ǁNaeǁgaudi Sida Xristeǁî ûib tsî aoǁnâ sîsenni sîsen ǂkhanib
APRILI 13-19
ELOBMÎSA XU HÂ ǂÛǂÛSA MÎDI | GENESIS 31
“Jakob tsî Labani tsîkha ge ǂkhîb di ǃgaeǀhaosa ra dī”
(Genesis 31:44-46) Hā ǁnâi nēsi, î khom ǃgaeǀhao-e dī tita tsî sats tsîkhoma, î-i ǀhûǀguitimî-i ase hâ tita tsî sats tsîkhom ǁaegu! 45 Ob ge Jakoba ǀui-e ū tsî ǁî-e ǂâiǂâixūse ge ǂnûikhâi. 46 Ob ge Jakoba ǃgâsagu âb ǃoa ge mî: ǀUide ǀhaoǀhao go re! O gu ge ǀuide ūkhâi tsî ǀuiǁkhopose ge dī, o gu ge ǁnāpa ǁnā ǀuiǁkhopos ai gere ǂû.
it-1-E 883 ¶1
Galed
ǁÎkha di ǁnâusāgudi hîna kha ge ūhâ ide ǃgâiǃgâi tsî kha ge ǃgaeǀhaosa ǁîkha ǁaegu ge dī. Jakob ge nēs ǀkha ǀuiǁkhopode ge kuru tsî ǁîb ǃgâsaga ge mîmā îgu nē ǀuide tafels khami kuruhe, ǃgaeǀhaos di ǂûǀhaos ǁnāpa nî dīhese. Labani ge nē ǃkhaisa nē ǀuidi ǃoagu ge ǂgai, Aramaic ǀons hîna “Jegar-Sahaduta” di hâsa ra māse xaweb ge Jakoba ǁîsa Galed ti ge ǂgai Hebregowab ǃoagu. Labani ge ge mî: “Nē ǀuiǁkhoposa as ǀhûǀguitimî xūse i tita tsî sats tsîkhom ǁaegu.” (Gen. 31:44-48) Nē ǀuiǁkhopodi ge ǃkharu gere khoen hoan ǃgao ge ǀhûǀguitimî i. 49ǁÎ ǁaraǃās ra mî khami “ǃkhē xū ǂgo ommi [Hebregowab mits·pahʹ],” ge a ǁgauǁgau Jakob tsî Laban hâkha ge nēba ǂkhîba a mîǁguisa ǁîkha ǁaegu tsî ǁîkha ǀaokhoen ǁaegu. (Gen. 31:50-53) Ega i ge ǀuide ǁkhā ǀgaub ǃnâ ǃnōsa ǀhûǀguitimî di khami gere sîsen-ūhe.—Jos. 4:4-7; 24:25-27.
(Genesis 31:47-50) Tsî Labanni ge ǁîsa Jegar-Sahaduta ti ge ǂgai; xawe Jakob ge ǁîsa Galed ti ge ǂgai. 48 ǃNubaib ge Labanna ge mî: Nē ǀuiǁkhoposa as ǀhûǀguitimî xūse i tita tsî sats tsîkhom ǁaegu. ǁNā-amagan ge ǀons âsa Galed ti ge ǂgai, 49 tsî Mispa, ǁîb ge mî xui-ao: Ab ǃKhūba mûǂamsisa ūhâ tita tsî sats tsîkhom ǁaegu, ǀguib ga nauba ǂganǃgâba hâ ǃnubai. 50 Sats ga ti ôara ǁgonǁgonǂgao tsîts ga ti ôara xōǀkhā ǀnî tarade ūo, khoe-i xare-i sakhom tawa a ǀkhai, xawe kō, ob ge Eloba ǀhûǀguitimî-aose nîra hâ tita tsî sats tsîkhom ǁaegu!
it-2-E 1172
ǃKhē xu ǂgō-ommi
ǀUiǁkhopodeb ge Jakoba ge kuru tsî nēsa “Galed” di ge ǂgai tsî “ǃKhē xu ǂgō-om di.” Labanni ge ge mî: “Ab ǃKhūba mûǂamsisa ūhâ tita tsî sats tsîkhom ǁaegu, ǀguib ga nauba ǂganǃgâba hâ ǃnubai.” (Gen. 31:45-49) Nē ǀuiǁkhopodi ge ra ǁgau Jehovab ge Jakob tsî Labani tsîkha ǁîkha ǃgaeǀhaosa nî dīǀoaǀoa ǃkhaisa gere kōsa.
(Genesis 31:51-53) Tsî Labanni ge ǃaruǀî Jakob ǃoa ge mî: Mû, nēs ge ǀuiǁkhopos ǁkhāsa, tsî mû, nēs ge ǂnûikhâihe hâ saosa, tita go ǂnûikhâisa tita tsî sats tsîkhom ǁaegu. Nē ǀuiǁkhopos ǁkhāsa as ǀhûǀguitimîxūse i, tsî nē ǂnûikhâihe hâ saosa as ǀhûǀguitimîxūse ī; tita nē ǀuiǁkhoposa ǃgû-īǀkhā tide ǃkhaisa saǀî, tsî sats nē ǀuiǁkhoposa tsî nē ǂnûikhâihe hâ saosa ǃgû-īǀkhā tide ǃkhaisa titaǀî ǂkhababa ǃoa. Elob Abrahammi dib tsî Elob Nahori dib, Elob ǁîkha îb diba ab ǂhanuǂhanu sakhom ǁaegu!
