ǁNaeǁgaudi Sida Xristeǁî ûib tsî aoǁnâ sîsenni sîsen ǂkhanib
MAARTI 2-8
ELOBMÎSA XU HÂ ǂÛǂÛSA MÎDI | GENESIS 22-23
‘Elob ge Abrahamma ge ǃâitsâ’
(Genesis 22:1, 2) Tsî i ge nē ǃnaeǃkhaidi khaoǃgâ ge ī, Elob ge Abrahamma ǃâitsâ ǃkhaisa; ob ge ǁîb ǃoa: Abrahamtse! ti ge mî. Ob ge ǁîba: Mû, nē ta a, ti ge mî. 2 ǃNubaib ge ǁîba ge mî: Sa ôab ǀguise ǃnae hâb, ǀnamts ab, Isaka ū îts ǃgû Moriaǃhūb ǃoa, îts ǁnāpa khauǁguibase sī ǁguiba bi ǁnā ǃhomgu di ǀguib, tita nîra mîba tsib ai.
w12-E 1/1 23 ¶4-6
Eloba tae-i ǃaroma Abrahamma ge mîba îb ǁîb ǀgôaba ǁguiba?
Jehovab ge Abrahamma a mîba mîdi xa ǂâi re: “Sa ôab ǀguise ǃnae hâb, ǀnamts ab, Isaka ū îts ǃgû . . . îts ǁnāpa khauǁguibase sī ǁguiba bi.” (Genesis 22:2) ǃGaoǃgâ re, Jehovab ge Isaka ǃoa ǀgôab hînats ‘kaise a ǀnamma’ di gere mî. Jehovab ge ge ǂan i Isaki, Abrahammi mûǁae kaise a ǀō-aisa ǃkhaisa. Elob tsîn ge ge ǂan i ǁÎb ǀGôab Jesub xab mati ra tsâsa. Jehovab ge Jesuba kaise ge ǀnam i, ǀgam ǃnāra ǁîb ǀkha ǀhomma xu ǃhoas ǃnâ-ūb ge nēsa ge ǁgau, mîb ge o ‘sats ge ti Ôats ǀnam ta atsa.’—Markub 1:11; 9:7.
Jehovab ge Abrahammab ge ǂgan o, “toxoba” di hâ mîsa ge sîsen-ū. ǀNî Elobmîs ôaǃnâ-ao i ge ra mî Elob ge nē mîsa a sîsen-ū ǃkhais ge ra ǁgau ‘Elob ǂgan î ra xū-i di ǀō-aisasisa ra ǃgôaǃgâsa.’ Nē ǂgans ge Abrahamma kaise ga tsûaǂgao kai hâ; ǁkhā ǀgaub ǃnâ da ge Jehovab di tsûb xa ra ǂâi, ǁÎb ǀGôab mati ǃgomsiga tsâ tsî ra ǁō ǃkhaisab ra mû hîna. Nē tsûbab ge Jehovaba noxoba ge hōǃâ tama hâ i tamas ka io ǁkhawa hōǃâ tide.
Jehovab ge Abrahamma ǁîb ǀgôaba a ǁguiba kai ǃkhais ge kaise a ǃao kai da ǁkhā, xawe da ge ǂâis ǃnâ nî ūhâ Jehovab ge nē ǂgomǂgomsa omaris danaba ge mā-am tama hâ i îb nē ǁguibas ǀkha aiǃgû. ǁÎb ge Abrahamma ǁgû-i a hōǃâ ǁkhā tsûba xu ge sâu; ǁîb ge Isaka ǁōba xu ge sâu. Jehovab ge ‘ǁîb di Ôab ǂûba ge sâu tama hâ i tsî ǁîba sada hoa da ǃaroma ge māǁnâ.’ (Romeǁîn 8:32) Jehovaba mati io netikō tsûaǂgaoxa ǀgaub ǃnâ ge ǃkharu kaisen? ǁÎb ge nēsa ge dī “ǁîba xu da nî ûiga.” (1 Johaneb 4:9) Jehovab di ǀgaisa ǀnammi hînab ge ǁgau dab xa da ge ra ǂâiǂâiǃnâ-e. Nēsa ǁgari da tama hâ i da ǁîb tsîna ǁkhā ǀnamma ǁgau?
(Genesis 22:9-12) Tsî kha ge ǁnā ǃkhais, ǃKhūb go ǁîba mîbas tawa ge sī; ob ge Abrahamma ǁnāpa altar-e ǂnubi tsî ǀaena ǁî-i ai ǁgui tsî ǁîb di ôab Isaka ǃgae tsî altars ai ge ǁgui bi, ǀaen ǀgapise. 10 Tsî Abrahammi ge ǃommi âba ǀhōǂui tsî gôasa ge ū, ǁîb di ôabab nî ǂāse. 11 Xawe ǀhomǃgāb ǃKhūb dib ge ǀhomma xu ǂgaiǀî bi tsî: Abrahamtse, Abrahamtse, ti ge mî. Ob ge ǁîba: Mû, nē ta a, ti ge mî. 12 Ob ge ge mî: Sa ǃomma tā ǀhōǂui ǀgôabǀî, îts tā tsūdī bi. Nēsisa ta ge tita a ǂan, eloǃaoǃgâxats a tsî sa ôab ǀguisets ūhâbats tita xu ūdawa tama hâ ǃkhaisa.
(Genesis 22:15-18) Ob ge ǀhomǃgāb ǃKhūb diba Abrahamma ǀgamǁî ǃnās ai ǀhomma xu ǂgaiǀî 16 tsî ge mî: Tita ǂûta tawa ta ge tita ra nū, tib ra ǃKhūba mî: Nē ǃkhaisats go dī amaga tsî sa ôab ǀguisets ūhâbats go ūdawaxu te tama i amaga 17 ta ge Tita ǂanǂansase nîra ǀkhae tsi, tsî sa suriba nîra ǂguiǂguiba tsi ǀhommi di ǀgamiron khami tsî ǀgopab hurib amǃgâ ǁgoeb khami, tsî sa surib ge khākhoen âb di dao-amsa nîra ūhâ. 18 Tsî sa surib ǃnâ di ge ǃhūbaib di ǁaedi hoade nîra ǀkhaehe, ti dommats go ǁnâuǀnam hâ i amaga.
w12-E 10/15 23 ¶6
Eloba da ge ǁnâuǀnam tsî ǁîb mîmâide xu nî ǀama
6 ǀOasa kurusa ūhâ tama hâ khoen nî ǀama ǃkhais ǃaromab ge Jehovaba mîmâide saora mîde ra sîsen-ūse gere dī “Tita a ûitsama ǃkhais ao, tib ra ǃKhūb ǃKhūba mî.” (Ese. 17:16) Elobmîs ge 40 ǃnaeǃkhaide ra ǁgau Jehovab ge mîmâide a dīsa. ǀNî ǂanǂansa aiǁgaus ge Elob ge Abrahammi ǀkha gere hâ ǀgausa xu ra mûhe. Jehovab ge ǂgui kuriga Abrahammi ǃoa mîmâide ge dī, ǁgau rase mîmâisa Surib ge Abrahamma xu nî hâ ǁîb ǀgôab Isaki ǃnâ-ū. (Gen. 12:1-3, 7; 13:14-17; 15:5, 18; 21:12) Jehovab ge Abrahamma kai ǃâitsâb ǃnâ ge ǂgā, ǁîb ǀnam ǀgôaba ǁguiba kais ǃnâ-ū. Abrahammi ge ǀhape tama hâse ǁnâuǀnam tsî Isaka gere ǁguiba ǂgao xaweb ge ǀhomǃgāba ǁîba ge ǂkhā. Elob ge saora mîmâisa ge dī: “Tita ǂûta tawa ta ge tita ra nū . . . Nē ǃkhaisats go dī amaga tsî sa ôab ǀguisets ūhâbats go ūdawaxu te tama i amaga ta ge Tita ǂanǂansase nîra ǀkhae tsi, tsî sa suriba nîra ǂguiǂguiba tsi ǀhommi di ǀgamiron khami tsî ǀgopab hurib amǃgâ ǁgoeb khami, tsî sa surib ge khākhoen âb di dao-amsa nîra ūhâ. Tsî sa surib ǃnâ di ge ǃhūbaib di ǁaedi hoade nîra ǀkhaehe, ti dommats go ǁnâuǀnam hâ i amaga.”—Gen. 22:1-3, 9-12, 15-18.
Gagasi xūna ǀō-aisase ôaǃnâs
(Genesis 22:5) Ob ge Abrahamma ǃgākha âb ǃoa ge mî: “Sakho nēpa hâ re eseli ǀkha, î khom tita tsî ǀgôab tsîkhoma ǁnāpas kōse ǃgû, tsî ǀgoreǀîtoa khom kao, o khom ge ǁkhawa sakho ǃoa nî oahā.”
w16.02-E 11 ¶13
Jehovab ge ǁîba ti “ǀhōsa” di ge ǂgai
13 ǁÎkha ǀkha ge hâ i ǃgāna xu kha nî īs aiǃgâb ge Abrahamma ge mî: “Sakho nēpa hâ re eseli ǀkha, î khom tita tsî ǀgôab tsîkhoma ǁnāpas kōse ǃgû, tsî ǀgoreǀîtoa khom kao, o khom ge ǁkhawa sakho ǃoa nî oahā.” (Gen. 22:5) Abrahamma tae-e gere ǂâibasen? ǁÎb ǃgāgab gere ǂhumiba, ǁîgab ge mîba o Isaki ge nî oahā di, Abrahammi Isaka sī ra ǁguibasab a ǂan hîna? Hî-î. Elobmîs ge Abrahammi ge tae-e gere ǂâisa ra mîba da. (Khomai re Hebreǁîn 11:19.) Abrahammi tsîn ge ge ǂâi Elob a ǁkhā ǃkhaisa Isaka ǁōba xu ǂkhaiǂkhaisa. Abrahammi ge khâis ǃnâ ge ǂgom hâ i. ǁÎb ge ge ǂan i Jehovab ge ǁîb tsî Saras tsîra ǀgôa-e hōs di ǀgaiba kairasis ǃnâ māsa. (Heb. 11:11, 12, 18) Abrahammi ge ge mûǂan xū-i Jehovaba ǃgomba tama hâsa. ǁNā-amagab ge ǂgomǃgâsiba ge ūhâ i, ǁnā tsēs ai ga ra ī xūn hoan ǃnâb Jehovaba ǁîb ǀnamsa ǀgôaba khâisa nî māsa îb ǁÎb mîmâide dīǀoaǀoa. ǁNā-amagab ge Abrahamma ‘ǂgom ran hoan di ǁgûb’ ti ra ǂgaihe.
