa mûo, o gu ge: Nēs ge ǁîb di tarasa, ti mî tsî tita nî ǃgam tsî sasa nî ûi kai. 13 Mî ǁnâi re ti ǃgâsas a ǃkhaisa, î ta ǃgâibahe re sas ǃaroma, îs ti ǀomsa ûi re sas ǃaroma. 14 Tsî i ge ge ǃnae, Abrammi ge Egipteb ǃnâ sīo, o gu ge Egipteǁîga nē tarasa ge mû, kaises a îsa ǃkhaisa. 15 ǁKhāti gu ge gaosagu Faraob diga ǁîsa mû tsî Faraob aiǃâ ge koa si, os ge tarasa Faraob ommi ǃoa ge ūsīhe. 16 Tsîb ge ǁîba Abramma ge ǃgâidī ǁîs ǃaroma, ob ge gūn, goman, eselgu, ǃgāgu, ǃgādi, eseldi tsî ǃnain tsîna ge ūhâ i. 17 Xawe ǃKhūb ge Faraoba ǁnora-aiǃnôan ǀkha ge ǁnora, tsî ommi âb ona Sarais Abrammi di taras ǃaroma. 18 Ob ge Faraoba Abramma ǂgai tsî ge mî: Tare-e sats go dī te-e? Tarexats ǂanǂan te tama hâ, ǁîs a sa tara ǃkhaisa? 19 Tare xū-i ǃaromats kha ǁîs a ti ǃgâ ti go mî, o ta go ǁîsa ǁaupe tarase ūbasen ǁga? Tsî nēsi ǁnâi, nēs hâ sa tarasa, xuige ū si îts ǃgû re! 20 ǃNubaib ge Faraoba aogu âba ǁîb ǃaroma ge mîmā, o gu ge ǁîba ge ǁnū tsî taras âb tsî ūb hâ xūn hoana.
FEBRUARIB 10-16
ELOBMÎSA XU HÂ ǂÛǂÛSA MÎDI | GENESIS 15-17
“Jehovab ge Abrammi tsî Sarais tsîra ǀonde ge dawa—Tae-i ǃaroma?”
(Genesis 17:1) Tsî Abrammi ge khoesedisikhoeseǀa kurixa ǃnubaib ge ǃKhūba Abrammi tawa ǂhai tsî ǁîb ǃoa ge mî: Tita ge ǃKhūta, Hoaǀgaixa ta, ti ais aiǃâ ǃgû îts ūose ī re.
it-1-E 817
ǀHapis, ǀhapisa ôa
Xawe khoen ǀgaub tsî dīn ra xūn ge kai-amse ǂhanu tama. Hoa khoen ge ǁoreba Adamma xu ge ǀumi. (Rom. 5:12; Psa. 51:5) Jehovab ge ǀhapiob a xawe a “ǂan mâ kuruǃnôada asa, tsarada” asab ge a ǂan tsîb ge a ǀkhomxa. (Psa. 103:13, 14) ǁÎb ge ǂgomǂgomxa khoeb Noaxa “ǂhauǃnâ” aob ase ge ǃgôa hâ i. (Gen. 6:9) Abrahammab ge ge mîba îb ǁÎb “ais aiǃâ ǃgû îts ūose ī.” (Gen. 17:1) Nē ǀgam khoekha ge ǀoasa kurusa ūhâ tama hâ i tsî a ǁō, xaweb ge Jehovab hîna ‘ǂgaoba ra kōǀîba’ ǁîkha ǀhapiose ge ǃgôa. (1Sam. 16:7; ǀgopeǀnō re 2Gao. 20:3; 2Kro. 16:9.) Israelǁaesab ge ge mîba: “ǂHauǃnâsets ge ǃKhūb, sa Elob ǀkha nî hâ” (Deu. 18:13; 2Sam. 22:24) ǁÎb ǀhapio ǀGôabab (Heb. 7:26) ge xoremarib ase a mā amagab ge ǁnā ǃgaoǃgaos ai ǂgomsa ūhâ tsî a ǁnâuǀnamxa khoena ‘ǂhanu-aise’ ra mû tsîb ge ǁkhā ǁaeb ai a ǂhanu-ai tsî ǀhapio ǀGoraǃgâ-ao.—Rom. 3:25, 26; mû re ǂHAUǃNÂSIB; ǀOASA KURUS.
(Genesis 17:3-5) ǃNubaib ge Abramma ais âb ai ge ǁnā; tsî Elob ge ǁîb ǀkha ǃhoa tsî ge mî: 4 Tsî mû, tita xasa, ti ǃgaeǀhaos ge sa ǀkha hâ; tsîts ge nîra kaise kai ǂguib ǁaedi dib di ǁgû kai. 5 Tsî sa ǀons ge ǃaruǀî Abrammi ti ǂgaihe tide, tsîs ge ǀons âtsa Abrahammi ti nîra ǂgaihe, tita ge ǁgûts kai ǂguib ǁaedi dib dits ase mâi tsî xui-ao.
it-1-E 31 ¶1
Abrahammi
ǁAeb ge ge ǃkharu. Disi kurigan Kanaan ǃhūb ǃnâ ǁan hâ hînas ge Sarasa noxoba ǀgôa-e ge hō tama hâ i. ǁNā-amagas ge ǁîs Egipteǁî ǃgās Hagarsa Abrahamma ge mā, îs ǁîsa ǀgôa-e hō. Abrahammi ge nēsa ge mā-am. Tsîb ge Ismaela 1932ǁî kurib ǃnâ, Abrahammi a 86 kurixa hîna ge ǃnaehe. (Gen. 16:3, 15, 16) ǁAeb ge noxoba ge ǃkharu. Abrahammi a 99 kurixa hîna, 1919ǁî kurib ǃnâb ge Jehovaba ǁîba ge mîmā îb ǁîb oms aore khoegu hoaga ǃgao kai. Nēs ge ge Abrahammi Jehovab ǀkha ūhâ ǃgaeǀhaos di ǁgauǁgau i. ǁKhā ǁaeb aib ge Jehovaba ǁîb ǀonsa Abram sa xu Abrahams ǃoa ge dawa, ǁgûb “kai ǂguib ǁaedi dib” aseb ge mâihe xui-ao. (Gen. 17:5, 9-27; Rom. 4:11) ǃNubu ǁaeroba ǃkharu tsî gu ge ǃnona ǀhomǃgāga Abrahammi xa ǃgâise ge ǃkhōǃoahe. Saras nî ǀgamǀkhā tsî saora kurib ǃnâ ǀgôaba nî hō ti gu ge ge mîmâi.—Gen. 18:1-15.