Gagasi xūna ǀō-aisase ôaǃnâs
(Genesis 31:19) Tsî Labanni ge ge ǃgû hâ i ǁîb di gūna nî ǂkhomse ǃnubais ge Raxelsa ǁgûb ūhâ omelona ge ǀâbasen.
it-2-E 1087-1088
Omelona
Ôaǃnâ-aon hîna Mesopotamias tsî nēs ǂnamipe hâ ǃādi ǃnâ hân tsîn ge ra mî nē omelon ge ra ǁgau ham-i omaris di ǀumisa nî hōsa. ǀNî tablets hîna ge Nuzis tawa a hō-es ǃoagu i ge omelona ǀnî mâsigu ǃnâ ra ǃaroma i-i ǀuiǀgôaba ǁnâuǃgâǃkhaiba ǃoa ī tsî ǁîb ǀuiǁgûb di xūna ūbasen. (Ancient Near Eastern Texts, edited by J. Pritchard, 1974, pp. 219, 220, tsî ftn 51) Raxels ge ǀnîsi nēsa ǂâis ǃnâ ūhâse ge mî ǁîs di ǁgûb omelona ūs ge ge ǃgâi xū-i dīsa di, ǁîs di ǁgûb ge ǁîs kaikhoeb Jakoba ǃgâi tama ǀgaub ǃnâ hâ-ū amaga. (ǀGopeǀnō re Gen. 31:14-16.) Omelon di ǂhâǂhâsasib omaris ǀumisa hōs dis ge Labani ge tae-i ǃaroma gere ǂâiǂhansensa nē omelona hōs ǃaroma sa ra ǁgau, ǁîb ǃgâsagab ge ūsao tsî Jakoba ge sauruǃgon hû tsēdi ǀgaiba. (Gen. 31:19-30) Raxels ge dī xū-eb ge Jakoba ge ǀū i (Gen. 31:32) tsî i ge ǁgauǁgau-e a ǀkhai ǁgau ra-e ǁîb ge nē omelona gere sîsen-ū Labani ǀgôagu ǀumisa ǃkhōǃoas ǃgao di. Jakob ge ǁgôatsuiǁgoa eloga ǃoabas ǀkha dīxū-e ge ūhâ tama hâ i. Omelon ge ga āxūhe hâ Jakob ge hoa omelon hîna ge ǁîba a māhena a sâu o, kai hais hîna Sexems xōǀkhā hâs tawa.—Gen. 35:1-4.
(Genesis 31:41, 42) Tita ge ǀgamdisi kuriga sa ommi ǃnâ ge hâ i; disihakaǀa kurigu kōse ta ge sa ǀgam ǀgôara ǃaroma gere ǃoaba tsi, tsî ǃnani kurigu kōse sa gūn ǃaroma, ots ge ti amǃnâsa disi ǃnādi kōse ge ǀkharaǀkhara. 42 Elob ti îb dib tsî Elob Abrahammi dib tsî ǃaoǃgâb Isaki dib ga ti ǀkha hâ tama ga hâ io, o ta ga nēsi ǂanǂansase sats xa ǀkhaiǃnâse sîbēhe hâ. Elob ge ti ǀkhomǀkhomxasib tsî ti ǃomkha di xūreba go mûǀî tsî ǁanǃoe go ǁkhara tsi.
(1 Petrub 2:18) Sadu ǃgādo, ǃaoǃgâb hoab ǀkha ǀhonkhoena ǃnaga hâba, ǃgâi tsî tsamtsiǃnân ǀguina tama i tsî karosan tsîna.
w13-E 3/15 21 ¶8
Jehovab—sida hâǃkhaib
8 Jakob ge Harans tawa a sī o, ob ge ǁîb omeb Labana ǁîba ge ǁkhoreǁare tsî ega Leas tsî Raxels tsîra ge mā bi îb ǃgame. Labani ge Jakoba gere gāxaǃnâ ǂgao tsî ǁîb mataresa disi ǃnāde ge dawa. (Gen. 31:41, 42) Jakob ge ǃgâi tama ǀgaub ǃnâ ge hâ-ūhe xaweb ge ge mâǀgai tsî Jehovab ai ge kō ǁîb ǃgomsinab nî kōǃgâ ǃkhaisa. Elob ge Jakoba a mîba îb Kanaana ǃoa oa ǁaeb aib ge ǁîba “ǂgui gūn, ǃgādi, ǃgāgu, ǃnain tsî eseln tsîna ge ūhâ i.” (Gen. 30:43) Jakob ge ganganxasiba ra ǁgause ge ǀgore: “Tita ge nē ǃgâidīgu hoagu tsî nē îǂhôasib hîats ge ti tawa dīb hoaba a ǂkhariba. Nē ǀkharus tis ǀguis ǀkha ta ge nē Jordanna ge ǃgâu, tsî nēsi ta ge go ǀgam ǂnubi kai xui-ao.”—Gen. 32:10.