(Genesis 22:12) Ob ge ge mî: “Sa ǃomma tā ǀhōǂui ǀgôabǀî, îts tā tsūdī bi. Nēsisa ta ge tita a ǂan, eloǃaoǃgâxats a tsî sa ôab ǀguisets ūhâbats tita xu ūdawa tama hâ ǃkhaisa.”
it-1-E 853 ¶5-6
Aiǂans
Aiǂansa ǃgâi ǀgaub ǃnâ ǁhûis. Aiǂans Elob dis ge ra ǂâibasen nēs Elob di ǂhanu ǁgaragu tsî Elob tae-e ǁîb mîs ǃnâ ǁîb xa ra mîs ǀkha nî ǃgûǀhaosa. Aiǂans Elob dis ge ǂgui ôaǃnâdi Elob dide ǃoa ra ǁnaeǁgau tsî mîǁguigu hîna ge nē ôaǃnâdi ai ǃgaoǃgaosase a dīhegu tsîna.
ǁNā-amaga i ge Genesis 11:5-8 tawa, Eloba ǁîb daoǁgausa ǃhūbaib ǂhawase ra māse ra ǁguiǃāhe, Babels tawa ra ī xūna ôaǃnâ tsî ge dī în ǁnāpa ge hâ i ǁgai xūna ǀû. Eloxoresasib ge Sodoms tsî Gomoras tsîn ǃnâ a ǀoa o, ob ge Jehovaba Abrahamma ǁîb mîǁguib nē ǃāsa ôaǃnâs diba ge mîba “tsî nî mû, isen ǁîn di gommi, ti tawa go hāb ǃoa dīǀamǀam hâ ǃkhaisa; tsî ǁnāti i ga ī tama hâ io, o ta ge tita nî ǂan.” (Gen. 18:20-22; 19:1) Elob ge ge mîǁgui Abrahammi di ǀhō kaisa tsî Abrahammi ge ǁîb ǀgôaba sī gere ǁguiba ǂgaos khaoǃgâb ge Jehovaba ge mî: “Nēsisa ta ge tita a ǂan, eloǃaoǃgâxats a tsî sa ôab ǀguisets ūhâbats tita xu ūdawa tama hâ ǃkhaisa.”—Gen. 18:19; 22:11, 12; ǀgopeǀnō re Neh. 9:7, 8; Gal. 4:9.
Elobmîs khomai ǃâs
(Genesis 22:1-18) Tsî i ge nē ǃnaeǃkhaidi khaoǃgâ ge ī, Elob ge Abrahamma ǃâitsâ ǃkhaisa; ob ge ǁîb ǃoa: Abrahamtse! ti ge mî. Ob ge ǁîba: Mû, nē ta a, ti ge mî. 2 ǃNubaib ge ǁîba ge mî: Sa ôab ǀguise ǃnae hâb, ǀnamts ab, Isaka ū îts ǃgû Moriaǃhūb ǃoa, îts ǁnāpa khauǁguibase sī ǁguiba bi ǁnā ǃhomgu di ǀguib, tita nîra mîba tsib ai. 3 Ob ge Abrahamma ǃnauǁgoaga khâi tsî eseli âba ǃgaeǃgâ tsî ge ūǀhao ǀgam ǃgākha tsî Isaki ǁîb di ôab tsîga; tsîb ge ǀaena ge ǁhāǃā khauǁguibas ǃoa tsî khâi, tsîb ge ǃgûsī ǁnā ǃkhais Elob go mîba bis ǃoa. 4 ǃNonaǁî tsēs aib ge Abrahamma ǃgapakhâi tsî ǁnā ǃkhaisa ǃnūseba xu ge mû. 5 Ob ge Abrahamma ǃgākha âb ǃoa ge mî: Sakho nēpa hâ re eseli ǀkha, î khom tita tsî ǀgôab tsîkhoma ǁnāpas kōse ǃgû, tsî ǀgoreǀîtoa khom kao, o khom ge ǁkhawa sakho ǃoa nî oahā. 6 Ob ge Abrahamma ǀaen khauǁguibas dina ū tsî ǁîna Isaki, ǀgôab âb ai ge ǁgui; tsîb ge ǀaes tsî gôas tsîra ǃomǁae ū, tsî kha ge ǁî ǀgamkha ge ǃgû. 7 ǃNubaib ge Isaka ǁgûb Abrahammi ǃoa: Ti îtse, ti ge mî. Ob ge Abrahamma: Nē ta a, ti ôatse, ti ge mî. Ob ge: Mû, nēn hâ ǀaen tsî ǀaes tsîna, tsî mapa i ǁnâi ǁkhao-i khauǁguibas di-e hâ? 8 Ob ge Abrahamma ge mî: Elob kom aitsama ǁkhao-i khauǁguibas di-e nîra ǁhûiǂuibaseno, ti ôatse. Tsî ǁnāti kha ge ǁî ǀgamkha ge ǃgûǀhao. 9 Tsî kha ge ǁnā ǃkhais, ǃKhūb go ǁîba mîbas tawa ge sī; ob ge Abrahamma ǁnāpa altar-e ǂnubi tsî ǀaena ǁî-i ai ǁgui tsî ǁîb di ôab Isaka ǃgae tsî altars ai ge ǁgui bi, ǀaen ǀgapise. 10 Tsî Abrahammi ge ǃommi âba ǀhōǂui tsî gôasa ge ū, ǁîb di ôabab nî ǂāse. 11 Xawe ǀhomǃgāb ǃKhūb dib ge ǀhomma xu ǂgaiǀî bi tsî: Abrahamtse, Abrahamtse, ti ge mî. Ob ge ǁîba: Mû, nē ta a, ti ge mî. 12 Ob ge ge mî: Sa ǃomma tā ǀhōǂui ǀgôabǀî, îts tā tsūdī bi. Nēsisa ta ge tita a ǂan, eloǃaoǃgâxats a tsî sa ôab ǀguisets ūhâbats tita xu ūdawa tama hâ ǃkhaisa. 13 ǃNubaib ge Abrahamma ǃgapakhâi tsî ge kō, tsî mû, naupab ge ǂkharagūba ǀgom ǃharahain ǃnâ ǁnâkha âb ǀkha tamisenǁapo ge hâ i, ob ge Abrahamma ǃgû tsî ǁnā ǂkharagūba ū tsî khauǁguibase ge ǁguiba bi ǁîb ôab di amǃnâs ai. 14 Tsî Abrahammi ge ǁnā ǃkhais di ǀonsa: ǃKhūb ra mû ti ge ǂgai. ǁÎ ǃkhais ǃaromas ge nētsēs kōse: ǃHommi ǃKhūb dib ai i ge nîra aimûǂanhe, ti ra mîhesa. 15 Ob ge ǀhomǃgāb ǃKhūb diba Abrahamma ǀgamǁî ǃnās ai ǀhomma xu ǂgaiǀî 16 tsî ge mî: Tita ǂûta tawa ta ge tita ra nū, tib ra ǃKhūba mî: Nē ǃkhaisats go dī amaga tsî sa ôab ǀguisets ūhâbats go ūdawaxu te tama i amaga 17 ta ge Tita ǂanǂansase nîra ǀkhae tsi, tsî sa suriba nîra ǂguiǂguiba tsi ǀhommi di ǀgamiron khami tsî ǀgopab hurib amǃgâ ǁgoeb khami, tsî sa surib ge khākhoen âb di dao-amsa nîra ūhâ. 18 Tsî sa surib ǃnâ di ge ǃhūbaib di ǁaedi hoade nîra ǀkhaehe, ti dommats go ǁnâuǀnam hâ i amaga.
MAARTI 9-15
ELOBMÎSA XU HÂ ǂÛǂÛSA MÎDI | GENESIS 24
“Tarasa Isaki ǃgao”
(Genesis 24:2-4) Ob ge Abrahamma ǁîb di ǃgāb, ommi âb ǃnâ a kaib, ūb hâ xūn hoana ra dī-unub ǃoa ge mî: Sa ǃomma ǁgui re ti kamanab ǃnâ; 3 î ta nū kai tsi re ǃKhūb ǀhommi di Elob tsî ǃhūbaib di Elob tawa, ti ôabats Kanaanǁîn, ǁîn ǁaegu ta ǁan hân di ôadi xa tara-e ūba tide ǃkhaisa; 4 xawe ti ǃhūb ǃoa ǃgû, tsîts nî ti ǀaokhoen tawa sī tsî ti ôab Isaka tara-e nî ūba ǃkhaisa.
wp16.3-E 14 ¶3
“Doe ǂgao ta ra”
Abrahammi ge Eliesera ge mîmâi kai Kanaanǁî tarade xub Isaka tara-e ǃgamebahe tidesa. Tae-i ǃaroma? Kanaanǁîn ge Jehovaba ǃgôaǃgâ tama hâ i tsî ǁîba ǃoabas tsîna hî tama hâ i amaga. Abrahammi ge ge ǂan i Jehovab ǁîb ǁaeb ai nē khoena ǁîn eloxoresa dīgu ǃgao nî ǁkharasa. Abrahammi ge ge ǂgao tama hâ i, îb ǁîb ǀgôab Isaka nē khoen ǀkha hâǀhao tsî ǁîn ǁgauoǃnâ dīgu ǃnâ ǁhao. ǁÎb ǀgôab ǂhâǂhâsa ǃâsa Elob mîmâide dīǀoaǀoas ǃnâ ūhâsab ge ge ǂan i.—Genesis 15:16; 17:19; 24:2-4.