(Genesis 17:15, 16) ǁKhātib ge Eloba Abrahammi ǃoa ge mî: ǀOns sa taras Sarais disats ge Sarai ti ǂgai tide, tsîts ge ǀons âsa Sara ti nî ǂgai. 16 Tita ge ǁîsa nîra ǀkhae tsî ǁîsa xu satsa ǀgôaba nîra mā, ā, tita ge ǁîsa nîra ǀkhae, os ge nîra ǁae kaihe; o gu ge gao-aogu ǁaedi diga ǁîsa xu nîra ǀkhī.
w09-E 2/1 13
ǀOnsa a tae?
Elob ge ǀnî khoen ǀonde kēbos ǀkhan nî ǀgau ga gere dawa. Aiǁgauseb ge Abrammi ǀons hîna “ǁGûb ge a ǀgapi” ti ra ǂâibasensa ge dawa Abrahams hîna ‘ǁgûb kai ǂguib ǁaedi dib’ ti ra ǂâibasensa ǃoa. Abrahammi ge ge ǂgui ǁaedi di ǁgû kai ǁîb ǀons ra mî khami. (Gen. 17:5, 6) Abrahammi taras ǀons, Sarais hîna “ǂKhabaxa” di ra ǂâibasens xas tsîna ǂâi re. Mati koses ge ǁîsa ǂkhî Elob ge ǁîs ǀonsa “Saras” ǃoa a dawa o. Nē ǀons ge “Gao-ǀgôas” ti ra ǂâibasen ǁîs nî Goagu di kai ǁgû kai amaga.—Gen. 17:15, 16.
Gagasi xūna ǀō-aisase ôaǃnâs
(Genesis 15:13, 14) Ob ge ǁîba Abrammi ǃoa ge mî: ǁAposase ǂan re, sa surib ǃhaokhoese nîra hâ ǃkhaisa, ǃhū-i ǁîn dise ī tama-i ǃnâ, tsîn ge ǁîna nîra ǃoaba, tsîn ge ǁîna nîra ǁgâiǀā hakakaidisi kuriga. 14 Xawe tita ge ǁkhāti ǁnā ǁaes ǁîn nîra ǃoabasa nîra ǀgoraǃgâ, tsî ǁnās khaoǃgân ge kai-am xūn ǀkha nîra doeǂoa.
it-1-E 460-461
Saogurasen ge xūna a ī ǀgaub
Jehovab ge Abrammi (Abrahammi) ǃoa ge mî: “ǁAposase ǂan re, sa surib ǃhaokhoese nîra hâ ǃkhaisa, ǃhū-i ǁîn dise ī tama-i ǃnâ, tsîn ge ǁîna nîra ǃoaba, tsîn ge ǁîna nîra ǁgâiǀā hakakaidisi kuriga.” (Gen. 15:13; mû re ǃNǃkh. 7:6, 7) Nē mîdi ge Isaki hîna ge mîmâisa ‘suri’ ib ge ǃnaehes aiǃâ ge mîhe. Ismaeli ge 1932ǁî kurib ǃnâ Egipteǁî ǃgās Hagars xa ge ǃnaehe. Tsîb ge Isaka 1918ǁî kurib ǃnâ ge ǃnae. (Gen. 16:16; 21:5) Israelǁaes ge Egipte ǃhūba xu a ǂoa ǁaeb hîna ge ‘ǁgâiǀāb’ (Gen. 15:14) di ǀam îba xu da 400 kuriga khaosǀkhāba ǃoa ra ǃgôa o, o da ge 1913ǁî kurib tawa nî sī. ǁNā kurib aib ge Isaka ge koro kurixa i. ǁNā ǁaeb aib ge ǀnîsi ǀnai ge ǀōǀōhe hâ i tsî “ǃhaokhoese” ǁîn di tama ǃhūb ǃnâ gere hâ. Mîmâihe ge hâ i ǁgâiǀābab ge ge hōǃgâ tsoatsoa Ismaeli hîna ge ǀnîsi 19 kurixa îb ge ǁîba gere “ǃhō” o. (Gen. 21:8, 9) Ismaeli ge Isaka gere ǃhō ǃkhaisan khoena nētsē ǀnîsi xu tama i ase nî mû xawe i ge Abrahammi ǁaeb ǃnâ tsū xū-i ase gere ǃgôahe. Hagars tsî Ismaeli nî doebēsas ge Sarasa ge ǂhâba hâ i tsîb ge Eloba nēsa a mā-am ǃkhais ge ra ǁgau ǂkhari xū tama i ge hâ i ǃkhaisa. (Gen. 21:10-13) Nē xūn ǃgāsase Elobmîs ǃnâ a xoa mâisa ǃkhais ge ra ǁgau 400 kurigu di ǁgâiǀāb ge ǁnā ǁaeb ai a tsoatsoasa tsî Egipte ǃhūba xūn ge ǂoa o ǀgui ge ǀamsa.—Gal. 4:29.