Elobmîs khomai ǃâs
(Genesis 31:1-18) ǃNubaib ge ǁîba Labanni ôagu di mîde ge ǁnâu, hîa ra mîga: Jakob ge sige îb din hoana ge ū, tsî sige îb di xūna xub ge nē ǃkhūsib hoaba ge dībasen. 2 Tsî Jakob ge ǁkhāti Labanni di aisa ge kōǀî, tsî mû ǁîs ge ǁîbǀî ǁari tsî aetsēs ge ī i khami ī tama ge i. 3 Ob ge ǃKhūba Jakob ǃoa ge mî: Oa ǁkhawa sa aboxan ǃhūba ǃoa tsî sa ǀaokhoena ǃoa, tsî tita ge sa ǀkha nîra hâ. 4 ǃNubaib ge Jakoba sîsī tsî Raxels tsî Leas tsîra ge ǂgai kai ǃgarob ai gūn âb tawa.5 Tsîb ge ǁîra ǃoa ge mî: Tita ge saro îb di aisa ra mû, titaǀîs ge ǁari tsî aetsē ī i khamis ī tama ǃkhaisa; xawe Elob ti îb dib ge tita ǀkha hâ ge i. 6 Tsî saro ge a ǂan, ti ǀgaib hoab ǀkha ta ge saro îba gere sîsenba ǃkhaisa. 7 Xawe saro îb ge gāxaǃnâsise ge sîsenū te, tsîb ge ti amǃnâsa disi ǃnādi kōse ge ǀkharaǀkhara; xawe Elob ge ǁîba mā-am tama ge i, tsūdī teb nî ǃkhaisa. 8 Nētib ge ǁîba mîo: ǀGarun ge nî sa amǃnâ, o di ge gūdi hoade ǀgaruna ge ôa, tsî nētib ge ǁîba mîo: Anxan ge nî sa amǃnâ, o di ge gūdi hoade anxana ge ôa. 9 Nētib ge Eloba saro îba ǀgoana ūǀhana tsî tita ge mā. 10 Tsî i ge ge ī, pirin ge ǀgam ǁaeb ai ta ti mûra ge ǃhâkhâi ǃkhaisa, tsî ta ge ǁhapos ǃnâ ge mû; tsî kō, pirigu piride ra ǃapagu ge anxa tsî ǀgaru tsî ǁgani ge i. 11 Tsî ǀhomǃgāb Elob dib ge tita ǃoa ǁhapos ǃnâ: Jakotse! ti ge mî. O ta ge tita: Mû, nē ta a, ti ge mî. 12 Ob ge ge mî: ǃGapakhâi îts kō: Pirigu hîa piride ra ǃapagu hoagu ge a anxa tsî ǀgaru tsî ǁgani, tita ge Labanni ra dī-ū tsi xūn hoana go mû xui-ao. 13 Tita ge ǁnā Elota, Bet-Els, hîats ge ǁîs ai ǂnûikhâihesa saosa ǂkhauǀkhāba tes tsî mîmâi-e ge mîmâiba tes di ta. Nēsi khâi îts nē ǃhūba xu doe îts ǁkhawa oa sa ǀaokhoexasis di ǃhūba ǃoa. 14 ǃNubai ra ge Raxels tsî Leas tsîra ǃeream tsî ǁîb ǃoa ge mî: Ūm hâ xare sima amǃnâ-e tsî ǀumi-e sim îb di ommi ǃnâ? 15 ǃHao khoesem xare ǁîb xa ǃgôahe tama hâ? ǁÎb kom sima ge ǁamaxūo, tsîb kom ǁkhāti hugaǀgui sim di mariba ge hapuo. 16 ǁNā ǃkhūsib Elob ge sim di îba ūǀhanab hoab ge a sada di tsî sada ôagu di; dī ǁnâi ǁnān Elob ge mîba tsin hoana. 17 ǃNubaib ge Jakoba khâi tsî ǁîb di ôagu tsî ǁîb di tarara tsîna ǃnain ai ge ǃnao. 18 Tsîb ge ǀgoan âb hoan tsî ūb hâ xūn hoan, tsî ǁnā ǀgoan, ūb hân Padan-Aramǃhūǃâs ǃnâb ge ǃoaǂuibasena ge ūǃgû, Isaki ǁgûb tawab nî sīga Kanaanǃhūb ǃoa.
APRILI 20-26
ELOBMÎSA XU HÂ ǂÛǂÛSA MÎDI | GENESIS 32-33
“ǀKhaeba du ra ǃkhamba?”
(Genesis 32:24) Xawe Jakob ǂûb ge ǀguri ge ǃgau; tsî khoeb ge ǁîb ǀkha ge ǃkham ǁgoaǂnobos ge ǁhais kōse.
w03-E 8/15 25 ¶3
Jehovaba du ǁkhoaǂgaosib ǀkha ra ôa?
Xoadi ge ǂgui aiǁgaude ūhâ ǁnān hîna Jehovaba ra ôan dide. ǀGui aiǁgaus ge Jakob disa hîna ge Elob di ǀhomǃgāb ǀkha hoa ǃuisa gere ǃkhama. Nēs xa ǃaroma-e hâseb ge Jakoba Israel di hâ ǀonsa ge mā-e, Elob ǀkhab ge ǀguiba gere ǃgû amaga. ǀHomǃgāb ge ǁîb mâǀgaibesib ǃgao ge ǀkhae bi.—Gen. 32:24-30.
