ǁNaeǁgaudi Sida Xristeǁî ûib tsî aoǁnâ sîsenni sîsen ǂkhanib
MEIB 4-10
ELOBMÎSA XU HÂ ǂÛǂÛSA MÎDI | GENESIS 36-37
“Joseb ge gere surihe”
(Genesis 37:3, 4) Tsî Israeli ge Joseba ge ǀnam i, ǁîb ôagu hoagu ǃgâ-ai, kairasib âb di ôab ge i amaga; ob ge anxa sara-e ge dība bi. 4 Tsî ǃgâsagu âb ge mûo ǁgûb ǁîba ǁîb di ǃgâsagu hoagu ǂamai ǀnam hâ ǃkhaisa, o gu ge ge ǁkhan bi, tsî gu ge khoexasise ǃhoa-ū bi ǁoa ge i.
w14-E 8/1 12-13
“Toxoba nē ǁhaposa ǃgâ re”
Elobmîs ge ra ǃeream: “ǃGâsagu âb ge mûo ǁgûb ǁîba ǁîb di ǃgâsagu hoagu ǂamai ǀnam hâ ǃkhaisa, o gu ge ge ǁkhan bi, tsî gu ge khoexasise ǃhoa-ū bi ǁoa ge i.” (Gen. 37:4) ǁÎgu surib ge ge ǁnâuǃāxa i xawe i ge Joseb ǃgâsaga nē ǁgai ǀgaub ǃnâ tanisensa ge ǂhâbasa tama hâ i. (ǂKhm. 14:30; 27:4) Sadu tsîna ǀnî ǁaegu ai ra ǁaixa khoe-i ga sadu ra ǂgao ǃharosa māhe o? Joseb ǃgâsagu xa ǂâi re. ǁÎgu surib ge ge dī îgu ǁore tsî ega nēs xa ǃhausen. ǁÎgu aiǁgaus ge Xristeǁîna ra ǂâiǂâiǃnâ ‘ǃgâiaǂgao ran ǀkha ǃgâiaǂgaos’ kaise a gā-ai ǃkhaisa.—Rom. 12:15.
Joseb ge ǁîb ǃgâsagu di suriba ge hōǃâ. ǁÎb îsa sarabab ge sâu ǁîb ǃgâsagu ge a ǀgū o? ǁÎb ge ǀnîsi gere ǃâitsâ-e nēsa dīsa. ǂÂis ǃnâ ūhâ re Jakob ge gere ǂhâba nē sarab ǃgâiǃgâibasens tsî ǀnammi ǁgauǁgaus ase nî īsa. Joseb ge ǁîb ǁgûb di ǂgomǃgâsiba gere ūhâ ǀgara ǂgao, ǁnās ǀkhab ge hoaǁae saraba gere ana. ǁÎb aiǁgaus ge sada di huib ase i. Sida ǀhomsi ǁGûb ge tātsēs tsîna ǀgora-e ūhâ tama hâ, ǁîb ge mâ ǂgomǂgomsa ǃoaba-ao-i hoa-e ra ǃgôaǃgâ. ǁÎb ǂgaoǀkhās ge hoa khoen nē eloxoresa ǃhūbaiba xu nî mâǂoasa. Joseb di ǀō-aisa sarab khami i ge Xristeǁîn tanisen ǀgauba ǁîna nē ǃhūbaiba xu ra mâǂoa kai. Nē ǀgaub ge ǀnî ǁaeb ai surib tsî ǃhuigus tsîna ra omkhâi. (1Pet. 4:4) Xristeǁîna Elob ǃoaba-aon ase ǁîn īsiba nî sâu? Hî-î, Joseb tsîn ge ǁîb saraba ge sâu tama hâ i.—Luk. 11:33.
(Genesis 37:5-9) ǁKhātib ge Joseba ǁhapo-e ge ǁhapo, ǁî-eb ge ǃgâsagu âba ge ǃhoaba; ǁnā-amaga gu ge ǁnās ǃgâ-ai ge ǁkhan bi. 6 Tsîb ge ǁîgu ǃoa ge mî: ǁNâu go re nē ǁhapo-i hîa ta go ǁhapo-e. 7 Tsî mû, sage ge ǃgaeǀkhādade ge ǃgaeǀkhā ǃhanab ǁaegub ǃnâ; tsî mû, ti ǃgaeǀkhādas ge khâi tsî khâi hâse ǁkhāti mâhâhâ ge hâ i; tsî mû sago ǃgaeǀkhādadi ge hāǂnamipe si tsî ti ǃgaeǀkhādas aiǃâ ge ǃgamǃgâ. 8 O gu ge ǃgâsagu âba ǁîb ǃoa ge mî: Hoaragasets kha ǁnâi satsa sige nî gaoǂam? Hoaragasets kha ǁnâi satsa sige nî gaoba? Nēti gu ge ǃaruǀîǀgui ge ǁkhan bi ǁhapodi âb tsî mîdi âb ǃaroma. 9 Tsîb ge ganupe ǀnî ǁhapo-e ge ǁhapo, tsîb ge ǁî-e ǃgâsagu âba ǃhoaba tsî ge mî: Kō, tita ge ǀnî ǁhapo-e go ǁhapo, tsî mû, sores tsî ǁkhâb tsî disiǀguiǀa ǀgamirodi tsîn ge ti aiǃâ ge ǃgamǃgâ.
(Genesis 37:11) Tsî ǃgâsagu âb ge ǁîba ge suri; xawe ǁgûb ge nē ǃnaeǃkhaisa ge sâu.
w14-E 8/1 13 ¶2-4
“Toxoba nē ǁhaposa ǃgâ re”
Nē ǁhapodi ge Jehova Eloba xu ra hā. Nē ǁhapodi ge ge kēbo i tsîb ge Eloba gere ǂâibasen îb Joseba nē haisi-amsa mā ǃkharu. Joseb ge ǀnî hâ mîdi ǃnâ nau kēbo-aogu ge dī khami nî dīs ge ge ī, Elob haisi-amdi tsî ǀgoraǃgâs tsîna gu gere mā ǃkharu o.
Joseb ge ǁîb ǃgâsaga ǃoa ge mî: “ǁNâu go re nē ǁhapo-i hîa ta go ǁhapo-e.” ǁÎb ǃgâsagu ge nē ǁhaposa ge ǁnâuǃā tsî xū-i xare-i xa ge ǃgâibahe tama hâ i. ǁÎgu ge ge ǃeream: “Hoaragasets kha ǁnâi satsa sige nî gaoǂam? Hoaragasets kha ǁnâi satsa sige nî gaoba?” ǃNaeǃkhais ge ra ǀaro: “Nēti gu ge ǃaruǀîǀgui ge ǁkhan bi ǁhapodi âb tsî mîdi âb ǃaroma.” Joseb ge ǀgamǁî kēbosa ǁîb ǁgûb tsî ǃgâsagu tsîna a mîba o, o gu ge ǃgâi tamase ge tanisen. Khomai da ge ra: ‘Ob ge ǁgûba ǀau tsî ge mîǀî bi: Mâ ǁhapo-ai-e kha nē-i, sats go ǁhapo-e? Sida hoada, tita tsî saos tsî sa ǃgâsagu tsîda kha ǁnâi hā tsî nî sa aiǃâ ǃgamǃgâ?’ Xaweb ge Joseba nēs xa gere ǂâiǃgâ. Jehovaba ǀnîsi Joseb ǀkha gere ǃhoa?—Gen. 37:6, 8, 10, 11.
Joseb ge ge ǂguro Elob ǃoaba-ao tama hâ i hîna ge a ǂgan-eba îb kēbode mîǃgāǃgā hîna saoǃgonde nî ǃaromade. Jesub ge ge kai i nē sîsenna dīs ǃnâ tsî ǁîb saosabena ge mîba: “Titan ga ǃgôaǃgono, on kom sago ona nî ǃgôaǃgono.” (Jhn. 15:20) Xristeǁîn hîna a ǂkham-an tamas ka io kairan hoan ge ǂkham Joseb di ǂgoms tsî ǁkhoaǂgaosib tsîna xu a ǁkhāǁkhāsen ǁkhā.
(Genesis 37:23, 24) Tsî i ge ge ī, Joseb ge ǃgâsagu âb tawa sīo, o gu ge ǁîba sarab âba ge ǂgaeǂuiǀkhā, ǁnā anxa sarab, hîab anasen hâba. 24 O gu ge ū tsî tsaus ǃnâ ge aoǂgā bi; tsî tsaus ge ǀkhaiǃnâ ge i.
(Genesis 37:28) Tsî Midianǁî ǁama-aogu ge ǃnarao, o gu ge Joseba tsausa xu ǂgaeǂui tsî ūkhâi tsî ǁîba Ismaelǁîgu tawa ge ǁamaxū, ǀgamdisi ǀhaiǀurimarin ama; ǁîgu ge ǁîba Egipteb ǃoa ge ūsī.