(Genesis 24:11-15) Tsîb ge ǃnaina ǃās ǃauga ge ǃhonǁgoa kai, ǁgamǂgâ-i tawa, ǃui-am ǁaeb ai, xuri-aodi ra ǂoaxa ǁaeb ai. 12 Tsîb ge ge mî: ǃKhūtse, ti ǀhonkhoeb Abrahammi di Elotse, a ta ǁnâi nētsē ǁîsa ǃoa re, îts ǃgâidība Abrahammi ti ǀhonkhoeb tawa dī re. 13 Mû tita ge ǁgamǀaus tawa mâ, tsî ǀgôadi nē ǃās di aogu didi ge ra ǂoaxa ǁgama di nîse. 14 A-i ǁnâi ī, îs ǁnā ǂkhamkhoes, ǁîs ǃoa ta ga: Sa xapasa ǂō î ta ā re, ti mîs, tsîs ga ǁîsa: Ā re, o ta ge ǁkhāti sa ǃnaina nî āsi, ti mîo, as ǁîsa ǁnā ǀgôa i, sa ǃgāb Isakats ǀkhae hâs ase, î ta ǁî ǃkhaisa xu ǂanǃā, ti ǀhonkhoeb tawats go ǃgâidība dī ǃkhaisa. 15 Tsî i ge ge ī, ǃhoatoa tamab hâ hîas ge Rebekasa ǀkhīsa, Betuela ge ǁorabahes, Milkas, Nahori Abrahammi ǃgâsab di taras xasa, tsîs ge ǁîsa xapas âsa ǃhōb âs ai ge ūhâ i.
wp16.3-E 14 ¶4
“Doe ǂgao ta ra”
Elieseri ge ǁîb sari-aoba ge mîba Harans ǀgūse hâ tsaub tawab ge sī o, ob ge Jehova Eloba ǃoa ge ǀgore di. ǁÎb ge Jehovaba ge ǂgan îb ǂkham tarasa Isaka ǁhûiba ǃgameb nîse. Mâ ǀgaub ǃnâ? Elieseri ge Eloba ge ǂgan îb dī is ǁÎb Isaka ra ǁhûiba tarasa tsaub tawa sī. ǁÎs ge Elieseri ga ǁgam-e ǂgan si o, o ǁîba ǁgam-i ǀgui-e mā tide xawe ǁîb ǃnaigu tsîna ǁgam-e nî mā. (Gen. 24:12-14) Ham-e hā tsî ǁnāti ge dī? Rebekasa. ǂÂi re ǁîs ga mati tsâ hâsa Elieseri ǁîs omaris ǁanina ra mîba xūnas ga ǁnâu hâ o.
(Genesis 24:58) On ge Rebekasa ǂgai tsî ǁîs ǃoa ge mî: “Doe ǂgaos ra nē khoeb ǀkha?” Os ge: “Doe ǂgao ta ra”, ti ge ǃeream.
(Genesis 24:67) Ob ge Isaka ǁîsa ǁîb îs Saras di tentoms ǃnâ ge ūǂgâ, tsîb ge Rebekasa ge ū, tsîs ge ǁîsa ge ǁîb di tara kai, tsîb ge ǁîsa ge ǀnam hâ i. Nētib ge Isaka ge ǁkhaeǂgaohe ǁîb îs di ǁōb ǃaroma.
wp16.3-E 14 ¶6-7
“Doe ǂgao ta ra”
Wekhega ǃkharu hâseb ge Eliesera ge mî: “ǀNîsis ge ǁnā tarasa tita sao ǂgao tama nî i.” Ob ge Abrahamma ǃeream tsî ge mî: “ǁNāǃnubaits ge ti nūsa xu nî ǃnorasa.” (Gen. 24:39, 41) Betueli di oms ǃnâs tsîna i ge ǂkham khoedi tsâsiga ge ǂhâǂhâsa i. Elieseri ge kaise ǁîb ǁgaumâisa gere ǃgôaǃgâ ǁnā-amaga ge ǂgan îb saora tsēs ai Kanaana ǃoa Rebekas ǀkha ǃhaese oa. ǁÎs omaris ge gere ǂgao îs ǁîn ǀkha noxoba disi tsēde hâ. Saorasen ge ge mîǁgui: “ǀGôasa ǂgai, î da ǁîs ai dî re.”—Genesis 24:57.
Nēb ge kaise ge ǃgom ǁae i Rebekas ûib ǃnâ. ǁÎsa tae-e ge mî? ǁÎsa ǁîs ǁgûb tsî ǃgâsab tsîna ǀkhom tsî nēsa xu oresa ga ǂgao hâ? Tamas ka ios ge Jehovab xa ra daoǁgauhe ǃnaeǃkhais ǃnâ ǁhaosa kai aiǂhanub ase gere mû? ǁÎs ge ǃeream tsî matis nēs xa ra tsâsa ge ǁgau, nēs ge ǀnîsi ge ǃaoǃaosa ǀkharaǀkhara i ǁîs ûib ǃnâ. ǁÎs ge ge mî: “Doe ǂgao ta ra” ti.—Genesis 24:58.
Gagasi xūna ǀō-aisase ôaǃnâs
(Genesis 24:19, 20) Tsî āsi bi toas geo, os ge ge mî: Tita ge ǁkhāti sa ǃnaina nî xuriba, hoatsaman nî ātoas kōse. 20 Os ge ǃhae tsî xapas âsa āǃnâǃoreb ǃnâ ǂnâǂui tsî ǁkhawa ǂgâs ǃoa ge ǃkhoe, ǃkhā nîse, tsîs ge ǃnain hoana gere xuriba.
wp16.3-E 12-13
“Doe ǂgao ta ra”
ǀGui tsē kham karab ais xapas ǃnâ ǁgam-e sī ra ū hînas ge kaira aoba ge ǀhao-ū. ǁÎb ge ge mî: “A ta āro re ǁgam-i xa sa xapas ǃnâ.” Nēs ge kaise ǃgâi ǀgaub ǃnâ ge ǂgan-e. Rebekas ge ge mû nē aob ge ǃnūseba xu a ǀkhīsa. ǁÎs ǁgam-i di xapasas ge ǃhaese ǁîs ǃhōde xu sabuǁgâ tsî aoba ge mā îb ā, aob ge ǂkharirose nē ǃkhai ǁgam-i xa ge ā tama hâ i xawe kaise ge ā. ǁÎs ge ge mûǂan ǁîb disi ǃnaiga ūhâsa tsî ǁîgu xapas ǃnâ i ǁgam-e a ǀkhaisa. ǁÎb khoexaǃnâ mûdi ǃnâs ge ge mû ǁîb ǁîsa ǂgōrisase ra kōsa tsîs ge ǁnās ǀkha khoexaǃnâsiba gere ǁgau bi ǂgao. Tsîs ge ge mî: “Tita ge ǁkhāti sa ǃnaina nî xuriba, hoatsaman nî ātoas kōse.”—Genesis 24:17-19.
ǂÂis ǃnâ ūhâ re Rebekas ge disi ǃnaiga ǁgammi ǀgui-e ge mā tama hâ i xawe māsenxase ǁîga āǂâu gu nîs kōse ǁgam-e ge mā. Kaise gu ga ǁgâ o, ob ge ǀgui ǃnaiba 95 litergu ǁgame-e ra ā. Hoa disi ǃnaigu ga kaise ǁgâ hâ o, os ge Rebekasa ǂgui irga ǃgarise ga sîsen hâ. Xūn ra ǁgaus ǃoagu i ge ǃnaiga ǁnātikōse ge ǁgâ tama hâ i. Xawe Rebekasa nēsa ge ǂan i māsenxases ge ǁgam-e mā o? Hî-î. ǁÎs ge māsenxase ǃgarise gere sîsen îs ǃhaokhoeǃkhōǃoaxasiba nē kaira aoba ǁgau. ǁÎb ge ǁîs māsenxasiba ge ūǃoa. Tsîb ge ǁîs ǁgam-e xapas ǃnâ ra ǂgā ǀgausa ǂgōrisase mā tsî gere kō.—Gen. 24:20, 21.
wp16.3-E 13, ftn.
“Doe ǂgao ta ra”
ǀNai i ge ge kara hâ i. Nē ǃnaeǃkhais ge ǁgau tama Rebekas ge tsaub tawa gaxuse hâ isa. Nēs ge ǁgau tama hâ ǁîs omaris khoen ge ǁom hâ isa ǁîs ge toa ǁaeb ai tamas ka io i ge khoe-e ǁîs ge tae-i ǃaroma a ǀhawesa sī ge kō tama hâ i.
(Genesis 24:65) Tsîs ge ǃgāb ǃoa ge mî: “Tariba ǁnā khoeb ǃaub ǃnâ sada ra ǃgûǃoaba?” Ob ge ǃgāba: Ti ǀhonkhoeb ge a ǁî, ti ge mî. ǃNubais ge ǃgū-aixūsa ū tsî ge ǃgū-aisen.
wp16.3-E 15 ¶3
“Doe ǂgao ta ra”
Nē ǁkhāǁkhāǃâs di tsoatsoas ai ge mîhe tsēs ge ge hā. Karavans ra Negeba ǃâu tsîs ǀgamiros ǃnâba ǃhūbaib ai ra ǃnâ hînas ge Rebekasa aob hîna ǃgaroba xu ra ǂoaxaba ge mû. ǁÎb ge ǂâiǂhansen rase gere mûsen. “Os ge ǃnaiba xu ge ǁgôa.” ǁÎs ge ǃnaib noxoba ǃhonǁgoa tama hâ hîna gere ǁgôa ǂgao tsîs ge ǃgāba ge dî: “Tariba ǁnā khoeb ǃaub ǃnâ sada ra ǃgûǃoaba?” Isaki a ǃkhaisas ge mûǂan o, os ge ǁîs danasa ge ǃgū-ai. (Gen. 24:62-65) Tae-i ǃaroma? Danasas ge ǃgū-ai ǃkhais ge ǃgôaǃgâsiba ǁîs hānîǁaeb di aoba gere ǁgau. ǁNā ǃgamǃgamsenxasib ge nēsi ǀoro ǁaeb axase ra mûhe. Nēsi da ga aore tamas ka io tare xawe da ge hoa da Rebekas ǃgamǃgamsenxasiba xu a ǁkhāǁkhāsen ǁkhā, ham-e amabes ǃnâ nē ǂoaǂamsa ǀgauba ǂhâ tama hâ?