(Genesis 15:16) Tsî hakaǁî ǃhaos, ǁîs ge ǁkhawa nîra oahā; ǂhanuoǃnâsib Amorǁîn dib nēs kōse ǀoa tama hâ xui-ao.
it-1-E 778 ¶4
Eksodus
“Hakaǁî ǃhaos.” Hakaǁî ǃhaos Abrahammi dis Kanaan ǃhūba ǃoa nî oaǀkhī tib ge Jehovaba Abrahamma a mîba ǃkhaisa da ge ǂâis ǃnâ nî ūhâ. (Gen. 15:16) Abrahammi di ǃgaeǀhaos ge ǂnûiǂgāhesa xu Israelǁaes ge Egipte ǃhūba xu a ǂoas kose i ge 430 kuriga ge hâ. Khoen ge kaise gaxu ǁaeba gere ûi. Xawe Israelǁaes ge 215 kurigu ǀguiga Egipte ǃhūb ǃnâ ge ǁan hâ i. Egipte ǃhūb ǃnân ǂgā toa hâs khaoǃgâ ge hâ hakaǁî ǃhaosa da ge Levib ǃhaosa ra sîsen-ūse nēti a ǁguiǃgā ǁkhā: (1) Levib, (2) Kehati, (3) Amrammi, tsî (4) Moseb.—Eks 6:15, 17, 19.
Elobmîs khomai ǃâs
(Genesis 15:1-21) Nē ǃnaeǃkhaidi khaoǃgâs ge mîs ǃKhūb disa Abramma ge ǃnaeba, ai-i ǃnâ, mî raǃâ: Tā ǃao re, Abramtse, tita ge sa khōsikhōta, sa amǃnâta, hîa kaise kaita. 2 Ob ge Abramma ge mî: ǃKhūtse, ǃKhūtse, tare-ets nî mā te, ǀgôan ose gau khoeta go titao; tsî ǀgôab ti ommi dib ge nē Damaskuǁîb Eliesera. 3 ǃAruǀîb ge Abramma ge mî: Mû, titats ge suri-e mā tama hâ; ǁnâi mû, ǀgôab ti ommi dib ge nî ti ǀumi-ao! 4 Tsî mû, os ge ǃKhūb mîsa ǁîba ge hāba, mî raǃâ: Nēb ge sa ǀumi-ao kai tide; tsî sa ǀkhāba xu nîra ǀkhīb, ǁîb ge nîra sa ǀumi-ao kai. 5 ǃNubaib ge ǃaugaba ǃoa ǂgaeǂguiǂui bi tsî ge mî: Kōkhâi re nēsi ǀhommiǀî îts ǀgamirode ǃgôa re, ǃgôa di ǁkhāts kao. Tsîb ge ǁîb ǃoa ge mî: Nētib ge surib âtsa nîra ī. 6 Ob ge ge ǂgom ǃKhūb ǃnâ; tsî ǁîb ge ǁnāsa ǂhanu-aisise ge ǃgôaba bi. 7 ǃAruǀîb ge ǁîb ǃoa ge mî: Tita ge ǁnā ǃKhūta, Urs Xaldeaǁîn disa xu ge ǂgaeǂguiǂui tsi ta, satsa ta nē ǃhūba nî māga, ǀumisets nî ǁîba ūhâga. 8 Ob ge ge mî: ǃKhūtse, ǃKhūtse, mâ xū-i tawa ta nî ǂan, ǁîba ta ǀumise nîra ūhâ ǃkhaisa? 9 Ob ge ǁîba ǁîb ǃoa ge mî: Tita ūba re ǃnona kurixa tsâus tsî ǃnona kurixa piris tsî ǃnona kurixa ǂkharapirib tsî ǂnais tsî ǂkham ǂnabus tsîna. 10 Ob ge nēn hoana ǁîba ge ūsība, tsîb ge ǁîna ge ǀgoraǃā, tsîb ge mâ ǃâs hoasa naus ǃoagu ge ǁgui; xawe aninab ge ǀgora tama ge i. 11 Tsî ǀaun ge ǁō hâ sorodi ai hā ǁgôaxa, xawe Abrammi ge ǁîna ge ǃhaebē. 12 Tsî i ge ge ī sores ra ǂgâ hîa i ge ǃgam ǂom-e Abrammi ai hā ǃkhaisa; tsî mû, o i ge ǃhuri-i tsî ǃkhaena-e ǁîba ge ǁgoe-ai. 13 Ob ge ǁîba Abrammi ǃoa ge mî: ǁAposase ǂan re, sa surib ǃhaokhoese nîra hâ ǃkhaisa, ǃhū-i ǁîn dise ī tama-i ǃnâ, tsîn ge ǁîna nîra ǃoaba, tsîn ge ǁîna nîra ǁgâiǀā hakakaidisi kuriga. 14 Xawe tita ge ǁkhāti ǁnā ǁaes ǁîn nîra ǃoabasa nîra ǀgoraǃgâ, tsî ǁnās khaoǃgân ge kai-am xūn ǀkha nîra doeǂoa. 15 Tsîts ge satsa sa îgu ǃoa ǂkhîb ǃnâ nîra ǃgû; ǃgâi kairasib ǃnâts ge satsa nîra ǁkhōhe. 16 Tsî hakaǁî ǃhaos, ǁîs ge ǁkhawa nîra oahā; ǂhanuoǃnâsib Amorǁîn dib nēs kōse ǀoa tama hâ xui-ao. 17 Tsî i ge ge ī sores ra ǂgâ tsî i ra ǃkhae ǃkhaisa, mû, o i ge ǀan ra ǁganom-i tsî ǀaexa ǃamamǀae-i khami ge hā, ǃâde ra ǃgûǃnâǃganu-e. 18 ǁNā tsēs ǁkhās aib ge ǃKhūba ǃgaeǀhao-e ge dī Abrammi ǀkha, mî rase: Sa suriba ta ge tita nē ǃhūba nîra mā, ǃāb Egipteba xu ǁnā kai ǃāb Eufrati kōse, 19 Keniǁîn, Kenisiǁîn, Kadmoniǁîn, 20 Hetiǁîn, Perisiǁîn, Refaimǁîn, 21 Amorǁîn, Kanaanǁîn, Girgasiǁîn tsî Jebusǁîn tsîna.