Gagasi xūna ǀō-aisase ôaǃnâs
(Genesis 36:1) Nēdi ge ǃnaeǃkhaidi Esaub, ǁkhāti a Edommi, dide.
it-1-E 678
Edommi
(Edommi) [ǀapa], Edomǁîn (Edomǁîn)
Edommi ge ge Esaub, Jakob di ǀgēb di ǀgamǁî ǀon ī. (Gen. 36:1) Nē ǀonsab ge ǁîb ǂguroǃnaesisab ge ǀapa ǂû-i ǃgao a ǁamaxū amaga ge hō. (Gen. 25:30-34) Esaub ge ǃnae-eb ge o kaise ge ǀapa-i (Gen. 25:25), ǁîb tsî ǁîb surib tsîn ge ega a hō ǃhūb tsîn ge ge ǀapa i.
(Genesis 37:29-32) Tsî Rubenni ge tsaus tawa oasīo, mû, ob ge Joseba tsaus ǃnâ ǀkhai ge i; ǃnubaib ge saran âba ge ǀkhau. 30 Tsîb ge ǃgâsagu âb tawa ǁkhawa hā tsî ge mî: ǀGôab ge a ǀkhai; o tita mâǀî ta ǁnâi nî ǃgû? 31 O gu ge Joseb saraba ū tsî piri-e ǂā tsî saraba ǀaob ǃnâ ge ǂgobe. 32 Tsî gu ge anxa saraba ū tsî ǁgûb ǃoa ge ūsī kai bi tsî ge mî: “ǁÎba ge ge go hō; mûǂan re, iseb ǁîba sa ôab di sara, iseb ǁî tama ǃkhaisa.”
it-1-E 561-562
Ūǃoahes
ǃÛi-aob ge ǃkharu ge ǁaeb ǃnâ ǁîb gūnab nî kōǃgâ ǃkhaisa gere mîǁgui o, ob ge gere ǁgau nē xamani-eb ǁîb di ase ra ūǃoa ǃkhaisa. ǁÎb ge khoena ǂgomǃgâsiba gere mā, nē xamani-eb nî ǂûmā tsî i ǃnari-e tidesa. Xawe i ge ǁî-e ǃereamsa hoase ūhâ tama hâ, nē xamani-i ga tsûtsûhe o, o i nau khoe-e noxoba nē ǃereamsa nî tani amaga. Nē ǃereamsa i ga ǀhonkhoe-e mā-oa ǂgao o, o i ge nē xamani-i go tsûtsû-e ǀgaus di ǁgauǁgau-e nî mā. ǀHonkhoeb ge ôaǃnâde dī tsî ǀhapiokaisens di ǃnuriba ǃûi-ao-i ǃgao ra mā.
Nēs ge omaris di xūn ǃnâs tsîna a sîsen-ūhe ǁkhā, aiǁgause kai ǃgâsab ge ǁîb ǂkham ǃgâsana kōǃgâs di ǁgaumâisa ūhâ. ǁNās ǀkha da ge a ǁnâuǃā ǁkhā Rubenni Joseb di kai ǃgâsab ge mati gere tsâsa, ǁîb nau ǃgâsagu ge Joseba ǃgams xa gere ǃhoa o, Genesis 37:18-30 tawa da ra khomai khami. “ǁÎb ge ge mî: ‘A ge ǁîba tā ǃgam.’ . . . ‘Tā ǀaoǂnâxū. . . . î go ǃomma tā ǁguiǀkhā bi.’ ǁÎgu ǃomǁaeba xub nî ore bise, ǁgûbab nî ǁkhawa ūsība biga.” Tsî Rubenni ge mû o, Joseb ge a ǀkhai di, ob ge gere ǂâiǂhansen tsî “saran âba ge ǀkhau” tsî ge mî: “ǀGôab ge a ǀkhai; o tita mâǀî ta ǁnâi nî ǃgû?” ǁÎb ge ge ǂan i Joseb di ûib ǃgaob nî ǃereamsa. Nē ǃereamsa ū ǂgao tama i tsî gu ge ǁîb ǃgâsaga Joseb ge ǁaixa hâ ǀguru-i xa go hapu-e di ge mî. Nēsa gu ge Joseb saraba piri-i ǀaob ǃnâ ǂgās ǃnâ-ū ge dī. ǁÎgu ge saraba Jakoba ǃoa ge ī-ū tsîb ge ǁîba nēs ǃnâ-ū Rubenna ǀhapiose ge mû, nē sarab ǃoagub ge Joseba a ǃgamhe amaga.—Gen. 37:31-33.
Elobmîs khomai ǃâs
(Genesis 36:1-19) Nēdi ge ǃnaeǃkhaidi Esaub, ǁkhāti a Edommi, dide. 2 Esaub ge ǁîb di tarara ge ū, Kanaanǁîna xu: Adas, Elonni, Hetiǁîb di ôas tsî Oholibamas, Anab di ôas, Sibeonni, Hiviǁîb ôab di ôas tsîra; 3 tsî Basemats, Ismaeli ôas, Nebajoti ǃgâsas ona. 4 Tsî Adas ge Esauba Elifaba ge ǁoraba, tsî Basemats ge Reguela ge ǁoraba bi. 5 Tsî Oholibamas ge Jeub, Jalammi tsî Koraxi tsîga ge ǁora. Nēgu ge Esaub ôaga, Kanaanǃhūb ǃnâb ge ǁorabahega. 6 Tsî Esaub ge ǁîb di tarara tsî ǁîb di ôagu tsî ǁîb di ôadi tsî ommi âb hoab di ǀomdi tsî ǀgoan âb tsî ǁîb di goman hoan tsî ūb hâ xūn, Kanaanni ǃnâb ge hōbasen hâ in hoana ū tsî ǀkhara ǃhūb ǃoa ge doe, Jakob, ǃgâsab âb di aisa xu. 7 ǁÎkha xūn di ǂguib ge ǁanǀhaosa ǃnā hâ i xui-ao; tsî ǃhūb ǃhaokhoesis âkha dib ge ǁîkha tani ǁoa ge i ǁîkha di ǀgoan ǃaroma. 8 ǁNā-amagab ge Esauba Seirǃhommi ai ge ǁan hâ i. Esaub ge a Edom. 9 Tsî nēdi ge ǃnaeǃkhaidi Esaub Edomǁîn îb dide, Seirǃhommi ai. 10 Nēdi ge ǀondi Esaub ôagu dide: Elifab, Adas Esaub taras di ôab, tsî Regueli, Basemats, Esaub taras di ôab tsîkha. 11 Tsî Elifab ôagu ge Temanni, Omari, Sefob, Gatammi tsî Kenab tsîga ge i. 12 Tsî Timnas ge ǀgamitaras Elifab, Esaub ôab disa ge i, tsîs ge Elifaba Amaleka ge ǁoraba: Nēgu ge Adas Esaub taras di ôaga ge i. 13 Tsî nēgu ge Regueli ôaga: Nahati, Serab, Samab tsî Misab tsîga. Nēgu ge Basemats, Esaub taras di ôaga ge i. 14 Tsî nēgu ge Oholibamas, Anab ôas, Sibeonni ôab di ôas, Esaub taras di ôaga: Tsîs ge Esauba ge ǁoraba Jeub, Jalammi tsî Koraxi tsîga. 15 Nēgu ge gaosagu Esaub ôagu diga: Elifab Esaub ǂguroǃnaesabeb di ôagu: Gaosab Temanni, gaosab Omari, gaosab Sefob, gaosab Kenab, 16 gaosab Koraxi, gaosab Gatammi, gaosab Amaleki tsîga; nēgu ge gaosagu Elifab diga Edomǃhūb ǃnâ; nēgu ge Adas di ôaga. 17 Tsî nēgu ge Regueli, Esaub ôab di ôaga: Gaosab Nahati, gaosab Serab, gaosab Samab, gaosab Misab tsîga; nēgu ge gaosagu Regueli diga Edomǃhūb ǃnâ; nēgu ge Basemats Esaub taras di ôaga. 18 Tsî nēgu ge Oholibamas, Esaub taras di ôaga: Gaosab Jeub, gaosab Jalammi, gaosab Koraxi tsîga. Nēgu ge gaosagu Oholibamas, Anab ôas, Esaub taras diga. 19 Nēgu ge Esaub ôaga, tsî nēgu ge ǁîn di gaosaga. ǁÎb ge a Edom.