Elobmîs khomai ǃâs
(Genesis 24:1-21) Tsî Abrahammi ge kaira tsî ge kurixa; tsî ǃKhūb ge Abrahamma hoa xūn ǃnâ ge ǀkhae. 2 Ob ge Abrahamma ǁîb di ǃgāb, ommi âb ǃnâ a kaib, ūb hâ xūn hoana ra dī-unub ǃoa ge mî: Sa ǃomma ǁgui re ti kamanab ǃnâ; 3 î ta nū kai tsi re ǃKhūb ǀhommi di Elob tsî ǃhūbaib di Elob tawa, ti ôabats Kanaanǁîn, ǁîn ǁaegu ta ǁan hân di ôadi xa tara-e ūba tide ǃkhaisa; 4 xawe ti ǃhūb ǃoa ǃgû, tsîts nî ti ǀaokhoen tawa sī tsî ti ôab Isaka tara-e nî ūba ǃkhaisa. 5 Ob ge ǁnā ǃgāba ǁîb ǃoa ge mî: Okha, ǀnîsis ge ǁnā tarasa tita nē ǃhūba ǃoa sao ǂgao tama nî i, ǁnâi ta kha sa ôaba ǁkhawa ǁnā ǃhūb, sats ge ǁîba xu doeǂoaxabǀî nî ūsī? 6 Ob ge Abrahamma ǁîb ǃoa ge mî: ǂAnbasen, îts ti ôaba tā ǁkhawa ǁnāpa ūsī! 7 ǁNā ǃKhūb ǀhommi di Elob, tita ti îb di ommi tsî ǀaokhoen di ǃhūba xu ge ūb, tsî tita ǃoa gere ǃhoab tsî tita gere nūbab, mî raǃâ: Sa suriba ta ge tita nē ǃhūba nîra mā. ǁÎb ǂûb ge ǀhomǃgāb âba sa ais aiǃâ nîra sî, ǁnāpa xuts nî ti ôaba tara-e ūbaga. 8 Tsî taras ga satsa sao ǂgao tama io, ots ge ti nūsa xu nî ǃnorasa, xawe ti ôaba tā ǁkhawa ǁnāpa ūsī. 9 ǃNubaib ge ǁnā ǃgāba ǃommi âba Abrahammi ǀhonkhoeb âb di kamanab ǃnâ ǁgui tsî ǁîba ge nūba nē ǃkhais ǃaroma. 10 Ob ge ǁnā ǃgāba disi ǃnaina ǀhonkhoeb âb di ǃnain xa ū tsî ge dāǁnâ; tsî xūn ǁîb ǀhonkhoeb din hoan ge ǁîb ǃomǁae ge hâ i; ob ge khâi tsî ge ǃgûsī Mesopotamiab ǁga Nahori di ǃās ǃoa. 11 Tsîb ge ǃnaina ǃās ǃauga ge ǃhonǁgoa kai, ǁgamǂgâ-i tawa, ǃui-am ǁaeb ai, xuri-aodi ra ǂoaxa ǁaeb ai. 12 Tsîb ge ge mî: ǃKhūtse, ti ǀhonkhoeb Abrahammi di Elotse, a ta ǁnâi nētsē ǁîsa ǃoa re, îts ǃgâidība Abrahammi ti ǀhonkhoeb tawa dī re. 13 Mû tita ge ǁgamǀaus tawa mâ, tsî ǀgôadi nē ǃās di aogu didi ge ra ǂoaxa ǁgama di nîse. 14 A-i ǁnâi ī, îs ǁnā ǂkhamkhoes, ǁîs ǃoa ta ga: Sa xapasa ǂō î ta ā re, ti mîs, tsîs ga ǁîsa: Ā re, o ta ge ǁkhāti sa ǃnaina nî āsi, ti mîo, as ǁîsa ǁnā ǀgôa i, sa ǃgāb Isakats ǀkhae hâs ase, î ta ǁî ǃkhaisa xu ǂanǃā, ti ǀhonkhoeb tawats go ǃgâidība dī ǃkhaisa. 15 Tsî i ge ge ī, ǃhoatoa tamab hâ hîas ge Rebekasa ǀkhīsa, Betuela ge ǁorabahes, Milkas, Nahori Abrahammi ǃgâsab di taras xasa, tsîs ge ǁîsa xapas âsa ǃhōb âs ai ge ūhâ i. 16 Tsîs ge ǂkhamkhoesa kaise îsa aisa-î ǀgôa ge i, ǂkhamkhoes hîa ao-i xa ǂanhe tama ge hâ is; tsîs ge ǂgâs ǃnâ ǁgôa tsî xapas âsa ǁai tsî ge ǂoaxa. 17 ǃNubaib ge ǃgāba ǁîsa ǃkhoeǃoa tsî ǁîs ǃoa ge mî: A ta āro re ǁgam-i xa sa xapas ǃnâ. 18 Os ge ǁîsa: Ā re, ti ǃkhūkhoetse! ti mî tsî xapas âsa ǃhaese ǃommi âs ai ǁgôa kai tsî ge ā kai bi. 19 Tsî āsi bi toas geo, os ge ge mî: Tita ge ǁkhāti sa ǃnaina nî xuriba, hoatsaman nî ātoas kōse. 20 Os ge ǃhae tsî xapas âsa āǃnâǃoreb ǃnâ ǂnâǂui tsî ǁkhawa ǂgâs ǃoa ge ǃkhoe, ǃkhā nîse, tsîs ge ǃnain hoana gere xuriba. 21 Ob ge khoeba ǁîs ǂama burugâ tsî ge ǃnō, hōǃâb nîse, īseb ǃKhūba ǁîb di daoba amǁnā kai tama hâsa.
MAARTI 16-22
ELOBMÎSA XU HÂ ǂÛǂÛSA MÎDI | GENESIS 25-26
“Esaub ge ǁîb di ǂguroǃnaesisa ra ǁamaxū”
(Genesis 25:27, 28) Tsî nē ǀgôakha ge ge kai, ob ge Esauba ge gā-ai ǃau-ao tsî ǃgarob di ao kai, tsî Jakob ge ge ǃaoǃgâxa ao kai, tentomdi ǃnâ ǁan hâba. 28 Tsî Isaki ge Esauba ge ǀnam hâ i, xamariǁgan-eb ra ǂû ǂgao amaga; xawe Rebekas ge Jakoba ge ǀnam hâ i.
it-1-E 1242
Jakob
Esaub hîna ge ǃgaro-ao tsî ǃau-ao tsî ǁîb ǁgûb xa ǀnam-e hâ îb ǂam-aib ge Jakoba ge “ǃaoǃgâxa-ao i tsî tentomdi ǃnâ gere ǁan” tsî ǁîb omarisa ǃgâi ǀgaub ǃnâ gere kōǃgâ, ǁîb ǁgûs ge Jakoba kaise ge ǀnam i. (Gen. 25:27, 28) Hebreǁîgowab mîs hîna tam di hâs ge ǀnî hâba Elob xa ra ǃkhōǃoa-e khoena ǃoa ǁnaeǁgaus ǃgao ra sîsen-ūhe. Aiǁgause, “ǀaoǁharisa khoen ra ǂhauǃnâba ǁkhan” xaweb ge Jehovab ra mîmâi ‘ǂkhî khoeb di ǀams a ǀkhaehesa’ ǃkhaisa. (ǂKhm. 29:10; Psa. 37:37) ǂHauǃnâ-aob Jobi ge ge “ǂhanu-ai tsî ǂhauǃnâ” ī.—Job. 1:1, 8; 2:3.
(Genesis 25:29, 30) Tsî Jakob ge ǂû-ai-e ge sâibasen; ob ge Esauba ǃauba xu ge hā tsau hâse. 30 Ob ge Esauba Jakob ǃoa ge mî: A ta tsâtsâ re ǁnā ǀapa ǂû-i xa, tsau ta hâ xuige. ǁNā-amagan ge Edom ti ge ǂgai bi.
(Genesis 25:31-34) ǃNubaib ge Jakoba: ǁAmaxū-ai te re nētsēs ai sa ǂguroǃnaesisa, ti ge mî. 32 Ob ge Esauba: Kō, tita kom ǁōǃgûgauo, tare-es ǂguroǃnaesisa nî hui te? ti ge mî. 33 Ob ge Jakoba: Nūba te re aibe, ti ge mî; ob ge ge nūba bi; tsîb ge ǁnāti ǂguroǃnaesis âba ge ǁamaxū. 34 ǃNubaib ge Jakoba Esauba pereb tsî lensiǂû-i xa ge mā; ob ge ǂû tsî ge ā; tsî khâi tsî ge ǃgû. Nētib ge Esauba ǂguroǃnaesisa ge ǃharaxū.
Tae-i ǃaroma da ganganxasiba nî ǁgau?
11 ǀNî Elobmîs khoen ge ganganxasiba ge ǁgau tama hâ i. Aiǁgause, Esaub ge ǁgûn hîna Jehovaba a ǀnam tsî ra ǃgôaǃgân xab ge kaikaihe xawe gagasi xūna ge ǃgôaǃgâ tama hâ i. (Khomai re Hebreǁîn 12:16.) Nē ganganoǃnâsiba mati ge ǁgausen tsoatsoa? Esaub ge ǁîb ǂguroǃnaesabesisa lensiǂû-i ǃgao ge ǁamaxū. (Gen. 25:30-34) Egab ge Esauba dīb ge mîǁguib ǃgao gere tsûaǂgao. ǁÎb ge ūb ge hâ i xūna ge ǃgôaǃgâ tama hâ i, ǁnā-amaga ǂguroǃnaesabesis ǀkhaebab ge hō tama hâ io, o ge ǁaixas di ǃaromasa ge ūhâ tama hâ i.
it-1-E 835
ǂGuroǃnaesabesis
ǃKharu ge ǁaeb ǃnâ i ge ǂguroǃnaesabe ǀgôaba ǀgapise omaris ǃnâ gere ǃgôahe tsî omaris danab ases tsîna gere ǁgaumâihe. ǁÎb ge ǀgam ǃnāra ǃnāsase ǁîb ǁgûb ǀumisa xu gere hō. (Deu. 21:17) Rubeni ge Joseb xōǀkhā ge ǂnôa i ǂû ǁaeb ai, ǁîb a ǂguroǃnaesabe amaga. (Gen. 43:33) Xawe Elobmîs ge ǂguroǃnaesabesisa ǀgôagu ǃnaehe hâs ǃoagu mā tama hâ. ǂGuroǃnaesabesis ge ǂgomǂgomsa ǀgôaba ra mā-e ǂgurose ǃnae-e hâba ǃoas ose.—Gen. 6:10; 1Kro. 1:28; ǀGopeǀnō re Gen. 11:26, 32; 12:4; mû re ǂGUROǃNAESABESIS; ǀUMIS.
