Matits ǂkhîba sa ǀaokhoen ǀkha a ūhâ ǁkhā

ǃGameb ge ǀasa omarisa ra tsoatsoa. Sa înats ga ǀnam tsî ǃgôa xawe i ge sats ǃgame hâ khoe-e kaise a ǂhâǂhâsa khoe ǃhūbaib ai. Nēs ge ǀnî ǀaokhoena kaise nî ǃgomba ūǃoasa. Xawe Elobmîs tsoatsoadi ge huitsi ǁkhā its ǂkhîba ūhâ sa ǀaokhoen ǀkha sa omaris ûibats ta ǀgaiǀgai hîna.

1 SA ǀAOKHOENA ǁÎN ǃKHAISA ŪHÂBA RE

ELOBMÎS TA MÎS: “Saob tsî saos tsîrats ge nî ǃgôa.” (Efeseǁîn 6:2) Matikō kurixats ga xawe i ge ǂhâǂhâsa sa îra hoaǁae ǃgôasa. ǂAnǃgâ re sats ǃgame hâ khoe-i tsîn ge ǀgôab tamas ka io ǀgôas ase ǁî-i ǁgû-e ǁaeba nî mā. “ǀNami ge suri tama hâ,” ta ǁaraǂuisa se tsâ re sats ǃgame hâ khoe-i ǁgûn ǀkha ūhâ ǃgaeǁaes xa.—1 Korinteǁîn 13:4; Galateǁîn 5:26.

SATS A DĪ ǁKHĀ I:

• ǂGō re nē ǃhoaǀgauba xu, “Sa ǀoakhoen ge tita hoaǁae ra ǃgôaǁnâ” tamas ka io “Sa mamas ge tātsē tita ra dī xūn xa ǃgâibahe tama”

• Dītsâ re xūna sats ǃgame hâ khoe-i mûǂui ǀgaub ai mû sa

2 MÂǁAPO RE ǂHÂBASA I GA O

ELOBMÎS TA MÎS: “ǁNā-amagab ge khoeba ǁgûb tsî ǁgûs tsîra ǁnāxū tsî nî ǁîb di taras tawa ǂgā mâisen, o ra ge ǁî ǀgamra nî ǀgui ǁgan.” (Genesis 2:24) ǃGamets ga xawen ge sa îra noxoba nî tsâ ǁîn ge sa ǃereamsa tani hâ ti tsî sa ǃgameb ǃnâ ǂhâbasa i as xa ǃnāsase nî ǂgâ ǂgao.

Sats tsî sats ǃgame hâ khoe-e xū-i ge hâ mās kōse ro nî mā-amsa xawe ǀnamxa ǃnâ ǀgaub ai ǂanǂan re. ǃOa tsî harase ǃhoa re, ǂū-oǃnâ ǀgaub ais ose. (ǂKhoamîdi 15:1) ǃGamǃgamsens, tsamtsiǃnâsib tsî ǃnūǃnâsib ge nî huitsi ǃgâi hâǀgauba sa ǀaokhoen ǀkha omkhâi sa tsî “tanigu re ǀnami ǃnâ.”—Efeseǁîn 4:2.

SATS A DĪ ǁKHĀ I:

• Tsūbahets ga o sa ǀaokhoen kaise sa ǃgameb ǃnâ ǂgāsen hâsa, ots ge nēsa sats ǃgame hâ khoe-i ǀkha a ǃhoa ǁkhā.

• ǁNâuǃāgu tsî ǀguiǂâixa re mati ro ǃgâi ǀgaub ai hâ ga ǃgomsina a ǀamǀam ǁkhā ǀgausa