MEIB 11-17
ELOBMÎSA XU HÂ ǂÛǂÛSA MÎDI | GENESIS 38–39
“Jehovab ge Joseba ge ǁnāxūǃgâ tama hâ i”
(Genesis 39:1) Tsî Joseb ge Egipteb ǃoa ge ūǁgôahe; tsî Potifari, Faraob ommi dib, ǃkhē-aogu ǂamkhoeb, Egipteǁî aob ge ǁîba Ismaelǁîgu ǁnāpa ge ūǁgôa bi gu di ǃomǁaeba xu ge ǁama.
w14-E 11/1 12 ¶4-5
“Mati ta nē ǁgai xū-e nî dī?”
“Tsî Joseb ge Egipteb ǃoa ge ūǁgôahe; tsî Potifari, Faraob ommi dib, ǃkhē-aogu ǂamkhoeb, Egipteǁî aob ge ǁîba Ismaelǁîgu ǁnāpa ge ūǁgôa bi gu di ǃomǁaeba xu ge ǁama.” (Gen. 39:1) Nē mîdi ǃnâ-ūs ge Elobmîsa ra hui da i da nē ǂkhamkhoeb di taoba mûǂan ǁamaxūheb ge o. ǁÎb ge xū-i ase ǀgui gere mûhe. Joseb xa da ge a ǂâi ǁkhā, ǁîb ǀasa ǀhonkhoeb Egipte ǂamkhoeb ǀkhab ǀhomaxa ǃgangu ǃnâ garu hîna, ǁîb ǀasa hâ ǃkhaisa ǃoa.
Oms. Nēs ge Joseb ge oms ase gere ǂgai xūna xu gere ǀkhara. ǁÎb ge doemā ra omarisa xu ra hā, hîna ge tenti ǃnâ gere hâna tsî ǁîn gūna gere kōǃgâna. Xawe nēpan ge Egipteǁîn hîna ǃkhū hâna, aiǁgause Potifari khami îsa omdi ǃnâ gere hâ. Ôaǃnâ-aogu ge ge mûǂan ǃkharu ge ǁaeb Egipteǁîn kaise îsa omgu hîna ǂgui som haidi tsî ǂû haidi tsîna ūhâdi xa a ǃgâibahesa. ǀNî omdi ge kai ǃhanagu, îsa ǃkhaib sâ ǁkhāts ab, kai mûǂuidaodi tsî ǂgui ǁom-ǃkhaidi, kai ǂû ǃnâ oms tsî ǂgui sîsen-aon omdi tsîna ūhâ.
(Genesis 39:12-14) Os ge sarab âb tawa ǃkhō bi tsî ge mî: ǁGoeǀkhā te re! Xaweb ge sarab âba ǁîs ǃomǁae xū tsî ge ǁhâ tsî ǃaugab ǃoa ge ǃgûǂoa. 13 Tsî i ge ge ī, mûs geo sarab âbab ge ǁîs ǃomǁae ǁnā tsî ǁhâ ǃkhaisa ǃaugaba ǃoa, 14 os ge ommi âs di khoena ǂgai tsî ǁîna ǃoa ge mî: Kō, ǁîb ge nē Hebreǁî khoeba ge ūǂgâxa, sada ǀkhab nî ǃhōkuse; ti tawab ge go hā ti ǀkhab nî ǁgoega, xawe ta ge ǃgari dommi ǀkha go ǂgai.
(Genesis 39:20) Ob ge Joseb ǀhonkhoeba ū bi tsî ǃkhō-omsa ge mā bi, ǁnā ǃkhais gao-aob di ǃkhōsan ǁîs ǃnâ hâs tawa; nētib ge ǁnāpa ǃkhō-oms ǃnâ ge hâ i.
w14-E 11/1 14-15
“Mati ta nē ǁgai xū-e nî dī?”
Egipteǁîn di ǃkhō-oms ge mati ī-i ǀgausa da ge tātsēs tsîna a ǀū. Ôaǃnâ-aogu ge nē ǃkhaidi ge hō hîna ǀoro ǃkhō-omdi khami a kurusade. Joseb ge ega nē ǃkhaisa “ās” di hâ mîs ǀkha ge ǁguiǃā, nēs ge xūo ǃkhais di gere ǂâibasen. (Gen. 40:15) Psalmdi ǂkhanis ǃnâ da ge ra ǁkhāǁkhāsen Joseb ge noxoba gere saoǃgon-e ǃkhaisa: “ǂAira âba haiǃnao-i ǃnâ ge ǂgā, ǀkhāb âba ǀurib ǃnâ.” (Psa. 105:17, 18) Egipteǁîn ge ǀnî ǁaegu ai ǃkhōsis ǃnâ hâ khoen ǁôaga ǃgâbǀkhāb ai ǃgae tsî ǀuriba ǁîn ǃaogu ai gere ǂgā. Joseb ge ǀnîsi kaise gere tsûaǂgao xū-eb dī tama hâ hînab gere mâǃoahe o.
Nēn ge ǁîba ǃkhō-oas ǀguisa ge hî tama hâ i. ǃNaeǃkhais ge ra mî Joseb ge ‘ǃkhō-oms ǃnâ ge hâ’ di. ǂGui kurigab ge ǁnā ǁgai ǃkhais ǃnâ ge hâ. Joseb ge ge ǀū i oreheb nî ǃkhaisa. Tsēdi ge wekhegu tsî ǁkhâgu tsîn ǃnâ a dawa o, ob ge mati gere huisen îb tā ǂkhabuǂâi?
ǃNaeǃkhais ge sao ra ǃereamsa ra mā da: ‘Xawe ǃKhūb ge Joseb ǀkha ge hâ i tsîb ge ǀkhomxaǂgaosib âba ǁîba ge mā.’ (Gen. 39:21) ǃKhō-oms di mirgu, ǀurigu tsî ǃkhōsis tsîn ge Jehovab di ǂgomǂgomsa ǀnamma ǁîb ǃoaba-aona ǃoa īsa ǁkhae tide. (Rom. 8:38, 39) Joseba da ge a mûnanai ǁkhā ǁîb ǂâiǂhansendeb ǁîb ǀhomsi ǁGûb ǀkha ǀgores ǃnâ-ū ra ǀgoragu hîna tsîb ge ǂkhîba ra hōǃâ hîna “Elob ǁkhaeǂgaob hoab diba” xu ra hāba. (2Kor. 1:3, 4; Fil. 4:6, 7) Jehovaba tae-i tsîna Joseba ge dība? Khomai da ge ra ǁîb ge “ǀkhomma ge mā bi ǃkhō-oms di ǂamkhoeb mûǁae.”
(Genesis 39:21-23) Xawe ǃKhūb ge Joseb ǀkha ge hâ i tsîb ge ǀkhomxaǂgaosib âba ǁîb ǃoa unu tsî ǀkhomma ge mā bi ǃkhō-oms di ǂamkhoeb mûǁae. 22 Ob ge ǃkhō-oms di ǂamkhoeba ǃkhōsan ǃkhō-oms ǃnâ hân hoana Joseb ǃomǁae ge mā; tsî ǁîn ra ǁnāpa dī xūn hoan ge ǁîb di ge i. 23 ǂAmkhoeb ǃkhō-oms dib ge ǁîb ǃomǁae hâ xū-i xare-e kōri tama ge i, ǃKhūb ǁîb ǀkha hâ xui-ao; tsî dīb ra xū-i hoa-eb ge ǃKhūba ge amǁnā kai.
w14-E 11/1 15 ¶2
“Mati ta nē ǁgai xū-e nî dī?”
ǃNaeǃkhais ge sao ra ǃereamsa ra mā da: ‘ǃKhūb ge Joseb ǀkha ge hâ i tsîb ge ǀkhomxaǂgaosib âba ǁîba ge mā.’ (Gen. 39:21) ǃKhō-oms di mirgu, ǀurigu tsî ǃkhōsis tsîn ge Jehovab di ǂgomǂgomsa ǀnamma ǁîb ǃoaba-aona ǃoa īsa ǁkhae tide. (Rom. 8:38, 39) Joseba da ge a mûnanai ǁkhā ǁîb ǂâiǂhansendeb ǁîb ǀhomsi ǁGûb ǀkha ǀgores ǃnâ-ū ra ǀgoragu hîna tsîb ge ǂkhîba ra hōǃâ hîna “Elob ǁkhaeǂgaob hoab diba” xu ra hāba. (2Kor. 1:3, 4; Fil. 4:6, 7) Jehovaba tae-i tsîna Joseba ge dība? Khomai da ge ra ǁîb ge “ǀkhomma ge mā bi ǃkhō-oms di ǂamkhoeb mûǁae.”