Gagasi xūna ǀō-aisase ôaǃnâs
(Genesis 25:31-34) ǃNubaib ge Jakoba: ǁAmaxū-ai te re nētsēs ai sa ǂguroǃnaesisa, ti ge mî. 32 Ob ge Esauba: Kō, tita kom ǁōǃgûgauo, tare-es ǂguroǃnaesisa nî hui te? ti ge mî. 33 Ob ge Jakoba: Nūba te re aibe, ti ge mî; ob ge ge nūba bi; tsîb ge ǁnāti ǂguroǃnaesis âba ge ǁamaxū. 34 ǃNubaib ge Jakoba Esauba pereb tsî lensiǂû-i xa ge mā; ob ge ǂû tsî ge ā; tsî khâi tsî ge ǃgû. Nētib ge Esauba ǂguroǃnaesisa ge ǃharaxū.
(Hebreǁîn 12:16) Î i tā ǀgui-e ǀai-ao tamas ka io xorexūsa Esaub khami, ǀgui ǂû-ai-i ama ǁîb di ǂguroǃnaesisa ge ǁamaxūba.
w17.12 15 ¶5-7
Khomai-aon dîdi
Hā re i da ǁkhawa Hebreǁîn 12:16 sa khomai: “Î i tā ǀgui-e ǀai-ao tamas ka io xorexūsa Esaub khami, ǀgui ǂû-ai-i ama ǁîb di ǂguroǃnaesisa ge ǁamaxūba.” Nēsa tae-e gere ǁgau?
Apostel Paulub ge nēpa Mesiab di surib xa ge ǃhoa tama hâ i. ǁÎb ge Xristeǁîna ge ǂkhâǃnâ în ‘ǂhanu daoga ǁîn ǂaidi ǃgao’ dībasen. ǁNās ǀkhan ge Elob ǀkhomxaǂgaosiba ge ǂoaǃnâ tama hâ i, nēsan ge ǀain ga hâ o, o ga ǂoaǃnâ hâ. (Heb. 12:12-16) Nēsan ga dī hâ o, on ge Esaub khami ga ī hâ. ǁÎb ge gagasi xūna ge ǃgôaǃgâ tama hâ i.
Esaub ge aogu gere ǂgaeǂgui ǁaeb ǃnâ ge ûi hâ i tsî ǁaeba xu ǁaeb ǀkha ǁguibade dīs aiǂhanuba ge ūhâ i. (Gen. 8:20, 21; 12:7, 8; Job. 1:4, 5) Xaweb ge Esauba ǁîb ǁgansi ǂâis xa ǃaroma-e hâse nē aiǂhanuga ǂû-i ǃgao ge mābē. ǁÎb ge Abrahammi surib nî hōǃâ di ge mîhe ǃgomsiga xu ǀnîsi gere ǁkhaubasen ǂgao. (Gen. 15:13) Esaub ge gagasi xūna ǃgôasiba ge ǁgau tama hâ i ǁnā-amaga ǀgam kaikhoera hîna Jehovaba ǃoaba tama hâra ge ǃgame, nēs ge ǁîb ǁgûra ge tsûaǂgao kai. (Gen. 26:34, 35) ǁÎb ge Jakoba xu gere ǀkhara hîna ge ama Eloba ra ǃoaba kaikhoesa a ǃgameba.—Gen. 28:6, 7; 29:10-12, 18.
(Genesis 26:7) Tsî ǁnā ǃās khoegu ge taras âb xa dîo, ob ge: Ti ǃgâsas ge, ti ge mî; ti taras a ti mîsab ge ǃao xui-ao; î gu ǁnā ǃās khoega tā ǀnîsi ǃgam te tib ge ge ǂâi, Rebekas ǃaroma, îsa aisa-îs ge i amaga.
it-2-E 245 ¶6
ǂHumib
Ama tama xūna ǃhoas Elobmîs ǃnâ a ǂkhāsa xawe i ge nēsa ǂâibasen tama hâ ama xūn tsîna da nē xū-e ǂans di ǁkhāsib ǃnâ hâ tama hâ khoe-e nî mîbasa. Jesub Xristub ge ge ǃkhâikhom: “ǃAnusiba tā arina mā, î du sadu ǃamde tā hāgūna ǁgui-aiǃâ, în tā ǂaidi ǃnâ dāǂgā ni, în tā dawasen tsî sado ǀkhauǃā.” (Mat. 7:6) ǁNā-amagab ge Jesuba ǀnî ǃnādi ai hoa ǃnāsa ǃgāsasiba ge mā tama hâ i, ǂkhôaba i nî ǃaroma ǃkhaisab ge ǂan io. (Mat. 15:1-6; 21:23-27; Jhn. 7:3-10) Abrahammi, Isaki, Raxas tsî Elisab tsîn ge Jehovaba ǃoaba tama hâ khoena ǃnāsa ǃgāsasiba mā tama hâ i ǀgausa da ge nî ǁgae.—Gen. 12:10-19; 20ǁî danaǃās; 26:1-10; Jos. 2:1-6; Jak. 2:25; 2Gao. 6:11-23.
Elobmîs khomai ǃâs
(Genesis 26:1-18) Tsî i ge ǃâtsūǀkhā-e ǁnā ǃhūb ǃnâ ge hā, nau ǃâtsūǀkhāb Abrahammi di tsēdi ǃnâ ge hâ iba ǃnā hâ-e. Ob ge Isaka Abimelexi Filisteǁîn di gao-aob ǁga Gerars ǃoa ge doe. 2 ǃNubaib ge ǃKhūba ǁîb tawa ǂhai tsî ge mî: Tā doeǁgôa Egipteb ǃoa, îts ǁnā ǃhūb tita nîra mā tsib ǃnâ ǁan. 3 ǃHaokhoese ǁan ǁnā ǃhūb ǃnâ, o ta ge tita sa ǀkha hâ tsî nîra ǀkhae tsi; sats tsî sa suriba ta ge tita nē ǃhūgu hoaga nîra mā, tsî nîra ǀgaiǀgai ǁnā nūs, Abrahammi sa îba ta ge nūbasa. 4 Tsî tita ge sa suriba nîra ǂguiǂgui ǀhommi di ǀgamirodi khami, tsî ta ge sa suriba nē ǃhūgu hoaga nîra mā, tsî sa surib ǃnâ di ge ǃhūbaib di ǁaedi hoade nîra ǀkhaehe; 5 Ti dommab ge Abrahamma ge ǁnâuǀnam hâ i amaga, tsî ti mîmās, ti ǃkhâikhomdi, ti ǂnûiǂgādi tsî ti ǂhanugu tsînab ge ǃkhōǀgaipe hâ i amaga. 6 Tsîb ge Isaka Gerars tawa ge ǁan. 7 Tsî ǁnā ǃās khoegu ge taras âb xa dîo, ob ge: Ti ǃgâsas ge, ti ge mî; ti taras a ti mîsab ge ǃao xui-ao; î gu ǁnā ǃās khoega tā ǀnîsi ǃgam te tib ge ge ǂâi, Rebekas ǃaroma, îsa aisa-îs ge i amaga. 8 Tsî i ge ge ī, ǂomxa ǁaebab ǁnāpa ge hâ is khaoǃgâ, ob ge Abimelexi Filisteǁîn di gao-aoba mûǂuidaosa xu ǂui tsî ge mû, Isaki, Rebekas, taras âb ǀkha ra gara ǃkhaisa. 9 ǃNubaib ge Abimelexa Isaka ǂgai tsî ge mî: Okha, amases go a sa tarao, tarexats ǁnâi: Ti ǃgâsas ge, ti ge mî? Ob ge Isaka ǁîb ǃoa ge mî: Nēti ta ge ǂâi xui-ao: Î ta tā ǀnîsi ǁîs ǃaroma ǁō! 10 Ob ge Abimelexa ge mî: Tare xū-e kha nē-e sats go dī da-e? Supuseb ga nē ǁaes aore khoegu di ǀguiba sa taras ǀkha ǁgoe hâo, ots kom ga ǀhapi-e sida ai ūhā hâo. 11 ǃNubaib ge Abimelexa ǁaes hoasa ǃkhâi tsî ge mî: Nē aob kas, taras âb kas hoasa ga tsâǀkhā-i hoa-i, ǁî-i ge amase nîra ǃgamhe. 12 Tsîb ge Isaka ǁnā ǃhūb ǃnâ gere tsoro, ob ge ǁnā kurib ǁkhāb ǃnâ kaidisiǃnâguse ge hō, ǃKhūb ge ǁîba ǀkhae amaga. 13 Nētib ge nē aoba ge kai, ā, ǃaruǀîǀguib ge kai, kaiseb ge kais kōse. 14 Tsîb ge ǂgui gūn tsî goman tsîna ge ūhâ i, tsî ommi âb din ge ǂgui ge i, Filisteǁîn ge suri bis kōse. 15 Tsî ǂgâdi ǁîb îb di ǃgāgu ge ǁîb îb Abrahammi di tsēdi ǃnâ gere khaodi hoaden ge Filisteǁîna ge ǂgan tsî ǃhūb ǀkha ǁîde ge ǀoaǀoa. 16 ǁKhātib ge Abimelexa Isaki ǃoa ge mî: Doe re sida xu, sida ǃnā hâsets go ǀgaisa xuige. 17 ǃNubaib ge Isaka ǁnāpa xu doe tsî Gerars di ǃgoaǃnāb ǃnâ ǁgoe tsî ǁnāpa sī ge ǁan. 18 Tsî Isaki ge oao, ob ge ǁgamǂgâdi, ǁîb îb Abrahammi ǁaeb ain gere khaodi, tsî Filisteǁîn ge Abrahammi di ǁōb khaoǃgâ ǂgande ge xora; tsîb ge ǁîdi di ǀonde ǁnā ǀondi, ǁgûb ge ǁîdi ǀkha ǂgaidi ǃoa ge ǂgai.
