ǃKhaenaba xu ǂgōsen tsî ǃnâb ǃnâ hâhâ

1-2. (a) Pauluba mâ mâsib ǃnâ ge hâ i Efeseǁîna ǃoab ge xoa o tsî tae-i ǃaromab ge ǁîna ǃoa xoa? (b) Mâ dîde da nî ǃhoaǃgao?

ROMES ǃnâb ge oms tronkes ǃnâ ǂnôa ī, ob ge apostel Pauluba ǁîb ǀkha ge ǀguiba gere ǃoaba ǃgâsana gere ǂkhâǃnâ ǂgao. ǁÎnab ge sari ǁoa i amagab ge sîǂkhinide gere xoaba nî. Nē sîǂkhanidi ǀguisab ge 60, tamas ka io 61ǁî kuri Jesub ǃnaes khaoǃgâ Efeseǁîna ǃoa ge xoa.—Efe. 1:1; 4:1.

² Disi kuriga ǃkharu hâseb ge Pauluba ǁaeroba Efeses ǃnâ ge hâ i, ǁkhāǁkhā tsî ǃgâiǂhôasa ra aoǁnâse. (ǃNǃkh. 19:​1, 8-10; 20:​20, 21) ǁÎb ǃgâsanab ge kaise ge ǀnam i tsîb ge gere hui nî ǂgao în ǂgomǂgomsase Jehovab ǃoagu hâ. Xawe tae-i ǃaromab ge ǂkhauhesa Xristeǁîna ǃoa ǃkhaenab tsî ǃnâb xa xoa? Tae-en hoa Xristeǁîna a ǁkhāǁkhāsen ǁkhā Paulub ge xoa xūna xu? Hā re î da nē dîdi ǃereamde ǃhoaǃgao.

ǃKHAENABA XU ǃNÂBA ǃOA

3. Efeseǁîna ǃoab ge xoa sîǂkhinis ǃnâb ge Pauluba mâ ǁgauǁgaude sîsenū?

³ Paulub ge Efeseǁîna ǃoa ge xoa: “ǂGuro du ge ǃkhaenas khami ge ī-i, xawe du go nēsi a ǃKhūb ôa kai, o du ge ǃnâb khami ǀgui ī.” (Efe. 5:8) Paulub ge nēba ǁgauǁgaura ge sîsenu ǃkhaenab tsî ǃnâb tsîna, îb ǁguiǃā Efeseǁîn ǀkharaǀkharana nî dīsa. Hā re i da ǃhoaǃgao tae-i ǃaromab ge Pauluba mîsa Efeseǁîn ge “ǃkhaenab” ǃnâ hâ īsa.

4. Mâ ǀgaub ǃnân ge Efeseǁîna ama tama ǂgomdi di ǃkhaenab ǃnâ hâ i?

⁴ Ama tama ǂgomdi ǃkhaenab. Amaban ge ǁkhāǁkhāsen tsî Xristeǁî kais aiǃân ge, Efeseǁîn Paulub ge xoabana ǃgāsis ǃnâ ge ūhe hâ i ama tama ǂgomdi xa. Tsîn ge ǃgaidib ǃnâs tsîna gere ǂgom. Efeses ǃnâ i ge tempela ge hâ i Grike elos artemes ti ge ǀon hâ is ǃaroma. ǂGui khoen ǁnā ǁaeb ai ge ûi hâ în ge nē tempela ǀō-aisa tempeli ase gere mû. Hîna ge khoen ge kuru xūn hoan ǂam-ai ǀō-aisa iba. Khoen ge ǁnā tempela ǃoa gere ī în ama tama eloga sī ǃoaba. Khoen hîna ge nē eloga gere kurun ge kai mari-e gere hō ǁnā eloga kuru tsîn gere ǁamaxu o. (ǃNǃkh. 19:​23-27) ǂGui khoen Efeses ǃnâ gere hân tsîn ge gere ǃgaidī.—ǃNǃkh. 19:19.