FEBRUARIB 17-23
ELOBMÎSA XU HÂ ǂÛǂÛSA MÎDI | GENESIS 18-19
“‘ǂHanuǂhanu-aob ǃhūbaib hoaragab’ dib ge Sodoms tsî Gomoras tsîna ra hîkākā”
(Genesis 18:23-25) Tsîb ge Abrahamma dāsī tsî ge mî: Tsîts kha ǁnâi satsa ǂhanu-aiba eloxoresab ǀkha nî hîkākā? 24 ǀNîsin nî korodisi ǂhanu-aina ǁnā ǃās ǃnâ hâ: ǁÎn onats kha nî hîkākā tsî ǃāsa sâu tide korodisi ǂhanu-ain ǁîs ǃnâ hân ǃaroma? 25 Tātsēts ge satsa ǁîsa hî tide, ǂhanu-aiba eloxoresab ǀkha ǃgamsa, ǂhanu-aib nî eloxoresab ǀkha ǀguiti-īsa; tātsēts ge satsa hî tide! ǁNâi ǂhanuǂhanu-aob ǃhūbaib hoaragab diba kha ǂhanuseb sîsen tide?
w17.04-E 18 ¶1
“ǂHanuǂhanu-aob ǃhūbaib hoaragab” dib ge hoaǁae ǂhanu xū-e ra dī
“ǁNâi ǂhanuǂhanu-aob ǃhūbaib hoaragab diba kha ǂhanuseb sîsen tide?” (Gen. 18:25) Nēb ge dî dîs ǀkhab ge Abrahamma ǂgomǃgâsibab Jehovab ǃnâ ūhâsa gere ǁgau. Jehovab Sodoms tsî Gomoras tsîna ǂhanu-ai ǀgaub ǃnâ nî ǀgoraǃgâ ǃkhaisab ge ge ǂgomǃgâ hâ i. Jehovab hukas tsîna ǂhanuoǃnâse “ǂhanu-aiba eloxoresab ǀkha” ǃgam tide ǃkhaisab ge ge ǂan i. “Tātsēs” ǁnāsa ī tidesab ge Abrahamma ge ǂan i. Jehovab ge 400 kurigu khaoǃgâ nē mîde ge mî: “ǃGareǀuib ge a ǁî, sîsenni âb ge a ǀoasa. ǁÎb di daogu hoagu ge a ǂhanu xui-ao; Elob ge a ama tsî gāxaǃnâ tama, ǂhanu-aib tsî ǂhauǃnâb ge a ǁî.”—Deu. 31:19; 32:4.
(Genesis 18:32) Ob ge gorose ge mî: Ab ǃKhūba tā ǁaixa re nē ǃnās ǀguisa ta ga ǃhoao: ǀNîsin nî disina hōhe. Ob ge: Tita ge ǁîsa hîkākā tide disin ǃaroma, ti ge mî.
ǃNūǃnâxasib hîna ǂâibasens ǀkha hâb
ǃNūǃnâxasib tawa i ga ra hā o, ob ge Jehovaba mâǂoa ra aiǁgause ī ǁgaehe ǁkhāba. (2Pet. 3:15) Elobmîs ǃnâ di ge ǂgui ǃnaeǃkhaide hâ Jehovab ǃnūǃnâxasiba ra ǃhoaǃgaode. (Neh. 9:30; Jes. 30:18) Aiǁgause, Jehovaba tae-e ge dī Abrahammi ge Sodoms dīkākās xa a dî bi o? Abrahammi gere ǃhoa o, ob ge Jehovaba ǁîba ge ǃhoa ǁkhae tama hâ i. Xawe Jehovab ge ǃnūǃnâxase Abrahammi dîdi tsî ǂâiǂhansendi tsîna gere ǃgâ. Jehovab ge ge ǁgau Abrahammab gere ǃgâ ǃkhaisa tsî ge mîba bi Sodomsab dīkākā tidesa 10 ǂhanu-ai khoen ga ǁnā ǃās ǃnâ hōhe o. (Gen. 18:22-33) Nēs ge ǃgâi aiǁgaus khoe-e ǃgâs disa, khoe-e ǃhoa ǁkhae tamase.
(Genesis 19:24, 25) ǃNubaib ge ǃKhūba sulfuri tsî ǀaes tsîra Sodoms tsî Gomoras tsîra ai ge ǀapi kai, ǃKhūba xu, ǀhomma xu. 25 Tsîb ge ǁîba nē ǃāra ge dabaǃkhuni, tsî ǁnā ǂgāb hoaragab tsî ǁansaben ǁnā ǃāra din hoana, tsî ǃhūb ra ūǀkhīn tsîna.
w10-E 11/15 26 ¶12
Jehovab ge sida di ǂhanu ǂgaeǂgui-ao!
ǂGomǃgâ ǁkhā da ge a Jehovab ǁîb a ǂhanu ǂgaeǂgui-aosa ǀgūǁae nî ǁgau ǃkhaisa. Nēsi da ge ǀuni tsēdi ǃnâ ûi hâ tsîb ge ǁÎba eloxoresasib ǀamose nî hâsa mā-am tide. Jehovab ge eloxoresana kai ǁgammi dâus ǀkha ge ǁkhara. ǁÎb ge Sodoms, Gomoras tsî Faraob tsî ǁîb di toro dī-aogu hoaga ge dīkākā. Siserab tsî Sanherib, Asiriab di gao-aob tsî ǁîb di toro dī-aogu ge Hoan xa ǀGapib aiǃâ, xu tama i ase ge i i. (Gen. 7:1, 23; 19:24, 25; Eks. 14:30, 31; ǂHǂh. 4:15, 16; 2Gao. 19:35, 36) ǁNā-amaga da ge a ǂgomǃgâ ǁkhā Jehova Elob ǁîb ǀons nî ǃhōhe tsîn ǁîb di ǀHûǀguitimî-aona ǁgaise nî hâ-ūhesa ǀunis kōse mā-am tidesa. ǁNās ǂam-ai da ge nētsē Jesub hās tsî nē hâ ǁaeb ǀams di saosa ra mû.—Mat. 24:3.
Gagasi xūna ǀō-aisase ôaǃnâs
(Genesis 18:1) ǁNās khaoǃgâb ge ǃKhūba ǁîb tawa ge ǂhai terpentinhaidi Mamres didi tawa, tentoms di dao-ams ǃnâb ǂnôa hîa, tsēs ge ǀgamsa i ǃnubai.