(Genesis 32:25, 26) Tsî mûb geo dan bi ǁoab a ǃkhaisa ob ge Jakob ǂnamib di uniǁaesa ge tsâǀkhā, Jakob ǂnamib di uniǁaes ge ǃoes kōse, ǁîb ǀkhab ra ǃkham hîa. 26 Ob ge ǁîba ge mî: A ta ǃgû ǁgoaǂnobos go ǁhai xuige. Xaweb ge ge mî: Tita ge satsa ǃgû kai tide, titats ga ǀkhae tama io.
it-2-E 190
ǃHorasis
Jakob di ǃhorasis. Jakob ge 97 kurixab a hîna hoa ǃuisa Elob di ǀhomǃgāb ǀkha gere ǃkham. ǁÎb ge ǀkhaebab ǀhomǃgāba xu nî hōs kōse ge ǃkham. ǃKhams ǃnâb ge ǀhomǃgāba Jakob di ǂnamib di uniǁaesa ge tsûtsûhe. Jakob ge nēs xa ǃaroma-e hâse gere ǀī. (Gen. 32:24-32; Hos. 12:2-4) Jakob ge ǁnās khaoǃgâ ge ǂâiǂâiǃnâhe, ‘Elob tsî khoen tsîn ǀkhab ge gaosase a tanisen’ tsî a dan xaweb ge amabes ǃnâ ǀgaisa ǀhomǃgāb Elob diba ge ǃkham dan tama hâ i. Elob ge mā-am amagab ge Jakoba ǀhomǃgāb ǀkha gere ǃkham, nēs ge Jakob Elob di ǀkhaeba ra ǃgôaǃgâ ǃkhaisa gere ǁgau.
(Genesis 32:27, 28) Ob ge ǁîba ǁîb ǃoa: Matits ǀon hâ? ti ge mî. Ob ge: Jakota, ti ge mî. 28 Ob ge ǁîba ge mî: Sa ǀons ge aiǃâb ǃoa Jakob ti ǂgaihe tide tsî Israel ti nî ǂgaihe: Sats ge gaosase go tanisen Elob tsî khoen tsîn ǀkha tsîts ge go dan amaga.
it-1-E 1228
Israeli
1. Elob ge Jakoba 97 kurixab a hîna a mā ǀons. Jabokǃāb di ǃgâuǃkhaisa xub ra ǃgâu îb ǁîb ǃgâsab Esauba sī ǀhao-ū hînas ge nē ǀhomǃgāb ǀkhab gere ǃkhamsa. Jakob ge ǀû ose a ǃkham amaga i ge ǁîb ǀonsa Israelsa ǃoa ge dawahe, Elob ǀkhaeb di ǁgauǁgaus ase. Nē ǃnaeǃkhaide ǂâiǂâisens ǃgaob ge Jakoba nē ǃâsa Penuel ti ge ǂgai. (Gen. 32:22-31; Mû re JAKOB No. 1.) Ega i ge Betels tawa nē ǀonsa Elob xa ge ǃkhōǃoahe, ǁnā ǁaeba xub ge Jakoba ǁaeba xu ǁaeb ǀkha Israel di gere ǂgaihe. (Gen. 35:10, 15; 50:2; 1Kro. 1:34) ǂGui ǃnādi hîna 2500 sa ǃnā hâse Israel di hâ mîsa ra sîsen-ūhe di ge Jakob di surib ǁaesa ǃoa ra ǁnaeǁgau.—Eks. 5:1, 2.
Gagasi xūna ǀō-aisase ôaǃnâs
(Genesis 32:11) Tsubuǂui te re ti ǃgâsab di ǃomǁaeba xu, Esaub di ǃomǁaeba xu, ǁîba ta ra ǃao xuige; îb tā ǀnîsi hā ǂnau te ǁgûs ǀgôagu ǀkha!
(Genesis 32:13-15) Tsîb ge ǁnāpa ǁnā tsuxub ǁkhāb ǃnâ ge ǁomǂkhai; tsîb ge ǃomǁaeb ūhân xa Esaub, ǃgâsab âba ǀkhaexū-e ge ūba: 14 ǀGamkaidisi piridi tsî ǀgamdisi piriga, ǀgamkaidisi gūdi tsî ǀgamdisi ǂkharagūga, 15 ǃnonadisi daisi ra ǃnaide ǂkhamn âdi ǀkha, hakadisi gomadi tsî disi ǁgōga, ǀgamdisi eseldi tsî disi ǂkham eselgu tsîna.
w10-E 6/15 22 ¶10-11
ǂKhâǃnâ ra mîdi ge ǃgâi ǀhōsaguside ra omkhâi
10 ǂKhâǃnâ ra mîdi tsî ǃgâise ǃhoa-ūgus tsîn ge ra hui da ǃgâi ǀhōsaguside ūhâ ǀgarasa. Dī ǁkhā da an hoana dī tsî da ga sida ǀhōsagusidi nau khoen ǀkha da ūhâde ǃgâiǃgâi o, o da ge ǁîn ǀkha ǃgâi ǀgaub ǃnâ a ǃhoa ǁkhā. Nau khoen ǀkha khoexaǃnâ ǀgaub ǃnâ ǃhoa, ǃēde ôa ǁîna huis dide, ǀkhae xū-e ǂgaoba xu mā tsî da ga ǃhaokhoeǃkhōǃoaxa o, o da ge ǁîn ǀkha ǁkhowamsase nî ǃhoa. Nēsa du ga dī o, o du ge “ǀaexa ǂnomde ǁî-i danas ai nî ǀhaoǀhao” tsî ǃgâi ǀgauga nî ūhâ, nēs ge xūna ǃgâi ǀgaub ǃnâ ǃhoaǂuisa nî supu kai.—Rom. 12:20, 21.
