ǂGomǂgomsase hâ ūgu

Jehovab ge ǂgaoǀkhā da hâ i da “ǃgamǃgamsensase tanisen.” (Mixab 6:8) Nēs ge ǀō-aisase a ǂhâǂhâsa sa ǃgameb ǃnâ, ǂgomǂgomsasib ose-i ge ǂgomǃgâgu-e a ǀkhai. ǂGomǃgâgus ge kaise a ǂhâǂhâsa ǀnama kais ǃaroma.

ǂGomǂgomsasib ge nētsē ǁnāǂams ǃnāga hâ ǃgameb ǃnâ. Sa ǃgameba ǁkhaubas ǃaromats ge ǀgam xūna nî dī.

1 SA ǃGAMEBA ǂGURO ǃKHAISA MĀ

ELOBMÎS TA MÎS: ǂHâǂhâsa “xūna du nî ǃâitsâ ǁkhāse.” (Filipeǁîn 1:10) Sa ǃgameb ge kaise a ǂhâǂhâsa xūn di ǀgui sa ûib ǃnâ. ǂGuro ǃkhaisa anu hâ.

Jehovab ge ǂhâba hâ its ǃgamets hâ khoe-i ai ǀgui ǂâisa ǂnûi tsî “ûiba ǁkhoaxa” kai ǂkhîb ǃnâ ǀguiba. (Aoǁnâ-aob 9:9) ǁÎb ge ǃgāsase ra mî its tā sats ǃgame hâ khoe-e ǃgâi tama se sîsenū, xawe ǀgauga ôa ǂkhîǂkhîgus ǃaroma. (1 Korinteǁîn 10:24) ǃGamets hâ khoe-e ǁî-i a ǂhâsa tsî ra ǃgôaǃgâhe se tsâ kai re.

SATS A DĪ ǁKHĀ I:

• Hoaǁae dītsâ re ǀguiba ǁaeba ǁamaǂuibagu sa, its sats ǃgame hâ khoe-e ǀō-aisa ǁaeba mā

• “Sim” ti ǂâi re “tita” tis ose

2 SA ǂGAOBA ǁKHAUBASEN RE

ELOBMÎS TA MÎS: “Mâb hoab, tarasa ga kōǀîb, tura si nîse, ǁnāb ge ǀnai ǂgaob âb ǃnâ ǃgameba ge khôaǀkhā si.” (Mateub 5:28) Khoe-i ga ǁgau-oǃnâ xūna ǂâi o, o i ge ǁnāti i khoe-e ǂgomǂgomsase tanisen tama hâ ǃgame i hâ khoe-i ǃoa-ai.

Jehovab ge ra mî “sâu sa ǂgaoba.”(ǂKhoamîdi 4:23; Jeremiab 17:9) Nēsa dīs ǃaroma sa mûde ǁkhauba re. (Mateub 5:29, 30) Kai ǁgûb Jobi di aiǁgausa sao re, ǁîb ge mûra âb ǀkha ǃgaeǀhao-e ge dī ib tātsēs tsîna tā ǀnî hâ ǂkham khoe-e tura. (Job 31:1) Mâǀgai, i tā ǁgoe-ūgub ai-īsiga kē. Mîǁgui tsî ǂgōsen re ǀnî hâ khoe-e ǃgameb ǃauga hâ-e ǀnam tsâsiba ūhâbasa.

SATS A DĪ ǁKHĀ I:

• Mûǃā kai re nau khoena hoasets māǁnâsen hâsa ǃgamets hâ khoe-i ǃoa-ai

• ǂÂi re ǃgamets hâ khoe-i di tsâsib xa, tsî ǀamǀam hâ ga ǀhōsagusisa sats ǃgame hâ khoe-e tsūse a tsâ kai ǁkhā-e