(Genesis 18:22) ǃNubai gu ge ǁnā aoga ǁnāpa xu ūnusen tsî Sodoms ǃoa ge ǃgû; xawe Abrahammi ge ǃKhūb di ais aiǃâ ge mâ i.
w88-E 5/15 23 ¶4-5
Khoe-e Eloba ge mû?
ǁNâuǃā ǁkhā da ge a tae-i ǃaromab Abrahamma, Elob haisi-amsa ge hau ǀhomǃgāba Jehovab ǀkhab ra ǃhoa khami gere ǃhoa-ūsa. Jehovab mîdeb ge ī di ase Abrahamma a mîba tsîb ge ǁnapa hâ i ǃkhais ǃaromas ge Elobmîsa “ǃKhūb ǁîb tawa ge ǂhai” di ra mî.—Gen. 18:1.
ǂÂis ǃnâ ūhâ re ǀhomǃgāb ge Eloba xu hâ haisi-amsa īs ase ge mā ǃkharu ǁkhā i, nētsēb telefoni tamas ka io radiosa ra dī khami. ǁNā-amaga da ge a ǁnâuǃā ǁkhā tae-i ǃaromab Abrahammi, Moseb, Manoaxi tsî nau khoen tsîna Elob ǀkha ra ǃhoa khami ǀhomǃgāgu ǀkha gere ǃhoasa. Nē ǀhomǃgāgan nē khoena gere mû tsî Jehovab di ǂhaisib tsîna ǁîgu ǃnâ-ū gere mû xawen ge Eloba ge mû tama hâ i. “Khoe-i xare-i ge Eloba tātsē mû tama hâ” tib ge Apostel Johaneba a mî mîdi ge noxoba a ama. (Jhn. 1:18) Nē khoegu ge Elob di ǀhomǃgāgu hîna ǁÎba gere ǂnûǁkhaeba ga ge mû, Elob ose.
(Genesis 19:26) Tsî taras âb ge ǂnan, os ge ge ǂōǂkhâǃnâ kai.
Nau ǃgâsana ǁîn ǃgomsina tanis ǀkha hui re
Loti ge ǃgâi tama mîmâisa ge dī, ǁîb ge ǁgai ǁorena ra dī khoen ǁaegu sī ge hâ Sodoms ǃnâ. (Khomai re 2 Petrub 2:7, 8.) Nē ǃās ge kaise ge ǁkhoaxa i xaweb ge Lota ǁnāǀî does ǃaroma kai ǃgomi ǃnâ ge hâ i. (Gen. 13:8-13; 14:12) ǁÎb taras ge ǃās tsî khoen tsîn xa kaise ge ǃgâibahe tsî Jehovaba ge ǁnâuǀnam tama hâ i. ǁÎs ge ǁîs ûiba Elob ge ǀaeb tsî sulfuri tsîna ǀhomma xu ǀapi kai o, o ge ǂoaǃnâ. Loti ǀgam ǀgôara xas tsîna ǂâi re. ǁÎra ge Sodoms ǃnâ ge ǁō khoekha nî ǃgamese ge ī i. Loti ge ǁîb oms, xūn tsî kaise tsûtsûsase ǁîb taras tsîna ge ǂoaǃnâ. (Gen. 19:12-14, 17, 26) ǁÎb di ǃgom ǁaegu ǃnâb ge Jehovaba ǁîb ǃoa-ai ǁaixa? Hî-î.
Elobmîs khomai ǃâs
(Genesis 18:1-19) ǁNās khaoǃgâb ge ǃKhūba ǁîb tawa ge ǂhai terpentinhaidi Mamres didi tawa, tentoms di dao-ams ǃnâb ǂnôa hîa, tsēs ge ǀgamsa i ǃnubai. 2 Tsîb ge ǃgapakhâi tsî ge kō; tsî mû, ǃnona aogu ge ǁîb aiǃâ ge mâ i, tsî ǁîgab ge mûo, ob ge ǁîga ge ǃkhoeǃoa tentoms di dao-amsa xu tsî ǃhūb ai ge ǃgamǃgâ, 3 tsî ge mî: ǃKhūtse, ǀkhomma ta ga sa mûǁae hō, o tā ǁnâi sa ǃgāta ǃgû-īǀkhā go re! 4 Î go ǁgamro-e ūhābahe î go sago ǂaide ǁā, î go nē hais ǃgao ǃgâsen re! 5 O ta ge tita pereǃâro-e nî ūǀkhī, sago ǂgaoba go nî ǀgaiǀgaise; ǁnās khaoǃgâ go ge nî ǃgû, sago ǃgāta ǃoa go go hā amaga. O gu ge: Mîts go khami dī re, ti ge mî. 6 Ob ge Abrahamma Saras ǃoa tentoms ǃnâ ǃhaeǃhaesen tsî ge mî: ǃHae îs ǃnona ǀguirode tsampereb xa ū, îs ǀhomam tsî ǁganperede dī re! 7 Ob ge Abrahamma goman ǃoa ǃnoe tsî tsâu-i hîa tsam tsî ǃgâi-e ū tsî ǁî-e ǃgāba ge mā; ǁîb ge ǃhaeǃhaesen tsî ǁî-e ge ǁanǁan. 8 Ob ge ora ǁnui-i tsî dai-i xa ū, tsî tsâu-i ǁîb goro ǁāǁā-e, tsîb ge ǁîna ǁîga ge mâi-aiǃâ; tsîb ge ǁnā hais ǃgao ge mâ, ǁîgu ra ǂû hîa. 9 ǃNubai gu ge ǁîb ǃoa ge mî: Mapas Saras sa tarasa hâ? Ob ge: ǁNā hâ tentoms ǃnâ, ti ge mî. 10 Ob ge ǁîba ge mî: Tita ge ǂanǂansase ǁkhawa nîra hā, ǁaupe nē ǁaeb ûib dib ǁkhāb ai; tsî mû, os ge sa taras Sarasa ǀgôaba nîra ūhâ. Tsî Saras ge ǁîsa tentoms di dao-ams, ǁîb khaoǃgâ hâs ǃnâ ge ǁnâu. 11 Tsî ra ge Abrahammi tsî Saras tsîra kaira tsî ge kurixa i; Saras ge ǀû ge hâ i tararekhoe dommi ai ībahesa. 