5. Mâ ǀgaugu ǃnân ge Efeseǁîna ǃgâi tama ǁgoe-ugub ǃkhaenab dib ǃnâ hâ i?

⁵ ǃKhaenab ǃnâ ǃgâi tama ǁgoe-ugub ǃaroma. Efeseǁîn ge ge ǂansa i ǃgâi tama ǁgoe-ugu ǀgaun ǁîn din ǃaroma. Tsîn ge ge tao tama hâ i ǁîn di ǁgai tanisen ǀgaugu ǃaroma. ǀGoe tamas ka io ǁgai ǃhoa-ugu ǀgaub ge hoaǁae gere ǁnâuhe. ǁÎn di ǂgomdi ge ǁaxasiga ūhâ i ǃkhais tawa. (Efe. 5:3) ǂGui Efeseǁîn ge ‘ǂgaogu an ǃnâ ge karo’ hâ i. Nēs ge ra ǂâibasen ǁîn ge tsû-i xare-e tātsē ge hōǃâ tama hâ i. (Efe. 4:​17-19) Tae-i ama ǂhanu tamasan nî ǁkhāǁkhāsens aiǃân ge, Efeseǁîna ge ǁae tama hâ i ǂhanu tamas ka io ǃgâi xū-e dīsa. ǁÎn ge ǁae tama ge hâ i, ǁîn da dī xūn xa ǃaroma-e hâseb ge Jehovaba mati gere tsâsa. ǁNā-amagab ge Pauluba saorase ǁîn xa ge mî, “ǁÎn di ǂâidi ge a ǃkhae ǁîn di ǂgaogu di karosasib tsî ǁae tama īsib xa ǃaroma-e hâsen ge Eloba xu hâ ûiba xu a ǁaraǂuisa.”

6. Tae-i ǃaromab ge Pauluba mî Efeseǁîn ‘nēsi a ǃnâ’ di?

⁶ ǀNî Efeseǁîn ge ǃkhaenab ǃnâ ge hâ ǀgara tama hâ i. Paulub ge ge xoa: “Xawe du go nēsi a ǃKhūb ôa kai, o du ge ǃnâb khami ǀgui ī.” (Efe. 5:8) ǁÎn ge nēsi Jehovab mîs ǃoagu gere hâ, hîna ge ǁîna ǃnâb khami gere daoǁgausa. (Psa. 119:105) Efeseǁîn ge ǁîn di ama tama ǂgomdi tsî ǃgâi tama ǁgoe-ugu ǀgaugu tsîna ge ǁnāxu. ǁÎn ge nēsi ‘Eloba gere ǁgae’ tsî ǁîn di ǁkhāsib ǃnâ hâ i hoa-e gere dītsâ, în Jehovaba ǃoaba tsî ǁîba ǃgâina dī.—Efe. 5:1.

7. Sida mâsiba mâ ǀgaugu ǃnâ Efeseǁîn di mâsigu ǀkha a ǀgui?

⁷ ǁKhā ǀgaub ǃnâ da ge sida tsîna amaba da nî ǁkhāǁkhāsens aiǃâ ǃkhaenab ǃnâ ge hâ i. Ama tama ǂgomdi tsî ǃgâi tama ǁgoe-ugu ǀgauga ǃkhōǂgā hâse. ǀNî da ge ama tama ǂgomdi ǁaxasiga gere tsēdī. ǀNîn ge ǃgâi tama ǁgoe-ugu ǀgaugu ǃnâ ge ûi hâ i. Xawe da ge Jehovab di ǂhanuga ǁkhāǁkhāsen, o da ge tae-i a ǂhanu tsî tae-i ǂhanu tamasa ge mûǃā. ǀKharaǁkharana dī tsî da ge Jehovab da ǂhapa khami ge ûitsoatsoa. ǁNās xa ǃaroma-e hâse da ge ǃgâib ǀguiba ra ǀama. (Jes. 48:17) Xawe da ge nēsi ǃgomsirona ra hōǃâ. Hoaǁae i ge supu tama ǃgâb ai da go ǁnāxu ǃkhaenaba xu hâbē tsî “ǃnâb di ǀgôan ase ǃgû ǀgarasa.”

Image digitally reproduced with the permission of the Papyrology Collection, Graduate Library, University of Michigan, P.Mich.inv. 6238. Licensed under CC by 3.0

ǃKHAENABA XU ǂGŌSEN

8. Efeseǁîn 5:​3-5 ǃoagun Efeseǁîna taena xu ga hâbē hâ?

⁸ Khomai re Efeseǁîn 5:​3-5 sa. ǃKhaenaba xu hâbēs ǃaroman ge Efeseǁî Xristeǁîna aiǃgû tsî Jehovaba ǂkhîǂkhî tama xūna xu ga hâbē hâ. ǁNā i ge ǃgâi tama ǁgoe-ugu ǀgaugu ǀguiga ge ǃkhōǂgā tama hâ i xawe ǀurixase ǃhoas tsîna. Paulub ge Efeseǁîna ge ǂâiǂâiǃnâ în nē xūna xu hâbē, “Xristub tsî Elob Gaosib” ǃnân ga amǃnâxa ǂgao o.