Gagasi xūna ǀō-aisase ôaǃnâs
(Genesis 38:9, 10) Xawe Onanni ge ǂan ge i, surib nî ǁîb ǂûb di tama i ǃkhaisa, o i ge ge ī, ǁîb ǃgâsab di taras tawab ge ǂgâ ǃnubaib ge ǃhūb ai ge hîǀhuru bi, ǃgâsab âbab suriba mā tidese. 10 Tsî nē ǃkhais hîab ge dīs ge ǃKhūb mûǁae ǂkhaba ge i; ǁnā-amagab ge ǁîba ǁkhāti ge ǃgam.
it-2-E 555
Onanni
(Onanni) [nēs ge “kai ǀgaiba” ūhâ di ra ǂâibasen].
Judab ǀgamǁî ǀgôab Kanaanǁî-aob, Sua ti ǀon hâb di ôas ǃnâb ge hōb. (Gen. 38:2-4; 1Kro. 2:3) Onanni kai ǃgâsab Eri ge tsūdī tsî Jehovab xa ǃgamhe o, ob ge Judaba Onanna ge mîba îb Eri taras Tamarsa ǃgame. ǁÎra ga ǀgôaba hō o, ob ge ǁîba Onanni omaris ǃâ tide tsî Eri di ǀumis ǂguroǃnaesabe i dis ge nî ǁîb di kai xawe i ga ǀumi-ao-e ǀkhai io, ob ge Onanna nē ǀumisa nî ūbasens ge ge ī. Onanni ge Tamars ǀkha a ǁgoe o, ob ge ǁîb di ǃkhoma ǃhūb ai ge ǂgâxū, ǁîsa ǀgôa-e mā tama ī tsi. Nēs ǃnâ-ūb ge Onanna ǁîb aorekhoe sorob ǀkha ǀgui ge ǀhuru tama hâ i xaweb ge ‘ǁîb ǃgâsab taras ǀkhab ge ǁgoe o,’ o ǁîb ǃkhoma ǃhūb ai ge ǂgâxū. Onanni ge ǂanǃgâsib ǀkha ǁîb di ǃkhoma ǃhūb ai ge ǂgâxū, i-i tā Tamars ǃnâ ǀgôa-e kuru. ǁÎb ǁgûbab ge ǁnâuǀnam tama hâ i tsî ǃgameba ǃgôaǃgâsiba ǁgau tama hâ i amagab ge Onanni tsîna ǀgôa-e ge hō tama hâ i tsî Jehovab xa ge ǃgam-e.—Gen. 38:6-10; 46:12; Num. 26:19.
(Genesis 38:15-18) Tsî Judab ge ǁîsa mûo, ob ge ǁîsa ǀai-aose ge ū, ais âs ge ǃgū-aihe hâ i amaga. 16 Ob ge ǁîsǀî daob ǃoa ǃgû tsî ge mî: Hā î ta sa tawa ǂgâ re, ǀūb ge i xui-ao ǁîb di ǀuiǀgôas a ǃkhaisa. Os ge ǁîb ǃoa ge mî: Tare xū-e mā te tsîts nî ti tawa ǂgâxa? 17 Ob ge ge mî: Tita ge piriro-e nî sîba si pirina xu. Os ge ǁîsa: Mâiǁkhae-ets ga mā teo, ǁî-ets nî sîs kōse, ti ge mî. 18 Ob ge ǁîba: Mâ mâiǁkhae-e mā si ta nî-e? ti ge mî. Os ge ǁîsa: Sa ǀkhunuǂnûidas tsî sa tsurib tsî sa ǀkharus hîats ǃomǁae ūhâs tsîna, ti ge mî; tsîb ge ǁîsa ǁîna mā tsî ǁîs tawa ge ǂgâ; tsîs ge ǁîba xu ge ǀgamǀkhā.
w04-E 1/15 30 ¶4-5
Khomai-aon dîdi
Judab ge ge tsūdī Tamarsab ge ǁîb ǀgôab Selaba mā tama io mîmâib ge khami. ǁÎb ge tempeli ǀai-aos a dib ge ǂâi hâ i khoes ǀkhas tsîna ge ǁgoe. Nēs ge Elob ǂâibasensa xu gere ǀkhara ǁîb ra ǂgao amaga î-i khoe-e ǃgame i hâ khoe-i ǀkha ǀgui ǁgoe. (Gen. 2:24) Xawe Judab ge amabes ǃnâ ǀai-aos ǀkha ge ǁgoe tama hâ i. ǁÎb ǀgôab Selab ǃkhaisab ge ge ū tsî ǂhanu-aise ǀgôakha ge hō.
Tamars ge ge ǀai-ao tama hâ i. ǁÎs di ǀgē ǀgôakha ge ǀai ǀgôase ge mûhe tama hâ i. Boab Betlehems dib ge Moabǁî taras Rutsa a ǃgame o, o gu ge Betlehems di ǀhaohâb ǃûi-aoga Tamars ǀgôab Peresi ǃnâ ǃgâiǃgâibasensa ge ūhâ i tsî Boaba ǃoa ge mî: “Îb ommi âtsa Peresi, Tamars ge Judaba ǁorabab di ommi ge ī i xase ī ǁnā surib, ǃKhūb nî nē ǂkham tarasa xu mā tsiba.” (Rut. 4:12) Peresi ge a Jesu Xristub di surib di ǃâ.—Mat. 1:1-3; Luk. 3:23-33.
Elobmîs khomai ǃâs
(Genesis 38:1-19) Tsî i ge ǁnā ǁaeb ǁkhāb ai ge ī, Judab ge ǃgâsagu âba xu doeǂoa tsî sī hâ ǃkhaisa, Adulamǁîb, Hira ti ǀon hâb tawa. 2 Tsî Judab ge ǁnāpa Kanaanǁî-aob, Sua ti ǀon hâb di ôasa ge mû; ob ge ǁîsa ū tsî ǁîs tawa ge ǂgâ. 3 Os ge ǀgamǀkhā tsî ǀgôaba ge ǁora, tsîb ge ǀons âba Er ti ge ǂgai. 4 ǁNās khaoǃgâs ge ǁkhawa ǀgamǀkhā tsî ǀgôaba ge ǁora, tsîs ge ǀons âba Onan ti ge ǂgai. 5 Tsîs ge aiǃâb ǃoa ǀgôaba ge ǁora, tsîs ge ǀons âba Sela ti ge ǂgai; tsî ǁîb ge Kesibs tawa ge hâ i, ǁîbas ge ǁora ǃnubai. 6 Tsî Judab ge Eri, ǁîb di ôab kaiba tara-e ge ūba; tsîs ge ǁîsa Tamar ti ge ǀon hâ i. 7 Xawe Eri Judab di ǂguroǃnaesabeb ge ǂkhaba ge i ǃKhūb mûǁae; ǁnā-amagab ge ǃKhūba ge ǃgam bi. 8 ǃNubaib ge Judaba Onanni ǃoa ge mî: ǂGâ re sa ǃgâsab di taras tawa îts ǃgame si re sa ǃgâsab di amǃnâs ǃnâ, îts sa ǃgâsaba suriba ǂkhaiǂkhaiba. 9 Xawe Onanni ge ǂan ge i, surib nî ǁîb ǂûb di tama i ǃkhaisa, o i ge ge ī, ǁîb ǃgâsab di taras tawab ge ǂgâ ǃnubaib ge ǃhūb ai ge hîǀhuru bi, ǃgâsab âbab suriba mā tidese. 10 Tsî nē ǃkhais hîab ge dīs ge ǃKhūb mûǁae ǂkhaba ge i; ǁnā-amagab ge ǁîba ǁkhāti ge ǃgam. 11 ǃNubaib ge Judaba Tamars ǁîb di ǀuiǀgôasa ǃoa ge mî: ǃOatarase hâ re sa îb di ommi ǃnâ, ti ôab Selab nî kais kōse, nētib ra mî xui-ao: Îb ǀnîsi nēba ǁkhāti tā ǁō ǁîb di ǃgâsakha khami. Os ge Tamarsa ǃgû tsî ǁgûb âs di ommi ǃnâ sī ge hâ. 12 Tsî ǂgui tsēdi khaoǃgâs ge Suab ôas, Judab tarasa ge ǁō; ǁnās khaoǃgâb ge Judaba ǁkhaeǂgaosen tsî ge ǃgûǃapa ǁîb di gūǂkhomaogu ǃoa Timnas tawa, ǁîb tsî Hirab, ǁîb di ǀhōsab Adulamǁîb tsîkha. 13 On ge Tamarsa ǂanǂan tsî ge mî: Mû, sa ǀuiǁgûb ge Timnas ǃoa ra ǃapa, gūna nî ǂkhomse. 14 Os ge ǃoatarasis âs di sarana ǁhûǁnâ tsî ǃgū-aida-i ǀkha ge ǃgū-aisen tsî ge anaǃgūsen tsî Enaims di ǂgâǃkhai-i, Timnas daob ǃnâ hâ-i tawa ge sī ǂnû; mûs ra amaga Selab ge kai xawes ǁîba tarase māhe tama ge i ǃkhaisa. 15 Tsî Judab ge ǁîsa mûo, ob ge ǁîsa ǀai-aose ge ū, ais âs ge ǃgū-aihe hâ i amaga. 16 Ob ge ǁîsǀî daob ǃoa ǃgû tsî ge mî: Hā î ta sa tawa ǂgâ re, ǀūb ge i xui-ao ǁîb di ǀuiǀgôas a ǃkhaisa. Os ge ǁîb ǃoa ge mî: Tare xū-e mā te tsîts nî ti tawa ǂgâxa? 17 Ob ge ge mî: Tita ge piriro-e nî sîba si pirina xu. Os ge ǁîsa: Mâiǁkhae-ets ga mā teo, ǁî-ets nî sîs kōse, ti ge mî. 18 Ob ge ǁîba: Mâ mâiǁkhae-e mā si ta nî-e? ti ge mî. Os ge ǁîsa: Sa ǀkhunuǂnûidas tsî sa tsurib tsî sa ǀkharus hîats ǃomǁae ūhâs tsîna, ti ge mî; tsîb ge ǁîsa ǁîna mā tsî ǁîs tawa ge ǂgâ; tsîs ge ǁîba xu ge ǀgamǀkhā. 19 Os ge khâi tsî ǃgû tsî ǃgū-aidas âsa ūǁnâ tsî ǃoatarasis âs di sarana ge ana.