11 Jakob ge nēsa ge ǁnâuǃā. ǁÎb ǀgē ǃgâsab Esaub ge kaise ge ǁaixa hâ i Jakob ge Esaub nî ǃgam bi ǃkhaisa ǃao tsî a ǃgoebē o. ǂGui kuriga ǃkharu hâseb ge Jakoba ge oaǀkhī. Esaub ge 400 khoegu ǀkha ǁîba sī ge ǀhao-ū. Jakob ge Jehovaba ǃoa ge ǀgore huib ǃaroma. Tsî Esauba xamanina ǀkhaeb ase ge sîba. Nē ǀkhaeb ge ǁî-i ǂâibasensa ge dīǀoaǀoa. ǀHao kha ge o, ob ge Esaub ǂgaoba ge tsau tsîb ge Jakoba ǃgoeǃoara tsî ge ǁnam bi.—Gen. 27:41-44; 32:6, 11, 13-15; 33:4, 10.
(Genesis 33:20) Tsîb ge ǁnāpa altarsa ge ǂnubikhâi tsî ǁîba Israeli Elob ge a Elo ti ge ǂgai.
it-1-E 980
Israeli Elob ge a Elo
ǁÎb ǃkhams hînab ge Jehovab ǀhomǃgāb ǀkha Penuels tawa ūhâ is xa ǃaroma-e hâseb ge Jakoba Israel di hâ ǀonsa ge mā-e. Tsî ǁîb ǃgâsab Esaub ǀkhab ge ǀhao toa o, ob ge Sukots ǃnâ gere hâ tsî ǁnāpaxū Sexems ǃnâ. Nēpab ge Hamori ǀgôagu xa ǃhū-e ge mā-e tsî ǁîb tentsa ge ǂnaumâi. (Gen. 32:24-30; 33:1-4, 17-19) ‘ǁNāpab ge altarsa ge ǂnubikhâi tsî ǁîba Israeli Elob ge a Elo ti ge ǂgai.’ (Gen. 33:20) ǁÎb ǀasa ǀons tsî altars di ǀons tsîna mûǂans ǃnâ-ūb ge Jakoba ge ǁgau nē ǀonsab ūǃoa tsî ra ǃgôaǃgâ ǃkhaisa tsî Elob ge ǁîba ǂōrisase mîmâisa ǃhūb ǃnâ a ǂgâ-ū ǃkhais tsîna. Nē ǁgâiǂuisens ge ǀgui ǃnās ǀguisa Xoadi ǃnâ ra hō-e.
Elobmîs khomai ǃâs
(Genesis 32:1-21) Tsî Jakob ge ǁkhāti daob âb ai ge ǃgû; tsî ǀhomǃgāgu Elob digu ge ǁîba ge ǃoa. 2 Ob ge Jakoba ǁîgab ra mû hîa ge mî: Nēs ge ǂnubis Elob disa. Ob ge ǁnā ǃās di ǀonsa Mahanaim ti ge ǂgai. 3 Tsî Jakob ge ais âb aiǃâ sîsabega ge sî Esaub, ǃgâsab âb ǁga Seirǃhūb Edommi ǃhūǃâba ǃoa. 4 Tsîb ge ǁîga mîmā tsî ge mî: Nēti go nî mî ti ǀhonkhoeb Esaub ǃoa: Nētib ra mî Jakob sa ǃgāba: Tita ge ǃhaokhoese ge ǁan hâ i Labanni tawa, tsî ta ge nēsis kōse ǁnāpa hâ; 5 tsî ta ge goman, eseln, gūn, ǃgāgu tsî ǃgādi tsîna ūhâ; tsî ta ge go sî, ti ǀhonkhoetsa ta nî mîba kaise, î ta ga sa mûǁae ǀkhomma hō ti. 6 O gu ge sîsabega Jakob tawa ǁkhawa hā tsî ge mî: Sige ge sa ǃgâsab Esaub kōse go sī; tsîb ra ǁkhāti satsa ǃgûǃoa tsî hakakaidisi aogu ǁîb ǀkha. 7 ǃNubaib ge Jakoba kaise ge ǃao tsîb ge ǃaoxaǃnâ; ob ge ǁaes ǁîb ǀkha hâs tsî gūn, goman tsî ǃnain tsîna ge ǀgora ǀgam ǂnubira ǃnâ, 8 nētib ra mî xui-ao: Esaub ga ǀgui ǂnubis ai hā tsî ga ǂnau sio, os ge ǃgau ga ǂnubisa nîra ûi. 9 ǃAruǀîb ge Jakoba ge mî: O Elots ti îb Abrahammi dits, Elots ti îb Isaki dits, sats ǃKhūts hîa ti ǃoa ge mîtse: ǁKhawa oa sa ǃhūba ǃoa, tsî sa ǀaokhoesisa ǃoa, o ta ge tita sats ǀkha nîra hâ, tsî ta ge satsa nîra ǃgâidī. 10 Tita ge nē ǃgâidīgu hoagu tsî nē îǂhôasib hîats ge ti tawa dīb hoaba a ǂkhariba. Nē ǀkharus tis ǀguis ǀkha ta ge nē Jordanna ge ǃgâu, tsî nēsi ta ge go ǀgam ǂnubi kai xui-ao. 11 Tsubuǂui te re ti ǃgâsab di ǃomǁaeba xu, Esaub di ǃomǁaeba xu, ǁîba ta ra ǃao xuige; îb tā ǀnîsi hā ǂnau te ǁgûs ǀgôagu ǀkha! 12 Sats kom ge mîo: Tita ge ǂanǂansase sa tawa nîra ǃgâidī, tsî tita ge sa suriba nîra mâi hurib amǃgâb di ǁkhaeb hîa ǂguib ǃaroma ǃgôahe ǁoab axase. 