ǀGôana mati ǃgameba a ǀkharaǀkhara ǁkhā

ǀGôaro-i ǃnaes ge ǂkhîba hau ǁkhā tsî nauǀkhāb ai kai ǂâiǂhansens tsîna hau ǁkhā. ǀAsa ǁgû-i asets ge a buru ǁkhā matits sa ǁaeb hoab tsî sa ǀgaib tsîna ra sîsenū sa nē ǀgôaro-e kēǃgâs ǃaroma. ǂÂusase ǁom tama is tsî tsâsib hîna ra ǀkharab ge ǁgâiba saro ǃgameb ai a hau ǁkhā. Sats tsî sats ǃgame hâ khoe-i ge ǂhâbasa ǀkharaǀkharana nî dī, nē ǀgôaro-e kēǃgâs ǃaroma tsî saro ǃgameb tsîna nî ǀgaiǀgai. Mati di Elobmîs ǀapemāde a huiro ǁkhā nē ǃgoma dans ǀkha?

1 ǁNÂUǃĀ RE ǀGÔA-I GO MATI SA ÛIBA A ǀKHARAǀKHARA ǀGAUSA

ELOBMÎS TA MÎS: “ǀNami ge a ǃnūǃnâxa, tsîb ge a ǃgâi.” ǁNās khamib ge ǀnama ‘ǁÎb di ǃgâi-eb oâbasen tama hâ tsî ǀarakaisen tamab hâ.’(1 Korinteǁîn 13:4, 5) ǀAsa ǁgûs ase du ge sadu ǁaeb hoaba ǀgôaro-e nî mā ǂgao. Xawe aob ge nî tsâ ǁîb ǁae-e ūhâbahe tama hâ di, xawe tā ǀuru re ǁîb tsîn ge sadu ǁaeba ǂhâ hâ. ǃNūǃnâxasib tsî ǃgâisib tsîn ǀkha huibi re ib ǁîb tsîna mû ǂhâheb hâ ǃkhaisa tsî ǃkhōǂgābi re ǀgôaro-e kēǃgâs ǃnâ.

“Sago aogo . . . ǁnâuǃāb ǀkha ǁîs tawa ǁan.” (1 Petrub 3:7) ǁNâuǃā re sadu taras ge ǁîs ǀgaib hoaba saro ǀgôaro-e nî mā. ǁÎs ge ǀasa ǃereamsa ūhâ tsî ǁgâib, tsaub tamas ka io ǁgâiǁnāsa se ra tsâ. ǁAeb ga hâ o, os ge sats ǀkha ra ǁaixa, xawe dītsâ re ǃnomsase hâ sa “ǃnūǃnâxab ge ǁē-aob xa a ǃgâi.” (ǂKhoamîdi 16:32) ǁNâuǃāxasiba ǁgau re tsî ǂhâbasa ǂkhâǃnâsa ǁîsa mā re.—ǂKhoamîdi 14:29.

SATS A DĪ ǁKHĀ I:

• Dadasagu: Hui re sa tarasa ǀgôaro-e kēǃgâs ǀkha, ǃuiǁaeb ais tsîna. ǀOroǀoro re ǁaeb hînats ta nau hâ xūn ai sîsenūba, its ǁnā ǀgaus ai ǃnāsa ǁaeba sa taras tsî ǀgôa-e ūhâba

• Mamasadi: Sadu aob ga ǀgôaro-i ǀkha hui ǂgao o, ūǃoa re ǁîb huiba. ǁNāsab ga ǃamkuse dī tama i o, tā mîn ǀkha mîbi re xawe ǃgâise ǁgaubi re matib nî ǁnāsa dī ǀgausa

2 ǀGAIǀGAI RE SA ǃGAEǁAESA

ELOBMÎS TA MÎS: “ǁÎǀgamra nî ǀgui ǁgan.” (Genesis 2:24) ǀAsa ǁaniro-i ga omaris ǃnâ hā xawe ǂâis ǃnâ ūhâ re sats tsî sats ǃgame hâ khoe-i ge a “ǀgui ǁgan.” ǁKhāts a xū-i hoa-e dī re sa ǃgaeǁaesa nî ǀgaisase ūhâ e.