12 Os ge Sarasa ǁîs ǂûs ǃnâ âi, tsî ge mî: Okha, xare ta kha tita turaba nî sîsenū kaira ta ges khaoǃgâ, tsî ti ǀhonkhoeb ge ǁkhāti a kaira? 13 Ob ge ǃKhūba Abrahammi ǃoa ge mî: Tare xū-i ǃaromas ra âi Sarasa, mî raǃâ: Amase ta kha ganupe nî ǁora, kaira ta hâ hîa? 14 Xū-i ǃKhūba nî dā-e hâ i a? Mîmâihesa ǁaeb ai ta ge tita ǁkhawa sa tawa nîra hā, ǁaupe nē ǁaeb ûib dib ǁkhāb ai, os ge Sarasa ǀgôaba nîra ūhâ. 15 Os ge Sarasa ǀoa tsî ge mî: Âi tama ta hâ ti, ǃaos gere amaga. Ob ge ǁîba: Hî-î, âis go, ti ge mî. 16 ǃNubai gu ge ǁnā aoga ǁnāpa xu khâi tsî Sodomsǀî ge ūnusen; ob ge Abrahamma ǁîgu ǀkha ge ǃgû ǁîgab nî ǁnūse. 17 Ob ge ǃKhūba ge mî: Gaugau ta nî tita Abrahammi aiǃâ dī ǂgao ta ra-e? 18 Amaseb Abrahamma nîra kai tsî ǀgaisa ǁae kai tsî ǁaedi ǃhūbaib didi hoadi ǁîb ǃnâ nîra ǀkhaehe amaga. 19 ǂAn bi ta a xui-ao, ǁîb di ôan tsî ommi âbab nîra ǁîb khaoǃgâ mîmā ǃkhaisa, în ǃKhūb di daoba ǃkhōǀgaipe ti, ǂhanu-aisib tsî ǀgoraǃgâs tsîra nî dīse, ǃKhūb nî Abrahammi ǂamai hā kaiga, ǁîb ge ǁîb xa mîsa.
FEBRUARIB 24–MAARTI 1
ELOBMÎSA XU HÂ ǂÛǂÛSA MÎDI | GENESIS 20-21
“Jehovab ge hoaǁae ǁîb mîmâide ra dīǀoaǀoa”
(Genesis 21:1-3) Tsî ǃKhūb ge Sarasa ge sari, ǁîb ge mî khami; tsî ǃKhūb ge Saras tawa ge dī ǁîb ge ǃhoa khami. 2 Tsî Saras ge ǀgamǀkhā tsî Abrahamma ǀgôaba ge ǁoraba kairasib âb ǃnâ, mîmâihesa ǁaeb Elob ge ǁîba mîbab ai. 3 Tsî Abrahammi ge ǁnā ǀgôab âb, ǁorabaheb ge Saras xab di ǀonsa Isaki ti ge ǂgai.
wp17.5-E 14-15
Elob ge ǁîsa “Gaoǀgôas” di ge ǂgai
Sarasa ǁîs ǂgoms a ǂkhabusa amaga ge âi? Hî-i. Elobmîs ge ra mî: “ǂGomsa xus ge ǁkhāti Sarasa ǀgaiba ge hō, ǃhao-es nî ǃgaoǃgaose, tsî kairas hâ xawes nî ǁorase; ǁîsa ge mîmâibas ge ǂgomǂgomsase ūhâ i amaga.” (Heb. 11:11) Saras ge Jehovaba ge ǂan i. ǁÎb mîmâidi hoadeb nî dīǀoaǀoa ǃkhais ǃnâs ge Sarasa ǂgomǃgâsiba ge ūhâ i. Amase da ge hoa da ǁîs ge ūhâ i ǀgaisa ǂgomsa ǂhâ hâ. Kaise i ge a ǃgâi ǁguiǂgāsen tsî da ga Eloba ǃgâise a ǂan o. Nēsa da ra dī khami da ge nî mû Saras ge ǃgâi xū-e a dīsa, Jehovab ǃnâs ge ǂgomsa a ūhâ o. Jehovab ge a ǂgomǂgomsa tsî dīb ra mîmâis hoasa nî dīǀoaǀoa. ǀNî ǁaegu ai da ge ǁÎb mîmâisa ra dīǀoaǀoa ǀgaub xa kaise buru tsî kaise i a ǂoaǂamsa amaga nî âi.
‘ǃGÂ RE ǁÎS DI DOMMA’
ǁÎs ûib hoabas ǃâu hâ xū-es ge Sarasa 90 kurixas a hîna ge hō. ǁÎs aob hîna 100 kurixabas ge ǀgôaroba ge hōba! Abrahammi ge ǀgôaba Isak tamas ka io “âi” di ge ǂgai. Mûnanai re Saras tsaus hâ xawe ǀnom rase ra mîsa: “Elob ge âixū-e tita go dība, ǁî-i xa ga ǁnâu-i hoa-i tita nî âi-e.” (Gen. 21:6) Jehovab di buruxa ǀkhaeb ge ǁîsa ǀunis kōse ge ǂkhî kai. Xawes ge nēsa kai sîsen-e ge ǃkhōǂgā hâ i.
Isaki ge koro kurixa os ge omarisa ǁîb di ǀōǀōhesa ge ǁâudī. Xawe i ge xū-e ǃgâi tama ge hâ i. Saras ge ǃgâi tama tanisen ǀgauba gere “mû” di da ge ra khomai. Hagars di 19 kurixa ǀgôab ge Isakroba gere ǃhō. Nēs ge ǀhurus ǀguisa ge ī tama hâ i. Apostel Paulub ge ega Ismaeli ge ǀgôaba gere ǃgôaǃgon di ge mî. Saras ge ge mûǂan ǁîs ôab di ûib ǁkhōǁkhōsa mâsib ǃnâ mâ ǃkhaisa. Saras ge ge ǂan i nēb ǁîs ǀgôas ǀguisa i tamasa xaweb Jehovab di ǂâibasens ǃnâ kai ǃâ-e ra ǀhurusa. ǁNā-amagas ge ǁkhoaǂgaose Abrahammi ǀkha ge ǃhoa. Abrahammas ge ge ǂgan îb Hagars tsî Ismaeli tsîna sî bē.—Gen. 21:8-10; Gal. 4:22, 23, 29.