MEIB 18-24
ELOBMÎSA XU HÂ ǂÛǂÛSA MÎDI | GENESIS 40-41
“Jehovab ge Joseba ge sâu”
(Genesis 41:9-13) ǃNubaib ge ǁhamaogu di ǂamsaba Faraob ǀkha ǃhoa tsî ge mî: Tita ge nētsē ti ǁoreb xa ra ǂâi. 10 Faraob ge kaise ǁaixa ge i ǁîb di ǃgākhom ǂama, tsîb ge tita ǃkhē-aogu ǂamsab di ommi ǃnâ ge sâu kai, tita tsî ǁganaob tsîkhoma. 11 Tsî khom ge ǀgui tsuxub ǃnâ ǁhapo-e ge ǁhapo, tita tsî ǁîb tsîkhoma; ǁhapo khom ge mâb hoab âkhoma ǁhapos âb di ǁguiǃāsa ǃoa. 12 Tsî ǁnāpab ge sikhom ǀkha Hebreǁî ǂkhamkhoeba ge hâ i, ǃkhē-aogu ǂamsab di ǃgāba; tsî khom ge ǁîra ge ǃhoaba bi, ob ge sikhom di ǁhapora ge ǁguiǃāba khom, mâb hoab âkhomab ge ge ǁguiǃāba ǁîb di ǁhapos ǃoa. 13 Tsî ǁîb ge ǁguiǃāba khom khami i ge ge ī: Titab ge ti sîsenǃâs ǃnâ ǁkhawa ge ǂnûiǂgā tsî ǁîbab ge ge ǂgāmâi.
w15-E 2/1 14 ¶4-5
“ǁHapode mîǃgāǃgāsa Elob di tama hâ?”
ǁHamaob [xûi ǂnâ-aob] ge ǀnîsi Joseba ge ǀuru xawe Jehovab ge tātsēs tsîna ǁîba ge ǀuru tama hâ i. ǀGui ǃuib ge Faraoba ǀurub tide ǁhapode ge mā. ǂGuro ǁhapos ǃnâb ge gao-aoba hû kausa tsî îsa īsiba ūhâ gomade ge mû hîna Nylǃāba xu ra hāde tsî ǃgâbǀkhāb aib ge, ǁgaisi tsî ǂgabasa īsiba ūhâ hû gomade ge mû. ǂGabasa gomadi ge kausa gomade ge hapu. Egab ge Faraoba hû ǃnurugu ǀgui ǁôab ai hâgu hîna a kausa tsî ǃgâigu xa ge ǁhapo. Tsî ǁkhawa ǀnî hâsa ge hō hîna hû ǂnâsa ǀui ǃnuruga ge ǂoaxasa tsî nau hû ǃnurugu kausa tsî ǃgâiga ge hapu. Nau ǁgoagab ge Faraoba khâib ge o, ǃgâi tamase ge khâi ǁhapodi xa tsîb ge hoa gā-ai khoegu tsî ǃgai-aogu tsîna ge ǂgai îgu hā ǁguiǃā. Hoagu ge ǃgâiǃgâ tama ge ī. (Gen. 41:1-8) ǁÎgu ge gârese a mû-es tamas ka io ǃkharagaǃnâgu ǂâi ǀgauga ūhâ i ǃkhaisa da ge a ǀū. Faraob ge ge ǂkhabuǂâi hâ i xaweb ge noxoba sîsenǂuiba gere ôa.
ǁHamaob ge Joseba ge ǂâihō. ǁÎb ǃgâiǂâisab ge ge sîsen-ū tsî Faraoba nē ǂoaǂamsa ǂkhamkhoeb hîna ge ǃkhō-oms ǃnâ ǀgam kurikha ǃkharu hâse ǁîb ǁhaposa a ǁguiǃāb xa ge mîba. Faraob ge ǃhaese Joseba ǃkhō-omsa xu ge ǂgai.—Gen. 41:9-13.
(Genesis 41:16) Ob ge Joseba Faraoba ǃeream tsî ge mî: Ti ǃnâ hâ tamas ge ǁîsa, xawe Elob ge Faraoba ǃgâiǃgâba nîra mîba.
(Genesis 41:29-32) Mû, nē ǃgoaxa hû kurigu ǃnâb ge ǃnāǂamsiba nîra hâ Egipteǃhūb hoaragab ǃnâ. 30 Xawe ǁîgu khaoǃgâ gu ge hû kurigu ǃâtsūǀkhāb diga nîra khâi; ǁnāǃnubaib ge ǁnā ǃnāǂamsib hoaba nîra ǀuruhe Egipteǃhūb hoaragab ǃnâ; tsî ǃâtsūǀkhāb ge ǃhūba nîra hapu. 31 ǁKhātib ge ǃnāǂamsiba ǃhūb ǃnâ hōǃâhe tide ǁnā ǃâtsūǀkhāb hîa ǁnās khaoǃgâ nîra hāb ǃaroma; kaiseb nîra ǃgom xui-ao. 32 Tsî ǁhapos ǀgamǁî ǃnās ai go ǃnaes ge nē ǃkhais Elob xa ǁaposase ǂâibasen hâsa tsî Elob nēsa nî dīse a ǃhaesa.
w15-E 2/1 14-15
“ǁHapode mîǃgāǃgāsa Elob di tama hâ?”
Jehovab ge ǃgamǃgamsenxa tsî ǂgomǂgomsa khoena a ǀnam, ǁnā-amagab ge Joseba gā-ai-aogu tsî pristergu tsîn ǃeream ǁoa dîsa ge dî. Joseb ge ge ǁguiǃā Faraob ǁhapo ra hoara ǀgui ǂâibasensa ūhâsa. Nē haisi-amsa ǁguiǃgâs ǃnâ-ūb ge Jehovaba gere ǁgau nēs amabes ǃnâ nî dīǀoaǀoahe ǃkhaisa. Kausa gomadi tsî ǃnurugu ǀgui ǁôab ai hâgu hîna a kausa tsî ǃgâigu tsîn ge hû kurigu ǃgâib hîna Egipteb ǃnâ nî hâba gere ǂnûǁkhaeba tsî ǂgabasa gomadi tsî ǂnâsa ǀui ǃnurugu tsîn ge hû kurigu ǃâtsūǀkhāb hîna nî saoba ǃoa ra ǁnaeǁgau. Nē ǃâtsūǀkhāb ge ǃhūba nî hîkākā.—Gen. 41:25-32.
(Genesis 41:38-40) Ob ge Faraoba ǃgāgu âb ǃoa ge mî: Xare ge sage nē khoeb khami ī khoeba nî hō, Elob Gagab ǁîb ǃnâ hâba? 39 ǁNās khaoǃgâb ge Faraoba Joseb ǃoa ge mî: Elob ge nēn hoana go ǂhaiǂhaiba tsi ǃkhais ǃaromab ge khoeb xareba ǁnâuǃāxa tsî gā-ai tama sats ī khami. 40 Sats ge ti ommi ǂama nîra hâ, tsî sa mîmās ais ge ti ǁaes hoasa ǃomma nî ǁoa, nē trons ǀguisa xu ta sats xa nî kai.
w15-E 2/1 15 ¶3
“ǁHapode mîǃgāǃgāsa Elob di tama hâ?”