Tarade di ǃgâiaǂgaoxa re aogu di huib tsî ǂkhâǃnâs tsîn ǃaroma. Sa ǁgâiǂuisens gangants ta sas ge “sōǀôa” i khami ī. (ǂKhoamîdi 12:18) Aogo, sago tarade mîba re matikōse di a ǀnamhe tsî ra ǀgawi ǃgôahe sa. Koasi re ǃgâi ǀgaub hînas ta omarisa kēǃgâb ai.—ǂKhoamîdi 31:10, 28.

“A i khoe-i xare-e ǁî-i ǃgâiba tā oâ, î-i mâ-i hoa-e nau-i diba oâ.” (1 Korinteǁîn 10:24) Hoaǁae dītsâ re ǃgâina khoe-aoguse dība gu sa. Khoe-aoguse, ǁaeba ǁamaǂui re ǃhoa ūgus ǃaroma, koagus ǃaroma, tsî ǃgâ gu re. Tā sats xa ǀgui ǂâi re ǁgansi ǂharugus tawa i ga hā o. Sats ǃgame hâ khoe-i di ǂhâsib xas tsîna ǂâi re. Elobmîs ge ra mî: “Tā ǂgaedawasenxugu ro re.” (1 Korinteǁîn 7:3-5) ǃHoa ūgu re nē ǃkhaisa ǂhauǃnâse saro ǁaegu. Sa ǃnūǃnâxasib tsî ǁnâuǃāxa ǀgaub ge sa ǃgameba a ǀgaiǀgai ǁkhā.

SATS A DĪ ǁKHĀ I:

• Tā ǀuru re ǁaeba ǁamaǂuisa sa ǀgamro ǃaroma ǀgui

• ǂKhari xūrona dība re sats ǃgame hâ khoe-e i i ǀnamhe hâse tsâ, ǂhawero-e sîba re tamas ka io ǂkhari ǀkhae xū-e mā re

3 ǁKHĀǁKHĀ RE SA ǀGÔARO-E

ELOBMÎS TA MÎS: “ǀGôasisa xuts ǃanu xoade a ǂan xuige, ǃgâiǃōsib ǃoa ǁgau tsi ǁkhāde.” (2 Timoteub 3:15) ǀApe re tae-ets sa ǀgôaro-e nî ǁkhāǁkhāsa. ǁÎ-i ge buruxa ǁkhāsiba ūhâ ǁkhāǁkhāsens tiba, ǁî-i nî ǃnaes aiǃâ. ǁHās ǃnâ i hâ, hîna i ge ǀgôaro-e sa doma a ǂanǂui ǁkhā tsî sa tsâsigu ǃoa-ai a ǃeream ǁkhā. Khomaiba re ǁî-i a ǂkhariro hîna. Sats tae-e ra khomai sa i ga ǁnâuǃā tama i xawe i ge nî hui ǁî-e si khomais xa ǃgâibahesa kai i ga ra o.

Sa ǀgôaro-i ge tātsēs tsîna ǂkham tama hâ Elob xats ta ǃhoa xūna ǁnâusa. A i ǁnâu re matits Jehovab ǃoa ra ǀgore ǀgausa. (Deuteronomium 11:19) Sats ga ǁî-i ǀkha ǀguiba ǀhuru o, ǃhoa re Elob ge kuru xūn xa. (Psalmdi 78:3, 4) Sa ǀgôaro-i ra kaikhâi khami i ge nî hōǃâ sats Jehovaba a ǀnam ǃkhaisa tsî ǁî-i tsîn ge ǁnā ǀgaus ai nî ǁkhāǁkhāsen ǁîba ǀnamsa.

SATS A DĪ ǁKHĀ I:

• ǀŌ-aisase gā-aisiba ǀgoreba re sa ǀgôaro-e ǁkhāǁkhās ǃnâ

• ǁGuiǃgâ re dana mîde tsî ǂâiro di tsîna, i i sa ǀgôaro-e tsoatsoasa xu ǁkhāǁkhāsen ǁkhā