Abrahamma tae-e ge dī? “Nē mîs ge kaise karosa ge i Abrahammi mûǁae, ǁîb di ôab a ǃkhais ǃaroma” di da ge ra khomai. ǁÎb ge Ismaela ge ǀnam i tsî ǁgûb aseb ūhâ tsâsib xa nē mâsiba ǃamkuse ge mû tama hâ i. Xaweb ge Jehovaba mâsibab ǃamkuse ra mû amaga xū-e ge dī. “Xawe Elob ge Abrahammi ǃoa ge mî: ǁÎ ǃkhaisa tā karosase ī kai sa mûǁae ǀgôab âts ǃaroma, tsî ǃgās âts ǃaroma; Saras ga mî xū-i hoa-i ǃnâ ǃgâ re ǁîs di dommi ai, Isaki ǃnâts sa ǃkhomma nîra ǂgaibahe xuige” di da ge ra khomai. Jehovab ge Abrahamma ge mîba Hagars tsî ǁîs ôab nî kōǃgâhe ǃkhaisa. ǂGomǂgomsa Abrahammi ge nēs ǀkha ge sîsenǀhao.—Gen. 21:11-14.
(Genesis 21:5-7) Tsî Abrahammi ge ǀguikaidisi kurixa ge i, Isaki ǁîb di ôabab ge ǁorabahe ǃnubai. 6 Tsî Saras ge ge mî: Elob ge âixū-e tita go dība, ǁî-i xa ga ǁnâu-i hoa-i tita nî âi-e. 7 ǃAruǀîs ge ge mî: Tari-e dītsâ tsî ga Abrahamma mîba hâ Saras ge ǀgôaga daisi hâ? Tita ge ǀgôaba ǁora kairasib âb ǃnâ amaga.
(Genesis 21:10-12) Os ge Abrahammi ǃoa ge mî: ǃHaeǂui re nē ǃgās tsî ǁîs di ôab tsîra; nē ǃgās di ôab ti ôab Isaki ǀkha ǀumi tide xuige. 11 Tsî nē mîs ge kaise karosa ge i Abrahammi mûǁae, ǁîb di ôab a ǃkhais ǃaroma. 12 Xawe Elob ge Abrahammi ǃoa ge mî: ǁÎ ǃkhaisa tā karosase ī kai sa mûǁae ǀgôab âts ǃaroma, tsî ǃgās âts ǃaroma; Saras ga mî xū-i hoa-i ǃnâ ǃgâ re ǁîs di dommi ai, Isaki ǃnâts sa ǃkhomma nîra ǂgaibahe xuige.
(Genesis 21:14) ǃNubaib ge Abrahamma ǃnauǁgoaga khâi tsî pereba ge ū, tsî ǁgam-i ǁhōsa, tsî ǁîna Hagarsa ge mā, ǁîna ǃhōb âs ai ra ǁguiǃâ, tsî ǀgôaba mā tsî ge sîbē si. Os ge ǃgû tsî ǃgaroǃhūb Bersebas dib ǃnâ gere kāma.
Gagasi xūna ǀō-aisase ôaǃnâs
(Genesis 20:12) Tsîs ge ǁkhāti amase a ti ǃgâ, ti îb di ôas a xawes ge ti îs di ôa tama hâ, tsîs ge ge ti tara kai.
wp17.3 12, ftn.
“Îsa taras a”
Saras ge ge Abrahammi di ǃgâ i. Terab ge ge hoara di ǁgû i xawe ra ge ǃkharaga ǁgûra ge ūhâ i. (Gen. 20:12) ǁNāti i ǃgammeb nētsēs ûib ǃnâ ūǃoahe tide xawe da ge ǂâis ǃnâ nî ūhâ mâsib ge kaise ǀkhara isa ǁnā ǁaeb ǃnâ. Adammi tsî Evas tsîra ge ǂoaǃnâ ǀoasa kurus ǀgūsen ge nē khoena ge hâ i. Nē khoen sorodi ge ǀgaisa i amaga i ge ǀgū omaris ǁanin ra hō ǀgôana ǁkhōǁkhōsa mâsib ǃnâ ge hâ tama hâ i. Khoen ûi kurin ge 400 kurigu ǃkharu hâs khaoǃgâ sida ûi kurin ǀkha ge ǀgui i. ǁNā ǁaeb aib ge Moseb di ǂhanuba ǀgū omaris ǁanin ǁaegu hâ ǃgammega ge ǂkhā.—Lev. 18:6.
(Genesis 21:33) Tsîb ge ǀnomahai-e ge ǂgā Bersebas tawa, tsîb ge ǁnāpa ǀons ǃKhūb ǀamo Elob disa gere ǂgaiǀî.