Faraob ge ǁîb mîde gere dīǀoaǀoa. Joseb ge ǀgūǁae îsa sarab ǀkha ge ana-e. Faraob ge ǁîba ǃhuniǀuriǁkham-i tsî ǀkhunuǂnûidas tsîna ge mā tsî ge mā-am bi îb ǁîb ǂhâba hâ khami ǁnā ǃhūb ǃnâ ǃnarimâ. (Gen. 41:42-44) ǀGui tsēs ǃnâb ge Joseba ǃkhōsisa xu îsa hâ ǃkhaisa ǃoa ge ī. ǁÎb ge ǃkhōsisa xu ǂoa tsî Faraoba xu ǀgamǁî gao-aose ge ǁō. Joseb ǂgoms hînab ge Jehovab ǃnâ ūhâ is ge ge ǃgāsa. Jehovab ge ǁîb ǃoaba-aob ge kurigu ǃnâ gere hōǃâ ǃgomsiga ge mûǂan. ǁÎb ge nēsa ǂhanu ǁaeb tsî ǃgâi ǀgaub tsîn ǃnâ ge ǃhoaǃgao. Jehovab ge Joseb ge tsūdī-e xūna ǃgâiǃgâis ǀguisa ǂâis ǃnâ ge ūhâ tama hâ i xawe Israelǁaes tsîna sâusa. Nēs ge mati a īsa da ge sao rase nē ǁkhāǁkhāǃâs ǃnâ nî mû.
Gagasi xūna ǀō-aisase ôaǃnâs
(Genesis 41:14) ǃNubaib ge Faraoba sî tsî Joseba ge ǂgai; on ge ǁîba ǃhaese ǃkhō-omsa xu ge hā kai; on ge khoena ǂkhom bi tsî saran âba ge ǀkharaǀkhara; ob ge Faraob tawa ge hā.
w15-E 11/1 9 ¶1-3
ǂAn i du go i?
Joseba tae-i ǃaroma ǁîb ǀûna ge ǂkhom Faraobab nî mûs aiǃâ?
Genesis ǃnaeǃkhais ǃoagub ge Faraoba ge ǂgan îb Hebreǁî khoeb Joseba ǃhaese ǃkhō-omsa xu ǁîb aiǃâ sī-ūhe tsî ǁîb ǁhaposa ǁguiǃā. Joseb ge ǀnai ǂgui kuriga ǃkhō-oms ǃnâ ge hâ i. Faraob ge ǃhaese a ǂgai bi xaweb ge Joseba noxoba ǁîb ǁaeba ū tsî ǁîb ǀûna ge ǂkhom. (Gen. 39:20-23; 41:1, 14) Xoa-aob ge nēs xa ǃhoa ǃkhais ge ra ǁgau ǁîb ge Egipteǁîn di ǁnaetīga ǂan i ǃkhaisa.
ǀHō-amsa kaikais ge ǂgui ǃhaodi ǃnâ ge ǁnaetī i ǃkharu ge ǁaeb ǃnâ, Hebreǁîna ǃkhōǂgā hâse. Egipteǁîn di ǃhaos ǀguis ge ge mîǁgui ǀhō-amsa ūhâ ǀgarasa, di i ge McClintock tsî Strong’s Cyclopedia of Biblical tsî Theological, tsî Ecclesiastical Literature di hâ ǂkhanide ra mî.
ǂKhomsa ǀhō-omsa ǂkhoms tawa ǀgui gere ǀam? Biblical Archaeology Review di hâ ǂkhanis ge ra ǁgau ǀnî Egipteǁîn di ǁnaetīgu gere ǂgaoǀkhāsa îb aoba tempeli ǃnâb nî ǂgâ khami aiǂhomisen Faraob aiǃâb ga sī o. Di i ga ī hâ o, ob ge Joseba ǁîb danas tsî ǀkhās ai hâ ǀûna nî ǂkhoms ge ge ī.
(Genesis 41:33) Ab ǁnâi Faraoba ǁnâuǃāxa tsî gā-ai khoeba mûǂuibasen, îb ǁîba Egipteǃhūb ǂamai mâi.
w09-E 11/15 28 ¶14
ǃGâi ǀgauga ǁgaus Elob ǃoaba-aon ase
14 Eloǃaoǃgâxa ǁgûn Elobmîs ǁaeb ǃnâ ge ûi hâ in ge gere ǁgūtsâ ǁîn ǀgôana oms ai ǃgôaǃgâsiba ǁkhāǁkhāsa. ǂÂi re mati kha ge Abrammi tsî ǁîb ôab Isak hâkha ǃgâi ǀgaub ǃnâ gere ǂgaigu ǀgausa Genesis 22:7 tawa. ǁÎb ǁgûra ge ǃgâi ǀgaub ǃnâ a ǁkhāǁkhā bi ǃkhais ge Joseb ǃnâ-ū gere mûsen. ǃKhō-oms ǃnâb ge hâ io, ob ge ǁîb ǀkha ge hâ i khoegu tsîna ǃgôasiba gere ǁgau. (Gen. 40:8, 14) ǁÎb mîdi Faraob ǀkhab gere ǃhoa di ge ra ǁgau ǀgapi ǃharosa ūhâ khoe-i ǀkhab nî ǃhoa ǀgausab ge ǁkhāǁkhāsen ǃkhaisa.—Gen. 41:16, 33, 34.
Elobmîs khomai ǃâs
(Genesis 40:1-23) Tsî i ge nē xūn khaoǃgâ ge ī, ǁhamaob Egipteb gao-aob dib tsî ǁganaob tsîkha ge ǁîkha di ǀhonkhoeb Egipteb di gao-aob ǃoagu tsūdī ǃkhaisa. 2 Ob ge Faraoba kaise ge ǁaixa ǁîb di ǀgam ommi dikha, ǁhamaogu di ǂamkhoeb tsî ǁganaogu di ǂamkhoeb tsîkha ǂama. 3 Ob ge ǁîkha sâus ǃnâ ge mā ǃkhē-aogu ǂamkhoeb di ommi tawa, ǃkhō-oms ǃnâ, ǁnā ǃkhais Joseb ǁîs ǃnâ ǃkhōhe hâsa. 4 Tsî ǃkhē-aogu di ǂamkhoeb ge Joseba ǁîkha ge ǂnûiba, ǁîkhab nî ǃoabaga; tsî kha ge ǀnî tsēde sâus ǃnâ ge hâ i. 5 Tsî kha ge hoakha ǁhapo-e ge ǁhapo, mâb hoab ǁîb di ǁhaposa, ǀgui tsuxub ǃnâ, mâb hoab ǁîb ǁhapos di ǁguiǃāsa ǃoa, ǁhamaob tsî ǁganaob tsîkha, Egipteb di gao-aob dikha, ǃkhō-oms ǃnâ ǃkhōhe hâkha. 6 Tsî Joseb ge ǁgoaga ǁîkha tawa sī tsî ǁîkha mû, kō o kha ge ǃoa hâse ge ī i. 7 ǃNubaib ge Faraob ommi dikha ǁîb tawa ǃkhōsis ǃnâ hâkha ǀhonkhoeb âb di ommi ǃnâ dî tsî ge mî: Tare xū-i ǃaroma ra kha sakho di aira nētsē tsūse ī? 8 O kha ge ǁîb ǃoa ge mî: ǁHapo-e khom go ǁhapo, tsî khoe-i ǁî-e nî ǁguiǃā-i ge a ǀkhai. Ob ge Joseba ǁîkha ǃoa ge mî: ǁGuiǃāde Elob di xū tamade? ǃHoaba te kho re! 9 ǃNubaib ge ǁhamaogu di ǂamkhoeba Joseba ǁîb di ǁhaposa ǃhoaba tsî ǁîb ǃoa ge mî: Ti ǁhapos ǃnâ, mû, ǂauxûiǂûhai-i ge ti ais aiǃâ go hâ i. 10 Tsî ǂauxûiǂûhais tawa gu ge ǃnona ǂgonaga go hâ i, tsîs ge go ǃam tsîs ge go ǃkhā tsî narudi âs ge ǁan hâ ǂauxûiǂûna go ūǀkhī. 11 Tsî Faraob di ǀgabis ge ti ǃomǁae go hâ i. O ta ge ǁnā ǂauxûiǂûn xa ū tsî Faraob di ǀgabis ǃnâ go ǀā, tsî ta ge ǀgabisa Faraob ǃomǁae go mā. 12 Ob ge Joseba ǁîb ǃoa ge mî: Nēs ge ǁguiǃās âsa: ǃNona ǂgonagu ge a ǃnona tsē. 13 ǃNona tsēdi ǃnâb ge Faraoba sa danasa nîra ǀgapiǀgapi tsî sa ǃkhais ǃnâ ǁkhawa nîra mâi tsi; ots ge Faraob di ǀgabisa ǁîb ǃomǁae ǁkhawa nîra mā, aibekam dommi ai, ǁhamaots ge i ǃnubai. 