13 Tsîb ge ǁnāpa ǁnā tsuxub ǁkhāb ǃnâ ge ǁomǂkhai; tsîb ge ǃomǁaeb ūhân xa Esaub, ǃgâsab âba ǀkhaexū-e ge ūba: 14 ǀGamkaidisi piridi tsî ǀgamdisi piriga, ǀgamkaidisi gūdi tsî ǀgamdisi ǂkharagūga, 15 ǃnonadisi daisi ra ǃnaide ǂkhamn âdi ǀkha, hakadisi gomadi tsî disi ǁgōga, ǀgamdisi eseldi tsî disi ǂkham eselgu tsîna. 16 Tsîb ge ǁîna ǃgāgu âb di ǃomǁae ge mā, mâ gūn ǃâs hoasa ǀguri; tsîb ge ǃgāgu âb ǃoa ge mî: ǃGû ǃganu go re ti ais aiǃâ, î go ǃkhai-e hâ kai re nē gūn tsî nau gūn hoan ǁaegu! 17 Tsîb ge ǂguroba mîmā tsî ge mî: Esaub ti ǃgâsab ga satsa ǃoa tsîb ga dî tsio: Tarib dits a? Tsî mâǀîts ra ǃgû? Tsî tarib dina nēn, sa ais aiǃâ hâna? ti a mîo, 18 ots ge nî mî: Nēn ge ǃnarexūn sa ǃgāb Jakob din, ti ǀhonkhoeb Esaub ǃoa go sîhena; tsî mû, ǁîb ǂûb ge ǁkhāti sige khaoǃgâ hâ. 19 Tsîb ge ǁkhāti ǀgamǁîba ge mîmā, tsî ǁkhāti ǃnonaǁîba, tsî ǁîna gūde ra saon hoana, mî raǃâ: Nē mîs ǁkhāsa du ge nî ǃhoa Esaub ǃoa, ǁîba du ga hō o. 20 Tsî du ge ǁkhāti nî mî: Mû, sa ǃgāb Jakob ge sida khaoǃgâ hâ! Nētib ra mî amaga: Tita ge ǁîb di aisa nē ǃnarexūn, ti ais aiǃâ ǃgûgaun ǀkha nî ǂkhî kai; tsî ǁnās khaoǃgâ ta ge ais âba nî mû; ǀnîsib ge ti aisa nî ǃkhōǃoa. 21 Nētin ge ǀkhaexūna ǁîb di ais aiǃâ ge ǃgû-ūhe; xaweb ge ǁîba ǁnā tsuxub ǁkhāba ǁgoeǃkhais ai ge ǁomǂkhai.
APRILI 27–MEIB 3
ELOBMÎSA XU HÂ ǂÛǂÛSA MÎDI | GENESIS 34-35
“ǃGâi tama ǀhōsan ǀkha hâs di ǀamǂoadi”
(Genesis 34:1) Tsî Dinas, Leas ôas, Jakobas ge ǁorabas ge ge ǃgûǂoa, ǁnā ǃhūb ǀgôades nî kōse.
w97-E 2/1 30 ¶4
Sexemmi—ǃHomgu ǁaegub ǃnâ hâ ǃās
ǂKhamkhoegu ǃās diga mati nē ǂkhamkhoes hîna ǁîgu ǃāsa ǀguri mâǁaeb hoaba ra sarisa gere mû? “ǃHūb di gaosab ge mû si ob ge ū si tsî ǁîs ǀkha ǁgoe tsî ge ǀgaiǁgūǀkhā si.” Dinasa tae-i ǃaroma ǁkhōǁkhōsasib ǃnâ ge hâ i Kanaanǁî ǂkhamkhoedi ǀkhas gere hâ o? ǁÎs ǀkha ǀguitikō kuriga ūhâ ǀgôadi ǀkhas gere hâ ǂgao amagasa? ǁÎs ǀnî ǃgâsagu khamis ge ǃgari danaxa ī? Genesis ǃnâ hâ ǃnaeǃkhaisa khomai tsî Jakob tsî Leas tsîn gere hōǃâ tsûb tsî taob tsîn xa ǂâi re ǁîra ǀgôas ge Sexemmi ǀgôade gere sari ǃkhais xa ǃaroma-e hâse.—Gen. 34:1-31; 49:5-7; Mû re The Watchtower, Junib 15, 1985ǁî kurib, 31ǁî ǂhaweb.
(Genesis 34:2) Tsî Sexemmi, Hamori ôab, Hiviǁîb, ǃhūb di gaosab ge mû si ob ge ū si tsî ǁîs ǀkha ǁgoe tsî ge ǀgaiǁgūǀkhā si.
lvs-E 124 ¶14
‘ǀAiba xu ǃgoe re.’
14 Sexemmi ge ǁîba ge ǃgâiba i xū-e ge dī. Dinas xab ge ǃgâibahe i amagab ge ǁîsa “ū” tsî ge ‘ǀgaiǃkhō.’ (Khomai re Genesis 34:1-4.) ǁÎb ge dī xū-i ge kai tsûǃgâba Dinas tsî ǁîs omaris hoas ai ge hā-ū.—Gen. 34:7, 25-31; Gal. 6:7, 8.
(Genesis 34:7) O gu ge Jakob ôaga ǁnâu gu geo ǃgaroba xu ge hā; tsî gu ge nē khoega tsûaǂgao tsî kaise ge ǁaixa, Israeli ǃnâb ge tsūdī-e go dī amaga, Jakob ôasa ra ǁom-ūse, ǃkhai-i hîa ga ǁnāti dīhe hâ ga tide-e.