w89-E 7/1 20 ¶9
Abrahammi ge Elob di ǀhō kai ǂgao ra khoena aiǁgause ība
Abrahammi ge ǁkhawa ǁîb ǂgomsa ra sîsenǂui. Elobmîs ge ra mî: ‘ǃNubaib ge ǁnāpa ǃKhūba . . . altar-e ge ǂnubiba.’ (Gen. 12:7) ǀNîsib ge xamani-e ǁnāpa ge ǁguiba, “altar” di hâ Hebregowab mîs “ǁguibas ǃkhaib” di ra ǂâibasen amaga. Abrahammi ge ǁkhā xū-e ǀkhara ǃkhaigu ai ge dī. ǁNās xōǀkhāb ge “ǀons . . . Elob disa gere ǂgaiǀî.” (Gen. 12:8; 13:18; 21:33) Hebregowab ǃnâ i ‘ǀonsa ǂgaiǀî’ di ra mîhe o i ge “ǀonsa ge ǂgaiǂui” tamas ka io aoǁnâ dis tsîna ra ǂâibasen. Abrammi omaris tsî Kanaanǁîn tsîn ge ǀnîsi gere ǁnâu matib ǁkhoaǂgaose îb Elob, Jehovab ǀonsa ra ǂgaiǂui ǀgausa. (Gen. 14:22-24) ǁNās ǁkhās khamin ge nētsē ra Elob di ǀhō kai ǂgao khoena ǁîb ǀonsa ǂgoms ǃnâ nî ǂgaiǀî. Nēs ge aoǁnâ sîsen-e ǃkhōǂgā hâ. ǁNās ǃnâ-ū “Eloba koaǁguibasa ǁguiba; ǁnās ge ǁîb di ǀonsa ra ǁguiǁnâ amǁgaugu di ǂûsa”.—Heb. 13:15; Rom. 10:10.
Elobmîs khomai ǃâs
(Genesis 20:1-18) Tsî Abrahammi ge ǁnāpa xu ǃkhawagasǀî ǁgoe ǃhūb ǃoa ge dāǁnâ, tsîb ge Kades tsî Surs tsîra ǁaegu ge sī ǁan; tsîb ge ǃhaokhoese Gerars tawa ge hâ. 2 Tsî Abrahammi ge Saras, taras âb xa mîo: Nēs ge a ti ǃgâ, ob ge Abimelexi, Gerars gao-aoba sî tsî Sarasa ge ūbē. 3 Xawe Elob ge Abimelexi tawa ge hā tsuxuba ǁhapo-i ǃnâ, tsîb ge ǁîba ge mîǀî: Mû, sats ge nî ǁō, ǁnā tarasats go ūbēs ǃaroma, aob ǀkhas ǃgame hâ xui-ao. 4 Tsî Abimelexi ge ǁîs tawa ǀgūǀgūsen tama ge i; ǁnā-amagab ge ge mî: ǃKhūtse, ǂhanu-ai ǁaesats ǁnâi nî ǃgam? 5 ǁÎ-aitsama mîba te tamab hâ: Nēs ge a ti ǃgâsa? Tsî ǁîs on ge: Ti ǃgâsab ge a ǁî, ti ge mî. ǂHauǃnâsib ti ǂgaob dib ǃnâ tsî ǃanusib ti ǃomkha dib ǃnâ ta ge nē ǃkhaisa go dī. 6 Ob ge Eloba ǁîb ǃoa ge mî ǁhapos ǃnâ: Tita ge ǁkhāti ǂan go i, nē ǃkhaisats ge satsa ǂhauǃnâsib sa ǂgaob dib ǃnâ go dī ǃkhaisa, tsî tita ge ǁkhāti go ǂhani tsi ti ǃoagu ǁoresa; ǁnā-amaga ta ge mā-am tsi tama go i, ǁîsa tsâǀkhāsa. 7 Nēsi ǁnâi nē aob di tarasa mādawa re, kēbo-aob a ǁî tsîb nîra ǀgoreba tsi ûits nîga xuige; xawe ǁîsats ga mādawa tama io, ǂan amasets nîra ǁō ǃkhaisa, sats tsî sa din hoana. 8 ǃNubaib ge Abimelexa ǃnauǁgoaga khâi tsî ǃgāgu âb hoaga ǂgai tsî nē mîdi hoade ǁîgu ǂgaedi ǃnâ ge mî. O gu ge ǁnā aoga kaise ge ǃao. 9 Tsî Abimelexi ge Abrahamma ǂgai tsî ǁîb ǃoa ge mî: Tare-ets dī da hâ? Tsî tare-e ta tita sa ǃoagu go ǁore, ots tita tsî ti gaosis ǂama kai ǁore-ai-e go ūhā? Sats ge dī ǃkhaide tita ǀkha go dī, dīhe ga tide hâde. 10 ǃAruǀîb ge Abimelexa Abrahammi ǃoa ge mî: Tare-ets mû hâ, ots nē ǃkhaisa go dī? 11 Ob ge Abrahamma ge mî: Nēti ta go ǂâi xui-ao: ǀNîsi i ge eloǃaoǃgâxasi-e hâ tama hâ nē ǃās ǃnâ, on ge ti taras ǃaroma nî ǃgam te. 12 Tsîs ge ǁkhāti amase a ti ǃgâ, ti îb di ôas a xawes ge ti îs di ôa tama hâ, tsîs ge ge ti tara kai. 13 Tsî i ge ge ī, Elob ge tita ti îb di omma xu ǂgaeǂguima ǃnubai ta ge ǁîs ǃoa ge mî: Nēb ge ǃgâidīb, titas nî dī-ūba: ǁÎs tawam ga sī ǃkhais hoas ai tita xa ǁîb a ti ǃgâ, ti mîsa. 14 Ob ge Abimelexa gūn tsî goman tsîna ū, ǁkhāti ǃgāgu tsî ǃgādi tsîna, tsî ǁîna Abrahamma ge mā; tsîb ge ǁîba Saras, taras âba ǁkhawa ge mā-oa. 15 Tsîb ge Abimelexa ge mî: Mû, ti ǃhūb ge sa ais aiǃâ hâ; ǁan re sa mûǁae a ǃgâi ǃkhais hoas ai. 16 Tsî Saras ǃoab ge ge mî: Mû, sa ǃgâsaba ta ge ǀoadisi ǀhaiǀurimarina go mā; kō, an ǃgū-aixū-i mûra di-i axase ība si re sa ǀkha hân hoan tawa; ā, hoan tawa as ǂhanu-ai kaihe hâse i. 17 Tsî Abrahammi ge Eloba ge ǀgore; ob ge Eloba Abimelexi tsî taras âb tsî ǃgādi âb tsîna ge ǂgauǂgau, o di ge ge ǁora. 18 ǃKhūb ge Abimelexi ommi di ǁhādi hoade hoaragase ǂganam hâ i xui-ao, Saras, Abrahammi di taras ǃaroma.