9. Tae-i ǃaroma da ǃgâi tama ǁgoe-ugu ǀgaugu ǃnâ ǁhao kai da ǁkhā xūna xu nî ǂgōsen?

⁹ Sida tsîn ge aiǃgû tsî nî ǃkham i da tā “xū-e hārebe tama sîsengu ǃkhaenab digu” ǃnâ māǁnâsen. (Efe. 5:11) Ama as ge khoe-i ǃgâi tama ǁgoe-ugu ǀgauga kō tsî ǃgâ. Tsî ǁî-i xa ǃhoa o i ge a supu ǁkhā î-i ǁî-e tsūxu-e dī. (Gen. 3:6; Jak. 1:​14, 15) ǀGui ǃhūb ǃnâ i ge ǂgui “ǃgâsana” internets ǃnâ-ū ge ǁgam tsoatsoa. ǁGam tsoatsoan ge, on ge ǃnāsana Jehovab tsî amab xa gere ǃhoa. Xawe ǁaeb da ī khamin ge ǁgai xūna ge ǃhoa tsoatsoa. ǁÎn ge ǃnāsase ǁgoe-ugub xa ge ǁgam tsoatsoa. Nē ǃgâsan ge ge ǂanǃgâ ǃanuoǃnâ ǃhoa ǀgaub ge ǃaromasa în ǃgâi tama ǁgoe-ugu ǀgaugu ǃnâ ǁhao.

10. ǁGâuaba mati ra gaxaǃnâ da ǂgao? (Efeseǁîn 5:6)

¹⁰ ǁGâuab ǃhūbaib ge gaxaǃnâ da tsî ra ǂgom kai da, Jehovab ǀaib tsî ǃanuoǃnâsib xa ra mîn ǂhanu tamasa. (2Pet. 2:19) Nē i ge buru kai da tama. ǀGui xū-i ǁGâuab hoaǁae ra sîsenu-i ge khoena ǀkhomaxa kaisa, în tā aitsama ǂâibasen tae-i ǂhanu tsî a tsūs ǁaegu. (Jes. 5:20; 2Kor. 4:4) Buru kai da tama i ge hâ muvin tsî internets ǂhawegu ai hâ xūn, Jehovab ǂhanu-ai ǁgaraga ra ǃgûǂamsa. ǁGâuab ge ra ǂâi kai da ǂgao ǃanuoǃnâ xūn tsî ǃgâi tama ǁgoe-ugu ûiǀgaub, nētsē ǃnāsa khoen xa ra dīhen tsū tamasa. Tsîn ǁnā xūna ǁkhoaxa tsî a ǃnōrasa ǃkhaisa.—Khomai re Efeseǁîn 5:6 sa.

11. Angelas aiǁgausa mati ra ǁgau gā-ai daoǁgaus Efeseǁîn 5:7 sa da nî saosa? (Ai-īsib tsîna mû re.)

¹¹ ǁGâuab ge ra ǂhâba i da ǁnā khoen hîna Jehovaba ǁnâuǀnamsa ra ǃgom kaiba dan ǀkha hâ. ǁNā-amagab ge Pauluba Efeseǁîna ge mîba: Tā Jehovab mûǁae ǃgâi tama xūna ra dī “khoen ǀkha ǁaeǁaesen.” (Efe. 5:7) ǂÂis ǃnâ da ge nî ūhâ, hâ-ū da ra khoen xa da ga ǃhoa, o i ge internets ǃnâ-ū da ra ǃhoa-u khoen tsîna ǃkhōǂgā hâ. ǁNā ǁkhōǁkhōsasiban ge ǂgurogam Efeseǁîn tsîna gere hōǃâ. Angela,a ti ǀon hâ ǃgâsas Asiab ǃnâ ra hâs ge ge mûǂan, matikōse i internets ǂhawega a ǁkhōǁkhōsasa. ǁÎs ge ra mî: “Nēs ge ǃnuis hîna sa ǂâiǀgauba ǂkharirose ra ǀkharaǀkharas khami ī. ‘Ti ǀhōn’ Jehovab ǁgaraga ǃgôaǃgâ tama ǃkhais ge tita ge ǂhani ǀû tsî ta ge Jehovab ūǃoa tama ûiǀgauba ûis xa ge tsūbahe tama hâ i.” Xawe gu ge ǀhaohâb ǃûi-aoga Angelasa ge hui is ǀkharaǀkharana dī. ǁÎs ge ra mî: “Nēsi ta ge Jehovab tsî ǁîb ǂâiǀgaub ai ti ǂâisa ra ǂnûi, internets ǂhawegu ais ose.”