MAARTI 23-29
ELOBMÎSA XU HÂ ǂÛǂÛSA MÎDI | GENESIS 27-28
“Jakob ge anub hâ ǀkhaeba ge ǃkhōǃoa”
(Genesis 27:6-10) ǃNubais ge Rebekasa Jakob ǁîs di ôab ǀkha ǃhoa tsî ge mî: Kō, tita ge go ǁnâu, saob go Esaub sa ǃgâsab ǃoa ǃhoa ǃkhaisa, nēti ra mîse: 7 Amǀnē-e ūhāba te re, îts ǁkhoaxa ǂû-aina ǂhomiba te re, î ta ǂû; o ta ge satsa ǃKhūb di ais aiǃâ nî ǀkhae ti ǁōb aiǃâ. 8 Nēsi ǁnâi, ti ôatse, ǁnâu re ti domma mîmā tsi ta nîn hoan ǃnâ. 9 ǃGû ǁnâi ǀgoan ǃoa îts ǁnāpa xu ǀgam ǃgâi pirirona ūhāba te re, o ta ge tita ǁîna saoba ǁkhoaxa ǂû-aise nî dība, ǂgaob ra khami. 10 Ots ge satsa ǁî-e saoba nî ūsība, ob ge nî ǂû, ǀkhae tsib nîga ǁōb âb aiǃâ.
w04-E 4/15 11 ¶4-5
Rebekas—Gagasi taras dīgu ǀkha
Elobmîs ge mî tama hâ Isaki a ǂansa Esaub Jakoba nî sîsenba ǃkhaisa. Xawe Rebekas tsî Jakob hâra hoara ge a ǂan ǁîb ǀkhaeba nî hō ǃkhaisa. Rebekas ge xū-e ge dī ǁnâus ge o Isaki ge Esauba ra ǀkhae ǂgao di, Esaub ge ǁîb ǁgûba amǀnē-e a sī uba o. Mîǁguiga dīs di ǁkhāsib tsî ǁîs ǁkhoaǂgaosib tsînas ge noxoba ge ūhâ ǀgara. ǁÎs ge Jakoba ge mîmā îb ǀgam ǂkhari pirirokha sī-ūba si. ǁÎs ge ǁîs aoba a ǃgâiba ǂû-e ǁîba nî dība. ǁNās khaoǃgâb ge Jakoba Esaub ase ge dīsen îb ǁîb ǀkhaeba ǃkhōǃoa. Jakob ge nēsa ge ǂkhā. ǁÎb ǁgûb ge ǁîb ra dī ǂgao xū-e ge hōǃâ tsî ǁîba ge ǀâxare. Rebekas ge noxoba ǁîs ǀapes ǀkha gere aiǃgû. “Ab sa ǀâxareba ti ai hā, ti ôa” dis ge ge mî. ǁNās khaoǃgâs ge sâi, Jakoba Esaub khami dī tsî ǁîs kaikhoeba ǃoa ge sî bi.—Gen. 27:1-17.
Rebekas tae-i ǃaroma nēti ra tanisen ǃkhais ge mîhe tama hâ. ǂGui khoen ge ǁîs dīga ra mâǃoa xawe Elobmîs ge nēsa dī tama hâ tamas ka io Isaki tsîna Jakob ge ǀkhaeba go ǃkhōǃoa dib ge ǁnâu xawe. Isaki ge nēs ai ra ǀaro. (Gen. 27:29; 28:3, 4) Rebekas ge Jehovab ge tae-e ǁîs ǀgôakha xa a mîmâisa ge ǂan i. Nēs ge amabes ǃnâ Jehovab di ǂâis ǀkha gere ǃgûǀhao.—Rom. 9:6-13.
(Genesis 27:18, 19) Ob ge ǁgûb tawa sī tsî: Ti îtse, ti ge mî. Ob ge ǁîba: Mû nē ta a; tarits a satsa, ti ôa? ti ge mî. 19 Ob ge Jakoba ǁgûb ǃoa ge mî: “Tita ge Esauta, sa ǂguroǃnaesabeta; tita ge go dī, sats go mîmā te khami; ǂnûkhâi îts ti amǀnē-i xa ǂû re, îs sa ǀomsa tita ǀkhae!”
w07-E 10/1 31 ¶2-3
Khomai-aon dîdi
Elobmîs ge ǁgau tama hâ Rebekas tsî Jakob tsîn ge tae-i ǃaroma ǁnā ǀgaub ǃnâ gere tanisensa xawe i ge ra ǁgau nēs ge ǃhaese a tsoatsoasa. Elobmîs ge Rebekas tsî Jakob tsîn ge dī xū-e mâǃoa tama hâ, nēs a ǂhumib tsî gāxaǃnâsib aiǁgau amaga. Elobmîs ge ǃnāsa ǃgāsasiba nēs xa ra mā.
ǂGuroses ge nē ǃnaeǃkhaisa ra ǁgau Jakob ge ǁîb ǁgûb ǀumisa hōs ǁkhāsiba ūhâ isa Esaub ose. Jakob ge ǂguroǃnaesabesisa ǁîb ǀgē ǃgâsaba xu ge ǁama, hîna ge ǁîb di ǃâsa dīǀoaǀoas ǃgao ǂguroǃnaesabesisa a ǁamaxūba. Esaub ge “ǂguroǃnaesisa ge ǃharaxū.” (Gen. 25:29-34) ǁNās ǀkhab ge Jakoba ǁîb ǁgûba ǃoab ge sī o, ǁîb anu hâ ǀkhaeba ge ǃkhōǃoa.
(Genesis 27:27-29) Ob ge ǃgûsī tsî ge ǁoa bi; ǃnubaib ge saran âb di ǁamaba ǃkhao tsî ǁîba ge ǀkhae; ob ge ge mî: Mû, ǁamab ti ôab dib ge ǁnā ǃaub ǃKhūb xa ǀkhaehe hâb di ǁamab khami ī. 28 Îb ǁnâi Eloba satsa mā ǀhommi di ǀaub xa, tsî ǃhūbaib di kaub xa tsî ǂguib ǃhorob tsî ǂkhon ǂauxûib tsîkha dib xa. 29 ǁAedi ge satsa nîra ǃoaba, tsî ǃhaodi ge sa aiǃâ nîra ǃhonǁgoa; îts ǃkhūse ī sa ǃgâsagu ǂamai, î gu saos di ôaga sa aiǃâ ǃhonǁgoa! A-i ǀâxarexūhe satsa ra ǀâxarexū-e, î-i ǀkhaehe satsa ra ǀkhae-e!
it-1-E 341 ¶6
ǀKhaeb
Aogu ra ǂgaeǂgui ǁaeb ǃnâ i ge ǁgûba ǁîb ǀgôaba ǁōb nîs aiǃâ gere ǀkhae. Nēs ge kaise ge ǂhâǂhâsa i tsî gere ǃgôaǃgâ-e. ǁNā-amagab ge Isaka Jakoba ge ǀkhae ǁîb a Esau di ǂâi tsî. Isaki ge Jakoba gere ǀgapiǃgôa tsî ge ǀkhae ǁîb ǀgēb Esaub xa ǃnāsase, Jehovab ǁîb ǀgôaba nî ǀkhae ǃkhaisab ge ge mā-am ǁîb ge ǂgī tsî kaira hâ i amaga. (Gen. 27:1-4, 23-29; 28:1, 6; Heb. 11:20; 12:16, 17) Egab ge Isaka ǂan nî a hîna nē ǀkhaeba mûǂan tsî ge kaikai. (Gen. 28:1-4) ǁŌb nîs aiǃâb ge Jakoba aibe Joseb di ǀgam ǀgôakha ge ǀkhae tsî ǁnāpaxū ǁîb di ǀgôaga. (Gen. 48:9, 20; 49:1-28; Heb. 11:21) Moseb tsîn ge ǁōb nî aiǃâ hoa Israelǁaesa ge ǀkhae. (Deu. 33:1) Nē ǃnaeǃkhaidi hoadi ge ra ǁgau ǁîgu ge kēbodi ase gere ǃhoasa. ǀNî ǃnādi ai i ge khoe-i gere ǀkhaehe o, o ǀkhae ra khoe-e ǁî-i ǃomkha nau khoe-i ai gere ǁgui.—Gen. 48:13, 14.
Gagasi xūna ǀō-aisase ôaǃnâs
(Genesis 27:46–28:2) Os ge Rebekasa Isaki ǃoa ge mî: “Tita ge ǃoas ǀguisa ra hî, ti ûib xasa Hetiǁîdi ǃaroma. Jakob ga Hetiǁîdi xa tara-e ūo, naura nē ǃhūb di ôadi dira ī khami, tarexa ta kha ǁnâi nî ûi?”
28 ǃNubaib ge Isaka Jakoba ǂgai tsî ge ǀkhae bi; ob ge mîmā bi tsî: Kanaanni ǀgôadi xa tara-e tā ū! ti ge mî. 2 Khâi îts ǃgûsī Padan-Aramǃhūǃâs ǁga Betueli, saos îb di ommi ǃoa, îts ǁnāpa tara-e ū Labanni, saos ǃgâsab di ôadi xa.
w06-E 4/15 6 ¶3-4
ǃGame hâ khoen nî ǃhoa-ūgu ǀgaus
Isaki tsî Rebekas tsîna ǃgâi ǃhoa-ūgu ǀgauba ge omkhâi? ǁÎra ǀgôab Esaub ge ǀgam ‘Hetiǁîb di ôa ra’ a ǃgames khaoǃgâ i ge omaris ǃnâ ǃgomsiba ge khâi. Rebekas ge Isaka ǃoa ge mî: “Tita ge ǃoas ǀguisa ra hî, ti ûib xasa Hetiǁîdi ǃaroma. Jakob ga Hetiǁîdi xa tara-e ūo, naura nē ǃhūb di ôadi dira ī khami, tarexa ta kha ǁnâi nî ûi?” (Gen. 26:34; 27:46) ǁÎs di ǂhansen tes ge ǃgāsa ǀgaub ǃnâ ge mî.
Isaki ge Jakob Esaub di ǀgēba ge mîba îb tā Kaananǁî tarasa ǃgame. (Gen. 28:1, 2) Rebekas ge ǃgāsase ge mî. Nē khoe-aogu ra ge nē omaris ǃgomsiba ǃgâi ǀgaub ǃnâ ge sîsenǂam tsî sida nētsē ǃgâi aiǁgausa ge ǁnāxūpa. Khoe-aogu ra ga hōgu tama ga ra ios? Tae-e a dī-e ǁkhā?
