Khomai-aon Dîdi

Davib ge Psalmdi 61:8 ǃnâ ge mî, ǁîb Elob ǀonsa “ǀamose” nî koa di. ǁNāsa gere ǂâibasen ǁîb ǁō tidesa?

Ga-aob Davib ge harpsa ra ǀhuruse ra ǁnae.

Hî-i. Davib ge xoa i ge ge ama i.

ǂÂiǃgâ re nē vers tsî ǀnî hâ vers di ǃnâb ge xoa xūn xa: “Sa ǀonsa ta ge ǀamose nî koaǁnaeba ti nūsa ta ra tsēsa xu tsēs ǁga ûiǂuise.” “Kare tsi ta ge nî ti ǂgaob hoab ǀkha ǃKhū, ti Elotse tsî ta ge ǀamose sa ǀonsa nî kaikai.” “Sa ǀonsa ta ge nî gare ǀamosiba xu ǀamosib kōse.”—Psa. 61:8; 86:12; 145:1, 2.

Nē mîdeb ge xoa ob ge Daviba ge ǂâi tama hâ i tātsēb ǁō tide di. ǁÎb ge ge ǂan i Jehovab ge mîsa, khoen ǁoreb ǁōba nî ǃaromasa. Tsî Davib ge ge ǂanǃgâ ǁîb a ǁore-aosa. (Gen. 3:3, 17-19; Psa. 51:4, 5) ǁÎb ge ge ǂan i Elob xa ūǃoahe hâ aogu Abrahammi, Isaki tsî Jakob hagu tsîn ge ǁōsa. Tsîb ge Daviba ge ǂan i, ǁîb tsîn nî ǁōsa. (Psa. 37:25; 39:4) ǁÎb mîdi hîna Psalmdi 61:8 ǃnâ ra hō-e di ge ra ǁgau. Davib di turab tsî ǁkhoreb tsîn ge īsa Eloba ǀamosib kōse koasa.—2Sam. 7:12.

Davib ge ǀnî ǁaeb ai ǁîb ûib ǃnâb gere hōǃâ xūn xa gere xoa. Psalmdi 18, 51 tsî 52ǁî danaǃâdi ǃnâ i ra ǁgauhe khami. Psalmdi 23 ǃnâb ge Daviba Jehovaba ǃûi-aob hîna daoǁgauda, khoakhoada tsî ǁkhaubasa ra mādab ase ra ǁguiǃā. Davib ge ge ǁkha ǃûi-ao i. Tsîb ge Eloba ǁîb ‘ûi tsēdi hoade’ gere ǃoaba ǂgao.—Psa. 23:6.

ǂÂis ǃnâ ūhâ re, Jehovab ge Daviba xoab gere xūn hoana a daoǁgausa. ǁÎb gere xoa xūn ge kēbode ge ǃkhōǂga hâ i, hānîǁaeb ǃnâ nî ī xūn xa. Aiǁgauseb ge Daviba Psalmdi 110 ǃnâ ge xoa, ǁaeb hînab ǁîb ǃkhūba “Elob amǀkhab ai ǂnû” ǀhommi ǃnâ tsî kai ǀgaiba nî ǃkhōǃoasa. Tae-e nî dīse? Îb Elob khākhoen ǂama gaosîsen tsî “ǃhaodi ǁaegu ǀgoraǃgâ” ǃhūbaib ai. Davib di suriba xūb ge Jesuba Mesiab ase ge hā. Mesiab hîna ǀhomma xu nî ǂgaeǂgui tsî ‘ǀamose pristerse’ nî hâba. (Psa. 110:1-6) Jesub ge ge mî, kebos hîna Psalmdi 110 ǃnâ xoasas ǁîb xa hâsa tsî hanîǁaeb ǃnâ nî dīǀoaǀoahesa.—Mat. 22:41-45.

Îo, Jehovab ge Daviba ge daoǁgau, îb ǁîb ûi ǁaeb xa xoa. Tsî hānîǁaeb khâisab nî hōs xa. Tsîb Jehovaba ǀamose nî koa ǁkhāsa. Psalmdi 37:10, 11 tsî 29 ge Israelǁaes ǁaeb ǃnâ sîsen ǂgûiba ge ūhâ i. Tsî hānîǁaeb ǃnâs tsîna nî dīǀoaǀoahe ǃhūbaib ǂhawase. Elob ga ǁîb mîmâide a dīǀoaǀoa o. “Tita ǀkhats ge Paradais ǃnâ nî hâ” ti hâ ǁkhāǁkhāǃâs ǃnâ, 8ǁî xoaǀgarasa mû re.

Psalmdi 61:8 tsî ǀnî hâ vers di tsîn ge ra ǁgau. Davib ge Israeli ǃnâ Jehovaba gere koa ǂgaosa ǁōb nîs kōse. Nē vers di ge ra ǁgau Davib tae-e nî dīsa Jehovab ga khâisa a mābi o.