(Genesis 34:25) Tsî i ge ǃnonaǁî tsēs ai ge ī, tsûb ǃnâ gu hâ hîa kha ge Jakob ôakha, Simeonni tsî Levib tsîkha, Dinas ǃgâkha, mâb hoab âkha gôab âba ū tsî ǁkhoaǂgaoxase ǃās ǃnâ sī tsî aoregu hoaga ge ǃgam.
w09-E 9/1 21 ¶1-2
ǁAixa kaihe du ga o
ǁAegu ai i ge ǁnān hîna ra ǀhaona, dī-en ge xū-i di ǁaib ǃgao nēsa ra dī. Aiǁgauses ge Elobmîsa ra mîba da Jakob di ǀgôagu ge ǁnâu o Sexemmi ge ǁîgu ǃgâsa ge ǀgaiǃkhō di o gu ge “tsûaǂgao tsî kaise ge ǁaixa.” (Gen. 34:1-7) ǁÎgu ǃgâs ge tsūdī-e amaga gu ge ǀgam ǀgôakha Jakob dikha Sexemmi tsî ǁîb omaris tsîna ge ǁnāǂam. Gāxaǃnâsiba ra sîsen-ūse kha ge Simeoni tsî Levib tsîkha Kanaani ǃās ǃnâ ge ǂgâ tsî hoa aore khoega ge ǃgam, Sexemmi tsîna ǃkhōǂgā hâse.—Gen. 34:13-27.
Nēsa ǂkhîba ǁîn ǁaegu ge hā-ū? Jakob ge ǁnâu o ǁîb ǀgôakha ge tae-e a dīsa ob ge ǁîkha ge ǀâxare mî rase: “Sakho ge tita go gongonǃnâ, tita ra ǀō kaise nē ǃhūb ǃnâ ǁan hân ǃnâ, Kanaanǁîn ǃnâ tsî Perisiǁîn ǃnâ; tsî tita ge ǀoro ǁaes â-i khoeta; ǁîn ga ti ǃoagu ǀhûo, on ge tita nîra ǂnau, o ta ge nîra hîkākāhe tita tsî ti ommi tsîna.” (Gen. 34:30) Nēs ge hoa xūna ge ǁgao kai, Jakob omaris ge nēsi ǁîn ǁanǁare-aon xa nî ǁnāǂamhe. Nēsa ǁkhaes ǃgaob ge Eloba Jakoba ge mîmā îb ǁîb omarisa Betelsa ǃoa doe ū.—Gen. 35:1, 5.
Gagasi xūna ǀō-aisase ôaǃnâs
(Genesis 35:8) Tsî Deboras, Rebekas di ǃhai-aos, ge ǁnāpa ge ǁō, os ge Bet-Els ǃnaga ǁnā ǁganahais, ǀons âs ǃGaes di ǁganas, ti ra ǂgaihes ǃgao ge ǁkhōhe.
it-1-E 600 ¶4
Deboras
1. Rebekas kōǃgâ-aos. Rebekas ge ǁîs ǁgûb Betueli omsa xu doe tsî Palestinesa ǃoa a doe tsî Isaka sī a ǃgame o, os ge Deborasa ǁîs ǀkha ge hâ i. (Gen. 24:59) Kurigas Isaki oms ǃnâ ǃoab hâ hînas ge Deborasa Jakobi omsa ǃoa ge ī nēs ge ǀnîsi Rebekas ge ǁōs khaoǃgâ ge ī. 125 Kurigas Rebekasa Isaki ǀkha ǃgame hâ hînas ge Deborasa ge ǁō tsî kai hais ǃnāga Betels tawa ge ǁkhō-e. Nē hais ge mā-e ǀons ge ra ǁgau Jakob tsî ǁîb omaris tsîn ge ǁîsa matikōse ǀnam i ǃkhaisa.—Gen. 35:8.
(Genesis 35:22-26) Tsî i ge ge ī Israeli ǁnā ǃhūb ǃnâ ǁan hâ hîab ge Rubenna ǃgûsī tsî Bilhas, ǁgûb di ǀgamitaras ǀkha ge ǁgoe; tsî Israeli ge ǁîsa ge ǁnâu. Tsî Jakob ôagu ge disiǀgamǀa ge i: 23 Leas ôagu ge Rubenni, Jakob di ǂguroǃnaesabeb, tsî Simeonni tsî Levib tsî Judab tsî Isaskari tsî Sebulonni tsîga ge i. 24 Tsî Raxels ôakha ge Joseb tsî Benjaminni tsîkha ge i. 25 Tsî Bilhas, Raxels ǃgās di ôakha ge Danni tsî Naftalib tsîkha ge i. 26 Tsî Silpas, Leas ǃgās di ôakha ge Gadi tsî Aseri tsîkha ge i. Nēgu ge Jakob ôaga Padan-Aramǃhūǃâs ǃnâb ge ǁorabahega.
w17.12 14
Khomai-aon dîdi
ǃKharu ge ǁaeb Israeli ǃnâ i ge Mesiab di suriba ǂguroǃnaesabesisa xu gere hā?
ǀNî ǁaegu ai da ge nēs a ama ǃkhaisa gere ǃkhō-am. Nēs ge Hebreǁîn 12:16 tawa da ra khomai mîdi ǀkha a ǀguiǃnâxa. Nē ǁaraǃās ge ra mî Esaub ge “xorexūsa” xūna ǃgôaǃgâsiba ge ǁgau tama hâ i tsî ‘ǀgui ǂû-ai-i ǃaroma ǁîb di ǂguroǃnaesisa ge ǁamaxū.’ Nēs ge ra ǁgau Jakob ge ǂguroǃnaesisab ge ǁama o, o ǁîb tsîna ge Mesiab di surib di ǃâ kai.—Mat. 1:2, 16; Luk. 3:23, 34.