(Genesis 28:12, 13) Ob ge ge ǁhapo; tsî mû ǃapa-ūda-i ge ǃhūbaib ai ge mâihe hâ i, ǀams â-i ǀhommi kōse ra sī-e; tsî mû, ǀhomǃgāgu Elob digu ge ǁî-i ai gere ǃapa ka ǁgôaxa. 13 Tsî mû ǃKhūb ge ǁî-i ai mâ tsî ge mî: Tita ge ǃKhūta, abob Abrahammi di Elota tsî Isaki di Elota. Nē ǃhūb ǁîb aits ǁomǁgoeba ta ge tita satsa nîra mā tsî sa suriba.
w04-E 1/15 28 ¶6
Mâǂoa ra ǂâidi Genesis ǂkhanisa xu—II
28:12, 13—Tae-e kaise ge ǂhâǂhâsa i Jakob di ǁhapos hîna ge ‘trapde’ ǃkhōǂgā hâ is xa? ‘Trapdi’ hîna ǀuidi khami ī di ge gere ǁgau ǁnâugus ge ǀhommi tsî ǃhūbaib tsîkha ǁaegu hâ isa. Elob ǀhomǃgāgu ge ǃhūbaib ai ǁgôaxa tsî ǁkhawa ǀhomma ǃoa gere ī ǃkhais ge gere ǁgau ǀhomǃgāgu Elob tsî khoen ǁaegu ǃgaeǀhaosa ūhâ ǃkhaisa.—Jhn. 1:51.
Elobmîs khomai ǃâs
(Genesis 27:1-23) Tsî i ge ge ī, Isaki ge kaira tsî mûra âb ge ǃkhaeo, mû ǁoab ge is kōse, ob ge Esaub, ǁîb di ôab kaiba ǂgai tsî ǁîb ǃoa: Ti ôatse, ti ge mî. Ob ge ǁîba: Mû, nē ta a, ti ge mî. 2 Ob ge: Kō, ti ge mî, tita ge go kaira, ǀū ta ge a ti ǁōtsēsa. 3 Îts ǁnâi ū sa ǃauxūn, sa ǁhōs tsî sa khās tsîna, îts ǃgarob ǃoa ǃgû, îts amǀnē-e ǃauba te re. 4 Îts ǁkhoaxa ǂû-aina dība te re îts ǁîna ūhāba te re, î ta ǁîna ǂû; îs ti ǀomsa satsa ǀkhae, ǁō tama ta hâ hîa. 5 Tsî Rebekas ge ge ǃgâǁnâ, Isaki ǁîb di ôab Esaub ǀkha gere ǃhoa ǃnubai; tsî Esaub ge ǃgarob ǃoa ǃgû hâ io, amǀnē-eb nî ǃauga, hā-ūb nîse, 6 ǃnubais ge Rebekasa Jakob ǁîs di ôab ǀkha ǃhoa tsî ge mî: Kō, tita ge go ǁnâu, saob go Esaub sa ǃgâsab ǃoa ǃhoa ǃkhaisa, nēti ra mîse: 7 Amǀnē-e ūhāba te re, îts ǁkhoaxa ǂû-aina ǂhomiba te re, î ta ǂû; o ta ge satsa ǃKhūb di ais aiǃâ nî ǀkhae ti ǁōb aiǃâ. 8 Nēsi ǁnâi, ti ôatse, ǁnâu re ti domma mîmā tsi ta nîn hoan ǃnâ. 9 ǃGû ǁnâi ǀgoan ǃoa îts ǁnāpa xu ǀgam ǃgâi pirirona ūhāba te re, o ta ge tita ǁîna saoba ǁkhoaxa ǂû-aise nî dība, ǂgaob ra khami. 10 Ots ge satsa ǁî-e saoba nî ūsība, ob ge nî ǂû, ǀkhae tsib nîga ǁōb âb aiǃâ. 11 ǃNubaib ge Jakoba ǁgûs Rebekas ǃoa ge mî: Kō, ti ǃgâsab Esaub ge a ǀûxaǀkhā tsî tita ge a ǂkhanu khoe; 12 ǀnîsib ge ti îba tita nî tsânana, o ta ge gāxaǃnâ-aose ǁîb mûǁae nî ī; ǃnubai ta ga ǀâxare-e ti ai hā kai ǀkhaeb amǃnâs ai. 13 Os ge ǁgûsa ǁîb ǃoa ge mî: Ab sa ǀâxareba ti ai hā, ti ôa, ǁnâus ǀguisa hîba ti domma îts ǃgû, îts ǁîna ūhāba te! 14 Ob ge ǃgû tsî ǁîna ū tsî ǁgûsa ge ūhāba; tsî ǁgûs ge ǁkhoaxa ǂû-aina ge dī, ǁgûb ra ǂgao khami. 15 ǁNās khaoǃgâs ge Rebekasa ǃgomǀgausa saran Esaub, ǁîs ôab kaib din, ommi ǃnâs ǁîs ǀkha ūhâna ū tsî ǁîna Jakob, ǁîs di ôab ǂkhamma ge ǂgaeǂgā. 16 Tsî khōn piriron dinas ge ǃomkha âb tsî ǃaob âb di ǂkhanu ǃkhaisa ge anaǂamū. 17 Tsîs ge ǁkhoaxa ǂû-ain tsî pereb tsîn, hîas goro dīna Jakob, ǁîs ôab di ǃomǁaeb ǃnâ ge mā. 18 Ob ge ǁgûb tawa sī tsî: Ti îtse, ti ge mî. Ob ge ǁîba: Mû nē ta a; tarits a satsa, ti ôa? ti ge mî. 19 Ob ge Jakoba ǁgûb ǃoa ge mî: Tita ge Esauta, sa ǂguroǃnaesabeta; tita ge go dī, sats go mîmā te khami; ǂnûkhâi îts ti amǀnē-i xa ǂû re, îs sa ǀomsa tita ǀkhae! 20 ǃNubaib ge Isaka ǀgôab âb ǃoa ge mî: Okha, mati i ī, ots ǁnātikōse ǃhaese hō hâ, ti ôa? Ob ge: ǃKhūb sa Elob kom ǁî-e ti aisa go ǃgûǃoa kaio, ti ge mî. 21 Ob ge Isaka Jakob ǃoa ge mî: ǀGū tsigo ti ôa, î ta tsânana tsi, isets a amase ti ôa Esau ǃkhaisa, isets ǁî tama ǃkhaisa. 22 ǃNubaib ge Jakoba Isaki, ǁgûba, ge ǀgū, ob ge ge tsânana; ob ge: Dommi ge Jakob di domma, xawe ǃomkha ge Esaub di ǃomkha, ti ge mî. 23 Xaweb ge ǂan bi tama ge i, ǃomkha âb ge ǃgâsab âb di ǃomkha khami ǀûxa i xui-ao; ob ge ge ǀkhae bi.
MAARTI 30–APRILI 5
ELOBMÎSA XU HÂ ǂÛǂÛSA MÎDI | GENESIS 29-30
“Jakob ge ra ǃgame”
(Genesis 29:18-20) Tsî Jakob ge Raxelsa ǁâ tsî ge mî: Tita ge hû kurigu kōse nî ǃoaba tsi Raxels sa ôas ǂkhams ǃaroma. 19 ǃNubaib ge Labanna ge mî: ǃGâiba te a satsa ta ǁîsa nî māsa, ǀkhara khoeba ta nî mā sis xa; hâǀkhā te re! 20 Nētib ge Jakoba Raxels ama hû kuriga gere ǃoaba bi; tsî ǁîgu ge ǁîb mûǁae ǀnî tsērodi khami ge ī, ǁâ sib hâ amaga.
w03-E 10/15 29 ¶6
Jakob ge gagasi xūna gere ǃgôaǃgâ
ǃGame-aob ge ǃgame kaikhoes omaris ge mā-e maris ǃgao ge tsâǀkhāhe hâ i. Moseb ǂhanub ge korodisi ǀhaiǀurimarina ǀgaiǃkhō-e hâ ǂkham khoes ǃgao gere ǂgaoǀkhā. Ôaǃnâ-aob Gordon Wenhami ge ra mî ǁnā maris ge ge ‘ǃgameb di ǀkhae i’ di xawe i ge ǀnîna ‘kaise ge ǀoro i.’ (Deu. 22:28, 29) Jakob ge nēsa ge matare hō tama hâ i. ǁÎb ge Labana hû kuriga sîsenbasa ge ǂgan. Sîsen-aon ge 42 sa xu 84 ǀhaiǀurimarina gere hō ǁkhâb ǃnâ Babilons ǁaeb ǃnâ dib ge Wenhama ra mî, ǁnās ǀkhab ge “Jakoba Labana kaise ǂoaǂamsa ǃgameb ǀkhaeba Raxels ǃgao ge mā.” Labani ge nēsa māsenxase ge ūǃoa.—Gen. 29:19.
(Genesis 29:21-26) ǃNubaib ge Jakoba Labanni ǃoa ge mî: Ti tarasa mā te re, ti tsēdi go ǀoa xuige; î ta ǁîs tawa ǂgâ re! 22 Ob ge Labanna ǁnā ǃās di aogu hoaga ǀhaoǀhao tsî ǂûǁae-e ge dī. 23 Tsî i ge ǃuia ge ī, ob ge ǁîb di ôas Leasa ū tsî ǁîb tawa ge ūhā si; ob ge ǁîs tawa ge ǂgâ. 24 Tsî Labanni ge ǃgās âb Silpasa ǁîb di ôas Leasa ǃgāse ge mā. 25 Tsî i ge ǃnauǁgoaga ge ī, tsî mû, os ge Lea go i. ǁNā-amagab ge Labanni ǃoa ge mî: Okha, tare xū-e kha sats go dī te-e? Raxels ama ta kha ǃoaba tsi tama hâ? Tarexats ǁnâi go gā te? 26 Ob ge Labanna ge mî: Nē ǃās sida dis ai dīhe tama ǃkhais ge nēsa, ǂkhams ra ǂguroǃnaesabes aiǃâ māǂuihesa.
w07-E 10/1 8-9
Tsûaǂgao hâ ǃgâsadi hîna “Israeli omma” ra omdi
Leasa Jakoba gāxaǃnâsa ge mîǁgui? Tamas ka ios ge ǁîs ǁgûb ǀguiba gere ǁnâuǀnam? Raxelsa mâpa ge hâ i? Tae-i ra īsas ge ǂan i? Tsî matis gere tsâ? ǁÎs ǁgûb di ǂâisas ge dīǀoaǀoa tama hâ i? Elobmîs ge nē dîde ǃeream tama hâ. Raxels tsî Leas tsîn ge nēs khaoǃgâ gere ǂâi xū-i ge Jakoba ge ǁaixa kai. Labani tamas ka io ǁîb ǀgôadi ǃoa tamas ge ge i Jakob ge sao ra mîde a mîsa: “Raxels ama ta kha ǃoaba tsi tama hâ? Tarexats ǁnâi go gā te?” Labana mati ge ǃeream? Nē ǃās sida dis ai dīhe tama ǃkhais ge nēsa, ǂkhams ra ǂguroǃnaesabes aiǃâ māǂuihesa. Nēs di wekheba dīǀoaǀoa, o da ge sida ǁîs ona nî mā tsi, ǃoabas hîats nî ǁkhawa hû kuriga ǃoaba tes ǃaroma.” (Gen. 29:25-27) Jakob ge ǀgam khoera ǃgames ǃnâ ge ǁgari-e, suriba ra aiǃgû kaise.