14 Îts ǁnâi tita xa ǂâi re ǃgâibahets kao, îts ti tawa ǀkhomxaǂgaosiba dī re, îts Faraoba tita xa ǂâiǂâi re, îts dī re, î ta nē omma xu ǂoa, ti. 15 ǃNaridommi ai ta ge Hebreǁîn di ǃhūba xu ge ǃnarihe xuige, tsî nēpa ta ǁkhāti xū-e dī tama hâ, nē ǃkhō-oms ǃnân nî ǂnûiba te-e. 16 Tsî ǁganaogu di ǂamkhoeb ge mûo, ǃgâi ǁguiǃā-eb go mā ǃkhaisa, ob ge Joseb ǃoa ge mî: Tita ge ǁkhāti ti ǁhapos ǃnâ go mû, ǃnona pereǀharudi ge ti danas ai go hâ i. 17 Tsî ǀgapise hâ ǀharus ǃnân ge ǂû-ain Faraob din, ǁganhe hân hoana go hâ i; tsî anin ge ǀharus ǃnâ hâna go ǂû ti danas ǂamaisa xu. 18 ǃNubaib ge Joseba ǃeream tsî ge mî: Nēs ge ǁîs di ǁguiǃāsa: ǃNona ǀharudi ge a ǃnona tsē. 19 ǃNona tsēdi ǃnâb ge Faraoba sa danasa satsa xu nîra ǀgapiǀgapi, tsîb ge hai-i ai nîra ǂgāmâi tsi, tsî anin ge sa ǁgansa sa ǂamaisa xu nîra ǂû. 20 Tsî i ge ǃnonaǁî tsēs ai ge ī, Faraob di ǃnaetsēs ai, ǁîb di ǃgāgu hoagab ge ǂûǁae-e a dība ǃkhaisa; tsîb ge ǂamkhoeb ǁhamaogu dib di danasa ge ǀgapiǀgapi tsî ǂamkhoeb ǁganaogu dib di danasa ǁîb di ǃgāgu ǁaegu. 21 Tsîb ge ǂamkhoeb ǁhamaogu diba ǁîb di ǁhamsîsenǃâs ǃoa ǁkhawa ge oa kai, ob ge ǁîba Faraoba ǀgabisa ǃomǁae ge mā, 22 xawe ǂamkhoeb ǁganaogu dibab ge ge ǂgāmâi, Joseb ge ǁîkha ǁguiǃāba hâ i khami. 23 Tsî ǂamkhoeb ǁhamaogu dib ge Joseb xa ǂâi tama i tsî ge ǀuru bi.
MEIB 25-31
ELOBMÎSA XU HÂ ǂÛǂÛSA MÎDI | GENESIS 42-43
“Joseb ge ge ǃkhō-oasen”
(Genesis 42:5-7) Nēti gu ge Israeli di ôaga ge sī, ǁnāpa ra sīgu ǃnâ, ǁama gu nîse; ǃâtsūǀkhāb ge Kanaanni ǃhūb ǃnâ hâ amaga. 6 Tsî Joseb ge gaosa ge i ǁnā ǃhūb ǂama; ob ge ǃhūb hoab di ǁaesa ge ǁamaxūba; tsî Joseb di ǃgâsagu ge hā tsî aidi âgu ǀkha ǁîb aiǃâ ǃhūb kōse ge ǃhon. 7 Tsî ǁîb ge ǃgâsagu âba mûo, ob ge ǁîga ge ǂan i; xaweb ge ǃhaokhoedīsen ǁîguǀî tsî ǁîgu ǀkha karosase ǃhoa tsî ge mîǀî gu: Mapa xu go ra hā? O gu ge: Kanaanǃhūba xu, ǂûna nî ǁamase, ti ge mî.
w15-E 5/1 13 ¶5
“Elob di ǃkhais ǃnâ ta hâ?”
O Joseb xas? ǁÎb ǃgâsagab ge ǃhaese ge mûǂan. ǁÎgu ge ǁîb aiǃâ a ǃhonǁgoa o, ob ge ǁîb ǂkhamsis tsēdi xa ge ǂâi tsoatsoa. ǃNaeǃkhais ge ra mî Joseb ge Jehovab ge ǂkhamsis ǃnâ a mā bi ǁhaposa ge ǂâihō, nē ǁhapos ge ǁîb ǃgâsagu ǁîb aiǃâ nî ǃhonǁgoa di gere mî tsî gu ge ǁîga ǁnāti ge dī. (Gen. 37:2, 5-9; 42:7, 9) Joseba tae-e nî dī? ǁÎgab nî ǃkhōǂgā? ǁÎgab nî ǀkhao ǃoa?
w15-E 5/1 14 ¶1
“Elob di ǃkhais ǃnâ ta hâ?”
Satsa ǁnā ǁgai mâsib ǃnâ mâisen re. Nē mâsigu ǃhuigub tsî ǀgoras dib ge nētsēs omaridi ǃnâ a ǃnāsa. ǃGomsina da ga hōǃâ o, o da ge sida ǂgaoga ra sao tsî sida ǀoasa kurusa ūhâ tama hâ tsâsigu tsîna. Kaise i ge nî gā-ai i Joseba ǁgae tsî Eloba ǃoa kōsa xū-e da nî dīs aiǃâ. (ǂKhm. 14:12) Omaris khoen ǀkha ǂkhîba ūhâs ge a ǂhâǂhâsa xawe hoan ǂam-ai Jehovab tsî Jesub tsîkha ǀkha ǂkhîba ūhâs ge kaise a ǂhâǂhâsa.—Mat. 10:37.
(Genesis 42:14-17) ǃNubaib ge Joseba ǁîgu ǃoa ge mî: Nēs ge ǁîs sago ǃoa ta goro mîsa ǃkhē-aogo. 15 Nēs ǃnâ go nî ǃâitsâhe, Faraob a ûitsama ǃkhais ao, nēpa xu go tātsē ǂoa tide, sago ǃgâsab ǂkhammi ga aibe hā hâ tama io! 16 ǀGuib sago diba sîǂui, sago ǃgâsaba nî ūhāba; î go sago ǃkhōsase hâ, o di ge sago di mîde nî ǃâitsâhe, iseb amaba sago ǃnâ hâ ǃkhaisa; tsî ǁnā tamas ka io: Faraob ûi hâ ǃkhais ao, ǃkhē-aogo! 17 Ob ge ǁîga ǀhûpe ǃnona tsēdi kōse sâus ǃnâ ge ǂnûi.
w15-E 5/1 14 ¶2
“Elob di ǃkhais ǃnâ ta hâ?”
Joseb ge nē ǃgomsiga ge hōǃâ, ǁîb ǃgâsagu amabes ǃnâ a ham ǃkhaisa mûs ǃgao. ǁÎb ge ǂgurose ǁîgu ǀkha ǃgâi tama ǀgaub ǃnâ gere ǃhoa tsî ǁîgu a ǃkhē-ao di gere mî. ǁKhaubasens ǃgao gu ge ǁîgu omaris xa ge mîba bi tsî ge mî ǃgâsaba gu oms ai ūhâ ǃkhaisa. Joseb ge ǁîb ǃgâiaǂgaoba gere sâu ǂgao. ǁÎb ǃgâsaba amabes ǃnâ ge ûitsama i? Joseb ge nēsi ge ǂan i tae-eb nî dīsa. ǁÎb ge ge mî: ‘Nēs ǃnâ-ū go ge nî ǃâitsâhe’ tsî ǁnāpaxū ge mîba gu îgu ǁîgu ǃgâsaba sī-ū. ǁÎb ge ge mā-am gu îgu omsa ǃoa oa tsî ǃgâsaba sī-ū xawe ǁîgu ǀguib ga ra hâ ǃau o ǀgui.—Gen. 42:9-20.
(Genesis 42:21, 22) ǃNubai gu ge nēba naub ǃoa ge mî: Amase ge a ǀhapixa sage ǃgâsab tawa, ǂōǂōsib ǁîb ǀoms diba ge ge mû, sageb ge ǀkhomabasen ǁaeb ai, xawe ge ge ǁnâu bi tama ge i; ǁnā-amagas kom nē ǂōǂōsib sage ǂama ra hāsao. 22 Ob ge Rubenna ǁîga ǃeream tsî ge mî: ǁNâi mîba go tama ta hâ: Tā ǁore-ū bi re nē ǂkhamkhoeba! ti ta ge mî ǃnubai, xawe go ge ǁnâu tama ge i; tsî kō, ǀaob âb xaweb ge nēsi ra ǂgaoǀkhāhe!
it-2-E 108 ¶4
Joseb
Nēn hoan xa ǃaroma-e hâse gu ge Joseb ǃgâsaga, Joseba gu ge ǂkhamsis ǃnâ ǃgā-i ase ǁamaxū amaga gu ra ǁkharahe di ge ǂâi. ǁÎgu ǃgâsab hîna gu ge noxoba mûǃā tama hâ îb aiǃâ gu ge ǁîgu ǀhapixasisa gere ǃhoaǃgao. ǁÎgu ra ǃhausen ǃkhaisab ge mû, ob ge Joseba ǁîga xu ī tsî sī gere ā. Simonab ge ǁîgu ǂkham ǃgâsab ǀkha gu nî oa hās kōse ge hâ oa kai.—Gen. 42:21-24.