12. Tae-e a hui da ǁkhā î da Jehovab ǁgaraga ǃkhōǀgara?

¹² Nē ǃhūbaib di ǂâiǀgaub ǃoagu da ge nî ǃkham hîna ra ǁgauba ǃgâi tama ǁgoe-ugu ǀgaugu a ūǃoahe ǁkhā ti. Sida ge a ǂan nē-i a tsūsa. (Efe. 4:​19, 20) Dîsen ǁkhā da ge a: ‘ǁGutsâ i ta ra î ta tā sîsenǀhao-ū ta ra khoen, ti klas ǃnâ hâ khoen tamasa ka io ǀnî hâ khoen hîna Jehovab ti ǂhanu-ai ǁgaraga ǃgôaǃgâ taman ǀkha hâǀhao? ǁKhoaǂgaose ta Jehovab ǁgaraga ra ǃkhōǀgara khoen xa ta ga mîhe xawe?’ 2 Timoteub 2:​20-22 ra mî khami da ge ǀhōsana da ga ǀhaohâb ǃnâ ǁhûibasen o nî ǂanbasen. ǂÂis ǃnâ da ge nî ūhâ ǀnî ǀhōsan ge hui da tide, î da ǂgomǂgomsase Jehovab ǃoabas ǃnâ hâ ǀgara.

“ǃNÂB” DI ǀGÔAN ASE TANISEN

13. ‘ǃNâb ǀgôan’ ase ǃgû ǀgarasa tae-e ra ǂâibasen? (Efeseǁîn 5:​7-9)

¹³ Paulub ge Efeses Xristeǁî ǃgâsana ǂkhâǃnâs ǀguisa ge di tama hâ i în ǃkhaenaba xu hâbē. Xaweb ge aiǃgû tsî ge mîba nî în ‘ǃnâb di ǀgôan khami ǀgui ī.’ (Khomai re Efeseǁîn 5:​7-9 sa.) ǁNāsa tae-e ra ǂâibasen? ǀGuiǃgubuse ǁnās ge ra ǂâibasen î da hoaǁae ama Xristeǁîn ase tanisen. ǀGui ǀgaub ǁnāsa da a dī ǁkhāb ge ǂōrisase Elobmîsa khomai tsî Elobmîs ai ǃgaoǃgaosa ǂkhanin tsîna ǁkhāǁkhāsensa. Tsî i ge ǃnāsase a ǂhâǂhâsa î da Jesub di ǁkhāǁkhāde ǃgaoǃgâ. ǁÎb ge mā da aiǁgausa saos ǃnâ, ǁîb ‘ǃhūbaib di ǃnâba.’—Jhn. 8:12; ǂKhm. 6:23.

14. ǃAnu gagaba mati a hui da ǁkhā?

¹⁴ Elob ǃanu gagab huib tsîna da ge ǂhâhâ î da aiǃgû tsî ‘ǃnâb ǀgôan’ ase tanisen. Tae-i ǃaroma? ǃAnuse nē ǃhūbaib ǃnâ hâs supu tama amaga. (1Tes. 4:​3-5, 7, 8) ǃAnu gagab ge nî hui da î da tā ǃhūbaib di khoen khami ǂâi, hîna xūna Jehovab ra mû khami mû tama hâna. ǃAnu gagab tsîn ge a hui da ǁkhā î da “ǃgâisib, ǂhanu-aisib tsî ǂgomǃgâsib tsîna” ūhâ.—Efe. 5:9.

15. Mâ ǀgaugu ǃnâ da ǃanu gagaba a hō ǁkhā? (Efeseǁîn 5:​19, 20)

¹⁵ ǃAnu gagaba da ge ǀgores ǃnâ hō ǁkhā. Jesub ge ge mî Jehovab ge “ǃanu gagaba ǁnān ǂgān bi rana nî mā.” (Luk. 11:13) Jehovaba da ga ǀguiba sida di ǀhaodi tawa koa, os tsîna da ge ǁîb ǃanu gagaba ra hō. (Khomai re Efeseǁîn 5:​19, 20 sa.) ǃAnu gagab ge nî hui da Jehovaba ra ǂkhîǂkhî ǀgaub ǃnâ ûisa.