it-2-E 341 ¶3
ǃGameb
ǁÂudīb. ǃGameb tsēs ge tsēdīhe tama hâ i xawe i ge Israeli ǃnâ ǁâudība ge hâ i. ǃGameb tsēs ais ge ǃgame ra khoesa kaise ǀgapi ǀgaub ǃnâ gere aiǂhomisen. Aibes ge ǁāsen tsî ǁnāpaxū ǃgâihamxū-i ǀkha gere ǂkhausen. (ǀGopeǀnō re Rut. 3:3; Ese. 23:40.) Kaikhoedi huib ǀkhas ge ǃhuri rokkeba gere ana, îsase a kurusaba xawe nēsas ge ǁîs mariǁhōgu gere mā-am khami ǀgui gere dī. (Jer. 2:32; J.ǂHa. 19:7, 8; Psa. 45:13, 14) Tsî ǁkhāsib ge hâ io, os ge îsaîsa xūna gere ǂnûi (Jes. 49:18; 61:10; J.ǂHa. 21:2) tsî ǁîs danas ai xū-e gere ǁgui hîna ǂaidi kōse ra sī-e. (Jes. 3:19, 23) Nēs ge ra ǁguiǃā tae-i ǃaroma i ge supu isa Labana Jakoba gāxaǃnâsa tsî ǁîba Leasa a māsa Raxels ose. (Gen. 29:23, 25) Rebekas ge ǁîs danasa ge ǃgū-ai Isakas ge sī gere ǀhao-ū o. (Gen. 24:65) Nēs ge ǃgame ra khoes ǃgame-aoba ra ǃgôaǃgâ ǃkhaisa gere ǁgau.—1Kor. 11:5, 10.
(Genesis 29:27, 28) Nēs di wekheba dīǀoaǀoa, o da ge sida ǁîs ona nî mā tsi, ǃoabas hîats nî ǁkhawa hû kuriga ǃoaba tes ǃaroma. 28 Ob ge Jakoba ǁnāti ge dī; tsîb ge ǁîs di wekheba ge dīǀoaǀoa. ǃNubaib ge Raxels, ǁîb di ôasa, tarase ge mā bi.
Gagasi xūna ǀō-aisase ôaǃnâs
(Genesis 30:3) Os ge ge mî: Mû nēs hâ ti ǃgās Bilhasa, ǂgâ re ǁîs tawa, îs ti ǁgoakha ai ǁora, î ta tita ona ǁîsa xu ǀgôahōbasen.
it-1-E 50
ǁÎxūdībasen
Raxels tsî Lea hâra ge ǁîra ǃgādi xa ge Jakob ǃnâ-ū a hō-e ǀgôana ǁîra di a khami gere mû. (Gen. 30:3-8, 12, 13, 24) Nē ǀgôan ge Jakob ǃgame taradi gere hō ǀgôan ǀkha ǁîn tsîna ǀumide gere hō. ǁÎn ge ge ǁgûb di ǀgôa i tsî nē ǃgādi a taradi sîsen-ao amaga ra ge Raxels tsî Leas tsîra nē ǀgôan ǀumis ǀkha dīxū-e ge ūhâ i.
(Genesis 30:14, 15) Tsî Rubenni ge ǃhorob ǃgaoǁaeb ai ǃgû tsî ǃaub ai dudaimǂûn xa hō tsî ǁîna ǁîb îs Leasa ge ūhāba. Os ge Raxelsa Leas ǃoa: Au te si go sa ôab di dudaimǂûn xa, ti ge mî. 15 Os ge ǁîs ǃoa ge mî: ǂÂuba si tama i kha hâ ti aobas ge ūǀhana te ǃkhaisa, os ti ôab di dudaimǂûna ǁkhāti nî ū? ǃNubais ge Raxelsa ge mî: Ab ǁnâi nē tsuxub ǃnâ sa ôab di dudaimǂûn ǃaroma sa tawa ǁgoe.
w04-E 1/15 28 ¶7
Mâǂoa ra ǂâidi Genesis ǂkhanisa xu—II
30:14, 15—Tae-i ǃaromas ge Raxelsa ǀgamǀās di ǃēsa ǂoaǃnâ ǀnammi di hais ǃaroma? ǃKharu ge ǁaeb ǃnâ i ge nē hais di ǂûsa sōǀôa-i ase gere sîsen-ūhe tsûba ūbes ǃgao. Nē ǂûs ge ǁgoe-ūgub turab tsîna gere khâikhâiǃnâ tsî ǀgôa-e hōs ǀkhas tsîna gere hui. (ǀG.ǁna. 7:13) Elobmîs ge mî tama hâ Raxels ge tae-i ǃaroma nē ǃēsa a ǂoaǃnâsa, ǁîs ge ǀnîsi ge ǂâi hâ i nē hais ǀgôa-e hōs ǀkha nî hui si di. Xawe nēs ge kuriga Jehovab ǁîs ‘ǁhāsa’ nî ǁkhowa-ams aiǃâ ge ī.—Gen. 30:22-24.
Elobmîs khomai ǃâs
(Genesis 30:1-21) Tsî Raxels ge mûo, Jakobas ǁoraba tama hâ ǃkhaisao, os ge Raxelsa ǃgâsas âsa ge suri; os ge Jakob ǃoa: ǀGôana mā te, ǁnā tamas ka io, o ta nî ǁō, ti ge mî. 2 ǃNubaib ge ǁaib Jakob diba Raxels ǃoagu ge khâi, tsîb ge ge mî: Elob ǃās ǃnâ ta kha tita hâ, o ta sa ǃnāb di ǂûtaniba ǂkhā si hâ? 3 Os ge ge mî: Mû nēs hâ ti ǃgās Bilhasa, ǂgâ re ǁîs tawa, îs ti ǁgoakha ai ǁora, î ta tita ona ǁîsa xu ǀgôahōbasen. 4 Nētis ge ǁîba ǁîs di ǃgās Bilhasa tarase ge mā, tsî Jakob ge ǁîs tawa ge ǂgâ. 5 Os ge Bilhasa ǀgamǀkhā tsî Jakoba ǀgôaba ge ǁoraba. 6 ǃNubais ge Raxelsa ge mî: Elob ge tita ge ǀgoraǃgâ, tsîb ge ti domma ǁnâu tsî ǀgôaba go mā te; ǁnā-amagas ge Dan ti ge ǂgai bi. 7 Tsî Bilhas Raxels di ǃgās ge ǁkhawa ǀgamǀkhā tsî Jakoba ǀgamǁî ǀgôaba ge ǁoraba. 8 ǃNubais ge Raxelsa ge mî: Tita ge elosi ǂnoagu-aide ti ǃgâsas ǀkha goro ǂnoagu, tsî ta ge go dan; os ge Naftali ti ge ǂgai bi. 9 Tsî Leas ge mûo, ǁoratoas go ǃkhaisa, os ge ǁkhāti ǁîs di ǃgās Silpasa ū tsî ǁîsa Jakoba tarase ge mā. 10 Os ge Silpas, Leas di ǃgāsa Jakoba ǀgôaba ge ǁoraba. 11 ǃNubais ge Leasa ge mî: ǂGuib ra hā tsîs ge Gad ti ge ǂgai bi. 12 ǁNās khaoǃgâs ge Silpas Leas di ǃgāsa Jakoba ǀgamǁî ǀgôaba ge ǁoraba. 13 ǃNubais ge Leasa ge mî: ǃGâiǃgâ ta a, ǀgôadi ge ǃgâiǃgâse nî ū te amaga; tsîs ge Aser ti ge ǂgai bi. 14 Tsî Rubenni ge ǃhorob ǃgaoǁaeb ai ǃgû tsî ǃaub ai dudaimǂûn xa hō tsî ǁîna ǁîb îs Leasa ge ūhāba. Os ge Raxelsa Leas ǃoa: Au te si go sa ôab di dudaimǂûn xa, ti ge mî. 15 Os ge ǁîs ǃoa ge mî: ǂÂuba si tama i kha hâ ti aobas ge ūǀhana te ǃkhaisa, os ti ôab di dudaimǂûna ǁkhāti nî ū? ǃNubais ge Raxelsa ge mî: Ab ǁnâi nē tsuxub ǃnâ sa ôab di dudaimǂûn ǃaroma sa tawa ǁgoe. 16 Tsî Jakob ge ǃuia ǃgaroba xu hāo, os ge Leasa ǁîba ǃgûǃoa tsî ge mî: Ti tawats ge nî hāǂgâxa; tita ge amase amǃnâ-i ǀkha go ǃgae tsi ti ôab di dudaimdi ǃaroma xuige. Ob ge ǁnā tsuxub ǃnâ ǁîs ǀkha ge ǁgoe. 17 Tsî Elob ge Leasa ge ǁnâu-am, os ge ǀgamǀkhā tsî Jakoba koroǁî ǀgôaba ge ǁoraba. 18 ǃNubais ge Leasa ge mî: Elob ge tita ti amǃnâsa go mā, ti ǃgāsa ta ge ti aoba mās khaoǃgâ; os ge Isaskar ti ge ǂgai bi. 19 Tsî Leas ge ǁkhawa ǀgamǀkhā tsî Jakoba ǃnaniǁî ǀgôaba ge ǁoraba. 20 Os ge Leasa ge mî: Elob ge tita, ā titab ge ǃgâi hō-e go ǀkhae; nē ǃnās aib ge ti aoba tita ǀkha nî ǁaeǁaesen, ǃnani ǀgôaga ta ge ǁoraba bi xui-ao. Os ge Sebulon ti ge ǂgai bi. 21 Tsîs ge ǁnās khaoǃgâ ǀgôasa ǁora tsî Dina ti ge ǂgai si.