Elob ǃoa kē re ǂkhîba ūhâ ǃgameb ǃaroma

Jehovaba ge ǂguro ǃgameba ge ǃgae. Elobmîs ge ra mîba da ǁîb ge ǂguro khoesa kuru “tsîb ge ǁîsa Adammi ǃoa ge ūhā.” Adammi ge kaise ǃgâiaǂgao tsî ge mî: “Nēs ge a ti ǂkhōgu di ǂkhō tsî ti ǁgans di ǁgan.” (Genesis 2:22, 23) Jehovab ge hoaǁae ra ǂhâba ǃgame hâ khoen nî ǂkhîb ǃnâ hâsa.

ǃGamets ga ǁaeb aits ge ra ǂâi hoaǁaeb ǃgameba ǁkhoaxas ǀguisa nî ī di. Amab ǃnâs ge ǁnāsa ī ǁoa, ama ǀnamgu hâ aob tsî taras tsîn ge ǃgomsiga a hōǁkhā. (1 Korinteǁîn 7:28) Nē ǂkhanib ǃnâ du ge Elobmîs tsoatsoade nî hō, ǁîde du ga sîsenū o, ob ge sadu ǃgameb tsî omarisa ǂkhîba nî ūhâ.—Psalmdi 19:8-11.

1 ŪǃOA RE ǃÂB HÎNAB JEHOVABA RA MĀ TSI BA

ELOBMÎS TA MÎS: Aob ge a omaris dana.​—Efeseǁîn 5:23.

ǃGame hâ aob ge nî ǂan Jehovab ge ǁîba ǂgaoǀkhā hâ ib ǁîb tarasa ǀnamxaǃnâse kēǃgâ. (1 Petrub 3:7) ǁÎb ge ǁîsa hui-aose ge kuruba tsi, tsîb ge ra ǂhâba sats nî ǁîsa anusib tsî ǀnami ǃnâ hâ ū ǃkhaisa. (Genesis 2:18) Sa tarasats ge ǁnātikōse nî ǀnam its māsenxase ǁîs ǂhâga sa gu ais ai mâi.—Efeseǁîn 5:25-29.

ǃGame hâ taras ge nî ǂan Jehovab ge ǁîsa xu ǃâubasen hâ ǁîs aobas ǃgam ǃgôasiba nî ūhâba sa tsî nî huisa ǁîb ǃâba dīǀoaǀoas ǃnâ. (1 Korinteǁîn 11:3; Efeseǁîn 5:33) ǁÎb ta ū mîǁguiga ǂkhâǃnâ re ǂgaob hoab ǀkha tsî ǁîb ǀkha sîsenǀhao re. (Koloseǁîn 3:18) Nēsa du ga dī o, o du ge kaise nî anusa ǁîb mûǁae tsî Jehovab mûǁae.—1 Petrub 3:1-6.

SATS A DĪ ǁKHĀ I:

• Sa kaikhoeb tamas ka io kaikhoesa dî re matits a ǃgâi ao tamas ka io tara kai ǁkhāsa. ǂŌrisase ǃgâ re tsî ǁkhāts a ba dī-unu re

• ǃNūǃnâxa re. ǁAeba i ge nî ū ǂan gu sa, ǂkhîǂkhîgus ǃaroma

2 ǃGAMETS H KHOE-I TSÂSIBA ǃGAMSE ǃGÔAǃG RE

ELOBMÎS TA MÎS: Sats ge ǃgamets hâ khoe-i ǂhâga nî kēǃgâ. (Filipeǁîn 2:3, 4) Sa kaikhoeb tamas ka io kaikhoesa ǀnamǀnamsa se hâ ū re. ǂÂis ǃnâ ūhâ re Jehovab ge ǁÎb ǃoaba-aona ra ǂgaoǀkhā in ‘khoexase ī mâ khoe-i hoa-i ǃoa-ai.’ (2 Timoteub 2:24) “ǀGuib ge hâ, mîdi ǀkha ǂâi-oǃnâse gôab ta ǃkhā xase ra ǀkhība, xawe nams gā-aigu dis ge a sōǀôa.” ǁNās ǀkha sa mîde ǂâi ǃgâ re. (ǂKhoamîdi 12:18) Jehovab di gāgāb ge nî huitsi its khoexaǃnâ tsî ǀnamǀnamsa ǀgaub ai ǃhoa.—Galateǁîn 5:22, 23; Koloseǁîn 4:6.

SATS A DĪ ǁKHĀ I:

• ǀGores ge nî huitsi its ǃnomsase hâ tsî hara ǂâis ǀkha ǂhâǂhâsa xūna khoe-aoguse ǃhoaǃgao

• ǂŌrisase ǂâi re tae-ets nî mîsa tsî matits nî mîsa

3 KHOE-AOGUSE RO ǀGUIBA ǂÂI RE

ELOBMÎS TA MÎS: ǃGamets ga o, ots ge ra “ǀgui ǁgan” kai ǃgamets go khoe-i ǀkha. (Mateub 19:5) Xawe ro ge a ǀgam ǃkharagagu khoe tsî ǃkharagagu ǂâiǀgauga ūhâ. ǁNās ǀkha ro ge nî ǁkhāǁkhāsen iro ǀguiǂâixa tsî ǀgui tsâsiba ūhâ. (Filipeǁîn 2:2) ǀGuiǂǃnâxasib ge a ǂhâǂhâsa mîǁguiga ūs ǃnâ. Elobmîs ge ra mî: “Mâ ǂâibasens hoas ta ǀaweǀhaos ǀkha ǂnûi ǁawoǁawohe.” (ǂKhoamîdi 20:18) A di Elobmîs tsaotsoade daoǁgau ro re ǀguiba ro ǂhâǂhâsa mîǁguiga ra dī hîna.—ǂKhoamîdi 8:32, 33.

SATS A DĪ ǁKHĀ I:

• Sats ǃgame hâ khoe-i ǀkha tā sa ǂâis tsî ī ra xūn ǀguina ǀgoragu re xawe sa tsâsib tsîna

• Sats ǃgame hâ khoe-i ǀkha ǃhoa re kai xū-ets nî dīs aiǃâ