Gagasi xūna ǀō-aisase ôaǃnâs
(Genesis 42:22) Ob ge Rubenna ǁîga ǃeream tsî ge mî: ǁNâi mîba go tama ta hâ: Tā ǁore-ū bi re nē ǂkhamkhoeba! ti ta ge mî ǃnubai, xawe go ge ǁnâu tama ge i; tsî kō, ǀaob âb xaweb ge nēsi ra ǂgaoǀkhāhe!
(Genesis 42:37) Ob ge Rubenna ǁgûb ǃoa ge mî: Ti ôagu xa ǀgamkha ǃgam re, ǁîba ta ga ǁkhawa ūhāba tsi tama io; ti ǃomǁae mā bi re, o ta ge tita ǁîba ǁkhawa nî ūhāba tsi.
it-2-E 795
Rubenni
Rubenni ǃgâi ǀgaugu ge ra ǁgau ǁîb khoese ǃgâsagab ge mîba o, îgu Joseba tā ǃgam xawe ās ǃnâ ǂgā, Rubenni ge ega oaǀkhī tsî Joseba gere sâu ǂgao. (Gen. 37:18-30) 20 Kuriga ǃkharu hâse gu ge nē ǃgâsaga gere mî Joseba gu ge ǃgâise hâ-ū tama hâ i amaga gu ge Egipteb ǃnâ ǃkhē-aogu a amaga gere matare kaihe. Rubenni ge nau ǃgâsaga ge ǂâiǂâiǃnâ ǁîb ge Joseba ǃgams ǃnâ ǃâ tama hâ i ǃkhaisa. (Gen. 42:9-14, 21, 22) Jakob ge ǂkhā o, îb Benjamena tā ǁîb ǃgâsagu ǀkha Egipteba ǃoa ī, ob ge Rubenna ǁîb ǀgam ǀgôaga gere ǁnāxū ǂgao tsî ge mî: “Ti ôagu xa ǀgamkha ǃgam re, ǁîba ta ga ǁkhawa ūhāba tsi tama io.”—Gen. 42:37.
(Genesis 43:32) On ge ǁîba ǀguri ge ǁāǁāba, tsî ǁîga ǀguri tsî Egipteǁîgu ǁîb ǀkha ra ǂûga ǀguri; Egipteǁîn ge Hebreǁîn ǀkha pereǂû ǁoa ge i, Egipteǁînas ge ǁîsa ǁgaisise ība i xui-ao.
w04-E 1/15 29 ¶1
Mâǂoa ra ǂâidi Genesis ǂkhanisa xu—II
43:32—Tae-i ǃaroman ge Hebreǁîna Egipteǁîn ǀkha ǂûǀhaos xa ǃgâibahe tama hâ i? Nēs ge ǃnāsase ǃhaoǃnâbe ǀgoras xa ge ǃaroma-e. Egipteǁîn ge gū ǃûi-aogu xas tsîna ge ǃgâibahe tama hâ i. (Gen. 46:34) Tae-i ǃaroma? Gū ǃûi-aogu ge Egipteǁîn xa kaise gere ǃgôaǁnâhe. Tamas ka ion ge ǀnîsi ǃhūb ge ǀoro i amaga ǁîn xamanin ǃgaon ǁnāpa ǂû-e nî ūsa ge ǂgao tama hâ i.
Elobmîs khomai ǃâs
(Genesis 42:1-20) Tsî Jakob ge mû Egipteb ǃnâb ǃhoroba hâsa, ob ge Jakoba ǁîb ôagu ǃoa: Tarexa go kha ra kōǀîgu? ti ge mî. 2 Ob ge ǃaruǀî ge mî: Mû, tita ge ge ǁnâu Egipteb ǃnâb ǃhoroba hâsa; ǃgûǁgôa î go ǁnāpa ǃhoroba ǁamaba da, î da ûi, î da tā ǁō. 3 ǃNubai gu ge Joseb di disi ǃgâsaga ge ǁgôa, Egipteb ǃnâ gu nî ǃhoroba ǁamase. 4 Xawe Benjaminni Joseb ǃgâsabab ge Jakoba ǃgâsagu âb ǀkha ǁgôa kai tama ge i, îb tā ǀnîsi tsū xū-i xa hāǂamhe, tib ra mî xui-ao. 5 Nēti gu ge Israeli di ôaga ge sī, ǁnāpa ra sīgu ǃnâ, ǁama gu nîse; ǃâtsūǀkhāb ge Kanaanni ǃhūb ǃnâ hâ amaga. 6 Tsî Joseb ge gaosa ge i ǁnā ǃhūb ǂama; ob ge ǃhūb hoab di ǁaesa ge ǁamaxūba; tsî Joseb di ǃgâsagu ge hā tsî aidi âgu ǀkha ǁîb aiǃâ ǃhūb kōse ge ǃhon. 7 Tsî ǁîb ge ǃgâsagu âba mûo, ob ge ǁîga ge ǂan i; xaweb ge ǃhaokhoedīsen ǁîguǀî tsî ǁîgu ǀkha karosase ǃhoa tsî ge mîǀî gu: Mapa xu go ra hā? O gu ge: Kanaanǃhūba xu, ǂûna nî ǁamase, ti ge mî. 8 Tsîb ge Joseba ǃgâsagu âba ǂan ge i, xawe gu ge ǁîga ǁîba ǂan tama ge hâ i. 9 ǃNubaib ge ǁîba ǁnā ǁhapora, ǁîgu xab ge ǁhapora xa ge ǂâi; ob ge ǁîgu ǃoa: ǃKhē-aogo komo, tsî go kom go hāo, mûhō go nîse, mapab ǃhūba a ǁkhowa-amsa ǃkhaisa, ti ge mî. 10 O gu ge ge mî: Hî-î, ǃkhūkhoetse, sa ǃgāge kom go hāo, ǂûna ge nî ǁamase. 11 Sige hoage kom ǀgui aob ǀguib di ôao, ǃaoǃgâxa khoege; ǃkhē-ao tama ge komo. 12 Ob ge ǁîba ǁîgu ǃoa ge mî: Hî-î, sago kom go hāo, mûhō go nîse, mapab ǃhūba a ǁkhowa-amsa ǃkhaisa. 13 O gu ge ge mî: Sige sa ǃgāge ge disiǀgamǀa khoeǃgâgu ge i, ǀgui aob ǀguib di ôa Kanaanǃhūb ǃnâ, tsî kō, ǂkhammi ge nētsē ǁgûb ǀkha hâ, tsî ǀguib ge a ǀkhai. 14 ǃNubaib ge Joseba ǁîgu ǃoa ge mî: Nēs ge ǁîs sago ǃoa ta goro mîsa ǃkhē-aogo. 15 Nēs ǃnâ go nî ǃâitsâhe, Faraob a ûitsama ǃkhais ao, nēpa xu go tātsē ǂoa tide, sago ǃgâsab ǂkhammi ga aibe hā hâ tama io! 16 ǀGuib sago diba sîǂui, sago ǃgâsaba nî ūhāba; î go sago ǃkhōsase hâ, o di ge sago di mîde nî ǃâitsâhe, iseb amaba sago ǃnâ hâ ǃkhaisa; tsî ǁnā tamas ka io: Faraob ûi hâ ǃkhais ao, ǃkhē-aogo! 17 Ob ge ǁîga ǀhûpe ǃnona tsēdi kōse sâus ǃnâ ge ǂnûi. 18 Tsî ǃnonaǁî tsēs aib ge Joseba ǁîgu ǃoa ge mî: Nēsa dī î go ûi, tita ge Eloba ra ǃao xuige. 19 ǃAoǃgâxa go kao, ab khoeǃgâgu go di ǀguiba ǃgaehe hâse hâ sago ra sâuǃnâhe ommi ǃnâ; î go naugo ǃgû, î go ǃhoroba sago omaridi ǃâtsūǀkhāb ǃaroma ūsī! 20 Î go sago ǃgâsab ǂkhamma ti tawa ūhā, o di ge sago mîde nîra ama; o go ge ǁō tide. O gu ge ǁnāti ge dī.