16. Tae-e nî hui da î da ǃgâi mîǁguiga dī? (Efeseǁîn 5:​10, 17)

¹⁶ ǂHâǂhâsa mîǁguiba da ga dī, o da ge nî ǁnâuǃā tae-i “ǃKhuba a ǃgâiba ǃkhaisa” tsî ôaǃnâde dī tsî ǁîn ǃoagu nî ûi. (Khomai re Efeseǁîn 5:10, 17 sa.) Elobmîs ǁgaragu sida mâsigu ǃoagu hâ ga da ga ǂanǂui, o da ge ǀnî mîdi ǃnâ Elob ǂâiǀgauba ra ôa. Tsî da ga nē ǁgaraga ûiǂui, o da ge ǃgâi mîǁguiga nî dī.

17. Mati da sida ǁaeba ǃgâi ǀgaub ǃnâ sîsenū ǁkhā? (Efeseǁîn 5:​15, 16) (Ai-īsib tsîna mû re.)

¹⁷ Paulub ge Efeses Xristeǁîn tsîna ge ǁnama în ǁîn ǁaeba ǃgâise sîsenū. (Khomai re Efeseǁîn 5:​15, 16 sa.) “ǂKhabab” tamas ka io sida khākhoeb ǁGâuab ge ra ǂhaba î da ǁnātikōse ǀhabe nē ǃhūbaib di xūn ǀkha. Î da tā ǁaeba ūhâ ǁkhā Elob ǃoabas ǃaroma. (1Jhn. 5:19) Xristeǁî-i ge supuse mari-i, ǀgapi ǁkhāǁkhāsens tamas ka io sîsenni ai ǁî-i ǂâisa ǂnûi ǁkhā. Tsî Jehovaba ǃoabasa ǀunigase mâi ǁkhā. ǁNā-e da ga dī, o i ge nî ǁgau mā-am da ra sa î-i sida ǂâiǀgauba nē ǃhūbaib di ǂâiǀgaub xa tsâǀkhāhe. Ama as ge nē xūn tsū tamasa xawen ge tā ǂguro ǃkhaisa sida di ûigu ǃnâ nî ū. ‘ǃNâb ǀgôan’ ase da ga ǃgû ǀgara, o da ge ‘sida di ǁaeba ǃgâise nî sîsenū’ tsî ama ǂhâǂhâsa xūn ai sida ǂâisa nî ǂnûi.

18. Donalda taena ge dī, îb ǁîb ǁaeba ǃgâise sîsenū?

¹⁸ ǀGauga ôa î du Jehovaba ǃnāsase ǃoaba ǁkhā. Donald ti Suid Afrikab ǃnâ ra hâb ge ra mî: “Ti ûib xa ta ge ge ǂâi tsî ǀaexase Jehovab ǃoa ge ǀgore, îb huite î ta aoǁnâ sîsenni ǃnâ ǃnāsa-e dī ǁkhā. ǀGore ta ge ge î ta sîsen-e hō hîna nî huite-e î ta ǃnāsa ǁaeba aoǁnâ sîsenni ǃnâ ǁhao ǁkhā. Jehovab huib ǀkha ta ge ǁnāti i sîsen-e ge hō. ǁNās ǀkham ge ti tara hâma Jehovaba ǀguiba ǀoasase ǃoabas ǀkha ge tsoatsoa.”

19. Mati da aiǃgû tsî ‘ǃnâb ǀgôan’ ase a ǃgû ǀgara ǁkhā?

¹⁹ Paulub ge Efeseǁîna ǃoa a xoa sîǂkhanis ge ge hui, în ǂgomǂgomsase Jehovab ǃoa-ai hâ. ǁNā daoǁgaus Jehovaba xu ra hās ge sida tsîna a hui ǁkhā. ǁKhāǁkhāsen da go khami i ge a hui da ǁkhā, mati da sida ǁkhoaxa ǁaeba ra ūhâs tsî ham-an ǀkha da ra hâǀhao ǀgaus tsîna. ǂKhâǃnâ da ǁkhā i ge a î da aiǃgû tsî Elobmîsa hoaǁae ǁkhāǁkhāsen. Î-i amab di ǃnâba sida aiǃgû tsî daoǁgau dī da ra xūn hoan ǃnâ. Tsî i ge ǃanu gagab di ǂhâǂhâsasib tsîna goro ǀgomǀgom ǃgaohe hîna hui da ǁkhāba î da ǃgâi ǀgauga ūhâ ǁkhā. Paulub ge xoa xūna da ga sîsenū, o da ge a hui-e ǁkhā ǃgâi mîǁguiga dīsa. Mîǁguigu hîna Jehovab ǂâiǀgaub ǀkha a ǀguiga. Nē xūna da ga dī, o da ge ǃkhaenaba xu nî hâbē tsî ǃnâb ǃnâ nî hâ ǀgara.