Xawe Elobmîs ǃnaeǃkhaidi ge ra ǁgau khoeb ge ǂguroǃnaesisa ǂhâ tama hâ Mesiab di surib ǃâ kais ǃaroma. Sao ra xūn xa ǂâi re:
Jakob di ǀgôagu xa i ge ǁîb di ǂguro ǀgôaba Leasa xu ge hâ i, ǁnāb ge Rubenna. Tsîb ge ega ǁîb ǀnamǀnamsa taras Raxels ǀkha Joseba ge hō. Rubenni ge tsūdī o, o i ge ǂguroǃnaesisa Joseba ge mā-e. (Gen. 29:31-35; 30:22-25; 35:22-26; 49:22-26; 1Kro. 5:1, 2) Nēs ǂam-ai i ge Mesiab suriba Rubenni tamas ka io Joseba xu ge hâ tama hâ i. Nēs ge Judaba xu ge hā, Jakob hakaǁî ǀgôab hînab ge Leas ǀkha hōba.—Gen. 49:10.
Elobmîs khomai ǃâs
(Genesis 34:1-19) Tsî Dinas, Leas ôas, Jakobas ge ǁorabas ge ge ǃgûǂoa, ǁnā ǃhūb ǀgôades nî kōse. 2 Tsî Sexemmi, Hamori ôab, Hiviǁîb, ǃhūb di gaosab ge mû si ob ge ū si tsî ǁîs ǀkha ǁgoe tsî ge ǀgaiǁgūǀkhā si. 3 Tsî ǀoms âb ge Dinas, Jakob ôasa ge ǂae-ai; tsîb ge ǀgôasa ǁâ tsî ǀgôas di ǂgaob ǃoa ge ǃhoa. 4 Ob ge Sexemma ǁkhāti Hamori, ǁgûb ǀkha ǃhoa tsî: Nē ǀgôasa tarase ǂganba te re! ti ge mî. 5 Tsî Jakob ge ǁnâu ǁîb ôas Dinasab go ǀuriǀuri ǃkhaisa ǃnubai gu ge ǁîb di ôaga ǀgoan ǀkha ǃgarob ai ge hâ i; ob ge Jakoba ge ǃnō, ǁîgu ge hās kōse. 6 Ob ge Hamori, Sexemmi îba, Jakob ǃoa ge ǂoa, ǁîb ǀkhab nî ǃhoase. 7 O gu ge Jakob ôaga ǁnâu gu geo ǃgaroba xu ge hā; tsî gu ge nē khoega tsûaǂgao tsî kaise ge ǁaixa, Israeli ǃnâb ge tsūdī-e go dī amaga, Jakob ôasa ra ǁom-ūse, ǃkhai-i hîa ga ǁnāti dīhe hâ ga tide-e. 8 ǃNubaib ge Hamora ǁîgu ǀkha ǃhoa tsî ge mî: Ti ôab Sexemmi di ǀoms ge sadu ôasa ǁâ hâ, mā si re ǁîba tarase, 9 î du ǀuigu re sida ǀkha; sadu di ôade sida mā re î du sida ôade sado ūbasen re; 10 î du sida ǀkha ǁan re; ǃhūb ge sadu ais aiǃâ hâ, ǁîb ǃnâ ǁan, î du ǁamagusa dī re, î du ǁîb ǃnâ xūna ūhâ re. 11 Tsîb ge Sexemma ǁîs di îb tsî ǁîs di ǃgâsagu ǃoa ge mî: A ta ǀkhomma hō re sago mûǁae; tsî sago ga mîba te xū-e ta ge tita nî mā. 12 Kaise ǁguiǂam te re khāǁuib tsî ǀkhaexūb tsîra; î du ǁnâi ǀgôasa tarase mā te re! 13 O gu ge Jakob ôaga Sexemmi tsî Hamori ǁgûb âba gāxaǃnâsise ǃeream tsî ge ǃhoa, Dinas ǁîgu di ǃgâsasab go ǀuriǀuri amaga. 14 Tsî gu ge ǁîgu ǃoa ge mî: Sige a dī ǁoa ǃkhais ge nēsa, sige ǃgâsasa ge nî aikhōb ǀkha hâ ao-e māsa; ǁîs kom ga taoǃkhaise ība geo. 15 Xawe nēs ǃnâ ge nî sadu ǀkha ǀgui, sadu ga sida ǀkha ǀguiti-īo, sadu ǃnâ hâ aore-i hoa-i ga ǃgaohe ti; 16 ǃnubai da ge sida ôade sado nî mā, o da ge sadu ôade sida nî ūbasen, o da ge sadu ǀkha nî ǁan, o da ge ǀgui ǁaese nî ī. 17 Xawe sida ǀkha du ga ǀgui tama io ǃgaokaisens xa, o da ge sida ôade ū tsî nî doebē. 18 Tsî nē mîdi âgu ge ǃgâi ge i Hamori mûǁae tsî Sexemmi, Hamori ôab mûǁae. 19 Ob ge ǂkhamkhoeba ǀhawe tama nē ǃkhaisa dīsa, Jakob ôasab ǁkhore hâ amaga; tsîb ge ǁgûb ommi ǃnâ hân hoan ǃgâ-ai ge ǃgôahe.